Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 5-й де́нь.
Преподо́бнаго Аѳана́сія Аѳо́нскаго.
Идѣ́же хра́мъ Аѳана́сія, твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Всехва́льніи му́ченицы.

Прему́дрости лу́чшее* нача́ло стра́ху предложи́въ,* я́коже основа́ніе непоколеби́мо* и утвержда́емо отъ него́,* Боже́ственныя за́повѣди соблю́лъ еси́* и, си́ми очи́щся,* просвѣти́лъ еси́ ду́шу,* неизрече́нныхъ же сподо́бился еси́* въ се́рдцѣ твое́мъ та́инъ,* о́тче Аѳана́сіе.

Въ земли́ не скры́лъ еси́,* тебѣ́ да́ннаго свы́ше* отъ Боже́ственныя благода́ти тала́нта,* но пре́далъ еси́* и мно́гимъ инѣ́мъ незави́стно,* бога́тно же Боже́ственныхъ даро́въ,* и́мже причасти́лся еси́,* я́ко вѣ́ренъ строи́тель,* яви́лся еси́ наслѣ́дникъ Бо́жій, Аѳана́сіе.

Сла́ва, гла́съ 6:

Безсме́ртія тезоимени́таго вси́ восхва́лимъ, во Аѳо́нѣ му́жески и до́блественнѣ пости́вшася, и́же и ста́до собра́ сіе́, и хра́мъ Го́сподеви воздви́же любо́вію, и Ма́тери Бо́жіи возложи́ вся́, Ейже и мо́лится о на́съ, вѣ́рою соверша́ющихъ па́мять его́.

И ны́нѣ, богоро́диченъ: Богоро́дице, Ты́ еси́ лоза́...

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Сни́демся, ли́цы оте́цъ,* и́же во Аѳо́нѣ,* въ па́мять боже́ственнаго* и му́драго Аѳана́сія,* сла́вяще Го́спода.

Сти́хъ: Честна́ предъ Го́сподемъ* сме́рть преподо́бныхъ Его́.

Вся́, отъ души́* притека́ющія, преблаже́нне,* къ боже́ственному хра́му твоему́,* спаса́й отъ бѣ́дъ,* богому́дре Аѳана́сіе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Собо́ръ честны́й* оте́цъ собра́вся* со ученики́ твои́ми,* ра́цѣ честнѣ́й твое́й* вси́ прикаса́емся.

Сла́ва, и ны́нѣ, богоро́диченъ:

Горѣ́ Тя ли́цы,* Богоро́дице Дѣ́во,* пою́тъ съ до́льними,* сла́вяще непреста́нно* Рождество́ Твое́ пречи́стое.

Тропа́рь, гла́съ 3:

Еже во пло́ти житію́ твоему́ удиви́шася а́нгельстіи чи́ни: ка́ко съ тѣ́ломъ къ неви́димымъ сплете́ніемъ изше́лъ еси́, присносла́вне, и уязви́лъ еси́ де́монскія полки́. Отону́дуже, Аѳана́сіе, Христо́съ тебѣ́ воздаде́ бога́тыми дарова́ньми, сего́ ра́ди, о́тче, моли́ спасти́ся душа́мъ на́шимъ.

Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Кíими похва́льными.

Кíя похва́льныя по́чести* принесе́мъ Аѳана́сію?* Преиспещре́нному дѣя́ньми изоби́льному благода́тьми,* богосія́нна свѣтоли́тія мече́мъ посѣ́кшему страсте́й стремле́нія,* столпу́, боговидѣ́ньми сія́ющу,* воздержа́нія свѣти́льнику,* на свѣ́щницѣ душе́внѣмъ зарю́ испуща́ющу Бо́жія велѣ́нія,* всѣ́мъ жи́знь даю́щаго. [Три́жды.]

Кíими похва́льными вѣнцы́* Аѳана́сія вѣнча́емъ словесы́?* Свяще́ннаго тече́нія рачи́теля,* небе́снымъ уче́ніемъ взя́таго* боговидѣ́нія крилы́ боже́ственными,* столпа́ смире́нія необори́маго,* стѣ́ну разсужде́нія непоколеби́мую,* нра́вомъ украше́нія честно́е благолѣ́піе,* о ча́дѣхъ свои́хъ Христа́ Бо́га моля́щаго,* еди́наго Благосе́рдаго. [Три́жды.]

Утро присносвѣ́тлое,* преподо́бне, показа́лся еси́,* луча́ми благода́тными:* страсте́й мгло́ю ослѣпѣва́ющихъ* приве́лъ еси́ къ Свѣ́ту невече́рнему,* о́тче Аѳана́сіе богому́дре.* Отню́дуже, я́ко возрасти́вша тала́нтъ,* душа́мъ тя́ цѣли́теля Христо́съ предлага́етъ,* неисцѣ́льнымъ струпо́мъ согни́вшимъ,* мече́мъ слове́съ посѣка́юща* и здра́віе при́сно и спасе́ніе всѣ́мъ подаю́ща. [Два́жды.]

Сла́ва, гла́съ 6:

Яко боже́ственная жи́знь Твоя́ и всеосвяще́нный тво́й коне́цъ, о́тче Аѳана́сіе, въ то́й бо всея́ горы́ мно́жество сне́мшеся, я́ко ви́дѣ безъ дыха́нія на одрѣ́ тя́, глаго́лы велегла́сными вопія́ше: да́ждь коне́чное сло́во рабо́мъ твои́мъ, свя́те, научи́, гдѣ́ оставля́еши ча́да твоя́, о́тче, и́хже уще́дри, я́ко оте́цъ, пои́стиннѣ ми́лостивъ и любе́зенъ. Оба́че а́ще и здѣ́ гро́бъ покрыва́етъ, но горѣ́ тя вси́ бога́тна и́мамы предста́теля и моли́твенника къ Бо́гу, любо́вію чту́щіи тя́.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1. Самогла́сны:

Незаходи́маго свѣти́льника вселе́нныя, воспое́мъ вси́ Аѳана́сія: па́че со́лнца бо возсія́ въ тверды́ни вѣ́ры и вѣ́рныхъ соста́вы къ добродѣ́тели наста́ви, о́во у́бо богодохнове́нными уче́ніи и спаси́тельными глаго́лъ ввожде́ніи и́же незави́стными и оби́льными, отъ усте́нъ источа́ше, о́во же дѣ́телію чу́дною и равноа́нгельнымъ житіе́мъ къ ре́вности привлача́я, и обоя́ — житіе́ и сло́во пресвѣ́тло, я́коже во́ждь изря́денъ, богоподо́бно показу́я. Того́ моли́твами, Христе́ Бо́же на́шъ, сіе́ ста́до соблюди́ и правосла́вныхъ вѣ́ру утверди́, я́ко Человѣколю́бецъ.

Гла́съ 2:

Христо́ва рачи́теля, тезоимени́таго безсме́ртію, и́стиннаго таи́нника Спа́сова, и красоту́, и хвалу́ единообра́знымъ всѣ́мъ и наста́вникомъ, освяще́ннаго отъ младе́нства Го́сподеви, ли́цы оте́цъ, соше́дшеся, восхва́лимъ: се́й бо, жела́ніе боже́ственное въ себе́ пріе́мъ, мірску́ю у́бо оста́ви пре́лесть, взя́тъ же яре́мъ Христо́въ на ра́мо и полки́ бѣсо́въ побѣди́ му́жески, показа́въ на́мъ дѣ́тельно боже́ственныя любве́ изря́дный пу́ть, и́бо и то́й сíй прете́къ во тща́ніи, пости́же свѣ́тъ и́стинный Тро́ицы Вседѣ́тельныя. О, чудесе́ ужа́снаго и ве́щи богоподо́бныя! Яко зе́менъ сы́й естество́мъ, ра́венъ бы́сть мы́сленнымъ существо́мъ, сла́ву и че́сть Бо́жію воспріе́мля, и моли́твенникъ на́мъ быва́етъ, я́ко да улучи́мъ вѣ́чныхъ бла́гъ въ де́нь Су́дный.

Гла́съ 4:

Удиви́ мы́сленныхъ, ужаси́ и земны́я пречу́дны труды́ воздержа́нія твоего́ житія́: я́коже бо безпло́тенъ отню́дъ, во пло́ти ста́ростнѣ, враги́ неви́димыя пребори́лъ еси́. Ро́ди у́бо тя́ вси́ пою́тъ благочести́выхъ, изря́днѣе же твое́ честно́е ста́до, свѣ́тлость твои́хъ болѣ́зней, столпописа́ніе, е́же показа́лъ еси́, я́ко гра́дъ, въ пусты́ни красе́нъ, и́же жили́ще собо́ромъ мона́шескимъ богоподо́бно соста́вилъ еси́, и е́же, я́коже оде́ждами многоче́стными, твои́ми красу́ется чудесы́ и до́блественными страда́ніи, и твои́ми мольба́ми, Аѳана́сіе, и моли́твами испроша́етъ ко Христу́ соблюсти́ся, иму́щему ве́лію ми́лость.

Сла́ва, гла́съ 5:

Востру́бимъ трубо́ю пѣ́сней, благода́ть бо Ду́ха, вся́кія трубы́ благолѣ́пнѣйши, всѣ́хъ къ пѣ́нію созыва́етъ богоно́снаго отца́: ца́ріе и кня́зи да чудя́тся всѣ́хъ Царя́ и́скреннему рабу́, и́же міроде́ржца нача́ла и вла́сти, Ду́ха Боже́ственнаго всѣ́ми ору́жіи побѣди́вшаго. Па́стыріе и учи́теліе изря́днаго вои́стинну пра́вила же и о́браза па́ствѣ да восхва́лятъ, и́же въ повелѣ́ніихъ свѣ́тлаго и въ вѣ́рѣ до́бляго, и́же въ видѣ́ніихъ высо́каго, въ дѣя́ніихъ вы́ше о́блакъ, во уче́ніихъ пи́щу пото́ка, наста́вника заблу́ждшимъ, подпо́ру преклоне́ннымъ, всѣ́хъ боля́щихъ ми́лующаго, Аѳо́ну вели́кое украше́ніе, похваля́юще, вси́ рце́мъ: отце́мъ верхо́вне Аѳана́сіе, предста́ни твои́мъ рабо́мъ всегда́, о́тче на́шъ, и спаси́ ста́до твое́ моли́твами твои́ми.

И ны́нѣ, богоро́диченъ, гла́съ то́йже:

Востру́бимъ трубо́ю пѣ́сней, прекло́ншибося свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющихъ Ю. Цари́ и кня́зи да стеку́тся, и Цари́цѣ да воспле́щутъ въ пѣ́снехъ, Царя́ ро́ждшей, сме́ртію одержи́мыя пе́рвѣе разрѣши́ти человѣколю́бно Благоволи́вшаго. Па́стыріе и учи́теліе, до́браго Па́стыря, Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ Простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище, пѣ́сньми богогла́сными похваля́юще, си́це рце́мъ: пала́то Сло́ва, сподо́би смире́нныхъ на́съ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, а́нгельскимъ бесѣ́дуя ликостоя́ніемъ,* Аѳана́сіе преподо́бне:* житіе́ бо сіе́, о́тче,* на земли́ вои́стинну, добродѣ́тель удержа́въ, пожи́лъ еси́,* показа́лся еси́ чистоты́ нескве́рное зерца́ло,* лучеза́рныя мо́лніи воспріе́мля Ду́ха Свята́го, всесла́вне.* Отону́дуже озаря́емь,* зрѣ́лъ еси́ бу́дущая, вся́ предглаго́ля,* отъ Боже́ственнаго свѣтоявле́нія науча́емь Христо́ва,* Его́же моли́ душа́мъ на́шимъ пода́ти ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, по́стниковъ нача́льникъ бы́въ* и непобѣди́мь побо́рникъ:* страсте́й бо отсѣка́я ко́рень и бѣсо́въ стремле́нія,* предста́въ му́жески, Аѳана́сіе,* тѣ́хъ посрами́лъ еси́ душепа́губную пре́лесть,* Креста́ же Спа́сова дѣ́йство* и непобѣди́мую яви́лъ еси́ си́лу,* е́юже и препоя́сався,* побѣди́лъ еси́ вся́ отмета́ющія Бо́жіе плотско́е явле́ніе Христо́во.* Его́же моли́ дарова́ти душа́мъ на́шимъ ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Сто́лпъ свѣтови́денъ, добродѣ́телію утвержде́нъ,* и о́блакъ, осѣня́ющь и́же во Аѳо́нѣ,* ты́ яви́лся еси́, о́тче,* къ небеси́ отъ земли́ Бо́га зря́щихъ предводя́,* кре́стною па́лицею страсте́й искорени́лъ еси́ мо́ре,* мы́сленнаго же Амали́ка отри́нувъ,* непреткнове́нный небе́сный восхо́дъ обрѣ́лъ еси́, богоблаже́нне,* и жре́бій непремину́ющь* со безпло́тными престо́лу, ра́дуяся, предстоя́ Христо́ву,* Его́же моли́ душа́мъ на́шимъ пода́ти ве́лію ми́лость.

Сла́ва, гла́съ 6:

Оте́ческую добро́ту, по́стниковъ украше́ніе, исто́чника чуде́съ и къ Бо́гу моли́твенника непосты́дна, сте́кшеся, о празднолю́бцы, пѣ́сненными похвала́ми воспое́мъ, глаго́люще: ра́дуйся, мона́шескаго житія́ пра́вило, и о́бразъ, и печа́ть извѣ́стная; ра́дуйся, свѣти́льниче пресвѣ́тлый, озаря́яй вся́ку добродѣ́тель свѣтлостьми́; ра́дуйся, и́же въ бѣда́хъ вели́кій утѣ́шителю и те́плый засту́пниче печа́льнымъ. Тѣ́мъ у́бо, Аѳана́сіе, не преста́й моля́ Христа́ Бо́га о ста́дѣ твое́мъ се́мъ и всѣ́хъ вѣ́рныхъ, почита́ющихъ всечестно́е твое́ успе́ніе.

И ны́нѣ, гла́съ то́йже: Богоро́дице, Ты́ еси́ лоза́ и́стинная...

Тропа́рь, гла́съ 3: Еже во пло́ти житію́... [пи́санъ на ма́лѣй вече́рни], два́жды, и Богоро́дице, Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, богоро́диченъ: Тя́, хода́тайствовавшую...

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Многосвѣ́тлая звѣзда́ мона́шествующихъ показа́лся еси́ и степе́нь извѣ́стенъ, воздержа́нія же предѣ́лъ, пресвѣ́тлое зерца́ло разсужде́нія, преподо́бне, па́мять твою́ ра́достно соверша́ющимъ разрѣше́нія проси́ согрѣше́ній, преблаже́нне, Бо́гу предстоя́. [Два́жды.]

Сла́ва, и ны́нѣ, богоро́диченъ:

Наста́ви на́съ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

По 2-й стихоло́гіи сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственнымъ жела́ніемъ безсме́ртія, Аѳана́сіе, одержи́мь и кре́стъ на ра́мо взе́мъ, во Аѳо́нѣ и́же дре́вле жела́ніемъ всели́лся еси́, идѣ́же, преподо́бне, Го́сподеви собра́лъ еси́ ста́до. Тѣ́мже и моли́твенника тя́ те́пла стяжа́хомъ ко Го́споду. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По поліеле́и сѣда́ленъ, гла́съ 8. Подо́бенъ: Прему́дрости.

Видѣ́ніе и дѣя́ніе воспріи́мъ, чу́вствія, преподо́бне, украша́я, житіе́ напра́вилъ еси́ къ боже́ственнымъ повелѣ́ніемъ: мона́хомъ бо яви́лся еси́ свѣти́льникъ свѣ́телъ, наставля́я и просвѣща́я на́съ къ позна́нію. Тѣ́мже, восхваля́юще, велича́емъ любо́вію исхо́дную па́мять твою́, богоно́се Аѳана́сіе. Сего́ ра́ди вопіе́мъ ти́: моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ стихира, гласъ 6:

Безсме́ртія тезоимени́таго вси́ восхва́лимъ, во Аѳо́нѣ му́жески и до́блественнѣ пости́вшася, и́же и ста́до собра́ сіе́, и хра́мъ Го́сподеви воздви́же любо́вію, и Ма́тери Бо́жіи возложи́ вся́, Ейже и мо́лится о на́съ, вѣ́рою соверша́ющихъ па́мять его́.

Кано́нъ Богоро́дицы, на 6 и свята́го, на 8.

Кано́нъ Богоро́дицы, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́гими содержи́мь напа́стьми, къ Тебѣ́ прибѣга́ю спасе́нія искíй, о Ма́ти Сло́ва и Дѣ́во! отъ тя́жкихъ и лю́тыхъ мя спаси́.

Страсте́й мя смуща́ютъ прило́зи, мно́гаго уны́нія испо́лнити мою ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га, молю́, Дѣ́во, изба́витися ми лю́тыхъ: къ Тебѣ́ бо ны́нѣ прибѣга́я, простира́ю и ду́шу и помышле́ніе.

Неду́гующа тѣ́ломъ и душе́ю, посѣще́нія Боже́ственнаго, и промышле́нія отъ Тебе́ сподо́би, еди́на Богома́ти, я́ко Блага́я, Блага́го же Роди́тельнице.

Кано́нъ свята́го, гла́съ то́йже.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Безсме́ртія бы́въ тезоимени́тъ, житіе́мъ скончава́я, и́стиннаго яви́лся еси́, о́тче Аѳана́сіе, безсме́ртія прія́телище, преше́дъ отъ вре́менныхъ, но, Христу́ предстоя́, помяни́ на́съ, помина́ющихъ тя́.

Благочести́въ отъ мя́гкихъ бы́въ ногте́й, преподо́бне, къ добродѣ́тели стяжа́нію роди́телей лише́ніе тя́ ника́коже возбрани́, но все́ жела́ніе все́ю си́лою и тща́ніе обрати́лъ еси́ къ еди́ному Содѣ́телю.

Отъ усте́нъ скве́рныхъ хвалу́, дерзну́въ, пою́ тебѣ́, и́же о тебѣ́ жела́нія пріе́мникъ бы́въ и любве́ сою́зникъ, но, о́тче, ми́лостивъ бу́ди и да́ждь по достоя́нію тебѣ́ сію́ принести́ хвалу́.

Богоро́диченъ: Мла́до Отроча́ па́че сло́ва родила́ еси́, Ве́тхаго де́ньми, но́ву на земли́ стезю́ добродѣ́тели показа́вша, Его́же уго́дникъ Тво́й при́сный Аѳана́сій, Отрокови́це, любо́вію снѣда́емь, сíй хра́мъ Тебѣ́ созда́.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Предста́телство и покро́въ жи́зни моея́ полага́ю Тя, Богороди́тельнице Дѣ́во, Ты мя окорми́ ко приста́нищу Твоему́, благи́хъ вино́вна, вѣ́рныхъ утвержде́ніе, еди́на Всепѣ́тая.

Молю́, Дѣ́во, душе́вное смуще́ніе, и печа́ли моея́ бу́рю разори́ти: Ты́ бо, Богоневѣ́стная, нача́льника тишины́ Христа́ родила́ еси́, еди́на Пречи́стая.

Благодѣ́теля ро́ждши, до́брыхъ вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Лю́тыми неду́ги и болѣ́зненными страстьми́ истяза́ему, Дѣ́во, Ты́ ми помози́: исцѣле́ній бо неоску́дное Тя зна́ю сокро́вище, Пренепоро́чная, неиждива́емое.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Отъ дѣ́тства уже́ къ Бо́гу любо́вію взя́тъ, све́рстныя отъ дѣте́й собира́я и ли́къ составля́я, духо́вно вчита́лъ еси́, дѣ́тскія, прему́дре, си́хъ обы́чаи изыма́я.

Прему́дрости жела́ніемъ преше́дъ, ко благоразу́мному гра́ду Константи́ню, богому́дре, доше́лъ еси́, я́коже пчела́ му́драя, и, любодѣ́льно чи́стая отъ слове́съ совоку́пль, неполе́зная оста́вилъ еси́.

Вѣ́триломъ, о́тче, Креста́ душе́вный тво́й кора́бль окорми́въ, благоути́шно же и легко́ жите́йскаго лю́таго потопле́нія избѣ́глъ еси́ и къ тишинѣ́ боже́ственныхъ извле́клъ еси́ приста́нищъ, ра́дуяся.

Богоро́диченъ: Иже пре́жде вѣ́къ рожде́йся отъ Отца́ неизрече́нно напослѣ́докъ изъ утро́бы Твоея́ про́йде и обожи́ на́ше естество́, Ма́ти Дѣ́во, Иже преподо́бныхъ ли́ки я́вѣ изводя́й.

Сѣда́ленъ, гла́съ 8. Подо́бенъ: Прему́дрости.

Отъ ю́ности вся́ оста́вль жите́йская, кра́сная же и лѣ́потная, усе́рдно послѣ́довалъ еси́ Зва́вшему тя́, преподо́бне, и, на ра́мо взя́лъ Кре́стъ Го́спода твоего́, въ постѣ́хъ, о́тче, тѣ́ло изнури́лъ еси́, тѣ́мъ и па́стыря тя́ Свои́мъ овца́мъ до́брѣ устроя́етъ Всеблагíй Госпо́дь, Аѳана́сіе блаже́нне. Моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страсте́й мои́хъ смуще́ніе, ко́рмчію ро́ждшая Го́спода, и бу́рю утиши́ мои́хъ прегрѣше́ній, Богоневѣ́стная.

Милосе́рдія Твоего́ бе́здну призыва́ющу пода́ждь ми, Яже благосе́рдаго ро́ждшая, и Спа́са всѣхъ пою́щихъ Тя.

Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя Богома́терь.

Наде́жду и утвержде́ніе, и спасе́нія стѣ́ну недви́жиму, иму́ще Тя, Всепѣ́тая, неудо́бства вся́каго избавля́емся.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Умъ страсте́й влады́ку творя́, и боже́ственными зако́ны наставля́емь, и за́повѣдьми Бо́жіими увѣря́емь, младе́нецъ бесѣ́дованія, и скве́рныхъ со́нмища, и пляса́нія бѣсо́въ благоче́стно возрази́, я́ко прему́дръ лу́чшее избира́я.

Пріе́мъ ле́гкое Спа́са и́го, и боже́ственнымъ стра́хомъ составля́емь, и очи́щъ тѣ́ло и ду́шу, бы́лъ еси́ чистоты́ и цѣлому́дрія вина́, и предѣ́лъ воздержа́нія, и печа́ть безстра́стія, и любве́ о́бразъ, Аѳана́сіе.

Проше́дъ е́же по на́съ, и внѣ́шнее ты́ наказа́ніе любому́дрія, прозяба́тельное и рѣши́тельное, ко́еждо прохожда́лъ еси́, пра́вдою огражда́емь, му́дростію и разсужде́ніемъ, смире́ніемъ и ра́зумомъ и инѣ́ми кра́сными дарова́ніи.

Богоро́диченъ: Плещми́ херуви́мскими стра́шными носи́мь Влады́ка на престо́лѣ я́коже о́гненнѣ, въ Твою́, Чи́стая, всели́ся утро́бу и пло́ти прія́тіемъ человѣ́ческое обожи́ существо́, я́ко учи́тъ изря́дный въ преподо́бныхъ Аѳана́сій, еди́на Всепѣ́тая.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Испо́лни, Чи́стая, весе́лія се́рдце мое́, Твою́ нетлѣ́нную даю́щи ра́дость, весе́лія ро́ждшая вино́внаго.

Изба́ви на́съ отъ бѣ́дъ, Богоро́дице Чи́стая, вѣ́чное ро́ждши избавле́ніе, и миръ всякъ умъ преиму́щій.

Разрѣши́ мглу прегрѣше́ній моихъ, Богоневѣ́сто, просвѣще́ніемъ Твоея́ свѣ́тлости, Свѣтъ ро́ждшая Боже́ственный и превѣ́чный.

Исцѣли́, Чи́стая, души́ моея́ неможе́ніе, посѣще́нія Твоего́ сподо́бльшая, и здра́віе моли́твами Твои́ми пода́ждь ми.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Яви́лся еси́, я́коже магни́тъ, привлача́ сла́достію, о́тче, слове́съ твои́хъ къ наказа́нію и послуша́нію уче́ніемъ, и́же рече́ннымъ непреста́нно зрѣ́ти и ви́дѣти честно́е твое́ и ра́достное лице́.

Зако́номъ Боже́ственнымъ послѣ́дуя и повелѣ́ніемъ повину́яся Сотво́ршаго, законополо́жникъ яви́лся еси́ мона́хомъ и пра́вило извѣ́стнѣйшее, наказа́тель безу́мнымъ, и наста́вникъ заблу́ждшимъ и свѣти́льникъ во тмѣ́, пресла́вне.

Добродѣ́телей орга́нъ и благодарова́ній прія́телище Ду́ха Свята́го сы́й, свяще́нно и красно́ жили́ще созда́лъ еси́, вся́ко житіе́ и жи́знь прора́сленно мона́хомъ предлага́я.

Богоро́диченъ: Витíйская не мо́гутъ уста́ по достоя́нію Тя́ пѣ́ти, Всепѣ́тая, вы́шшу су́щу херуви́мъ и вся́кія тва́ри. Тѣ́мже съ боже́ственнымъ Аѳана́сіемъ Влады́ку о всѣ́хъ на́съ помоли́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Сме́рти и тли́ я́ко спа́слъ есть, Са́мъ Ся́ изда́въ сме́рти, тлѣ́ніемъ и сме́ртію мое́ естество́ я́то бы́вшее, Дѣ́во, моли́ Го́спода и Сы́на Твоего́, враго́въ злодѣ́йствія мя изба́вити.

Предста́тельницу Тя живота́ вѣмъ, и храни́тельницу тве́рду, Дѣ́во, и напа́стей рѣша́щу молвы́, и нало́ги бѣсо́въ отгоня́ющу: и молю́ся всегда́, отъ тли́ страсте́й мои́хъ изба́вити мя.

Яко стѣ́ну прибѣ́жища стяжа́хомъ, и душъ всесоверше́нное спасе́ніе, и простра́нство въ ско́рбехъ, Отрокови́це, и просвѣще́ніемъ Твоимъ при́сно ра́дуемся: о Влады́чице, и ны́нѣ насъ отъ страсте́й и бѣдъ спаси́.

На одрѣ́ ны́нѣ немощству́яй лежу́, и нѣсть исцѣле́нія пло́ти мое́й, но Бо́га и Спа́са мíру, и Изба́вителя неду́говъ ро́ждшая, Тебѣ́ молю́ся Благо́й: отъ тли неду́гъ возста́ви мя.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Умертви́лъ еси́ плотскíя по́хоти воздержа́ніемъ мно́гимъ, распя́лъ еси́ себе́ мíру и страсте́мъ, поще́ньми и слеза́ми, моли́твами и пѣ́сньми непреста́нными прилѣпля́яся Бо́гу.

Мона́шествующихъ наста́вникъ, су́щихъ въ горѣ́ Аѳо́нстѣй, и о́бразъ и начерта́ніе добродѣ́тельныхъ дѣя́ній сы́й, украси́лъ еси́ я́же та́мо вся́ безсупру́жныхъ пребыва́нія.

Сла́докъ, пра́въ и бла́гъ, кро́токъ же и смире́нъ, благопристу́пенъ прибли́жникъ, ми́лостивъ бы́лъ еси́, ще́дръ и благосе́рдъ, ти́хъ о́бразы, Христо́въ подража́тель нра́вы.

Богоро́диченъ: Но́въ, я́коже Моисе́й, я́влься, устро́илъ еси́, я́коже другу́ю ски́нію, огра́ду, всече́стне, ю́же и превозрасти́лъ еси́ болѣ́зньми и по́ты, и возложи́лъ еси́ Ма́тери Бо́жіей.

Конда́къ, гла́съ 8. Подо́бенъ: Взбра́нной.

Яко невеще́ственныхъ суще́ствъ зри́теля изря́дна и дѣ́ятельна сказа́теля всеи́стинна, взыва́етъ тя́ ста́до твое́, богоглаго́льниче: не оскудѣ́й, моля́ о рабѣ́хъ твои́хъ, изба́витися напа́стей и обхожде́ній, вопію́щимъ ти́: ра́дуйся, о́тче Аѳана́сіе.

Икосъ:

Свы́ше твое́ зва́ніе пріе́мъ пресла́вно, безсме́ртную жи́знь наслѣ́довалъ еси́: съ пло́тію бо на земли́ безпло́тныхъ житіе́ проше́дъ, бы́лъ еси́ страстьми́ непрія́тенъ. Тѣ́мже тя́ хва́лимъ, о́тче: ра́дуйся, свѣ́тлая мона́шествующихъ сла́во; ра́дуйся, я́сный цѣлому́дрія сто́лпе; ра́дуйся, му́жества я́вѣ сказа́тельное позна́ніе; ра́дуйся, прему́драго ра́зума явле́ніе; ра́дуйся, пра́вило равностоя́тельное пра́вды извѣ́стіе; ра́дуйся, сло́вомъ соверши́вшу ти́ дѣя́ніемъ стремле́нія; ра́дуйся, у́ме, наслажда́яся мы́слей неизрече́нныхъ; ра́дуйся, всю́ тва́рь благоче́стно уди́вль; ра́дуйся, и́мже посрами́шася де́мони; ра́дуйся, и́мже вся́ка стра́сть умертви́ся; ра́дуйся, исто́чниче живото́чныхъ во́дъ. Ра́дуйся, спаси́телю вѣ́рно ти вопію́щихъ: ра́дуйся, о́тче Аѳана́сіе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́выя всели́лся еси́, Юже мíру предста́тельницу показа́лъ еси́: отецъ на́шихъ Бо́же, благослове́нъ еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися отъ прегрѣше́ній, и душе́вныхъ скве́рнъ, вѣ́рою зову́щимъ: отецъ на́шихъ, Бо́же, благослове́нъ еси́.

Сокро́вище спасе́нія, и исто́чникъ нетлѣ́нія, Тя ро́ждшую, и сто́лпъ утвержде́нія, и дверь покая́нія зову́щимъ показа́лъ еси́: отецъ на́шихъ Бо́же, благослове́нъ еси́.

Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ ко кро́ву Твоему́, Дѣ́во, исцѣли́ти сподо́би, Спа́са Христа́ намъ ро́ждшая.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Всю́ обтече́ отню́дъ тва́рь житія́ твоего́ исправле́ній вѣща́ніе, о́тче, и въ пресла́вную дости́глъ еси́ высоту́, Бо́гу тя́ просла́вльшу и наро́чита всѣ́мъ сотво́ршу.

Ни́щихъ строи́тель, вдови́цъ предста́тель, промы́сленникъ си́рыхъ, печа́льныхъ ско́рая утѣ́ха, потопля́емыхъ приста́нище, оби́димыхъ заступле́ніе бы́лъ еси́, твоему́, о́тче, подо́бяся учи́телю.

Звѣзду́ всемíрну и мона́шествующихъ свѣти́ло незаходи́мо, помо́щника въ бѣда́хъ, грѣ́шниковъ ве́ліе прибѣ́жище вѣ́дый, хода́тая и моли́твенника предлага́ю Влады́цѣ Христу́ тя, всече́стне.

Богоро́диченъ: Ви́дѣти жела́я Тво́й уго́дникъ Твоего́ Сы́на и Бо́га неизрече́нную сла́ву, Богороди́тельнице, Сего́ Честны́й Кре́стъ на ра́му взе́мъ, послѣ́дова живоно́снымъ Его́ и Боже́ственнымъ стопа́мъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

По́мощи я́же отъ Тебе́ тре́бующія, не пре́зри, Дѣ́во, пою́щія и превознося́щія Тя во вѣ́ки.

Неможе́ніе души́ моея́ исцѣля́еши, и тѣле́сныя болѣ́зни, Дѣ́во, да Тя просла́влю, Чи́стая, во вѣ́ки.

Исцѣле́ній бога́тство излива́еши вѣ́рно пою́щимъ Тя, Дѣ́во, и превознося́щимъ неизрѣче́нное Твое́ рождество́.

Напа́стей Ты прило́ги отгоня́еши, и страсте́й нахо́ды, Дѣ́во: тѣ́мже Тя пое́мъ во вся вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Юношески побѣжда́я нача́ла, Аѳана́сіе, и вла́сти тмы́, вели́къ учи́тель бы́лъ еси́ и наста́вникъ спаси́тельный, навѣ́ты, и ла́янія, и ле́сти тѣ́хъ открыва́я, ста́до твое́ всего́ де́моновъ злодѣ́йствія невреди́мо соблюда́я.

На земли́ я́ко человѣ́къ ходя́, житіе́ на небесѣ́хъ я́ко вои́стинну стяжа́лъ еси́, а́нгеломъ собесѣ́дникъ я́влься, житіе́ и жи́знь соверша́я о́нѣхъ, съ ни́миже воспѣва́еши ны́нѣ: свяще́нницы, благослови́те, лю́діе, превозноси́те Христа́ во вѣ́ки.

Тя́, соше́дшеся дне́сь, досто́йно хва́лимъ и моще́й твои́хъ чти́мъ ра́ку, страсте́й избавле́ніе, согрѣше́ній оставле́ніе, вся́кая напа́сти и обстоя́нія разрѣше́ніе прося́ще моли́твами твои́ми, святу́ю твою́ па́мять вѣ́рно и ра́достно соверша́юще во вѣ́ки.

Богоро́диченъ: Якоже Илія́ пе́рвѣе въ Карми́лѣ всели́ся, та́ко и ты́, въ горѣ́ Аѳо́нстѣй упражня́яся, возжела́лъ еси́ осо́бь бы́ти съ Бо́гомъ и, богонача́льными озари́вся видѣ́ніи, уго́дникъ яви́лся еси́ Чи́стѣй Богоро́дице, вопія́ Ей, — ра́дуйся, — со арха́нгеломъ.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

То́ка слезъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Свѣ́та Твоего́ заря́ми просвѣти́, Дѣ́во, мракъ невѣ́дѣнія отгоня́щи, благовѣ́рно Богоро́дицу Тя исповѣ́дающихъ.

На мѣ́стѣ озлобле́нія не́мощи смири́вшагося, Дѣ́во, исцѣли́, изъ нездра́вія во здра́віе претворя́ющи.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Въ чистотѣ́ и цѣлому́дріи, и въ чи́стѣ пребыва́ніи, и житіи́ нескве́рненѣ, я́ко безпло́тенъ, на земли́ пожи́въ, восте́клъ еси́ къ небе́снымъ стезя́мъ, и со всѣ́ми ра́дуешися преподо́бными и пра́ведными, моля́ о всѣ́хъ Христа́.

Вельми́ возвели́чилъ еси́ на земли́ твоего́ Влады́ку, и у́ды твои́ми видѣ́ніемъ и дѣ́телію Сего́ просла́вль пресла́вно, яви́лся еси́ взо́ренъ всю́ду и сла́венъ бы́лъ еси́, богоно́се: добродѣ́тель бо вѣ́сть вои́стинну посрами́ти и супоста́та.

Совокупи́лся еси́ со безпло́тными во́инствы, и преподо́бнымъ лико́мъ сочета́лся еси́, и со избра́нными всѣ́ми лику́еши, прича́щся и́стиннымъ обоже́ніемъ и безсме́ртною, о́тче, жи́знію. Съ ни́миже о ста́дѣ твое́мъ непреста́нно твоего́ Влады́ку моли́.

Богоро́диченъ: Хра́мъ освяще́нъ, вмѣ́стенъ Еди́ному отъ Тро́ицы сы́й, хра́мъ Тво́й, Влады́чице, уго́дникъ че́стенъ Аѳана́сій воздви́же въ сла́ву Твою́ и че́сть, въ не́мже непреста́нно не преста́й да́рующи по́мощь моли́твами Твои́ми.

Свѣти́ленъ:

Яко издале́ча возсія́лъ еси́ те́мнымъ, сы́й свѣтоно́сенъ, и мра́чныя страны́, Аѳана́сіе, просвѣти́лъ еси́ твои́хъ добродѣ́телей свѣ́тлостію, но не преста́й моля́ся о мíрѣ Го́сподеви. [Два́жды.]

Сла́ва, и ны́нѣ, богоро́диченъ:

Умоле́на бы́вши, Всецари́це, мольба́ми Твоего́ честна́го Аѳана́сія, храни́ ста́до Твое́ неприкоснове́нно вся́каго супроти́вства, всегда́ Тя́ моля́щее, Предста́тельницу мíра.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Честна́ вои́стинну сме́рть* Твоего́ преподо́бнаго, Христе́,* предъ Тобо́ю бы́сть.* Се́ бо источи́ отъ ноги́ уго́дникъ Тво́й* исто́чникъ кро́ве,* и по сме́рти вся́къ неду́гъ отгоня́щь* и прогоня́щь лука́вствія ду́хи,* на ня́же, еще́ жи́въ,* сопроти́въ ополчи́ся* да́же и до кро́ве. [Два́жды.]

Исто́чникъ чуде́съ показа́* и рѣку́ дарова́ній* ра́ку моще́й твои́хъ человѣ́комъ Госпо́дь,* Аѳана́сіе прему́дре:* слѣпы́мъ е́же ви́дѣти сія́ дарова́ся,* прокаже́ннымъ очище́ніе,* одержи́мыя нечи́стыми ду́хи* отъ тѣ́хъ вла́сти избавля́етъ* и цѣлому́дрити твори́тъ.

Ра́дуйся, по́стниковъ свѣти́ло,* мона́шествующихъ звѣздо́,* па́стырей похвало́, о́тче Аѳана́сіе,* преподо́бныхъ совсе́льниче;* ра́дуйся, Тро́ицы жили́ще;* ра́дуйся, любве́ и цѣлому́дрія исто́чниче;* ра́дуйся, пресвѣ́тлый свѣти́льниче разсужде́нія;* ра́дуйся, пра́вило добродѣ́телей пра́вое* и сто́лпе одушевле́нный.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Аѳана́сіе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ, и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 33 – 43 об.

/ Къ оглавленію раздѣла /


Наверхъ / Къ титульной страницѣ

0