Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 7-й де́нь.
Слу́жба свято́й благовѣ́рной Вели́кой Княги́нѣ Евдокíи, во и́нокиняхъ Евфроси́ніи.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 8:

О, ма́ти Евфроси́ніе,* не забу́ди ны́, ча́да твоя́,* во оби́тели твое́й живу́щія,* и всѣ́хъ, съ вѣ́рою припа́дающихъ* къ ра́цѣ моще́й твои́хъ;* помина́юще твоя́ по́двиги и труды́,* тя́ про́симъ, ма́ти Евфроси́ніе:* не преста́й о на́съ моли́ти Царя́ Христа́,* да не отлучи́тъ ны́* избра́ннаго Своего́ ста́да.

Небрегла́ еси́, ма́ти преподо́бная,* о тѣле́снѣй красотѣ́,* тѣ́ло твое́ изнури́вши посто́мъ* и до́лгимъ стоя́ніемъ на моли́твѣ,* плотско́е мудрова́ніе покори́ла еси́ ду́ху,* и, отъ Бо́га да́ра исцѣле́ній сподо́бльшися,* слѣпо́му подала́ еси́ прозрѣ́ніе,* и три́десять боля́щихъ исцѣли́ла еси́* еще́ въ житіи́ твое́мъ;* вѣ́руемъ же, я́ко по преставле́ніи* сугу́бую и́маши благода́ть,* моли́ся у́бо о на́съ ко Го́споду.

Сла́ва, гла́съ 2:

Имаши, о ма́ти Евфроси́ніе, ве́ліе дерзнове́ніе ко Христу́ Бо́гу, твоея́ ра́ди презѣ́льныя любве́ къ Нему́. Его́ бо ра́ди сла́ву ца́рства и кра́сная мíра и вся́ плотскíя утѣ́хи презрѣ́ла еси́, еще́ въ мірстѣ́мъ житіи́ равноа́нгельно пожи́вши, и, да́ра чудотворе́ній сподо́бльшися, во и́ноческомъ чи́нѣ ко Христу́ преста́вилася еси́, Его́же моли́ о чту́щихъ святу́ю па́мять твою́.

И ны́нѣ, богоро́диченъ, гла́съ то́йже:

Непроходи́мая врата́, та́йно запеча́тствованная, Благослове́нная Богоро́дице Дѣ́во, пріими́ моле́нія на́ша и принеси́ Твоему́ Сы́ну и Бо́гу, да спасе́тъ Тобо́ю ду́ши на́ша.

На стихо́внѣ стихи́ры, гла́съ 2:

Земну́ю сла́ву и ри́зы мя́гкія* презрѣ́ла еси́,* о́строю власяни́цею одѣ́ялася еси́,* тѣле́сныя болѣ́зни терпѣ́ла еси́* бу́дущаго ра́ди наслажде́нія,* е́же ны́нѣ получи́вши* и престо́лу Влады́ки всѣ́хъ предстоя́щи,* помяни́ и на́съ, ма́ти преподо́бная.

Сти́хъ: Воззва́ша пра́ведніи,* и Госпо́дь услы́ша и́хъ.

Во́лнъ мірска́го мяте́жа уклони́вшися* и въ приста́нище ти́хое дости́гши,* въ созда́нную тобо́ю оби́тель вше́дши* и та́мо богоуго́дно пожи́вши,* преста́вилася еси́ къ вѣ́чнымъ оби́телемъ.* Тѣ́мже, ма́ти преподо́бная,* Христа́ Бо́га моли́* спасти́ся душа́мъ на́шимъ.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Ны́нѣ уже́ прія́ла еси́ вѣне́цъ сла́вы* отъ Царя́ Христа́,* ра́дость и весе́ліе несконча́емо* и наслажда́ешися вѣ́чнымъ поко́емъ,* моли́ся у́бо о на́съ, преподо́бная Евфроси́ніе,* Христу́ Бо́гу на́шему,* да вся́ ны́ сопричте́тъ избра́нному Своему́ ста́ду* по вели́цѣй Свое́й ми́лости.

Сла́ва, гла́съ 8:

Пріиди́те, вси́ празднолю́бцы и мона́шествующихъ же́нъ сосло́віе, вѣ́рою соше́дшеся, торжеству́емъ дне́сь въ па́мять благовѣ́рныя княги́ни и на́шея ма́тере Евфроси́ніи, пѣ́сньми возвели́чимъ ю́ и усе́рдно возопіи́мъ е́й, глаго́люще: ра́дуйся, мона́шествующихъ же́нъ наста́внице и въ мíрѣ живу́щихъ ко спасе́нію путеводи́тельнице! Ты́ отъ человѣ́къ бѣ́сы ско́ро отго́ниши и здра́віе подае́ши всѣ́мъ, къ тебѣ́ съ вѣ́рою прибѣга́ющимъ.

И ны́нѣ, богоро́диченъ, гла́съ то́йже:

Азъ, Дѣ́во Свята́я Богоро́дице, къ покро́ву Твоему́ прибѣга́ю: вѣ́мъ, я́ко обря́щу Тобо́ю спасе́ніе, мо́жеши бо, Чи́стая, помощи́ мнѣ́.

По Ны́нѣ отпуща́еши.., тропа́рь святы́я, гла́съ 8:

По земнѣ́мъ вдовствѣ́ Небе́сному Жениху́ себе́ уневѣ́стивши и въ кня́жестѣмъ черто́зѣ подви́жнически пожи́вши, по́слѣжде и черто́гъ, и ча́дъ твои́хъ Бо́га ра́ди оста́вила еси́, преподо́бная Евфроси́ніе, и вше́дши во оби́тель, тобо́ю созда́нную, и во и́ноческомъ о́бразѣ мно́ги по́двиги показа́ла еси́, и свято́е твое́ житіе́ по благода́ти Бо́жіей блаже́нною кончи́ною увѣнча́ла еси́. И ны́нѣ предстоя́щи Христу́ Бо́гу, моли́ спасти́ся душа́мъ на́шимъ.

Или́ се́й тропа́рь, гла́съ 5:

Отъ ю́ности предъизбра́нная Бо́гомъ уго́днице, оста́вльши свѣ́тлый черто́гъ кня́жескій, уклони́лася еси́ во оби́тель, тобо́ю созда́нную, и, пучи́ну жите́йскаго мо́ря преплы́вши, ны́нѣ со а́нгелы пѣсносло́виши Христа́ Бо́га. Ему́же непреста́нно моли́ся, преподо́бная, я́ко да сохраня́етъ вы́ну оби́тель, тобо́ю созда́нную, и да́руетъ на́мъ ми́ръ и ве́лію ми́лость.

Сла́ва, и ны́нѣ, богоро́диченъ, по гла́су тропаря́.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8:

Ро́да свята́го Влади́міра* о́трасль блага́я была́ еси́,* о преподо́бная ма́ти Евфроси́ніе,* благи́ми нра́вы сла́ву княже́нія украси́вши:* любо́вію къ Бо́гу и моли́твою непреста́нною,* поще́ніемъ и благотворе́ніемъ* Бо́гу угоди́ла еси́,* и еще́ въ житіи́ се́мъ* да́ръ чудотворе́ній прія́ла еси́,* и, земна́го ца́рства сла́ву оста́вльши* и во оби́тель, тобо́ю созда́нную, всели́вшися,* къ небе́снѣй сла́вѣ, ра́дующися, преста́вилася еси́.* Тѣ́мже ны́нѣ предстоя́щи престо́лу Госпо́дню,* помина́й на́съ, чту́щихъ святу́ю па́мять твою́. [Два́жды.]

Отъ ю́ности и́го Христо́во* на ра́мена твоя́ взе́мши,* преподо́бная и прехва́льная княги́не Евфроси́ніе,* добродѣ́тельми ду́шу твою́ украси́ла еси́,* оби́тели и хра́мы во сла́ву Бо́жію воздви́гла еси́,* къ ни́щимъ и убо́гимъ любо́вь милосе́рдую стяжа́ла еси́,* въ моли́твахъ и поще́ніихъ тѣ́ло изнури́вши,* стра́сти плотскíя въ коне́цъ искорени́ла еси́.* Тѣ́мже ны́нѣ въ небе́снѣй сла́вѣ прославля́ющися,* помина́й на́съ, чту́щихъ святу́ю па́мять твою́.

Въ са́нѣ кня́жестѣмъ* преподо́бнѣ пожила́ еси́,* прехва́льная ма́ти Евфроси́ніе,* сла́вою княже́нія, бога́тствы тлѣ́нными* и мíра утѣ́хами ника́коже прельща́яся,* но о́бразъ въ себѣ́ всѣ́мъ лю́демъ показу́я:* моли́твы непреста́нныя, воздержа́нія и поще́нія* и плотски́хъ страсте́й отсѣче́нія,* къ ни́щимъ благотворе́нія,* въ ско́рбехъ и вра́жіихъ обстоя́ніихъ* несомнѣ́ннаго на Бо́га упова́нія.* Тѣ́мже ны́нѣ предстоя́щи престо́лу Госпо́дню,* отъ прило́гъ вра́жіихъ* спаса́й при́сно гра́дъ се́й, и оби́тель твою́,* и всѣ́хъ, чту́щихъ па́мять твою́.

Ины стихи́ры, гла́съ 2:

Егда́ тя, блаже́нная княги́не Евфроси́ніе,* свободи́ Госпо́дь отъ у́зъ супру́жества,* въ та́йнѣ Бо́гу рабо́тающи,* труды́ ко трудо́мъ приложи́ла еси́* и, въ кня́жестѣмъ черто́зѣ пребыва́ющи,* ри́зы же свѣ́тлыми облача́яся,* посто́мъ и бдѣ́ніи пло́ть твою́ та́ко изнури́ла еси́,* я́ко псало́мски, ко́сти твоя́, я́ко суши́ло, сосхо́шася,* и пло́ть твоя́ прильпе́ ко́сти твое́й,* я́коже ужаса́тися ча́домъ твои́мъ,* твое́ увѣ́дѣвшимъ по́стническое житіе́. [Два́жды.]

Егда́ прибли́жися вре́мя* твоего́ къ Бо́гу отше́ствія,* преподо́бная княги́не Евфроси́ніе,* яви́ся тебѣ́ арха́нгелъ Михаи́лъ,* небе́снаго свѣ́та осія́ніемъ* и благода́ти Бо́жія сугу́бымъ прича́стіемъ* ду́шу твою́ ко исхо́ду уготовля́я* и те́мныя ду́хи отъ тебе́ дале́че отгоня́я;* его́же явле́ніе а́ще и сотвори́ тя безгла́сну,* но увѣ́дано бы́сть въ разрѣше́ніи язы́ка твоего́,* да вси́, чудеси́ удивля́ющеся,* просла́вятъ твое́ на земли́ а́нгельское житіе́.

Въ мíрѣ по́стнически пожи́вши,* во и́ночестѣмъ ли́цѣ Бо́гу порабо́тати возжела́ла еси́.* Тѣ́мже сла́вы княже́нія и мíра кра́сныхъ отре́кшися,* егда́ ра́достно въ созда́нную тобо́ю оби́тель потекла́ еси́,* слѣпо́му прозрѣ́ніе дарова́ла еси́* и три́десять неду́жныхъ исцѣли́ла еси́,* не я́ко въ добродѣ́телехъ новонача́льная и́ноческаго житія́ и́щущи,* но я́ко же́ртву соверше́нную себе́ Бо́гу принося́щи;* Ему́же по ма́лѣ ду́шу въ ру́цѣ преда́вши,* тѣ́ло твое́ многоцѣле́бное оби́тели твое́й во утвержде́ніе* и всѣ́мъ, съ вѣ́рою притека́ющимъ,* во исцѣле́ніе оста́вила еси́.

Сла́ва, гла́съ 5:

Ублажи́мъ ны́нѣ преподо́бную Евфроси́нію, въ мíрѣ свя́то пожи́вшую и во и́ночестѣмъ чи́нѣ къ Бо́гу преста́вльшуюся, въ са́нѣ кня́жестѣмъ о́бразъ благоче́стія всѣ́мъ лю́демъ въ себѣ́ показа́вшую, въ бога́тствахъ на ни́щія и убо́гія при́сно призира́вшую, въ черто́зѣхъ кня́жескихъ и́ночески пожи́вшую, во оби́ліи бла́гъ по́стъ и бдѣ́ніе возлю́бльшую, свѣ́тлыми ри́зами пло́ти изможде́ніе сокрыва́вшую, арха́нгельскаго явле́нія сподо́бльшуюся, еще́ въ житіи́ се́мъ да́ръ чуде́съ пріи́мшую и до ны́нѣ исцѣле́нія неоску́дно подаю́щую съ вѣ́рою восхваля́ющимъ святу́ю па́мять ея́.

И ны́нѣ, [богоро́диченъ, гла́съ то́йже]: Въ Чермнѣ́мъ мо́ри...
Вхо́дъ. Проки́менъ дне́. [И чте́нія три́.]

При́тчей чте́ніе. [Глава́ 31.]

Жену́ до́блю кто́ обря́щетъ, дража́йши е́сть ка́менія многоцѣ́ннаго такова́я. Дерза́етъ на ню́ се́рдце му́жа ея́: такова́я до́брыхъ коры́стей не лиши́тся. Дѣ́лаетъ бо му́жу своему́ блага́я во все́ житіе́. Обрѣ́тши во́лну и ле́нъ, сотвори́ благопотре́бную рука́ма свои́ма. Бы́сть, я́ко кора́бль, ку́плю дѣ́ющій издале́ча: собира́етъ себѣ́ бога́тство. И востае́тъ изъ но́щи, и даде́ бра́шна до́му и дѣла́ рабы́нямъ. Препоя́савши крѣ́пко чре́сла своя́, утверди́тъ мы́шцы своя́ на дѣ́ло. И вкуси́, я́ко добро́ е́сть дѣ́лати, и не угаса́етъ свѣти́льникъ ея́ всю́ но́щь. Ру́цѣ свои́ отверза́етъ убо́гому, дла́нь же простре́ ни́щу. Не пече́тся о су́щихъ въ дому́ му́жъ ея́, егда́ гдѣ́ заме́длитъ: вси́ бо у нея́ одѣ́яни су́ть. Уста́ своя́ отве́рзе внима́тельно и зако́нно и чи́нъ заповѣ́да язы́ку своему́. Крѣ́постію и лѣ́потою облече́ся и возвесели́ся во дни́ послѣ́днія. Тѣ́сны стези́ до́му ея́, бра́шна же лѣ́ностнаго не яде́. Уста́ своя́ отве́рзе му́дро и зако́нно, ми́лостыня же ея́ возста́ви ча́да ея́, и обогати́шася. Мно́ги дще́ри стяжа́ша бога́тство, мно́ги сотвори́ша си́лу, ты́ же предуспѣ́ла и превознесла́ся еси́ надъ всѣ́ми. Ло́жнаго угожде́нія и су́етныя добро́ты же́нскія нѣ́сть въ тебѣ́: жена́ бо разу́мная благослове́на е́сть. Стра́хъ же Госпо́день сія́ да хва́литъ.

Прему́дрости Соломо́новы чте́ніе. [Главы́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Те́плыми твои́ми къ Бо́гу моли́твами во всѣ́хъ ско́рбехъ и вра́жіихъ нахожде́ніихъ, лю́ди вся́ подвиза́я ко усе́рдному моле́нію, мно́гажды, преподо́бная, улучи́ла еси́ отъ бѣ́дъ свобожде́ніе, отъ нахожде́ній вра́жіихъ спасе́ніе и ва́рварскаго избѣжа́ла еси́ плѣне́нія; хра́мы и оби́тели мно́ги воздви́гла еси́, Еди́ному Бо́гу хвалу́ и благодаре́ніе воздаю́щи, спаса́ющему лю́ди Своя́ отъ бѣ́дъ моли́твами твои́ми, преподо́бная.

О и́ночестѣмъ житіи́ ревну́я, еще́ во сла́вѣ княже́нія су́щи, оби́тели и́ноческія созида́ла еси́, преподо́бная, спасе́нія и́щущимъ стезю́ къ небеси́ удо́бну указу́я; и, въ мíрѣ Бо́гу угоди́вши, я́ко и да́ра чуде́съ отъ Него́ сподо́битися, во и́ночестѣмъ ли́цѣ къ Бо́гу преста́витися возжела́ла еси́, и въ созда́нной тобо́ю оби́тели о́бразъ свята́го житія́ показа́ла еси́. Тѣ́мже моли́ся, преподо́бная, ко Го́споду, спасти́ся ста́ду, тобо́ю собра́нному, и съ тобо́ю ку́пно улучи́ти небе́сная ра́йская селе́нія.

Мно́ги труды́ приложи́ла еси́, преподо́бная, ко устрое́нію святы́я сея́ оби́тели и, я́ко сокро́вище неиждива́емо, чудодѣ́йственныя мо́щи твоя́ въ не́й оста́вила еси́, къ ни́мже припа́дающе, со умиле́ніемъ взыва́емъ ти́: не отлуча́йся, преподо́бная ма́ти, отъ оби́тели твоея́, но при́сно посѣща́й ю́ ду́хомъ твои́мъ, сохраня́ющи ю́ отъ вся́каго зла́го обстоя́нія, и твое́ свято́е житіе́ почита́ющія и къ тебѣ́ съ вѣ́рою притека́ющія спаса́й при́сно моли́твами твои́ми.

Сла́ва, гла́съ 6:

Соше́дшеся дне́сь въ па́мять преподо́бныя Евфроси́ніи, во оби́тели е́ю соза́ннѣй, предъ ра́кою святы́хъ ея́ моще́й предстоя́ще, со умиле́ніемъ воззове́мъ къ не́й: о, преподо́бная ма́ти Евфроси́ніе, не преста́й моля́щися о на́съ ко Го́споду, ца́рствующій гра́дъ се́й сохраня́й при́сно отъ бѣ́дъ и губи́тельствъ, святу́ю твою́ оби́тель отъ вся́каго зла́го обстоя́нія невреди́му соблюди́, ли́къ и́ноческій, тобо́ю собра́нный, въ добродѣ́телехъ преспѣ́ющь покажи́ и всѣ́мъ, чту́щимъ твою́ святу́ю па́мять, испроси́ у Го́спода ми́ръ и ве́лію ми́лость.

И ны́нѣ, богоро́диченъ, гла́съ то́йже:

Упова́ніе мíра, блага́я Богоро́дице Дѣ́во, Твое́ и еди́но держа́вное предста́тельство про́симъ: умилосе́рдися на безпредста́тельственныя лю́ди, моли́ ми́лостиваго Бо́га изба́вится душа́мъ на́шимъ отъ вся́каго преще́нія, еди́на Благослове́нная.

На стихо́внѣ стихи́ры, гла́съ 2:

До́брѣ земно́е житіе́ соверши́ла еси́,* преподо́бная ма́ти Евфроси́ніе,* къ Бо́гу любо́вь ве́лію иму́щи,* къ моли́твамъ во дни́ и нощи́ прилежа́щи,* посто́мъ и бдѣ́ніи пло́ти мудрова́нія смиря́ющи,* чистото́ю и цѣлому́дріемъ ду́шу украша́ющи,* ко всѣ́мъ кро́тость и смире́ніе явля́ющи,* ни́щимъ и убо́гимъ благотворе́нія источа́ющи,* тѣ́мже въ небе́сныхъ оби́телехъ ны́нѣ водворя́ешися,* при́сно моля́щися о чту́щихъ тя́.

Сти́хъ: Воззва́ша пра́ведніи,* и Госпо́дь услы́ша и́хъ.

Ве́лію любо́вь къ Бо́гу* въ се́рдцѣ твое́мъ имѣ́ла еси́, преподо́бная,* тѣ́мже ни сла́вы земна́го княже́нія,* ни бога́тствъ земны́хъ оби́ліе,* ни жи́зни вре́менныя сла́дости* ника́коже возмого́ша* отъ любве́ Бо́жія тя́ отлучи́ти* и отъ жесто́каго по́стническаго житія́ отврати́ти,* но да́же до конца́ вѣ́ру и терпѣ́ніе соблюла́ еси́.* Тѣ́мже и небе́снымъ вѣнце́мъ увѣнча́вшися,* въ небе́сныхъ черто́зѣхъ водворя́ешися,* при́сно моля́щися о чту́щихъ тя́.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Мно́ги ско́рби въ житіи́ твое́мъ* претерпѣ́ла еси́, преподо́бная ма́ти Евфроси́ніе:* смертоно́сныя я́звы о́крестъ губи́тельство,* мно́гажды враго́въ безбо́жныхъ нахожде́нія* и гра́да ца́рствующаго разоре́нія и запале́нія,* супру́жника въ ю́ныхъ лѣ́тахъ лише́ніе,* отъ клеветы́ и злорѣ́чія поноше́нія;* но, во все́мъ Бо́гу себе́ предаю́щи* и те́плыя Тому́ моли́твы непреста́нно возсыла́ющи,* я́ко адама́нтъ непоколеби́мый,* во упова́ніи на Бо́га пребыла́ еси́, преподо́бная.

Сла́ва, гла́съ то́йже:

Вта́йнѣ Бо́гу рабо́тати жела́ла еси́, преподо́бная ма́ти Евфроси́ніе, твоя́ моли́твенная бдѣ́нія но́щію отъ при́сныхъ и ча́дъ твои́хъ утаева́ющи и по́стническое тѣ́ла изможде́ніе во мно́гихъ свѣ́тлыхъ ри́захъ сокрыва́ющи. Бо́гъ же, испыту́яй сердца́ и вѣ́дый та́йная, всѣ́мъ явле́но сотвори́ твое́ свято́е житіе́, да́ра чуде́съ еще́ въ жи́зни тя́ сподо́бивъ и по преставле́ніи твое́мъ при́сно и до ны́нѣ неоску́дно да́руя исцѣле́нія всѣ́мъ, съ вѣ́рою призыва́ющимъ тя́, преподо́бная ма́ти Евфроси́ніе.

И ны́нѣ, богоро́диченъ, гла́съ то́йже: О, чудесе́ но́ваго...

По Ны́нѣ отпуща́еши: тропа́рь преподо́бныя, два́жды [пи́санъ на ма́лѣй вече́рни] и Богоро́дице, Дѣ́во, ра́дуйся.., еди́ножды.



НА УТРЕНИ,
На Бо́гъ Госпо́дь: тропа́рь преподо́бныя, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 5:

До́блественнѣ Бо́гу рабо́тавши, злоко́зненнаго врага́ низложи́ла еси́ и въ терпѣ́ніи мно́зѣ земно́е житіе́ препроводи́ла еси́, преподо́бная Евфроси́ніе, и ны́нѣ ра́достно предстои́ши престо́лу Госпо́дню, моля́щися о всѣ́хъ на́съ. [Два́жды.]

Сла́ва, и ны́нѣ, богоро́диченъ, гла́съ то́йже:

Всенепоро́чная Ма́ти, возсія́й ми́ лучу́, и разжени́ мра́къ безмѣ́рныхъ мои́хъ грѣхо́въ, и лука́выя по́мыслы отжени́, Дѣ́во, отъ се́рдца моего́ оскверне́ннаго.

По 2-мъ стихосло́віи сѣда́ленъ, гла́съ 4:

Пло́ть распя́ла еси́ со страстьми́ и похотьми́, и всѣ́мъ се́рдцемъ возлюби́ла еси́ Христа́ Бо́га, и все́ жела́ніе къ Нему́ устреми́ла еси́, преподо́бная Евфроси́ніе. Тѣ́мже прія́ла еси́ неоску́дный да́ръ исцѣле́ній: отъ человѣ́къ бо изгоня́еши бѣ́сы и здра́віе въ болѣ́знехъ ско́ро подае́ши, водворя́ющися въ небе́сныхъ селе́ніихъ. [Два́жды.]

Сла́ва, и ны́нѣ, богоро́диченъ, гла́съ то́йже:

Тружда́етъ мя́ бу́ря грѣхо́вная и возмуще́ніе безмѣ́стныхъ помышле́ній: умилосе́рдися, Всенепоро́чная, и ру́ку по́мощи, я́ко Милосе́рдая, простри́ ми, да велича́ю Тя́, спаса́емый.

Поліеле́й.

Велича́ніе: Ублажа́емъ тя́, преподо́бная ма́ти Евфроси́ніе, и чте́мъ святу́ю па́мять твою́, ты́ бо мо́лиши за на́съ Христа́, Бо́га на́шего.

Псало́мъ избра́нный: Терпя́, потерпѣ́хъ Го́спода...

По поліеле́и сѣда́ленъ, гла́съ 2:

Тве́рдое изволе́ніе Бо́гу усе́рдно служи́ти имѣ́ла еси́, преподо́бная ма́ти. Тѣ́мже ни мірска́го житія́ широта́, ни ско́рби тѣ́снаго пути́ подви́жническаго отню́дь не возмого́ша отъ любве́ Бо́жія отлучи́ти тя́, но, до́брымъ по́двигомъ подвиза́вшися на земли́, небе́сную сла́ву улучи́ла еси́ на небесѣ́хъ, идѣ́же при́сно веселя́щися, моли́ Бо́га о чту́щихъ тя́. [Два́жды.]

Сла́ва, и ны́нѣ, богоро́диченъ, гла́съ то́йже:

На Тя́ упова́ніе, Богоро́дице, возложи́хомъ, ча́янія да не отпаде́мъ, спаси́ на́съ отъ бѣ́дъ, Помо́щнице недоумѣ́емымъ, и сопроти́вныхъ совѣ́ты разори́: Ты́ бо еси́ на́ше спасе́ніе, Благослове́нная.

Степе́нна, 1-й антифо́нъ 4-го гла́са: Отъ ю́ности моея́... Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Матѳе́я, зача́ло 16, отъ полу́: Рече́ Госпо́дь, егда́ мо́лишися, не бу́ди, я́коже лицемѣ́ри...

По 50-мъ псалмѣ́ стихи́ра, гла́съ 2:

Небрегла́ еси́ о тѣле́снѣй красотѣ́, изнури́вши твое́ тѣ́ло посто́мъ и до́лгимъ стоя́ніемъ на моли́твѣ, плотско́е мудрова́ніе покори́ла еси́ ду́ху, и сподо́билася еси́ прія́ти отъ Бо́га да́ръ исцѣле́ній: слѣпо́му подала́ еси́ прозрѣ́ніе, и три́десять боля́щихъ исцѣли́ла еси́ еще́ въ житіи́ твое́мъ, и по преставле́ніи сугу́бую и́маши благода́ть. Моли́ся у́бо о на́съ ко Го́споду.

Кано́нъ [пра́здника или́] Богоро́дицы со ирмосо́мъ на 6, и преподо́бныя кано́нъ, на 8.

Кано́нъ Богоро́дицы, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пріими́, Дѣ́во, мольбу́ мою́ изъ у́стъ недосто́йныхъ, отъ скве́рныхъ усте́нъ дерзнове́нно приноси́ти устреми́вшагося, и свѣ́тъ умиле́нія, Чи́стая, озари́ рабу́ Твоему́.

Ту́чи сле́зъ ми́ пода́ждь Твои́ми моли́твами, Дѣ́во Ма́ти Чи́стая, я́ко да пла́чу те́плѣ, о и́хже содѣ́лахъ на земли́, и убѣ́гну Тобо́ю му́ки вся́кія.

Моего́ рыда́нія не отри́ни, Яже Исто́чникъ Милосе́рдія ро́ждшая, но ми́лостивно, Бла́гая, Твои́мъ ми́лостивнымъ о́комъ, Богоро́дице, души́ моея́ стра́сти исцѣли́.

Стена́ніемъ пла́чися, душе́ моя́, и себе́ отню́дь рыда́й, покланя́ющися Ма́тери Бо́жіи и глаго́лющи: мене́, пови́ннаго, изба́ви му́ки стра́шныя.

Кано́нъ преподо́бныя, гла́съ и ирмо́съ то́йже.
Пѣ́снь 1.

Моего́ ра́зума омраче́ніе твои́ми моли́твами отжени́, преподо́бная Евфроси́ніе, да восхвалю́ сла́вную и свѣтоно́сную твою́ па́мять, поя́ боже́ственную пѣ́снь.

Яко рѣка́ многово́дная, ты́, сла́вная Евфроси́ніе, благода́ти боже́ственными струя́ми, напои́ла еси́ вѣ́рныхъ со́нмы, вопію́щія Бо́гу пѣ́снь побѣ́дную.

Боже́ственными сія́ньми ду́шу твою́ озари́вши, сладостра́стіе пло́ти попали́ла еси́ воздержа́ніемъ кра́йнимъ, воспѣва́ющи Христу́ Бо́гу пѣ́снь побѣ́дную.

Богоро́диченъ: Свѣ́тлыми луча́ми Твоего́ Сы́на, Богоро́дице, просвѣти́ омраче́нную мою́ ду́шу, страсте́й смуще́ніе отжени́, Твои́ми, Чи́стая, хода́тайствы.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Нѣ́сть и́нъ, я́коже а́зъ, прегрѣши́въ, Пресвята́я Чи́стая, порабо́щся зло́бами безмѣ́рныхъ помышле́ній, но на Тя́ надѣ́явся, молю́: си́хъ мя́ исхити́.

Се́ наидо́ша на мя́ я́ко ра́ны, вся́ вра́жіи зло́бы отяготѣ́вше, и зѣло́ возсмердѣ́ша, и ду́шу веду́тъ на вся́ко паде́ніе.

Мно́гое мно́жество мои́хъ прегрѣше́ній, сего́ ра́ди, Пресвята́я, вѣ́рою припа́дая, вопію́ Ти смире́нный: въ ча́съ стра́шный умоли́, Его́же по пло́ти родила́ еси́.

Свята́я Богоро́дице, мене́ пови́ннаго вся́кому осужде́нію изми́, дерзнове́ніе къ Бо́гу я́ко иму́щи ма́терне, и черто́гу Сего́ вчини́ мя.

Инъ. Ирмо́съ то́йже.

Испо́лнится, му́драя ма́ти Евфроси́ніе, Боже́ственнаго Ду́ха, до́мъ яви́лася еси́ Его́ и, ча́дъ твои́хъ по пло́ти оста́вльши и Бо́гу прилѣпи́вшися, Тому́ воспѣва́ла еси́: нѣ́сть свя́тъ, па́че Тебе́, Го́споди.

Отъ повелѣ́нія боже́ственнаго, я́влься тебѣ́ архистрати́гъ Михаи́лъ, осія́ тя луча́ми свѣ́та небе́снаго и удержа́ язы́къ тво́й, да извѣ́стно сотвори́тъ всѣ́мъ явле́ніе свое́ тебѣ́.

На го́ру высо́кую добродѣ́телей возжела́вши вни́ти, преподо́бная, по явле́ніи тебѣ́ Архистрати́га оста́вила еси́ вре́менную княже́нія сла́ву и, въ созда́нную тобо́ю оби́тель укло́ншися, Христу́ Бо́гу воспѣ́ла еси́: Ты́ еси́ Сы́нъ Бо́жій, Изба́витель мíра.

Богоро́диченъ: Се́ лѣ́ствица, ю́же ви́дѣ иногда́ Іа́ковъ утвержде́ну на земли́, на не́йже утвержда́шеся Бо́гъ, Свѣтоно́сная Пречи́стая Богоро́дица, Приснодѣ́вствующая.

Сѣда́ленъ, гла́съ 3:

Яви́лася еси́, преподо́бная Евфроси́ніе, во гра́дѣ Москвѣ́, я́ко со́лнце ино́е, озаря́ющи вѣ́рныхъ луча́ми чуде́съ твои́хъ и исцѣле́нія подаю́щи всѣ́мъ, съ вѣ́рою приходя́щимъ къ тебѣ́ и вопію́щимъ ти́: ра́дуйся, въ мíрѣ благоче́стно живу́щихъ похвало́ и мона́шествующихъ удобре́ніе. [Два́жды.]

Сла́ва, и ны́нѣ, богоро́диченъ, гла́съ то́йже:

Пречи́стыя Твои́ ру́цѣ, Дѣ́во Ма́ти, просте́рши, покры́й упова́ющія на Тя́ и къ Сы́ну Твоему́ зову́щія: всѣ́мъ пода́ждь, Христе́, Твоя́ ми́лости.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Исто́чникъ ми́ сле́зъ да́руй, Влады́чице, я́ко да отмы́ю скве́рну смире́нныя моея́ души́ и обря́щу добро́ту, ю́же погуби́хъ совѣ́томъ зміи́нымъ.

Бо́же мо́й Милосе́рде, Бо́же Человѣколю́бче, воли́телю ми́лости, ны́нѣ на мя́ излíй Твою́ ми́лость, мо́литъ Тя́ наде́жда и засту́пница моя́, Ма́ти Твоя́.

Мене́ блу́днаго, мене́ ужа́снаго, безъ ума́ и безсту́дно мно́го согрѣ́шша къ Тебѣ́, Пренепоро́чная, уще́дривши, спаси́ и гее́нны свободи́.

Па́жить потреби́ла еси́ сме́рти, ро́ждши Жи́знь вся́ческихъ. Тѣ́мже и а́зъ зову́ Ти: согрѣши́хъ, спаси́ мя, Чи́стая, ма́терними Твои́ми моли́твами.

Инъ. Ирмо́съ то́йже.

Посто́мъ и моли́твою, преподо́бная Евфроси́ніе, себе́ очи́стивши, вся́ свѣ́та испо́лнилася еси́ и до́мъ Свята́го Ду́ха показа́лася еси́.

Бдѣ́ніями и поще́ніемъ, бу́дущаго ра́ди воздая́нія, лю́тѣ пло́ть твою́ умерщвля́ла еси́, блаже́нная Евфроси́ніе, и ны́нѣ чи́стѣ зри́ши Святу́ю Тро́ицу.

Облиста́ема сла́вою кра́сныхъ житія́ твоего́ исправле́ній, яви́лася еси́, я́ко ме́чь обою́ду о́стрый, ссѣка́ющій де́монская ухищре́нія, Боже́ственною си́лою укрѣпля́ема.

Богоро́диченъ: Свѣти́льникъ всесвѣ́тлый, Боже́ственная трапе́за, Бо́жіе селе́ніе, киво́тъ и же́злъ процвѣ́тшій мíру Ты́ показа́лася еси́, Ма́ти Дѣ́во.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Поми́луй мя́, Чи́стая, на Тя́ всю́ наде́жду мою́ возложи́вшаго, и уще́дри, вѣ́рою взыва́ю Ти́, презрѣ́вши души́ моея́ вся́ стра́сти лю́тыя.

Спаси́ мя отъ страсте́й, ско́рби и вре́да, лука́выхъ сопроти́вныхъ, и изба́ви си́хъ ла́янія смире́нную мою́ ду́шу, да не реку́тъ, Дѣ́во: укрепи́хомся на́нь.

Чиста́ тѣ́ломъ и душе́ю, Пречи́стая, я́вльшися, ду́шу мою́ отъ скве́рны свободи́, дая́ ми чи́сто жи́ти, и наста́ви твори́ти ми́ Госпо́дню боже́ственную во́лю.

Тя́ Еди́ну и́мамъ прибѣ́жище, и къ Бо́гу премѣне́ніе, и́же во мно́гихъ прегрѣше́ніихъ все́ житіе́ мое́ ижди́хъ. Тѣ́мже мя́, Богоро́дице, Ты́ уще́дри.

Инъ. Ирмо́съ то́йже.

Свѣтопода́тельными благода́ти блиста́ньми, осіява́й вся́ ны́, преподо́бная ма́ти, и тму́ отжени́ искуше́ній и грѣхо́внаго омраче́нія.

Тебе́ вси́ засту́пницу и́мамы, преподо́бная ма́ти на́ша Евфроси́ніе: не преста́й у́бо о на́съ моли́ти Го́спода, да не лише́ни бу́демъ Черто́га Его́ небе́снаго.

Яко звѣзда́ свѣтоза́рная, показа́лася еси́, ма́ти Евфроси́ніе, блужда́ющихъ во мра́цѣ путеводя́щая, во искуше́ніихъ и вра́жіихъ навѣ́тахъ ско́рая и наде́жная помо́щница.

Богоро́диченъ: Добро́та Іа́ковля, Юже возлюби́ Бо́гъ и въ Ню́же всели́тися изво́ли Сло́во Бо́жіе, земны́хъ сла́ва и грѣ́шныхъ прибѣ́жище Ты́ еси́, Богоро́дице Чи́стая.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Испра́ви, Влады́чице, ма́лое мое́ стена́ніе и ру́къ воздѣя́ніе, я́коже благово́нну же́ртву, и Тво́й сподо́би зра́къ чи́стою со́вѣстію узрѣ́ти.

Глаго́лъ мои́хъ, Влады́чице блага́я, не пре́зри моле́ніе, Роди́тельнице ми́лостиваго Бо́га, отъ Твоея́ утро́бы возсія́вшаго, но да́ждь ми́ пре́жде конца́ боже́ственное оставле́ніе.

Преклони́хся страстьми́ блу́дно, преокая́нный, и удали́хся отъ Бо́га, Его́же моли́ спасти́ мя, Блага́я, къ Тебѣ́ бо прибѣго́хъ, и оде́ждами мя́ пре́дними украси́.

Не опали́въ ложе́снъ Твои́хъ о́гнь сы́й Іису́съ, изъ Тебе́ пло́тію прихо́дитъ, Сего́, Чи́стая, моли́ огня́ и вся́кія му́ки изба́вити вѣ́рою воспѣва́ющихъ Тя́.

Инъ. Ирмо́съ то́йже.

Возсія́вши, я́ко со́лнце, богосія́нными луча́ми, преподо́бная Евфроси́ніе, струи́ излива́еши исцѣле́ній всѣ́мъ, похваля́ющимъ твоя́ по́стническія труды́ и ди́вныя по́двиги.

Ублажа́емъ и чти́мъ твою́ па́мять святу́ю и мо́лимъ тя́ при́сно: помяни́ и на́съ, ма́ти Евфроси́ніе, у престо́ла всѣ́хъ Царя́.

Егда́ то́кмо узрѣ́ла еси́, преподо́бная Евфроси́ніе, трети́цею напи́санный о́бразъ я́вльшагося тебѣ́ архистрати́га, и а́біе разрѣши́шася у́зы язы́ка твоего́, и просла́вила еси́ Го́спода, творя́щаго ди́вная чудеса́.

Богоро́диченъ: Вся́ хотѣ́ніемъ соста́вивый Бо́гъ и содержа́й вся́ческая сло́вомъ, Твои́ма рука́ма держи́тся, Пречи́стая, Иже Боже́ственнымъ Существо́мъ неопи́санный.

Конда́къ, гла́съ 2:

Вся́ кра́сная мíра сего́, я́ко су́етная, презрѣ́вши и тѣ́ло твое́ посто́мъ и бдѣ́ніемъ изнури́вши, непреста́нными моли́твами Бо́гу угоди́ла еси́, преподо́бная Евфроси́ніе, и, да́ръ исцѣле́ній отъ Него́ прія́ти сподо́бльшися, слѣпо́му прозрѣ́ніе и мно́гимъ неду́жнымъ исцѣле́ніе дарова́ла еси́. Тѣ́мже ра́достно взыва́емъ, глаго́люще: сла́ва Бо́гу, прославля́ющему святы́я Своя́.

Икосъ:

Пріиди́те, по́стническое сосло́віе и чистоты́ усе́рдніи храни́теліе, пѣ́сньми духо́вными воспои́мъ преподо́бную Евфроси́нію, красоты́ мíра сего́ возненави́дѣвшую, вре́менную княже́нія сла́ву оста́вльшую, во оби́тели, е́ю созда́ннѣй, о́бразъ мона́шествующимъ показа́вшую, мно́гими бдѣ́ніями и посто́мъ тѣ́ло свое́ удручи́вшую, и мно́гихъ ра́ди по́двиговъ еще́ въ житіи́ се́мъ да́ръ исцѣле́ній отъ Бо́га прія́вшую, и по сме́рти исцѣле́нія неоску́дно источа́ющую всѣ́мъ, съ вѣ́рою приходя́щимъ къ честно́й ра́цѣ моще́й ея́. Тѣ́мже ра́достно взыва́емъ, глаго́люще: сла́ва Бо́гу, прославля́ющему святы́я Своя́.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Возни́кни, о душе́ моя́, отъ злы́хъ, я́же содѣ́яла еси́, что́ спи́ши про́чее, низлежа́щи? Къ Богоро́дицѣ возопíй: Пресвята́я, помози́ ми.

Образъ ви́да Твоего́ чту́ и не смѣ́ю воззрѣ́ти къ Тебѣ́, Пресвята́я, молю́ прія́ти ми́ долго́въ проще́ніе и чи́сто ви́дѣти Твою́ пречи́стую ико́ну.

Въ Твое́ прибѣга́ю, Богороди́тельнице, заступле́ніе, и припа́даю прія́ти ми́ проще́ніе: не пре́зри мене́, Влады́чице, но уще́дривши спаси́ мя.

Многообра́зными зло́бами душетлѣ́ннаго оскверни́въ ду́шу и у́мъ, молю́ Тя, Пречи́стая, моля́ща мя́ не пре́зри, и того́ искуше́ній исхити́ раба́ Твоего́.

Инъ. Ирмо́съ то́йже.

Ева́нгельскимъ словесе́мъ вне́млющи, кре́стъ сво́й на ра́мена твоя́ воспрія́ла еси́ и Христу́ послѣ́довала еси́, преподо́бная Евфроси́ніе, Тому́ непреста́нно взыва́я: благослове́нъ еси́, Бо́же оте́цъ на́шихъ.

Добро́ты тлѣ́ющія, Евфроси́ніе, небрегла́ еси́, бу́дущаго ча́ющи воздая́нія, и прія́ла еси́ сла́ву нестарѣ́ющую небе́снаго блаже́нства и весе́лія вѣ́чнаго.

То́ки чуде́съ излива́еши, и подае́ши исцѣле́нія тѣле́сныхъ болѣ́зней, и ду́ши исполня́еши боже́ственнаго весе́лія вѣ́рою почита́ющихъ святу́ю па́мять твою́.

Богоро́диченъ: Ве́ліе содѣ́яся на Тебѣ́ та́инство, Дѣ́во Ма́ти: Сы́нъ Бо́жій изъ Тебе́ воплоти́ся и Человѣ́къ бы́сть. Ему́же, веселя́щеся, пое́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Безмѣ́рно согрѣши́въ и оскверни́въ мое́ во грѣсѣ́хъ тѣ́ло, неразу́мный, помышля́ю необыме́ннаго Суда́ де́нь, и недоумѣ́вся, убоя́хся, и ужаса́юся и трепе́щу. Ко благоутро́бію Твоему́, Влады́чице, припа́даю: не отри́ни мене́, но ви́ждь мою́ ско́рбь и изба́ви вся́каго осужде́нія и му́къ многообра́зныхъ.

Зако́нъ боже́ственный презрѣ́въ, въ лѣ́ности ве́сь слежу́ окая́нный: призрѣ́вши, Пречи́стая, возста́ви вско́рѣ, и спасе́нныхъ сотвори́ мя ча́сти получи́ти, да ра́дуяся зову́ Ти: ра́дуйся, Ра́досте мíра, еди́на Предста́тельнице вѣ́рою призыва́ющимъ Тво́й тве́рдый покро́въ.

Увы́ мнѣ́, душе́ моя́! Ка́ко предста́немъ тогда́ во стра́сѣ и тре́петѣ суди́щу стра́шному, егда́ а́нгели предста́нутъ въ стра́сѣ и тре́петѣ? Богоро́дицу иму́щи бла́гу засту́пницу, преклони́ колѣ́на и воздѣжи́ ру́цѣ, вопію́щи: при́зри на мене́ отча́яннаго Твои́мъ ми́лостивымъ тогда́ взо́ромъ, Дѣ́во.

Покажи́ крѣ́пость Твою́ непосты́дну въ заступле́ніе ны́нѣ, Твои́ми бо, ма́терними мольба́ми преклони́тся Сы́нъ Тво́й, Дѣ́во. Предвари́ у́бо ны́нѣ въ ну́ждный ча́съ, да не отыду́ негото́въ, но поживу́ и еще́, Препѣ́тая Богоро́дице Чи́стая.

Инъ. Ирмо́съ то́йже.

Въ зако́нѣ Бо́жіемъ ча́сто поуча́яся и въ за́повѣдехъ Бо́жіихъ безпоро́чно ходя́ши, до́мъ Ду́ха Свята́го была́ еси́, блаже́нная Евфроси́ніе. Тѣ́мже по сме́рти твое́й не отлучи́ тебе́ Госпо́дь ли́ка преподо́бныхъ, съ ни́ми же ны́нѣ Бо́гу пое́ши: Превозноси́мый во вѣ́ки Бо́же, благослове́нъ еси́.

Кро́тостію ко всѣ́мъ зе́млю кро́ткихъ наслѣ́довала еси́, нищелю́біемъ и ми́лостынями поми́лованіе отъ Бо́га улучи́ла еси́, чистото́ю се́рдца и цѣлому́дріемъ Бо́га зрѣ́ти сподо́билася еси́, Ему́же со всѣ́ми святы́ми пое́ши: Превозноси́мый во вѣ́ки Бо́же, благослове́нъ еси́.

Умъ тво́й къ Бо́гу ча́сто возводя́щи и добро́ту вѣ́чнаго поко́я смотря́ющи, плотскíя стра́сти ду́ху покори́ла еси́ и, и́ноческимъ о́бразомъ украси́вшися, вѣ́чное блаже́нство улучи́ла еси́, пою́щи Христа́ во вѣ́ки.

Богоро́диченъ: Бо́жія и несѣко́мая гора́ яви́лася еси́, Дѣ́во, отъ нея́же отсѣче́ся ка́мень краеуго́льный — Христо́съ, Иже сокруши́ крѣ́пость и́дольскую и две́ри отве́рзе Ца́рствія небе́снаго.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Да вы́шнія сла́вы получу́, Дѣ́во, молю́ся Тебѣ́: осла́би ми́ и изба́ви долго́въ тмы́, вся́ презрѣ́вши, Пречи́стая, моя́ прегрѣше́нія, я́же въ невѣ́дѣніи и ра́зумѣ, во дни́ и въ нощи́, я́ко да благода́рственную пѣ́снь, ра́дуяся, принесу́ Ти.

Отъ вся́кихъ мя́ скорбе́й исхити́, Отрокови́це, и на ка́мени поста́ви но́зѣ мои́ боже́ственнаго спасе́нія, Тя́ бо предста́тельницу необори́му ны́нѣ стяжа́въ, упова́ю преити́ стѣ́ну и прегра́ду, ю́же преслуша́ніемъ дре́ва созда́хъ.

Тя́ молю́, ро́ждшую милосе́рдаго Судію́ и Влады́ку: пріими́ де́рзость скве́рныхъ усте́нъ и убо́гое пѣ́ніе мое́, и не омерзи́ мене́, па́че всѣ́хъ человѣ́къ грѣ́шнѣйшаго. Тя́ бо по Бо́зѣ засту́пницу имѣ́ю ра́бъ Тво́й.

Яко вы́шши су́щи созда́нію вся́ческихъ, во утро́бѣ Твое́й имѣ́ла еси́, Богоро́дице, Бо́га воплоще́нна, Сего́ прилѣ́жно моли́, Чи́стая, разрѣши́ти вся́каго настоя́нія раба́ Твоего́, да свобо́днымъ гла́сомъ Тя́ славосло́влю и а́зъ.

Инъ. Ирмо́съ то́йже.

Не терпя́ лука́вый вра́гъ твои́хъ всено́щныхъ бдѣ́ній и зѣ́льнаго воздержа́нія, сла́вы же земны́я и кра́сныхъ мíра сего́ презрѣ́нія, клевета́ми и злорѣ́чіемъ возмути́ ду́шу ча́дъ твои́хъ со служи́тели и́хъ, ты́ же, преподо́бная, Бо́га ра́ди поноше́нія клеветы́ съ терпѣ́ніемъ ве́ліимъ понесла́ еси́, Бо́гу себе́ вруча́ющи.

Егда́ кра́йнее изможде́ніе тѣ́ла твоего́ обличи́ла еси́ предъ ча́ды твои́ми, клеветы́ вся́чески клеветнико́мъ отмща́ти воспрети́ла еси́, Бо́гу себе́ предаю́щи, Иже и просла́ви тя́ чуде́съ дарова́ніи, блаже́нная Евфроси́ніе.

Твои́хъ по́двиговъ прія́ла еси́ вѣнцы́ и ны́нѣ съ преподо́бныхъ ли́ки на небесѣ́хъ при́сно ра́дуешися, помина́й у́бо и на́съ, преподо́бная ма́ти Евфроси́ніе, да моли́твами твои́ми сподо́бимся улучи́ти небе́снаго Ца́рствія.

Богоро́диченъ: Посо́бствуеши царе́мъ вѣ́рнымъ во бране́хъ, Пресвята́я Влады́чице, тѣ́мже и Импера́тору на́шему на вся́ сопроти́вныя да́ждь побѣ́ды, да Тя́ вы́ну велича́емъ.

Свѣти́ленъ:

Избѣ́гла еси́ ко́зней врага́ иско́ннаго, возгнуша́вшися всея́ его́ и мíра сего́ пре́лести, и прешла́ еси́ въ небе́сныя черто́ги, идѣ́же ны́нѣ лику́еши со всѣ́ми преподо́бными. [Два́жды.]

Сла́ва, и ны́нѣ, богоро́диченъ:

Богоро́дице Дѣ́во, невѣ́дущіи Тя́ не и́мутъ ви́дѣти Свѣ́та, ро́ждшагося изъ Тебе́, Пречи́стая.

На хвали́техъ стихи́ры на 4, гла́съ 2:

Разумѣ́ніе доброразсу́дное* имѣ́ла еси́ въ душѣ́ твое́й, преподо́бная,* и смире́ніе, и кро́тость,* вѣ́ру, наде́жду и любо́вь, я́же къ Бо́гу,* и всено́щными моли́твами* Ему́ послужи́ла еси́. [Два́жды.]

Собра́вшеся дне́сь, лю́діе христоимени́тіи,* возвели́чимъ Христа́ Бо́га на́шего,* возвели́чившаго преподо́бныя Евфроси́ніи свяще́нную па́мять,* въ не́йже, пра́зднующе, возопіи́мъ къ преподо́бнѣй:* помина́й на́съ, вѣ́рно почита́ющихъ тя́. [Два́жды.]

Сла́ва, гла́съ 8:

О, блаже́ннаго изволе́нія! Яко усе́рдно Бо́га возжела́вши, презрѣ́ла еси́ мірскíй мяте́жъ и земны́я сла́сти, въ по́стничествѣ и трудѣ́хъ пожи́вши, Го́споду угоди́ла еси́.

И ны́нѣ, богоро́диченъ, гла́съ то́йже:

Арха́нгела Гавріи́ла гла́съ воспріи́мше, рце́мъ: ра́дуйся, Ма́ти Бо́жія, Яже Жизнода́вца Христа́ мíру ро́ждшая.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на преподо́бныя, пѣ́снь 3-я и 6-я. Проки́менъ, [гла́съ 4]: Ди́венъ Бо́гъ во святы́хъ Свои́хъ, Бо́гъ Изра́илевъ. [Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ]. Апо́столъ къ Гала́томъ, зача́ло 208. [Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 104. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба свято́й благовѣ́рной Вели́кой Княги́нѣ Евдокíи, во и́нокиняхъ Евфроси́ніи, положи́вшей основа́ніе Моско́вскаго Вознесе́нскаго монастыря́. — М.: Сѵнодальная тѵпогра́фія, 1914. — 22 л.

/ Къ оглавленію раздѣла /


Наверхъ / Къ титульной страницѣ

0