Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба Благовѣщенію Пресвятой Богородицы приводится въ соединеніи съ поліелейной службой блаж. Прокопію. Уставъ соединенія изложенъ въ Іюльской Минеѣ 1646 г.

Мѣ́сяца Іу́лія въ 8-й де́нь.
Слу́жба воспомина́нію зна́менія, я́вльшагося отъ ико́ны Пресвяты́я Влады́чицы на́шея Богоро́дицы, честна́го и сла́внаго Ея́ Благовѣ́щенія во гра́дѣ Вели́цѣмъ Устюзѣ.
И па́мять свята́го блаже́ннаго Проко́пія, Христа́ ра́ди юро́диваго, Устюжскаго чудотво́рца.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры Богородицы Благовѣ́щенія, гла́съ 6. Подо́бенъ: Все́ отло́жше.

Совѣ́тъ превѣ́чный* открыва́я Тебѣ́, Отрокови́це,* Гавріи́лъ предста́,* Тебе́ лобза́я и вѣща́я:* ра́дуйся, земле́ ненасѣ́янная;* ра́дуйся, купино́ неопали́мая;* ра́дуйся, глубино́ неудобозри́мая;* ра́дуйся, мо́сте, къ небесе́мъ преводя́й,* и лѣ́ствице высо́кая, ю́же Іа́ковъ ви́дѣ;* ра́дуйся, боже́ственная ста́мно ма́нны;* ра́дуйся, разрѣше́ніе кля́твы;* ра́дуйся, Ада́мово воззва́ніе:* съ Тобо́ю Госпо́дь. [Два́жды]

Явля́ешися мнѣ́ я́ко человѣ́къ, —* глаго́летъ нетлѣ́нная Отрокови́ца ко архистрати́гу, —* и ка́ко вѣща́еши глаго́лы па́че человѣ́ка?* Со Мно́ю бо, ре́клъ еси́, Бо́гу бы́ти,* и всели́тися во утро́бу Мою́.* И ка́ко бу́ду, глаго́ли Ми́,* вмѣсти́лище простра́нное* и мѣ́сто свяще́нія,* херуви́мы превосходя́щаго?* Да не прелсти́ши мене́ ле́стію,* не позна́хъ бо сла́сти,* бра́ку е́смь неприча́стна,* ка́ко у́бо Отроча́ рожду́?

Бо́гъ, идѣ́же хо́щетъ,* побѣжда́ется естества́ чи́нъ, —* глаго́летъ безпло́тный, —* и я́же па́че человѣ́ка содѣва́ются,* мои́мъ вѣ́руй и́стиннымъ глаго́ломъ,* Всесвята́я Пренепоро́чная. —* Она́ же возопи́:* бу́ди Мнѣ́ ны́нѣ по глаго́лу твоему́,* и рожду́ Безпло́тнаго,* пло́ть отъ Мене́ заи́мствовавшаго,* я́ко да возведе́тъ человѣ́ка,* я́ко еди́нъ Си́ленъ,* въ пе́рвое достоя́ніе, съ растворе́ніемъ.

Ины стихи́ры, свята́го пра́веднаго Проко́пія, гла́съ 8. Подо́бенъ: О, пресла́внаго чудесе́!

Блаже́нне Проко́піе богому́дре,* чи́стая твоя́ душа́* правовѣ́рнымъ смы́сломъ сія́ющи,* облиста́ющи добродѣ́телей свѣтлостьми́,* озаря́етъ вѣ́рныхъ исполне́ніе,* бѣсо́вскую тму́ отгоня́щи,* тѣ́мже, я́ко прича́стника тя́* невече́рнѣй благода́ти,* ублажа́емъ благоче́стно вси́, досточу́дне. [Два́жды.]

Имѣ́я ду́шу ми́лостивну,* и чи́стъ по́мыслъ, и се́рдце бо́дро,* вѣ́ру небла́знену и любо́вь вои́стинну нелицемѣ́рну,* отъ земли́ преста́вился еси́ къ небе́снымъ* и съ ли́ки пра́ведныхъ водворя́ешися.* Тѣ́мже тя́ почита́емъ свяще́нными пѣ́сньми* и благоче́стно вси́ сла́вимъ,* досточу́дне Проко́піе.

Боже́ственными уче́ніи укрѣпля́яся,* стра́сти плотскíя отъ души́ отгна́лъ еси́* и Святѣ́й Тро́ицѣ селе́ніе преочище́нное бы́лъ еси́.* Тѣ́мъ къ боже́ственнѣй жи́зни преста́вился еси́,* Бо́гу, соблюда́ющу ны́нѣ невреди́мо* твое́ блаже́нное тѣ́ло,* Боже́ственнымъ судо́мъ, и́мже Са́мъ вѣ́сть,* прославля́яй тя́ я́вѣ, Проко́піе. [Два́жды.]

Сла́ва, гла́съ 1:

Яко тече́ніе до́брѣ сконча́вшему, и вѣ́ру соблю́дшему непоро́чну, и враги́ безпло́тныя терпѣ́ніемъ свои́мъ попра́вшему, возложи́ся на честны́й тво́й ве́рхъ побѣ́ды вѣне́цъ пресвѣ́телъ отъ руки́ Вседержи́теля Бо́га, Его́же ра́ди мíръ и я́же въ не́мъ су́етства преоби́дѣлъ еси́. Тѣ́мъ и свята́я твоя́ чи́стая душа́ на небеса́ востече́, ра́дующися, пра́ведныхъ же ли́цы срѣто́ша тя́, веселя́щеся, и небе́сная селе́нія свѣ́тло воспрія́ша; блаже́нное же и честно́е тѣ́ло твое́ на земли́ пребыва́етъ нетлѣ́нно, вѣ́рнымъ подава́я исцѣле́ніе. Тѣ́мже вѣ́рою пра́вою и те́плымъ жела́ніемъ, свято́му твоему́ гро́бу припа́дающе, богому́дре Проко́піе, про́симъ испроси́ти у Христа́ Бо́га на́шего гра́ду твоему́ непоколеби́му и безмяте́жну пребы́ти отъ навѣ́тъ вра́жіихъ и пога́нскаго наше́ствія, Правовѣ́рному Импера́тору на́шему держа́вы и побѣ́ды на враги́, умире́нія мíру и спасе́нія душа́мъ на́шимъ.

И ны́нѣ, Благовѣ́щенія, гла́съ 6:

По́сланъ бы́сть съ небесе́ Гавріи́лъ арха́нгелъ, благовѣсти́ти Дѣ́вѣ зача́тіе и, прише́дъ въ Назаре́тъ, помышля́ше въ себѣ́, чудеси́ удивля́яся: О, ка́ко, въ вы́шнихъ непостижи́мь Сы́й отъ Дѣ́вы ражда́ется! имѣ́яй престо́лъ не́бо и подно́жіе зе́млю, во утро́бу вмѣща́ется Дѣ́вичу! на Него́же шестокрила́тіи и многоочи́тіи зрѣ́ти не мо́гутъ, сло́вомъ еди́нѣмъ отъ Сея́ воплоти́тися благоизво́ли. Бо́жіе е́сть Сло́во настоя́щее. Что́ у́бо стою́, и не глаго́лю Дѣ́вѣ: ра́дуйся, Благода́тная, Госпо́дь съ Тобо́ю; ра́дуйся, Чи́стая Дѣ́во; ра́дуйся Невѣ́сто неневѣ́стная; ра́дуйся, Ма́ти Живота́, благослове́нъ пло́дъ чре́ва Твоего́!

Вхо́дъ. Свѣ́те Ти́хій... Проки́менъ дне́, и чте́нія три́: Благовѣ́щенія двѣ́ и преподо́бному еди́на.

Исхо́да чте́ніе. [Глава́ 3.]

Вни́де Моисе́й въ го́ру Бо́жію Хори́въ. Яви́ же ся ему́ Ангелъ Госпо́день въ пла́мени о́гненнѣ изъ купины́. И ви́дѣ, я́ко купина́ горя́ше огне́мъ, и купина́ не сгара́ше. Рече́ же Моисе́й: преше́дъ, узрю́ видѣ́ніе вели́кое сіе́, что́ я́ко не сгара́етъ купина́? Якоже ви́дѣ Госпо́дь, я́ко приступа́етъ ви́дѣти, призва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть? И рече́: не прибли́жися сѣ́мо; изу́й сапо́гъ отъ ногу́ твое́ю: мѣ́сто бо, на не́мже ты́ стои́ши, земля́ свята́ е́сть. И рече́ ему́: Азъ е́смь Бо́гъ отца́ твоего́, Бо́гъ Авраа́мовъ, и Бо́гъ Исаа́ковъ, и Бо́гъ Іа́ковль. Отврати́ же Моисе́й лице́ свое́: стыдя́ше бо ся зрѣ́ти предъ Бо́гомъ. Рече́ же Госпо́дь къ Моисе́ю: ви́дя, ви́дѣхъ озлобле́ніе люде́й Мои́хъ, и́же во Еги́птѣ, и во́пль и́хъ услы́шахъ отъ наси́льствующихъ въ дѣ́лѣхъ, вѣ́мъ бо болѣ́знь и́хъ, и снидо́хъ, е́же изъя́ты и́хъ отъ руки́ еги́птянъ, и извести́ и́хъ отъ земли́ о́ныя, и ввести́ и́хъ въ зе́млю бла́гу и мно́гу, въ зе́млю, точа́щу ме́дъ и млеко́.

При́тчей чте́ніе. [Глава́ 8.]

Госпо́дь созда́ мя нача́ло путе́й Свои́хъ въ дѣла́ Своя́. Пре́жде вѣ́къ основа́ мя въ нача́лѣ, пре́жде, не́же зе́млю сотвори́ти, и пре́жде, не́же бе́здны содѣ́лати, пре́жде, не́же произы́ти исто́чникомъ во́днымъ, пре́жде, не́же гора́мъ водрузи́тся, пре́жде же всѣ́хъ холмо́въ ражда́етъ мя́. Госпо́дь сотвори́ страны́, и пусты́ни, и концы́, населе́ны подъ небесе́мъ. Егда́ гото́вяше не́бо, съ Ни́мъ бѣ́хъ, и егда́ отлуча́ше Себѣ́ престо́лъ на вѣ́трѣхъ, егда́ крѣ́пки творя́ше вы́шнія о́блаки и я́ко тве́рды полага́ше исто́чники поднебе́сныя. Внегда́ полага́ти мо́рю предѣ́лъ его́, и во́ды не ми́мо и́дутъ у́стъ Его́, и крѣ́пки творя́ше основа́нія земли́, бѣ́хъ къ Нему́ подо́бна. Азъ бѣ́хъ, о не́йже ра́довашеся: по вся́ же дни́ веселя́хся предъ лице́мъ Его́ на вся́ко вре́мя.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Юро́дствомъ прему́дрости дости́гъ глубину́, преблаже́нне, и ра́йская селе́нія наслѣ́дивъ, и ны́нѣ веселя́ся съ ли́ки пра́ведныхъ, и че́сти зря́ Влады́чнія добро́ты, и со а́нгелы предстоя́ Святѣ́й Тро́ицѣ, помина́й, блаже́нне, всегда́ чту́щія па́мять твою́.

Тѣ́снымъ ше́ствовавъ путе́мъ, дости́глъ еси́ ра́йскія широты́, ны́нѣ же изря́днѣ наслажда́яся небе́сныя пи́щи, и вѣнце́мъ страда́нія вѣнча́лся еси́ отъ руки́ Вседержи́телевы. Его́же ны́нѣ моли́, блаже́нне Проко́піе, о е́же сохрани́тся гра́ду твоему́ отъ вра́гъ ненавѣ́тну и душа́мъ на́шимъ дарова́ти ве́лію ми́лость.

Ле́гкостію кри́лъ прелетѣ́въ отъ многомяту́щаго и треволнова́тельнаго мíра и внѣ́ бу́рнаго приста́нища дости́гъ, заступа́я отъ напа́стей вся́ призыва́ющія тя́ вѣ́рно, покрыва́й, преблаже́нне, и на́съ, прите́кшихъ въ хра́мъ тво́й. О, преблаже́нне Проко́піе, спаси́ ста́до твое́ моли́твами твои́ми ко Го́споду.

Яко со́лнце свѣтоза́рно, добродѣ́тельнаго ра́ди житія́ твоего́ повсю́ду просія́лъ еси́. Хра́му у́бо, идѣ́же лежа́тъ честны́я твоя́ мо́щи, я́коже ца́рскую иму́щу у́тварь, гра́ду же, у́бо всю́ду, я́ко трубѣ́, велегла́сно вопію́щу и хва́лящуся, имѣ́ющу въ себѣ́ процвѣ́тша чуде́съ исто́чника неисчерпа́емаго и изоби́льно всѣ́мъ подава́юща бога́тно дарова́нія чуде́съ. О, преблаже́нне и чудоно́сче Проко́піе, испроси́ моли́твами твои́ми у Христа́ Бо́га, е́же дарова́ти Импера́тору на́шему [и́мярекъ] посо́біе на ва́рвары и и́же твое́ пра́зднество творя́щимъ че́стно, очище́ніе и спасе́ніе душа́мъ на́шимъ.

Сла́ва, гла́съ 8:

Добродѣ́телей твои́хъ, богому́дре, исправле́нія уясни́ша вѣ́рныхъ сердца́: кто́ бо, слы́шавъ безмѣ́рное твое́ смире́ніе и терпѣ́ніе, не удиви́тся? е́же ко всѣ́мъ кро́тость и беззло́біе, къ скорбя́щимъ ми́лованіе и къ су́щимъ въ бѣда́хъ ско́рое поможе́ніе, въ пу́ть ше́ствующимъ благо́е поспѣше́ніе и къ пла́вающимъ немяте́жное приста́нище. Вся́ боголѣ́пно предвари́, досточу́дне Проко́піе, и ны́нѣ неувяда́емымъ одѣ́явся вѣнце́мъ отъ руки́ Вседержи́теля Бо́га, Его́же моли́ спасти́ся душа́мъ на́шимъ.

И ны́нѣ, Благовѣ́щенія, гла́съ 8:

Да веселя́тся небеса́, и ра́дуется земля́, и́бо Отцу́ Соприсносу́щный, Собезнача́льный и Сопресто́льный, щедро́тство пріе́мъ и человѣколю́бную ми́лость, Себе́ поста́ви во истоща́ніе благоволе́ніемъ и совѣ́томъ Отчимъ и во утро́бу всели́ся Дѣви́чу, предочище́нную Ду́хомъ. О, чудесе́! Бо́гъ въ человѣ́цѣхъ, Невмѣсти́мый въ ложесна́хъ, Безлѣ́тный въ лѣ́то, и е́же пресла́внѣе, я́ко и зача́тіе безсѣ́менно, и истоща́ніе несказа́нно, и та́инство ели́ко. Бо́гъ бо истощава́ется, и воплоща́ется, и зи́ждется, а́нгелу къ Чи́стѣй зача́тіе глаго́лавшу: ра́дуйся, Обра́дованная, Госпо́дь съ Тобо́ю, имѣ́яй ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще* Ду́ха Пресвята́го,* прему́дре Проко́піе, бы́лъ еси́.* Тѣ́мже и на́съ до́мы Того́ содѣ́лай,* святу́ю твою́ па́мять почита́ющихъ.

Сти́хъ: Возвесели́тся пра́ведникъ о Го́сподѣ* и упова́етъ на Него́.

Житіе́ твое́, я́ко со́лнце* въ сердца́ вѣ́рныхъ возсія́,* чуде́съ зарю́ испуща́я,* тѣ́мже и на́съ свѣ́томъ невече́рнимъ озари́,* всечестну́ю твою́ па́мять почита́ющихъ.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Не преста́й моля́ся, Проко́піе,* о при́сныхъ твои́хъ рабѣ́хъ,* и́хже духо́внымъ твои́мъ житіе́мъ просвѣти́лъ еси́,* да вси́ честно́е твое́ успе́ніе,* веселя́щеся, почита́емъ.

Сла́ва, гла́съ то́йже. Самогла́сенъ:

Свѣ́томъ разу́мнымъ отъ Бо́га просвѣще́нъ, мірска́го пристра́стія отбѣ́глъ еси́, бу́йство Христа́ ра́ди стяжа́въ, тѣ́мъ гра́да на́шего Устюга засту́пникъ бы́въ, въ не́мже чи́стымъ и непоро́чнымъ житіе́мъ Го́сподеви угоди́лъ еси́ и мно́гія лю́ди удиви́лъ еси́ чудесы́, богоблаже́нне Проко́піе. Но и ны́нѣ имѣ́я дерзнове́ніе ко Влады́цѣ всѣ́хъ Христу́ Бо́гу, моли́ о вѣ́рою творя́щихъ всечестну́ю па́мять твою́ и притека́ющихъ со усе́рдіемъ къ чудотво́рному гро́бу твоему́, изба́вится страсте́й, душе́вныхъ же вку́пѣ и тѣле́сныхъ, и вся́кихъ бѣ́дъ и скорбе́й и спасти́ся душа́мъ на́шимъ.

И ны́нѣ, Благовѣ́щенія, гла́съ то́йже:

Благовѣству́етъ Гавріи́лъ Благода́тнѣй дне́сь: ра́дуйся, неневѣ́стная Ма́ти и неискусобра́чная! Не удивля́йся стра́нному моему́ зра́ку, ни ужаса́йся, арха́нгелъ бо е́смь. Змíй прелсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.

Тропа́рь, гла́съ 4:

Просвѣти́вся Боже́ственною благода́тію, богому́дре, и ве́сь ра́зумъ въ се́рдцы отъ су́етнаго мíра сего́ къ Зижди́телю неукло́нно возложи́лъ еси́ цѣлому́дріемъ и мно́гимъ терпѣ́ніемъ, во вре́меннѣй жи́зни тече́ніе до́брѣ сконча́въ и вѣ́ру соблю́лъ еси́ непоро́чну. Тѣ́мже и по сме́рти яви́ся свѣ́тлость житія́ твоего́: источа́еши бо чудесе́мъ исто́чникъ неисчерпа́емый вѣ́рою притека́ющимъ ко свято́му твоему́ гро́бу, Проко́піе всеблаже́нне, моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, Благовѣ́щенія, гла́съ то́йже:

Дне́сь спасе́нія на́шего глави́зна и е́же отъ вѣ́ка та́инства явле́ніе: Сы́нъ Бо́жій Сы́нъ Дѣ́вы быва́етъ, и Гавріи́лъ благода́ть благовѣству́етъ. Тѣ́мже и мы́ съ ни́мъ Богоро́дицѣ возопіи́мъ: ра́дуйся, Благода́тная, Госпо́дь съ Тобо́ю.

Или́ тропа́рь зна́менія, гла́съ то́йже:

Всепѣ́тая и Всесла́вная Цари́це Богоро́дице, Ма́ти всея́ тва́ри Содѣ́теля, христіа́нская наде́ждо и засту́пнице, печа́льнымъ утѣше́ніе, ненадѣ́ющимся и отча́явшимся ско́рое надѣ́яніе, мо́лимъ Тя́: ми́лостива бу́ди на́мъ, грѣ́шнымъ, не оста́ви ра́бъ Твои́хъ и не отри́ни моле́нія недосто́йныхъ. Мо́лимъ Ти ся, взира́юще ко о́бразу Твоему́ честно́му святы́я и чудотво́рныя ико́ны Твоея́ и вопію́ще: съ пла́вающими и пу́ть ше́ствующими, да пребу́детъ ми́лость Твоя́. О Влады́чице, ри́зою честно́ю защити́, и во вся́цѣхъ мѣ́стѣхъ злы́хъ соблюди́, и моли́ся къ ро́ждшемуся изъ Тебе́ Христу́ Бо́гу на́шему, да спасе́тъ отъ грѣ́хъ ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 8:

Отъ ю́ности, я́ко свѣти́льникъ, возсія́лъ еси́, блаже́нне, зѣ́льнымъ воздержа́ніемъ, умертви́лъ еси́ плотска́я взыгра́нія, тѣ́мъ и на высоту́ восте́клъ еси́ богоразу́мія, пресла́вне, пожи́въ въ мíрѣ богоуго́дно, посрами́лъ еси́ бѣсо́вская ополче́нія, Проко́піе всеблаже́нне. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, Благовѣ́щенія, гла́съ 1. Подо́бенъ: Гро́бъ Тво́й.

Вели́кій воево́да невеще́ственныхъ а́нгелъ, во гра́дъ Назаре́тъ предста́въ, Царя́ возвѣща́етъ Тебѣ́, Пречи́стая, вѣко́въ и Го́спода, ра́дуйся, — глаго́ля Тебѣ́, — благослове́нная Марíе, непости́жимое и несказа́нное чу́до, человѣ́ковъ обновле́ніе.

По 2-й стихоло́гіи сѣда́ленъ, гла́съ 4:

Бы́лъ еси́ бездо́менъ на земли́, богому́дре Проко́піе, вся́ко озлобле́ніе претерпѣва́я, до́брыя дѣ́тели, я́коже ѳиміа́мъ благово́ненъ и же́ртву благопрія́тну, Бо́гу прине́слъ еси́. Тѣ́мъ ны́нѣ на небеси́ дерзнове́ніе стяжа́въ къ Нему́, моли́ дарова́ти согрѣше́ній очище́ніе вѣ́рою хва́лящимъ святу́ю па́мять твою́. [Два́жды.]

Сла́ва, и ны́нѣ, Благовѣ́щенія, гла́съ 3. Подо́бенъ: Красотѣ́ дѣ́вства.

Дне́сь вся́ тва́рь ра́дуется, я́ко — е́же ра́дуйся, — Тебѣ́ глаго́летъ арха́нгелъ, благослове́нная, честна́я и пречи́стая Ма́ти Христа́ Бо́га. Дне́сь омрача́ется зміи́но шата́ніе, кля́твы бо пра́отчи разрѣша́ется сою́зъ. Тѣ́мже и непреста́нно вопіе́мъ Ти́: ра́дуйся, Обра́дованная.

По поліеле́и сѣда́ленъ, гла́съ 8:

Яко врача́ прему́дра и уго́дника Госпо́дня благопрія́тна, къ чудоно́сному твоему́ гро́бу прикаса́ющеся, богому́дре, соше́дшеся любо́вію и вѣ́рою, во псалмѣ́хъ и пѣ́ніихъ возра́дуемся, сла́вяще Христа́, такову́ю благода́ть тебѣ́ дарова́вшаго исцѣле́ній, Проко́піе всеблаже́нне. Моли́ Христа́ Бо́га согрѣше́ній оставле́ніе дарова́ти вѣ́рою и любо́вію пра́зднующимъ всечестну́ю па́мять твою́. [Два́жды.]

Сла́ва, и ны́нѣ, Благовѣ́щенія, гла́съ то́йже:

Сло́во Отчее на зе́млю сни́де, и а́нгелъ свѣ́телъ Богоро́дицѣ глаго́лаше: ра́дуйся, Благослове́нная, Яже черто́гъ еди́на сохра́ншая, зача́тіе пріе́мши Превѣ́чнаго Бо́га и Го́спода, да отъ пре́лести, я́ко Бо́гъ, спасе́тъ ро́дъ человѣ́ческій.

Степе́нна, 1-й антифо́нъ 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Человѣ́че Бо́жій, вѣ́рный ра́бе, уго́дниче Христо́въ, соверши́телю Того́ боже́ственныхъ повелѣ́ній, му́же ди́вный въ чудесѣ́хъ, сто́лпе и утвержде́ніе гра́да на́шего, Ца́рствія небе́снаго наслѣ́дниче, богоблаже́нне Проко́піе, дерзнове́ніе имѣ́я ко Христу́ Бо́гу, не преста́й моли́тися о душа́хъ на́шихъ.

Кано́нъ Благовѣ́щенія со ирмосо́мъ на 6 и свята́го на 8.

Кано́нъ Богоро́дицы, творе́ніе ки́ръ Ѳеофа́на, его́же краегране́сіе по алфави́ту до 8-й пѣ́сни. Гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да пое́тъ Тебѣ́, Влады́чице, движа́ свирѣ́ль духо́вную, Дави́дъ, пра́отецъ Тво́й: послу́шай, Дщи́, ра́дованнаго гла́са отъ а́нгела, ра́дость бо возвѣща́етъ Тебѣ́ неизглаго́ланную.

[Ангелъ:] Вопію́ Тебѣ́, веселя́ся, приклони́ у́хо Твое́, и вонми́ ми́, Бо́жіе возвѣща́ющу безсѣ́менное зача́тіе, обрѣла́ бо еси́ благода́ть предъ Бо́гомъ, ея́же никогда́же обрѣ́те друга́я, Всечи́стая.

[Богоро́дица:] Да разумѣ́ю, а́нгеле, твои́хъ глаго́лъ си́лу, ка́ко бу́детъ, е́же ре́клъ еси́, глаго́ли я́вственнѣйше? Ка́ко зачну́, Дѣ́ва су́щи, Отрокови́ца? ка́ко же и Ма́ти бу́ду Зижди́теля Моего́?

[Ангелъ:] Ле́стно мя́ вѣща́ти помышля́еши, я́ко мню́, и ра́дуюся, зря́ Твое́ утвержде́ніе. Дерза́й, Влады́чице, Бо́гу бо хотя́щу, удо́бь сконча́ются и пресла́вная.

Кано́нъ свята́го Проко́пія, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Высоко́ житіе́ имѣ́я и восхожде́ніи боже́ственными ве́сь свѣ́телъ бы́въ, просвѣще́ніе ми́ испроси́, похваля́ющу честны́я твоя́ по́двиги, и́миже до́брѣ пожи́въ, получи́лъ еси́, и́хже надѣ́ялся еси́, блаже́нне Проко́піе.

Мѵроуха́нная любя́ уче́нія и во чте́ніи Святы́хъ Писа́ній упражня́яся, сласте́й уклони́лся еси́, блаже́нне, смра́дныхъ и безче́стныхъ и облагово́нился еси́, Боже́ственными дарова́ньми удобря́яся.

Дрема́ніе вѣ́ждома отъ души́, блаже́нне, отгна́лъ еси́, бдя́ и Бо́гу пріединѣва́яся всено́щными стоя́ніи, непрекло́ненъ ну́ждами есте́ственными, тѣ́мже ко дню́ невече́рнему прише́лъ еси́.

Богоро́диченъ: Яко черто́гъ одушевле́нный Бо́жій и кади́льницу разу́мнаго и свѣтоно́снаго Угля, приснора́дованную блажи́мъ Богоро́дицу, зову́ще: ра́дуйся, Хода́таице спасе́ннаго воззва́нія.

Катава́сія Благовѣ́щенія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

[Богоро́дица:] Оскудѣ́ кня́зь отъ Іу́ды, вре́мя наста́ про́чее, въ не́же яви́тся язы́ковъ наде́жда, Христо́съ; ты́ же, ка́ко Сего́ рожду́, Дѣ́ва су́щи, скажи́?

[Ангелъ:] Ищеши отъ мене́ увѣ́дѣти, Дѣ́во, о́бразъ зача́тія Твоего́, но то́й несказа́ненъ е́сть: Ду́хъ же Святы́й, зижди́тельною си́лою осѣни́въ Тя́, соверши́тъ.

[Богоро́дица:] Моя́ прама́ти, пріе́мши ра́зумъ зміи́нъ, пи́щи Боже́ственныя изгна́на бы́сть, тѣ́мже и Азъ бою́ся цѣлова́нія стра́ннаго твоего́, стыдя́щися поползнове́нія.

[Ангелъ:] Бо́жій предста́тель, по́сланъ е́смь боже́ственный повѣ́дати Тебѣ́ совѣ́тъ. Что́ мене́ бои́шися, Всенепоро́чная, па́че Тебе́ боя́щагося? Что́ благоговѣ́еши мнѣ́, Влады́чице, Тебѣ́ че́стно благоговѣ́ющему?

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Глаго́ломъ живото́чнымъ внима́я, испи́лъ еси́ во́ду спасе́нія, возгнуша́вся го́рькаго грѣха́, и, поя́, глаго́лалъ еси́ Бо́гу, Проко́піе, я́ко нѣ́сть свя́тъ, па́че Тебе́, Го́споди.

Ми́лованіе стяжа́лъ еси́ христоподо́бно, разда́лъ еси́ бога́тство тре́бующимъ, небе́сное бога́тство, хода́тайствующее тебѣ́, его́же и получи́лъ еси́, вопія́, Проко́піе: я́ко нѣ́сть свя́тъ, па́че Тебе́, Го́споди.

Присво́ився Зижди́телю любо́вію боже́ственною, прія́лъ еси́ небе́сное наслѣ́діе. Дре́ва живо́тнаго получи́ти сподо́бился еси́, блаже́нне, боготворе́ніемъ обожа́яся и поя́, сла́вне, я́ко нѣ́сть свя́тъ, па́че Тебе́, Го́споди.

Богоро́диченъ: Су́щи а́нгелъ святѣ́йши, Зижди́теля а́нгеловъ во Твою́ боку́ носи́ла еси́ и родила́ еси́, Богома́ти, на избавле́ніе человѣ́комъ, пою́щимъ Ти́, я́ко нѣ́сть пречи́сты, ра́звѣ Тебе́, Влады́чице.

Конда́къ Благовѣ́щенія, гла́съ 8. Самогла́сенъ:

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́, раби́ Твои́, Богоро́дице, но, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: ра́дуйся, Невѣ́сто неневѣ́стная.

Икосъ:

Ангелъ предста́тель съ небесе́ по́сланъ бы́сть рещи́ Богоро́дицѣ: радуйся! и, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся, глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.

Сѣда́ленъ свята́го, гла́съ 4:

Благоволи́въ благи́ми дѣя́ніи, искуси́лся еси́, я́ко зла́то въ пещи́, напа́стьми, Проко́піе сла́вне. Тѣ́мже и по сме́рти источа́еши чудеса́ бога́тно, я́ко во́ды, неду́ги уставля́еши, о на́съ при́сно моли́ся, я́ко да согрѣше́ній проще́ніе пріи́мемъ. [Два́жды.]

Сла́ва, и ны́нѣ, Благовѣ́щенія, гла́съ то́йже. Подо́бенъ: Удиви́ся Іо́сифъ.

По́сланъ бы́сть Гавріи́лъ къ Дѣ́вѣ Марíи и возвѣсти́ Ей неизглаго́ланную ра́дость, я́ко безсѣ́менно зачне́тъ и не истлѣ́етъ: Роди́ши бо Сы́на, Превѣ́чнаго Бо́га, и спасе́тъ лю́ди Своя́ отъ грѣ́хъ и́хъ; и свидѣ́тельствуетъ Посла́вый мя́ вопи́ти Тебѣ́ благослове́нная, е́же ра́дуйся, Дѣ́ва роди́ши, и по рождествѣ́ па́ки пребу́деши Дѣ́ва.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

[Богоро́дица:] Свяще́нную нѣ́кую Дѣ́ву ражда́ющую слы́шахъ проро́ка, дре́вле Емману́ила проре́кша; хощу́ же разумѣ́ти, ка́ко Божества́ растворе́ніе, естество́ человѣ́ческое претерпи́тъ?

[Ангелъ:] Яви́ла е́сть купина́, неопа́льна пребы́вши, пріе́мши пла́мень, обра́дованная Всепѣ́тая, на Тебѣ́ та́инства пресла́вное: по рождествѣ́ бо пребу́деши Чи́стая Приснодѣ́ва.

[Богоро́дица:] Освѣща́емь сія́ніемъ Бо́га Вседержи́теля, и́стины проповѣ́дниче, глаго́ли, Гавріи́ле, и́стиннѣйшая: ка́ко, нетлѣ́ннѣ бы́вши чистотѣ́ Мое́й, Сло́ва рожду́, съ пло́тію Безпло́тнаго?

[Ангелъ:] Со стра́хомъ Тебѣ́, я́ко ра́бъ Госпоже́, предстою́, съ боя́знію, Отрокови́це, ны́нѣ смотри́ти стыжду́ся Тебе́, я́ко бо до́ждь на руно́, сни́детъ на Тя́ Сло́во Отчее, я́ко благоволи́.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Повелѣ́нія оте́ческая храня́ невреди́мо, правовѣ́рнымъ смы́сломъ, ты́ отъ ю́ности имѣ́лъ еси́ житіе́ чи́сто и ми́лостивенъ нра́въ, досточу́дне.

Ни смуще́ніе мірско́е, ни вла́сти держа́ніе, ни сла́ва вре́менная твоего́ къ Бо́гу раче́нія, Проко́піе, преврати́, но благоволи́лъ еси́ вои́стинну боже́ственнымъ дѣя́ніемъ.

Возне́сся боже́ственными поуче́ніи вы́ну, врага́ смири́лъ еси́, исцѣле́нія дѣ́тель прія́лъ еси́, Проко́піе, судо́мъ пра́веднымъ вся́ческая Пра́вящаго.

Богоро́диченъ: Препѣ́тая, во́инствы горѣ́ препѣ́таго Бо́га родила́ еси́, Человѣ́ка вои́стинну бы́вша, Его́же за рабы́ Твоя́ моля́щи не преста́й, Приснодѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

[Богоро́дица:] Разумѣ́ти не могу́ Твои́хъ слове́съ извѣ́стія: чудеса́ бо бы́ша мно́жицею, Боже́ственною си́лою чудодѣ́йствуема, зна́менія и о́бразы зако́нніи, роди́ же дѣ́ва неискусому́жнѣ никогда́же.

[Ангелъ:] Диви́тъ, Всенепоро́чная, и стра́нно бо чу́до Твое́, еди́на бо Ты́ всѣ́хъ Царя́ пріи́меши во утро́бѣ, воплоща́ема, и Тя́ прообразу́ютъ проро́ческая рече́нія, и гада́нія, и зако́нніи о́бразы.

[Богоро́дица:] Всѣ́ми Невмѣсти́мый и всѣ́ми Неви́димый, ка́ко Се́й мо́жетъ во чре́во дѣви́че всели́тися, е́же Са́мъ созда́? Ка́ко же и зачну́ Бо́га Сло́ва, собезнача́льна Отцу́ и Ду́ху?

[Ангелъ:] Къ Твоему́ пра́отцу Дави́ду обѣща́ся посади́ти отъ плода́ Твоего́ чре́ва на престо́лѣ ца́рства его́, Іа́ковлю Тя́ добро́ту, еди́ну избра́ въ слове́сное селе́ніе.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Свѣ́томъ чи́стымъ Святы́я Тро́ицы просвѣще́нъ, зако́номъ же Сея́ огражде́нъ, но́щь жите́йскую безъ претыка́нія преше́лъ еси́, видѣ́ніи боже́ственными возвыша́яся, блаже́нне, въ боже́ственный живо́тъ всели́лся еси́.

Ны́нѣ на тебѣ́ чу́до ве́ліе ви́дится и у́жаса испо́лнено: ка́ко по погребе́ніи вои́стинну надо́лзѣ соблюда́ется невреди́мо, блаже́нне, твое́ тѣ́ло, во гро́бѣ лежа́що, судо́мъ, и́мже вѣ́сть Бо́гъ, прославля́яй тя́.

Блаже́нне Проко́піе, твое́ дерзнове́ніе къ Бо́гу и любо́вь, ю́же отъ се́рдца къ Тому́ имѣ́ти благоволи́въ, и́стинно имени́то же возсія́въ пресла́вно, Боже́ственными свѣтлостьми́ просвѣти́ вѣ́рныхъ со́нмища.

Богоро́диченъ: За ны́ изъ Тебе́ вопло́щшагося, Дѣ́во Ма́ти, всегда́ моли́, благоче́стно Тя́ блажа́щимъ изба́витися бѣ́дъ, душетлѣ́нныхъ страсте́й и печа́лей и вѣ́чнующаго пла́мене муче́нія.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

[Богоро́дица:] Глаго́лъ твои́хъ, Гавріи́ле, гла́съ ра́дованенъ пріе́мши, весе́лія Боже́ственнаго испо́лнихся: ра́дость бо повѣ́даеши и весе́ліе возвѣща́еши безконе́чное.

[Ангелъ:] Тебѣ́ даде́ся ра́дость, Богома́ти Боже́ственная, Тебѣ́, е́же ра́дуйся, вся́ тва́рь вопіе́тъ, Богоневѣ́сто: Ты́ бо еди́на Ма́ти Сы́на Бо́жія пронарече́ся, Чи́стая.

[Богоро́дица:] Евы Мно́ю ны́нѣ да упраздни́тся осужде́ніе, да возда́стся Мно́ю до́лгъ дне́сь, Мно́ю заи́мствованіе дре́внее да да́стся преиспо́лнено.

[Ангелъ:] Обѣща́ся Бо́гъ Авраа́му пра́отцу благослови́тися въ сѣ́мени его́ язы́комъ, Чи́стая, Тобо́ю же коне́цъ обѣща́ніе пріе́млетъ дне́сь.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Ка́пли сла́дкія иска́павше, блаже́нне, по́тъ твои́хъ сла́дость и исцѣле́ній сія́нія, на хвалу́ Христа́ Бо́га на́шего.

Во дво́рѣхъ Бо́га процвѣ́лъ еси́, виногра́дъ многопло́денъ прозя́бъ, и добродѣ́телей гро́здіе Дѣ́лателю душа́мъ оби́ліе пода́въ.

Ца́рства Бо́жія возжелѣ́лъ еси́, надъ страстьми́ ца́рствовавъ, Проко́піе, и, по произволе́нію лу́чшему, ра́дость пра́ведныхъ получи́лъ еси́.

Богоро́диченъ: Избра́нно Бо́гу бы́вши я́ко прекра́сное селе́ніе и простра́нное Сему́, Дѣ́во, была́ еси́, и черто́гъ, и свѣ́щникъ, и трапе́за.

Конда́къ, гла́съ 4:

Христа́ ра́ди юро́дствомъ возду́шная мыта́рства на рука́хъ а́нгельскихъ неприкоснове́нно преше́дъ, ца́рскаго дости́глъ еси́ престо́ла и отъ Царя́ всѣ́хъ Христа́ Бо́га да́ръ пріе́мъ благода́ть исцѣле́ній, мно́гими бо чудесы́ твои́ми и зна́меніемъ стра́шнымъ удиви́лъ еси́ гра́дъ тво́й Вели́кій Устюгъ: лю́демъ твои́мъ ми́лость испроси́, мѵ́ро отъ честна́го о́браза Пресвяты́я Богоро́дицы моли́твою изве́лъ еси́ и неду́жнымъ по́далъ еси́ цѣльбы́. Тѣ́мже мо́лимъ тя́, чудоно́сче Проко́піе: моли́ Христа́ Бо́га непреста́нно пода́ти грѣхо́въ на́шихъ проще́ніе.

Икосъ:

Ка́ко возмогу́ грѣ́шный и скве́рный а́зъ душе́ю вку́пѣ и тѣ́ломъ исписа́ти во пло́ти су́щее равноа́нгеломъ житіе́ твое́ и пресла́вная чудеса́? Аще у́бо мно́зи прему́дріи не дости́гнутъ исповѣ́дати мно́гаго твоего́ терпѣ́нія, и смире́нія, и те́плыя ко Христу́ любве́, но, оба́че надѣ́яся на твое́ беззло́біе, о блаже́нне, си́це вопію́ ти: ра́дуйся, пресвѣ́тлая звѣздо́, отъ восто́ка добродѣ́телей возсія́вшая и вселе́нную чудесы́ озари́вшая; ра́дуйся, возненави́дѣвый роди́тельскую любо́вь, Христа́ же еди́наго, надъ всѣ́ми су́щаго Бо́га, всѣ́мъ се́рдцемъ возлюби́вый и Тому́ невозвра́тнымъ жела́ніемъ послѣ́довавый; ра́дуйся, я́ко бу́йственное и юро́дственное, е́же по апо́столу, жи́тельство избра́вый; ра́дуйся, премѣни́вый тлѣ́нная и настоя́щая наде́ждею бу́дущихъ бла́гъ; ра́дуйся, дре́внему Іову уподо́бивыйся терпѣ́ніемъ; ра́дуйся, страстоте́рпче Христо́въ непобѣди́мый, но при́сно побѣди́вый діа́вола твои́мъ смире́ніемъ; ра́дуйся, я́ко дре́вній о́нъ Ла́зарь ни́щій, ны́нѣ почива́еши въ нѣ́дрѣхъ Авраа́млихъ; ра́дуйся, и́же по отше́ствіи мíра сего́ су́щимъ въ бѣда́хъ и искуше́ніихъ гото́въ обрѣта́яйся предста́тель и засту́пникъ; ра́дуйся, вездѣ́ призыва́ющія тя́ бы́стро предваря́яй, мо́лиши бо Христа́ Бо́га непреста́нно пода́ти грѣхо́въ на́шихъ проще́ніе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

[Богоро́дица:] Свѣ́тъ невеще́ственный повѣ́дая, въ веще́ственнѣ тѣлеси́ совокупля́емь за милосе́рдіе мно́гое, свѣ́тлое благовѣ́щеніе, Боже́ственная проповѣ́данія, ны́нѣ взыва́еши Ми́: благослове́нъ, Всечи́стая, Пло́дъ Твоего́ чре́ва.

[Ангелъ:] Ра́дуйся, Влады́чице Дѣ́во, ра́дуйся Пречи́стая, ра́дуйся, прія́телище Бо́жіе, ра́дуйся свѣ́щниче Свѣ́та, Ада́мово воззва́ніе, Евы избавле́ніе, горо́ свята́я, прея́вственное свяще́ніе и черто́гъ безсме́ртія.

[Богоро́дица:] Ду́шу очи́сти, тѣ́ло освяти́, це́рковь сотвори́ Мя вмѣсти́тельну Бо́га, ски́нію богоукра́шену, одушевле́нъ хра́мъ наи́тіемъ Пресвята́го Ду́ха и Жи́зни чи́стую Ма́терь.

[Ангелъ:] Яко многосвѣ́тлую свѣщу́, и богодѣ́ланенъ черто́гъ, ви́жу Тя́ ны́нѣ, я́ко зла́тъ киво́тъ, зако́на Пода́теля пріими́, Богоневѣ́сто, благоизво́лившаго человѣ́ческое изба́вити Тобо́ю тлѣ́нное существо́.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Крѣ́постію возмо́гъ Живода́вца, плотско́е удержа́лъ еси́ жела́ніе, пребога́те, и у́мъ возвы́силъ еси́ на небе́сная, поя́ крѣ́пко: Сы́й благослове́нъ и препросла́вленъ.

Са́мъ неблагоро́денъ сотвори́вся, благоро́дны нра́вы стяжа́лъ еси́ умо́мъ цѣ́лымъ, поуче́ніемъ же упражня́яся Богодохнове́нныхъ писа́ній, все́ жела́ніе твое́ къ Бо́гу Всеви́дцу, блаже́нне, возложи́лъ еси́.

Го́рнее Ца́рство, вы́шній гра́дъ, Бо́жій ра́й, пра́ведныхъ наслажде́ніе и пи́щу несодѣ́янную, бога́тство некра́домое, Свѣ́тъ невече́рній, обрѣсти́ сподо́бился еси́, блаже́нне Проко́піе.

Богоро́диченъ: Его́же породила́ еси́, Влады́чице, при́сно моли́, отъ рабо́ты изба́вити мя́ страсте́й, и осужде́нія, и стужа́ющаго ми́ лю́таго окамене́нія, и оскорбля́ющаго, Чи́стая, одержа́нія, Богора́дованная.

Пѣ́снь 8.

Ирмо́съ: Слы́ши, Отрокови́це, Дѣ́во чи́стая, да рече́тъ у́бо Гавріи́лъ, совѣ́тъ Вы́шняго дре́вній и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и, ра́дуяся, вопію́: благослови́те, вся́ дѣла́ Госпо́дня, Го́спода.

[Богоро́дица:] Умъ вся́къ побѣжда́ется земны́хъ, — отвѣща́ Дѣви́ца, — и́щущи, я́же Мнѣ́ вѣща́еши, пресла́вная: слы́шахъ твоя́ словеса́, но бою́ся, ужаса́ющися, да не ле́стію Мя́, я́ко Еву, дале́че по́слеши отъ Бо́га. Но оба́че се́ вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Ангелъ:] Се́ Тебѣ́ недоумѣ́нное разрѣши́тся, — глаго́летъ къ си́мъ Гавріи́лъ, — до́брѣ бо рекла́ еси́, ве́щь неудобопости́жна. Словесе́мъ Твои́хъ усте́нъ повину́ющися про́чее, не сумни́ся, я́ко ле́сти, я́коже ве́щи, вѣ́руй. Азъ бо, ра́дуяся, вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Богоро́дица:] Зако́нъ се́й отъ Бо́га е́сть человѣ́комъ, — Непоро́чная а́біе глаго́летъ, — отъ о́бщія любве́ рождество́ происхо́дитъ. Не вѣ́мъ супру́жника сла́сти всеконе́чно, ка́ко у́бо глаго́леши, я́ко рожду́? Бою́ся, еда́ ле́сть глаго́леши? Но оба́че се́ вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Ангелъ:] Глаго́лы, я́же мнѣ́ вѣща́еши, Чи́стая, — а́нгелъ па́ки глаго́летъ, — обы́чая е́сть рождества́ человѣ́ковъ сме́ртныхъ; и́стинно Бо́га Тебѣ́ обѣщава́ю, па́че сло́ва же и смы́сла воплоща́ема, я́ко вѣ́сть, изъ Тебе́. Тѣ́мже и, ра́дуяся, вопію́: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

[Богоро́дица:] Явля́ешися Мнѣ́ и́стины вѣща́тель, — рече́ Дѣ́ва, — ра́дости бо о́бщія прише́лъ еси́ благовѣ́стникъ. Ду́шу у́бо очи́стихъ съ тѣ́ломъ, и по глаго́лу твоему́ бу́ди Мнѣ́, да всели́тся Бо́гъ въ Мя́, къ Нему́же вопію́ съ тобо́ю: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Огнь помышля́я стра́шный, предъ престо́ломъ Христо́вымъ хотя́щъ изы́ти, умиле́ніемъ се́рдца те́плы пролива́еши пото́ки сле́зныя, погаша́я тѣ́ми страсте́й пе́щь, Проко́піе богому́дре.

Любо́вію предложи́лъ еси́ твою́, му́дре, къ Бо́гу ду́шу и къ Тому́ прилѣпи́лся еси́, вопія́ пѣ́сненно: Христе́ мо́й, Ты́ ны́нѣ мя́ изба́ви страсте́й смертоно́сныхъ во вѣ́ки.

Терпѣ́ніемъ пожда́тель и се́рдцемъ смире́нъ, ты́ ви́дѣнъ бы́лъ еси́, ми́лостивъ тре́бующимъ, обы́чай при́сно бла́гъ имѣ́я и нра́въ добродѣ́тельный, всече́стне, въ ни́хже до́брѣ пожи́въ, чуде́съ то́чиши благода́ть.

Богоро́диченъ: Ада́мовъ Содѣ́тель отъ крове́й Твои́хъ чи́стыхъ зи́ждется и млеко́мъ пита́ется, пита́яй вся́ко дыха́ніе, Дѣ́во Богоро́дице. Тѣ́мъ я́ко Ма́терь Тя́ Бо́жію прославля́емъ.

Пѣ́снь 9.

Ирмо́съ: Яко одушевле́нному Бо́жію киво́ту, да ника́коже ко́снется рука́ скве́рныхъ. Устнѣ́ же вѣ́рныхъ, Богоро́дицѣ, немо́лчно, гла́съ а́нгела воспѣва́юще, съ ра́достію да вопію́тъ: ра́дуйся, Благода́тная, Госпо́дь съ Тобо́ю.

Па́че смы́сла заче́нши Бо́га, естества́ обы́чая утаи́ся, Отрокови́це! Ты́ бо въ Рождествѣ́ ма́терскаго избѣжа́ла еси́ тлѣ́ннаго естества́ и превы́шши су́щи. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Ка́ко то́чиши млеко́, Дѣ́во Чи́стая, не мо́жетъ изрещи́ язы́къ зе́мленъ; стра́нну бо естества́ показу́еши ве́щь, зако́ннаго рождества́ уста́въ прехо́диши. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Та́йно во свяще́нныхъ писа́ніихъ глаго́лася о Тебѣ́, Ма́ти Вы́шняго, лѣ́ствицу бо дре́вле Іа́ковъ Тя́ образу́ющую, ви́дѣвъ, рече́: степе́нь Бо́жія сія́. Тѣ́мже досто́йно слы́шиши: ра́дуйся, Благода́тная, Госпо́дь съ Тобо́ю.

Чу́дное священноявле́нному Моисе́ю купина́ и о́гнь показа́ чу́до, ища́й же конца́ въ прехожде́ніи време́нъ, во Отрокови́це чи́стѣй, рече́, узрю́. Ейже, я́ко Богоро́дицѣ, да рече́тся: ра́дуйся, Благода́тная, Госпо́дь съ Тобо́ю.

Даніи́лъ Тя́ го́ру нарече́ мы́сленную, роди́тельницу же Бо́жію Иса́ія, ви́дитъ же я́ко руно́, Гедео́нъ, Дави́дъ же свяще́ніе глаго́летъ, две́рь же Тя́ и́нъ. Гавріи́лъ же Тебѣ́ взыва́етъ: ра́дуйся, Благода́тная, Госпо́дь съ Тобо́ю.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Ви́дѣти жела́я сла́ву Бо́га на́шего, добродѣ́тельми богоразу́мія себе́ удобри́лъ еси́ и, свѣщу́ нося́, вше́лъ еси́ во свѣ́тлый черто́гъ, со а́нгелы живы́й яснѣ́е наслажда́яся Божества́.

Яко у́треннее со́лнце, взы́де па́мять твоя́, су́щія во мра́цѣ сердца́ просвѣща́ющи: ты́ бо свѣ́та и дне́ яви́лся еси́ вои́стинну сы́нъ, богому́дре Проко́піе, сего́ ра́ди тя́ почита́емъ.

Му́дростію украша́яся и ра́зумомъ просвѣща́яся, смире́ніемъ се́рдца красу́яся, высото́ю житія́, досточу́дне, въ разу́мныя дворы́ вше́лъ еси́, идѣ́же на́съ помяни́, чту́щихъ тя́, блаже́нне Проко́піе.

Богоро́диченъ: Свѣ́та жили́ще, вся́ озари́вшаго, и сѣ́нь ви́дѣна была́ еси́, Богоблагода́тная, мо́стъ и лѣ́ствица, на высоту́ земны́я возводя́щи, Дѣ́во, тѣ́мъ Тя́ ублажа́емъ и вѣ́рно велича́емъ.

Свѣти́ленъ. Подо́бенъ: Жены́, услы́шите.

Удали́лся еси́, бѣ́гая мірска́го сожи́тельства, и Христу́, су́щему надъ всѣ́ми Бо́гу на́шему, непоро́чнымъ житіе́мъ благоугоди́лъ еси́, всеблаже́нне Проко́піе. Его́же и ны́нѣ моли́ о на́съ, рабѣ́хъ твои́хъ, вѣ́рою пра́зднующихъ всечестну́ю па́мять твою́. [Два́жды.]

Сла́ва, и ны́нѣ, Благовѣ́щенія. Подо́бенъ то́йже.

Еже отъ вѣ́ка дне́сь открыва́ется та́инство Бо́жіе: Бо́гъ Сло́во Сы́нъ Дѣ́вы Марíи за милосе́рдіе быва́етъ, и ра́дость благовѣ́щенія Гавріи́лъ провѣщава́етъ; съ ни́мже вопіе́мъ Ей: ра́дуйся, Ма́ти Госпо́дня.

На хвали́техъ стихи́ры на 6: Благовѣ́щенія три́ и Проко́пія три.
Стихиры Благовѣщенія, гла́съ 1. Подо́бенъ: Небе́сныхъ чино́въ.

Съ небе́сныхъ круго́въ слетѣ́въ Гавріи́лъ въ Назаре́тъ,* пріи́де къ Дѣ́вѣ Марíи,* вопія́ Ей: ра́дуйся!* Зачне́ши Сы́на, Ада́ма дре́внѣйшаго,* Творца́ вѣко́въ и Изба́вителя,* вопію́щихъ Тебѣ́: ра́дуйся, Чи́стая.

Соприсносу́щное Сло́во Пребезнача́льного Отца́,* не разлучи́вся го́рнихъ,* ны́нѣ предста́ до́льнимъ, ра́ди кра́йняго благоутро́бія,* ми́лость пріе́мь, е́же на ны́ поползнове́нія,* и, Ада́мову нищету́ вопріе́мь,* вообрази́ся въ чужде́е.

Гавріи́лъ, Дѣ́вѣ благовѣ́стіе съ небесе́ прине́съ,* вопія́ше: ра́дуйся!* Заче́нши во чре́вѣ Твое́мъ, Тобо́ю вмѣсти́маго,* невмѣсти́маго же всѣ́ми,* и ражда́ющая яви́шися,* отъ Отца́ пре́жде денни́цы Возсія́вшаго.

Стихи́ры свята́го, гла́съ 4. Подо́бенъ: Да́лъ еси́ зна́меніе.

Да́лъ еси́ при́тчу терпѣ́нія и му́жества,* Преблагíй Го́споди,* пра́веднаго Проко́пія и многочуде́снаго,* добродѣ́тельми, и словесы́,* и дѣ́лы сія́юща,* цѣлому́дріемъ украша́ема и кро́тостію,* тѣ́мъ Твое́ неизрече́нное смотре́ніе сла́вимъ,* Іису́се Всеси́льне* и Спа́се ду́шъ на́шихъ.

Пра́веденъ и незло́бивъ,* и́стиненъ же, и непоро́ченъ, и вѣ́ренъ,* уклоня́яся отъ вся́кія зло́бныя ве́щи,* показа́лся еси́, Проко́піе блаже́нне,* просвѣще́нъ добродѣ́тельми* и благоче́стіемъ сія́я.* Тѣ́мъ тя́ ублажа́емъ* и свято́е твое́ и честно́е дне́сь пра́зднуемъ успе́ніе,* ра́дующеся, богому́дре.

Цѣлому́дріемъ и благовѣ́ріемъ,* я́ко благряни́цею многоцѣ́нною, одѣ́явся, Проко́піе,* пра́вдою же и кро́тостію,* я́ко боже́ственнымъ вѣнце́мъ, увя́злся еси́,* со стра́ждущими Христа́ ра́ди* ца́рствовати возжелѣ́лъ еси́.* И ны́нѣ Царю́ си́лъ предстои́ши,* Іису́су Всеми́лостивому* и Спа́су ду́шъ на́шихъ.

Сла́ва, гла́съ 8:

Добродѣ́телей твои́хъ, богому́дре, исправле́нія уясни́ша вѣ́рныхъ сердца́: кто́ бо, слы́шавъ безмѣ́рное твое́ смире́ніе и терпѣ́ніе, не удиви́тся? Еже ко всѣ́мъ кро́тость и беззло́біе, къ скорбя́щимъ ми́лованіе и къ су́щимъ въ бѣда́хъ ско́рое поможе́ніе, въ пу́ть ше́ствующимъ благо́е поспѣше́ніе и къ пла́вающимъ немяте́жное приста́нище. Вся́ боголѣ́пно предвари́лъ еси́, досточу́дне Проко́піе, и ны́нѣ неувяда́емымъ увя́злся еси́ вѣнце́мъ отъ руки́ Вседержи́теля Бо́га, Его́же моли́ спасти́ся душа́мъ на́шимъ.

И ны́нѣ, Благовѣ́щенія, гла́съ 2:

Еже отъ вѣ́ка та́инство открыва́ется дне́сь, и Сы́нъ Бо́жій Сы́нь человѣ́чь быва́етъ, да, ху́ждшее воспріе́мь, пода́стъ ми́ лу́чшее. Солга́ся дре́вле Ада́мъ, и Бо́гъ возжелѣ́въ бы́ти, не бы́сть: Человѣ́къ быва́етъ Бо́гъ, да бога Ада́ма содѣ́лаетъ. Да весели́тся тва́рь, да ликовству́етъ естество́, я́ко арха́нгелъ Дѣ́вѣ со стра́хомъ предстои́тъ, и — е́же, ра́дуйся — прино́ситъ, печа́ли сопроти́вное. За милосе́рдіе ми́лости вочеловѣ́чивыйся, Бо́же на́шъ, сла́ва Тебѣ́.

Славосло́віе вели́кое. И ча́съ 1-й. И отпу́стъ.



НА ЛИТУРГІИ,

Блаже́нна, отъ кано́на Благовѣ́щенія, пѣ́снь 3-я и свята́го, пѣ́снь 6-я. Проки́менъ пра́здника, гла́съ 4: Благовѣсти́те де́нь отъ дне́* спасе́ніе Бо́га на́шего. Сти́хъ: Воспо́йте Го́сподеви пѣ́снь но́ву, воспо́йте Го́сподеви, вся́ земля́. И свята́го, гла́съ 7: Честна́ предъ Го́сподемъ сме́рть преподо́бныхъ его́. Апо́столъ Благовѣ́щенія, ко Евре́емъ, зача́ло 306. И свята́го, къ Гала́томъ, зача́ло 213. Аллилу́ія пра́здника, гла́съ 1: Сни́детъ, я́ко до́ждь на руно́, и, я́ко ка́пля, ка́плющая на зе́млю. Сти́хъ: Бу́детъ и́мя Его́ благослове́но во вѣ́ки, пре́жде со́лнца пребыва́етъ и́мя Его́. И свята́го, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе Благовѣ́щенія, Луки́, зача́ло 3. И свята́го, Луки́, зача́ло 24. Прича́стенъ пра́здника: Избра́ Госпо́дь Сіо́на и изво́ли его́ въ жили́ще Себѣ́. И свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Послѣдованіе праздника приводится по изданію: Минѣ́я, мѣ́сяцъ Іюль. — М.: Печа́тный дво́ръ, 1646. — Л. 90 – 109 об.

Служба Благовѣщенію: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 121 – 131 об.

Служба блаж. Прокопію: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 68 об. – 75.

/ Къ оглавленію раздѣла /


Наверхъ / Къ титульной страницѣ

0