Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія во 2-й де́нь.
Слу́жба Пресвятѣ́й Влады́чицѣ на́шей Богоро́дицѣ, въ де́нь явле́нія чудотво́рныя ико́ны Ея́ Ахты́рскія.

[НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 1:

О явле́ніи свѣтоно́сныя ико́ны Твоея́* страна́ на́ша зѣло́ возра́довася,* Це́рковь же Россíйская духо́вно обогати́ся,* сію́ стяжа́вши, я́ко да́ръ многоцѣ́ненъ* Твоего́ къ человѣ́комъ благоволе́нія,* Богоро́дице Дѣ́во, христіа́номъ блага́я Помо́щнице* и скорбя́щимъ ско́рая Утѣ́шительнице,* си́це вопію́щимъ Тебѣ́:* Благода́тная, ра́дуйся, съ Тобо́ю Госпо́дь,* подая́й Тобо́ю на́мъ ве́лію ми́лость. [Два́жды.]

Се́ де́нь весе́лія и пра́здникъ че́стенъ наста́* явле́нія чудотво́рныя ико́ны Твоея́, Богоро́дице Дѣ́во,* я́же неду́жнымъ исто́чникъ приснотеку́щій показа́ся,* да́ры исцѣле́нія неоску́дно источа́яй,* тѣ́мже, вѣ́рніи, духо́внѣ возвесели́мся* и пѣ́сненно возопіи́мъ:* Благода́тная, ра́дуйся, съ Тобо́ю Госпо́дь,* подая́й Тобо́ю на́мъ ве́лію ми́лость. [Два́жды.]

Гла́съ 5: Пресла́вное явле́ніе о́браза Твоего́, Влады́чице,* и мно́гая чудеса́, отъ него́ быва́емая,* удивля́ютъ земноро́дныхъ:* ка́ко іере́ю благоговѣ́йну,* въ бы́ліи травно́мъ ико́на Твоя́ свята́я* лучеза́рно сія́ющи,* явле́на бы́сть благоволе́ніемъ всѣ́хъ Творца́,* Его́же моли́, Чи́стая,* въ пресла́вномъ торжествѣ́ Твое́мъ* дарова́ти на́мъ просвѣще́ніе благода́тное и ве́лію ми́лость. [Два́жды.]

Сла́ва, и ны́нѣ, гла́съ 6:

Пріиди́те, вси́ концы́ земли́, честно́му о́бразу Бо́жія Ма́тере поклони́мся: Та́ бо, у Креста́ Христо́ва предстоя́щи и Пострада́вшему на́съ ра́ди ско́рбію ма́тернею состра́ждущи, всыновле́ніемъ Ей возлю́бленнаго ученика́ ве́сь ро́дъ христіа́нскій въ ма́тернее попече́ніе воспрія́, да хода́тайствуетъ предъ возлю́бленнымъ Сы́номъ и Бо́гомъ за лю́ди, Того́ честно́ю Кро́вію иску́пленныя. Тѣ́мже къ Не́й возопіи́мъ: о Госпоже́ Всеми́лостивая, умоли́ Сы́на Твоего́, да спасе́тъ на́съ отъ бѣ́дъ, Тво́й пра́здникъ всечестны́й свѣ́тло пра́зднующихъ.

[Вхо́дъ. Проки́менъ дне́.] Чте́нія Богоро́дичны три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 6:

Го́споди Человѣколю́бче, естество́ человѣ́ческое хотя́й взыска́ти и ко Отцу́ Твоему́ привести́, я́ко Па́стырь до́брый, ду́шу Твою́ на Крестѣ́ за о́вцы Твоя́ положи́лъ еси́ и Ма́терь Твою́, Всенепоро́чную Дѣ́ву, въ Ма́терь на́мъ и Всемо́щную Хода́таицу дарова́лъ еси́, Тоя́ моли́твами, Го́споди, посѣти́ лю́ди Твоя́ и о́вцы па́жити Твоея́ не преда́ждь волко́мъ всегуби́тельнымъ, но спаси́, Всеми́лостиве, достоя́ніе Твое́.

Небе́сная Цари́це и всеми́лостивая Влады́чице, Наде́ждо человѣ́комъ и Заступле́ніе, егда́ у Креста́ Сы́на Твоего́ предстоя́ла еси́, ору́жіе ско́рби, Симео́номъ предрече́нное, про́йде святу́ю Твою́ ду́шу, но Того́ воскресе́ніемъ утѣше́ніе пріи́мши вѣ́чное, на́ша печа́ли дне́сь утоли́, и болѣ́зни исцѣли́, и любо́вію пою́щія Тя́ не пре́зри, но посѣти́, и отъ скорбе́й изба́ви, и не оста́ви до конца́ поги́бнути рабо́мъ Твои́мъ.

Сла́ва, и ны́нѣ, гла́съ 8:

Тя́ мо́лимъ, Предста́тельницу на́шу, Богороди́тельнице Марíе, и къ Тебѣ́ припа́даемъ въ ско́рбехъ и печа́лехъ: яви́ на́мъ многомо́щное Твое́ заступле́ніе и ускори́ изъя́ти отъ облежа́щихъ на́съ бѣ́дъ, мно́го бо мо́жетъ моли́тва Твоя́ ма́терняя ко благосе́рдію Влады́ки. Сего́ ра́ди зове́мъ Тебѣ́ гла́сы немо́лчными: ра́дуйся, Ра́досте на́ша и спасе́ніе ду́шъ на́шихъ.

На стихо́внѣ стихи́ры, гла́съ 2:

Пресвята́я Ма́ти Бо́жія,* ка́ко Тя́ возблагодари́мъ досто́йно,* я́ко пресла́вно ико́ну Твою́ святу́ю* въ покро́въ и утѣше́ніе вѣ́рнымъ яви́ла еси́* и тоя́ свѣтоза́рнымъ явле́ніемъ въ сердца́хъ на́шихъ* вѣ́ру Правосла́вную утверди́ла еси́.

Сти́хъ: Слы́ши, Дщи́, и ви́ждь,* и приклони́ у́хо Твое́.

Влады́чице Преблага́я,* не забу́ди на́съ, смире́нныхъ,* вѣ́рою покланя́ющихся Твое́й чудотво́рнѣй ико́нѣ,* и распя́тіе Твоего́ Сы́на и Бо́га на́шего на не́й созерца́ющихъ,* и о Твое́мъ при Крестѣ́ ско́рбномъ предстоя́ніи умиля́ющихся.* Но и на́съ, Госпоже́, скорбе́й вре́менныхъ и вѣ́чныхъ изба́ви,* моли́твы къ Ро́ждшемуся изъ Тебе́ о на́съ принося́щи.

Сти́хъ: Помяну́ и́мя Твое́* во вся́комъ ро́дѣ и ро́дѣ.

О, Всепѣ́тая Ма́ти и Дѣ́во,* приклони́ся ми́лостивно къ моли́твамъ на́шимъ,* дне́сь предъ пречи́стымъ о́бразомъ Твои́мъ смире́нно приноси́мымъ,* покры́й на́съ ма́тернимъ Твои́мъ покро́вомъ отъ вся́каго зла́* и защити́ отъ стрѣ́лъ вра́жіихъ,* да вси́ непреста́нно Тя́ велича́емъ.

Сла́ва, и ны́нѣ, гла́съ то́йже:

Ны́нѣ наста́ де́нь ра́достенъ честна́го торжества́ Засту́пницы на́шея, де́нь, я́же ико́ну Свою́ святу́ю въ покро́въ и утѣше́ніе на́мъ явля́етъ. Сію́ у́бо любо́вію серде́чною цѣлу́юще, ко изображе́ннѣй на не́й Приснодѣ́вѣ си́це рце́мъ: о Всеблага́я Влады́чице, сотвори́ ны досто́йны бы́ти такова́го да́ра ми́лости Твоея́ и чту́щихъ Тя́ всегда́ спаса́й отъ вся́кихъ бѣ́дъ.

Тропа́рь, гла́съ 4:

Преблагослове́нная Дѣ́во, Богороди́тельнице Чи́стая, у Креста́ Сы́на Твоего́ и Бо́га на́шего предстоя́щи, ско́рбь ве́лію претерпѣ́ла еси́ и благода́ть отъ Него́ прія́ла еси́ су́щія въ ско́рбехъ утѣша́ти. Тѣ́мже на пречи́стый о́бразъ Тво́й благоговѣ́йно взира́юще и изображе́нную Тя́ на не́мъ предъ Кресто́мъ Спа́са на́шего ви́дяще, умиле́нно къ Тебѣ́ вопіе́мъ: Засту́пнице усе́рдная, блага́я и ми́лостивая! Ускори́ изба́вити ны́ отъ вся́кія ско́рби, ну́жды и болѣ́зни и спаси́ ду́ши на́ша, да Тя́ со благодаре́ніемъ сла́вимъ во вѣ́ки. [Три́жды.]


НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, то́йже.

По 1-мъ стихосло́віи сѣда́ленъ, гла́съ 4:

Боже́ственнымъ сія́ніемъ пречи́стый о́бразъ Тво́й, Влады́чице, Госпо́дь озари́ и многоцѣле́бное сокро́вище благода́ти Своея́ се́й содѣ́ла: слѣпы́я просвѣща́ти, разсла́бленныя укрѣпля́ти и вся́къ неду́гъ исцѣля́ти, да та́ко о́бразъ Тво́й святы́й прославля́я, научи́тъ на́съ Тя́, су́щую Богоро́дицу, сла́вити, я́ко ско́рую Помо́щницу и Утѣ́шительницу въ ско́рбехъ на́шихъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 6:

Яко звѣзда́ многосвѣ́тлая, ико́на Твоя́, Богоро́дице Дѣ́во, въ бы́ліи травно́мъ заре́ю Боже́ственною возсія́вши, іере́емъ Даніи́ломъ обрѣ́тена бы́сть, ю́же на ру́цѣ прія́тъ свои́ и съ вѣ́рою благоговѣ́йною вопія́ше Ти́: о Пресвята́я Богоро́дице Дѣ́во, въ житіи́ мое́мъ и въ ча́съ кончи́ны живота́ моего́ не оста́ви мене́.

Сла́ва, и ны́нѣ, то́йже.

По поліеле́и сѣда́ленъ, гла́съ 8:

Въ Ма́лѣй Россíи, въ ма́лѣмъ и незна́емомъ гра́дѣ, вели́кая и пресла́вная чудеса́ явле́ніемъ чудотво́рнаго о́браза Твоего́ показа́ла еси́, Влады́чице, тѣ́мже Твои́ми ми́лостями, Госпоже́, хва́лимся и Твоя́ чудеса́ велегла́сно проповѣ́дуемъ, я́ко Ты́ еси́ прибѣ́жище на́ше и къ Бо́гу Всеми́лостивая о на́съ Хода́таица.

Сла́ва, и ны́нѣ, то́йже.

[Степе́нна, 1-й антифо́нъ 4-го гла́са. Проки́менъ: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, глаго́лю а́зъ дѣла́ моя́ Царе́ви. Вся́кое дыха́ніе... Ева́нгеліе Луки́, зача́ло 4.]

По 50-мъ псалмѣ́ стихи́ра, гла́съ 6:

Пріиди́те, вѣ́рніи, просла́вимъ чу́дное явле́ніе ико́ны Бо́жія Ма́тере, пресвѣ́тлымъ бо сія́ніемъ въ травно́мъ зла́цѣ возсія́вши, я́ко лу́чь свѣтоза́рный, гра́дъ и страну́ сію́ просвѣти́ и вся́ вѣ́рная ча́да Правосла́вныя Це́ркве на́шея духо́вно возвесели́, при́сно пою́щая Богома́тери пѣ́снь ра́достную: ра́дуйся, Обра́дованная, Госпо́дь съ Тобо́ю.

[Кано́нъ похвалѣ́ Богоро́дицы со ирмосо́мъ на 6 и пра́здника, гла́съ 4, на 8.]

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да́ждь на́мъ сло́во, Сло́ве Бо́жій, Іису́се Всеблагíй, воспѣ́ти ра́достное явле́ніе ико́ны ро́ждшія Тя́ Богоневѣ́сты и пресла́вная Тоя́ чудеса́, въ ни́хже си́ла Твоя́ Боже́ственная сла́вно просла́вися.

О, преди́внаго Твоего́ чудесе́, Влады́чице, и мно́гаго милосе́рдія къ лю́демъ: се́ бо ико́ну Твою́ честну́ю въ бы́ліи травно́мъ солнцеподо́бнымъ сія́ніемъ іере́ю благоговѣ́йну явля́еши дне́сь и исцѣле́ній мно́жество отъ Нея́ источа́еши неду́жнымъ, я́ко Всеми́лостивая.

Ты́, о Богома́ти, ро́ждшая Претерпѣ́вшаго на́съ ра́ди на дре́вѣ Кре́стнѣмъ распя́тіе, умоли́ Его́ бла́гость, е́же страда́ніе Его́ всегда́ памятова́ти, во́лю же Его́ Боже́ственную твори́ти и бла́гъ небе́сныхъ наслѣ́дники бы́ти.

Влады́чице Всеблага́я, умоли́ Сладча́йшаго Сы́на Твоего́ и Го́спода, рукописа́ніе грѣ́хъ на́шихъ на Крестѣ́ пригвозди́вшаго, да сподо́битъ на́съ досто́йно одесну́ю Его́ ста́ти и гла́съ благíй Его́ слы́шати, егда́ пріи́детъ во сла́вѣ Свое́й.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Во о́бразѣ невѣ́сты яви́лася еси́ во снѣ́, Богоро́дице, обрѣ́тшему ико́ну Твою́ іере́ю Даніи́лу, лице́ Твое́ на ико́нѣ омы́ти водо́ю повелѣва́ющи, и сія́, я́ко врачевство́ богода́нное, во исцѣле́ніе неду́жнымъ яви́ся.

Въ ско́рбехъ мно́гихъ и гоне́ніихъ сконча́ти жи́знь вре́менную обрѣ́тшему ико́ну Твою́ іере́ю суди́ла еси́: да, я́ко зла́то, въ горни́лѣ скорбе́й очи́стився, досто́инъ яви́тся блаже́ннаго въ вѣ́чности упокое́нія.

Омраче́нныхъ на́съ грѣха́ми мно́гими, о Ма́ти Бо́жія, просвѣти́ и на стезю́ спаси́тельную покая́нія напра́ви, отве́рзи о́чи на́ша душе́вная, я́коже о́чи тѣле́сныя слѣпо́й женѣ́ и слѣпо́му о́троку предъ ико́ною Твое́ю отве́рзла еси́, да у́зримъ свѣ́тъ спасе́нія и и́мя Твое́ просла́вимъ свято́е во вѣ́ки.

Страсте́й нечи́стыхъ бѣснова́ніе обурева́етъ на́съ, Госпоже́ Всеми́лостивая, и ины́я Помо́щницы, ра́звѣ Тебе́, Всеблага́я, не и́мамы, отъ сего́ душегуби́тельнаго бѣснова́нія изба́ви на́съ, я́коже мно́гія бѣсну́емыя отъ наси́лія вра́жія предъ ико́ною Твое́ю свободи́ла еси́, я́ко Всеси́льная.

Сѣда́ленъ, гла́съ 4:

Яко вои́стинну боже́ственное украше́ніе Це́ркви и зало́гъ ми́лости Твоея́ къ христоимени́тымъ лю́демъ ико́на Твоя́, Богоро́дице Дѣ́во, показа́ся: вся́къ бо, съ вѣ́рою къ не́й приходя́й, въ неду́зѣхъ исцѣле́ніе, въ ско́рбехъ утѣше́ніе, въ бѣда́хъ вспоможе́ніе отъ Тебе́ ско́ро пріе́млетъ, Всеми́лостива бо су́щи, ми́лости Твоея́ исто́чникъ въ чудотво́рнѣмъ о́бразѣ Твое́мъ на́мъ здѣ́ явля́еши, да сла́вимъ и́мя Твое́ преблагослове́нное во вѣ́ки.

Сла́ва, и ны́нѣ, то́йже.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Еди́наго возлюби́ти Христа́ сподо́би на́съ, Влады́чице, и Ему́ при́сно угожда́ти Сама́ научи́ на́съ, Всеблага́я, я́коже боля́щую Евфи́мію, во снѣ́ то́й я́вльшися, ко хра́му Твоему́ пріити́ наста́вила еси́ и въ не́мъ исцѣле́ніе неду́гомъ проси́ти.

Житіе́ непоро́чное на земли́ соверши́ти помози́ на́мъ, Преблагослове́нная Дѣ́во, и отъ разслабле́нія грѣхо́внаго руко́ю Твое́ю держа́вною свободи́ на́съ, я́коже зѣло́ разсла́бленнаго Моисе́я предъ ико́ною Твое́ю исцѣли́ла еси́ пресла́вно.

Ты́, о Благода́тная, въ ми́лостивомъ явле́ніи чудотво́рнаго Твоего́ о́браза страну́ на́шу благода́тно посѣти́ла еси́ и ны́нѣ чудотворе́ньми, отъ него́ быва́емыми, на́съ посѣща́еши, и́хже мно́жество исчести́ невозмо́жно, но, ели́ко мо́жно, сія́ благода́рнѣ во сла́ву Твою́ исповѣ́дуемъ.

Благоче́стно отвсю́ду, о Богома́ти, къ чудотво́рнѣй ико́нѣ Твое́й притека́ющія и усе́рдно покланя́ющіяся ми́лостей Твои́хъ и щедро́тъ не лиша́еши, отъ бѣ́дъ сія́ спаса́ющи, отъ неду́гъ избавля́ющи, ду́хи лука́выя отъ ни́хъ прогоня́ющи, утѣше́ніе же и здра́віе всѣ́мъ подаю́щи, я́ко Всеблага́я.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Къ Твое́й, Дѣ́во, прибѣга́емъ бла́гости и о́чи серде́цъ на́шихъ къ Тебѣ́, Чи́стая, возво́димъ: не пре́зри воздыха́ній на́шихъ моли́твенныхъ, но бу́ди на́мъ Покро́въ и Помо́щница въ де́нь Су́дный.

Еди́на всѣ́мъ еси́ Предста́тельница, Богома́ти Влады́чице: услы́ши у́бо на́ша моле́нія, предъ чудотво́рнымъ о́бразомъ Твои́мъ дне́сь приноси́мая, и сподо́би на́съ въ бу́дущемъ вѣ́цѣ узрѣ́ти Тя́ ку́пно съ Сы́номъ Твои́мъ, на о́блацѣхъ во сла́вѣ гряду́щимъ, и гла́съ Боже́ственный Его́ слы́шати, призыва́ющій въ Ца́рство небе́сное.

Земля́ Россíйская явле́ніемъ чудотво́рнаго Твоего́ о́браза, Влады́чице, освяти́ся, и гра́дъ ма́лый вели́къ и зна́емь по благода́ти Твое́й во всѣ́хъ концѣ́хъ яви́ся: въ не́мъ бо драгоцѣ́нное сокро́вище блюде́тся — Твоя́ цѣле́бная ико́на, зало́гъ сы́й Твоего́ къ на́мъ благоволе́нія.

Лю́тыми помышле́ніи отъ лука́выхъ вра́гъ стужа́емыхъ на́съ не оста́ви поги́бнути до конца́, Богороди́тельнице: трепе́щутъ бо си́лы Твоея́ ду́си тмы́ и боя́тся и́мене Твоего́, я́коже мно́гажды у ико́ны Твоея́ чудотво́рныя сія́ изъяви́шася. Ихже злодѣ́йства и на́съ изба́ви, упова́ніе на Тя́ возложи́вшихъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Освяще́ніе, здра́віе и спасе́ніе душа́мъ и тѣлесе́мъ на́шимъ, Ма́ти Бо́жія, отъ святы́я Твоея́ ико́ны подае́ши, е́йже благоче́стно покланя́емся и усты́ и се́рдцемъ благоговѣ́йно сію́ цѣлу́емъ, Твоя́ чудеса́ и неисче́тную ми́лость къ христіа́нскому ро́ду при́сно сла́вяще.

Ко́е благодаре́ніе принесе́мъ Ти́, Богоро́дице, я́ко въ послѣ́дняя лѣ́та такова́го да́ра сподо́била еси́ на́съ, дарова́вши на́мъ многоцѣле́бную Твою́ ико́ну? Тѣ́мъ у́бо, о Всеблага́я, о таковѣ́й неизрече́ннѣй ми́лости досто́йно благодари́ти Тя́ Сама́ на́съ научи́.

Боголѣ́пное явле́ніе Пречи́стыя ико́ны Твоея́, Влады́чице, но́вое явле́ніе Бо́жія благода́ти, Правосла́вной Це́ркви прису́щей, въ посрамле́ніе ересе́й и раско́ловъ показа́ся и я́ко но́вое утѣше́ніе свы́ше всѣ́мъ правосла́внымъ и вѣ́рнымъ ея́ сыно́мъ подае́тся.

Ма́ти Бо́жія милосе́рдая, ми́лости Твоея́ две́ри отве́рзи на́мъ, озари́ на́съ свѣ́томъ Боже́ственныя благода́ти Твоея́ и отъ мы́сленныхъ волко́въ соблюди́ на́съ невреди́мыхъ, въ Правосла́віи неруши́момъ сподо́бивъ на́съ благоугожда́ти Сы́ну Твоему́ и Бо́гу и прія́ти живота́ коне́цъ благíй.

Конда́къ, гла́съ 8:

Притеце́мъ, вѣ́рніи, къ благода́тному ми́лостей и щедро́тъ исто́чнику — чудотво́рному Пречи́стыя Дѣ́вы о́бразу: се́й бо на́мъ свы́ше дарова́ся, душа́мъ и тѣлесе́мъ во спасе́ніе, ему́же покланя́ющеся съ любо́вію, возопіе́мъ къ Богоро́дицѣ: о Всепѣ́тая Ма́ти, о Цари́це Всеми́лостивая, покры́й и соблюди́ на́съ отъ вся́каго зла́ Твои́мъ къ Бо́гу ма́тернимъ предста́тельствомъ.

Икосъ:

Пресла́вное явле́ніе ико́ны Твоея́, Богоро́дице, ра́дости испо́лни сердца́ вѣ́рныхъ сыно́въ Правосла́вныя Це́ркве: ца́ріе бо и святи́тели о се́мъ возликова́ша и вси́ лю́діе утѣше́нія небе́снаго испо́лнишася, я́ко въ послѣ́дняя на́ша времена́ таковы́й да́ръ Бо́жія благода́ти Россíи свы́ше дарова́нъ бы́сть Твои́мъ благопромышле́ніемъ, Влады́чице. Мо́лимъ у́бо Твою́ бла́гость, уми́льно къ чудотво́рному Твоему́ о́бразу припа́дающе: спаса́й въ ми́рѣ и здра́віи Импера́тора на́шего, соблюда́ющи всѣ́хъ на́съ отъ вся́каго зла́ Твои́мъ къ Бо́гу ма́тернимъ предста́тельствомъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Вдови́цъ заступле́ніе и сиро́тъ покрови́тельнице, Влады́чице Пречи́стая, нѣ́кія умира́ющія ма́тери моли́тву о ча́дѣхъ ея́ услы́шала еси́ и па́че надѣ́янія сиро́тствующія дще́ри ея́ благоустро́ила еси́, я́же сла́вити навыко́ша ми́лость Твою́ по вся́ дни́ живота́ своего́.

Извѣще́ніе отъ Тебе́, Богоро́дице, благочести́вая Императри́ца Елисаве́та пріи́мши, сиро́тствующія двѣ́ отрокови́цы подъ кро́въ своего́ попече́нія воспрія́тъ, Твою́ же ико́ну честну́ю зѣло́ возлюби́ и но́вый хра́мъ вмѣ́сто ве́тхаго отъ щедро́тъ свои́хъ ца́рскихъ благолѣ́пно сооруди́.

Извѣ́стная вѣ́рныхъ еси́ Помо́щница и вся́кихъ бла́гъ Пода́тельнице, Пречи́стая Дѣ́во, ико́ною бо Твое́ю чудотво́рною неисче́тныя ми́лости прося́щимъ подае́ши и вся́ спаса́еши, и́же Тебѣ́ вѣ́рно вопію́тъ отъ души́: поми́луй и спаси́ на́съ, Влады́чице.

Ма́ти Бо́жія Всеблага́я, милосе́рдыхъ щедро́тъ Твои́хъ не лиши́ на́съ, обнища́вшихъ во грѣсѣ́хъ, и отъ че́люстей мы́сленнаго во́лка исхити́ ду́ши на́ша, да не поги́бнемъ до конца́, но прино́симъ при́сно плоды́ покая́нія Бо́гу.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

О, пресла́вныхъ чуде́съ Твои́хъ, Влады́чице, и мно́гаго Твоего́ къ человѣ́комъ сострада́нія: еди́нымъ бо прикоснове́ніемъ къ ико́нѣ Твое́й немощны́я врачу́еши и издале́че, въ со́ніяхъ и видѣ́ніихъ, къ не́й тре́бующихъ Твоего́ заступле́нія призыва́еши.

Вода́ освяще́нная и еле́й отъ лампа́ды ико́ны Твоея́ святы́я неду́ги неисцѣ́льныя, Богоро́дице Дѣ́во, врачу́ютъ и о́ныя съ вѣ́рою пріе́млющимъ во исцѣле́ніе и спасе́ніе быва́ютъ; сего́ ра́ди Тя́, Цѣли́тельницу, ублажа́емъ и чудеса́ Твоя́, отъ ико́ны Твоея́ явле́нныя и присноявля́емая, сла́вимъ.

Воспѣ́ти пречи́стаго о́браза Твоего́ явле́ніе сподо́би на́съ, Влады́чице, и пѣ́ній на́шихъ хвале́бныхъ, Тебѣ́ отъ усе́рдія возноси́мыхъ дне́сь, не пре́зри, но пріими́, Всепѣ́тая, моли́твы ра́бъ Твои́хъ и пода́ждь на́мъ въ ну́ждахъ и бѣда́хъ по́мощь Твою́ держа́вную и Твоего́ заступле́нія благода́ть.

Дне́сь ра́дости испо́лнила еси́ на́съ, Богоро́дице, яви́вши на́мъ ико́ну Твою́ святу́ю ди́вно, на ню́же взира́юще и съ любо́вію е́й покланя́ющеся, Тебѣ́ си́це вопіе́мъ: Ма́ти Бо́жія, спаси́ гра́дъ и страну́ явле́ніемъ ико́ны Твоея́ просла́вленныя и вся́ ны́ поми́луй, я́ко милосе́рдая Предста́тельница.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Явле́ніе преди́вныя ико́ны Твоея́, Ма́ти Бо́жія, славосло́вимъ ра́достно: сія́ бо, въ бы́ліи травно́мъ свѣ́томъ Боже́ственнымъ сія́ющая, я́вльшися и чуде́съ мно́жество сотвори́, я́ко вои́стинну Твоего́ къ на́мъ благоволе́нія зало́гъ богодарова́нный.

Яко звѣзда́ свѣтоза́рная, ико́на Твоя́, Пресвята́я Богоро́дице Дѣ́во, явле́ніемъ свои́мъ Це́рковь Россíйскую благода́тно озари́: лучи́ бо чуде́съ испуща́етъ и вѣ́рныя ду́ши къ славосло́вію Бо́га, все́льшагося въ Тя́, приво́дитъ, я́ко Тобо́ю па́дшему человѣ́честву благодѣ́ющаго.

Еди́наго отъ Тро́ицы нетлѣ́нно ро́ждши, Богороди́тельнице, ма́тернее къ Нему́ дерзнове́ніе и́маши: слы́шитъ бо моли́тву Твою́ Сы́нъ Тво́й и Бо́гъ и ми́лостивно къ проше́нію Твоему́ приклоня́ется, Его́же не преста́й моли́ти за ро́дъ христіа́нскій, при́сно въ пѣ́снехъ Тя́ сла́вящій.

Пріими́ на́ша хвале́бныя гла́сы, Влады́чице, и пѣ́ніе смире́нное не отве́ргни, но, я́ко Сы́нъ нѣ́когда Тво́й двѣ́ ле́птѣ вдови́цы прія́тъ, та́ко и на́ше славосло́віе благоуго́дно да бу́детъ предъ Тобо́ю. Сла́ва Тебѣ́, Богоро́дице Дѣ́во, ико́ною Твое́ю честно́ю пресла́вная чудеса́ творя́щей, сла́ва Тебѣ́.

Свѣти́ленъ, гла́съ 4:

Пречи́стаго о́браза Твоего́ явле́ніе, Ма́ти Бо́жія, пра́зднуемъ свѣ́тло, и́бо въ не́мъ Твои́хъ чудотворе́ній вели́чество познае́мъ и Твои́хъ щедро́тъ мно́жество пріе́млемъ: ми́луеши бо и ще́дриши чту́щія Тя́ и отъ бѣ́дъ спаса́еши упова́ющія на Тя́, Богоро́дице Всепѣ́тая и Неискусобра́чная.

Сла́ва, и ны́нѣ, то́йже.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Ве́лія ра́дость дне́сь Россíи возсія́,* благода́тная бо ико́на Твоя́, Богоро́дице,* а́нгельскима рука́ма неви́димо принесе́ся* и посредѣ́ бы́лія травна́го, луча́ми свѣ́та сія́юши,* я́ко сокро́вище нетлѣ́нное яви́ся,* благоче́стію во утвержде́ніе и вѣ́рнымъ во спасе́ніе,* о ея́же явле́ніи ра́дующеся, Тебе́, Влады́чице, мо́лимъ:* спаси́ ду́ши на́ша, я́ко Милосе́рда. [Два́жды.]

О, пресла́внаго чудесе́!* Превы́ше ины́хъ стра́нъ Россíйская страна́ почте́ся* явле́ніемъ въ не́й ико́ны Твоея́, Богоро́дице,* сія́ бо я́ко небе́сный да́ръ просла́влена бы́сть* и исцѣле́ній мно́жество соверши́.* Сего́ ра́ди любо́вію къ не́й припа́даемъ* и моле́бно Тебѣ́ вопіе́мъ:* отъ бѣ́дъ изба́ви на́съ, Влады́чице,* и спаси́ ду́ши н́аша, я́ко Милосе́рда.

О, пресла́внаго чудесе́!* Исто́чникъ исцѣле́ній въ Ма́лѣй Россíи яви́ся —* ико́на Твоя́ многочуде́сная, Богоро́дице,* ю́же въ ма́лѣмъ гра́дѣ вели́кими чудесы́ Госпо́дь просла́ви,* въ зна́меніе прису́щей Це́ркви благода́ти Его́* и въ благослове́ніе свы́ше ца́рству Россíйскому.* Сію́ у́бо боголѣ́пнымъ поклоне́ніемъ честву́емъ* и со умиле́ніемъ Тебѣ́ вопіе́мъ:* Правосла́віе утверди́ въ Россíи непоколеби́мо, Влады́чице,* и спаси́ ду́ши на́ша, я́ко Милосе́рда.

Сла́ва, и ны́нѣ, гла́съ 6:

Блажи́мъ Тя́, вси́ ро́ди, Богоро́дице, я́ко ра́дости вся́ ны́ испо́лнила еси́ явле́ніемъ чудотво́рныя Твоея́ ико́ны и мно́гихъ отъ Нея́ исцѣле́ній дарова́ніемъ: ду́ши бо и тѣлеса́ врачу́еши и вся́кія ско́рби утоля́еши честна́го о́браза Твоего́ осѣне́ніемъ, ему́же дне́сь покланя́ющеся, усе́рдно мо́лимъ Тя́: сподо́би, Влады́чице, Твоя́ рабы́ въ бу́дущемъ вѣ́цѣ избра́нныхъ ра́дости.


НА ЛИТУРГІИ,

Блаже́нна, пѣ́снь 3-я и 6-я. Проки́менъ, Апо́столъ, Ева́нгеліе и прича́стенъ Богоро́дицѣ о́бщій: [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Зри́: Яко пра́зднованіе Пресвятѣ́й Богоро́дицѣ, ра́ди ико́ны Ея́ Ахты́рскія, во 2-й де́нь мѣ́сяца Іу́лія твори́мъ, та́кожде и въ суббо́ту предъ Пятидеся́тницею, егда́ ико́на сія́ изно́сится отъ собо́рныя це́ркви гра́да Ахты́рки въ бли́жнюю Тро́ицкую оби́тель, и по дву́хъ седми́цахъ па́ки возвраща́ется.

Источникъ: Слу́жба со Акаѳістомъ Пресвятѣ́й Влады́чицѣ на́шей Богоро́дицѣ, въ де́нь явле́нія чудотво́рныя ико́ны Ея́ Ахты́рскія. Мѣ́сяца Іу́лія во 2-й де́нь. — М.: Сѵнода́льная тѵпогра́фія, 1916. — Л. 2 – 10, 22 об. – 26.

/ Къ оглавленію раздѣла /


Наверхъ / Къ титульной страницѣ

0