Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 6-й де́нь.
Преподо́бнаго отца́ на́шего Сисо́я Вели́каго.

[ВЕЧЕРЪ,
На Го́споди воззва́хъ:] стихи́ры, гла́съ 4. Подо́бенъ: Да́лъ еси́ зна́меніе.

Ангелъ земны́й,* я́коже другíй, пожи́лъ еси́,* воздержа́ніемъ тѣ́ло твое́ увяди́лъ еси́, пребога́те,* и бдѣ́ньми, и па́мятію сме́ртною,* всегда́ поуча́яся боже́ственно, о́тче,* и возраста́я вели́кими восхожде́ніи* къ жела́нію кра́йнему.* Тѣ́мже вои́стинну прибли́жился еси́* въ са́мое то́ соверше́ніе.

Чу́до па́че ума́,* во успе́ніи твое́мъ бы́сть,* преподобному́дре чуде́сне,* внегда́ ли́къ святы́хъ, о́тче, предста́ внеза́пу:* я́коже бо со́лнце, му́дре, лице́ твое́ облиста́,* явля́я блиста́ющій зра́къ,* твоея́ души́ чистоту́,* и увѣря́юще всѣ́хъ,* какову́ кончи́ну получи́лъ еси́.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Сисо́е, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ:

Юница нескве́рная,* Юнца́ ви́дящи на дре́вѣ,* пригвожда́ема во́лею,* рыда́ющи жа́лостнѣ, —* увы́ Мнѣ́, — вопія́ше, —* люби́мѣйшее Ча́до:* что́ Ти́ со́нмъ воздаде́ безблагода́тный евре́йскій,* хотя́ Мя обезча́дствовати* отъ Тебе́, Вселюбе́зне?

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Сисо́е: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою приходя́щихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Страстьми́ умерщвле́на, оживи́ мя, о́тче, моли́твами твои́ми, Жи́зни ны́нѣ живу́щихъ со дерзнове́ніемъ мно́гимъ предстоя́.

Жела́ніемъ, о́тче, боже́ственнымъ раче́ніе пло́ти отри́нувъ, послѣ́довалъ еси́ любо́вію Зову́щему, Сисо́е блаже́нне.

Зарю́ невеще́ственну, о́тче, вну́трь въ се́рдцы пріе́мъ, просвѣти́лся еси́ и всестра́стную мглу́ потреби́лъ еси́.

Богоро́диченъ: Спаси́ мя, въ бу́ри всѣ́хъ сласте́й обурева́емаго, Спа́са ро́ждшая, всѣ́хъ тишину́, Пренепоро́чная.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Пло́ть покори́лъ еси́ по́мыслу крѣ́пко, преподо́бне, ду́шу же показа́лъ еси́ рабо́ты страстны́я свобо́дну.

Болѣ́зньми твои́ми бразду́ душе́вную, му́дре преподо́бне, до́брѣ дѣ́лая, кла́съ безстра́стія и чуде́съ израсти́лъ еси́.

Въ ме́ртвость одѣ́ялся еси́, Животво́рца Христа́, преподо́бне, стопа́мъ послѣ́дуя, тѣ́мъ возставля́ти тебѣ́ и ме́ртвыя благода́ть дае́тъ.

Богоро́диченъ: Мѣ́сто свяще́нія, и мы́сленну, Чи́стая, трапе́зу, хлѣ́бъ, Христа́, жи́знь всѣ́хъ пріе́мшую, пое́мъ Тя́.

Сѣда́ленъ, гла́съ 4:

Воздержа́ніемъ житіе́ украси́лъ еси́, и, у́ды умертви́въ, побѣди́лъ еси́ страстна́я прирѣва́нія, Сисо́е блаже́нне, и преста́вился еси́ къ Бо́гу въ вѣ́чный живо́тъ, я́ко досто́инъ наслѣ́дникъ. Тѣ́мъ не преста́й моля́ся спасти́ ду́ши на́ша.

Сла́ва, и ны́нѣ, богоро́диченъ:

Те́плая Предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы умире́ніе да́ти мíрови, и спасе́ніе, и ве́лію ми́лость.

Крестобогоро́диченъ:

Кресто́мъ Сы́на Твоего́, Богоблагода́тная, и́дольская пре́лесть вся́ упраздни́ся и де́монская крѣ́пость попра́ся. Сего́ ра́ди, вѣ́рніи, по до́лгу Тя́ при́сно пое́мъ, и благослови́мъ, и, Богоро́дицу вои́стинну исповѣ́дающе, Тя́ велича́емъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Одожде́ніемъ благода́ти, о́тче, рѣ́ки чуде́съ источи́лъ еси́, отъ скве́рны очища́я вѣ́рою, блаже́нне, къ тебѣ́ притека́ющія.

Всено́щными мольба́ми и вседне́вными, преподо́бне, стоя́ніи, ду́шу предочи́стивъ, Тро́ицѣ до́мъ сію́ показа́лъ еси́.

Въ пусты́няхъ удали́лся еси́, о́тче, бѣ́гая и ожида́я тя́ Спаса́ющаго, блаже́нне, отъ малоду́шія и озлобле́нія.

Богоро́диченъ: Несѣко́мую го́ру Тя́ дре́вле Авваку́мъ прови́дѣ, Всенепоро́чная, изъ нея́же Бо́гъ яви́ся и на́съ, истлѣ́вшія, обнови́лъ е́сть.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Хра́мъ трисо́лнечнаго Божества́ бы́въ, страсте́й куми́ры твоея́ души́ потреби́лъ еси́.

Умертви́въ пло́ти твоея́ мудрова́ніе, богоно́се, ме́ртвыя воскреси́лъ еси́ дѣ́йствомъ Ду́ха.

Духо́въ нечи́стыхъ отгони́тель яви́лся еси́, о́тче, Свята́го бо Ду́ха чи́стое жили́ще бы́лъ еси́ ты.

Богоро́диченъ: Со́лнца ро́ждши незаходи́маго, Богоро́дице, всего́ просвѣти́ омраче́на мя́ страстьми́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ки́та мы́сленнаго всегуби́тельства избѣжа́лъ еси́, воздержа́ніе, моли́тву, любо́вь нему́тну, держа́вное смире́ніе и любле́ніе тве́рдо, ко Христу́, о́тче, стяжа́въ.

Бо́гъ твоя́ я́же къ Нему́ напра́ви стопы́, Си́льный си́льна я́вѣ содѣ́ла, попира́юща зміе́въ и скорпíй главы́, богоно́се всеблаже́нне.

Манове́ніемъ, е́же къ Бо́гу, бо́гъ я́вѣ бы́лъ еси́, ко Свѣ́ту все́ю любо́вію свѣ́тъ бы́въ, а́нгелъ земны́й, богоно́се о́тче, небе́сный же человѣ́къ.

Богоро́диченъ: Марíе, чи́стый дѣ́вства сосу́де, очи́сти мо́й у́мъ отъ страстна́го омраче́нія и испо́лни благода́ти и пра́вды се́рдце мое́, Всенепоро́чная.

Конда́къ, гла́съ 4. Подо́бенъ: Яви́лся еси́.

Подвиза́вся, а́нгелъ на земли́ ви́дѣнъ бы́лъ еси́, озаря́яй, преподо́бне, помышле́нія вѣ́рныхъ богозна́меньми всегда́. Тѣ́мже тя́ вѣ́рою, Сисо́е, почита́емъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Всю́ Ду́ха зарю́ прія́лъ еси́ умо́мъ чи́стымъ и свѣти́льникъ вѣ́рно вопію́щихъ бы́лъ еси́: благослове́нъ еси́, Го́споди Бо́же, во вѣ́ки. [Два́жды.]

Боже́ственнымъ огне́мъ воздержа́нія попали́лъ еси́ те́рніе грѣхо́вное и къ Свѣ́ту мы́сленному преше́лъ еси́, взыва́я: благослове́нъ еси́, Го́споди Бо́же, во вѣ́ки.

Богоро́диченъ: Спаси́ мя, Ма́ти Спа́са, содержи́ма глубино́ю согрѣше́ній, и вся́кія вра́жія исхи́ти зло́бы, да Твое́, спаса́емь, велича́ю заступле́ніе.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Непреста́нными прилѣжа́ моли́твами и мольба́ми, мра́къ отъ души́ страсте́й отгна́лъ еси́ и ума́ твоего́ зри́тельное очи́стилъ еси́. Тѣ́мже прозрѣ́ти проро́чески сподо́бился еси́ бу́дущая, Сисо́е, благоче́стно воспѣва́я: лю́діе, превозноси́те Го́спода во вѣ́ки.

Ангельски пожи́лъ еси́ съ тѣ́ломъ, преподо́бне, и проти́вныя побѣди́лъ еси́ полки́. Тѣ́мже въ невеще́ственнѣй жи́зни, идѣ́же а́нгельскія чи́ны, съ весе́ліемъ, о́тче, всели́лся еси́, съ ни́миже взыва́еши: свяще́нніи, воспо́йте Го́спода, лю́діе, превозноси́те во вся́ вѣ́ки.

Олядѣ́вшую страстьми́ ду́шу мою́ очи́сти твои́ми къ Бо́гу свяще́нными моли́твами и содержа́щаго мя́ плѣне́нія изба́ви, о́тче богоно́се, да пою́ чи́сто: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Освяти́вшися Ду́хомъ, прія́ла еси́ во утро́бѣ Твое́й Содѣ́теля человѣ́ческаго естества́ и Сего́ несказа́нно родила́ еси́, Отрокови́це Чи́стая. Его́же непреста́нно воспѣва́юще, пое́мъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Яви́ся чу́до стра́шное въ са́мое вре́мя успе́нія твоего́, па́че со́лнца твоему́ лицу́, о́тче, облиста́вшу, егда́ пріидо́ша ли́цы а́нгельстіи, ду́хъ тво́й пріе́млющіи и Свѣ́ту трисо́лнечному принося́щіи.

Боже́ственными, блаже́нне, добро́тами наслажда́яся, и прича́стіемъ обожа́емь, и просвѣща́емь свѣ́тлыми отту́ду сія́ніи, свѣтоно́сную твою́ вѣ́рно па́мять чту́щія твои́ми мольба́ми, му́дре, мра́чныя страсте́й па́губы изба́ви.

Пра́веденъ, непоро́ченъ, вся́каго огреба́яся зла́, о́тче, бы́лъ еси́, преподо́бенъ, незло́бивъ, Бо́гу послужи́въ въ преподо́біи, тѣ́мже почи́ла е́сть Тро́ица въ се́рдцѣ твое́мъ, Ея́же ны́нѣ яснѣ́е наслажда́ешися свѣ́тло, досточу́дне.

Богоро́диченъ: Отъ дѣ́лъ отню́дъ во мнѣ́ спасе́нія нѣ́сть, Всенепоро́чная: проти́вною бо ше́ствуя стезе́ю, тмы́ испо́лнихся. Но Свѣ́тъ отъ Свѣ́та на́мъ возсія́вшая, просвѣти́ и спаси́ мя, не пре́зри мене́, лю́тѣ погиба́юща.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 54 – 57.

/ Къ оглавленію раздѣла /


Наверхъ / Къ титульной страницѣ

0