Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 8-й де́нь.
Свята́го великому́ченика Проко́пія.

[ВЕЧЕРЪ,
На Го́споди воззва́хъ:] стихи́ры на 6, гла́съ 4. Подо́бенъ: Яко до́бля.

Воздержа́ніемъ пе́рвѣе* плотска́я взыгра́нія обузда́въ,* по́слѣжде къ страда́нію* мужему́дренно отлучи́лся еси́,* всеблаже́нне Проко́піе,* не пощадѣ́въ пло́ти си́лою Ду́ха.* Тѣ́мже вся́къ претерпѣ́лъ еси́* ви́дъ муче́ній,* вѣнцено́сецъ къ вы́шнимъ ликостоя́ніемъ восте́клъ еси́.

Воево́да я́ко непобѣди́мь,* Кресто́мъ вооружи́вся,* то́ки кро́вными всю́ си́лу сопроти́вныхъ погрузи́лъ еси́* и ту́чи источи́лъ еси́ исцѣле́ній бога́тно,* отъ исто́чникъ излива́я,* досточу́дне, спаси́тельныхъ* и всѣ́хъ напая́я,* пла́менемъ страсте́й содержи́мыхъ, богодохнове́нне.

Ины стихи́ры, гла́съ то́йже. Подо́бенъ: Да́лъ еси́ зна́меніе.

Яко Па́вла пе́рвѣе,* съ небесе́ тя́ призва́ Іису́съ Истина,* Проко́піе всесла́вне,* Ему́же благоду́шно, блаже́нне, вѣ́ровавъ,* оте́ческую пре́даную лжу́* и безбо́жную ле́сть оста́вилъ еси́* и, ра́дуяся, отлучи́лся еси́ къ болѣ́зненнымъ трудо́мъ,* соверше́ннаго страда́нія просвѣ́щся мы́слію.

Трезу́бцы стру́жемь,* и огне́мъ изнуря́емь,* и въ темни́цѣ затворя́емь,* пребы́лъ еси́ непрело́женъ,* ко предлежа́щимъ Боже́ственнымъ воздая́ніемъ* просвѣще́ннымъ по́мысломъ предзря́, му́чениче многострада́льне.* Тѣ́мже тя́ вѣнча́ Вѣнцеда́вецъ Христо́съ, Проко́піе,* по́двиги сконча́вшаго* и вѣ́ру соблю́дшаго.

Образомъ страда́нія,* е́же пло́тію прія́тъ,* Іису́съ улови́лъ тя́ е́сть,* добро́ты, Проко́піе, вожделѣ́въ и́скренно* боже́ственныя души́ твоея́,* е́йже удиви́шася врази́, терпѣ́нію и свѣ́тлости.* Тѣ́мже тя́ ублажа́емъ* со страда́вшими съ тобо́ю, сла́вне,* съ ни́миже проси́ оставле́ніе лю́тыхъ пою́щимъ тя́.

Сла́ва, гла́съ 6:

Просія́ дне́сь сла́вная па́мять твоя́, Проко́піе многострада́льне, созыва́ющи на́съ, празднолю́бцевъ, ко благохвале́нію и сла́вѣ Христа́ Бо́га на́шего. Тѣ́мже и притека́юще къ ра́цѣ моще́й твои́хъ, исцѣле́ній дарова́нія пріе́млемъ и вѣнча́вшаго тя́ Спа́са Христа́ воспѣва́емъ во вѣ́ки, непреста́нно сла́вяще.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше,* и дивя́щися, вопія́ше:* Ча́до Сладча́йшее,* что́ зрѣ́ніе сіе́ но́вое и пресла́вное?* ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ окто́иха. Сла́ва, гла́съ 8. Проко́пія Хартофила́кса.

Та́йными сія́ніи Пресвѣ́тлыя Тро́ицы озаря́емь, му́чениче Проко́піе доблему́дренне, положе́ніемъ бо́гъ бы́лъ еси́, обожа́емь прича́стіемъ. Тѣ́мже вѣ́рою творя́щія тво́й свѣтоно́сный пра́здникъ отъ напа́стей многообра́зныхъ спаса́й твои́ми моли́твами.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, — Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ?

Тропа́рь, гла́съ 4:

Му́ченикъ Тво́й, Го́споди, Проко́пій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


НА УТРЕНИ,
Оба кано́на окто́иха безъ му́ченичновъ и свята́го на 6, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Бога́тыми сія́ніи Ду́ха облія́нъ, свѣтоно́сный се́й и честны́й пра́здникъ тво́й чту́щія, страсте́й мглы́ изба́ви и напа́стей, му́чениче Проко́піе.

Зва́ніе не отъ человѣ́къ бы́сть твое́, Проко́піе, но съ небесе́, я́ко Па́вла пе́рвѣе, Христо́съ улови́, страсте́й Свои́хъ свидѣ́теля всеи́стиннаго тя́ содѣ́лавъ.

Во́инствомъ тлѣ́ннымъ, прему́дре, на вѣ́чнующая, я́ко смы́сленъ, премѣни́въ и сме́ртнаго царя́ на Безсме́ртнаго и Ца́рствіе нетлѣ́нное тебѣ́ подава́ющаго, Проко́піе.

Богоро́диченъ: Естество́мъ Содѣ́теля родила́ еси́, на́съ обожи́вшаго па́че ума́ соедине́ніемъ и́стиннымъ, Богоро́дице Препѣ́тая, Его́же прилѣ́жно моли́ просвѣти́ти пою́щія Тя́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Посредѣ́ Креста́ пресла́вно Христо́съ тебѣ́ явля́ется, науча́я я́вѣ, е́же къ на́мъ схожде́ніе, и тя́ къ страда́нію призыва́я.

Хра́мъ и сто́лпъ воздви́глъ еси́ тебе́ сама́го Боже́ственному Ду́ху, ре́вностію же дыха́я Бо́жіею, хра́мы и безду́шныя истука́ны де́монскія низложи́лъ еси́, му́чениче Проко́піе.

Совле́клся еси́ ко́жныхъ ри́зъ строга́ніемъ, нетлѣ́нія же оде́ждею одѣ́явся, Проко́піе, многоко́зненнаго, му́чениче, обнажи́лъ еси́.

Богоро́диченъ: Изба́ви мя́ вся́каго прило́га сопроти́внаго змíя, Ма́ти Дѣ́во Чи́стая, и се́рдце мое́ просвѣти́, вѣ́рою Тя́ сла́вящаго, Пренепоро́чная.

Сѣда́ленъ, гла́съ 1. Подо́бенъ: Гро́бъ Тво́й.

Яко Па́вла пе́рвѣе, Христо́съ съ небесе́, Проко́піе му́дре, тя́ зове́тъ къ вѣ́рѣ, добро́ту боже́ственную провѣ́дый се́рдца твоего́. Тѣ́мже пострада́лъ еси́ му́жески, проповѣ́дая стра́сти и Того́ къ человѣ́комъ, преблаже́нне, соше́ствіе. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ строе́ніе? Имже спа́слъ еси́ пречи́стыхъ ру́къ Твои́хъ, Ще́дре, созда́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Превознесе́ннаго держа́вою нече́стія го́рдаго мучи́теля, ко Влады́цѣ боже́ственными воззрѣ́ніи взыва́я, разрази́лъ еси́: сла́ва си́лѣ Твое́й, Го́споди.

Явля́ется въ темни́цѣ тебѣ́ затворе́ну Изба́витель, Проко́піе, де́рзости наполня́я тя́, сія́ніемъ же просвѣща́я тя́ и зва́ніе сугу́бо твоему́ предспѣ́янію подая́.

Благода́тію Боже́ственною просвѣще́но зря́ще твое́ лице́, невѣ́рія мра́комъ покрове́нніи свѣ́тъ вѣ́ры Боже́ственнымъ манове́ніемъ пріе́млютъ.

Богоро́диченъ: Отягче́на сно́мъ уны́нія, къ покая́нія у́тру мя́ Твое́ю неусы́пною, Влады́чице, воздви́гни моли́твою и спаси́ мя, Еди́на Спа́са ро́ждшая.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Свѣ́томъ слове́съ твои́хъ во́инство богопоко́рное приве́лъ еси́ Христу́, муче́нія кро́вію наслѣ́довавшее съ тобо́ю, Проко́піе, Ца́рство недви́жимое.

Синкли́тства яви́шася вы́шняго прича́стницы жены́ синкли́тскія, и ро́да свѣ́тлости отре́кшеся, и умре́ти изво́лиша по Тебѣ́, Сло́ве Безсме́ртне.

Огне́мъ распаля́еми Боже́ственнымъ ду́ши, опаля́емаго и неща́дно жего́маго тѣ́ла пренебре́гше, я́же Твое́ возжелѣ́вшія Ца́рство, Многоми́лостиве.

Богоро́диченъ: Заче́нши, родила́ еси́ Бо́га Емману́ила, на обновле́ніе человѣ́комъ, Пресвята́я Чи́стая, пло́ть бы́вша, Его́же при́сно моли́ спасти́ ду́ши на́ша.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Источа́я тво́й медото́чный язы́къ уче́нія медото́чная и го́рести безбо́жія вои́стинну изба́ви благопоко́рно тебѣ́ притека́ющія, му́чениче Проко́піе.

Ма́терь — благоче́стіе, му́чениче, стяжа́въ, злоче́стія изыма́еши твою́ по пло́ти честну́ю ма́терь и приво́диши небе́сному Отцу́ страда́нія ра́ди.

Лани́ты стружа́ желѣ́зомъ мучи́тель, по́мысла твоего́ тве́рдости, му́чениче, не поколеба́, водруже́ннаго любо́вію, стра́сти пло́тію претерпѣ́вшаго.

Богоро́диченъ: Свята́го святы́хъ неизрече́нно родила́ еси́, Пресвята́я Дѣ́во, вѣ́рныя при́сно освяща́ющаго и му́ченическія ли́ки со а́нгелы совокупля́ющаго.

Конда́къ, гла́съ 2. Подо́бенъ: Вы́шнихъ ища́.

Ре́вностію ко Христу́ боже́ственною распала́емь и Креста́ крѣ́постію огражда́емь, враго́въ шата́ніе и де́рзость низложи́лъ еси́, Проко́піе, и честну́ю Це́рковь возвы́силъ еси́, вѣ́рою преуспѣва́я и просвѣща́я на́съ.

Икосъ:

Уста́ ра́зума мнѣ́ пода́ждь, Пребезнача́льне Сло́ве, хотя́щу пѣ́ти Твоего́ ору́жника Проко́пія: и́маши бо бога́тство милосе́рдія неизче́тно, Христе́ мо́й, пучи́ну Твои́хъ суде́бъ, да и а́зъ душе́внаго мра́ка очи́щуся, ума́ же вся́ку скве́рну отмы́въ, хра́мъ свяще́нія дѣ́лы боже́ственными Твои́ми бу́ду и досто́йная пою́ му́ченику, вѣ́рою преуспѣва́я и просвѣща́я на́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Тя́жестію о́лова твое́й вы́и сокруша́емѣ, му́чениче, не чу́лъ еси́: носи́ти бо и́го на вы́и возжелѣ́лъ еси́ преле́гкое за милосе́рдіе на́мъ Примѣ́шшагося.

Благода́ть свы́ше исцѣле́ній пріе́мъ, неду́ги отъе́млеши, му́чениче, и лука́выя отгоня́еши ду́хи, вопія́: благослове́нъ еси́, Го́споди Бо́же оте́цъ на́шихъ.

Многообра́зныя отъ вра́гъ я́звы пріе́мля, блаже́нне, и огне́мъ опаля́емь, тве́рдостнѣ нече́стіе попали́лъ еси́: благослове́нъ еси́, — вопія́, — Бо́же оте́цъ на́шихъ.

Богоро́диченъ: Отъ Дѣ́вы нетлѣ́нныя па́че естества́ ражда́ется Сло́во, Иже сло́вомъ вся́ содѣва́яй, безслове́сія хотя́ изба́вити во́льное славосло́вящія Того́ сни́тіе.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Свѣща́ми опаля́емь лю́тѣ, остны́ же подбода́емь, и лѣ́тнымъ ра́намъ строга́ніе пріе́мля, и болѣ́знуя зѣло́, му́чениче, взыва́лъ еси́: благослови́те, вся́ дѣла́ Госпо́дня, Го́спода.

Твое́ю десни́цею те́мная де́моновъ ли́ца, блаже́нне, зауши́лъ еси́, сію́ бо на у́гліе горя́щее, сла́вне, опали́тися положи́лъ еси́, беззако́нному мучи́телю противля́яся и взыва́я: благослови́те, вся́ дѣла́ Госпо́дня, Го́спода.

Ка́меня Христа́ незы́блема, всеблаже́нне сла́вне, имѣ́я основа́ніе, ка́меніемъ, Проко́піе, ра́довашеся, су́рово отягчава́емь, къ нетя́жцѣй тя́ ра́дости облегча́етъ, вопію́ща: благослови́те, вся́ дѣла́ Госпо́дня, Го́спода.

Богоро́диченъ: Се́ вси́, Отрокови́це, ро́ди, я́коже прорекла́ еси́, Тя́ ублажа́ютъ, Бо́га Блаже́ннаго ро́ждшую, блаже́нны содѣва́ющаго, и́же повелѣ́ніемъ Его́ послѣ́дующія вѣ́рно и вопію́щія: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Возжелѣ́нный тебѣ́ получи́вшу коне́цъ, велему́дренно преклони́лъ еси́ Бо́гу вы́ю, уда́ренъ же бы́въ мече́мъ, я́коже на колесни́цу, твое́ю всѣ́лъ еси́ кро́вію и къ Нему́, му́чениче, восте́клъ еси́.

То́чиши рѣ́ки исцѣле́ній, исто́чникъ бы́въ чуде́съ, уставля́еши же пла́мень страсте́й, де́монская же погружа́еши полки́ всеси́льною Ду́ха Боже́ственною крѣ́постію, досточу́дне.

Всесвяту́ю твою́ па́мять ра́достно творя́щія вся́каго преще́нія, вся́каго же неду́га и вся́кія бѣды́ спаса́й, Проко́піе, къ Зижди́телю Бо́гу свяще́нными твои́ми мольба́ми.

Богоро́диченъ: Свѣ́тъ на́мъ возсія́, Отрокови́це, отъ свѣтоно́сныя Твоея́ утро́бы, Созда́тель со́лнца, и звѣ́здъ, и вся́кія тва́ри, Его́же прилѣ́жно моли́ просвѣти́ти пою́щія Тя́.

Свѣти́ленъ:

Съ небесе́, я́ко Па́влу, бы́сть тебѣ́ зва́ніе, ему́же тезоимени́тно преспѣва́я, Проко́піе, Го́сподеви ли́ки му́ченикъ приве́лъ еси́, съ ни́миже мо́лиши о хва́лящихъ тя́.

[Сла́ва, и ны́нѣ,] богоро́диченъ:

Свѣ́тъ ро́ждшая, Дѣ́во, Иже отъ Свѣ́та нерожде́нна, Незаходи́маго Свѣ́та, Твои́ми неусы́пными моли́твами наставля́ющи не преста́й Тя́ пою́щія, Ма́ти Приснодѣ́во.

На хвали́техъ стихи́ры на 4, гла́съ 2. Византíево.

Яко преуспѣва́я въ Бо́зѣ, о всѣ́хъ моли́ся, страстоно́сче, преуспѣва́ти въ Не́мъ, му́ченикомъ похвало́, вели́кій Проко́піе, я́ко дерзнове́ніе имѣ́я къ Нему́ и Того́ престо́лу при́сно предстоя́ въ богоизря́дныхъ стезя́хъ и боже́ственныхъ дѣя́ніихъ, благоугожда́ющихъ Ему́ и тя́ блажа́щихъ.

Гла́съ 3. Ге́рманово:

Юношескимъ во́зрастомъ подвиза́яся, я́коже боже́ственнѣйшій Па́велъ, свы́ше Боже́ственное дарова́ніе прія́лъ еси́, и лю́таго борца́ де́рзость всеору́жествомъ Креста́ низложи́лъ еси́, му́ченикомъ похвало́, страстоно́сче Проко́піе, о на́съ ко Го́споду моли́ся, спасти́ ду́ши на́ша.

Гла́съ 4. Кипріа́ново:

Хвала́ Бо́гови отъ бре́нныхъ усте́нъ прино́сится въ боже́ственнѣй па́мяти твое́й, Проко́піе многострада́льне: ты́ бо яви́лся еси́ изря́дный во́инъ сло́ва вѣ́ры, побѣди́въ въ трудѣ́хъ и́дольскія зра́ки, и ны́нѣ просвѣти́лся еси́ свѣ́томъ Тро́ическимъ, озаря́я на́ша помышле́нія моли́твами твои́ми.

Гла́съ 5:

Це́рковь дне́сь, одѣ́явшися держа́вою Твое́ю, му́чениче Христо́въ, весели́тся и твою́ всеизря́дную па́мять по достоя́нію благохва́льно взыва́етъ, почита́ющи: ра́дуйся, и́же Па́влу поревнова́вый, и Кре́стъ Христо́въ взе́мъ, и сѣ́ти сокруши́лъ еси́ чужда́го; ра́дуйся, му́чениковъ похвало́ и царе́й держа́во, Проко́піе многострада́льнее; о на́съ ко Го́споду не преста́й моля́ся, я́ко дерзнове́ніе имѣ́я, страда́льцевъ украше́ніе.

Сла́ва, гла́съ 4:

Червлени́цею крове́й муче́нія твоего́ украси́вшися, Це́рковь Бо́жія со́лнечныя зари́ испуща́етъ, Проко́піе многострада́льне, Кресто́мъ бо вооружи́въ себе́ и умре́ти по Христѣ́ жела́я доблему́дренно, ко ополче́нію чужда́го супроти́ву ста́лъ еси́, и посрами́въ умышле́нія беззако́нныхъ, побѣ́дный во́инъ я́влься Христо́въ. Тѣ́мже мо́лимъ тя́: я́ко имѣ́я дерзнове́ніе къ Нему́, му́чениковъ украше́ніе, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца* ви́дящи, Пречи́стая,* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, вселюбе́знѣйшій?* Удивля́юся, Благоутро́бне,* Твоему́ во́льному распя́тію.

На стихо́внѣ окто́иха.

Та́же глаго́лемъ припѣ́въ: Ди́венъ Бо́гъ во святы́хъ Свои́хъ, Бо́гъ Изра́илевъ.

И пое́мъ стихи́ру, гла́съ 6: Пріиди́те, вси́ земнíи концы́, духо́вный ли́къ соста́вимъ, пѣ́ніемъ тру́бный гла́съ воспріи́мше, и благода́рныя пѣ́сни принесе́мъ, глаго́люще: ра́дуйся, Христо́въ во́ине, му́чениче Проко́піе, любо́вію бо Сего́ пострада́лъ еси́, блаже́нне; ра́дуйся, и́же тѣ́ло отда́въ на ра́ны лю́тыя за вѣ́чную и блаже́нную вои́стинну жи́знь; ра́дуйся, несы́тною душе́ю наслажда́яся непреста́нно, я́ко о́бщникъ Христа́ Бо́га на́шего. Тѣ́мже о творя́щихъ вѣ́рою сла́вную па́мять твою́ моли́, изба́витися вся́каго гнѣ́ва, и тли́, и муче́нія.

Сла́ва, гла́съ 8:

Якоже Па́велъ, зва́ніе отъ Бо́га пріе́мъ, му́чениче Проко́піе, и преуспѣва́я въ Бо́зѣ Креста́ жела́ніемъ, мучи́телей злоче́стія и муче́нія вся́ му́жественно посрами́лъ еси́. Тѣ́мже и до кро́ве противоста́лъ еси́ ко грѣху́, къ неви́димымъ враго́мъ подвиза́яся, и мо́лишися непреста́нно Изба́вителю и Бо́гу дарова́ти вселе́ннѣй ми́ръ и душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Госпо́дни.

Не терплю́, Ча́до, ви́дящи Тя́,* на дре́вѣ усну́вша,* бо́дрость всѣ́мъ подаю́щаго,* я́ко да дре́вле преступле́нія плодо́мъ* сно́мъ поги́бельнымъ усну́вшимъ,* боже́ственную и спаси́тельную* бо́дрость пода́си,* Дѣ́ва глаго́лаше, пла́чущи,* Юже велича́емъ.


НА ЛИТУРГІИ,

Блаже́нна окто́иха и отъ кано́на свята́го пѣ́снь 3-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Матѳ́ея, зача́ло 39. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 63 – 68.

/ Къ оглавленію раздѣла /


Наверхъ / Къ титульной страницѣ

0