Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 4-й де́нь.
Иже во святы́хъ отца́ на́шего Андре́я, архіепи́скопа Кри́тскаго Іерусалими́та, и преподо́бныя Ма́рѳы, ма́тере свята́го Симео́на Дивного́рца.

[ВЕЧЕРЪ,
На Го́споди воззва́хъ:] стихи́ры Андре́я три́, гла́съ 1. Подо́бенъ: Небе́сныхъ чино́въ.

Госпо́дню Ма́терь обрѣ́тъ,* вину́ вели́кихъ похва́лъ,* медото́чными словесы́ воспѣ́лъ еси́, Андре́е,* свяще́нныхъ апо́столъ* и му́ченикъ же блаже́нныхъ сосло́віе,* съ ни́ми же на́съ, чту́щихъ тя́, помина́й.

Правосла́вія тя́ сто́лпъ, о́тче, зна́емъ,* о́бразъ цѣлому́дрія,* и кро́тости начерта́ніе,* и боже́ственна пѣснопи́сца,* Христо́вы Це́ркви просвѣща́юща,* священнотаи́нниче Андре́е,* тѣ́мже твое́ пра́зднуемъ торжество́.

Ины стихи́ры Ма́рѳы три́, гла́съ 4. Подо́бенъ: Яко до́бля.

Къ болѣ́зненному воздержа́нію,* къ му́жескимъ боре́ніемъ,* проти́ву врага́ ополче́нію,* запе́ншаго естество́ человѣ́ковъ,* отлучи́лася еси́* поще́ніи и слеза́ми,* не пощадѣ́вши пло́ти* любве́ ра́ди боже́ственныя.* Тѣ́мже подъя́ла еси́ боже́ственныя по́двиги,* смири́вши ра́зумъ сопротивобо́рца,* Ма́рѳо честна́я и пресла́вная. [Два́жды.]

Возгнуша́лася еси́ вре́менныхъ,* и тлѣ́нныхъ любве́ отбѣ́гла еси́,* и жре́бій возжелѣ́ла еси́ небе́сный,* пра́веднымъ досто́йный, вѣ́чнующій,* нетлѣ́нный, чи́стая,* и жи́знь непреста́нную.* Тѣ́мже вѣ́рою твою́ свѣ́тлую и свѣтоно́сную соверша́юще па́мять,* пѣ́сньми боже́ственными почита́емъ,* Ма́рѳо сла́вная.

Сла́ва, гла́съ то́йже, самогла́сенъ:

Духо́вною благода́тію отъе́млеши неду́ги, отгоня́еши ду́хи лука́выя, и цѣли́ши стра́сти, Ма́рѳо всесла́вная, и просвѣща́еши вѣ́рныя блиста́ніи чуде́съ твои́хъ. Тѣ́мже дне́сь гла́сы немо́лчными воспѣва́емъ свѣ́тлую, и свѣтоно́сную, и досточу́дную па́мять твою́.

И ны́нѣ, богоро́диченъ или́ крестобогоро́диченъ:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

На стихо́внѣ окто́иха. Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Андре́е, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́лъ еси си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Юница Нескве́рная,* Юнца́ ви́дяши на дре́вѣ, пригвожда́ема во́лею,* рыда́ющи жа́лостнѣ, —* увы́ Мнѣ́, — вопія́ше, —* люби́мѣйшее Ча́до!* Что́ Ти со́нмъ воздаде́* безблагода́тный евре́йскій,* хотя́ Мя́ обезча́дствовати* отъ Тебе́, Вселюбе́зне?

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ Яже веще́й Истина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Андре́е, моли́ Христа́ Бо́га спасти́ся душа́мъ на́шимъ.

Другíй тропа́рь, гла́съ 8:

Въ тебѣ́, ма́ти, извѣ́стно спасе́ся, е́же по о́бразу: пріи́мши бо кре́стъ, послѣ́довала еси́ Христу́, и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Ма́рѳо, ду́хъ тво́й.


НА УТРЕНИ,
Кано́нъ, еди́нъ окто́иха и святы́хъ два́.

Кано́нъ свята́го Андре́я, его́же краегране́сіе: Пѣ́сньми воспле́щемъ му́жескими Андре́я. Гласъ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Со́нъ отъ вѣ́ждей оттря́съ, тебе́ сама́го Влады́цѣ добродѣ́телію угото́валъ еси́ свѣ́тло жили́ще, богоявле́нне преподо́бне, и Боже́ственное поко́ище.

Пѣ́ніемъ всесли́чнымъ твою́ цѣвни́цу движа́, Христо́ву Це́рковь, пѣсносло́вя, уясни́лъ еси́, Андре́е чу́дне, Свята́го Ду́ха оглаша́емь Боже́ственною благода́тію.

Зако́ну богопи́санному му́дрѣ повину́яся, тѣле́сныя стра́сти по́стнически умертви́лъ еси́, у́мъ же возвы́силъ еси́ крѣ́пкимъ твои́мъ жела́ніемъ, поя́ пѣ́сни Бо́жія, всему́дре.

Богоро́диченъ: Ве́сь жела́ніе и пречи́сто наслажде́ніе, Сы́нъ и Бо́гъ Тво́й благи́хъ исполне́ніе е́сть, Всенепоро́чная, Его́же моли́ изба́вити вѣ́рою ны́нѣ къ Тебѣ́ притека́ющія.

Кано́нъ преподо́бныя, гла́съ 8.
Пѣ́снь 1.

Ирмо́съ: Истря́сшему въ мо́ри мучи́тельство фарао́не и Изра́иля су́шею наста́вльшему, пои́мъ Христу́, я́ко просла́вися во вѣ́ки.

Боже́ственнымъ жела́ніемъ уя́звена вѣ́чныхъ бла́гъ, сла́ву тлѣ́нную и пи́щу преоби́дѣла еси́. Тѣ́мже и а́нгельское, преподо́бная, житіе́ пожила́ еси́ боже́ственнѣ.

Распала́ема боже́ственнымъ рве́ніемъ, богому́жно пожи́вши, родила́ еси́ свѣти́льника вѣ́рнымъ и забра́ло, втора́го Саму́ила, и пусты́ни кра́сное воспита́ніе.

Прозябе́ніе яви́ся воздержа́нія, возсія́вши на́мъ со́лнце многосвѣ́тлое, и вели́ка цѣле́бника, прему́драго Симео́на, и восто́чнѣй странѣ́ предста́теля же и стѣ́ну.

Богоро́диченъ: Земли́ исча́діе, Богоро́дице, сы́нове Бо́жіи благода́тію Боже́ственною и неизрече́ннымъ рождество́мъ Твои́мъ, пое́мъ Тя́ прилѣ́жно, еди́ну вино́вну су́щаго спасе́нія.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Упра́вилъ еси́ добродѣ́телію житіе́ твое́, преподо́бне, и, боже́ственнымъ жела́ніемъ Бо́гу соединя́яся, орга́нъ яви́лся еси́ слове́сенъ, всю́ вселе́нную уясня́я пѣ́сньми, Боже́ственная сокро́вища почерпа́я.

Прему́дрости небе́сныя бы́лъ еси́ испо́лненъ, душе́вная бо уста́ разшири́въ, преподо́бне, всю́ прія́лъ еси́ я́вѣ зарю́ свѣтоно́сную трисо́лнечныя свѣ́тлости, я́ко священнодѣ́йственникъ свяще́ненъ.

Утверди́въ душе́вныя си́лы твоя́, преподо́бне, и пло́ть удержа́въ воздержа́ніемъ, бы́лъ еси́ ве́сь пресвѣ́тлая звѣзда́, украша́я Це́рковь правосла́вными твои́ми уче́ніи и пѣ́сненными пѣ́ніи.

Богоро́диченъ: Изба́вити мя́ стра́стнаго плѣне́нія ны́нѣ молю́ Тя́, Ма́ти Бо́жія Всенепоро́чная, и грѣхо́вныя я́звы вся́ очи́стити, грѣ́хъ Взе́млющаго мíра пресла́вно ро́ждшая.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Пло́дъ прече́стенъ изъ утро́бы твоея́ Влады́цѣ прине́сши, же́ртву соверше́нну, сама́ же себе́ воздержа́нія огне́мъ принесла́ еси́, Ма́рѳо, пѣсносло́вящи Его́.

Же́ртву благопрія́тну и присноживо́тну Христу́ твоему́ принесла́ еси́, прозя́бшаго изъ ложе́снъ твои́хъ, богоно́сице преподо́бная, вѣ́рныхъ утвержде́ніе, и стѣ́ну, и забра́ло.

Къ высотѣ́ небе́снѣй впери́ла еси́ ду́шу съ тѣ́ломъ и была́ еси́ единожи́тельница му́дрымъ дѣ́вамъ и боже́ственное изображе́ніе вѣ́рою притека́ющимъ къ Бо́гу.

Богоро́диченъ: На ка́мени, Пречи́стая, упова́нія моего́ души́ моея́ восхо́ды поло́жь, недви́жимь при́сно пребыва́я, хвалю́ и сла́влю Тя́, еди́ну Засту́пницу мою́.

Конда́къ Ма́рѳы, гла́съ 2. Подо́бенъ: Въ моли́твахъ.

Въ моли́твахъ Го́сподеви предстоя́щи, Пречи́стѣй Дѣ́вѣ Богоро́дицѣ пѣ́ніе и хвалы́ принося́щи, Ма́рѳо честна́я, породила́ еси́ свяще́нное отроча́, Симео́на преди́внаго, свѣти́льника всемíрнаго, съ ни́мже моли́ при́сно о всѣ́хъ на́съ.

Та́же сѣда́ленъ Андре́я, гла́съ 4. Подо́бенъ: Ско́ро предвари́.

Яко ка́меніемъ, словесы́ твои́ми церко́вный, прему́дре, украси́въ вѣне́цъ, священнодѣ́йственникъ свяще́ненъ, Андре́е, бы́лъ еси́. Тѣ́мже по мно́гихъ въ житіи́ трудѣ́хъ прія́лъ еси́ нестарѣ́емое Ца́рство и сла́ву, въ не́мже помина́ющихъ тя́, о́тче, помина́й.

Сла́ва, сѣда́ленъ Ма́рѳы, гла́съ то́йже:

Непреста́нно въ моли́твахъ бдя́щи и ми́лостынею Бо́гу угожда́ющи, въ Боже́ственныя хра́мы, прехва́льная, ча́сто ходя́щи, Ма́рѳо, слеза́ми, и посто́мъ, и вѣ́рою моля́щися, прія́ла еси́ свяще́нно отроча́, съ ни́мже моли́ся спасти́ся отъ бѣ́дъ на́мъ, любо́вію чту́щимъ тя́.

И нынѣ, богородиченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, и́же вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Сло́во Твое́, житіе́мъ укра́шено, богосло́вія извѣ́стное пра́вило показа́лся еси́, чу́дне, Препѣ́тыя Тро́ицы сла́ву сказу́я я́сно.

Дѣя́ніемъ видѣ́нія восхо́дъ показа́въ, му́дре, и видѣ́ніемъ объе́мся, житія́ о́бразомъ, Андре́е богогла́се, уподо́бился еси́.

Яко боже́ственъ святи́тель, пребога́те, па́стырски побора́я, отъ Це́ркве отгна́лъ еси́ льво́въ наше́ствія, Андре́е, му́жеству тезоимени́те.

Вели́ку похвала́мъ вину́, Богоро́дицу обрѣ́тъ, тща́ніе показа́лъ еси́ сугу́бо, превы́шшую похва́лъ хвала́ми многообра́зными почита́я, му́дре.

Богоро́диченъ: Кромѣ́ у́бо совокупле́нія зачала́ еси́ нетлѣ́нно во утро́бѣ, и пре́жде болѣ́зни родила́ еси́, и по рождествѣ́ Дѣ́вою, Бо́га пло́тію ро́ждши, сохрани́лася еси́.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Иму́щи Христа́ при́сно во умѣ́, любве́ тлѣ́нныхъ и жела́нія возгнуша́лася еси́ и сего́ ра́ди дарова́нія сподо́билася еси́, Ма́рѳо, Того́ просла́вльши.

Попали́вши страсте́й, Ма́рѳо, треволне́ніе, угаси́ла еси́ звѣре́й ди́віихъ наше́ствія, мы́сленнаго же Амали́ка многоплете́нныя сѣ́ти посрами́ла еси́.

Была́ еси́ вѣ́рныхъ предгра́діе и стѣна́, чи́стою любо́вію тя́ чту́щимъ и святу́ю твою́ па́мять творя́щимъ, богоблаже́нная, вѣ́рныхъ помо́щнице.

Богоро́диченъ: Яви́лася еси́ мы́сленный о́блакъ, Богоро́дице, нося́щи Самаго́ Со́лнца сла́вы съ пло́тію, озаря́ющаго всю́ тва́рь свѣ́томъ Боже́ственныя благода́ти.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Ны́нѣ крася́щіися твои́ми уче́ніи и пѣ́сньми богодохнове́нными свяще́нно наслажда́ющеся, Андре́е всеблаже́нне, па́мять твою́ почита́емъ.

Заре́ю просвѣща́емь я́вѣ духо́вною, святы́хъ ликостоя́нія пресвя́то похвали́лъ еси́, съ ни́миже ны́нѣ ра́дуешися, Андре́е всеблаже́нне.

Ны́нѣ не чу́вствы тлѣ́ннаго тѣ́ла, ни мечта́ньми зри́ши Боже́ственная, у́мно же, прему́дре, душе́вными дѣ́йствы соединя́яся лу́чшимъ.

Богоро́диченъ: Со слеза́ми припа́даю Ти́, зѣло́ моля́ся, мои́хъ согрѣше́ній ны́нѣ изба́витися Тобо́ю, Всенепоро́чная, и вѣ́чныя ра́дости сподо́битися.

Инъ.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

На не́бо зря́щи твое́ прозябе́ніе, столпо́мъ вознесе́на, сего́ боже́ственными дѣя́ніи, Ма́рѳо, Вы́шняго воспѣва́ла еси́ Христа́.

Съ небесе́ отвѣ́тъ, богоблаже́нная Ма́рѳо, прія́тъ я́вѣ и зачала́ еси́ отъ Боже́ственнаго открове́нія вели́каго служи́теля.

Твое́ прозябе́ніе, преподо́бная, Антіохíйскій у́бо гра́дъ предлага́етъ те́пла предста́теля, и стѣ́ну, и прибѣ́жище су́щимъ въ ско́рбехъ.

Богоро́диченъ: Же́злъ си́лы Тя́ надѣ́ющіися на Тя́, Богоневѣ́сто, иму́ще, побѣжда́емъ супоста́тныя полки́.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Витíи обличи́лъ еси́ безбо́жныя усты́ свѣ́тлыми, честны́хъ бо ико́нъ уясни́лъ еси́ вои́стинну, священнотаи́нниче, поклоне́ніе.

Свяще́нно украси́лъ еси́ твою́, о́тче сла́вне, жи́знь: стра́стное бо смуще́ніе угаси́лъ еси́ и къ жи́зни безстра́стія прите́клъ еси́.

Добро́тами слове́съ твои́хъ и уче́ніи вси́ вѣ́рніи благоче́стно наслажда́ющеся, ра́дуются, ерети́къ языкобо́лія побѣжда́юще.

Богоро́диченъ: Ве́сь примѣша́ется ми́, Иже безнача́льно возсія́въ отъ Отца́, воплоще́ніемъ, Пренепоро́чная, изъ Тебе́ бы́вшимъ, Богоневѣ́сто.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Вся́ческихъ Цари́цу отъ души́ вожделѣ́вши, украси́лася еси́ сама́ чистото́ю и дарова́нія Ея́ ра́ди, Ма́рѳо, улучи́ла еси́.

Ста́рѣй му́дрости твое́й, честна́я, удиви́шася а́нгели, и человѣ́цы пою́тъ вся́ческихъ Творца́, тя́ просла́вльшаго.

Яко дре́во благора́слено же и красно́, себе́ украси́ла еси́ и зерца́ло была́ еси́ нескве́рно явле́ніемъ Свята́го Ду́ха.

Богоро́диченъ: Тишину́ Тя́ въ бу́ри страсте́й и скорбе́й, Влады́чице, при́сно предзря́, во приста́нище спасе́нія притека́ю.

Конда́къ, гла́съ 2. Подо́бенъ: Вы́шнихъ ища́.

Воструби́въ я́сно боже́ственная сладкопѣ́нія, яви́лся еси́ свѣти́льникъ мíра свѣтлѣ́йшій, свѣ́томъ сія́я Тро́ицы, Андре́е преподо́бне. Тѣ́мже вси́ вопіе́мъ ти́: не преста́й моля́ся о всѣ́хъ на́съ.

Икосъ:

Восхвали́ти твое́, о́тче, житіе́, окая́нный, хощу́, вѣ́дый ны́нѣ, исправле́ній твои́хъ ра́ди, ищу́ отту́ду, я́коже дарова́нія, похвалы́ прія́ти твои́хъ украше́ній и честно́му верху́ твоему́, Андре́е, исплести́, е́же а́нгели почита́ютъ, зовы́й: моля́ не преста́й о всѣ́хъ на́съ.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Да свѣ́тлость святы́хъ, преподо́бне, у́зриши, свѣ́тлостію дѣ́лъ просвѣти́лъ еси́ житіе́ твое́, зовы́й: Бо́же, благослове́нъ еси́.

Тѣ́ломъ обложе́нъ, безпло́тныхъ чино́мъ поревнова́лъ еси́, преподо́бне, съ ни́миже согла́сно, ра́дуяся, взыва́еши: Бо́же, благослове́нъ еси́.

Іерусали́мъ ны́нѣ свѣ́тло весели́тся, свѣти́льника многосвѣ́тла мíру тя́ возсія́въ, блаже́нне, поя́: Бо́же, благослове́нъ еси́.

Богоро́диченъ: Иже пре́жде у́бо Безпло́тный воплоща́ется, Пречи́стая, за милосе́рдіе безчи́сленное изъ ложе́снъ Твои́хъ святы́хъ. Ему́же вси́ пое́мъ: Бо́же, благослове́нъ еси́.

Инъ.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Страстну́ю совле́кши ри́зу, въ безстра́стную оде́жду одѣ́ялася еси́, и Жениху́ чи́сто, преподо́бная, обручи́лася Христу́, и угоди́ла еси́.

Сто́лпъ о́гненъ твое́ прозябе́ніе яви́ся, Ма́рѳо честна́я, просвѣща́ющъ, мíръ и я́же въ мíрѣ очища́я отъ неразу́мія те́мнаго и вся́каго ина́го гнѣ́ва.

Плотска́я погаси́ла еси́ возноше́нія, и мы́сленныхъ вра́гъ кова́рствія возгнуша́лася еси́, преподо́бная Ма́рѳо, и си́хъ сплете́нія на зе́млю низве́ргла еси́.

Богоро́диченъ: Ви́дѣти на́мъ сла́ву Сы́на Твоего́ и чи́стѣ ея́ наслади́тися, Тя́ жела́ющимъ и воспѣва́ющимъ, моли́ся прилѣ́жно, Богоблагода́тная.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Но́ваго киво́та Це́рковь, о́тче, я́сно обвесели́лъ еси́, ли́ки соста́вль, взыва́я: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пѣ́ніе но́вое въ Це́ркви, блаже́нне, преподо́бно взыва́лъ еси́ Вседержи́телю: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Дая́ добродѣ́телію боголѣ́пно дѣла́, страда́нія воспѣ́лъ еси́, Андре́е прему́дре, всѣ́хъ святы́хъ, дре́вле удивле́нныхъ и соверше́нныхъ Христу́ во вѣ́ки.

Богоро́диченъ: Пріиди́те, Чи́стую Богоотрокови́цу воспое́мъ, глаго́люще, боже́ственными пѣ́сньми: ра́дуйся, Дѣ́во, Ея́же ра́ди ра́дость даде́ся естеству́ человѣ́ческому, Преблагослове́нная.

Инъ.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Нището́ю вре́менныхъ стяжа́ла еси́ бога́тство, Ма́рѳо, вѣ́чное и сла́ву. И сего́ ра́ди любо́вію взыва́ла еси́: Го́спода по́йте и превозноси́те Его́ во вѣ́ки.

Вѣ́дый Бо́гъ твое́ се́рдце и жела́ніе, его́же родила́ еси́ отъ младе́нства, преподо́бная Ма́рѳо, вѣ́рою серде́чною вѣнча́ боже́ственнѣ вѣ́рою вопію́ща Ему́ во вѣ́ки вся́.

Свѣ́тлый твоего́ пра́здника де́нь озаря́етъ вѣ́рныхъ мы́сли и просвѣща́етъ всю́ зе́млю, я́коже денни́ца, да́же до коне́цъ земли́ всесія́я.

Богоро́диченъ: Иже естество́ на́ше созда́вый, изъ Тебе́ сіе́ обле́къ, Богоро́дице, вообража́етъ и обновля́етъ я́ко Человѣколю́бецъ Тя́ пѣсносло́вящія и славосло́вящія вои́стинну Богоро́дицу.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Глаго́лъ твои́хъ вѣща́ніе всю́ обтече́ зе́млю, уче́ній же красота́ и свѣ́тлость, Андре́е блаже́нне, тѣ́мже Христо́съ, Иже всѣ́хъ Ца́рь, тя́ вѣнча́лъ е́сть благолѣ́пія вѣнце́мъ.

Соедине́ніемъ лу́чшимъ наслажда́яся зари́ трисія́нныя, Андре́е, таи́нниче пачеесте́ственныхъ, любо́вію творя́щихъ твою́ святу́ю па́мять свяще́нно, ны́нѣ моли́твами твои́ми отъ бѣ́дъ сохрани́.

Со безпло́тными чи́нми весели́шися ны́нѣ на небесѣ́хъ: си́хъ бо на земли́ житіе́ неукло́нно я́ко пожи́въ и пра́выя вѣ́ры я́влься проповѣ́дникъ изря́денъ, богоглаго́ливе досточу́дне.

Богоро́диченъ: Приноси́мое уста́вила еси́ сме́рти неуста́вное стремле́ніе, ро́ждши пло́тски, вои́стинну па́че ума́, Жи́знь вѣ́чную, Ейже прирази́вся усты́, го́рькій а́дъ упраздни́ся, Пресвята́я Дѣ́во Ма́ти.

Инъ.

Ирмо́съ: Велича́емъ Тя́, Ма́терь Бо́жію, и сла́вимъ Тя́, Богоро́дице Дѣ́во, я́ко Спа́са ро́ждшую ду́шъ на́шихъ.

Единообра́зно, Ма́рѳо, лику́ющи съ сы́номъ, моли́ Христа́ Бо́га на́шего о почита́ющихъ тя́.

Благоче́стно пожи́вши, въ трудѣ́ му́жески подвиза́лася еси́ отъ него́же сокры́ла еси́ бога́тство небе́сное.

Облобыза́емъ твои́хъ моще́й ра́ку, Ма́рѳо всечестна́я, изъ нея́же почерпа́емъ исцѣле́ній во́ды.

Богоро́диченъ: Па́че со́лнечныхъ лу́чъ моли́тва Твоя́ возсія́вши, просвѣща́етъ, Пречи́стая, Тя́ велича́ющія.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, преподо́бне, тѣ́мже покори́лъ еси́ стра́сти плотскíя му́жески, равноа́нгеленъ бы́въ, богоно́се о́тче.

Богоро́диченъ:

Тя́ Предста́тельницу и́мамы, вси́ грѣ́шніи, о Пресвята́я Дѣ́во! Ты́ благопремѣ́нна сотвори́ Твоего́ Сы́на ма́терними Твои́ми моли́твами.

На стихо́внѣ окто́иха. Сла́ва, гла́съ 6:

Преподо́бне о́тче Андре́е, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Зача́тіе Твое́ безсѣ́менное и рождество́ неизрече́нное помышля́ющи, удивля́юся зѣло́: ка́ко си́це, я́коже злодѣ́й, благоволи́лъ еси́ умре́ти, Сы́не? — Пречи́стая, пла́чущи, взыва́ше.


НА ЛИТУРГІИ,

Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ ко Евре́емъ, зача́ло 318 отъ полу́. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе отъ Матѳе́я, зача́ло 21. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 27 – 33.

/ Къ оглавленію раздѣла /


Наверхъ / Къ титульной страницѣ

0