Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 7-й де́нь.
Преподо́бныхъ оте́цъ на́шихъ Ѳомы́, и́же въ Мале́и, и Ака́кія, и́же въ Лѣ́ствицѣ.

[ВЕЧЕРЪ,
На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Свѣ́телъ въ житіи́ дре́вле бы́въ,* бога́тствомъ и си́лою,* мона́шескимъ о́бразомъ, преподо́бне,* одѣ́ялся еси́, о́тче Ѳомо́,* нищетѣ́ подо́бяся на́съ ра́ди Вопло́щшагося,* тѣ́мже мно́гими тя́ дарова́ніи обогати́лъ е́сть.

Столпо́мъ о́гненнымъ зри́тельно* тя́ Бо́гъ наста́ви ко спасе́нію, о́тче,* къ ти́хому приста́нищу и къ горѣ́ безстра́стія,* во́ду же твое́ю моли́твою источи́лъ еси́* и неви́дящимъ е́же ви́дѣти* и хромы́мъ благотече́ніе дарова́лъ еси́.

Ины стихи́ры свята́го Ака́кія, гла́съ 4. Подо́бенъ: Яко до́бля.

Воздержа́ніемъ му́дрость плотску́ю умертви́лъ еси́* и ду́шу оживи́лъ еси́ посто́мъ* и добродѣ́телей соверше́ніемъ.* Отсю́дуже и яви́лся еси́,* я́ко жи́въ, по кончи́нѣ вои́стинну:* я́коже бо со́нъ, вмѣни́ся тебѣ́ сме́рть,* къ Бо́гу преста́вльшуся* и въ ру́цѣ ду́шу прело́жшу Ему́,* Ака́кіе сла́вне.

Страсте́й успи́лъ еси́* жела́нія, Ака́кіе,* бдѣ́ніе всено́щное я́ко стяжа́въ,* послуша́ніе и смире́ніе,* поуче́ніе же Боже́ственныхъ писа́ній,* и се́рдце чи́сто, и у́мъ несмуще́нъ,* тѣ́мже бы́лъ еси́ и прія́телище Ду́ха Свята́го,* зари́ чуде́съ возсія́въ конце́мъ.

Мірска́го пристра́стія до конца́ возгнуша́вся,* безстра́стія сосу́дъ бы́лъ еси́,* въ любому́дріи же, сла́вне,* дѣ́тельнымъ восхожде́ніемъ возвы́сился еси́* къ самому́ жела́нію коне́чному* и узрѣ́лъ еси́ та́йнымъ видѣ́ніемъ* неви́димыхъ недомы́сленныя и боже́ственныя добро́ты,* Ака́кіе всему́дре и блаже́нне.

Сла́ва, и ны́нѣ, богоро́диченъ:

Яже Бо́га невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вша я́вѣ,* не пре́зри мене́, Всечи́стая, ны́нѣ скорбя́ща,* но уще́дри ско́ро* и разли́чныя вражды́ же* и вре́да лука́ваго свободи́.

Крестобогоро́диченъ:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


[НА УТРЕНИ,]
Кано́нъ преподо́бного Ѳомы́, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Просвѣще́ніе Боже́ственныя благода́ти, сла́вне, въ души́ пріи́мъ, я́ко другíй Еги́петъ, страсте́й мглу́ оста́вилъ еси́ и житіе́ прія́лъ еси́ небе́сное.

Свѣ́телъ, о́тче, въ житіи́ бы́въ, на иноплеме́нники воздви́глъ еси́ неисче́тны побѣ́ды и, мона́шествовавъ преподо́бно, полки́ де́моновъ побѣди́лъ еси́.

Воздержа́тельно врагу́ спле́тся, посо́біемъ, преподо́бне, Боже́ственнаго Ду́ха смири́лъ еси́ сего́ и побѣ́ды съ небесе́ вѣне́цъ прія́лъ еси́.

Богоро́диченъ: Еди́на Бо́га, всѣ́хъ су́щаго невмѣсти́ма, Тебѣ́ вмѣ́стна бы́вша за бла́гость, породила́ еси́, Отрокови́це, Его́же моли́ спасти́ пою́щія Тя́.

Инъ кано́нъ преподо́бного Ака́кія, его́же краегране́сіе: Ака́кія, изря́днаго послу́шника, пѣ́сньми пою́. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Незло́бнымъ нра́вомъ обложи́вся, благообра́зную добродѣ́телей стяжа́лъ еси́ добро́ту, Христо́ву во́льному послуша́нію подо́бяся да́же до сме́рти, всеблаже́нне.

Зло́бы обрѣта́теля посрами́лъ еси́ беззло́біемъ твои́мъ, терпѣ́ніемъ же, о́тче, искуше́ній того́ го́рдую и вознесе́нную вражду́ къ земли́, всеблаже́нне, смири́лъ еси́.

Воздержа́ніемъ терпѣли́внымъ, преподо́бне, предъобуча́яся и страсте́й отсѣка́я нача́ла, безстра́стія оде́ждею украси́лся еси́ по́слѣжде, благода́тію Боже́ственною покрыва́емь.

Укрѣ́пль душе́вное устрое́ніе терпѣ́ніемъ тве́рдымъ и до́блимъ, всеблаже́нне, по́мысломъ, по вся́ дни́ терпѣ́въ му́ченическій по́двигъ, и вѣне́чникъ показа́лся еси́.

Богоро́диченъ: Крѣ́пость твори́тельная и пѣ́ніе, Бо́гъ и Госпо́дь, Иже на́съ ра́ди изъ Тебе́ воплоще́йся и рожде́йся, проро́чески я́коже Иса́ія, Пречи́стая, благовѣсти́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Твои́ми прекло́нься Бо́гъ мольба́ми, руко́ю тя́ проро́ка у́зъ изба́ви и ше́ствовати благоизво́ли къ болѣ́зненному труду́ воздержа́нія.

Житія́ го́рькое оста́вивъ треволне́ніе, ко приста́нищу приступи́лъ еси́ воздержа́нія и тишинѣ́ боже́ственнѣй, о́тче Ѳомо́, испо́лнився Ду́ха благода́тію.

Столпо́мъ Изра́иля иногда́ пусты́ню, всеблаже́нне, проходи́ти наста́вивый, столпо́мъ тя́ о́гненнымъ наставля́ше, прови́дяй души́ твоея́ благоро́діе.

Богоро́диченъ: Злату́ю я́ко и́стинно кади́льницу, и ста́мну ма́нны, и Боже́ственную го́ру, и пала́ту красну́ Бо́жію Тя́, Дѣ́во, имену́емъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Всего́ тебе́ сама́го Творцу́ твоему́ и Бо́гу, преподо́бне, возложи́въ, терпѣ́лъ еси́ томи́тельное уничиже́ніе.

Зако́нно страда́льческое терпѣ́ніе, возде́ржниче, показа́лъ еси́ на земли́, тѣ́мже тебѣ́ небе́сное весе́ліе даде́ся.

Смире́ніе и́стинно, долготерпѣ́ніе опа́сно держа́лъ еси́, терпѣ́ніе, воздержа́ніе съ послуша́ніемъ, преблаже́нне.

Богоро́диченъ: Всѣ́хъ Содѣ́тель зи́ждется, на́съ ра́ди, Пречи́стая, пло́ть пріе́мъ одушевле́ну изъ Тебе́, Пресвята́я Богоневѣ́сто.

Конда́къ Ака́кія, гла́съ 2. Подо́бенъ: Вы́шнихъ ища́.

Мíръ оста́вль, Христу́ послѣ́довалъ еси́ отъ младе́нства, прему́дре Ака́кіе преподо́бне, Того́ подража́я во́льное смире́ніе, низве́рглъ еси́ го́рдостнаго мучи́теля, моли́ непреста́нно о всѣ́хъ на́съ.

Сѣда́ленъ, гла́съ 4. Подо́бенъ: Яви́лся еси́ дне́сь.

Яви́лся еси́, преподо́бне, благоугоди́въ боже́ственными дѣя́ніи, и житіе́мъ чи́стымъ наслѣ́дія сподо́бился еси́ безпло́тныхъ, моли́ спасти́ся на́мъ.

Сла́ва, Ака́кія, гла́съ то́йже. Подо́бенъ: Ско́ро предвари́.

Свѣ́тлостію вѣ́ры и дѣ́тельнымъ свѣ́томъ яви́лся еси́ равноа́нгеленъ на земли́ вои́стинну, Ака́кіе всему́дре, показа́лъ еси́ му́жески крѣ́пкое ума́ твоего́, сокруши́лъ еси́ напа́данія страсте́й посто́мъ. Тѣ́мже и по кончи́нѣ, я́ко жи́въ, яви́лся еси́, непобѣди́ме.

И ны́нѣ, богоро́диченъ:

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Воздержа́нія поже́глъ еси́ огне́мъ боже́ственнымъ те́рніе грѣхо́вное и чуде́съ заре́ю, о́тче, облиста́лъ еси́.

Души́ твоея́ о́чи отъ страстны́я ти́ны очи́стивъ, незря́щія зѣ́ницы, о́тче, отве́рзлъ еси́.

Са́мъ отчужди́лся еси́ мірски́хъ мяте́жей, богоно́се, и премíрную тишину́ получи́лъ еси́.

Богоро́диченъ: Неискусобра́чная Влады́чице, Яже Бо́га безъ сѣ́мене заче́ншая, напа́стей и печа́лей всѣ́хъ изба́ви.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Умертви́въ, о́тче, му́дрость пло́ти твоея́, твою́ ду́шу оживи́лъ еси́ и пра́вды вѣне́цъ прія́лъ еси́, зовы́й, Ака́кіе: сла́ва си́лѣ Твое́й, Го́споди.

По́двиги до́лги пріе́мля, и́же по вся́ дни́ терпѣли́вное пока́зовалъ еси́ сопротивле́ніе, о́тче. Тѣ́мже по сме́рти, я́ко жи́въ, возопи́лъ еси́: сла́ва си́лѣ Твое́й, Го́споди.

Тве́рдымъ умо́мъ томле́нія за Христа́ претерпѣ́лъ еси́, Ака́кіе блаже́нне, Сего́ помышля́я, на Крестѣ́ пригвожде́на за спасе́ніе ро́да на́шего.

Богоро́диченъ: Чистѣ́йши еси́ небе́съ и мы́сленныхъ си́лъ, я́ко си́хъ Зижди́теля, Пречи́стая, ро́ждши. Тѣ́мже Ти́ зове́мъ: ра́дуйся, Богоро́дице Всепѣ́тая.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Руководя́щаго тя́ къ пусты́нямъ благоче́стно имѣ́лъ еси́ Илію́, о́тче, Ѳесви́тянина, явля́ющася но́щію и тайноуча́ща боже́ственнымъ тя́, преподо́бне.

Яко въ другíй Карми́ль, въ Мале́йскую го́ру, му́дре, всели́лся еси́, видѣ́ній Боже́ственныхъ наслажда́яся и чудотворе́ній благода́ть пресла́вно, блаже́нне, пріе́мля.

Простра́ннаго пути́ тѣ́сный предпочита́я, дости́глъ еси́ ра́достно широту́ рая́, и дре́ву жи́зненному, о́тче, невозбра́нно причаща́ешися, веселя́ся.

Богоро́диченъ: Уязви́вшееся прило́ги вра́жіими, Чи́стая, я́ко ми́лостива, исцѣли́ се́рдце мое́, на Крестѣ́ пло́тію Пригвозди́вшагося неизрече́нно ро́ждшая.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, преподо́бне, я́звами му́жески ураня́емь и біе́ніи по вся́ дни́ терпя́ крѣ́пко, преподо́бно почи́лъ еси́.

Тече́ніе до́брое сконча́въ, Ака́кіе незло́бный, трудо́въ свобо́дный и болѣ́зней воспрія́лъ еси́ поко́й.

Умъ тво́й, чи́стымъ по́мысломъ окормля́емь, Ака́кіе богоно́се, къ Вино́вному всѣ́хъ благополу́чно устреми́ся.

Богоро́диченъ: Ни а́нгельскій у́мъ, ни человѣ́чь мо́жетъ рождества́ Твоего́ сказа́ти: превосхо́дитъ бо вся́ко постиже́ніе ра́зума.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Въ пусты́ни безво́днѣй всели́лся еси́ и моли́твъ одожде́ніемъ твои́хъ, преподо́бне, во́ду всебога́тну Влады́ку источи́ти умоли́лъ еси́.

Якоже Авраа́мъ дре́вле пра́ведный, во и́ну страну́ себе́ удали́лъ еси́, и Бо́гу прибли́жился, и въ зе́млю кро́ткихъ всели́лся еси́.

Мона́хъ и́стиненъ бы́лъ еси́ и по погребе́ніи исцѣле́ній дарова́нія, о́тче Ѳомо́, тре́бующимъ источа́еши си́лою духо́вною.

Богоро́диченъ: Во́лею вся́ Содѣ́лавый, въ ложесна́, восхотѣ́въ, Неискусобра́чныя всели́ся, тлѣ́ніемъ неду́говавшія нетлѣ́ніемъ почести́ хотя́, я́ко Благосе́рдъ.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Усну́лъ еси́ блаже́ннымъ сно́мъ, блаже́нне, и по сме́рти яви́лся еси́, послу́шая, о́тче, вопроша́ющихъ, я́ко не умира́етъ послуша́ніе имѣ́яй.

Сконча́въ до́брыя по́двиги, тезоимени́те, нетлѣ́ннаго, богому́дре, сподо́бился еси́ вои́стинну безсме́ртія, идѣ́же, ра́дуяся, вѣнцы́ побѣ́ды воспрія́лъ еси́.

Боже́ственное, и до́брое, и богоуго́дное воздержа́ніе житія́ твоего́, блаже́нне, мно́гая утвержда́етъ Боже́ственнымъ стра́хомъ и жела́ніемъ бла́гъ бу́дущихъ, Ака́кіе.

Богоро́диченъ: Вои́стинну Богоро́дицу, Тя́ вѣ́рою сла́вимъ, я́ко Бо́га заче́ншую и ро́ждшую Сего́ неискусобра́чно, соеди́ншася изъ Тебе́, прія́тныя святы́мъ хра́момъ.

Конда́къ Ѳомы́, гла́съ 4. Подо́бенъ: Вознесы́йся.

Ве́лію побѣ́ду му́жески показа́лъ еси́, отону́дуже Боже́ственною любо́вію разгорѣ́вся, царя́ тлѣ́ннаго и вся́ кра́сная преоби́дѣлъ еси́, на горѣ́ Мале́йстѣй вселе́ніе соверши́въ, отъ нея́же въ небе́сная возше́лъ еси́ къ Царю́ царе́й, Ѳомо́, моли́ непреста́нно о всѣ́хъ на́съ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Огнь страсте́й воздержа́нія росо́ю, о́тче, погаси́лъ еси́ и, просія́въ, я́коже со́лнце, добродѣ́телей свѣ́тлостію, всѣ́хъ вопію́щихъ просвѣща́еши сердца́, блаже́нне: благослове́нъ еси́, Бо́же оте́цъ на́шихъ.

Слѣпы́мъ е́же зрѣ́ти и хромы́мъ, о́тче Ѳомо́, благотече́ніе, ско́рбнымъ избавле́ніе и боля́щимъ исцѣле́ніе подая́ си́лою Христо́вою, взыва́лъ еси́: благослове́нъ еси́, Бо́же оте́цъ на́шихъ.

Безмо́лвно твою́ соверши́лъ еси́ жи́знь, о́тче блаже́нне, нестяжа́ніемъ просвѣща́яся и воздержа́ніемъ украша́яся, поя́ умиле́ніемъ се́рдца Влады́цѣ, пребога́те: благослове́нъ еси́, Бо́же оте́цъ на́шихъ.

Богоро́диченъ: Дѣ́во Чи́стая, Неискусобра́чная, благослове́нная, па́дающихъ исправле́ніе, согрѣша́ющихъ избавле́ніе, спаси́ мя, блу́днаго, спаси́ Сы́ну Твоему́ зову́ща: благослове́нъ еси́, Бо́же оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Всѣ́мъ жела́ніемъ ко Влады́цѣ иды́й, доса́ды, и безче́стія, преподо́бне, и я́звы терпя́, взыва́лъ еси́: благослове́нъ еси́ въ хра́мѣ сла́вы Твоея́, Го́споди.

По́мыслъ тво́й Влады́чнія помышля́я стра́сти и распя́тіе и сме́рти поуча́яся, ураня́емь, поя́ше: благослове́нъ еси́ въ хра́мѣ сла́вы Твоея́, Го́споди.

Ме́ртвъ во гро́бѣ по зако́ну умира́ющихъ, лежа́ безъ дыха́нія, глаго́лющему вѣща́еши па́че естества́, я́ко не у́мерлъ е́смь, и взыва́еши: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Уме́ршія, и́мже, Дѣ́во, держи́ми бѣ́хомъ зако́номъ, Жи́знь ро́ждши и́стинную, возста́вила еси́ зову́щія: благослове́на Ты́ въ жена́хъ, Пренепоро́чная Влады́чице.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Стра́сти неудержи́мыя души́ воздержа́нія уздо́ю покори́въ, невеще́ственнымъ а́нгеломъ уподо́бился еси́, вопія́: по́йте, дѣла́, я́ко Го́спода, и превозноси́те во вся́ вѣ́ки.

Ѳесви́тянина Иліи́ послѣ́дуя, преблаже́нне, свяще́нному житію́, на го́ру возше́лъ еси́ бесѣ́довати къ Бо́гу, посто́мъ у́мъ очища́я, поя́: благослови́те, вся́ дѣла́ Госпо́дня, Го́спода.

Кро́токъ и незло́бивъ я́влься, на земли́ кро́ткихъ живе́ши, богому́дре, со всѣ́ми преподо́бными и избра́нными поя́: благослови́те, вся́ дѣла́ Госпо́дня, Го́спода.

Богоро́диченъ: Живы́й су́щій исто́чникъ, я́ко во́ду жи́зни ро́ждшая, ду́шу мою́, иста́явшую грѣхо́внымъ пла́менемъ, Дѣ́во Богоро́дице, напо́й, да Тя́ сла́влю во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Крѣ́пкимъ воздержа́ніемъ Бо́гу тебѣ́ бы́сть смѣси́тися, преподо́бне, у́зъ тѣ́ла разрѣ́шшуся и пло́ть изнури́вшу, и видѣ́ніемъ дѣ́тельнымъ, о́тче, зовы́й: благослови́те, вся́ дѣла́ Госпо́дня, Го́спода.

Съ му́ченики Христо́вы сочета́емь и вчиня́емь, непреста́нно, преподо́бне, поя́ Человѣколю́бца и моля́ся о на́съ, восхваля́ющихъ тя́ и вопію́щихъ: благослови́те, вся́ дѣла́ Госпо́дня, Го́спода.

Пострада́въ зако́нно на земли́, небе́сный обрѣ́лъ еси́ поко́й, ра́дуяся, преподо́бне, со святы́ми, и соприча́стникъ весе́лію и ра́дости и́хъ бы́въ, и взыва́я: благослови́те, вся́ дѣла́ Госпо́дня, Го́спода.

Богоро́диченъ: Воплоща́ется Безпло́тный пре́жде, Содѣ́тель зи́ждется изъ Тебе́, Всенепоро́чная, и́бо въ пречи́стая ложесна́ Твоя́ заше́дъ непостижи́мый, описа́ніемъ плотски́мъ хотя́ объя́тся. Тѣ́мже вси́ Тя благослови́мъ, Марíе Богоневѣ́сто.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Ду́хомъ, о́тче, обнища́въ, небе́сное Ца́рство воспрія́лъ еси́ со всѣ́ми избра́нными, сла́вы неизрече́нныя исполня́емь и болѣ́зней по́честь пріе́мля, Ѳомо́, возда́нія. Сего́ ра́ди тя́ вѣ́рою и любо́вію ублажа́емъ.

Моще́й твои́хъ ра́ка вѣ́рно приступа́ющимъ источа́етъ исцѣле́ній рѣ́ки, стра́сти ду́шъ потопля́ющая и тѣле́съ болѣ́зни отъе́млющая, блаже́нне Ѳомо́, моли́твенниче вѣ́рою при́сно блажа́щимъ тя́.

Совокупля́яся съ преподо́бныхъ свѣ́тлыми ли́ки и сія́ніемъ невече́рнимъ мы́сленно, о́тче Ѳомо́, озаря́емь, боже́ственную твою́ па́мять творя́щія просвѣти́ вѣ́рно и улучи́ти спасе́ніе моли́твами твои́ми сподо́би.

Богоро́диченъ: Облиста́ющая всѣ́хъ чуде́съ заря́ Твои́хъ, Богоблагода́тная Чи́стая, страсте́й и скорбе́й отъе́млетъ мглу́ и свѣ́тъ весе́лія мы́сленный простира́етъ Ма́терь Бо́жію Тя́ велича́ющимъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ми́лостивно вмѣсти́лся еси́, о́тче ко вся́ческихъ Благода́телю, незло́бія добро́тою украша́емь и красото́ю добродѣ́телей сія́я, тѣ́мже тя́ вси́ ублажа́емъ.

Зако́ну повину́яся Влады́чню, твою́ преклони́лъ еси́ вы́ю мона́шествующихъ боре́нію и, побѣдоно́сецъ, о́тче, бы́въ, къ незло́бію дости́глъ еси́ соверше́нному, всеблаже́нне.

Пѣ́ніе Бо́гу возсыла́ти со безпло́тными сподо́бился еси́, я́ко соблю́дъ о́нѣхъ житіе́ и чистоту́, терпѣ́ніемъ же дѣ́лъ му́ченикъ сла́ву прія́лъ еси́.

Пріими́ отъ на́съ, богоно́се, приноси́мое тебѣ́ пѣ́ніе отъ чи́ста се́рдца и возда́ждь мольба́ми твои́ми согрѣше́ній оставле́ніе и спасе́ніе, всече́стне.

Богоро́диченъ: Яко ко́рень су́щую вои́стинну нетлѣ́нія, Тя́, Дѣ́во, вси́ вѣ́рніи, и утвержде́нія, хвала́ми почита́емъ: Ты́ бо Ѵпоста́сное Безсме́ртіе на́мъ родила́ еси́.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 57 – 62 об.

/ Къ оглавленію раздѣла /


Наверхъ / Къ титульной страницѣ

0