Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 1-й де́нь.
Па́мять возвраще́нія честны́хъ моще́й преподо́бнаго отца́ на́шего Іоа́нна, изъ Те́рнова гра́да въ Ры́льскую его́ оби́тель.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Жела́ніемъ лу́чшихъ распала́емь, о́тче,* и Авраа́мскаго услы́шавъ гла́са,* любе́знѣ тя́ призыва́юща,* мíръ оста́вилъ еси́* и въ пусты́ню всели́лся еси́,* идѣ́же къ Бо́гу прича́стіемъ у́мъ сво́й просвѣти́въ* и ду́шу воздержа́ніемъ очи́стивъ,* благи́хъ наде́ждъ исполне́ніе прія́лъ еси́,* богопрія́тне.

Ярость души́ любо́вію къ Бо́гу обузда́въ,* и по́хоть зѣ́льнымъ воздержа́ніемъ увяди́въ,* и у́мъ чи́стою на не́бо впери́въ моли́твою,* Влады́цѣ своему́ и Бо́гу угоди́лъ еси́, о́тче,* Иже тя́ на земли́ си́лою чуде́съ просла́ви* и въ премíрная селе́нія ду́хъ тво́й всели́,* богоблаже́нне.

Влѣ́поту Ду́хъ Бо́жій почи́ на тя́, Іоа́нне,* чи́стаго се́рдцемъ, по ева́нгельскому велѣ́нію,* смире́нна же му́дростію* и бо́дра въ моли́твахъ, о́тче,* бога́та слеза́ми и колѣ́нъ преклоне́ніи,* вышеесте́ственнымъ и чу́днымъ воздержа́ніемъ,* любве́ же и кро́тости испо́лнена* и видѣ́ньми возвыша́ема.

Сла́ва, гла́съ 6:

Мяте́жа мірска́го избѣ́гъ, до́бръ ше́ственникъ къ небесе́мъ бы́лъ еси́ лѣ́ствицею добродѣ́телей мно́гихъ: житіе́мъ бо а́нгелы удиви́въ, возвесели́лъ еси́, бѣ́сы же ужаси́въ, посрами́лъ еси́ и чуде́съ изря́денъ дѣ́латель показа́лся еси́. И ны́нѣ Тро́ицѣ предстоя́ со а́нгельскими чи́нми, Іоа́нне досточу́дне, испроси́ на́мъ, и́же съ вѣ́рою ра́цѣ моще́й твои́хъ покланя́ющимся, ве́лія и бога́тыя ми́лости.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Гряди́, и́ноковъ* сосло́віе, ра́достно,* обступи́ мо́щи честны́я* Іоа́нна блаже́ннаго,* поя́ пѣ́ніе съ весе́ліемъ* спаси́тельное.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Пусты́не, ра́дуйся,* горо́ Бо́жія, весели́ся,* иногда́ бо мíра бѣ́гая,* ны́нѣ же отъ Те́рнова преноси́мый,* Іоа́ннъ къ тебѣ́ пріи́де.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Хва́лимъ высо́кое* твое́ житіе́, Іоа́нне,* блажи́мъ сла́вную твою́ па́мять,* почита́емъ и честны́хъ моще́й твои́хъ* дне́сь возвраще́ніе.

Сла́ва, и ны́нѣ, [богоро́диченъ]:

Горѣ́ Тя а́нгельстіи* сла́вятъ ли́цы,* до́лѣ же человѣ́честіи,* моля́ще, пою́тъ ро́ди,* Дѣ́во Влады́чице,* Бо́га на́мъ пло́тію ро́ждшая.

Тропа́рь, гла́съ 4:

Твои́хъ моще́й возвраще́ніемъ* оби́тель твоя́ обогати́ся,* це́рковь же твоя́, пріе́мши я́, просвѣти́ся* и, крася́щися, вѣ́рныхъ созыва́етъ съ весе́ліемъ* свѣтоно́сный тво́й свѣ́тло пра́здновати де́нь,* гряди́те, глаго́лющи,* и пріими́те благода́тей дарова́нія.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Пе́рвыя каѳи́смы, пе́рвый антифо́нъ: Блаже́нъ му́жъ... На Го́споди воззва́хъ.., поста́вимъ стихо́въ 8 и пое́мъ стихи́ры, гла́съ 5. Подо́бенъ: Преподо́бне о́тче.

Преподо́бне о́тче, богому́дре Іоа́нне,* е́же па́че ума́ блаже́нства жела́ніемъ распала́емь,* и мíра суеты́ отре́кся, и въ пусты́ню Ры́льскую всели́вся,* пи́щу вмѣни́лъ еси́ вышеесте́ственное воздержа́ніе,* нищету́ же — бога́тство и́стинное,* па́че вся́каго благосла́вія — ху́дость,* напа́сти же и многоразли́чная отъ бѣсо́въ искуше́нія — упокое́ніе.* Тѣ́мже ны́нѣ жела́емыхъ кра́й я́ко дости́гъ,* проси́ на́мъ ми́ра и ве́лія ми́лости. [Три́жды.]

Преподо́бне о́тче, всече́стне Іоа́нне,* о́крестъ моще́й твои́хъ предстоя́ще,* восхваля́емъ труды́ твоя́ и страда́нія,* сла́вимъ равноа́нгельное воздержа́ніе,* блажи́мъ по пусты́ни мѣ́стная прехожде́нія,* диви́мся чудесе́мъ, и́миже обогати́лся еси́,* почита́емъ па́мять твою́ святу́ю,* возвѣща́емъ честна́я пренесе́нія,* усе́рдно пое́мъ дне́сь возвраще́ніе* и согла́сно зове́мъ въ честнѣ́мъ хра́мѣ твое́мъ:* проси́ на́мъ ми́ра и ве́лія ми́лости. [Три́жды.]

Преподо́бне о́тче, равноа́нгельне Іоа́нне,* во мно́зѣмъ терпѣ́ніи* недѣ́ланною тѣ́ло пита́лъ еси́ пи́щею,* ду́шу же непреста́нною просвѣща́лъ еси́ моли́твою,* до́ндеже Бо́гови прибли́зился еси́* и, дѣя́ніемъ наче́нъ, видѣ́ніемъ же соверши́въ ду́хъ тво́й* въ блаже́нная возне́слъ еси́ селе́нія,* тѣ́ло же твое́ на земли́ нетлѣ́нно соблюде́ся,* его́же дне́сь возвраще́ніе* любо́вію почита́юще, вопіе́мъ ти́:* проси́ на́мъ ми́ра и ве́лія ми́лости. [Два́жды.]

Сла́ва, гла́съ 6:

Пріиди́те, тѣ́ло обсту́пимъ ди́внаго Іоа́нна многотерпѣли́вное, бѣ́сы посрами́вшее и а́нгелы возвесели́вшее, житіе́мъ жесто́кимъ Бо́гу угоди́вшее и лѣ́тными прехожде́ньми тлѣ́нію неподпа́дшее. Весели́теся, и́ноцы, въ горѣ́ Ры́льстѣй живу́щіи, се́ бо преподо́бный съ ва́ми жи́тельствовати па́ки пріи́де, и до́блественнѣ на стра́сти дерза́йте, наста́вника иму́ще, неви́димо ва́съ свои́ми моли́твами укрѣпля́юща, къ нему́же вку́пѣ вси́ возопіи́мъ, глаго́люще: ра́дуйся Іоа́нне, Тро́ицы честно́е жили́ще, рая́ жи́телю и Ца́рствія Христо́ва наслѣ́дниче; ра́дуйся, чуде́съ мно́жествомъ отъ Христа́ Бо́га на́шего обогаще́нный, моли́твенниче и те́плый на́шъ предста́телю. Но я́ко дерзнове́ніе имѣ́я ко Го́споду, не преста́й моли́тися о и́же вѣ́рою и любо́вію почита́ющихъ честну́ю па́мять твою́.

И ны́нѣ, богоро́диченъ пе́рвый гла́са:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Свѣ́те ти́хій... Проки́менъ дне́ и чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 1:

Учени́къ Госпо́день отъ младе́нства бы́лъ еси́, преподо́бне, и́бо, кре́стъ на ра́мо взе́мъ и у́зкимъ путе́мъ ше́ствуя, вся́ уме́ты вмѣни́лъ еси́, да Христа́ пріобря́щеши. Ангеломъ поревнова́въ воздержа́ніемъ и моли́твою, бѣсо́мъ сопроти́вился еси́ му́жески, Іоа́нне богому́дре, моли́твенниче о душа́хъ на́шихъ.

Гла́съ 2:

Ду́ха Боже́ственнаго сія́ніе явле́ннѣ воспріи́мъ, блаже́нне о́тче, ду́хи лука́вствія прого́ниши и чудодѣ́йствіемъ звѣзда́ свѣ́тлая мíрови явля́ешися, су́щія въ нощи́ грѣха́ просвѣща́я и проше́нія съ вѣ́рою къ тебѣ́ притека́ющимъ подава́я, чту́щимъ тво́й свѣтоно́сный пра́здникъ, Іоа́нне преподо́бне, и́ноковъ украше́ніе.

Гла́съ 4:

Свѣ́томъ добродѣ́телей свое́ уясни́въ житіе́ и заре́ю боже́ственнаго свѣ́та ду́шу просвѣти́въ, свѣ́тло преше́лъ еси́ житія́ твоего́ по́прище. Во свѣ́тлостехъ же святы́хъ ны́нѣ дости́гъ и Свѣ́ту Предвѣ́чному со а́нгельскими чи́нми я́ко предстоя́, отъ тмы́ на́съ грѣхо́вныя изыма́й, богоно́се о́тче Іоа́нне, свѣ́томъ благода́ти просвѣща́я и Свѣ́та невече́рняго прича́стники сотворя́я моли́твами твои́ми.

Гла́съ 6:

Пресла́вныхъ чуде́съ дѣ́йствы обогати́вся, приснопа́мятне о́тче, въ животѣ́ же и по сме́рти бѣ́сы лука́выя прогоня́я, боля́щія исцѣля́я, невѣ́рныя ка́знію ужаса́я и вѣ́рныя чудесы́ уясня́я, зе́млю про́йде исправле́ній твои́хъ мно́жество и сла́ва твоя́ всю́ду протече́. Тѣ́мже, собра́вшеся въ честнѣ́мъ хра́мѣ твое́мъ и святы́хъ твои́хъ моще́й возвраще́ніе чту́ще, мо́лимъ ти ся приле́жно: моли́ спасти́ся душа́мъ на́шимъ.

Въ ра́дость а́нгеломъ пожи́лъ еси́, преподо́бне о́тче, и во обличе́ніе бѣсо́мъ, въ ре́вность же и похвалу́ Бо́га лю́бящимъ, въ ликова́ніе святы́мъ и въ на́ше, ча́дъ твои́хъ, весе́ліе.

Сла́ва, гла́съ 3:

Пра́здникъ моще́й возвраще́нія Іоа́нна богоно́снаго, и́же, со́лнцу подо́бнѣ, дне́сь сія́етъ, съ вѣ́рою приходя́щихъ просвѣща́етъ и коему́ждо проше́нія подае́тъ. Тѣ́мже, соше́дшеся и того́ ублажа́юще, Христу́ Бо́гу на́шему вси́ воззове́мъ единогла́сно: Человѣколю́бче Влады́ко, возста́ви сѣ́нь па́дшую и коне́чному запустѣ́нію не преда́ждь, е́йже врато́мъ а́довымъ не одолѣ́ти ре́клъ еси́. Да не премо́гутъ беззако́нія на́ша пучи́ну Твоея́ ми́лости, но за бла́гость Твою́ уще́дри лю́ди Твоя́ моли́твами святы́хъ Твои́хъ.

И ны́нѣ, богоро́диченъ:

Безъ сѣ́мене отъ Боже́ственнаго Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.

На стихо́внѣ стихи́ры самогла́сны, гла́съ 1:

Ры́льская горо́, взыгра́й:* просвѣти́вый бо тя́ жи́тель тво́й,* отъ мно́га тя́ вре́мене оста́вль, па́ки пріи́де.* Ра́дуйтеся, мíра отре́кшіися:* я́коже бо дре́вле мíръ, си́це ны́нѣ гра́дъ оста́вивъ,* наста́вникъ ва́шъ къ ва́мъ въ пусты́ню притече́.* Восплещи́те въ весе́ліи рука́ми, христоимени́тіи о́крестъ лю́діе,* и вси́ вку́пѣ къ ра́цѣ моще́й отца́ богоно́снаго припаде́мъ,* любе́знѣ сія́ лобыза́юще и Христа́ сла́вяще.

Сти́хъ: Честна́ предъ Го́сподемъ* сме́рть преподо́бныхъ Его́.

Тѣ́снымъ путе́мъ* неукло́нно ше́ствовалъ и приско́рбнымъ,* преподо́бне о́тче,* въ вѣ́чный досто́йно вше́лъ еси́ живо́тъ,* широ́каго же отвраща́тися, я́ко въ па́губу вводя́щаго, всѣ́мъ завѣща́лъ еси́* и, дре́внихъ ревну́я отце́въ вся́ческимъ добродѣ́телемъ,* тѣ́хъ и дарова́ній сподо́бился еси́.* Тѣ́мже ны́нѣ на небеси́ водворя́яся,* твои́ми къ Бо́гу моли́твами* избавля́й всѣ́хъ на́съ отъ па́губы грѣхо́вныя.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Чи́ста тя́ душе́ю и тѣ́ломъ* ублажа́емъ, преподо́бне о́тче,* а́нгела земна́го воздержа́ніемъ* и человѣ́ка небе́снаго непреста́ннымъ Бо́га славосло́віемъ* и къ го́рнимъ оби́телемъ ума́ утвержде́ніемъ,* идѣ́же всегда́ твое́ жела́ніе восхище́нно имѣ́я* и отону́дуже озаре́ніе пріе́мъ,* небе́снаго Ца́рствія наслѣ́діемъ отъ Христа́ Бо́га обогати́лся еси́.* Тѣ́мъ ны́нѣ моли́ спасти́ся* пра́зднующимъ честны́хъ моще́й твои́хъ возвраще́ніе.

Сла́ва, гла́съ 8:

Ца́рскаго видѣ́нія отре́клся еси́, ца́рствующихъ Царю́ угоди́ти жела́я, преблаже́нне, и ничто́же отъ разлуча́ющихъ Того́ боже́ственныя любве́ въ себѣ́ имѣ́ти восхотѣ́въ, даро́въ ца́рскихъ не прія́лъ еси́; тѣ́мъ смиренному́дрія о́бразъ бы́лъ еси́ и пустынножи́тель всеизря́денъ, ху́ждшее вконе́цъ покори́вый лу́чшему и пло́ть порабо́тивый ду́ху и е́же по о́бразу сохрани́вый неврежде́нно. И ны́нѣ съ преподо́бными тя́ почита́юще, Іоа́нне всеблаже́нне, мо́лимъ тя́ приле́жно: моли́ спасти́ся душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: тропа́рь преподо́бнаго [пи́санъ на ма́лѣй вече́рни], два́жды, и Богоро́дице, Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь возвраще́нія, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства Твоего́.

Красоты́ вожделѣ́въ боже́ственныя* и удали́вся кра́сныхъ мíра су́етнаго,* воздержа́ніемъ и моли́твою а́нгелы съ человѣ́ки удиви́лъ еси́.* Тѣ́мъ поко́й ти́ бы́сть преставле́ніе,* и́мже къ блаже́нству вѣ́чному преше́дъ,* свы́ше назира́й лю́ди твоя́,* прося́ у Бо́га на́мъ ве́лія* и бога́тыя ми́лости. [Два́жды.]

Сла́ва, и ны́нѣ, богоро́диченъ, гла́съ то́йже:

Красотѣ́ дѣ́вства Твоего́,* и пресвѣ́тлой чистотѣ́ Твое́й,* Гавріи́лъ удиви́вся, вопія́ше Ти́, Богоро́дице:* ку́ю Ти́ похвалу́ принесу́ досто́йную?* Что́ же возимену́ю Тя́? Недоумѣва́ю и ужаса́юся.* Тѣ́мже я́ко повелѣ́нъ бы́хъ, вопію́ Ти́:* ра́дуйся, Благода́тная.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Удиви́шася а́нгели* па́че естества́ по́двигомъ твои́мъ:* сле́зному оче́съ твои́хъ тече́нію* и всено́щному на моли́твѣ стоя́нію,* въ мра́чнѣй пеще́рѣ вселе́нію* и бѣсо́вскихъ ко́зней терпѣ́нію,* и́миже ду́хъ тво́й досто́йно* въ премíрная дости́же селе́нія,* твоя́ же мо́щи честны́я* нетлѣ́нно предлежа́тъ ча́домъ твои́мъ,* я́же возвраще́ніе тѣ́хъ съ любо́вію пра́зднующе,* тя́ ублажа́емъ, Іоа́нне, о́тче на́шъ. [Два́жды.]

Сла́ва, и ны́нѣ, богоро́диченъ, гла́съ то́йже:

Удиви́ся Іо́сифъ,* е́же па́че естества́ зря́,* и внима́ше мы́слію,* и́же на руно́ до́ждь,* въ безсѣ́менномъ зача́тіи Твое́мъ, Богоро́дице,* купину́, огне́мъ неопали́мую,* же́злъ Ааро́новъ прозя́бшій,* и, свидѣ́тельствуя, обру́чникъ Тво́й и храни́тель* свяще́нникомъ взыва́ше:* Дѣ́ва ражда́етъ* и по рождествѣ́* па́ки Дѣ́ва пребыва́етъ.

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Отъ ю́ности вся́ оста́вивъ жите́йская,* кра́сная же и лѣ́потная,* усе́рдно послѣ́довалъ еси́ Зва́вшему тя́, преподо́бне,* въ постѣ́хъ и по́двизѣхъ тѣ́ло изнуря́я* и къ лу́чшимъ себе́ при́сно взима́я,* отону́дуже и благода́ть прія́лъ еси́* неду́жныя цѣли́ти и стра́сти прогони́ти.* Іоа́нне преблаже́нне,* моли́ Христа́ Бо́га* грѣхо́въ оставле́ніе дарова́ти* чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Яко дѣ́ву Тя́ и еди́ну въ жена́хъ,* безсѣ́менно ро́ждшую Бо́га пло́тію,* вси́ ублажа́емъ, ро́ди человѣ́честіи:* о́гнь бо всели́ся въ Тя́ Божества́,* и, я́ко Младе́нца, млеко́мъ* пита́ла еси́ Зижди́теля и Го́спода.* Тѣ́мже, досто́йно Тя́ прославля́юще,* согла́сно Тебѣ́ вопіе́мъ:* моли́ Христа́ Бо́га* прегрѣше́ній оставле́ніе дарова́ти* покланя́ющимся вѣ́рою всесвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́, хвали́те Его́ во утверже́ніи си́лы Его́. Ева́нгеліе отъ Матѳе́я, зача́ло 43: Вся́ Мнѣ́ предана́ су́ть Отце́мъ Мои́мъ... и бре́мя Мое́ легко́ е́сть.

По 50-мъ псалмѣ́ стихи́ра самогла́сна, гла́съ 6:

Ду́ха Свята́го благода́тію собра́вшеся дне́сь, христоимени́тіи, ли́къ соста́вимъ въ честнѣ́мъ хра́мѣ отца́ на́шего и, Преблага́го сла́вяще Влады́ку, къ преподо́бному моле́бнѣ воззове́мъ: моли́ся приле́жно Го́сподеви изба́витися вся́каго вре́да душетлѣ́ннаго чту́щимъ любо́вію свѣ́тлый пра́здникъ моще́й твои́хъ возвраще́нія.

Кано́нъ преподо́бному, гла́съ 1, его́же краегране́сіе: Похвалу́ ти, о́тче Іоа́нне, плету́, Дими́трій.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Плести́ пѣ́ніе сіе́ ма́лое моще́й возвраще́нію Твоего́ уго́дника, Христе́, во отверзе́ніе у́стъ мои́хъ сло́во ми́ да́руй по достоя́нію сего́ воспѣ́ти, Человѣколю́бче.

Озари́ мя́ ра́зумомъ къ пѣ́нію сему́ моли́твами твои́ми, о́тче Іоа́нне, свя́тости твое́й вѣща́ти словеса́ похвале́нія, я́ко жи́ву ти су́шу, жи́ви бо Бо́гови пра́ведніи вси́.

Хвалю́ твое́ въ пусты́ни пребыва́ніе, ублажа́ю я́же въ не́й по́двиги, прославля́ю ангелоподо́бное воздержа́ніе, почита́ю па́мять твою́, воспѣва́ю и честны́хъ моще́й твои́хъ возвраще́ніе.

Богоро́диченъ: Вся́къ у́мъ досто́йно похвали́ти Тя́ не мо́жетъ а́нгельскій и человѣ́ческій, Дѣ́во, Бо́га бо па́че ума́ и сло́ва родила́ еси́.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Анто́нія Вели́каго и други́хъ, дре́вле просія́вшихъ оте́цъ, житію́ поревнова́въ, о́тче, си́хъ и чуде́съ дѣ́латель Боже́ственною благода́тію бы́лъ еси́, преподо́бне, тѣ́мже тя́ по до́лгу ублажа́емъ.

Лука́выхъ бѣсо́въ мно́гая въ пусты́ни нападе́нія нивочто́же вмѣни́въ, блаже́нне, добродѣ́тельми на небеса́, я́коже лѣ́ствицею, къ вожделѣ́нному Христу́, Влады́цѣ твоему́, возше́лъ еси́.

Удали́вся человѣ́къ, Бо́гу прибли́зился еси́; тлѣ́нное оста́вивъ житіе́, нетлѣ́нное стяжа́лъ еси́; здѣ́ у́бо Бо́гъ тя́ просла́ви чудесы́, та́мо же Ца́рствіемъ тя́ обогати́ небе́снымъ.

Богоро́диченъ: Тя́, ро́ди родо́въ, по до́лгу восхваля́емъ, по достоя́нію не возмога́юще, Влады́чице: еди́на бо Невмѣсти́маго вмѣсти́ла еси́ Го́спода и о́гнь Божества́ во чре́вѣ Твое́мъ неопа́льно понесла́ еси́.

Сѣда́ленъ, гла́съ 8. Подо́бенъ: Прему́дрость и Сло́во.

Прему́дрости на пе́рсехъ возле́гшему* и въ рожде́нныхъ жена́ми бо́льшему* тезоимени́тствомъ обога́щся,* житію́ тѣ́хъ поревнова́лъ еси́ чистото́ю серде́чною,* и пусты́ннымъ пребыва́ніемъ,* и вышеесте́ственнымъ воздержа́ніемъ.* Тѣ́мъ жили́ще Свята́го Ду́ха яви́лся еси́* и чуде́съ дѣ́йствы просла́вился еси́.* Іоа́нне преподо́бне,* моли́ Христа́ Бо́га грѣхо́въ оставле́ніе дарова́ти* пра́зднующимъ любо́вію честну́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Прему́дрость ро́ждши и Сло́во,* Христа́ Бо́га на́шего,* Еди́на Всенепоро́чная Богоневѣ́сто,* кри́нъ яви́лася еси́ благово́нный,* отъ удо́лій смире́нія человѣ́ческаго произра́стшій,* и о́блакъ солнцезра́чный,* свѣ́тъ Боже́ственный на земли́ откры́вый.* Тѣ́мъ въ воню́ мѵ́ра духо́внаго* пріими́ во́пль се́рдца моего́:* моли́, Его́же родила́ еси́,* грѣхо́въ оставле́ніе пода́ти* воспѣва́ющимъ досто́йно сла́ву Твою́.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Иноковъ сосло́віе и вси́ ны́нѣшняго ро́да правосла́вніи, сте́кшеся усе́рдно, къ ра́цѣ припаде́мъ ди́внаго Іоа́нна, да кíйждо да́ръ ра́венъ усе́рдію своему́ пріи́метъ.

Оте́чество свое́, я́коже со́лнце, осія́въ, и въ иноплеме́нныхъ чудесы́ просія́лъ еси́, Среде́цъ же и Те́рновъ благодѣ́тельствовавъ, въ пусты́ню па́ки возврати́лся еси́, идѣ́же Влады́цѣ своему́ угоди́лъ еси́.

Твоя́ оби́тель, ви́дѣвши тя́ дне́сь, я́ко жи́ва, къ не́й возвраща́ющася, возра́довася неизрече́нно и съ любо́вію прія́ тя мно́гою, я́коже отца́ своего́ и те́плаго засту́пника.

Богоро́диченъ: Чи́стая Благослове́нная, Яже еди́на кля́твы всѣ́хъ свободи́вшая, Дѣвома́ти Марíе, со апо́столы, и му́ченики, и проро́ки моли́ изъ чре́ва Твоего́ Проше́дшаго спасти́ ду́ши пою́щихъ Тя́.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Еди́нъ Еди́ному собесѣ́довати жела́я, я́коже Моисе́й на горѣ́, удали́лся еси́ въ пусты́няхъ и, ве́сь у́мъ тво́й углуби́въ въ богомы́сліи, просія́лъ еси́ чуде́съ свѣтлостьми́ и мно́гою сла́вою.

Іоа́нне всече́стне, а́нгеловъ равностоя́телю, твои́хъ моще́й возвраще́ніе чту́ще, я́коже Дави́дъ предъ сѣ́ннымъ дре́вле ковче́гомъ, ска́чуще ду́хомъ, съ вѣ́рою игра́емъ, веселя́щеся.

О, вели́каго жела́нія твоего́ пусты́ни Ры́льскія, о́тче, е́же ны́нѣ я́вѣ сотвори́лъ еси́, къ не́й возвра́щся многострада́льнымъ и честны́мъ тѣ́ломъ твои́мъ, богоблаже́нне.

Богоро́диченъ: Авваку́мъ Тя́ дре́вле го́ру мы́сленную и сѣ́нь добродѣ́телей проро́ческимъ ду́хомъ ви́дѣвъ, Пречи́стая, проповѣ́даше, я́ко отъ ю́га прише́дшаго Сло́ва и отъ Тебе́ пло́ть пріе́мшаго.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

На стра́сти му́жески подвиза́вся, о́тче, бѣсо́мъ сопроти́вился еси́ до́блественно и, пло́ть покори́въ ду́ху, хлѣ́бъ а́нгельскій, по пи́санному, я́лъ еси́, блаже́нство дости́гъ вѣ́чнующее.

Не́мощь естества́ вышеесте́ственнымъ жела́ніемъ и къ Бо́гу любо́вію укрѣпи́въ, о́тче, жесто́кій жи́тель пусты́ни бы́лъ еси́ и оте́честву твоему́ моли́твенникъ богопрія́тенъ показа́лся еси́.

Еже отъ Те́рнова моще́й твои́хъ возвраще́ніе дне́сь пра́зднующе, любо́вь изря́дную, я́же къ тебе́, показу́емъ и, пѣ́сньми похва́льными усе́рдно тя́ ублажа́юще, ми́лости Бо́жія про́симъ получи́ти моли́твами твои́ми.

Богоро́диченъ: Покры́й ста́до Сы́на Твоего́ кро́вомъ Своея́ бла́гости, Влады́чице, вся́каго гнѣ́ва избавля́ющи, и зла́го обстоя́нія, и му́ки вѣ́чныя предста́тельствомъ Твои́мъ.

Конда́къ, гла́съ 2. Подо́бенъ: Въ моли́твахъ Неусыпа́ющую.

Тве́рдымъ умо́мъ и непреста́нными моли́твами* бори́теля врага́ си́лу всегуби́тельную до конца́ побори́въ,* досто́йно отъ Христа́ просла́вился еси́,* Іоа́нне всеблаже́нне.* Тѣ́мъ твои́хъ дне́сь моще́й возвраще́нія* свѣ́тлый соверша́юще пра́здникъ въ весе́ліи,* согла́сно вопіе́мъ ти́:* ста́ду и лю́демъ твои́мъ ты́ еси́ съ Бо́гомъ,* о́тче преподо́бне, похвала́ и утвержде́ніе.

Икосъ:

Сего́ преподо́бнаго Іоа́нна пѣ́сньми почита́юще и того́ къ на́мъ честны́хъ моще́й возвраще́ніе свѣ́тло пра́зднующе, си́це къ нему́ возопіи́мъ: блаже́нъ еси́, о́тче, отъ младе́нства Го́сподеви порабо́тавъ и ничесо́же Того́ любви́ предпоче́тъ, но вся́ уме́ты вмѣни́въ, да Христа́ пріобря́щеши, Иже тя́ несѣ́яннымъ сѣ́менемъ и хлѣ́бомъ а́нгельскимъ препита́, и чуде́съ дарова́ньми оби́льнѣ обогати́, и царя́ жела́нника видѣ́нія твоего́ показа́, по сме́рти же тѣ́ло твое́ нетлѣ́ніемъ просла́ви, и отъ мѣ́ста на мѣ́сто пренесе́ньми почте́, и повсю́ду свѣти́льникъ, чудесы́ сія́ющій, сотвори́, послѣди́ же въ оби́тель твою́ па́ки возврати́, я́ко вои́стинну ста́ду и лю́демъ твои́мъ похвалу́ и утвержде́ніе.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Любо́вію Боже́ственною разжи́гаемь, любве́ мірскíя отре́клся еси́ и, кре́стъ на ра́мо взе́мъ, Христу́ послѣ́довалъ еси́, зовы́й: оте́цъ на́шихъ Бо́же, благослове́нъ еси́.

Его́же отъ ю́ности всѣ́мъ се́рдцемъ возлюби́лъ еси́, Бо́га, Тому́ во все́й жи́зни усе́рдно порабо́талъ еси́, преподо́бне о́тче, зовя́ къ Нему́ при́сно: оте́цъ на́шихъ Бо́же, благослове́нъ еси́.

Твои́хъ честны́хъ моще́й къ на́мъ возвраще́ніе на́съ къ любви́ твое́й подви́же, преподо́бне о́тче, и къ пѣ́нію всѣ́хъ на́съ возста́ви, и зва́ти научи́: оте́цъ на́шихъ Бо́же, благослове́нъ еси́.

Богоро́диченъ: Умніи Тя́ горѣ́ сла́вятъ чи́нове, Дѣ́во Чи́стая, до́лѣ же на земли́ человѣ́честіи ублажа́ютъ ро́ди, при́сно зову́ще Сы́ну Твоему́ ра́достно: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Добродѣ́тели твоя́, я́ко кади́ло благово́нное, къ Бо́гу взыдо́ша, тѣ́мже твое́ нетлѣ́нное тѣ́ло благоуха́ніемъ почте́ся, его́же возвраще́ніе ны́нѣ пра́зднующе, зове́мъ: благослови́те, вся́ дѣла́ Госпо́дня, Го́спода.

Иже зе́млю и мо́ре потреби́ти хваля́йся, тебѣ́ прирази́вся, посра́мленъ бы́сть, преподо́бне о́тче, и до конца́ низложе́нъ, тѣ́мъ, ду́хомъ веселя́ся, взыва́лъ еси́: благослови́те, вся́ дѣла́ Госпо́дня, Го́спода.

Мо́ре су́етнаго житія́ до́брѣ преплы́въ корабле́мъ воздержа́нія, вѣ́рою окормля́емь и я́дриломъ любве́ Христо́вы носи́мь, въ приста́нище дости́глъ еси́, зовя́: благослови́те, вся́ дѣла́ Госпо́дня, Го́спода.

Богоро́диченъ: Иже отъ дѣ́лъ свои́хъ наде́жды спасе́нія не иму́ще, къ Твое́й прибѣга́емъ ми́лости, Влады́чице, и мо́лимся грѣхо́въ проще́ніе Тобо́ю улучи́ти, зову́ще: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Тя́ Христо́съ чуде́сными дарова́ньми просла́ви, еще́ на земли́ живу́щаго, о́тче, и недѣ́ланною препита́ пи́щею, и нетлѣ́нно тѣ́ло твое́ по сме́рти соблюде́, его́же возвраще́ніе по си́лѣ дне́сь любо́вію восхваля́емъ.

Ра́ди мно́жества грѣхо́въ мои́хъ и дерзну́тія къ похвалѣ́ твое́й да не отри́неши мене́ же и пѣ́нія сего́ ма́лаго, но, я́ко блага́го Влады́ки учени́къ, ма́лый се́й тру́дъ показа́вшему благода́ть пода́ждь, ели́ко во́лиши.

Іоа́нне всече́стне, це́рковь и су́щая въ не́й ча́да твоя́ отъ вра́гъ ви́димыхъ и неви́димыхъ сохраня́й, окормля́я ко спасе́нію, въ стра́шный же де́нь Суда́ въ своя́ съ собо́ю небе́сная селе́нія пріе́мля.

Богоро́диченъ: Иноцы Тя́ во все́мъ мíрѣ, въ гора́хъ и пусты́няхъ пожи́вшіи, наде́жду правосла́вно стяжа́ша и хода́таицу спасе́нія, горо́ Бо́жія одушевле́нная, вѣ́рныхъ похвало́ и непогрѣши́тельное упова́ніе, Пренепоро́чная Влады́чице.

Свѣти́ленъ, гла́съ 3. Подо́бенъ: Посѣти́лъ ны́ е́сть.

Посѣти́лъ ны́ е́сть* ми́лостію Спа́съ на́шъ* честны́хъ моще́й твои́хъ возвраще́ніемъ,* Іоа́нне всеблаже́нне.* Тѣ́мъ, соше́дшеся дне́сь, мо́лимъ тя́:* моли́ся Христу́ Бо́гу о всѣ́хъ на́съ. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Свѣ́тъ пріе́мшая во утро́бѣ* Боже́ственный и Превѣ́чный,* просвѣти́ рабы́ Твоя́,* Пречи́стая Богоро́дице,* изъ Тебе́ бо роди́ся* Еди́нъ те́мныя просвѣща́яй Бо́гъ.

На хвали́техъ стихи́ры, гла́съ 5. Подо́бенъ: Ра́дуйся, по́стническихъ.

Ра́дуйся, Іоа́нне треблаже́нне,* мона́шествующихъ вои́стинну красото́,* хра́ме честны́й Всесвята́го Ду́ха,* Христо́во со Отце́мъ чи́стое пребыва́лище,* Ца́рствія небе́снаго наслѣ́дниче* и чуде́съ преди́вныхъ исто́чниче!* Но я́ко дерзнове́ніе стяжа́вый ко Го́споду,* испроси́ пра́зднующимъ честны́хъ моще́й твои́хъ возвраще́ніе* ми́ръ и ве́лію ми́лость.

Ра́дуйся, Іоа́нне треблаже́нне,* пусты́ни Ры́льскія пе́рвый насе́льниче,* Христа́ Бо́га на́шего уго́дниче,* кро́ткаго Учи́теля кро́ткій учениче́,* земна́я съ земны́ми оста́вивый* и небе́сная съ небе́сными наслѣ́довавый.* Но, о похвало́ и украше́ніе наро́ду твоему́!* испроси́ пра́зднующимъ честны́хъ моще́й твои́хъ возвраще́ніе* ми́ръ и ве́лію ми́лость.

Ра́дуйся, Іоа́нне треблаже́нне,* и́же а́нгельское житіе́ на земли́ пожи́вый,* и пло́ть ду́хови порабо́тивый,* и воздержа́ніемъ свѣти́льникъ себе́ мíрови яви́вый,* Святѣ́й же Тро́ицѣ оби́тель ся́ содѣ́лавый* и дарова́нія чуде́съ сподо́бивыйся неду́ги исцѣля́ти* и пра́зднующимъ честны́хъ моще́й твои́хъ возвраще́ніе дарова́ти* ми́ръ и ве́лію ми́лость.

Ра́дуйся, Іоа́нне треблаже́нне,* его́же мо́щи всечестны́я оби́льно* исцѣле́нія источа́ютъ приходя́щимъ вѣ́рою,* и благоуха́нія духо́внаго всѣ́хъ исполня́ютъ* и де́монскую тму́ дале́че прогоня́ютъ.* Тѣ́мже мо́лимъ тя́ вся́каго навѣ́та вра́жія на́съ изба́вити* и пра́зднующимъ честны́хъ моще́й твои́хъ возвраще́ніе дарова́ти* ми́ръ и ве́лію ми́лость.

Сла́ва, гла́съ 3:

Но́вое оби́тели Ры́льстѣй пра́зднество возвраще́ніемъ моще́й Іоа́нна блаже́ннаго дарова́ Христо́съ Бо́гъ. Тѣ́мже, преподо́бнаго ублажа́юще пѣ́сненно, Того́ просла́вимъ согла́сно и вси́ усе́рдно возопіи́мъ, взыва́юще: Человѣколю́бче Влады́ко, моли́твами Твоего́ уго́дника и всѣ́хъ святы́хъ Це́ркви Твое́й исправле́ніе да́руй, ю́же искупи́лъ еси́ честно́ю Кро́вію, и правосла́внымъ согрѣше́ній проще́ніе пода́ждь и ве́лію ми́лость.

И ны́нѣ, богоро́диченъ, гла́съ то́йже:

Вельми́ согрѣша́юща мя́, Отрокови́це, исхити́ вели́кою Твое́ю моли́твою пла́мене ну́жднаго и испра́ви, Чи́стая, Твои́ми мольба́ми, ко спасе́ннымъ стезя́мъ наставля́ющи мя́ ма́терними Твои́ми моли́твами.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213: Пло́дъ духо́вный е́сть... и та́ко испо́лните зако́нъ Христо́въ. Аллилуія, гласъ 8: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 10: По Іису́сѣ идо́ша наро́ди мно́зи... я́ко мзда́ ва́ша мно́га на небесѣ́хъ. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.] Аллилу́ія.

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 289-308.

/ Къ оглавленію раздѣла /


Наверхъ / Къ титульной страницѣ

0