Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 5-й де́нь.
Слу́жба обрѣ́тенію честны́хъ моще́й преподо́бнаго и богоно́снаго отца́ на́шего Се́ргія игу́мена, Ра́донежскаго чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Иже на небеси́ человѣ́ка Бо́жія* и на земли́ а́нгела су́ща съ пло́тію,* Бо́гу отъ чре́ва ма́терня освяще́ннаго блаже́ннаго Се́ргія,* дне́сь наста́ обрѣ́теніе чудотво́рныхъ моще́й* и созыва́етъ все́ церко́вное исполне́ніе* возсыла́ти сла́ву Христу́ Бо́гу.

Вы́спрь на небеси́ а́нгели ра́дуются,* и ни́зу на земли́ человѣ́цы ликовству́ютъ,* и Це́рковь Бо́жія, украша́ема, весели́тся* о пресла́вномъ пренесе́ніи честны́хъ моще́й твои́хъ,* о́тче Се́ргіе, Христу́ вопію́щи:* Ты́ ми держа́ва, Христе́, и утвержде́ніе.

Сла́ва, гла́съ 6:

Пріиди́те, вси́ концы́ земнíи, ра́дующеся, псалмы́ и пѣ́сньми духо́вными честно́е пренесе́ніе засту́пника на́шего благоче́стно восхва́лимъ и, обстоя́ще честну́ю его́ и чудотво́рную ра́ку, на по́мощь того́ призыва́емъ, си́це глаго́люще: преблаже́нне о́тче Се́ргіе, да́руй Благочести́вому Импера́тору на́шему и духо́вному Сы́ну твоему́ твои́ми моли́твами посо́біе на враги́, и держа́ву Его́ ми́ромъ огради́, и во́я Его́ на сопроти́вныя укрѣпи́, и спаси́ ду́ши на́ша.

[И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Ду́ха Пресвята́го* бы́лъ еси́, о́тче,* и на́съ моли́твами твои́ми* вселе́ніе покажи́ Святѣ́й Тро́ицѣ,* богому́дре Се́ргіе и пребога́те.

Сти́хъ: Честна́ предъ Го́сподемъ* сме́рть преподо́бныхъ Его́.

Пріиди́те, вѣ́рніи, ра́дующеся,* и вни́демъ въ це́рковь въ весе́ліи се́рдца,* облобыза́юще честны́я мо́щи Се́ргія богому́драго,* исцѣле́ніе и грѣхо́въ проще́ніе пріи́мемъ* моли́твами его́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пріими́ пѣ́ніе* ча́дъ твои́хъ, Се́ргіе о́тче,* и пою́щимъ обрѣ́теніе моще́й твои́хъ* и лю́бящимъ тя́* подава́й е́же на по́льзу проше́ніе.

Сла́ва, и ны́нѣ, богоро́диченъ, гла́съ и подо́бенъ то́йже:

Вы́шніи ли́цы,* Богоро́дице Дѣ́во,* пою́тъ съ ни́жними,* сла́вяще непреста́нно* Рождество́ Твое́ пречи́стое.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 4. Подо́бенъ: Зва́нный свы́ше.

Егда́ пре́жде рождества́ твоего́* пріи́де заче́ншая тя́ въ це́рковь Бо́жію,* тогда́ во чре́вѣ ея́ трикра́ты возгласи́лъ еси́,* Тро́ицу прославля́я, богому́дре о́тче Се́ргіе.* Пре́жде мірска́го позна́нія Бо́га позна́лъ еси́,* па́че же Бо́гомъ позна́нъ бы́лъ еси́, преблаже́нне.* Проявля́я всѣ́мъ хотя́щая бы́ти на тебѣ́* Бо́жія благода́ти сія́ніе* и свѣтлостьми́ лица́ твоего́* показу́я душе́вную и тѣле́сную чистоту́,* ея́же ра́ди избра́нный сосу́дъ бы́въ Христа́ Бо́га на́шего,* Его́же моли́* спасти́ и просвѣти́ти ду́ши на́ша. [Два́жды.]

Егда́ Бо́жіе раче́ніе на́йде на тя́,* богому́дре и всеблаже́нне о́тче Се́ргіе,* тогда́ вся́ су́щая въ мíрѣ преоби́дѣлъ еси́,* и, Христа́ еди́наго отъ души́ возлюби́въ* и Того́ живоно́снымъ стопа́мъ послѣ́дуя,* пусты́ню дости́глъ еси́,* и, сію́ насѣ́явъ сѣ́менемъ трудо́въ твои́хъ* и напои́въ ту́чами сле́зъ твои́хъ,* умно́жилъ еси́ плоды́ добродѣ́телей,* и, тѣ́ми напита́въ ча́да,* приве́лъ еси́ я́ Христу́ Бо́гу.* Его́же моли́* спасти́ и просвѣти́ти ду́ши на́ша. [Два́жды.]

Егда́ Боже́ственный гла́съ* услы́шалъ еси́, богому́дре, глаго́лющъ ти́:* се́ Пречи́стая гряде́тъ!* тогда́ во мно́зѣ по́двизѣ прилѣ́жнѣ моли́лся еси́,* я́ко да сподо́бишися о́наго стра́шнаго посѣще́нія.* И а́біе пресвѣ́тлый па́че со́лнца свѣ́тъ* осія́ тя, преподо́бне,* и Влады́чицу Богома́терь разу́мныма и тѣле́сныма очи́ма* ви́дѣти сподо́бился еси́* и Тоя́ сла́дкій гла́съ уши́ма внуши́лъ еси́, рече́нный:* неотсту́пна бу́ду отъ мѣ́ста, сего́,* и не и́мать оскудѣ́ти оби́тель твоя́.* Юже моли́* спасти́ и просвѣти́ти ду́ши на́ша. [Два́жды.]

Егда́ приспѣ́ вре́мя* е́же къ Бо́гу отше́ствія твоего́,* тогда́, я́ко звѣзда́ пресвѣ́тлая,* восте́клъ еси́ въ небе́сныя оби́тели,* и та́мо съ ли́ки святы́хъ престо́лу Единосу́щныя Тро́ицы предстои́ши;* блаже́нное же и честно́е тѣ́ло твое́,* на мно́га лѣ́та земле́ю покрове́но бы́вшее,* ны́нѣ отъ земли́ изда́вшеся, чуде́съ зарю́ испуща́етъ* чту́щимъ обрѣ́теніе твое́, богому́дре Се́ргіе.* Импера́тору Благочести́вому на сопроти́вныя побѣ́ды да́руй* и всѣ́мъ вѣ́рнымъ грѣхо́въ проще́ніе испроси́* у Христа́ Бо́га на́шего,* Его́же моли́* спасти́ и просвѣти́ти ду́ши на́ша. [Два́жды.]

Сла́ва, гла́съ 8:

Пріиди́те, вси́ вѣ́рніи россíйстіи собо́ри, и наслади́мся ны́нѣшняго свѣ́тлаго торжества́, пріиди́те, свяще́нныхъ исполне́ніе и мона́ховъ сосло́віе, и ви́дите, ка́ко Це́рковь Бо́жія украша́ется, псалмы́, и пѣ́сньми, и пѣ́ньми духо́вными исполня́ема. Честна́я же и сла́вная оби́тель богоблаже́ннаго отца́ Се́ргія, весе́лія и ра́дости исполня́ема во обрѣ́теніе честны́хъ моще́й его́, хва́лящися, вселе́нную созыва́етъ ра́достно вопи́ти Го́сподеви: Ты́ дарова́лъ еси́, Влады́ко Христе́, Благовѣ́рному Импера́тору на́шему крѣ́пкаго во́ина, и непобѣди́мое ору́жіе на неви́димыя и ви́димыя враги́, и христоимени́тымъ лю́демъ сокро́вище неистощи́мо неисчерпа́емыхъ дарова́ній. Того́ моли́твами пода́ждь душа́мъ на́шимъ ве́лію ми́лость.

И ны́нѣ, богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Вхо́дъ. [Проки́менъ дне́.] И чте́нія.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6:

Пріиди́те, празднолю́бцы и по́стниковъ сосло́віе, вѣ́рою соше́дшеся, и́стиннаго по́стника почти́мъ дне́сь, Се́ргія, съ весе́ліемъ ше́ствовавшаго по стопа́мъ Влады́ки своего́ у́зкій пу́ть и безстра́стную жи́знь, и вѣ́рою возопіи́мъ: О, всеблаже́нне! Преподо́бнымъ сожи́телю и по́стникомъ похвало́, о на́съ моли́ся ко Го́споду, поми́ловатися душа́мъ на́шимъ.

Преподо́бне и богоно́се Се́ргіе, любве́ ра́ди Христо́вы вся́ оста́вилъ еси́ и, въ пусты́ню вше́дъ, ника́коже убоя́лся еси́ неви́димыхъ вра́гъ кова́рствія, а́ще бо и мно́гажды пріидо́ша на тя́, скрежета́ніемъ зубны́мъ я́рость показу́юще, ты́ же моли́твами твои́ми, я́ко ды́мъ, безъ вѣ́сти си́хъ сотвори́лъ еси́. О, непоро́чныя твоея́ души́ и крѣ́пкаго терпѣ́нія твоего́! Христа́ непреста́нно моли́ спасти́ся душа́мъ на́шимъ.

Россíйская у́бо всеосвяще́нная и вели́кая Це́рковь съ правосла́вными кня́зи, мона́си же и простíи, ева́нгельскихъ исто́чникъ струя́ми напои́вшеся, духо́вно весели́мся въ наро́читомъ пра́здницѣ до́браго па́стыря и учи́теля, и, цѣле́бныя его́ мо́щи обстоя́ще, любе́зно облобыза́емъ, и си́хъ, я́ко цвѣ́ты, пѣ́сньми и хвала́ми увязе́мъ, реку́ще: ра́дуйся, Се́ргіе блаже́нне, небе́сный человѣ́че, земны́й а́нгеле и Ду́ха Свята́го оби́тель; ра́дуйся, я́ко мно́гихъ ко спаси́тельному пути́ наста́вилъ еси́; ра́дуйся, Благовѣ́рному Импера́тору на́шему похвала́ и утвержде́ніе, преподо́бне Се́ргіе богопрія́тне, оте́честву твоему́ пресвѣ́тлый свѣти́льниче и моли́твенниче о душа́хъ на́шихъ.

Гла́съ 1:

Пріиди́те, свяще́нныхъ собо́ри и правосла́вныхъ исполне́ніе, пріиди́те, мона́ховъ совокупле́ніе, и вни́демъ, ра́дующеся, въ це́рковь Бо́га на́шего, и чудотво́рную ра́ку преподо́бнаго отца́ Се́ргія обы́мемъ ра́достно, я́ко чуде́съ сокро́вище неизъе́млемо, и, честны́я его́ мо́щи любо́вію лобыза́юще, разли́чныхъ неду́гъ свободи́мся, и душа́мъ спасе́ніе пріи́мемъ, вопію́ще ему́: О, всеблаже́нне о́тче Се́ргіе! Моли́ Преблага́го Бо́га на́шего дарова́ти посо́біе на враги́ Благовѣ́рному Импера́тору на́шему, и спасти́ ду́ши на́ша.

Дне́сь весели́тся не́бо свы́ше, и земля́ ра́дуется съ человѣ́ки, и да ликовству́ютъ новоизбра́нніи россíйстіи собо́ри, и свѣ́тло торжеству́ютъ мона́шеская совокупле́нія, свята́я же Це́рковь Бо́жія и ди́вная въ пра́вду, я́ко пресвѣ́тлыми заря́ми просвѣща́ема, мно́гихъ чуде́съ наполня́ющися отъ честны́хъ и многоцѣле́бныхъ моще́й преподо́бнаго отца́ Се́ргія, всю́ вселе́нную созыва́етъ похвали́ти по́двиги его́. Тѣ́мъ вси́, соше́дшеся, того́ обрѣ́теніе въ пѣ́снехъ и пѣ́ніихъ ве́село пра́зднующіи, воспое́мъ Христа́ Бо́га на́шего, да пода́стъ на́мъ моли́твами его́ ми́ръ и ве́лію ми́лость.

Наста́ дне́сь свѣ́тлое торжество́ пренесе́нія моще́й богоблаже́ннаго отца́ Се́ргія: пріиди́те, вси́ вѣ́рніи, Це́рковь Бо́жію пѣ́сньми вѣнча́емъ и въ не́й просла́вимъ въ Тро́ицѣ пѣва́емаго Христа́ Бо́га на́шего, вопію́ще и глаго́люще: Ты́ дарова́лъ еси́, Влады́ко Христе́, Твоего́ уго́дника, гра́ду на́шему Москвѣ́ тве́рдую стѣ́ну, и всѣ́мъ россíйскимъ страна́мъ крѣ́пкаго предста́теля показа́лъ еси́, и христоимени́тымъ лю́демъ такова́го чудесопода́теля, и неисцѣ́льныхъ неду́гъ цѣли́теля и моли́твенника о душа́хъ на́шихъ.

Сла́ва, гла́съ 6:

Пріиди́те, мона́шествующихъ мно́жество дне́сь, Се́ргія, благоче́стія подража́теля, пѣ́сньми и пѣ́ньми восхва́лимъ и, честну́ю его́ и многоцѣле́бную ра́ку обстоя́ще, любе́зно облобыза́емъ, глаго́люще: ра́дуйся, пресла́вне Се́ргіе, оте́честву твоему́ пресвѣ́тлый свѣти́льниче; ра́дуйся, я́ко чи́стѣ чистѣ́йшему Свѣ́ту совоку́плься; ра́дуйся, я́ко Тро́ицѣ предстои́ши со а́нгелы, Юже непреста́нно моли́ дарова́ти душа́мъ на́шимъ ве́лію ми́лость.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ украше́ніе Це́ркви Твое́й, Го́споди,* честны́я и многоцѣле́бныя мо́щи* преподо́бнаго Се́ргія, Твоего́ уго́дника,* и, я́ко у́тварь ца́рскую иму́щи, красу́ется,* и, я́ко вѣне́цъ пресвѣ́тлый нося́щи, весели́тся,* созыва́ющи своя́ ча́да,* и́хже водо́ю и ду́хомъ ева́нгельски породи́.* Тѣ́мже Твое́ человѣколю́бное смотре́ніе сла́вимъ,* Іису́се Человѣколю́бче* и Спа́се ду́шъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Да́лъ еси́ держа́ву необори́му* Ца́рствующему гра́ду Москвѣ́, Го́споди,* и всѣ́мъ Россíйскимъ страна́мъ утвержде́ніе,* честнѣ́й же оби́тели Твое́й тве́рдое укрѣпле́ніе* и стѣ́ну непоколеби́му —* цѣльбоно́сныя и святы́я мо́щи* преблаже́ннаго Се́ргія, Твоего́ рачи́теля.* Тѣ́мъ Твоя́ человѣколю́бныя щедро́ты сла́вимъ,* Іису́се Всеси́льне* и Спа́се ду́шъ на́шихъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Да́лъ еси́ Благочеси́вому Импера́тору и вѣ́рному Твоему́ Слузѣ́, Го́споди,* тве́рдое защище́ніе, и ору́жіе спасе́нія,* и всѣ́мъ правосла́внымъ князе́мъ и во́емъ Его́* вели́кое на сопроти́вныя одолѣ́ніе,* святи́телемъ же честно́е украше́ніе* и всѣ́мъ боля́щимъ врачевство́ безме́здно —* святы́я мо́щи преподо́бнаго и треблаже́ннаго Се́ргія,* и́хже ны́нѣ ра́достно облобыза́емъ,* исцѣле́нія разли́чная пріе́млюще.* Твое́ неизрече́нное милосе́рдіе сла́вимъ,* Іису́се Благосе́рде* и Спа́се ду́шъ на́шихъ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Се́ргіе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: тропа́рь преподо́бнаго, два́жды, и Богоро́дице Дѣ́во.., еди́ножды.

Тропа́рь преподо́бнаго, гла́съ 8:

Отъ ю́ности воспрія́лъ еси́ Христа́ въ души́ твое́й, преподо́бне, и па́че всего́ вожделѣ́лъ еси́ мірска́го мяте́жа уклони́тися: му́жески въ пусты́ню всели́лся еси́ и ча́да послуша́нія въ не́й, плоды́ смире́нія, возрасти́лъ еси́. Тѣ́мъ, бы́въ Тро́ицѣ вселе́ніе, чудесы́ твои́ми всѣ́хъ просвѣти́лъ еси́, приходя́щихъ къ тебѣ́ вѣ́рою, и исцѣле́нія всѣ́мъ подая́ оби́льно. Отче на́шъ Се́ргіе, моли́ Христа́ Бо́га, да спасе́тъ ду́ши на́ша.


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Приспѣ́ дне́сь па́мять твоя́, о́тче Се́ргіе прехва́льне, веселя́щи избра́нное твое́ ста́до, въ ню́же че́стно пра́зднуемъ обрѣ́теніе святы́хъ твои́хъ моще́й и ра́достно велича́емъ Христа́ Бо́га, чуде́съ благода́ть тебѣ́ дарова́вшаго, вопію́ще: сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе. [Два́жды.]

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

По 2-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Вели́кій па́стырь на́шъ ны́нѣ да похва́лится, мона́шескій пресвѣ́тлый сто́лпъ да воспое́тся пѣ́сньми, просвѣща́яй на́съ чуде́съ свѣтлостьми́, отъ пречестны́хъ его́ моще́й исходя́щими, и я́ко росода́тельный о́блакъ, погаша́яй пла́мень страсте́й на́шихъ и ороша́яй вѣ́рныхъ ра́зумы, боже́ственный Се́ргій. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ Бо́га, па́че ума́ же и сло́ва, непреста́нно моли́ съ вы́шними си́лами, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

Ми́лостивому Христо́ву уго́днику, па́стырю на́шему и учи́телю, вси́ тебѣ́ прилѣ́жно мо́лимся, и любо́вію облобыза́емъ мо́щи твоя́ честны́я, и ра́достію отъ души́ вопіе́мъ: разруши́ пога́ныхъ наше́ствія, и покори́ подъ но́зѣ Благочести́вому Импера́тору на́шему, и разори́ о́блакъ страсте́й на́шихъ, и бѣсо́вская мечта́нія прогони́ отъ ста́да учени́къ твои́хъ, и вся́ческихъ изба́ви искуше́ній любо́вію тя́ пою́щихъ, Се́ргіе преподо́бне. [Два́жды.]

Сла́ва, и ны́нѣ, богоро́диченъ:

Недомы́сленно и непостижи́мо е́сть, Влады́чице Богора́дованная, е́же содѣ́ланное на Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на отъ пречи́стыхъ крове́й Твои́хъ; Его́же всегда́, Чи́стая, я́ко Сы́на Твоего́, моли́ спасти́ся душа́мъ на́шимъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ стихира, гласъ 8:

Преподо́бне о́тче, мíра красоты́ и пи́ши вре́менныя отню́дъ возненави́дѣлъ еси́, мона́шеское житіе́ па́че возлюби́въ, и а́нгеломъ собесѣ́дникъ бы́ти сподо́бился еси́ и свѣти́льникъ многосвѣ́тлый Россíйскія земли́, чудесы́, я́коже второ́е со́лнце, сія́я, но всѣ́хъ на́съ помина́й, соверша́ющихъ свяще́нную па́мять твою́. Мы́ бо ча́да твоя́ и о́вцы слове́сныхъ твои́хъ уче́ній и тя́ на по́мощь призыва́емъ, прося́ще тобо́ю прія́ти ми́ръ и ве́лію ми́лость.

Кано́нъ Богоро́дицы со ирмосо́мъ, на 6, и преподо́бнаго Се́ргія на 8. Гла́съ 4.

Пѣ́снь 1.

Ирмо́съ: Предѣли́въ пучи́ну чермну́ю Бо́гъ, фарао́на погрузи́вый въ не́й, прове́дъ Моисе́я немо́кренно въ пусты́ню и одожди́въ ма́нну въ снѣ́дь лю́демъ Изра́илевымъ, я́ко си́ленъ.

Свѣ́томъ Твоего́ трисо́лнечнаго Божества́, Содѣ́телю мо́й, просвѣти́ помраче́нныя о́чи ду́ши моея́, молю́ Ти ся, и очи́сти се́рдце мое́, да возмогу́ пѣ́ти обрѣ́теніе честны́хъ моще́й преподо́бнаго Се́ргія, Твоего́ рачи́теля.

Да́ждь ми́ сло́во, Сло́ве Бо́жій, во отверзе́ніе у́стъ мои́хъ, и уясни́ ми язы́къ, Ми́лостиве, и не помина́й грѣхо́въ мои́хъ мно́жества, да, Твое́ю благода́тію наставля́емь, возмогу́ пѣ́ти преподо́бнаго Твоего́ Се́ргія.

Якоже во чре́вѣ ма́терни проглаше́ніемъ Тро́ицу проповѣ́далъ еси́, та́ко и Та́ просла́ви тя́: ка́ко на мно́га лѣ́та сокрове́ны земле́ю честны́я мо́щи твоя́ нетлѣ́нны обрѣто́шася, благоуха́нія вку́пѣ же и чуде́съ вѣ́рныхъ исполня́юще.

Богоро́диченъ: Пречи́стая Влады́чице, небе́сныхъ си́лъ превы́шшая, поро́ждшая Спа́са, всѣ́хъ Содѣ́теля, единосу́щна Отцу́ и Ду́ху, да́ждь на́мъ сло́во, Препѣ́тая, я́ко да возмо́жемъ пѣ́ти Тя́, су́щую Засту́пницу ро́да на́шего.

Катава́сія: Отве́рзу уста́ моя́...

Пѣ́снь 3.

Ирмо́съ: Да не хва́лится му́дръ, хваля́йся, но о се́мъ, е́же разумѣва́ти, я́ко нѣ́сть свя́тъ, я́ко Бо́гъ на́шъ, вознося́й ро́гъ на́шъ, дая́й крѣ́пость царе́мъ на́шимъ.

Креста́ Госпо́дня си́лою укрѣпля́яся, стра́сти душе́вныя и плотско́е мудрова́ніе ду́ху покори́лъ еси́, и сего́ ра́ди Ду́ху Пресвято́му прекра́сная оби́тель бы́въ и нераздѣ́льныя Тро́ицы избра́нно поко́ище.

Житіе́мъ твои́мъ, е́же въ мíрѣ се́мъ, о́бразъ бы́въ всѣ́мъ, отъ души́ Христу́ порабо́тившимся, чистото́ю же, я́ко со́лнце, просія́лъ еси́ и сего́ ра́ди стокра́тное возда́ніе отъ руку́ Вседержи́теля прія́лъ еси́, богому́дре Се́ргіе. Тѣ́мже тя́ ра́достно ублажа́емъ.

Пріиди́те, сни́демся въ настоя́щее ны́нѣ торжество́, у́зримъ, и ра́дости испо́лнимся, и Христа́ да просла́вимъ, та́ко прославля́юща Его́ прославля́ющихъ, и на́мъ стѣ́ну необори́му и чуде́съ пода́теля дарова́вшаго, богоблаже́ннаго Се́ргія.

Богоро́диченъ: Благодаре́ніе, вку́пѣ же и пѣ́ніе, Богома́ти, — ра́дуйся, — прино́симъ Ти́, я́ко родила́ еси́ пло́тію Бо́га Вседержи́теля, тве́рдую Предста́тельницу Тебе́ христіа́номъ дарова́вшаго.

Сѣда́ленъ, гла́съ 8:

Жите́йское мо́ре преплы́лъ еси́ мно́гимъ воздержа́ніемъ и приста́лъ еси́ въ ти́хое приста́нище, въ небе́сныя оби́тели, я́ко звѣзда́ свѣтоза́рна, сія́еши и, я́ко со́лнце незаходи́мое, мо́лніями чуде́съ твои́хъ вселе́нную всю́ просвѣща́еши и озаря́еши стада́ учени́къ твои́хъ, Благовѣ́рному же Импера́тору на́шему, и всѣ́мъ вѣ́рнымъ да́руеши грѣхо́въ проще́ніе, и житія́ исправле́ніе, и е́же на сопроти́вныя одолѣ́ніе, я́ко да, ра́достно обстоя́ще честну́ю и многоцѣле́бную ра́ку, любе́зно лобыза́емъ святы́я мо́щи твоя́ и, я́ко отцу́ чадолюби́ву, вопіе́мъ ти́: богому́дре и преблаже́нне о́тче Се́ргіе, моли́ Святу́ю Тро́ицу, Ейже въ житіи́ се́мъ порабо́талъ еси́, грѣхо́въ оставле́ніе дарова́ти чту́щимъ любо́вію обрѣ́теніе честны́хъ моще́й твои́хъ. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Отъ утро́бы ма́терни Бо́гу прилѣпи́лся еси́, блаже́нне о́тче Се́ргіе, и зача́ло му́дрости — стра́хъ Бо́жій въ се́рдцы твое́мъ имѣ́лъ еси́, ко́рень и основа́ніе всѣ́хъ благи́хъ, нищету́ духо́вную возлюби́въ. Сего́ ра́ди Влады́ка Христо́съ чудесы́ обогати́лъ тя́ е́сть.

Яко кри́нъ благово́нный, отъ земны́хъ нѣ́дръ изда́шася честны́я мо́щи твоя́, преблаже́нне Се́ргіе, и, я́ко сокро́вище, чуде́съ зарю́ испуща́ютъ, веселя́ще духо́вная ча́да твоя́.

Дне́сь ра́дуется Ца́рствующій гра́дъ Москва́, и весе́лія исполня́ется вся́ вселе́нная, честна́я же оби́тель твоя́, богоблаже́нне Се́ргіе, хва́лящися, украша́ется, имѣ́ющи въ себѣ́ честны́я мо́щи твоя́, я́ко сокро́вище неоску́дное и пречу́дное.

Богоро́диченъ: Дѣ́во Господоимени́тая и Цари́це всея́ тва́ри, мно́гими проро́ки пронарече́нная, ро́ждшая Царя́ небе́сныхъ си́лъ, да́ждь, Госпоже́, побѣ́ду на враги́ Вѣ́рному Твоему́ Слузѣ́, Благочести́вому Импера́тору на́шему и Ца́рствія небе́снаго всѣ́хъ на́съ сподо́би моли́твами Твои́ми.

Пѣ́снь 5.

Ирмо́съ: Ча́сть моя́ еси́, Го́споди, и сла́ва лица́ моего́: Ты́ бо мя́ изъ тмы́ невѣ́дѣнія еди́нъ изба́вилъ еси́ богоразу́міемъ. И Тебѣ́ молю́ся, Христе́: да́руй рабу́ Твоему́ ми́ръ, я́ко Человѣколю́бецъ.

Яже въ Тро́ицѣ Бо́га на́шего Свята́я Це́рковь и ди́вная впра́вду свѣ́тло красу́ется, Импера́торъ же Благочести́вый и всенаро́дное мно́жество духо́внѣ ра́дуется, зря́ще тя́, богому́дре Се́ргіе, рука́ма архіере́я Бо́жія че́стно взе́млема и на плещу́ свяще́нныхъ носи́ма.

Посѣще́нія ра́ди богома́тере ра́дости испо́лнився, свѣ́тъ бы́лъ еси́ ста́ду твоему́ и наста́вникъ но́вому Изра́илю, преводя́ на́съ, о́тче, отъ земли́ къ небе́снымъ оби́телемъ, идѣ́же ны́нѣ наслажда́ешися неизрече́нныя свѣ́тлости.

Ма́терня утро́ба освяти́ся честны́мъ зача́тіемъ твои́мъ, сла́вный же гра́дъ Росто́въ просвѣти́ся рождество́мъ твои́мъ, вели́кая же твоя́ и многосла́вная оби́тель просла́вися по́двиги твои́ми, вся́ же вселе́нная напо́лнися чуде́съ твои́хъ, преподо́бне о́тче Се́ргіе.

Богоро́диченъ: Ма́ти Бо́жія Пречи́стая, тве́рдая Засту́пнице на Тя́ надѣ́ющимся, покро́ве и стра́жъ гра́ду на́шему, и необори́мая стѣно́ святѣ́й оби́тели се́й, и ору́жіе спасе́нія Благовѣ́рному Импера́тору на́шему, спаси́ всѣ́хъ, благоче́стно покланя́ющихся свято́му о́бразу Твоему́.

Пѣ́снь 6.

Ирмо́съ: Да не погрузи́тъ мене́ бу́ря водна́я, ниже́ пожре́тъ мене́ глубина́, отве́рженъ бо е́смь во глубины́ се́рдца морска́го зо́лъ мои́хъ. Тѣ́мъ зову́, я́ко Іо́на: да взы́детъ отъ тли́ зо́лъ живо́тъ мо́й къ Тебѣ́, Бо́же.

Отъ млада́го во́зраста, о́тче Се́ргіе, Христа́ возлюби́въ и Сего́ живоно́снымъ стопа́мъ послѣ́дуя, мíра всего́ избѣ́глъ еси́ и дости́глъ еси́ въ незаходи́мый свѣ́тъ ра́зума, идѣ́же ны́нѣ дерзнове́нно Святѣ́й Тро́ицѣ предстои́ши, Юже о всѣ́хъ на́съ умоли́.

Удиви́шася во пло́ти житію́ твоему́ безпло́тніи чи́нове, и устраши́шася бѣсо́вская по́лчища отъ Бо́га да́нныя тебѣ́ на ни́хъ побѣ́ды; мы́ же прославля́емъ тя́, преподо́бне Се́ргіе, обстоя́ще ра́ку честны́хъ моще́й твои́хъ, и велича́емъ Христа́, чудесы́ тя́ просла́вльшаго.

Иже любо́вію и чи́стою вѣ́рою чту́щимъ честно́е и сла́вное обрѣ́теніе святы́хъ моще́й твои́хъ и пра́зднующимъ свѣ́тло свяще́нную па́мять твою́, о́тче преблаже́нне Се́ргіе, моли́твами твои́ми всѣ́мъ поле́зная испроси́.

Богоро́диченъ: Безъ сѣ́мене во чре́вѣ Твое́мъ заче́нши Творца́ всѣ́хъ и Спаси́теля, Богома́ти Влады́чице, и ро́ждши пло́тію Христа́ Бо́га, Его́же моли́твами Твои́ми ми́лостива на́мъ сотвори́, и да сподо́бимся вси́ явле́нія Его́ и Ца́рствія.

Конда́къ, гла́съ 8. Подо́бенъ: Взбра́нной.

Дне́сь, я́ко со́лнце пресвѣ́тло, возсія́вше отъ земли́, честны́я мо́щи твоя́ нетлѣ́нны обрѣто́шася, я́ко благоуха́нный цвѣ́тъ, мно́жествомъ чуде́съ сія́юще, и всѣ́мъ вѣ́рнымъ источа́юще разли́чная исцѣле́нія, и веселя́ще избра́нное твое́ ста́до, е́же му́дрѣ собра́въ, до́брѣ па́ствилъ еси́. О ни́хже и ны́нѣ Тро́ицѣ предстои́ши, моля́ся, и Импера́тору побѣди́тельная на враги́ дарова́ти, да вси́ вопіе́мъ ти́: ра́дуйся, Се́ргіе богому́дре.

Икосъ:

Су́щая въ мíрѣ преоби́дѣвъ, премíрная и нетлѣ́нная селе́нія, о́тче богому́дре, стяжа́лъ еси́ и, незави́стными дарми́ отъ Вседержи́тельныя десни́цы по числу́ добродѣ́телей обогати́вся и вѣнце́мъ по́чести, я́ко побѣди́тель, вѣнча́вся, чудесы́ всѣ́хъ обогаща́еши, пою́щихъ ти́ си́це: ра́дуйся, богоблаже́нне Се́ргіе; ра́дуйся, и́же пре́жде рожде́нія твоего́ трикра́ты проглаше́ніемъ просла́вивый Святу́ю Тро́ицу; ра́дуйся, я́ко отъ младе́нства твоего́ избра́нный сосу́дъ бы́въ Пресвято́му Ду́ху; ра́дуйся, мірску́ю красоту́ и сла́ву, я́ко уме́ты, вмѣни́лъ еси́; ра́дуйся, я́ко всели́выйся въ пусты́ню; ра́дуйся, я́ко гра́дъ, сію́ сотвори́лъ еси́; ра́дуйся, я́ко въ не́й хра́мъ прече́стенъ въ похвалу́ Святы́я Тро́ицы воздви́гнувый; ра́дуйся, я́ко сла́вну и превели́ку оби́тель въ сла́ву Бо́жію созда́лъ еси́; ра́дуйся, я́ко въ не́й мно́жества мона́шествующихъ собра́въ, Го́сподеви приве́лъ еси́; ра́дуйся, я́ко ми́лостиваго посѣще́нія Богома́тере сподо́бился еси́, То́й бо во пло́ти, я́ко а́нгелъ, послужи́въ; ра́дуйся, я́ко Го́сподеви мо́лишися о чту́щихъ обрѣ́теніе честны́хъ моще́й твои́хъ; ра́дуйся, Крестоно́сному Импера́тору на́шему ору́жіе спасе́нія и побѣди́тель на враги́, Его́же соблюда́й вы́ну здра́ва и ве́села, да вси́ твое́ обрѣ́теніе свѣ́тло пра́зднуемъ, ра́достно вопію́ще: ра́дуйся, Се́ргіе богому́дре.

Пѣ́снь 7.

Ирмо́съ: Не преда́ждь на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ, Го́споди Бо́же оте́цъ на́шихъ, препѣ́тый во вѣ́ки.

Бо́жіимъ хране́ніемъ соблюдено́ бы́сть честно́е тѣ́ло твое́, богому́дре Се́ргіе, мно́гими лѣ́ты земле́ю покрове́но, цѣ́ло и ничи́мже вреди́мо изы́де. Мы́ же, ча́да твоя́, сіе́ зря́ще, ра́достно вопіе́мъ: благослове́нъ Бо́гъ оте́цъ на́шихъ.

Весе́лія ри́зою облече́ся, ра́дости вѣнце́мъ вѣнча́ся честна́я глава́ твоя́, свѣ́тло вни́де въ небе́сный черто́гъ Царя́ Христа́, по́честь пріе́мля трудо́въ твои́хъ, поя́ Го́сподеви: благослове́нъ Бо́гъ оте́цъ на́шихъ.

Свѣ́тлымъ житіе́мъ твои́мъ сія́я, чу́дне Се́ргіе, въ жи́зни се́й, безпло́тныхъ чи́ны дости́глъ еси́, ны́нѣ же съ ни́ми лику́еши у престо́ла всѣ́хъ Бо́га, проси́ грѣхо́въ оставле́ніе дарова́ти соверша́ющимъ любо́вію па́мять обрѣ́тенія честны́хъ моще́й твои́хъ.

Богоро́диченъ: Простри́ моле́ніе, Пречи́стая Дѣ́во Влады́чице, къ ро́ждшемуся изъ Тебе́ Бо́гу на́шему, и Тобо́ю Ада́ма назда́вшему, и на́ше естество́ обнови́вшу, да вси́ вопіе́мъ Ти́: благослове́нъ, Пречи́стая, Пло́дъ чре́ва Твоего́.

Пѣ́снь 8.

Ирмо́съ: Вся́ческая, Влады́ко, прему́дростію Твое́ю соста́вилъ еси́, земли́ же па́ки утверди́лъ еси́, я́коже вѣ́си, дно́, основа́ніемъ водрузи́вый на вода́хъ безмѣ́рныхъ. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Весели́тся дне́сь Це́рковь Бо́жія, я́ко ца́рскою порфи́рою одѣва́ющися, честна́я же оби́тель твоя́, богоблаже́нне о́тче Се́ргіе, я́ко многоцѣ́нно сокро́вище, иму́щи честно́е тѣ́ло твое́, разли́чна исцѣле́нія подава́юще всѣ́мъ, вѣ́рно пою́щимъ: благослови́те, вся́ дѣла́ Госпо́дня, непреста́нно Го́спода.

Свѣ́томъ небе́снымъ просвѣща́ется хра́мъ Бо́жій, и въ не́мъ благочести́выхъ собо́ри ра́дуются, ви́дяще тя́, богоблаже́нне о́тче Се́ргіе, архіере́йскима рука́ма носи́ма и Христолюби́ваго Импера́тора устна́ма и душе́ю лобыза́ема, и отъ всѣ́хъ вѣ́рныхъ покланя́ема, Христу́ вопію́щихъ: благослови́те, вся́ дѣла́ Госпо́дня, непреста́нно Го́спода.

Съ небе́сными во́инствы ны́нѣ Тро́ицѣ предстоя́ и съ ли́ки всѣ́хъ святы́хъ водворя́яся, вѣ́рно почита́ющимъ па́мять твою́ грѣхо́въ проще́ніе испроси́, и свѣ́тло пра́зднующимъ обрѣ́теніе честны́хъ моще́й твои́хъ спасе́ніе на́мъ да́руй, да, ра́дующеся, пое́мъ: благослови́те, вся́ дѣла́ Госпо́дня, непреста́нно Го́спода.

Богоро́диченъ: Превѣ́чный во чре́вѣ Твое́мъ, Дѣ́во Чи́стая, зачина́ется и соверше́нный Бо́гъ, Иже изъ Тебе́, Неискусобра́чныя Отрокови́цы, Младе́нецъ пло́тію роди́вся, соверше́нъ Бо́гъ и Человѣ́къ человѣ́ки ви́дится, сопресто́ленъ сы́й Отцу́ и Ду́ху: Его́же превозно́симъ во вѣ́ки.

Пѣ́снь 9.

Ирмо́съ: Моисе́й на горѣ́ неопали́мую купину́ ви́дѣ, Іо́сифъ въ верте́пѣ неизрече́нное рождество́ слы́ша, нескве́рная Дѣ́во, безму́жная Ма́ти, пѣ́сньми Тя́, Богоро́дице, велича́емъ.

Взя́тся къ высотѣ́ небе́снѣй добродѣ́тельми, богому́дре о́тче Се́ргіе, и въ весе́ліи се́рдца предстои́ши престо́лу Святы́я Тро́ицы, не забу́ди ча́дъ твои́хъ, соверше́нно здра́віе и ди́вну побѣ́ду да́руй на враги́ Благочести́вому Импера́тору на́шему, да вси́ тя́ пѣ́сньми непреста́нно велича́емъ.

Пресла́вная па́мять твоя́, богоно́се, па́че лу́чъ со́лнечныхъ вѣ́рныя просвѣща́етъ, благоче́стно тя́ почита́ющія, и вѣ́рою и любо́вію покланя́ющіяся ра́цѣ честны́хъ моще́й твои́хъ, и въ пѣ́снехъ пою́щія тя́, богому́дре Се́ргіе.

Руко́ю мое́ю недосто́йною и любо́вію серде́чною приноси́мое тебѣ́ ма́лое моле́ніе пріими́, богоблаже́нне о́тче Се́ргіе, душа́мъ на́шимъ спасе́ніе, и тѣлесе́мъ здра́віе, и мíру ми́ръ моли́твами твои́ми да́руй, да тя́ мно́жае въ пѣ́снехъ велича́емъ.

Богоро́диченъ: О, Дѣ́во Влады́чице Всепѣ́тая, Ма́ти Христа́ Бо́га на́шего! Спаси́ вся́, на Тя́ надѣ́ющіяся, и къ Твоему́ заступле́нію притека́ющія, и благоче́стно Тя́, су́щую Богоро́дицу, въ пѣ́снехъ велича́ющія.

Свѣти́ленъ. Подо́бенъ: Жены́, услы́шите.

Дне́сь соше́дшеся, небе́сная со земны́ми ра́дуются, и вѣ́рныхъ совокупле́нія со свяще́нными, вку́пѣ же и мона́хи, весе́лія духо́внаго и даро́въ чуде́съ твои́хъ исполня́ются, преподо́бне Се́ргіе, въ твое́ обрѣ́теніе, сла́вяще Го́спода. [Два́жды.]

Сла́ва, и ны́нѣ, богоро́диченъ:

Прему́дрость Ѵпоста́сную, Сло́во Отчее Присносу́щное, врача́ человѣ́комъ — Христа́ ро́ждшая, Дѣ́во Пречи́стая, я́звы и стру́пы се́рдца моего́ исцѣли́, лю́тыя и многовре́менныя, и страстна́я взыгра́нія ути́ши пло́ти моея́.

На хвали́техъ стихи́ры на 4, гла́съ 4. Подо́бенъ: Яко до́бля.

Яко звѣзда́ многосвѣ́тлая* Христа́ со́лнца незаходи́маго,* заря́ми твои́хъ добродѣ́телей всѣ́хъ просвѣща́еши,* блиста́ніемъ чуде́съ вся́ концы́ озаря́еши,* богоблаже́нне и богому́дре о́тче Се́ргіе,* вѣ́рою чту́щихъ святу́ю па́мять твою́* и честно́е обрѣ́теніе моще́й твои́хъ* въ пѣ́снехъ свѣ́тло почита́ющихъ. [Два́жды.]

Яко свѣти́льникъ многосвѣ́тлый,* и боля́щимъ вра́чь преизря́дный,* и мона́шескій па́стырь доброразсу́дный показа́лся еси́,* Благочести́вому Импера́тору на́шему ору́жіе спасе́нія* и на враги́ побѣ́да,* и всея́ Россíйскія земли́ удобре́ніе,* и моле́бникъ вѣ́ренъ о всѣ́хъ,* вѣ́рою и́мя твое́, Се́ргіе, призыва́ющихъ* и любо́вію пра́зднующихъ* обрѣ́теніе честны́хъ моще́й твои́хъ.

Яко цвѣ́тъ благово́ненъ,* и кади́ло благоуха́нія,* и я́ко боже́ственная мѵрополо́жница,* за́пахъ масте́й твои́хъ* во вся́ страны́ испуща́еши* и мо́лніями чуде́съ твои́хъ лю́ди христоимени́тыя просвѣща́еши,* вѣ́рою соверша́ющія свяще́нную па́мять твою́,* преподо́бне и всеблаже́нне Се́ргіе.

Сла́ва, гла́съ 6:

Дне́сь, вѣ́рніи христоимени́тіи наро́ди, соше́дшеся, ра́дости испо́лнимся и, ли́къ соста́вльше, духо́внѣ пра́зднуемъ, во благонаро́читое торжество́ преподо́бнаго отца́, во псалмѣ́хъ и пѣ́ніихъ Христу́ вопію́ще: Ты́ прояви́лъ еси́, Влады́ко Христе́, послѣ́днему ро́ду на́шему такова́го чуде́съ дарова́теля, вели́каго засту́пника всея́ земли́ Россíйскія. Но, о преподо́бне и богому́дре о́тче Се́ргіе! Моли́ся прилѣ́жно Христу́ Бо́гу на́шему за всѣ́хъ, вѣ́рою и любо́вію тя́ почита́ющихъ.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 44 – 54.

/ Къ оглавленію раздѣла /


Наверхъ / Къ титульной страницѣ

0