Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 5 де́нь.
Слу́жба святѣ́й преподобному́ченицѣ Елисаве́тѣ
[1].

НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ.
На Го́споди воззва́хъ, стихи́ры на 8, гла́съ 4:

Отъ ю́ности возлю́бльши небе́снаго Творца́, прилѣжа́ла еси́ поуча́тися въ моли́твѣ и богомы́сліи, не вѣ́дущи еще́ и́стинныя вѣ́ры правосла́вныя, и воспи́тана сро́дники свои́ми въ иносла́внѣмъ уче́ніи, бога́тно ороша́ла еси́ ду́шу свою́ сло́вомъ Бо́жіимъ, и пребыла́ еси́ вѣрна́ Христу́ Бо́гу до конца́.

Очи тѣле́снѣи отве́рзши въ странѣ́ Герма́нстѣй, воспита́лася еси въ непра́вой вѣ́рѣ при́сныхъ ти́, чу́вство же душе́вное приведе́ тя съ супру́гомъ твои́мъ въ Ру́сь Правосла́вную, идѣ́же тебѣ́ отверзо́стѣся о́чи духо́внѣи, и вку́пѣ обрѣла́ еси́ вѣ́ру и́стинную.

Гла́съ 1. Подо́бенъ: Небе́сныхъ чино́въ.

На Руси́ обрѣла́ еси́ би́серъ безцѣ́нный,* преподобному́ченице Елисаве́то,* правосла́вную вѣ́ру чи́стую,* ю́же прія́ла еси́ всѣ́мъ се́рдцемъ твои́мъ и ду́хомъ,* ны́нѣ же предстоя́щи Бо́гу на небесѣ́хъ,* моли́ся Ему́ за на́съ грѣ́шныхъ и неключи́мыхъ.

Отъ ю́ности вѣ́ра въ Бо́га Всемогу́щаго,* угото́ва тя́ къ по́двигу любве́ и милосе́рдія,* сего́ ра́ди прости́ла еси́ му́жа своего́ убíйцу,* и предала́ся еси́ житію́ и́ноческому.

Покланя́емся твоему́ по́двигу,* богому́драя Елисаве́то,* и состра́ждущему милосе́рдію,* восхваля́юще му́жество твое́ предъ мучи́тели* и да́же въ страда́ніи* те́плую любо́вь къ бли́жнимъ.

Гла́съ 3. Подо́бенъ: Ве́лія Креста́.

Пріиди́те, празднолю́бцы, хвалу́ принесе́мъ преподобному́ченицѣ Елисаве́ти, въ оте́честѣмъ е́й гра́дѣ Да́рмштадтѣ, воспои́мъ ю́ въ це́ркви святы́я Марíи Магдали́ны равноапо́стольныя. Здѣ́ ма́лое ста́до правосла́вныхъ христіа́нъ, прино́ситъ ти́ пѣ́снь побѣ́дную.

Ны́нѣ ка́ется гра́дъ Москва́, имѣ́вый въ себѣ́ святу́ю оби́тель твою́, зане́ не возбрани́ разоре́нію ея́. Ма́рѳа же и Марíя на небесѣ́хъ ра́дуетѣся, обрѣ́тшѣ тя́ съ вѣ́рною ти́ и́нокинею Варва́рою, я́ко те́плѣи и́мъ смоли́твенницы.

Сла́ва, гла́съ 2, самогла́сенъ:

Якоже многоцѣ́нное мѵ́ро, кро́вь твою́ принесла́ еси́ Жениху́ твоему́ Христу́, страстоно́сице свята́я Есисаве́то, воздая́ніе же прія́ла еси́ вѣне́цъ нетлѣ́ненъ отъ Него́, досточу́дная, моли́ся спасти́ся душа́мъ на́шимъ.

И ны́нѣ, богоро́диченъ догма́тикъ, гла́съ то́йже:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго, пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ, проки́менъ дне́ и чте́нія три́:

Проро́чества Иса́іина чте́ніе (глава́ 43):

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе (глава́ 3):

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе (глава́ 5):

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра хра́ма, и святы́я, гла́съ 8:

Богому́драя Елисаве́то, въ се́рдцы твое́мъ пріе́мши сло́во нело́жное: люби́те враги́ ва́ша, добро́ твори́те ненави́дящимъ ва́съ, — посѣти́ла еси́ въ темни́цѣ убíйцу супру́га твоего́, и прости́ла еси́ ему́ грѣ́хъ князеубíйства, проще́ніемъ всесоверше́ннымъ.

Въ ю́ности оста́вивши страну́ свою́, возлюби́ла еси́ страну́ Россíйскую, идѣ́же обрѣла́ еси́ би́серъ Це́ркве, Еди́ныя, Апо́стольскія, Правосла́вныя; жениха́ же земна́го лиши́вшися, не отврати́лася еси́ люде́й Россíйскихъ, но Кре́стъ объя́ла еси́ Христо́въ, и путе́мъ тѣ́снымъ ко спасе́нію ше́ствовала еси́.

Въ ца́рскихъ черто́зѣхъ свѣ́тъ преходя́щій не прельсти́ тя, ги́бнущею красото́ю свое́ю, но оста́вивши вся́ и вмѣни́вши умѣ́ты бы́ти, послѣ́довала еси́ Авраа́му пра́отцу: изше́дши изъ до́му о́тчаго, и страны́ своея́ Герма́нскія, пришла́ еси́ въ зе́млю Ру́сскую, и обрѣла́ еси́ свѣ́тъ Христо́въ немерца́ющій.

Сла́ва, гла́съ 6:

Преподобному́ченица Твоя́, Го́споди, Елисаве́та, я́же земна́го житія́ забве́нію предаде́, о тѣле́сныхъ же му́кахъ небре́гши, бу́дущія жи́зни ра́ди, и сея́ наслѣ́дница яви́ся, тѣ́мже и со а́нгелы ра́дуется; ея́же моли́твами, да́руй на́мъ ве́лію ми́лость.

И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ вои́стинну, вопіе́мъ немо́лчно: ра́дуйся а́нгельски, ра́дуйся Влады́чице, предста́тельство и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Яко звѣзда́ отъ за́пада,* преподобному́ченице Елисаве́то,* провозсія́ла еси́ на́мъ,* и прія́вши и́ноческій о́бразъ,* была́ еси́ пра́вило добродѣ́телей,* и мона́шествующихъ утвержде́ніе,* по́стниковъ удобре́ніе.* Тѣ́мже па́мять твою́ почита́емъ, досточу́дная.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Елисаве́то, пресла́вная княги́не,* возлюби́вши Христа́* послужи́ла еси́ Ему́ и при́снымъ твои́мъ,* отложи́вши же мірску́ю оде́жду,* и прія́вши а́нгельскій о́бразъ,* боголюбе́зныхъ же́нъ привела́ еси́* въ черто́ги небе́снаго Жениха́ твоего́,* тѣ́мже твою́ па́мять пое́мъ, достохва́льная.

Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.

Му́ченическій вѣне́цъ украша́етъ вели́кую княги́ню* и до́брую нача́льницу мона́шествующихъ,* злодѣ́ю всепроща́ющую,* и отре́кшуюся мíра сего́.* Укра́симъ ю́ многоплете́ннымъ вѣнце́мъ* пѣ́сней и пѣ́ній на́шихъ,* и, подража́юще е́й, принесе́мъ ми́лость и по́двиги* въ да́ръ Христу́, Подвигонача́льнику на́шему.

Сла́ва, гла́съ 8:

Иночествующихъ и мірски́хъ наста́вницу тя́ почита́емъ, преподобному́ченице Елисаве́то, я́ко твое́ю стезе́ю пра́во ходи́ти позна́хомъ. Ма́рѳѣ и Марíи подража́ти на́съ учи́ла еси́, е́же любо́вію къ Бо́гу и милосе́рдіемъ ходи́ти къ бли́жнему. Соверши́вши же тече́ніе твое́, сему́ и на́съ наста́ви твои́мъ заступле́ніемъ небе́снымъ.

И ны́нѣ, богоро́диченъ, гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропарь, гласъ 4:

Кро́тость и смире́ніе и любо́вь* всели́вши въ ду́шу свою́,* усе́рдно послужи́ла еси́ стра́ждущимъ,* страстоте́рпице свята́я княги́не Елисаве́то,* та́же съ вѣ́рою претерпѣ́ла еси́ страда́нія и сме́рть за Христа́,* ку́пно съ и́нокинею Варва́рою.* Съ не́ю же моли́ о всѣ́хъ съ любо́вію почита́ющихъ ва́съ.

Сла́ва, ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Аще бдѣ́ніе соверша́ется: тропа́рь два́жды, и Богоро́дице Дѣ́во, еди́ножды.



НА УТРЕНИ,
На Бо́гъ Госпо́дь: тропа́рь преподобному́ченицы два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 8:

Отъ ю́ности Бо́га возлюби́ла еси́ и земно́е оте́чество оста́вила еси́, прине́сши себе́ въ же́ртву Бо́гу Живо́му, Елисаве́то, преподобному́ченице, сего́ ра́ди вопіе́мъ ти́: моли́ Христа́ Бо́га, согрѣше́ній оставле́ніе дарова́ти чту́щимъ любо́вію па́мять твою́. [Два́жды.]

Сла́ва, и ны́нѣ, богоро́диченъ:

Влады́чице, Пресвята́я Богоро́дице, моли́ Сы́на Твоего́ и Зижди́теля, я́ко да покая́нія ра́ди о содѣ́янныхъ лю́тыхъ, пріи́метъ моле́нія ро́да на́шего, я́ко еди́нъ Благоутро́бенъ.

По 2-мъ стихосло́віи сѣда́ленъ, гла́съ 4:

Надъ страстьми́ плотски́ми ца́рствующи, страстьми́ животво́рными воцари́лася еси́, твое́ю кро́вію обагри́вши, честна́я, оде́жду нетлѣ́нну, Елисаве́то, тѣ́мже Всецаря́ невѣ́ста яви́лася еси́. И ны́нѣ на небеси́ дерзнове́ніе стяжа́вши, моли́ дарова́ти согрѣше́ній очище́ніе вѣ́рою хва́лящимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ ме́ртвенное существо́ земноро́дныхъ, и воздви́гла еси́ ны́ отъ сме́рти къ животу́, тѣ́мже Тя́ по до́лгу ублажа́емъ вси́, Дѣ́во Пренепоро́чная.

Поліеле́й и велича́ніе:

Велича́емъ тя́, страстоте́рпице свята́я княги́не Елисаве́то, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный [о́бщій му́ченицамъ]: Бо́гъ на́мъ Прибѣ́жище и Си́ла, Помо́щникъ въ ско́рбехъ, обрѣ́тшихъ ны́ зѣло́.

По поліеле́и сѣда́ленъ, гла́съ 1:

Погре́бши страсте́й все́ воста́ніе любо́вію ко Христу́ Всецарю́, преподобному́ченице Елисаве́то, жи́знь безконе́чную прія́ла еси́ по сме́рти лю́тѣй отъ ру́къ безбо́жныхъ, тѣ́мже дне́сь Христо́ва Це́рковь пра́зднуетъ твою́ досточу́дную па́мять. [Два́жды.]

Сла́ва, и ны́нѣ, богоро́диченъ:

Наста́ви на́съ на пу́ть покая́нія, уклоня́ющихся къ злы́мъ дѣло́мъ, неискусобра́чная благослове́нная Дѣ́во, прибѣ́жище человѣ́ковъ, моля́щихся Тебѣ́.

Та́же степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе да хва́литъ Го́спода. Ева́нгеліе отъ Матѳе́я, зача́ло 62.

По 50-мъ псалмѣ́ стихи́ра, гла́съ 6:

Ве́лію вѣ́ру и ди́вную любо́вь ко враго́мъ стяжа́ла еси́, преподобному́ченице Елисаве́то, во испыта́ніихъ на Бо́га надѣ́ющися и во страда́ніихъ мучи́телей не осужда́ющи, и помога́ющи бли́жнимъ твои́мъ. Тѣ́мже и за на́съ моли́ Всеблага́го Бо́га, да пода́стъ на́мъ оставле́ніе грѣхо́въ и ве́лію ми́лость.

Кано́нъ Богоро́дицѣ, со ирмосо́мъ на 6, гласъ 8: Во́ду проше́дъ... И преподобному́ченицѣ два́ кано́на на 8. Творе́ніе Ма́рково.

Кано́нъ преподобному́ченицы, гла́съ 2.
Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Отве́рзи ми́, Христе́, устнѣ́, воспѣ́ти по́двиги уго́дницы Твоея́, преподобному́ченицы Елисаве́ты, да моли́твами свои́ми о́блакъ разори́тъ моего́ невѣ́дѣнія.

Возлюби́вши Бо́га отъ всея́ души́ твоея́, Тому́ отъ ю́ности послужи́ла еси́, преподобному́ченице, вся́ лѣ́та живота́ твоего́, тѣ́мже и просла́ви тя́: вѣ́сть бо Госпо́дь сла́вящія Его́ прославля́ти.

Ны́нѣ, преподобному́ченице Елисаве́то, съ ли́ки проро́къ и апо́столъ, му́ченикъ же и преподо́бныхъ, во свѣ́тѣ Святы́я Тро́ицы соводворя́ющися, помина́й ча́да твоя́, вѣ́рою творя́щія па́мять твою́.

Богоро́диченъ: Зачала́ еси́ Сло́во Отчее, пло́ти соедини́вшееся изъ Тебе́, Боже́ственныя ѵпоста́си не оста́вль, Ма́ти Чи́стая; Его́же возжела́вши преподо́бная Елисаве́та, муче́нія сла́ву стяжа́ла е́сть.

Инъ кано́нъ, гла́съ 4.
Пѣ́снь 1.

Ирмо́съ: Мо́ря чермну́ю пучи́ну, невла́жными стопа́ми, дре́вній пѣшеше́ствовавъ Изра́иль, крестообра́зными Моисе́овыма рука́ма, Амали́кову си́лу въ пусты́ни побѣди́лъ е́сть.

Благи́ми наде́ждами утверди́вся у́мъ тво́й, преподобному́ченице Елисаве́то, и къ Бо́гу вознесе́ся отъ кратковре́менныхъ, тебѣ́ во оби́тели въ моли́твѣ и трудѣ́хъ пребыва́ющей.

Съ любо́вію прихожду́ къ тебѣ́, преподобному́ченице честна́я, твои́ми мольба́ми жите́йскія суеты́ мя спаси́, и страсте́й мои́хъ смуще́ніе утиши́.

Му́дростію и благода́тію просвѣ́щшуся уму́ твоему́, Елисаве́то, мучи́телей преще́ній не устраши́лася еси́, преподобному́ченице свята́я, Боже́ственною си́лою укрѣпля́ема.

Богоро́диченъ: Вопло́щшагося изъ Тебе́, Богоневѣ́сто, и кре́стъ и сме́рть пріи́мшаго, позна́хомъ я́ко Го́спода и пое́мъ Его́ я́ко Изба́вителя ро́да на́шего, Тя́ ублажа́юще.

Катава́сія: Отве́рзу уста́ моя́...

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Нача́ло житія́ твоего́ земна́го положи́ла еси́ во гра́дѣ Да́рмштадтѣ, идѣ́же благочести́вый ца́рь-му́ченикъ святѣ́й равноапо́стольнѣй Марíи Магдали́нѣ хра́мъ созда́.

Упокое́ніе вѣ́чное обрѣла́ еси́ въ оби́тели тоя́ же святы́я, во святѣ́мъ гра́дѣ Іерусали́мстѣмъ, близъ це́ркве Успе́нія Пресвяты́я Богоро́дицы, ю́же всѣ́мъ се́рдцемъ твои́мъ возлюби́ла еси́.

Здѣ́ ны́нѣ, въ Геѳсима́нстѣй оби́тели, храня́тся святы́я мо́щи твоя́, и́мже мы́ недосто́йніи и неключи́міи раби́ твои́ благоче́стнѣ покланя́емся.

Богоро́диченъ: Еди́наго Невмѣсти́маго Бо́га во Твое́мъ чре́вѣ прія́ла еси́, Пречи́стая Богороди́тельнице. Тѣ́мже мы́ вѣ́рніи вси́ пѣ́сньми Тя́ ублажа́емъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Отве́ргшися мíра и пло́ти мудрова́нія, милосе́рдіемъ и труды́ въ моли́твахъ оби́тели Ма́рѳы и Марíи стяжа́ла еси́ Христа́, вку́пѣ со сестра́ми, я́же тебѣ́ отъ Бо́га вручи́шася.

Яко сто́лпъ непоколеби́мъ стоя́ла еси́ во вре́мя тя́жкихъ обстоя́ній, убíйцу прости́вши и о мучи́телехъ моля́щися, княги́не блаже́нная.

Ни о́гнь, ни ме́чь, ни уничиже́нія, ни ро́въ жесто́кій, ни мучи́телей суровство́ не возмого́ша отлучи́ти тебе́ отъ любве́ Бо́жія.

Богоро́диченъ: Сло́во Отчее, о Чи́стая, предочи́стившися ду́хомъ, родила́ еси́ на спасе́ніе поги́бшаго ро́да на́шего.

Сѣда́ленъ, гла́съ 7:

Страстоте́рпице свята́я княги́не Елисаве́то,* егда́ тя́ жи́ву во алапа́евскую ша́хту вверго́ша,* ку́пно со святы́ми му́ченики ца́рскія кро́ве,* я́же бя́ху кня́зіе Се́ргій, Іоа́ннъ, Константи́нъ, Игорь и Влади́міръ,* та́кожде му́ченица Варва́ра,* и святы́й му́ченикъ Ѳео́доръ,* изнемога́ющимъ же надо́лзѣ всѣ́мъ отъ ра́нъ,* облегча́ла еси́ е́ле жи́ва су́щи страда́нія умира́ющихъ,* воспѣва́ющи свяще́нная пѣснопѣ́нія, я́же слы́шаху мимоходя́щіи.* Сего́ ра́ди мо́лимъ тя́: моли́ся Христу́ Бо́гу* прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ то́йже:

Егда́ предста́ну предъ лице́мъ Созда́теля моего́, въ де́нь пра́веднаго Суда́ Его́, тогда́, Влады́чице, бу́ди ми́ хода́таица предъ Ни́мъ, вѣ́чныя му́ки избавля́ющи мя́, да не сни́ду во а́дъ, но да спасу́ся Твои́мъ, Пречи́стая Богоро́дице, заступле́ніемъ.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Поста́вивши но́зѣ твои́ на ка́мени чи́стыя вѣ́ры правосла́вныя, непоколе́блема пребыла́ еси́ отъ искуше́ній и навѣ́товъ безбо́жныхъ гони́телей твои́хъ.

Отъ вдовства́ твоего́ возлюби́ла еси́ пребыва́ти въ дому́ Госпо́дни, основа́вши оби́тель въ ца́рствующемъ гра́дѣ Москвѣ́ служе́нія дѣ́ля бли́жнимъ.

Удали́лася еси́ отъ мíра су́етнаго сего́ во святу́ю оби́тель Ма́рѳы и Марíи, во е́же пѣ́сньми непреста́нными и моли́твами стра́сти телѣ́сныя вся́ упраздни́ти, да до́брѣ послу́жиши Бо́гу и бли́жнимъ, съ со́нмомъ единому́дренныхъ ти́ же́нъ.

Богоро́диченъ: Ты́ вѣ́рныхъ похвала́ еси́, Богоро́дице, Безневѣ́стная, Ты́ предста́тельница, Ты́ и прибѣ́жище христіа́нъ. Моли́ Сы́на Твоего́ и о на́съ, прибѣга́ющихъ къ покро́ву Твоему́.

Инъ.

Ирмосъ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Стра́хомъ Бо́жіимъ огради́вшися, Бо́гу послужи́ла еси́, посто́мъ и жа́ждею смиря́ющи тѣ́ло твое́, моли́твою же чи́стою ду́шу твою́ просвѣща́ющи.

Якоже честны́й би́серъ твоя́ мо́щи предлежа́тъ, подаю́ще разли́чная исцѣле́нія съ вѣ́рою приступа́ющимъ и моля́щимтися.

Въ ча́съ мра́ка, одержа́щаго зе́млю Ру́сскую, Госпо́дь тя́ призва́ на по́двигъ му́ченичества, Ему́ же вѣ́рна была́ еси́ до конца́.

Богоро́диченъ: Нескве́рная, небла́зная, оскверне́нное мое́ се́рдце помышле́ньми маловѣ́рія и лѣ́ности возста́ви къ моли́твѣ и покая́нію, моли́твами Твои́ми.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Пресвѣ́тлымъ вѣнце́мъ увязена́ бы́вши, предстои́ши престо́лу всѣ́хъ Царя́, тѣ́мже моли́ся, преподобному́ченице Елисаве́то, о вѣ́рою и любо́вію пра́зднующихъ святу́ю па́мять твою́.

Зако́номъ Боже́ственнымъ повину́вшися, зако́новъ грѣхо́вныхъ до конца́ уклони́лася еси́, да Христа́ пріобря́щеши, и сего́ ра́ди до́брѣ потруди́лася еси́, вѣнцено́сице великоимени́тая.

Умъ и се́рдце отве́рзла еси́ къ вселе́нію благода́ти, еди́наго Влады́ку прія́ла еси́, и вѣне́цъ нетлѣ́нія обрѣла́ еси́, сія́ющій свѣ́тлыми свѣтоли́тіи и бога́тыми дарова́ніи.

Богоро́диченъ: Тя́, Богоро́дице Чи́стая, ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія стяжа́хомъ.

Инъ.

Ирмо́съ: Ты́, Го́споди мо́й, Свѣ́тъ въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія, вѣ́рою воспѣва́ющія Тя́.

Боголѣ́пно бы́сть вои́стинну житіе́ твое́, человѣ́комъ и а́нгеломъ яви́ся сіе́ любе́зно, слу́гъ же сатани́нскихъ свирѣ́пству непристу́пно показа́ся.

На земли́ подвиза́вшися, всебога́тая, съ сестра́ми твои́ми о Бо́зѣ, и вре́менныя болѣ́зни претерпѣ́вши, ны́нѣ на небесѣ́хъ воздая́нія пріе́млеши со а́нгелы, му́ченице непобѣди́мая.

Презрѣ́вши благолѣ́піе мíра сего́, яви́лася еси́ наста́вница заблу́ждшимъ, и приста́нище вѣ́рно спаса́емымъ, твои́ми же кровьми́ обагри́ла еси́ багряни́цу многоцѣ́нную, е́юже ны́нѣ на небесѣ́хъ одѣ́яна, Жениху́ предстои́ши.

Богоро́диченъ: Превы́шша естества́ Бо́га пло́тію породила́ еси́, Дѣ́во, я́коже Са́мъ восхотѣ́. Тѣ́мъ мы́ вѣ́рніи мо́лимъ Тя́, изба́витися на́мъ Рождество́мъ Твои́мъ вѣ́чнаго муче́нія.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Егда́ ра́ны тѣле́сныя прія́ла еси́ отъ безбо́жныхъ убíйцъ, во смире́ннѣй му́дрости свое́й я́зву тя́жкую возложи́ла еси́ врагу́, ражда́ющему сме́рть.

Егда́ ведя́хуся на заколѣ́ніе вку́пѣ со вѣ́рною ти́ и́нокинею Варва́рою и вели́кими кня́зи, ты́ сохрани́ла еси́ духо́вную крѣ́пость, не отре́кшися Христа́ Бо́га, Ему́же служи́ла еси́ и́стинно.

Яже въ ро́вѣ алапа́евстѣмъ услы́шавши уя́звленныхъ стена́нія, съ любо́вію я́звы тѣле́сныя и́хъ обвяза́вши, пріиди́ на по́мощь на́мъ, уя́звленнымъ горды́нею и киче́ніемъ, и обвяжи́ стру́пы лю́тыя ду́шъ на́шихъ.

Богоро́диченъ: О на́съ изъ Тебе́ Воплоще́ннаго, Дѣ́во Ма́ти, всегда́ моли́, благоче́стно Тя́ блажа́щихъ, изба́витися бѣ́дъ, и душетлѣ́нныхъ страсте́й и вѣ́чнаго муче́нія.

Инъ.

Ирмо́съ: Пожру́ Ти́ со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Че́стенъ сосу́дъ яви́лася еси́ Боже́ственнаго Ду́ха, нося́щи въ се́рдцы твое́мъ Боже́ственныя арома́ты, и услажда́ющи сердца́ вѣ́рно соверша́ющихъ па́мять твою́.

Си́лою Ду́ха мы́сленныхъ волко́въ че́люсти сокруши́ла еси́, преподобному́ченице Елисаве́то, зарю́ невече́рнюю облиста́ющи, веди́ и на́съ по стези́ неколеби́мыя любве́ Бо́жія.

Всю́ Сиби́рь преше́дши въ тѣлеси́ ме́ртвеннѣмъ, моща́ми свои́ми посѣти́вши страны́ да́льнія, дости́гла еси́ во Святы́й гра́дъ, въ оби́тель, ю́же искони́ возлюби́ла еси́.

Богоро́диченъ: Глаго́ловъ Боже́ственныхъ послушли́ва была́ еси́, Богоро́дице Пречи́стая, и Пребезнача́льнаго Сло́ва пло́тію родила́ еси́, безслове́сія на́съ изба́вльшаго.

Конда́къ, гла́съ 4:

Отъ сла́вы ца́рственныя,* взе́мши кре́стъ Христо́въ,* прешла́ еси́ къ сла́вѣ небе́снѣй, моля́щися за враги́,* и обрѣла́ еси́ ра́дость вѣ́чную,* свята́я му́ченице княги́не Елисаве́то,* съ Варва́рою му́ченицею,* тѣ́мже моли́те о душа́хъ на́шихъ.

Икосъ:

Возлюби́вши Христо́вы за́повѣди, преподобному́ченице, и возненави́дѣвши мíра сего́ наслажде́ніе, притекла́ еси́ усе́рдно ко Го́споду, и просвѣща́ющи зе́млю Ру́сскую блиста́ніемъ духо́внымъ, привела́ еси́ къ Нему́ ста́до дѣ́въ, наста́вленныхъ тобо́ю въ любви́ Бо́жіей. Просвѣти́ на́ши о́чи серде́чныя, во е́же воспѣ́ти по́двиги твоя́, проще́ніе, бдѣ́ніе, сле́зы, болѣ́зни, сострада́ніе, блаже́нныя ра́ди жи́зни вѣ́чныя, ея́же ны́нѣ наслажда́ющися, непреста́нно моли́ о душа́хъ на́шихъ.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Къ Свѣ́ту незаходи́мому возше́дши, я́ко со́лнце просвѣща́еши вселе́нную, дѣла́ бо свѣ́та соверши́ла еси́, тѣ́мже просвѣща́й и на́съ недосто́йныхъ ны́нѣ зову́щихъ: оте́цъ на́шихъ Бо́же, благослове́нъ еси́.

Еди́ному Бо́гу возложи́вши ду́шу и помышле́ніе, тѣ́сный пу́ть ше́ствовала еси́, тѣ́мже получи́ла еси́ небе́снаго Ца́рствія наслажде́ніе, и ны́нѣ взыва́еши: оте́цъ на́шихъ Бо́же, благослове́нъ еси́.

Сія́ющи луча́ми благода́ти, преподобному́ченице Елисаве́то, испроси́ и на́мъ, соверша́ющимъ свѣ́тлый пра́здникъ тво́й, оставле́ніе грѣхо́въ, пою́щимъ: Бо́же оте́цъ на́шихъ, благослове́нъ еси́.

Богоро́диченъ: Ра́дуйся, зове́мъ Ти́, вку́пѣ съ Гавріи́ломъ, Пречи́стая, Преблагослове́нная, моли́ Сы́на Твоего́, да моли́твами Твои́ми спасе́тъ ду́ши на́ша.

Инъ.

Ирмо́съ: Въ пещи́, авраа́мстіи о́троцы, перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Свѣ́тъ непристу́пный досто́йно просвѣти́ ду́шу твою́, Елисаве́то преподобному́ченице, и свѣща́ми свѣ́тлыми озари́ пою́щія: Бо́же оте́цъ на́шихъ, благослове́нъ еси́.

Терни́стый пу́ть земна́го житія́ проше́дши, ма́ти преподо́бная, небе́снаго наслажде́нія дости́гла еси́, и ны́нѣ со а́нгелы лику́еши: Бо́же оте́цъ на́шихъ, благослове́нъ еси́.

Христа́ возлюби́вши всѣ́мъ се́рдцемъ твои́мъ, въ свѣтлѣ́йшій черто́гъ небе́снаго Жениха́ всели́лася еси́, богоблаже́нная, и я́ко му́ченица непобѣди́мая Тому́ зове́ши: Бо́же оте́цъ на́шихъ, благослове́нъ еси́.

Богоро́диченъ: Хра́мъ свяще́нія су́щи, Всенепоро́чная, во святы́хъ Почива́ющаго родила́ еси́ Всесвята́го Бо́га, вся́ освяща́ющаго, и лю́тыхъ изъима́ющаго.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Дне́сь просія́ пресвѣ́тлая па́мять твоя́, Елисаве́то преподобному́ченице, княги́не свята́я, я́же ны́ созыва́етъ на торжество́, е́же просла́вити терпѣ́ніе твое́, и́мже подвиза́лася еси́ со ины́ми му́ченики, въ ро́вѣ алапа́евстѣмъ бы́вшими, и Христу́ возопи́ти: благослови́те вся́ дѣла́ Госпо́дня, Го́спода.

Яко свѣ́тъ возсія́ изъ мра́ка лю́таго безбо́жія пра́здникъ тво́й, новоявле́нная преподобному́ченице. Ты́ же свѣ́томъ любве́ твоея́ просвѣща́й и на́съ, вопію́щихъ: благослови́те вся́ дѣла́ Госпо́дня, Го́спода.

Ца́рскія черто́ги оста́вивши, дости́гла еси́ черто́га небе́снаго, угото́ваннаго тебѣ́ Женихо́мъ возлю́бленнымъ ти́ Христо́мъ, Его́же ви́дящи, зове́ши: благослови́те вся́ дѣла́ Госпо́дня, Го́спода.

Богоро́диченъ: Тебе́ ра́ди, Пречи́стая Богонѣве́сто, печа́ль преста́, и кля́тва вои́стинну непло́дствомъ изнемо́же, и благослове́ніе процвѣте́ вѣ́рнымъ во вѣ́ки.

Инъ.

Ирмо́съ: Ру́цѣ распросте́ръ Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели о́троцы, взыва́юще: благослови́те, вся́ дѣла́ Госпо́дня, Го́спода.

Волну́ющееся мо́ре напа́стей му́къ, воздвиза́емыхъ безбо́жными гони́телями на вѣ́ру Христо́ву, невре́дно преплыла́ еси́, и ра́йскаго приста́нища дости́гла еси́, вопію́щи: свяще́нницы воспо́йте, лю́діе превозноси́те во вся́ вѣ́ки.

Яко пра́вды свѣща́ возсія́вши, мра́къ безбо́жія разсѣ́яла еси́, богому́драя Елисаве́то, и ко Христу́ привела́ еси́ мно́жество же́нъ боголюби́выхъ, вопію́щихъ: свяще́нницы воспо́йте, лю́діе превозноси́те во вся́ вѣ́ки.

Пресла́вно просла́ви тя́ Боже́ственная благода́ть, Елисаве́то княги́не съ Варва́рою и́нокинею и мно́жайшими ины́ми му́ченики но́выми, и свѣ́тло вопи́ти ва́съ научи́вши: свяще́нницы воспо́йте, лю́діе превозноси́те во вся́ вѣ́ки.

Богоро́диченъ: Ка́пля Богото́чная, я́же отъ Тебе́ ро́ждшися, мíръ освяти́вшая, Богоро́дице Дѣ́во, ка́плю ми́лости ми́ источи́, освяща́ющую ду́ши на́ша и помышле́нія.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди, святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Вся́ въ Го́рній Іерусали́мъ устрѣми́вшися, преподобному́ченице Елисаве́то, оста́вила еси́ святы́я мо́щи твоя́ въ до́льнѣй Геѳсима́ніи, идѣ́же вы́ну сла́вятъ Бо́га, тя́ просла́вльшаго, въ и́ночестѣмъ житіи́ благочести́выя сестры́ твоя́.

Жи́знь вѣ́чную, му́ченице Христо́ва, прилѣ́жно стяжа́ла еси́, му́ченическими кровьми́ сія́ющи издале́ча, тѣ́мже и на пра́здникъ тво́й зове́ши ны́, нача́льнице мона́шествующимъ, свята́я Елисаве́то.

Моли́твами твои́ми, невѣ́сто Христо́ва богоизбра́нная, разрѣши́ ми согрѣше́ній плени́цы, и страсте́й мои́хъ мглу́ разори́.

Богоро́диченъ: Свѣ́тъ блиста́нія Рождество́мъ Твои́мъ возсія́, и просвѣти́ всю́ подсо́лнечную, и предста́теля тьмы́ погуби́, Богороди́тельнице Всечи́стая, непреста́нными гла́сы всѣ́мъ восхваля́ющимъ Тя́.

Инъ.

Ирмо́съ: Ка́мень нерукосѣ́чный отъ несѣко́мыя горы́ Тебе́, Дѣ́во, краеуго́льный отсѣче́ся, Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Добродѣ́тельми мно́гими укра́шена, человѣконенави́стника ко́зни погуби́ла еси́, ко Христу́ любо́вію прилѣпи́вшися, и христолю́бицъ со́нмъ къ Бо́гу приве́дши.

Совокупи́вшися съ беспло́тными ли́ки, сла́вная, и со страда́льческими собо́ры, моли́ Христа́ Бо́га о отсту́пльшихъ и ненави́дящихъ Его́.

Страны́ разли́чны прешла́ еси́ въ житіи́ твое́мъ вре́меннѣмъ, и ны́нѣ блиста́ніи Ду́ха просвѣща́еши на́съ, во мно́зѣхъ гра́дѣхъ и оби́телехъ тя́ сла́вящихъ.

Богоро́диченъ: Гла́съ вопіе́мъ Ти́ вси́ а́нгеловъ, Дѣ́во, Пала́то, и Престо́ле Бо́жій: ра́дуйся, Еюже сподо́бихомся небе́снаго Ца́рствія, дре́вле отринове́нніи тлѣ́ніемъ, и добро́ту пе́рвую несмы́сленно погуби́вшіи.

Свѣти́ленъ:

Укрѣ́пльшися, преподобному́ченице, Елисаве́то, Кресто́мъ Го́спода твоего́, мучи́телей горды́ню погуби́ла еси́, пострада́вши му́жески, и отъ Христа́ прія́ла еси́ по́чести вѣне́цъ, о на́съ моля́щи, тя́ почита́ющихъ любо́вію. [Два́жды.]

Сла́ва, и ны́нѣ, богоро́диченъ:

Стоя́ще о́крестъ Тебе́ дѣ́вы богому́дрыя, Богороди́тельнице Марíе, я́ко Цари́цѣ ро́да, Твоему́ Сы́ну приведо́шася, Пречи́стая, я́ко Царю́ вся́ческихъ, Его́же, Ма́ти Дѣ́во, о на́съ умоли́.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Яко на ка́мени тве́рдѣ* во исповѣ́даніи Бо́жіи извѣсти́вшися,* Елисаве́то свята́я съ Варва́рою,* пострада́ла еси́ въ ро́вѣ алапа́евстѣмъ,* тѣ́мже мы́сленнаго убíйцу врага́* въ бе́зднѣ потопи́ла еси́,* и вѣне́цъ побѣ́дный* досто́йно прія́ла еси́.

Па́мять твою́ свяще́нную соверша́емъ,* я́ко пріе́мшую любо́вь Христо́ву,* и Того́ повелѣ́нія,* и проповѣ́давшую, преподобному́ченице,* душа́мъ спасе́ніе.* Тѣ́мже моще́й твои́хъ ра́ку, Елисаве́то,* вѣ́рою облобыза́емъ,* источа́ющую благода́ть неоску́дную,* вѣ́рою и любо́вію притека́ющимъ.

Блаже́нъ Святы́й гра́дъ и оби́тель Геѳсима́нская,* въ ню́же дости́гли естѣ́,* преподобному́ченице Елисаве́то съ и́нокинею Варва́рою,* честны́й же хра́мъ тѣлеса́ ва́ша воспріе́мый,* я́ко вѣнце́мъ ца́рствія украси́ся;* храни́тельницы благопрія́тныя,* враги́ устраша́ющія* и дале́че отъ оби́тели и гра́да ва́шего отгоня́ющія,* моли́те спасти́ся душа́мъ на́шимъ.

Въ кня́жестѣмъ гра́дѣ Дармшта́дтѣ пу́ть сво́й наче́нши,* въ ца́рствующій гра́дъ Москву́ дости́гла еси́,* се́рдцемъ же и умо́мъ взира́юще на го́рній Іерусали́мъ,* учреди́ла еси́ оби́тель Ма́рѳы и Марíи.* Егда́ же въ ме́ртвеннѣмъ тѣлеси́ твое́мъ* и́нъ пу́ть чре́зъ Сиби́рь и Кита́й прія́ла еси́* я́коже принести́ся моще́мъ твои́мъ въ до́льній Іерусали́мъ,* и во оби́тели Марíи Магдали́ны возложи́тися,* о, сла́во му́чениковъ и похвало́, Елисаве́то приснопа́мятная!

Сла́ва, гла́съ 3:

Дне́сь празднолю́бныхъ собо́ри соше́дшеся, ра́достнымъ лице́мъ и чи́стымъ се́рдцемъ, духо́внѣ соста́вимъ ли́къ, похваля́юще Христа́, Бо́га на́шего, прославляю́щаго святы́я Своя́ страстоно́сицы: вели́кую княги́ню Елисаве́ту съ и́нокинею Варва́рою, я́ко многоцѣ́нное мѵ́ро — кро́вь свою́ прине́сшія Жениху́ своему́ Христу́, и воздая́ніе прія́вшія вѣне́цъ нетлѣ́ненъ отъ Него́, преподобному́ченицы досточу́дныя.

И ны́нѣ, богоро́диченъ, гла́съ то́йже:

Безъ сѣ́мене зачала́ еси́ отъ Ду́ха Свята́го, и, славосло́вяще, воспѣва́емъ Тя́: ра́дуйся, Пресвята́я Дѣ́во.

Славосло́віе вели́кое.
Тропа́рь преподобному́ченицы. Сла́ва, и ны́нѣ, богоро́диченъ.
Ектеніи́ и отпу́стъ.



НА ЛИТУРГІИ.

Блаже́нна отъ кано́на пѣ́снь 3-я и 6-я. Проки́менъ, гла́съ 4: Тебе́ ра́ди, Го́споди,* умерщвля́еми есмы́ ве́сь де́нь. Сти́хъ: Вмѣни́хомся я́ко о́вцы заколе́нія. Апо́столъ къ Ри́мляномъ, зача́ло 99. Аллилу́ія, гла́съ 1. Бо́гъ на́мъ прибѣ́жище и си́ла, помо́щникъ въ ско́рбѣхъ обрѣ́тшихъ ны́ зѣло́. Сти́хъ: Го́споди, спаси́ царя́ и услы́ши ны́, въ о́ньже а́ще де́нь призове́мъ Тя́. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Коне́цъ, и Бо́гу на́шему сла́ва!

Примѣчаніе:
[1] Слу́жба сія́ соста́влена по слу́чаю осмидесятилѣ́тія му́ченическія кончи́ны святы́я преподобному́ченицы Елисаве́ты, благослове́ніемъ Архіере́йскаго Сѵно́да Ру́сскія Правосла́вныя Це́ркве Заграни́цей.

Источникъ: Слу́жба святѣ́й преподобному́ченицѣ Елисаве́тѣ. Съ приложе́ніемъ житія́ преподобному́ченицы Елисаве́ты. — Мюнхенъ: Изданіе обители преподобнаго Іова Почаевскаго, 1998. — 12 л.

/ Къ оглавленію раздѣла /


Наверхъ / Къ титульной страницѣ

0