Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 5-й де́нь.
Слу́жба святѣ́й преподобному́ченицѣ вели́кой княги́нѣ Елисаве́тѣ
[1].

[ВЕЧЕРЪ,]
На Го́споди воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Варва́ра преподобному́ченица,* вѣ́рна бы́вши нача́льницѣ свое́й въ жи́зни вре́меннѣй,* пребы́сть вѣ́рна до конца́* по сло́ву подвигополо́жника Христа́:* вѣ́рный въ ма́лѣ* и въ вели́цѣ вѣ́ренъ е́сть.

Отрасли отъ блага́го ко́рене:* кня́зи страстоте́рпцы ѵподіа́конъ Іоа́ннъ, Константи́нъ и Игорь* до́брѣ страда́ша за Христа́.* Но а́ще наста́нетъ на ны́, Го́споди, вре́мя и на́шего испыта́нія,* да принесе́мъ и мы́ пло́дъ духо́вный,* и да вѣнча́емся.

Дне́сь Се́ргію преподо́бному пра́зднуемъ,* моще́й ра́ди пренесе́нія,* вели́кій же кня́зь Се́ргій страстоте́рпецъ* въ вѣ́чность преселя́ется,* вку́пѣ съ вѣ́рнымъ Ѳео́доромъ.* Вси́ да ублажа́ются отъ на́съ.

Сла́ва, гла́съ 6:

Овча́та и́стиннаго Па́стыря явля́еми страстоно́сцы, преподобному́ченицы Елисаве́то и Варва́ро, кня́зи вели́цыи Іоа́нне, Константи́не, Игоре и Се́ргіе, страстоте́рпцы же Ѳео́доре вку́пѣ съ Влади́міромъ, посредѣ́ ди́віихъ волко́въ неврежде́ни пребы́сте и сконча́вше до́брѣ тече́ніе и вѣ́ру соблю́дше пастыренача́льнику Христу́, боже́ственніи, во огра́ду небе́сную всели́стеся.

И ны́нѣ, богоро́диченъ или́ крестобогоро́диченъ.

На стихо́внѣ стихи́ры окто́иха. Сла́ва, гла́съ 8. Подо́бенъ: О, пресла́внаго чудесе́!

Му́ченицы Христо́вы прехва́льніи,* гони́телей стремле́нія,* и ну́ждную сме́рть ни вочто́же вмѣни́вше, и благоде́рзостно ополчи́вшеся* мужему́дренно къ боре́ніемъ,* побѣдоно́сною сла́вою одѣ́ястеся,* и причто́стеся всѣ́мъ пра́веднымъ,* съ ни́миже ва́съ всегда́* хва́ляще, ублажа́емъ.

И ны́нѣ, богоро́диченъ или́ крестобогоро́диченъ.

Тропарь, гласъ 4:

Кро́тость и смире́ніе и любо́вь всели́вши въ ду́шу свою́, усе́рдно послужи́ла еси́ стра́ждущимъ, страстоте́рпице свята́я княги́не Елисаве́то, та́же съ вѣ́рою претерпѣ́ла еси́ страда́нія и сме́рть за Христа́, съ му́ченицею Варва́рою. Съ не́ю же моли́ о всѣ́хъ съ любо́вію почита́ющихъ ва́съ.


НА УТРЕНИ,
Кано́нъ, на 6, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Вѣ́ры броне́ю огради́вшеся страстоте́рпцы непобѣди́міи, во́иновъ Христо́выхъ осмери́ца всечестна́я кресто́мъ на враги́ вооружи́шася.

Не на кня́зи и сы́ны человѣ́ческія упова́ніе свое́ возложи́вше, святíи, но на еди́наго Бо́га, Тому́ вѣ́рно послужи́сте въ преподо́біи и пра́вдѣ.

Сы́нове тмы́ беззако́нніи лиши́ша ва́съ жи́зни и ца́рства вре́меннаго, оба́че небе́сному Ца́рствію устреми́лися есте́, идѣ́же твори́тъ Госпо́дь сы́ны свѣ́та.

Ве́лія ва́ша страда́нія и бо́льша дарова́нія: Царя́ Небе́снаго моли́те отъ тли́ и бѣ́дъ изба́витися соверша́ющимъ па́мять ва́шу вѣ́рно.

Богоро́диченъ: Отъ дѣ́лъ спасе́нія нѣ́сть ми́, Влады́чице, грѣхи́ бо прилага́ю ко грѣхо́мъ, и къ зло́бѣ зло́бу: моли́твою у́бо Твое́ю, Чи́стая, уще́дри и спаси́ мя.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Возлюби́ла еси́ богоизбра́нный наро́дъ, преподобному́ченице богоблаже́нная, я́коже Ру́ѳь дре́вле, и глаго́лала еси́: Свята́я Ру́сь не поги́бнетъ! Иска́ла еси́ всѣ́мъ спасти́ся и въ ра́зумъ и́стины пріити́.

Жениха́ земна́го лиши́лася еси́, оба́че Небе́снаго обрѣла́, Его́же ра́ди отрекла́ся еси́ отъ мíра сего́ и вся́ я́же въ не́мъ, глаго́ля: нѣ́сть свя́тъ па́че Тебе́, Го́споди!

Любо́вь ко враго́мъ стяжа́ла е́сть Елисаве́та милосе́рдная, не то́кмо сло́вомъ, но дѣ́ломъ и и́стиною подо́бящися Бо́гу, объ убива́ющихъ ю́ моля́шеся: прости́ и́мъ, не вѣ́дятъ бо что́ творя́тъ!

Клевета́ша на тя́ лука́віи человѣ́цы, не вѣ́дяще я́ко клеветни́къ е́сть діа́волъ. Но я́ко смире́нная подража́тельница Христа́, вся́ въ кро́тости претерпѣ́ла еси́.

Богоро́диченъ: Су́дъ при две́рехъ, суди́ще гото́во, угото́вися, смире́нная душе́, и возопíй: внегда́ суди́ти Ти́, Сло́ве, не осуди́ мене́, моли́твами Ро́ждшія Тя́.

Сѣда́ленъ, гла́съ 3:

Свѣ́тло пра́зднуемъ дне́сь па́мять Алапа́евскихъ страстоте́рпцевъ, и́же до́блественно пострада́ша, живопогребе́нни въ ро́вѣ глубо́цѣ, въ непреста́ннѣмъ славословле́ніи Христа́, діа́волю пре́лесть упраздни́ша и сме́рть попра́ша, вопію́ще: Христо́съ воскре́се изъ ме́ртвыхъ!

Богоро́диченъ:

Свята́я Дѣ́во, Ма́ти Христо́ва, му́чениковъ сла́во и а́нгеловъ ра́досте, съ ни́ми моли́ Сы́на Твоего́, уще́дрити и спасти́ рабы́ Твоя́.

Или́ крестобогоро́диченъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Отце́мъ твои́мъ послуша́нія ревни́тельница су́щи, стяжа́ла еси́ ма́терь непоро́чныя моли́твы — глубоча́йшее смире́ніе.

Ма́рѳа у́бо служа́ше Іису́су, Марíя же сѣдя́ше при ногу́ Его́. Ихже о́бразъ была́ еси́, преподобному́ченице, въ дѣя́ніи обрѣла́ еси́ видѣ́нія восхо́дъ во оби́тели твое́й.

Иму́ще сердца́ моли́твою и слеза́ми очище́нныя, преподо́бныя жены́ Елисаве́то съ други́нею Варва́рою, во Свѣ́тѣ Непристу́пнѣмъ зри́те Свѣ́тъ.

Ни сна́ дала́ еси́ очи́ма твои́ма, ниже́ вѣ́ждома дрема́нія, до́ндеже дости́гла еси́ любве́ благи́хъ, при́сно уча́щи ча́да твоя́: люби́те дру́гъ дру́га!

Богоро́диченъ: Объе́мь грѣхо́вныя плоды́, умертви́хся, и принося́ ду́шу непло́дну, зову́ Ти́: плодоно́сну покажи́, Яже Плодо́мъ Твои́мъ тлѣ́ніе потреби́вшая.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Алчущихъ пита́тельницы, стра́нныхъ утѣ́шительницы, неизлѣчи́мыхъ больны́хъ посѣти́тельницы бы́ли естѣ́, сего́ ра́ди небе́сная наслѣ́довасте.

Сострада́тельная Елисаве́та потща́ся овча́та заблу́дшія взыска́ти, подража́ющи Па́стыря до́браго, Иже рече́: пріидо́хъ спасти́ поги́бшаго.

Кро́тость при́сную, смире́ніе высо́кое, нелицемѣ́рную любо́вь, му́дрость же духо́вную стяжа́ла еси́, сего́ ра́ди тя́ ублажа́емъ.

Рыда́ніе и го́ре неутѣ́шное пости́же оби́тель ми́рную, егда́ тя́ человѣ́цы звѣронра́вніи отъ среды́ вѣ́рныхъ учени́цъ твои́хъ отлуча́ху, ты́ же всѣ́хъ утѣша́ше.

Богоро́диченъ: Наде́жду и утвержде́ніе, и спасе́нія стѣ́ну недви́жиму иму́ще Тя́, Всепѣ́тая, неудо́бства вся́каго избавля́емся.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Язвы Го́спода Іису́са на тѣлесѣ́хъ ва́шихъ нося́ще, всю́ си́лу а́дову въ терпѣ́ніи покори́сте.

Му́ченицы непобѣди́міи, не отверго́стеся Поже́ршагося за вы́, но Тому́ же́ртву непоро́чную себе́ принесо́сте.

На ка́мени за́повѣдей бѣ́ основана́ хра́мина ду́шъ ва́шихъ, сего́ ра́ди неподви́жни пребы́сте, страстоте́рпцы осмочи́сленіи.

Иже на земли́ изгна́ни бы́ша Христа́ ра́ди, ны́нѣ небожи́теліе блаже́нніи ра́дуются во вся́ вѣ́ки.

Богоро́диченъ: Препѣ́тая Влады́чице, во святы́хъ Почива́ющаго па́че сло́ва родила́ еси́, сего́ ра́ди Тя́ пѣ́сньми почита́емъ.

Конда́къ, гла́съ 4:

Отъ сла́вы ца́рственныя, взе́мши кре́стъ Христо́въ, прешла́ еси́ къ сла́вѣ небе́снѣй, моля́щися за враги́, и обрѣла́ еси́ ра́дость вѣ́чную, свята́я му́ченице княги́не Елисаве́то, съ Варва́рою му́ченицею. Тѣ́мже моли́те о душа́хъ на́шихъ.

Икосъ:

Же́ртвы Бо́гу живопогребе́нныя въ кладезеподо́бный ро́въ низри́нутыя: пре́жде всѣ́хъ Елисаве́та страстоте́рпица, къ го́рнимъ устремле́нная княги́ня милосе́рдная, би́серъ правосла́вія въ но́вѣмъ оте́чествѣ обрѣ́тшая, ева́нгельски убíйцу му́жа своего́ прости́вшая, моли́твою и благотворе́ніемъ Бо́гу угоди́вшая, безбо́жными же безпоща́дно уму́ченная, тѣ́мже вопіе́мъ ти́: ра́дуйся, се́рдцемъ въ Бо́зѣ утвержде́нная; радуйся, съ вѣ́рою и упова́ніемъ поне́сшая кре́стъ тво́й и Христу́ послѣ́довавшая. Ра́дуйся, избра́нная Бо́гомъ на служе́ніе стра́ждущимъ, невѣ́сто Христо́ва; ра́дуйся, отда́вшихъ жи́знь на служе́ніе бли́жнимъ покрови́тельнице. Ра́дуйся, за́повѣди Госпо́дни испо́лнити возжелѣ́вшая; ра́дуйся, ре́вность по Бо́зѣ въ сердца́хъ на́шихъ воспламеня́ющая. Радуйся, презрѣ́нныхъ и отве́рженныхъ не оставля́ющая; ра́дуйся мно́гія ду́ши отъ тмы́ грѣхо́вныя и поги́бели спа́сшая. Радуйся, пріобщи́тися страсте́мъ Христо́вымъ удосто́ившаяся; ра́дуйся, въ исповѣ́дничестѣмъ по́двизѣ лю́ди россíйскія утвержда́ющая. Ра́дуйся, же́ртво непоро́чная, благопрія́тная, Бо́гу принесе́нная; ра́дуйся, со всѣ́ми святы́ми земли́ на́шея торжеству́ющая. Ра́дуйся, преподобному́ченице Елисаве́то, моли́твенница о душа́хъ на́шихъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Поже́рты бы́ша святíи, я́коже а́гнцы, за прегрѣше́нія наро́да и́хъ, и безгла́сны ведо́шася на предлежа́щій и́мъ по́двигъ, взира́юще на нача́льника вѣ́ры Іису́са.

Яко тріе́ о́троцы въ пещи́, пѣ́снь побѣ́ды надъ сме́ртію воспѣва́ху въ ша́хту вве́ржени, му́ченицы святíи: Изба́вителю Бо́же, благослове́нъ еси́.

Блаже́ни есте́, умира́ющіи о Го́сподѣ, отны́нѣ да почíете отъ трудо́въ ва́шихъ, дѣла́ бо ва́ша вслѣ́дъ ва́съ да хо́дятъ, рече́ Ду́хъ Святы́й, повелѣва́я и на́мъ вопи́ти: Бо́же, благослове́нъ еси́.

Подоба́етъ ва́мъ по́честь отъ Го́спода, пострада́вшимъ крѣ́пко, и обнажи́вшимъ хи́трости вра́жія, и пою́щимъ согла́сно: Изба́вителю Бо́же, благослове́нъ еси́.

Богоро́диченъ: Пода́ждь на́мъ ра́дость неча́янную, е́же — ра́дуйся — отъ а́нгела пріи́мшая, да гла́сомъ ве́ліимъ возопіи́мъ: Изба́вителю Бо́же, благослове́нъ еси́.

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Во́ини христолюби́віи, изне́сше свята́я тѣлеса́ ва́ша изъ земли́, че́стію во гро́бы положи́ша, пѣ́снь надгро́бную пою́ще: свяще́нницы, воспо́йте, лю́діе, превозноси́те Го́спода во вѣ́ки.

Возлюби́вши Сіо́нъ, Бо́жіе жили́ще, и возжела́вши ви́дѣти блага́я Іерусали́ма вся́ дни́ живота́ своего́, свята́я Елисаве́та, погребе́ніе въ не́мъ прія́тъ, идѣ́же свяще́нницы пою́тъ, лю́діе превозно́сятъ Христа́ во вѣ́ки.

Земля́ положе́ніемъ свяще́нныхъ му́ченикъ моще́й освяти́ся: и́бо исто́чникъ источа́ющъ исцѣле́ній вся́ческихъ сія́ Боже́ственнаго стяжава́етъ, стра́сти тѣле́сныя и душе́вныя непреста́нно исцѣля́ющи превознося́щимъ Христа́ во вѣ́ки.

Тро́иченъ: Тріѵпоста́сный Бо́же! Пріими́ на́съ, грѣ́шныхъ, болѣ́зненный гла́съ воздыха́нія серде́чнаго. При́зри на стра́ждущую страну́ на́шу, да и въ то́й вы́ну свяще́нницы пою́тъ, лю́діе же воспѣва́ютъ Тя́ во вся́ вѣ́ки.

Богоро́диченъ: Просвѣти́ ми о́чи серде́чныя, Яже две́рь Свѣ́та чи́стая, о́блакъ страсте́й и тму́ глубо́кую разгоня́ющи, да пою́тъ свяще́нницы, лю́ди же превозно́сятъ Тя́ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вы́, страстоно́сцы осмочи́сленіи, въ ча́яніи осьма́го дне́ пребыва́ли есте́ непоколе́блеми до сконча́нія вре́меннаго житія́.

Ца́рственніи о́трасли достохва́льніи, па́че плотска́го благоро́дія духо́вное улучи́ли есте́. Го́рняго Ца́рствія возжелѣ́ли есте, идѣже Христо́съ ца́рствуетъ.

Бо́гъ бо е́сть Бо́гъ живы́хъ, глаго́летъ Госпо́дь, посему́ не забу́дите ча́дъ ва́шихъ въ разсѣ́яніи су́щихъ и стра́ждушую страну́ Россíйскую, да изба́вимся отъ лю́тыхъ враго́въ на́шихъ.

Предъ святы́ми моща́ми ва́шими въ земнѣ́мъ Іерусали́мѣ мо́лимся: пре́жде да́же до конца́ не поги́бнемъ, заступи́те на́съ и введи́те въ го́рній Іерусали́мъ.

Богоро́диченъ: Предъ Держа́вною Твое́ю ико́ною, Влады́чице, моля́хуся страстоте́рпцы: не отыми́ отъ на́съ покро́ва Твоего́!

Свѣти́ленъ. Подо́бенъ: Не́бо звѣзда́ми.

Пріиди́те, мучениколю́бцевъ собо́ръ, здѣ́ совоку́пльшеся въ Геѳсиманíйстѣй ве́си, припаде́мъ къ честны́мъ моще́мъ страстоте́рпицъ и въ моли́твѣ те́плой испро́симъ ниспосла́ти на́мъ ми́ръ и ве́лію ми́лость.

Богоро́диченъ:

Обо́лкся въ мя́, про́йде изъ Тебе́ Бо́гъ, нетлѣ́нія облече́ мя оде́ждою, злы́мъ нра́вомъ обна́жшася боже́ственныя оде́жды, Богороди́тельнице Влады́чице, всѣ́хъ человѣ́ковъ прибѣ́жище, му́чениковъ вѣнцено́сныхъ утвержде́ніе и стѣна́ и а́нгеловъ ра́дованіе.

На стихо́внѣ окто́иха. Сла́ва, гла́съ 1:

Въ заточе́ніи злостра́ждуще, моли́тву дѣ́ясте, и въ ша́хту вве́ржени благоду́шествующе поя́сте, я́ко Даніи́лъ во рву́ льви́номъ, тѣ́мже изба́вите ны́ отъ ро́ва страсте́й на́шихъ, вѣ́рою и любо́вію соверша́ющихъ па́мять ва́шу.

И ны́нѣ, богоро́диченъ или́ крестобогоро́диченъ.



НА ЛИТУРГІИ,

Блаже́нна окто́иха на 4, и отъ кано́на святы́хъ, пѣ́снь 3-я, на 4. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Ри́мляномъ, зача́ло 99. [Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ.] Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь. Ева́нгеліе отъ Іоа́нна, зача́ло 52.] Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́.]

Примѣчанія:
[1] Первый опытъ службы преподобномученицѣ великой княгинѣ Елизаветѣ. Служба составлена аѳонскимъ іеромонахомъ въ 1990 году. — Аще настоятель изволитъ, службу сію можно соединить со службой преподобному Сергію Радонежскому.

Источникъ: Служба преподобномученицѣ великой княгинѣ Елисаветѣ. — М.: Сестричество во имя преподобномученицы великой княгини Елизаветы, 1999. — С. 21-38.

/ Къ оглавленію раздѣла /


Наверхъ / Къ титульной страницѣ

0