Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 8-й де́нь.
Слу́жба явле́нію ико́ны Пресвяты́я Влады́чицы на́шея Богоро́дицы Каза́нскія.

ВЕЧЕРЪ,
Блаже́нъ му́жъ, [1-й антифо́нъ]. На Го́споди воззва́хъ, поста́вимъ стихо́въ 8, и пое́мъ стихи́ры, гла́съ 4. Подо́бенъ: Яко до́бля.

Яко вели́ка су́щи Цари́ца и Ма́ти* на небеси́ превысо́кихъ си́лъ Царя́,* пречи́стыя Твоя́ ру́ки просте́рши,* моле́бно за ны́ предстои́ши* и на земли́ я́ко держа́вная помо́щница* боже́ственною Твое́ю ико́ною* и ду́хомъ съ Твои́ми рабы́ пребыва́еши,* и ве́село спаса́еши,* и избавля́еши отъ вся́кія напа́сти* благоче́стно Богоро́дицу Тя́ исповѣ́дающія.

Яко златоза́рный ра́й* и мѣ́сто прекра́сное и богопросвѣще́нное,* и дре́во свято́е, Ду́хомъ Святы́мъ осѣне́нное,* вмѣсти́лище Свѣ́та невече́рняго,* Тебе́ вѣ́дущимъ,* я́сно немерца́ющися Боже́ственною луче́ю,* Младе́нцемъ Твои́мъ,* свѣ́тиши все́й тва́ри,* Его́же моля́щи, Цари́це Богоро́дице,* спаси́ Импера́тора и лю́ди,* къ Тебѣ́ прибѣга́ющія, отъ всѣ́хъ бѣ́дъ.

Яко порфи́рою ца́рскою и ви́ссомъ,* ико́ною Твое́ю и Твоего́ Сы́на, Богоро́дице,* Це́рковь Бо́жія просвѣти́вшися,* красу́ется чудесы́.* Дне́сь явле́ніемъ вся́ созыва́етъ пра́здновати,* па́че сія́нія со́лнечнаго* благода́тію Свята́го Ду́ха блиста́ющися,* на боля́щихъ и неду́жныхъ* исцѣле́нія исто́чники источа́ющи* и всѣ́мъ да́рующи бога́тую ми́лость.

Ины стихи́ры, гла́съ 8:

Высо́кій Царю́ непостижи́мый,* со Отце́мъ сѣдя́й на престо́лѣ и Боже́ственнымъ Ду́хомъ,* благоволи́вый роди́тися на земли́* отъ Дѣ́вы неискусобра́чныя, Іису́се,* ущедря́я Твое́ созда́ніе,* человѣ́ческое естество́,* неизрече́нными добро́тами,* пріими́ Твоея́ Ма́тере* приноси́мыя Тебѣ́ за ны́ моли́твы* и не помяни́ беззако́ній на́шихъ,* но поми́луй и спаси́ ду́ши на́ша, я́ко Милосе́рдъ. [Два́жды.]

Преклони́въ небеса́,* Ца́рь Сла́вы сни́де* обнови́ти Ада́ма,* преступле́ніемъ всего́ истлѣ́вшаго,* всели́ся въ Тя́, Чи́стая Дѣ́во,* и роди́ся, ключе́й дѣ́вства не руши́въ,* и на рука́хъ Твои́хъ смире́нъ Младе́нецъ,* Иже арха́нгеловъ Ца́рь ноша́шеся;* и ны́нѣ Твою́ моли́тву пріе́млетъ* и проше́ніе Твое́ во все́мъ исполня́етъ, Богоро́дице,* я́ко Тво́й Сы́нъ и Бо́гъ,* Ему́же усе́рдно моли́ся:* да спасе́тъ ду́ши на́ша, я́ко Милосе́рдъ.

Па́че ски́ніи Моисе́евы,* по о́бразу небе́сному сотворе́нныя,* всю́ Тя Бо́гъ освяти́, Богоро́дице,* Ду́хомъ Святы́мъ,* ве́сь всели́ся въ Тя́, всего́ человѣ́ка оживи́.* Тѣ́мъ и Твоя́ ико́на,* па́че Ааро́ня киво́та,* напо́лнися благода́ти Бо́жія,* и источа́етъ освяще́ніе душа́мъ и тѣлесе́мъ.* Ейже любе́зно покланя́ющеся,* про́симъ отъ Тебе́ вели́кія ми́лости:* да спасе́ши ду́ши на́ша,* благослове́нная Помо́щнице.

Сла́ва, и ны́нѣ, гла́съ 8:

Пріиди́те, возра́дуемся держа́внѣй Засту́пницѣ ро́да на́шего, Цари́цѣ Богоро́дицѣ, пріиди́те къ ти́хому Ея́ и чу́дному, почита́емому а́нгелы, честно́му поклони́мся о́бразу. Да́руетъ бо Богоро́дица вѣ́рнымъ оби́льныя да́ры цѣле́бныя, отъ неистощи́маго исто́чника святы́я ико́ны, неоску́дную благода́ть источа́ющи: тьмы́ избавля́етъ на́съ искуше́ній и бѣ́дъ, и вся́каго грѣха́, благоче́стно и богопрія́тно прославля́ющихъ, и чту́щихъ свѣ́тлую и чу́дную Богома́тере святу́ю ико́ну. Тѣ́мъ, воспѣва́юще, воззове́мъ Первообра́знѣй: ра́дуйся, любе́зная мíру по́моще во спасе́ніе ду́шъ на́шихъ.

Вхо́дъ. Проки́менъ дне́, и чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Главы́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 2, самогла́сны:

Яко вои́стинну дре́вняго киво́та пречестнѣ́е, егда́ Дави́дъ, собра́въ чи́ны, ликовствова́ше, ны́нѣ Твоя́, Богоро́дице, ико́на, е́йже предстоя́тъ архіере́евъ собо́ри, и съ чи́нми а́нгелъ ца́ріе же и кня́зи, и все́ христоимени́тыхъ люде́й мно́жество, досто́йно блажа́тъ Тя́, Ма́терь Бо́жію, и прославля́ютъ раболѣ́пно, и честву́ютъ, и покланя́ются, и мо́лятся Тебѣ́ по Бо́зѣ: да мíръ умири́ши въ Правосла́віи, и ца́рскія ски́петры утверди́ши, и спасе́ши отъ всѣ́хъ зо́лъ Твоя́ рабы́, я́ко еди́на Благослове́нная.

Предстоя́тъ Ти́, Госпоже́ Богоро́дице, предъ Твои́мъ, Пречи́стая, о́бразомъ архіере́евъ сосло́віе, ца́ріе и кня́зи, и вси́ лю́діе, мона́си и простíи, вѣ́дуще Тя́ вои́стинну Помо́щницу си́льну и непобѣди́му, моле́нія Тебѣ́ приноси́ти отъ всея́ души́ подвиза́ютъ и поуща́ютъ на моли́тву къ Бо́гу, тре́бующе Твоея́ по́мощи, да простре́ши богоно́сныя Твоя́ ру́ки и умо́лиши за мíръ. Вонми́ и услы́ши, Влады́чице, и пода́ждь утѣше́ніе рабо́мъ Твои́мъ, до́ндеже не одолѣ́ютъ ны́ грѣхи́ на́ши тя́жкія и лю́тыя: Твоея́ бо всегда́ тре́буемъ вси́ по́мощи.

Гла́съ 8: Пе́рвѣе написа́вшейся Твое́й ико́нѣ ева́нгельскихъ та́инъ благовѣ́стникомъ, и къ Тебѣ́, Цари́цѣ, принесе́ннѣй, да усво́иши ту́ и си́льну содѣ́лаеши спасти́ честву́ющія Тя́, пора́довалася еси́, и я́ко су́щи ми́лостива, спасе́нія на́шего Содѣ́тельница, я́ко уста́ и гла́съ ико́нѣ бы́вши, я́коже и Бо́га внегда́ зачина́ющи во чре́вѣ, пѣ́снь воспѣ́ла еси́: Се́ отъ ны́нѣ ублажа́тъ Мя́ вси́ ро́ди! И на ту́ зря́щи, глаго́лала еси́ со вла́стію: Съ си́мъ о́бразомъ благода́ть Моя́ и си́ла. И мы́ и́стинно вѣ́руемъ, я́ко се́ рекла́ еси́, Госпоже́, си́мъ о́бразомъ съ на́ми еси́. Тѣ́мъ благоговѣ́йно предстоя́ще, покланя́емся Тебѣ́ раби́ Твои́, посѣти́ ны Твои́ми ма́терними щедро́тами.

Гла́съ 7: Гора́ еси́ вели́кая и пресла́вная, па́че горы́ Сина́йскія, Богоро́дице: она́ бо не терпя́щи сни́тія сла́вы Бо́жія во о́бразѣхъ и сѣ́нехъ, огне́мъ возгара́шеся, и гро́ми и мо́лніи та́мо бы́ша. Ты́ же, ве́сь Боже́ственный Огнь су́щь, Бо́жіе Сло́во во чре́вѣ Твое́мъ неопа́льно носи́ла еси́, и отъ сосе́цъ Твои́хъ млеко́мъ пита́ла еси́, ма́ніемъ Нося́щаго вся́. И ны́нѣ, ма́тернее дерзнове́ніе къ Нему́ иму́щи, помози́, Влады́чице, вѣ́рно пра́зднующимъ Тво́й честны́й пра́здникъ, и не забу́ди, ми́лостивно посѣща́ющи: прія́ла бо еси́ отъ Бо́га да́ръ стро́ити и покрыва́ти христоимени́тое ста́до, рабы́ Твоя́.

Сла́ва, и ны́нѣ, гла́съ 6:

Тебѣ́ вси́ ро́ди человѣ́честіи хва́льныя да́ры прино́сятъ, Влады́чице, и мо́лятся я́ко Цари́цѣ и Ма́тери Бо́жіи: проро́цы Тя́ прему́дро проповѣ́даша, леви́ти благослови́ша, апо́столи и му́ченицы исповѣ́даша, ца́ріе и кня́зи покланя́ются, архіере́е проповѣ́дуютъ, мона́си и простíи благоговѣ́ютъ, бога́тіи и убо́зіи, сироты́ и вдовы́, и вся́къ во́зрастъ, и вся́ко преспѣ́яніе, ста́рческое и младе́нческое, подъ кро́въ Тво́й держа́вный съ вѣ́рою прибѣга́емъ: покры́й и соблюди́, Госпоже́, моли́твами Твои́ми, и спаси́ отъ бѣ́дъ ду́ши на́ша.

На стихо́внѣ стихи́ры, гла́съ 2:

Вмѣсти́лище чи́стое Свѣ́та пречи́стаго, Богоро́дице,* ка́ко Тя́, раби́, досто́йно воспѣва́емъ,* я́ко явле́ніемъ пречи́стыя Твоея́ ико́ны* и Превѣ́чнаго Младе́нца, вся́ освѣща́еши.

Сти́хъ: Помяну́ и́мя Твое́* во вся́комъ ро́дѣ и ро́дѣ.

О, Дѣ́во Нескве́рная, Богора́дованная,* что́ Ти когда́ таково́ благодаре́ніе принесе́мъ,* я́ко блаже́ннаго Твоего́ Рождества́* всесія́ющею луче́ю* всѣ́хъ отъ тлѣ́нія къ жи́зни возвела́ еси́.

Сти́хъ: Слы́ши, Дщи́, и ви́ждь,* и приклони́ у́хо Твое́.

О, Дѣ́во Госпоже́, Ма́ти Зижди́телева,* небе́сныхъ еси́ чино́въ ра́дованіе* и человѣ́ческому ро́ду благослове́нная помо́щнице,* моли́ о спасе́ніи ду́шъ на́шихъ.

Сла́ва, и ны́нѣ, гла́съ 5:

Воспое́мъ, лю́діе, свѣ́тло Дави́дскую пѣ́снь Отрокови́цѣ, Невѣ́стѣ Бо́жіи и Ма́тери Царя́ Христа́: предста́ Цари́ца одесну́ю Тебе́, Влады́ко, ря́сны златы́ми одѣ́яна и преукра́шена Боже́ственными благолѣ́потами. Сію́ у́бо я́ко избра́нную и до́брую въ жена́хъ, па́че всего́ мíра удобри́въ, благоволи́лъ еси́ роди́тися изъ Нея́ вели́кія ра́ди ми́лости, и Сію́ Помо́щницу лю́демъ Твои́мъ дарова́лъ еси́ спаса́ти и покрыва́ти отъ бѣ́дъ всемогу́щею Твое́ю и Боже́ственною си́лою, Ея́же моли́твами, Христе́ Бо́же, поми́луй на́съ.

Тропа́рь, гла́съ 4:

Засту́пнице усе́рдная, Ма́ти Го́спода Вы́шняго, за всѣ́хъ мо́лиши Сы́на Твоего́ Христа́ Бо́га на́шего и всѣ́мъ твори́ши спасти́ся, въ держа́вный Тво́й покро́въ прибѣга́ющимъ. Всѣ́хъ на́съ заступи́, о Госпоже́ Цари́це и Влады́чице, и́же въ напа́стехъ и ско́рбехъ, и въ болѣ́знехъ, обремене́нныхъ грѣхи́ мно́гими, предстоя́щихъ и моля́щихся Тебѣ́ умиле́нною душе́ю и сокруше́ннымъ се́рдцемъ, предъ пречи́стымъ Твои́мъ о́бразомъ со слеза́ми, и невозвра́тно наде́жду иму́щихъ на Тя́ избавле́нія всѣ́хъ зо́лъ. Всѣ́мъ поле́зная да́руй и вся́ спаси́, Богоро́дице Дѣ́во: Ты́ бо еси́ боже́ственный покро́въ рабо́мъ Твои́мъ.


НА УТРЕНИ,
На Бо́гъ Госпо́дь: тропа́рь три́жды.

По 1-й стихоло́гіи сѣда́ленъ, гла́съ 3:

Лю́діе благочести́віи, правовѣ́рніи собо́ри христоимени́тіи, приступи́те вѣ́рно вси́, боже́ственному припа́дающе Бо́жія Ма́тере о́бразу: Та́я бо исцѣле́ніе боля́щимъ ра́достно подае́тъ, уязвля́етъ же злосла́вныя, я́ко стрѣла́ отъ лу́ка, на́съ всѣ́хъ весели́тъ свѣтови́дно и благода́тію озаря́етъ моли́твами Свои́ми.

Сла́ва, и ны́нѣ:

Всю́ Тя Бо́гъ освяти́, Дѣ́ву до́брую и непоро́чную въ жена́хъ, проро́ки прообрази́въ че́стно, іере́и благослови́въ, во Свята́я святы́хъ всели́, а́нгеломъ воспита́, съ небесе́ пи́щу хлѣ́бъ подая́. Са́мъ же Преблагíй, Единоро́дное Бо́гъ Сло́во, всели́ся въ Тя́ и пло́тію про́йде изъ Тебе́. Тѣ́мже Ти́ покланя́емся и чти́мъ, я́ко вои́стинну и́стинную су́щую Богоро́дицу.

По 2-й стихоло́гіи сѣда́ленъ, гла́съ 4:

Да ликовству́етъ свѣ́тло вѣ́рныхъ все́ мно́жество, рыда́етъ же де́монское во́инство, ви́дяще многоиме́нныя сія́ющя пра́здники Бо́жія Ма́тере, ублажа́ему Бо́жію Ма́терь боже́ственными пѣ́сньми, идѣ́же бо богопрія́тно сла́вится преблагослове́нная Богоро́дица Влады́чица, богоизбра́нная Отрокови́ца, непрія́зни паде́ніе, христіа́номъ же крѣ́пкое утвержде́ніе.

Сла́ва, и ны́нѣ:

О, всеблагослове́нная Богоро́дице Влады́чице, богоизбра́нная Отрокови́це, свѣ́тлое проро́ческое сбытіе́, апо́стольская похвало́, и му́ченическое исповѣ́даніе и вѣ́нче, а́нгелы чти́мая и человѣ́ческими ро́ды многопѣ́тая, и всего́ мíра вожделѣ́нная Помо́щница, изба́ви рабы́ Твоя́ осужде́нія бу́дущаго и е́зера о́гненнаго, еди́на Благослове́нная.

По поліеле́и сѣда́ленъ, гла́съ 1:

Правовѣ́рно чту́щія Тя́, и Импера́тора къ Тебѣ́ прибѣга́юща и ико́нѣ Твое́й святѣ́й любе́зно покланя́ющася, о Бо́жія Ма́ти, спаси́ и не да́ждь въ расхище́ніе сопоста́томъ, ниже́ на́йдутъ на ны́ вся́ зла́я, я́же грѣхи́ на́ша угото́ваша на́мъ, ниже́ беззако́нія на́ша превзы́дутъ на главы́ на́ша, но да Твоя́ ма́терняя къ Бо́гу преодолѣ́етъ за ны́ богопрія́тная моли́тва.

Сла́ва, и ны́нѣ:

Пречи́стая Твоя́ ико́на, Богоро́дице Дѣ́во, врачевство́ всему́ мíру духо́вное, къ не́йже прибѣга́юще, Тебѣ́ покланя́емся и почита́емъ, и лобыза́емъ, и чти́мъ, исцѣле́ній благода́ть почерпа́юще отъ нея́, и неду́гъ тѣле́сныхъ и душе́вныхъ страсте́й, Твои́ми моли́твами свобожда́емся.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждъ, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 8:

Пріиди́те, возра́дуемся [держа́внѣй Засту́пницѣ ро́да на́шего, Цари́цѣ Богоро́дицѣ, пріиди́те къ ти́хому Ея́ и чу́дному, почита́емому а́нгелы, честно́му поклони́мся о́бразу. Да́руетъ бо Богоро́дица вѣ́рнымъ оби́льныя да́ры цѣле́бныя, отъ неистощи́маго исто́чника святы́я ико́ны, неоску́дную благода́ть источа́ющи: тьмы́ избавля́етъ на́съ искуше́ній и бѣ́дъ, и вся́каго грѣха́, благоче́стно и богопрія́тно прославля́ющихъ, и чту́щихъ свѣ́тлую и чу́дную Богома́тере святу́ю ико́ну. Тѣ́мъ, воспѣва́юще, воззове́мъ Первообра́знѣй: ра́дуйся, любе́зная мíру по́моще во спасе́ніе ду́шъ на́шихъ].

Кано́нъ Одиги́трію Пресвяты́я Богоро́дицы, со ирмосо́мъ на 6. Творе́ніе іеромона́ха Игна́тія, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ра́достно, Чи́стая, ны́нѣ наста́вшее хвале́ніе приноша́ю, ра́дуяся, и ти́химъ гла́сомъ, Одиги́тріе, вопію́ Ти: ра́дуйся и испо́лни мя́ ра́зума, пѣ́ти начина́юща.

Христа́ роди́вшая, ра́дость на́мъ вѣ́чную, о, ра́дуйся, Всепѣ́тая, правосла́вныхъ наде́жда, Одиги́тріе, всепѣ́тая Дѣви́це! Ра́дости испо́лни мя́ мíрови жела́нныя.

Лику́ютъ вси́ человѣ́цы и а́нгели, всегда́ согла́сно вопію́ще на небеси́ и на земли́, Одиги́тріе: ра́дуйся, Дѣви́це, ра́дости бо Рождество́мъ Твои́мъ вся́ческая испо́лнила еси́.

Ра́дуйся, Одиги́тріе, со стра́хомъ Ти́ вопію́щихъ ра́дости сподо́би, Ма́ти су́щія ра́дости, избавля́ющи скорбе́й вся́ческихъ, и всѣ́хъ поми́луй, къ Тебѣ́ прибѣга́ющихъ.

Инъ кано́нъ пра́здника на 8, гла́съ то́йже.
Пѣ́снь 1. Ирмо́съ то́йже.

Благоговѣ́ютъ Ти́, Богоро́дице, а́нгеловъ нача́льницы, и святы́хъ чи́ни че́стно слу́жатъ, пра́ведніи красу́ются, небе́сныхъ Хода́таицу блажа́тъ Тя́. Ку́пно же и земля́ и не́бо въ весе́ліи свѣ́тло восхваля́ютъ Тя́, и мы́, грѣ́шніи, ми́лости про́симъ: озари́ на́ша сердца́, Влады́чице, воспѣ́ти пѣ́снь святы́я Твоея́ ико́ны явле́нію.

Пріиди́те, собери́теся, христоимени́тіи лю́діе, умы́ та́йно очи́стившеся, во святу́ю це́рковь Ма́тере Христа́ Бо́га на́шего: источа́етъ бо на́мъ неоску́дно отъ святы́я ико́ны исто́чникъ духо́венъ, цѣле́бенъ душа́мъ и тѣ́ломъ, пѣ́снь вопію́щимъ: благослове́нъ изъ Тебе́ рожде́йся Бо́гъ на́шъ.

Диви́тъ, Пренепоро́чная, и ужаса́етъ вся́къ слу́хъ стра́нно чу́до боже́ственнаго Твоего́ Рождества́: ка́ко херуви́мскаго Творца́ зачала́ еси́? ка́ко Огнь нестерпи́мый во утро́бѣ носи́ла еси́? ка́ко су́щую Жи́знь пло́тію облекла́ еси́ и Живо́тъ всему́ мíру родила́ еси́, Бо́га ку́пно и человѣ́ка?

Подъ кро́въ Тво́й, Дѣ́во Госпоже́, прибѣга́емъ вси́ ро́ди человѣ́честіи: просвѣти́ ны свѣ́томъ Рождества́ Твоего́, грѣ́шныя рабы́ Твоя́, моля́щіяся приле́жно и кла́няющіяся пречи́стѣй Твое́й ико́нѣ, прося́ще отъ Тебе́ прія́ти вели́кія ми́лости.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Христа́, Вы́шняго Царя́, о, ра́дуйся, непоколеби́мая чи́стая и одушевле́нная пала́то! Ра́дуйся, Одиги́тріе: ра́дуйся, Тобо́ю неруши́мь на́шъ гра́дъ сохраня́ется.

Вмѣсти́ти Его́же не возмо́же тва́рь, во утро́бу неискусобра́чную, Одиги́тріе Дѣви́це, тѣле́сно вмѣсти́ла еси́, тѣ́мже Ти́, ра́дуйся, пое́мъ, по до́лгу велича́юще.

Ра́дость многопѣ́тая мíрови, ра́достно Ти́ пою́ще при́сно, вѣ́чнующія, Чи́стая, ра́дости сподобля́емся Твои́ми ма́терними моли́твами къ Ро́ждшемуся изъ Тебе́, Одиги́тріе.

Злату́ю Тя́ ста́мну, и свѣ́щникъ, и же́злъ, и трапе́зу, Чи́стая, призыва́емъ, Одиги́тріе, и гла́съ е́же, ра́дуйся, Тебѣ́ при́сно привноша́емъ съ си́ми же имены́.

Инъ. Ирмо́съ то́йже.

Ку́ю Ти досто́йную похвалу́ на́ше принесе́тъ коне́чное неможе́ніе? Яко явле́ніемъ пречи́стыя Твоея́ боже́ственныя ико́ны незави́стныя исто́чники цѣле́бныя источа́еши, вѣ́рно прибѣга́ющимъ къ Тебѣ́ рабо́мъ Твои́мъ.

Боже́ственныя Твоея́ ико́ны свято́е явле́ніе, Богоро́дице Дѣ́во, я́ко свѣтоза́рное возсія́ на́мъ со́лнце, пресла́вныхъ чуде́съ лучи́ пуща́ющи, тьмы́ лю́тыхъ обстоя́ній отгоня́ющи свяще́нными Твои́ми, Влады́чице, предста́тельствы.

Испо́лнила еси́ благода́ти иногда́ первопи́санную Твою́ ико́ну, Госпоже́ Дѣ́во Богоро́дице, и ны́нѣ та́ же благода́ть и́стинствуетъ сія́ніемъ вѣ́ры чуде́съ, я́ко тоя́ ра́ди первопи́санныя, ко спасе́нію вѣ́рно къ Тебѣ́ по Бо́зѣ прибѣга́ющимъ.

Покланя́емся, Богоро́дице, Твоему́ пречи́стому о́бразу и пресла́дкому Твоему́ Младе́нцу, превѣ́чному и незаходи́мому Свѣ́ту, Христу́, Имже спасла́ еси́ отъ лю́тыхъ зо́лъ и тлѣ́нія сме́ртнаго все́ человѣ́ческое естество́.

Сѣда́ленъ, гла́съ 8. Подо́бенъ: Прему́дрости.

Боже́ственніи Сло́ва апо́столи, Ева́нгелія Христо́ва велегла́сніи вселе́нныя благовѣ́стницы, боже́ственную це́рковь созда́вше въ пресвято́е Твое́ и́мя, Богоро́дице, и къ Тебѣ́, Госпоже́, прихо́дятъ, моля́ще Тя́ пріити́ на тоя́ освяще́ніе. Ты́ же, о Богома́ти, рекла́ еси́: иди́те съ ми́ромъ и Азъ съ ва́ми та́мо е́смь. Они́ же, ше́дше, обрѣта́ютъ та́мо на стѣнѣ́ це́ркве Твоего́, Влады́чице, о́браза подо́біе, Боже́ственною пи́сано си́лою шаро́вными подо́біи, и, ви́дѣвше, поклони́шася Ти́ и просла́виша Бо́га. Съ ни́миже и мы́ боже́ственнѣй Твое́й покланя́емся ико́нѣ, прося́ще отъ Тебе́ вели́кія ми́лости: да́руй согрѣше́ній оставле́ніе рабо́мъ Твои́мъ, еди́на Благослове́нная.

Сла́ва, и ны́нѣ, то́йже.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ра́дуйся, чу́до чудесе́мъ, Одиги́тріе Влады́чице; ра́дуйся, всѣ́мъ ра́досте градо́въ и ве́сей, непобѣди́мое христіа́нское въ бѣда́хъ храни́лище, и предгра́діе, и на враги́ побѣжде́ніе.

Ра́дуйся, ра́дуйся, царе́й правосла́вныхъ похвало́, и христолюби́выхъ во́инствъ покро́въ пребыва́еши всѣ́хъ, Цари́це; ра́дуйся, Одиги́тріе, прибѣ́жище всѣ́мъ на́мъ и утвержде́ніе.

Ра́дуйся, всѣ́мъ ско́рое въ бѣда́хъ избавле́ніе; ра́дуйся, гото́вое всѣ́мъ скорбя́щимъ утѣше́ніе; ра́дуйся, Всепѣ́тая; ра́дуйся, Одиги́тріе Всеблагослове́нная, всѣ́мъ немощны́мъ исцѣли́тельнице.

Ра́дуйся, Ея́же вели́чія вся́ тва́рь сла́вити у́бо спѣши́тъ по достоя́нію, но не возмога́етъ, Одиги́тріе, и сего́ ра́ди зове́тъ Ти́: ра́дуйся, Влады́чице, Боговмѣсти́мое жили́ще.

Инъ. Ирмо́съ то́йже.

Почти́мъ, лю́діе, Чи́стыя въ чистотѣ́ ико́ну Дѣ́вы Богоро́дицы и Тоя́ Боже́ственнаго Младе́нца, Христа́ Бо́га на́шего, и лобыза́емъ и прославля́емъ со стра́хомъ и тре́петомъ: почита́емъ бо ико́ну благоче́стно, па́че же почита́емъ Са́мую Ту́ю су́щую Чи́стую Богома́терь.

Дави́дъ, боже́ственный и чу́дный проро́къ, издале́ча прови́дя, глаго́ла: лицу́ Твоему́ помо́лятся бога́тіи лю́діе. Мы́ же, вѣ́рніи, покланя́емся и лобыза́емъ честну́ю ико́ну, душа́ми ку́пно и тѣлесы́ освяща́ющеся.

Ева́нгелія Христо́ва богогла́сный списа́тель Лука́, Бо́жіимъ манове́ніемъ всенепоро́чный Тво́й напису́етъ о́бразъ, Богоро́дице, и Младе́нца Превѣ́чнаго на рука́хъ Твои́хъ вообрази́въ, къ нему́же притека́ющія напа́стей и бѣ́дъ избавля́еши, и вся́ покрыва́еши, и спаса́еши Твое́ю ми́лостію.

Ты́ еси́ похвало́ и вѣне́цъ святы́мъ всѣ́мъ, о Цари́це! Ты́ упова́ніе на́ше и Помо́щница по Бо́зѣ, и на Тя́ наде́жду спасе́нія на́шего возложи́хомъ вси́. Тебѣ́ мо́лимся, я́ко Бо́жіи Ма́тери: одожди́ грѣ́шнымъ рабо́мъ Твои́мъ бога́тыя Твоя́ душеспаси́тельныя ми́лости.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Благосты́ни бе́здно и щедро́тамъ еси́, ра́дуйся, Одиги́тріе Дѣви́це; ра́дуйся, всѣ́мъ ра́дость творя́щи вѣ́рнымъ; о, ра́дуйся, су́щимъ въ бѣда́хъ и скорбя́щимъ пребы́страя засту́пнице!

Ра́дости, отъ исполне́нія вели́чія чуде́съ Твои́хъ зря́ще, исполня́емся, вси́ незря́щіи, слы́шаще же, вѣ́рніи. Тѣ́мже, ра́дуйся, Тебѣ́ при́сно всю́ду и вси́, Одиги́тріе, пое́мъ.

Христа́ Бо́га на́шего, о, ра́дуйся, Одиги́тріе, жили́ще и до́мъ неизрече́ннѣй и Пребоже́ственнѣй, Дѣ́во, сла́вѣ Его́! О, ра́дуйся, пала́то преукраше́нная! Ра́дуйся, гра́де одушевле́нный, присноца́рствующій!

Ра́дость неоску́дную Тя́ разсмотря́юще, я́ко мо́ре, Отрокови́це, Одиги́тріе Дѣви́це, ра́дующеся вси́, ра́дуйся, вопіе́мъ Ти́, и пою́ще, Боже́ственныхъ даро́въ неви́димо при́сно отъ Тебе́ ожида́юще.

Инъ. Ирмо́съ то́йже.

Вся́ко, Пречи́стая, существо́ воспѣ́ти недоумѣ́етъ Тя́, па́че бо го́рнихъ умо́въ превозвы́силася еси́, ро́ждши непристу́пнаго и стра́шнаго Всецаря́ и Бо́га, но, я́ко Ми́лостива и ско́рая человѣ́комъ Помо́щница, вонми́ моле́нію ра́бъ Твои́хъ и да́руй Твою́ по́мощь.

Идѣ́же осѣни́тъ благода́ть Твоя́, Богоро́дице, стра́хомъ исчеза́ютъ де́мони и разруша́ется злоко́зненное тѣ́хъ мечта́ніе, бѣ́гаютъ ду́си те́мніи, ра́дуется же вѣ́рныхъ все́ мно́жество, Тебѣ́ пѣ́снь хва́льну отъ се́рдца вопію́ще: ра́дуйся, боже́ственный Покро́ве ду́шъ на́шихъ.

Безоче́снымъ сла́дкое зрѣ́ніе дае́тся, глухи́мъ слы́шаніе, нѣмы́мъ благоглаго́ланіе, хромы́мъ хожде́ніе, прокаже́ннымъ очище́ніе, де́монствуемымъ цѣлому́дріе и въ болѣ́знехъ су́щимъ разли́чныхъ исцѣле́ніе, осѣне́ніемъ Пречи́стыя Твоея́, Богоро́дице, ико́ны.

Не умолчи́мъ никогда́же, Богоро́дице, псалмы́ и пѣ́сньми воспѣва́ти вели́чія Твоя́, Обра́дованная: Бо́га бо вои́стинну воплоти́вшагося родила́ еси́, во спасе́ніе на́ше всемíрное и избавле́ніе.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Христа́, Чи́стая, пріе́млющи, гла́съ, е́же ра́дуйся, Одиги́тріе Дѣви́це, слы́шала еси́; Его́же неизрече́нно ро́ждши, ра́дуйся, отъ всѣ́хъ слы́шиши всегда́.

Ра́дости вся́ испо́лнила еси́, вы́шнія и ни́жнія Ты́ совокупи́ла еси́, Одиги́тріе, тѣ́мже ра́достно и согла́сно ны́нѣ не́бо и вся́ земля́ зове́тъ Ти́.

Вдова́мъ, о, ра́дуйся, Всепѣ́тая, и всѣ́мъ си́рымъ, Одиги́тріе, утѣше́ніе! Ра́дуйся, всѣ́мъ источа́ющи ни́щимъ бога́тство неистощи́мое!

Зла́та вся́каго блиста́ема и у́тра со́лнечнаго свѣтлѣ́йши, жили́ще Христо́во; ра́дуйся, Одиги́тріе, ра́дуйся, Дѣви́це, ра́дуйся, Невѣ́сто неневѣ́стная.

Инъ. Ирмо́съ то́йже.

Боже́ственнаго Твоего́ Рождества́, Дѣ́во Госпоже́, пребога́тая благода́ть, ю́же дре́вле изглаше́ніемъ предала́ еси́ пречи́стому Твоему́ о́бразу, неоску́днѣ дѣ́йствовати вели́кая же и пресла́вная, во спасе́ніе на Тя́ надѣ́ющимся.

Идѣ́же прославля́ется свято́е и́мя Обра́дованныя Богоро́дицы, та́мо вся́ческихъ благи́хъ исто́чницы пролива́ются; пріиди́те въ чистотѣ́, человѣ́цы, се́ бо явле́ніе боже́ственныя Дѣ́вы ико́ны сказу́етъ Цари́цы прише́ствіе, во спасе́ніе всѣ́хъ вѣ́рныхъ.

Цѣле́нія болѣ́зней, отгна́ніе же страсте́й и душепита́тельное спасе́ніе, грѣхо́въ проще́ніе и вѣ́чное избавле́ніе отъ пречи́стыя Твоея́ ико́ны, Влады́чице, вѣ́рно приходя́ще, пріе́млемъ, Богома́ти Всенепоро́чная.

Къ Тебѣ́, Госпоже́, прибѣга́ютъ ро́ди правовѣ́рныхъ, про́сятъ вели́кія ми́лости и пріе́млютъ неоску́дно су́щіи въ неду́зѣхъ исцѣле́ніе, въ страсте́хъ премѣне́ніе, въ печа́лѣхъ утѣше́ніе. Источи́ и мнѣ́, Влады́чице, ка́плю душеспаси́тельную, да со всѣ́ми и а́зъ пою́ Твое́ вели́чіе.

Конда́къ, гла́съ 8. Подо́бенъ: Взбра́нной.

Притеце́мъ, лю́діе, къ ти́хому сему́ и до́брому приста́нищу, ско́рой помо́щницѣ, гото́вому и те́плому спасе́нію, покро́ву Дѣ́вы, ускори́мъ на моли́тву и потщи́мся на покая́ніе: источа́етъ бо на́мъ неоску́дныя ми́лости Пречи́стая Богоро́дица, предваря́етъ на по́мощь и избавля́етъ отъ вели́кихъ бѣ́дъ и зо́лъ благонра́вныя и богобоя́щіяся рабы́ Своя́.

Икосъ:

Смы́слъ очи́стивше и у́мъ, притеце́мъ къ Богоро́дицѣ, свѣ́тло пѣ́сньми ублажа́юще Ю, и пречи́стую ико́ну Ея́ прославля́емъ и чти́мъ, и, припа́дающе, покланя́емся я́ко Само́й су́щей Оной: че́сть бо ико́ны на первообра́зное восхо́дитъ, и почита́яй и покланя́яйся е́й почита́етъ са́мое первообра́зное, я́коже боже́ственніи отцы́ реко́ша. И а́ще кто́ не чти́тъ Пресвяты́я Богоро́дицы и не покланя́ется ико́нѣ Ея́, ана́ѳема да бу́детъ: посрамля́етъ бо и погубля́етъ не чту́щія ю́, избавля́етъ же отъ вели́кихъ бѣ́дъ и зо́лъ благонра́вныя и богобоя́щіяся рабы́ Своя́.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ра́дуйся, ра́дуйся, Богоро́дице Одиги́тріе, всѣ́хъ и всегда́ наставля́ющи вѣ́рныхъ ше́ствовати ко вся́кому пути́ спаси́тельному; ра́дуйся, Влады́чице, Тобо́ю бо при́сно избавля́емся настоя́щія ва́рварскія бѣды́.

Ра́дуйся, ра́дуйся, Одиги́тріе, бдя́щи и моля́щися о на́съ къ Бо́гу, и вся́кія зло́бы хода́тайствомъ Твои́мъ, вся́ческихъ скорбе́й, Богороди́тельнице, всѣ́хъ люде́й избавля́ющи.

Ра́дуйся, ра́дуйся, Пресвята́я Одиги́тріе, Яже проше́нія на́ша къ по́льзѣ на́мъ исполня́ющи, и хотя́щи всѣ́мъ при́сно всегда любодру́жное благо́е еди́нство, спѣ́шное же во изя́щныхъ.

Ра́дуйся, ра́дуйся, корабле́мъ, Одиги́тріе, ну́ждно пла́вающимъ, избавля́ющи вѣ́рныхъ и всѣ́мъ избавле́ніе отъ вся́кія ско́рби и неду́ги пестро́тныя и ме́дленныя разрѣша́ющи вско́рѣ.

Инъ. Ирмо́съ то́йже.

Пріиди́те, почерпе́мъ отпуще́ніе отъ неистощи́маго исто́чника, точа́щаго святы́ню — Пречи́стыя Дѣ́вы, и Тоя́ Пречи́стаго Младе́нца, Бо́жія Сло́ва, на́съ ра́ди вочеловѣ́чшагося. Къ Нему́ же возопіи́мъ: Тво́рче Изба́вителю, препросла́вленный со Отце́мъ и Ду́хомъ, Бо́же, благослове́нъ еси́.

Неусы́пную, Чи́стая, и богопрія́тную иму́щи моли́тву, и непреодолѣ́емую держа́ву крѣ́пости, враго́въ на́шихъ де́рзость, я́же на ны́, разори́, и вы́я и́хъ подъ но́зѣ вѣ́рному Импера́тору на́шему низложи́, да возвесели́мся о Тебѣ́, раби́, Сы́ну Твоему́ вопію́ще: оте́цъ на́шихъ Бо́же, благослове́нъ еси́.

Ра́дуемся и весели́мся, вѣ́рніи лю́діе, чу́дному явле́нію ико́ны Пречи́стыя Влады́чицы Богоро́дицы, рѣка́ бо яви́ся неисчерпа́ема, цѣле́бную во́ду точа́щи: слѣпы́мъ бо ви́дѣти дае́тъ и глухи́мъ слы́шаніе, хромы́мъ хожде́ніе и всѣ́мъ су́щимъ въ неду́зѣхъ безме́здное исцѣле́ніе.

Неиспы́тана глубина́, недовѣ́домо та́инство, непостижи́мъ о́бразъ, Дѣ́во, зача́тія Твоего́: зача́тіе безъ сѣ́мене, безъ му́жа рождество́, Безпло́тный воплоти́ся, Превѣ́чный младе́нствуетъ, Сы́нъ Бо́жій, Сы́нъ Тебе́, Дѣ́вы, быва́етъ. Ему́же вопіе́мъ: Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ра́дуйся, Всеблагослове́нная Марíе, изъ Тебе́ бо Всеблагослове́нный Бо́гъ одѣ́яся во всего́ мя, человѣ́ка, и, одѣ́явся, соедини́ Своему́ Божеству́ неизрече́ннымъ соедине́ніемъ, Дѣ́во Одиги́тріе; ра́дуйся, Обра́дованная, ра́досте всего́ мíра.

Ра́дуйся, лука́выхъ духо́въ Прогони́тельнице; ра́дуйся, Богоро́дице Одиги́тріе; ра́дуйся, Юже небе́сная неви́димая во́инства славосло́вятъ всегда́ и велича́ютъ я́ко Ма́терь Бо́жію бы́вшую; ра́дуйся, Яже ни́жняя сочта́вши съ вы́шними.

Ра́дуйся, всѣ́хъ небе́сныхъ си́лы безъ разсужде́нія превосходя́щая; ра́дуйся, Одиги́тріе; ра́дуйся, вся́кія тва́ри, я́ко Бо́га ро́ждшая, госпо́дствующи; е́й, Влады́чице Всепѣ́тая, ра́дуйся, я́ко пребыва́еши Дѣ́вою, Чи́стая, и по рождествѣ́.

Ра́дуйся, жена́мъ всѣ́мъ сла́во, хра́ме преосвяще́нный Бо́га на́шего; ра́дуйся, Одиги́тріе; ра́дуйся, душеспаси́тельная все́й вселе́ннѣй; ра́дуйся, покрыва́ющій о́блаче, небе́съ ши́ршая; ра́дуйся, мѵрополо́жнице, Боже́ственнаго мѵ́ра полна́.

Инъ. Ирмо́съ то́йже.

Умъ а́нгельскій и человѣ́ческій ужаса́ется, Богоро́дице, ка́ко Бо́га небе́снаго, ложесна́ми объе́мши, воплоти́ла еси́? ка́ко, Младе́нца ро́ждши, я́ко Сы́на на руку́ но́сиши? Его́же ужаса́ется тва́рь и трепе́щутъ го́рніи престо́ли, вопію́ще непреста́нно: Свя́тъ, Свя́тъ, Свя́тъ еси́, Бо́же, препѣ́тый и превозноси́мый во вѣ́ки.

Ра́дуйся, су́щая ра́досте всего́ мíра, со арха́нгеломъ Гавріи́ломъ вопіе́мъ Ти́, Богоро́дице: ра́дуйся, вмѣсти́лище Невмѣсти́маго; ра́дуйся, Благода́тная, носи́ло Божества́ всего́; ра́дуйся, Ада́мово воззва́ніе, съ Тобо́ю Госпо́дь, и Тебе́ ра́ди съ на́ми, спаса́я на́съ. Его́же пое́мъ и превозно́симъ во вѣ́ки.

Ко́рень Іессе́евъ освяще́нный — ко́рень грѣха́ на́шего исто́ргнула еси́; же́злъ Ааро́новъ процвѣ́тшій — Жизнода́теля цвѣ́та израсти́вши Христа́; ста́мно маннопріе́мная — сме́рти всю́ си́лу сокруши́ла еси́ и въ поро́ду жи́зни возвела́ еси́ ро́дъ человѣ́ческій. Тѣ́мже Тя́ пое́мъ, до́брыхъ вино́вную.

Ты́ похвала́ христіа́номъ еси́, Влады́чице, Ты́ ору́жіе на враги́ и стѣна́ къ Тебѣ́ прибѣга́ющимъ. Тя́ и ны́нѣ на по́мощь призыва́емъ, Госпоже́, не да́ждь враго́мъ вознести́ся на лю́ди Твоя́, и́же Тебе́ не хва́лятъ, ни Сы́на Твоего́, Богоро́дице, и Твое́й ико́нѣ не кла́няются: си́хъ побѣди́ и ду́ши на́ша спаси́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся, свѣще́, Свѣ́тъ невече́рній поне́сшая, и въ рождествѣ́ Твое́мъ многобо́жія тьму́ разруши́вшая, и а́довы про́пасти изба́вльшая лю́ди; ра́дуйся, Одиги́тріе Богоро́дице, добро́тъ всѣ́хъ Предхода́таице.

Ра́дуйся, земле́, изъ нея́же кла́съ прозя́бши небе́сный вѣ́рнымъ, и мíра всего́ душегу́бнаго гла́да изба́ви, разу́мная и одушевле́нная; о, ра́дуйся, виногра́де, и́же гро́здъ живо́тный ро́ждшая, Богоро́дице Чи́стая Одиги́тріе!

Ра́дуйся, та́йныхъ цвѣто́въ прекра́сный су́щій раю́; ра́дуйся, Ма́ти Дѣ́во, неви́димыхъ ра́зумъ чистото́ю страннолѣ́пно побѣ́ждши, Богороди́тельнице; ра́дуйся, Отрокови́це; ра́дуйся, Одиги́тріе, всемíрное чу́до и слы́шаніе.

Лѣ́то живота́ на́шего про́чее сохрани́ неврежде́нно, поможе́ніемъ Твои́мъ, Дѣ́во Отрокови́це, и сподо́би коне́цъ благíй получи́ти на́мъ, воспѣва́ющимъ Тя́ и взыва́ющимъ: ра́дуйся, Всеблаже́нная Богоро́дице, Чи́стая Одиги́тріе.

Инъ. Ирмо́съ то́йже.

Тебе́, тве́рдую помо́щницу ро́ду человѣ́ческому, Богоро́дице Марíе, ли́къ проро́ческій многообра́зно провозвѣсти́, сѣ́нь святу́ю, небе́съ простра́ннѣйшую, скрижа́ль богопи́санную и купину́ неопали́мую, две́рь богопрохо́дную, го́ру же и лѣ́ствицу, и мо́стъ, и же́злъ процвѣ́тшій; мы́ же вои́стину Богоро́дицу Тя́ велича́емъ.

Та́йна глубины́ Рождества́ Твоего́ у́мъ а́нгельскій ужаса́етъ, Дѣ́во, и пречи́стая ико́на де́моны прого́нитъ, и ли́ца нечести́выхъ омрача́етъ, и въ сту́дъ порѣва́етъ: не терпя́тъ бо взира́ти на си́лу ея́, бѣ́гаютъ же и исчеза́ютъ. Мы́ же любе́зно покланя́емся и лобыза́емъ, и Тя́, Богоро́дицу, велича́емъ.

Предста́тельница су́щи неотсту́пна къ Вы́шнему Царю́, я́ко иму́щи ма́терне дерзнове́ніе непосты́дно, въ ми́рѣ глубо́цѣ правосла́вныхъ житіе́ утверди́ и Благовѣ́рнаго Импера́тора на́шего возвы́си, и вся́ поле́зная да́руй всегда́ рабо́мъ Твои́мъ, да Тя́, Богоро́дице, велича́емъ.

О, Всеми́лостивая христіа́номъ помо́щнице! Не мо́жетъ Тя́ воспѣ́ти досто́йно у́мъ человѣ́ческій и а́нгельскій, я́ко всея́ тва́ри честнѣ́йши, небе́сныхъ и земны́хъ сла́внѣйши: всѣ́хъ бо родила́ еси́ Творца́ и Бо́га. Но, о Влады́чице! пріими́ ми́лостивно ю́же Тебѣ́ отъ се́рдца возложи́хомъ пѣ́снь, спаса́й на́съ всегда́, на Тя́ бо надѣ́емся.

Свѣти́ленъ:

Да почти́тся Всепѣ́тая Ма́ти Бо́жія, жи́знь су́щую ро́ждши — Христа́ Бо́га на́шего, ра́йскихъ двере́й отверзе́ніе, и всего́ мíра очище́ніе, къ животу́ возведе́ніе. Се́й е́сть проро́комъ глаго́лавый, Тому́ поклони́мся, Бо́гу и Спа́су ду́шъ на́шихъ. [Два́жды.]

Сла́ва, и ны́нѣ:

Пріиди́те, вѣ́рніи, съ чистото́ю, возвели́чимъ Пречи́стыя Ма́тере Бо́га на́шего чу́дную ико́ну, и Боже́ственнаго Младе́нца Спа́са Христа́, Его́же, я́ко ро́ждшая, на руку́ носи́вши, и ма́терне дерзнове́ніе къ Нему́ иму́щи, непреста́нно мо́литъ за ны́ и подае́тъ рабо́мъ Свои́мъ бога́тыя ми́лости.

На хвали́техъ стихи́ры на 4, гла́съ 4:

Просла́вимъ, вѣ́рніи, Обра́дованную Богоро́дицу,* па́че же во устѣ́хъ на́шихъ и́мамы всегда́* свято́е и благослове́нное и́мя Ея́,* непреста́нно прибѣга́юще къ пречи́стѣй Ея́* и цѣльбоно́снѣй ико́нѣ:* то́ю бо обрѣта́емъ я́же на земли́* вся́ блага́я и поле́зная* и су́щихъ на возду́сѣ отъ де́моновъ запина́ній избавля́емся,* я́ко Ма́ти, ро́ждшая всѣ́хъ Творца́,* спаса́етъ отъ бѣ́дъ ду́ши на́ша. [Два́жды.]

Да рыда́етъ вѣ́чно со́нмъ злочести́выхъ,* не исповѣ́дающихъ Тя́* въ рождествѣ́ Чи́стую Богороди́тельницу* и не покланя́ющихся пречи́стѣй Твое́й ико́нѣ.* Вѣ́рніи же лю́діе, ра́дующеся,* исповѣ́даемъ Тя́ и́стинную Дѣ́ву Богоро́дицу,* я́ко вои́стинну родила́ еси́ пло́тію* Христа́ Бо́га на́шего,* тлѣ́ніе Ада́мово попра́ла еси́* и отъ грѣха́ ве́сь мíръ очи́стила еси́,* жи́знь безконе́чную дарова́ла еси́,* ра́йскій вхо́дъ вѣ́рнымъ отве́рзла еси́* Боже́ственнымъ Твои́мъ Рождество́мъ.* Его́же моли́ спасти́ся на́мъ,* пою́щимъ вѣ́рно Твое́ та́инство.

Ра́дуется у́бо и весели́тся* неизрече́нною ра́достію* все́ мно́жество благочести́выхъ:* припа́дающе же покланя́ются,* вси́ благоговѣ́ютъ Бо́жіи Ма́тери съ боя́знію,* благодаря́ще Сію́ по Бо́зѣ,* я́ко Бо́га толи́кихъ превели́кихъ бла́гъ Хода́таицу,* въ ня́же жела́ютъ а́нгели прини́кнути,* дарова́ Богоро́дицею вѣ́рнымъ* Христо́съ Бо́гъ на́шъ,* имѣ́яй премно́жество щедро́тъ* и вели́кую пребога́тую ми́лость.

Сла́ва, и ны́нѣ, гла́съ 8:

Свята́я Твоя́ и сообра́зная ико́на, Богоро́дице Дѣ́во, благода́тію Твое́ю пребога́тый су́щій исто́чникъ, кипя́щій все́й подсо́лнечнѣй и свѣтя́щій всему́ мíру свѣтолу́чными Свята́го Ду́ха сія́ньми и исцѣле́ній свѣтлостьми́. Ты́ бо Бо́га Сло́ва пло́тію несказа́нно родила́ еси́, отъ арха́нгела Гавріи́ла сицева́я слы́шавши: ра́дуйся, Обра́дованная, Госпо́дь съ Тобо́ю, и Ду́хъ Святы́й осѣни́тъ Тя́ къ зача́тію. Та́кожде рекла́ еси́ къ первопи́санной Твое́й ико́нѣ, на ту́ зря́щи: съ то́ю Моя́ благода́ть, — и сло́во Твое́ со вла́стію ико́нѣ бы́стъ. И о́бразъ, и гла́съ, и си́ла, и дѣ́ло, и вся́къ у́мъ превосходя́щая Боже́ственная благода́ть, спребыва́ющи вѣ́чно, зна́менія и чудеса́ непреста́нно содѣва́етъ и душеполе́зное исцѣле́ніе всѣ́мъ вѣ́рно приходя́щимъ подае́тъ, Твои́ми Богома́терними непреста́нными къ Бо́гу моли́твами.

Славосло́віе вели́кое. [Ектеніи́.] И отпу́стъ.



НА ЛИТУРГІИ,

Слу́жба Богоро́дицы: [Блаже́нны, отъ кано́на пра́здника, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 75 – 85 об.

/ Къ оглавленію раздѣла /


Наверхъ / Къ титульной страницѣ

0