Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 6-й де́нь.
Слу́жба святѣ́й пра́веднѣй дѣ́вѣ Іуліанíи, княжнѣ́ Ольша́нской.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры [на 8], гла́съ 4. Подо́бенъ: Яко до́бля.

Колесни́цею добродѣ́телей востекла́ еси́* въ го́рняя селе́нія,* прекра́сная дѣ́во Іуліанíе,* на́мъ же честны́я мо́щи твоя́,* нетлѣ́ніемъ процвѣ́тшія и чудесы́ точа́щія,* я́ко наслѣ́діе бога́тое, оста́вила еси́.* Тѣ́мже, обрѣ́теніе и́хъ свѣ́тло пра́зднующе,* мо́лимъ тя́, невѣ́сто Христо́ва,* моли́ся вы́ну ко Го́споду о душа́хъ на́шихъ. [Три́жды.]

Жениха́ Нетлѣ́ннаго красото́ю* уязви́вши се́рдце твое́,* Того́ вседу́шно возлюби́ла еси́, дѣ́во Іуліанíе,* и, Тому́ непоро́чно дѣ́вство твое́ сохра́нши,* сподо́билася еси́ вни́ти въ черто́гъ Его́ бра́чный,* идѣ́же со святы́ми наслажда́яся блаже́нства неконча́емаго,* помяни́ въ моли́твахъ твои́хъ ко Го́споду* почита́ющихъ любо́вію святу́ю па́мять твою́* и моли́ся о душа́хъ на́шихъ. [Два́жды.]

Сла́ва, гла́съ 6:

Одесну́ю Спа́са Христа́ въ ли́цѣ святы́хъ дѣ́въ предстоя́щи, дѣ́во княжно́ Іуліанíе, наслажда́ешися созерца́ніемъ пресвѣ́тлаго Его́ лица́, отону́дуже и сама́, свѣ́тлость немерца́ющую пріе́мши, свѣти́ши благода́тно во мра́цѣ страсте́й и скорбе́й су́щимъ и цѣльбы́ подае́ши неду́жнымъ, съ вѣ́рою притека́ющимъ къ ра́цѣ святы́хъ твои́хъ моще́й. Тѣ́мже моли́твами твои́ми сохраня́й на́съ отъ неду́говъ душе́вныхъ и тѣле́сныхъ и исхода́тайствуй на́мъ наслѣ́діе Ца́рствія небе́снаго.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́. Чте́нія три́ преподо́бническія.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Стра́сти вре́менныя обузда́ла еси́* и плотоугодіе отве́ргла еси́, Іуліанíе блаже́нная,* въ дѣ́вствѣ непоро́чномъ пребы́вши отъ ю́ности твоея́,* да благоуго́дна бу́деши Пресла́дкому Іису́су,* Иже возлюби́ душе́вную твою́ красоту́* и обручи́ тя́ въ невѣ́сту Себѣ́ нетлѣ́нную,* къ Нему́ же дерзнове́ніе стяжа́вши,* сохраня́й моли́твами твои́ми гра́дъ и оби́тель,* храня́щія честны́я твоя́ мо́щи,* и моли́ся вы́ну о чту́щихъ святу́ю па́мять твою́.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Добро́та тѣле́сная* и красота́ боже́ственная души́ твоея́,* сопряго́шася чу́дно, прекра́сная дѣ́во Іуліанíе,* содѣ́лаша тя́ вои́стинну* досто́йну Жениха́ Безсме́ртнаго,* Иже избра́ тя́ и возлюби́,* и дара́ми духо́вными зѣло́ обогати́,* и́миже, я́ко ря́сны, укра́шена,* вошла́ еси́ въ невѣ́стникъ Его́ ра́йскій,* и та́мо вѣне́цъ Ца́рствія небе́снаго* получи́ла еси́ отъ руки́ Вседержи́теля,* Ему́же предстоя́ во сла́вѣ невече́рнѣй,* моли́ся вы́ну о чту́щихъ святу́ю па́мять твою́.

Сти́хъ: Въ це́рквахъ благослови́те Бо́га,* Го́спода отъ исто́чникъ Изра́илевыхъ.

Окрестъ стоя́ще честны́я твоея́ ра́ки,* дѣ́во блага́я, Іуліанíе присносла́вная,* пѣ́сни хвале́бныя прино́симъ ти́ по достоя́нію,* я́ко моли́твенницѣ за на́съ у престо́ла Го́спода сла́вы,* да́ры цѣле́бныя неоску́дно подаю́щей* съ вѣ́рою къ тебѣ́ притека́ющимъ,* и́хже не лиши́ и на́съ,* тре́бующихъ твоего́ заступле́нія,* и моли́ся ко Го́споду о чту́щихъ святу́ю па́мять твою́.

Сла́ва, гла́съ 6:

Княже́нія высота́ и мірскíя утѣ́хи не отторго́ша се́рдца твоего́ отъ любве́ Христо́вы, Іуліанíе пра́ведная, тѣ́мже съ кня́жескою діади́мою, вѣне́цъ нетлѣ́ненъ обруче́нія со Христо́мъ соедини́ла еси́ и Краснѣ́йшему па́че сыно́въ человѣ́ческихъ уневѣ́стилася еси́ преподо́біемъ и чистото́ю, съ Ни́мже соедини́вшися любо́вію крѣ́пкою, ны́нѣ лику́еши свѣ́тло въ оби́телехъ ра́йскихъ, я́ко дѣ́ва и невѣ́ста Христо́ва прекра́сная.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

Тропа́рь, гла́съ 8:

Яко непоро́чная невѣ́ста Нетлѣ́ннаго Жениха́ Христа́, пра́ведная дѣ́во Іуліанíе, съ свѣ́тлою свѣще́ю до́брыхъ дѣ́лъ вошла́ еси́ въ черто́гъ Его́ небе́сный и та́мо со святы́ми блаже́нства вѣ́чнаго наслажда́ешися. Тѣ́мже моли́, Его́же возлюби́ла еси́ и Ему́же дѣ́вство твое́ обручи́ла еси́, спасти́ ду́ши на́ша.

[Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
На Бо́гъ Госпо́дь: Тропа́рь [святы́я два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

Благоче́стно жи́знь вре́менную сконча́вши, къ безсме́ртнѣй жи́зни кончи́ною блаже́нною прешла́ еси́, Іуліанíе всечестна́я, и, я́ко луна́ по́лная, сія́еши луча́ми Свѣ́та невече́рняго, озаря́ющи но́щь страсте́й и скорбе́й на́шихъ, сія́ніемъ мно́гихъ чуде́съ, и́миже обогати́лася еси́ отъ Го́спода, тя́ вѣнча́вшаго вѣнце́мъ сла́вы нетлѣ́нныя, Ему́же моли́ся о на́съ, соверша́ющихъ па́мять твою́. [Два́жды.]

Сла́ва, и ны́нѣ, богоро́диченъ:

Те́плая предста́тельнице и непобѣди́мое упова́ніе извѣ́стное и непосты́дное, стѣно́, и покро́ве, и приста́нище прибѣга́ющихъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы и блаже́нною дѣ́вою Іуліанíею умире́ніе да́ти мíру, и спасе́ніе, и ве́лію ми́лость.

По 2-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й.

Гро́бъ тво́й исто́чникъ исцѣле́ній показа́ся, Іуліанíе достохва́льная, его́же не потаи́ земля́, но издаде́ изъ нѣ́дръ свои́хъ во обогаще́ніе на́ше, въ не́мже зря́ще нетлѣ́ніемъ процвѣ́тшія твоя́ мо́щи, ра́дуемся и благодари́мъ Го́спода, такова́го да́ра на́съ сподо́бльшаго, Его́же моли́ при́сно о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Моли́твы Твои́хъ ра́бъ пріими́, Богоро́дице, и изба́ви на́съ отъ вся́кія бѣды́, я́ко ро́ждшая Христа́ Спа́са, Изба́вителя ду́шъ на́шихъ.

Та́же, поліеле́й и велича́ніе:

Велича́емъ тя́, свята́я пра́ведная дѣ́во Іуліанíе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

По поліеле́и сѣда́ленъ, гла́съ 8. Подо́бенъ: Прему́дрости.

Уневѣ́стившися Го́сподеви боголѣ́пно, Тому́ Еди́ному дѣ́вство твое́ непоро́чно сохрани́ла еси́, дѣ́во Іуліанíе, и черто́гъ Его́ боже́ственный въ наслѣ́діе вѣ́чное воспрія́ла еси́, свѣтоли́тія небе́снаго свѣ́тлою заре́ю просвѣща́ема, отню́дуже свѣ́тлость немерца́ющую пріе́мши, озари́ и на́ша мра́чныя ду́ши луче́мъ Бо́жія благода́ти и моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Безпло́тныхъ Твои́хъ, Христе́, и Предте́чи Твоего́, апо́столъ, и проро́къ, и му́ченикъ, и всѣ́хъ святы́хъ, и Богоро́дицы моли́твами, неискусому́жныя и благíя Ма́тере Твоея́, умоле́нъ бы́въ, да́ждь на́мъ во свѣ́тѣ Твое́мъ ходи́ти и сподо́би на́съ улучи́ти Ца́рствіе Твое́ за милосе́рдіе ми́лости Твоея́.

Степе́нна, 1-й антифо́нъ 4-го гла́са. Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Матѳе́я, зача́ло 104.

По 50-мъ псалмѣ́ стихи́ра, гла́съ 6:

Житія́, до́лу влеку́щаго, сла́дость и княже́нія сла́ву презрѣ́ла еси́ любве́ ра́ди Христо́вы, Іуліанíе блаже́нная, и въ ю́ностнѣмъ во́зрастѣ му́дрость духо́вную прояви́ла еси́, е́юже вся́ стрѣ́лы искуше́ній вра́жіихъ недѣ́йственны содѣ́лала еси́, и я́ко побѣдоно́сица вѣне́цъ небе́сныя сла́вы отъ десни́цы Всевы́шняго прія́ла еси́, Его́же моли́ сподо́бити и на́съ блаже́нства вѣ́чнаго.

Кано́нъ Богоро́дицы [со ирмосо́мъ, на 6,] и святы́я [на 8]. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Іису́се, Царю́ си́лъ, Сло́ве Бо́жій Безсме́ртный, да́руй ми́ сло́во и смы́слъ воспѣ́ти непоро́чную Твою́ невѣ́сту, пра́ведную дѣ́ву Іуліанíю, ю́же нетлѣ́ніемъ и чудесы́ свѣ́тло просла́вилъ еси́.

Уязви́вшися жела́ніемъ безсме́ртныя жи́зни и красото́ю Краснѣ́йшаго па́че сыно́въ человѣ́ческихъ плѣни́въ твое́ се́рдце, во слѣ́дъ Его́ потекла́ еси́ вѣ́рно, Іуліанíе богому́драя.

Ря́сны чистоты́ боголѣ́пно украси́лася еси́ и во оде́жду непоро́чную дѣ́вства облекла́ся еси́, прекра́сная дѣ́во, тѣ́мже и возлюби́ Христо́съ твою́ душе́вную добро́ту.

Богоро́диченъ: Укрѣпи́вшеся благода́тію Возсія́вшаго изъ ложе́снъ Твои́хъ, Пренепоро́чная, дѣ́въ ли́цы во слѣ́дъ Тебе́ къ Нему́ приведо́шася, ра́дующеся и зову́ще: Ты́ еси́ дѣ́вственныхъ похвало́.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Си́лою Бо́жіею укрѣпля́ема, Іуліанíе, во ю́ностнѣмъ во́зрастѣ страсте́й возста́нія побѣжда́ла еси́, еди́но тща́ніе имѣ́я, е́же еди́ному Христу́ вѣ́рно благоугожда́ти и Тому́ непоро́чно служи́ти преподо́біемъ и чистото́ю.

Яви́ся на тебѣ́ чу́до ве́ліе Бо́жія бла́гости, дѣ́во свята́я: ка́ко ты́, млада́ отрокови́ца, дре́вняго веліа́ра ухищре́нія побѣди́ла еси́, въ не́мощи бо твое́й си́ла Бо́жія сла́вно просла́вися.

Му́дрость неземну́ю отъ мла́дости возлюби́ла еси́, а́гнице непоро́чная, Іуліанíе, и, то́ю наставля́ема, княже́нія сла́ву, и бога́тство, и красоту́ ни вочто́же вмѣни́ла еси́, да Христу́ уго́дна бу́деши.

Богоро́диченъ: Разумѣ́вше благовѣ́рно, проповѣ́дуемъ Тебе́ и́стинную Бо́жію Ма́терь Всенепоро́чную: Тобо́ю бо съ на́ми Зижди́тель совокупи́тися изво́ли.

Сѣда́ленъ, гла́съ 4:

Красото́ю дѣ́вственною преукра́шена, невѣ́сто непоро́чная, свята́я дѣ́во Іуліанíе, въ черто́гъ Христо́въ вошла́ еси́, ра́дуяся, идѣ́же ли́цы а́нгельстіи и святы́хъ собо́ры любо́вно тя́ срѣто́ша и Са́мъ Ца́рь сла́вы, возлю́бленный тво́й Жени́хъ, при́зрѣ на тя́ ми́лостиво и увѣнча́ тя́ вѣнце́мъ безсме́ртія. Его́же моли́, всеблаже́нная, не лиши́ти и на́съ, земны́хъ и пе́рстныхъ, наслѣ́дія небе́снаго. [Два́жды.]

Сла́ва, и ны́нѣ, богоро́диченъ:

Чи́стая, Всенепоро́чная и Неискусобра́чная, еди́на безлѣ́тнаго Сы́на и Сло́во Бо́жіе въ лѣ́тѣ ро́ждшая, Того́ со святы́ми и честны́ми апо́столы, му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Во гла́сѣхъ пѣ́ній а́нгельскихъ вошла́ еси́ на бра́къ Агнчій, Іуліанíе, невѣ́сто Христо́ва, и зало́гъ обруче́нія со Христо́мъ, чуде́съ благода́ть воспрія́ла еси́, е́юже врачу́еши неду́ги человѣ́ческія.

Чудесы́ боже́ственными и нетлѣ́ніемъ дѣ́вственнаго твоего́ тѣлесе́ увѣря́еши на́съ, уго́днице Бо́жія, я́ко благоуго́дно бы́сть Бо́гови житіе́ твое́ и я́ко мзду́ небе́сную воспрія́ла еси́ со святы́ми.

Да́ры Христу́ принесла́ еси́: дѣ́вство непоро́чное, молчали́вая уста́ и кро́ткое се́рдце, Іуліанíе блаже́нная, и труда́ми воздержа́нія небе́сное Ца́рствіе обрѣла́ еси́, въ не́мже вѣ́чнаго блаже́нства наслажда́ешися.

Богоро́диченъ: Сни́де во чре́во Твое́, Пренепоро́чная, Госпо́дь, я́ко до́ждь на руно́, я́коже ви́дѣ проро́къ Гедео́нъ дре́вле, Его́же во двою́ существу́ родила́ еси́ на спасе́ніе на́съ, зову́щихъ: сла́ва, Христе́, си́лѣ Твое́й.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Яко сокро́вище многоцѣ́нное, нетлѣ́ніемъ процвѣ́тшія мо́щи твоя́ въ земли́ обрѣто́шася про́мысломъ Бо́жіимъ ди́внымъ, Іуліанíе, дѣ́во свята́я: съ свѣ́тлымъ бо лице́мъ и у́тварьми дѣви́ческими прекра́сно во гро́бѣ почива́ла еси́, тлѣ́ніемъ невреди́ма.

Уме́рши тѣ́ломъ, ду́хомъ жива́ еси́, княжно́ богоуго́дная, тѣ́мже въ видѣ́ніи первосвяти́телю Це́ркве Кíевскія Петру́ (Моги́лѣ) яви́лася еси́, повелѣва́я, да моще́мъ твои́мъ по́честь подоба́ющая воздана́ бу́детъ.

Проразумѣ́въ твою́ свя́тость, Пе́тръ святи́тель въ но́выя благолѣ́пныя ри́зы святы́я мо́щи твоя́ облече́, Іуліанíе пра́ведная, и въ це́ркви вели́цѣй съ че́стію и́хъ поста́ви, при́сно же па́мять пра́здновати тебѣ́ установи́, я́ко и́стиннѣй уго́дницѣ Бо́жіей.

Богоро́диченъ: Воздви́гни мя́, па́дшаго въ ро́вѣ страсте́й, и упра́ви мя́ въ приста́нище спасе́нія, Яже Бо́га и Упра́вителя ро́ждшая, еди́на Всенепоро́чная, совокупи́вшаго благода́тію го́рняя съ до́льними, разстоя́щіяся пе́рвѣе.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Безу́мнаго святота́тца, пе́рстень съ руки́ твоея́ похи́тившаго, гро́зно наказа́ла еси́, уго́днице Бо́жія: и́же а́біе на пра́гѣ церко́внѣмъ го́рько ду́шу свою́ изве́рже, и бы́сть та́ діа́волу въ коры́сть.

Увѣ́рити хотя́ благоговѣ́йнаго игу́мена Ѳеодо́сія, я́ко вои́стинну со святы́ми почива́еши въ оби́телѣхъ ра́йскихъ, въ видѣ́ніи предста́ла еси́ ему́ въ ли́цѣ святы́хъ дѣ́въ, Іуліанíе блаже́нная, и того́ обличи́ла еси́, я́ко то́ю пренебрега́ше, я́же причте́на Бо́гомъ ко святы́мъ, Ему́ благоугоди́вшимъ дѣ́вамъ.

Исцѣле́нія неду́жнымъ источа́ютъ святы́я твоя́ мо́щи, княжно́ Іуліанíе, и си́хъ де́мони трепе́щутъ, и́бо ве́лія си́ла дана́ ти е́сть отъ Бо́га на ду́хи нечи́стыя, и́хже наси́лія свободи́ и на́съ твои́ми богопрія́тными моли́твами.

Богоро́диченъ: Глаго́лъ Твои́хъ сбытіе́ зря́ще, велича́емъ Тя́, Богома́ти, возвели́чившую ро́дъ на́шъ, и́бо, ро́ждши Еди́наго отъ Тро́ицы, содѣ́лалася еси́ одушевле́нное носи́ло Божества́, тѣ́мже ро́ди вси́ Тебе́ вои́стинну ны́нѣ ублажа́ютъ.

Конда́къ, гла́съ 8:

Хра́мъ Бо́жій одушевле́нный, дѣ́вственною чистото́ю благоукра́шенный, вѣ́мы тя́, свята́я и пра́ведная дѣ́во, княжно́ Іуліанíе, тѣ́мже, съ любо́вію пра́зднующе святы́хъ моще́й твои́хъ обрѣ́теніе, мо́лимъ тя́, извѣ́стная жела́ній на́шихъ хода́таице: принеси́ за на́съ моли́твы твоя́ ко Го́споду и отъ вся́кихъ бѣ́дъ свобожда́й на́съ предста́тельствомъ твои́мъ у престо́ла Всевы́шняго, да зове́мъ ти́: ра́дуйся, дѣ́во свята́я Іуліанíе, невѣ́сто Христо́ва прекра́сная.

Икосъ:

Ангеломъ любе́зную возлюби́вши чистоту́, свята́я и пра́ведная дѣ́во, непоро́чно соверши́ла еси́ житіе́ твое́ земно́е, во пло́ти а́нгельскія нра́вы стяжа́вши, тѣ́мже ны́нѣ со безпло́тными и всѣ́ми святы́ми въ оби́телѣхъ ра́йскихъ водворя́ешися, отъ на́съ же, чту́щихъ тя́, слы́шиши сія́ пѣ́сненныя хвалы́: ра́дуйся, роди́телей благовѣ́рныхъ дще́рь боголюбе́зная; ра́дуйся, діади́му кня́жескую съ вѣнце́мъ безсме́ртія чу́дно совокупи́вшая; ра́дуйся, обру́чника земна́го па́че Небе́снаго зна́ти не восхотѣ́вшая; ра́дуйся, дѣ́вство твое́ еди́ному Христу́ непоро́чно сохра́ншая; ра́дуйся, въ ю́ности твое́й Сладча́йшаго Іису́са отъ всея́ души́ возлюби́вшая; ра́дуйся, вѣ́рность Ему́ до конца́ жи́зни твоея́ соблю́дшая; ра́дуйся, нетлѣ́ніемъ и чудесы́ отъ Го́спода просла́вленная; ра́дуйся, исцѣле́нія благода́тная оби́льно источа́ющая; ра́дуйся, свѣще́, присносія́ющая и освѣща́ющая святу́ю Це́рковь; ра́дуйся, Ла́вры Пече́рскія Бо́гомъ дарова́нное многоцѣле́бное сокро́вище; ра́дуйся, тѣле́съ на́шихъ немздопріи́мная цѣле́бнице; ра́дуйся, о душа́хъ на́шихъ усе́рдная къ Бо́гу моли́твеннице. Ра́дуйся, дѣ́во свята́я Іуліанíе, невѣ́сто Христо́ва прекра́сная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Аще и косну́ся тебе́ сме́рть естество́мъ зако́на, Іуліанíе богому́драя, оба́че безсме́ртія зарю́ отъ гро́ба твоего́ испуща́еши, и́бо, въ живоно́сную ме́ртвость о Христѣ́ обле́кшися, нетлѣ́ніемъ чудотво́рнымъ прекра́сно процвѣла́ еси́.

Па́че ума́ и смы́сла естества́ зако́ны въ тебѣ́ премѣни́шася, чу́дная дѣ́во, и́бо, мно́га лѣ́та въ нѣ́дрѣхъ земли́ во гро́бѣ лежа́щи, нетлѣ́нна и благоцвѣту́ща лице́мъ показа́лася еси́, я́ко усну́вшая о Го́сподѣ сно́мъ пра́ведныхъ.

Ви́дѣти жела́ющи добро́ту пресвѣ́тлаго зра́ка Христо́ва, ты́, чи́стая дѣ́во, обру́чника земна́го отрекла́ся еси́, да Христу́ уневѣ́стишися во вѣ́ки, Ему́же, я́ко вѣ́но драго́е, чистоту́ непоро́чную принесла́ еси́, тѣ́мже и возлюби́ То́й твою́ душе́вную красоту́.

Богоро́диченъ: Пощади́ мя́, Христе́, егда́ хо́щеши мíру суди́ти со сла́вою, разори́ мглу́ страсте́й мои́хъ моли́твами ро́ждшія Тя́ Непоро́чныя Дѣ́вы, съ Не́ю же и Іуліанíю пра́ведную пріими́ моля́щуюся, я́ко Бла́гъ и Многоми́лостивъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Свѣтоно́сная твоя́ па́мять, Іуліанíе блаже́нная, ра́достна вѣ́рнымъ быва́етъ, и́бо торжество́ Правосла́вія въ не́й прояви́ся: въ нѣ́дрѣхъ бо еди́ныя Правосла́вныя Це́ркве нетлѣ́ніе благода́тное процвѣта́етъ, и́мже ты́ боголѣ́пно облекла́ся еси́, по́честь досто́йную воспріи́мши.

Бога́тство неистощи́мое исцѣле́ній подаде́ тебѣ́, отрокови́це, Христо́съ и вмѣ́сто княже́нія земна́го наслѣ́діемъ Ца́рства небе́снаго тя́ обогати́, я́ко возлю́бльшую Его́ отъ и́скреннія души́; тѣ́мже моли́ Его́ бла́гость, не лиши́ти и на́съ, омраче́нныхъ, просвѣще́нія свы́ше и ча́сти благíя святы́хъ.

Иска́паютъ цѣле́бныя струи́, твоя́ святы́я мо́щи, княжно́ богоуго́дная, и́миже ороша́еши ду́ши на́ша благода́тно и врачу́еши тѣлеса́ на́ша отъ неду́говъ многоразли́чныхъ, я́ко пріи́мшая отъ Го́спода бога́тыя да́ры исцѣле́ній.

Богоро́диченъ: Прему́дрость ѵпоста́сную, и Сло́во пресу́щественное, и Врача́ ду́шъ и тѣле́съ ро́ждшая, гное́нія и ра́ны души́ моея́ исцѣли́, лю́тыя и многовре́менныя, и се́рдца моего́ уста́ви болѣ́знь, Дѣ́во.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Лику́етъ свята́я Ла́вра Пече́рская, иму́щи драго́е сокро́вище — твоя́ чудотворя́щія мо́щи, Іуліанíе, отъ ни́хже, я́ко отъ неистощи́маго исто́чника, вѣ́рнымъ то́чиши исцѣле́нія, тѣ́мже тя́ пѣ́сньми хвале́бными любо́вію ублажа́емъ.

Яви́лася еси́ я́ко звѣзда́ свѣтоза́рная, мы́сленное не́бо Ла́вры Пече́рскія благода́тно озаря́ющая, пра́ведная дѣ́во, и свѣ́тиши всѣ́мъ, въ преподо́біи жи́ти хотя́щимъ, житія́ твоего́ чистото́ю, е́же все́ посвяще́но бы́сть тобо́ю въ любо́вь Христу́ Бо́гу.

Голуби́це непоро́чная, подъ кро́въ небе́снаго Орла́ прелетѣ́ла еси́ и до́брый поко́й у Него́ обрѣла́ еси́, Іуліанíе достохва́льная, къ Нему́ же и на́ша по́мыслы вознеси́ и научи́ на́съ подража́ти житія́ твоего́ чистотѣ́ и те́плой любви́ твое́й ко Христу́ Бо́гу.

Богоро́диченъ: Благослове́нъ Пло́дъ благослове́ннаго чре́ва Твоего́, Чи́стая, Его́же благословя́тъ небе́сныя си́лы и человѣ́честіи собо́ри, изба́вльшаго на́съ отъ пе́рвыя кля́твы, Благослове́нная Дѣ́во.

Свѣти́ленъ:

Въ черто́зѣ небе́снѣмъ Христа́ Бо́га ви́димъ тя́, свята́я дѣ́во, и, тоя́жде добро́ты наслади́тися жела́юще, мо́лимъ тя́ со умиле́ніемъ мно́гимъ: возжги́ уга́сшій свѣти́льникъ на́шъ отъ еле́я благи́хъ дѣ́лъ твои́хъ и помози́ на́мъ съ му́дрыми дѣ́вами срѣ́сти Го́спода и улучи́ти благу́ю ча́сть одесну́ю Его́ стоя́щихъ и сла́вящихъ Его́ во вѣ́ки. [Два́жды.]

Сла́ва, и ны́нѣ, богоро́диченъ:

Черто́же Бо́жій одушевле́нный, Богороди́тельнице Пречи́стая, нѣ́смь досто́инъ черто́га Сы́на Твоего́ и Бо́га, но къ Тебѣ́ припа́даю, Всеблага́я, сотвори́ мя вни́ти въ о́нь, Твои́ми всеси́льными и благопрія́тными къ Нему́ мольба́ми.

На хвали́техъ стихи́ры [на 4], гла́съ 4. Подо́бенъ: Яко до́бля.

Сокрове́нно бы́сть* въ Бо́зѣ житіе́ твое́, Іуліанíе,* и добродѣ́тели твоя́* утаи́шася отъ вѣ́дѣнія человѣ́ча,* оба́че Подвигополо́жникъ Христо́съ,* Ему́же во смире́ніи, и молча́ніи,* и кро́тости се́рдца, вѣ́рно служи́ла еси́,* предъ всѣ́ми по сме́рти тя́ просла́ви* нетлѣ́ніемъ ди́внымъ и мно́гими чудесы́:* вѣ́сть бо Госпо́дь прославля́ти я́вно* та́йныя Своя́ рабы́,* рабо́тающія Ему́ непоро́чно,* Его́же моли́, уго́днице Бо́жія,* дарова́ти душа́мъ на́шимъ* оставле́ніе грѣхо́въ и ве́лію ми́лость. [Два́жды.]

Свѣ́тлымъ лице́мъ* нетлѣ́ннаго твоего́ тѣ́ла,* егда́ то́е обрѣ́тено бы́сть* въ нѣ́дрѣхъ земли́,* я́вственно показа́ла еси́, Іуліанíе,* свѣ́тлость немерца́ющую души́ твоея́:* не дерзну́ бо тлѣ́ніе косну́тися тоя́,* я́же соедини́ся со Христо́мъ* сою́зомъ неразлу́чнымъ во вѣ́ки.* Его́же моли́, пра́ведная дѣ́во,* дарова́ти душа́мъ на́шимъ* оставле́ніе грѣхо́въ и ве́лію ми́лость.

Житіе́ твое́ земно́е* пра́ведно и непоро́чно соверши́ла еси́,* княжно́ преподо́бная,* въ мíрѣ премíрно пожи́вши* и въ ю́ныхъ лѣ́тѣхъ* къ соверше́нству духо́вному дости́гши,* во е́же бы́ти тебѣ́ равноа́нгельнѣй нра́вами.* Тѣ́мже ны́нѣ свята́я твоя́ душа́* со а́нгелы водворя́ется,* дѣ́вственное же твое́ тѣ́ло нетлѣ́ніемъ почте́ся* и чудесы́ отъ Го́спода просла́влено бы́сть,* Его́же моли́, Іуліанíе блаже́нная,* дарова́ти душа́мъ на́шимъ* оставле́ніе грѣхо́въ и ве́лію ми́лость.

Сла́ва, гла́съ 2:

Пріиди́те, вѣ́рныхъ собо́ри, пріиди́те, дѣ́вственныхъ ликостоя́нія, дѣ́ву пра́ведную пѣ́сньми хвале́бными почти́мъ, Іуліанíю княжну́, я́же Христу́ въ ю́ности благоугоди́ и, я́ко еле́нь млады́й, на го́ру небе́сную ско́ро востече́, дѣ́вственныхъ по́двиговъ прія́ти мздовоздая́ніе отъ Пра́веднаго Мздовоздая́теля, всѣ́мъ воздаю́щаго по дѣло́мъ. Тѣ́мже, бра́тіе, поревну́емъ ея́ чистотѣ́ и стя́жимъ любо́вь ея́ ко Христу́ Бо́гу, да ми́лостива обря́щемъ Его́ въ де́нь су́дный.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 208. Аллилу́ія, гла́съ [1]: Терпя́ потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе отъ Матѳе́я, зача́ло 104. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Слу́жба святѣ́й пра́веднѣй дѣ́вѣ Іуліанíи, княжнѣ́ Ольша́нской. Мѣ́сяца Іу́лія въ 6-й де́нь. — Кíевъ: Въ Тѵпогра́фіи Кíево-Пече́рскія Ла́ѵры, 1882. — 9 л.

/ Къ оглавленію раздѣла /


Наверхъ / Къ титульной страницѣ

0