Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 1-й де́нь.
Святы́хъ и чудотво́рцевъ, безсре́брениковъ Космы́ и Даміа́на, въ Ри́мѣ му́чившихся.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4. Подо́бенъ: Да́лъ еси́ зна́меніе.

Стра́сти безслове́сныя* поко́рше, святíи,* душе́вными си́лами,* человѣ́комъ и ското́мъ* благодѣя́ніе подава́ете,* отъ Христа́ дарова́ніемъ исцѣле́ній обога́щшеся.* Тѣ́мже свяще́нное ва́ше* и свѣтоно́сное торжество́ соверша́юще,* про́симъ очище́нія душа́мъ на́шимъ.

Боже́ственный хра́мъ ва́шъ* я́ко не́бо показа́ся, свѣтоза́рно и спасе́нно,* я́ко звѣ́зды, чудеса́ спаси́тельная* ны́нѣ притяжа́въ* и, я́коже со́лнце свѣ́тло,* исцѣле́ній Боже́ственное дѣ́йство,* Космо́ преблаже́нне,* Даміа́не пресла́вне,* Госпо́дни служи́тели,* моли́твенницы о душа́хъ на́шихъ.

Сла́ва, гла́съ 8:

Кто́ не удиви́тся, кто́ не просла́витъ, кто́ не воспое́тъ вѣ́рно, му́дрыхъ и пресла́вныхъ безсре́бреникъ чудеса́? Яко да и по свято́мъ и́хъ преставле́ніи всѣ́мъ подаю́тъ, притека́ющимъ вѣ́рою, бога́тно исцѣле́нія, и честны́я и святы́я мо́щи тѣ́хъ источа́ютъ благода́ть исцѣле́ній. О, дво́ице свята́я! О, честны́я главы́! О, прему́дросте и сла́во, я́же отъ Бо́га да́нныя ва́мъ благода́ти! Тѣ́мже пѣ́сньми зове́мъ Благодѣ́телю Бо́гу, показа́вшему тѣ́хъ на врачева́ніе ду́шъ и тѣле́съ на́шихъ.

И ны́нѣ, богоро́диченъ, гла́съ то́йже:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Чуде́съ луча́ми облиста́вше вселе́нную всю́,* святíи безме́здницы,* пресвѣ́тліи свѣти́льницы,* небеси́ уподо́бистеся благода́тію,* высо́каго жи́тельства добродѣ́тельми,* звѣ́зды предлага́еми.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Дождеро́дныя о́блаки, преизя́ществующа* многотеку́щими благода́тей чудесы́,* му́ченицы Госпо́дни,* всю́ зе́млю мы́сленно напоя́ете,* здра́вая пѣснопѣ́нія Бо́гу* приноси́ти понужда́юща.

Сти́хъ: Се́ что́ добро́, или́ что́ красно́,* но е́же жи́ти бра́тіи вку́пѣ.

Исцѣля́ти стра́сти души́ и тѣлесе́* хи́трость отъ Бо́га и́стинно пріе́мше,* му́ченицы Госпо́дни,* преесте́ственно исцѣля́ете вся́* не человѣ́ческими лѣчба́ми враче́бными,* но Боже́ственными дохнове́ньми.

Сла́ва, гла́съ 6:

Всегда́ иму́ще Христа́, дѣ́йствующа въ ва́съ, святíи безсре́бреницы, чудодѣ́йствуете въ мíрѣ, боля́щія исцѣля́ете, и́бо врачевство́ ва́ше исто́чникъ е́сть неисчерпа́емый: че́рплемый же, па́че изоби́льно истека́етъ, и излива́емь, изоби́луетъ; на кíйждо де́нь истощева́емь, и умножа́емь, всѣ́мъ подая́, и неоскудѣва́емь пребыва́я; и че́рплющіи насыща́ются исцѣле́нія, то́й же пребыва́етъ неиждиву́щь. Что́ у́бо ва́съ нарече́мъ? цѣли́тельныхъ ли враче́въ ду́шъ же и теле́съ? цѣли́телей страсте́й неисцѣ́льныхъ, ту́не исцѣля́ющихъ всѣ́хъ, пріе́мшихъ дарова́ніе отъ Спа́са Христа́, подаю́щаго на́мъ ве́лію ми́лость.

И ны́нѣ, богоро́диченъ дне́, [или́ се́й, гла́съ то́йже.]
[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Тропа́рь, гла́съ 8:

Святíи безсре́бреницы и чудотво́рцы Космо́ и Даміа́не, посѣти́те не́мощи на́ша: ту́не прія́сте, ту́не дади́те на́мъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 1. Подо́бенъ: Небе́сныхъ чино́въ.

Чуде́сными заря́ми* болѣ́зней на́шихъ отжени́те вся́къ неду́гъ,* безсре́бренно благода́ть простира́юще,* дарова́ньми Учи́теля обога́щшеся,* на земли́ болѣ́зни земноро́дныхъ* взе́мшаго на ра́мѣхъ Свои́хъ. [Два́жды.]

Враче́бнѣ, у́бо пе́рвѣе,* наказа́вшеся до́брѣ,* болѣ́зни всѣ́мъ очища́ете вѣ́рою,* второ́е же, па́ки* духо́вно себе́ вооружи́вше,* отгоня́ете боже́ственнѣ* и душе́вныхъ неду́гъ врежде́нія.

Яко безсре́бренно благода́ть отъ Христа́ Бо́га пріе́мше,* всѣ́мъ безсре́бренно исцѣля́ете,* безсре́бреницы, неду́ги,* не то́кмо на́ша болѣ́зни очища́ете,* но и ското́мъ даю́ще слове́сно исправле́ніе,* я́ко ми́лостиви.

Ины стихи́ры, гла́съ 4. Подо́бенъ: Да́лъ еси́ зна́меніе.

Вода́ми духо́вными,* я́ко рѣ́ки, наводня́емы,* и, я́вѣ напо́лншеся, тва́рь напоя́ете* богозна́меньми и пресла́вными исцѣле́ній дарова́ніи,* и душетлѣ́нныя стра́сти изсуша́ете,* и неду́ги исцѣля́ете,* и отгоня́ете ду́хи,* богоно́сніи безсре́бреницы,* моли́твенницы о душа́хъ на́шихъ. [Два́жды.]

Стра́сти безслове́сныя* поко́рше, святíи,* душе́вными си́лами,* человѣ́комъ и ското́мъ* благодѣя́ніе подава́ете,* отъ Христа́ дарова́ніемъ исцѣле́ній обога́щшеся.* Тѣ́мже свяще́нное ва́ше* и свѣтоно́сное торжество́ соверша́юще,* про́симъ очище́нія душа́мъ на́шимъ.

Боже́ственный хра́мъ ва́шъ* я́ко не́бо показа́ся, свѣтоза́рно и спасе́нно,* я́ко звѣ́зды, чудеса́ спаси́тельна* ны́нѣ притяжа́въ* и, я́коже со́лнце свѣ́тло,* исцѣле́ній Боже́ственное дѣ́йство,* Космо́ преблаже́нне, Даміа́не пресла́вне,* Госпо́дни служи́тели,* моли́твенницы о душа́хъ на́шихъ.

Сла́ва, гла́съ 6:

Безконе́чна е́сть святы́хъ благода́ть, ю́же отъ Христа́ прія́ша, тѣ́мже и мо́щи и́хъ отъ Боже́ственныя си́лы непреста́нно дѣ́йствуютъ чудеса́, и́хже и имена́, вѣ́рою призыва́ема, неисцѣ́льныя болѣ́зни исцѣля́ютъ; и́миже, Го́споди, и на́съ душе́вныхъ и тѣле́сныхъ страсте́й свободи́, я́ко Человѣколю́бецъ.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 2:

Вра́чеве немощству́ющихъ, сокро́вища врачева́ній, спаси́теліе вѣ́рныхъ, безсре́бреницы всесла́вніи, въ ну́ждахъ зову́щія и боля́щія исцѣли́те, моля́ще Бо́га блага́го изба́витися на́мъ отъ сѣ́тей вра́жіихъ.

Исто́чникъ исцѣле́ній еди́наго то́кмо въ лѣ́тѣ исцѣлева́ше, хра́мъ же безсре́брениковъ все́ мно́жество исцѣля́етъ неду́гующихъ: неоску́дно бо е́сть и неиждива́емое бога́тство святы́хъ. Тѣ́хъ моли́твами, Христе́, поми́луй на́съ.

Ра́дуется ли́къ святы́хъ во вѣ́ки, Ца́рство бо небе́сное наслѣ́доваша; земля́, мо́щи и́хъ пріе́мши, благово́ніе возвѣ́я, раби́ Христо́вы бы́ша, все́лившеся въ жи́знь вѣ́чную.

Сла́ва, гла́съ 6:

Безконе́чна е́сть святы́хъ благода́ть, ю́же отъ Христа́ прія́ша, тѣ́мже и мо́щи и́хъ отъ Боже́ственныя си́лы непреста́нно дѣ́йствуютъ чудеса́, и́хже и имена́, вѣ́рою призыва́ема, неисцѣ́льныя болѣ́зни исцѣля́ютъ; и́миже, Го́споди, и на́съ душе́вныхъ и тѣле́сныхъ страсте́й свободи́, я́ко Человѣколю́бецъ.

И ны́нѣ, богоро́диченъ, [гла́съ то́йже]:

Преложе́ніе скорбя́щихъ, премѣне́ніе боля́щихъ еси́, Богоро́дице Всепѣ́тая, спаси́ гра́дъ и лю́ди, бори́мыхъ умире́ніе, обурева́емыхъ тишина́, Еди́на предста́тельнице вѣ́рныхъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Чуде́съ луча́ми облиста́вше вселе́нную всю́,* святíи безме́здницы,* пресвѣ́тліи свѣти́льницы,* небеси́ уподо́бистеся благода́тію,* высо́каго жи́тельства добродѣ́тельми,* звѣ́зды предлага́еми.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Дождеро́дныя о́блаки, преизя́ществующа* многотеку́щими благода́тей чудесы́,* му́ченицы Госпо́дни,* всю́ зе́млю мы́сленно напоя́ете,* здра́вая пѣснопѣ́нія Бо́гу* приноси́ти понужда́юща.

Сти́хъ: Се́ что́ добро́, или́ что́ красно́,* но е́же жи́ти бра́тіи вку́пѣ.

Исцѣля́ти стра́сти души́ и тѣлесе́* хи́трость отъ Бо́га и́стинно пріе́мше,* му́ченицы Госпо́дни,* преесте́ственно исцѣля́ете вся́* не человѣ́ческими лѣчба́ми враче́бными,* но Боже́ственными дохнове́ньми.

Сла́ва, гла́съ 8:

Кто́ не удиви́тся, кто́ не просла́витъ, кто́ не воспое́тъ вѣ́рно, му́дрыхъ и пресла́вныхъ безсре́бреникъ чудеса́? Яко да и по свято́мъ и́хъ преставле́ніи всѣ́мъ подаю́тъ, притека́ющимъ вѣ́рою, бога́тно исцѣле́нія, и честны́я и святы́я мо́щи тѣ́хъ источа́ютъ благода́ть исцѣле́ній. О, дво́ице свята́я! О, честны́я главы́! О, прему́дросте и сла́во, я́же отъ Бо́га да́нныя ва́мъ благода́ти! Тѣ́мже пѣ́сньми зове́мъ Благодѣ́телю Бо́гу, показа́вшему тѣ́хъ на врачева́ніе ду́шъ и тѣле́съ на́шихъ.

И ны́нѣ, богоро́диченъ, гла́съ 8:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ тропа́рь, гла́съ 8, два́жды [пи́санъ на ма́лѣй вече́рни], и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь святы́хъ, два́жды. Сла́ва, и ны́нѣ, богоро́диченъ, гла́съ 8: Иже на́съ ра́ди рожде́йся отъ Дѣ́вы...

По 1-мъ стихоло́гіи сѣда́ленъ, гла́съ 2:

Вели́кихъ досто́йни бы́вше дарова́ній, сла́вніи, во смире́ннѣмъ житіи́ на земли́ пожи́сте и, преходя́ще всю́ду, ту́не боля́щимъ неду́ги и стра́сти исцѣля́юще, яви́стеся а́нгеломъ собесѣ́дницы, Космо́ и Даміа́не, вѣ́рніи, бра́тіе прекра́сніи, и на́ша стра́сти моли́твами ва́шими исцѣли́те. [Два́жды.]

Сла́ва, и ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

По 2-мъ стихоло́гіи сѣда́ленъ, гла́съ 1:

Страстоте́рпцы Христо́вы, Космо́ и Даміа́не, моли́теся за ны́, вѣ́рою приходя́щія къ ва́мъ: вы́ бо моли́твами ва́шими подае́те исцѣле́нія благода́ть, и премно́гія неду́ги отгоня́ете, я́ко сохра́нницы жи́зни на́шея. [Два́жды.]

Сла́ва, и ны́нѣ, богоро́диченъ:

Пречи́стая Богоро́дице, на небесѣ́хъ благослове́нная, и на земли́ славосло́вимая, ра́дуйся Невѣ́сто неневѣ́стная.

[Поліеле́й.]

Велича́ніе: Велича́емъ ва́съ чудотво́рцы сла́вніи, Космо́ и Даміа́не, и чте́мъ честна́я страда́нія ва́ша, я́же за Христа́ претерпѣ́ли есте́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Возсія́ дне́сь пра́зднество страстоте́рпцевъ Космы́ и Даміа́на, имѣ́ютъ бо съ небесе́ зарю́. Ли́къ а́нгельскій торжеству́етъ, и человѣ́ческій ро́дъ спра́зднуетъ: тѣ́мже сíи мо́лятъ о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Ди́вныя Дѣ́вы та́йна, всему́ мíру яви́ся спасе́ніе, изъ Нея́же роди́ся ра́дость: Го́споди, сла́ва Тебѣ́!

Степе́нна, 1-й антифо́нъ 4-го гла́са. Проки́менъ, [гла́съ 4]: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Вся́кое дыха́ніе... Ева́нгеліе Матѳе́я, зача́ло 34 отъ полу́.

По 50-мъ псалмѣ́ стихи́ра, гла́съ 1:

Свѣтоза́рная, и свята́я и благообра́зная, му́ченковъ Космы́ и Даміа́на, всепра́зднственная па́мять, я́же всю́ зе́млю просвѣща́ющи, мра́къ грѣхо́вный отгоня́ющи, лѣчба́мъ благода́ть источа́етъ.

Кано́нъ Богоро́дицы, со ирмосо́мъ на 6, и святы́хъ на 8, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Дво́ице свѣтови́дная му́дрыхъ безсре́бреникъ, Тро́ицѣ Честнѣ́й со всѣ́ми избра́нными предстоя́щи, моли́ся, па́мять твою́ свѣтоно́сную творя́щимъ просвѣти́тися Ду́ха боже́ственными свѣтлостьми́.

Превысо́цы умо́мъ въ су́щихъ ве́щехъ я́вльшеся, невеще́ственна блиста́нія Ду́ха, му́дріи, прія́сте, святíи. Тѣ́мже тму́ неду́говъ разрѣша́ете всегда́ посѣще́ніи боже́ственными, безсре́бреницы.

Недрема́нно душе́вное стяжа́вше о́ко ко исполне́нію Бо́жію боже́ственныхъ за́повѣдей, спя́щія въ неду́зѣхъ, сла́вніи, къ до́брому здра́вію возбужда́ете благода́тію, ми́лостивіи богоно́сніи безсре́бреницы.

Моле́нія, безсре́бреницы вра́чеве, Бо́гу принеси́те, я́ко да изба́витъ ны́ искуше́ній и скорбе́й мно́гихъ, и тре́петнаго и стра́шнаго тогда́ муче́нія.

Богоро́диченъ: Спа́са и Бо́га отъ чи́стыхъ Твои́хъ крове́й воплоти́ла еси́, Чи́стая, показа́вшаго на́мъ врачи́ душа́мъ на́шимъ, Пречи́стая, спаси́тельны и теплы́ засту́пники, честны́я безсре́бреники, Ду́хомъ.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Мѵ́ро благово́нно исцѣле́ній боже́ственный хра́мъ ва́шъ источа́етъ свяще́нно, ту́чи духо́вныя, стра́сти злосмра́дныя отмыва́я всегда́.

Въ небе́сныхъ се́лѣхъ водворя́ющеся всегда́, сѣ́нь ва́шу при́сно исто́чникъ исцѣле́ній, прему́дріи, показу́ете благода́тію Вседержи́теля.

Плотскíя стра́сти воздержа́нія броздо́ю обузда́вше, духо́вныя зари́ пребога́тно прія́сте, тѣ́мже исцѣле́ньми мíръ обогаща́ете.

Мíръ пое́тъ ва́ша, святíи, всегда́ мно́гая благодѣя́нія, и чуде́съ мно́жество, чудотво́рцы вра́чеве, а́нгелъ всѣ́хъ равностоя́теле.

Богоро́диченъ: Краснѣ́йшу въ жена́хъ Тя́ Бо́гъ избра́ и изъ Тебе́ пло́тски, Чи́стая, роди́тися благоизво́ли, почива́яй во святы́хъ Свои́хъ.

Сѣда́ленъ, гла́съ 8. Подо́бенъ: Прему́дрости.

Исцѣле́ній да́тели, и чудотво́рцы, и чуде́съ свѣти́льники свѣтопріе́мніи всѣ́мъ яви́стеся духо́вною благода́тію, страстны́й бо пла́мень вѣ́рою прохлажда́ете и вѣ́рнымъ въ не́й смы́слъ согрѣва́ете. Тѣ́мъ врачевство́ душе́вное стяжа́вше, боже́ственную це́рковь ва́шу, къ не́йже прибѣга́юще, вопіе́мъ: богоно́сцы безсре́бреницы, моли́те Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, гла́съ и подо́бенъ то́йже:

Исцѣле́ній зари́ су́щимъ на земли́ возсія́юще, боже́ственніи чудотво́рцы, я́вѣ отгоня́ете человѣ́ковъ неду́ги, вои́стинну незаходи́маго Со́лнца въ себѣ́ стяжа́вше, Христа́ Бо́га на́шего. Тѣ́мже, досто́йно соше́дшеся, почита́емъ сла́вную, святíи, и честну́ю ва́шу па́мять, богоно́сніи безсре́бреницы. Моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

И ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Живоно́сными дѣ́йствы, вся́ческими дѣя́ніи, смертоно́сныя стра́сти человѣ́ковъ исцѣля́ете, свѣтови́дніи столпи́, забра́ла недви́жима, виногра́да и́стиннаго боже́ственныя ло́зы.

Сосцы́ церко́вніи, и́же млеко́ пролива́юще исцѣле́ній, просвѣще́ній, безсре́бреницы, пита́юще всѣ́хъ боже́ственными бра́шны, да восхва́лятся ра́достными пѣ́сньми.

Врачевство́ показа́ся хра́мъ ва́шъ, святíи, обурева́емымъ небу́рно приста́нище и спаси́тельно, въ о́ньже притека́юще, вси́ пріе́млемъ тишину́ и лю́тыхъ избавле́ніе.

Досто́йно хвали́ми есте́ на земли́, исцѣли́тели неду́жныхъ, безме́здницы Космо́ и Даміа́не, я́ко и по кончи́нѣ вся́ отъ неду́гъ свобожда́ете.

Богоро́диченъ: Ми́лости мя́, Дѣ́во, я́же въ Тебѣ́, сподо́би, ро́ждшая Сло́во, еди́на вои́стинну Ми́лостивное, еди́но ми́лостивны святы́я показа́вшее, цѣли́тели и чудотво́рцы въ концѣ́хъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Боже́ственными свѣтлостьми́ я́вѣ облиста́еми, ве́сь обхо́дите мíръ, вся́ человѣ́ки просвѣща́ете, тму́ отъе́млюще страсте́й, де́моны прогоня́юще, богоно́сніи безсре́бреницы.

Яко два́ просвѣща́ете свѣти́льники поднебе́сную, духодви́жно, богоно́сцы, всю́ тва́рь обходя́ще, и и́же на одрѣ́ болѣ́зней посѣща́юще, и отъ бѣ́дъ изыма́юще.

Неду́гующимъ исцѣле́ніе, страсте́й избавле́ніе подаю́ще безсре́бренно, всѣ́мъ предста́тели вели́цы яви́стеся, всѣ́мъ помо́щницы съ Бо́гомъ, всѣ́мъ засту́пницы, богоно́сніи безсре́бреницы.

Моли́твами святы́хъ служи́телей, Космы́ и Даміа́на, Ты́, Спа́се на́шъ, да́ждь мíру всему́ Твоя́ ми́лости, я́ко Милосе́рдъ.

Богоро́диченъ: Му́дрость породила́ еси́ Бо́жію Ѵпоста́сную, Пречи́стая Дѣ́во Богоро́дице, святы́я прему́дры показа́вшую, и́миже зломудреца́ паде́ся шата́ніе и лю́тая ухищре́нія.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Не хи́тростію человѣ́ческою, но Боже́ственною благода́тію очища́ете неду́ги человѣ́ковъ, сла́вніи, сего́ ра́ди соше́дшеся, по до́лгу ва́съ ублажа́емъ.

Любо́вію ко Христу́, богоно́сніи, связа́еми, всю́ зло́бу де́моновъ разруша́ете Боже́ственною благода́тію, сего́ ра́ди ва́ше соверша́емъ торжество́.

Яко су́ще виногра́да боже́ственнаго прозябе́нія, вино́ на́мъ исцѣле́ній, су́щимъ въ сѣ́тованіи неду́говъ, точа́ще, весе́лія исполня́ете, безсре́бреницы.

Живу́ще, му́ченицы, ра́достно на небесѣ́хъ, въ честны́й хра́мъ ва́шъ пріити́ потщи́теся, и на́ша неду́ги тѣле́сныя, и серде́чныя стра́сти исцѣли́те.

Богоро́диченъ: Хра́мъ Тя́ чи́стъ содѣ́ла, Влады́чице, Пречи́стое Сло́во, Еже боже́ственный хра́мъ безсре́бреникъ велича́я въ чудесѣ́хъ и зна́меніихъ всегда́.

Конда́къ, гла́съ 2:

Благода́ть пріи́мше исцѣле́ній, простира́ете здра́віе су́щимъ въ ну́ждахъ, вра́чеве, чудотво́рцы пресла́вніи, но ва́шимъ посѣще́ніемъ ра́тниковъ де́рзости низложи́те, мíръ исцѣля́юще чудесы́.

Икосъ:

Вся́каго ра́зума и му́дрости прехо́дитъ сло́во му́дрыхъ враче́въ, и всѣ́мъ ра́зумъ подаю́тъ: Вы́шняго бо благода́ть пріе́мше, неви́димо здра́віе да́руютъ всѣ́мъ. Отону́дуже и мнѣ́ по́вѣсти благода́ть дарова́ся пѣ́ти, я́ко богоно́сныя уго́дники Христо́вы и служи́тели, исцѣле́ній мно́жество подаю́щія, болѣ́зни бо всѣ́хъ избавля́ютъ, мíръ исцѣля́юще чудесы́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Отверза́юще исто́чникъ богода́нный, святíи, всѣ́мъ рѣ́ки источа́ете чи́стыхъ исцѣле́ній, отмыва́юще страсте́й скверне́нія и де́моновъ зло́бу всегуби́тельную.

Укрѣпля́еми Вседержи́теля Ду́ха благода́тію, здра́віе боля́щимъ всегда́ подае́тъ дво́ица безсре́бреникъ Твои́хъ досточу́дная, Сло́ве Бо́жій, Му́дросте и Си́ло.

Свя́тъ еди́нъ еси́, прославля́я святы́я Твоя́, мíръ бо тѣ́хъ ра́ди избавля́еши отъ бѣ́дъ и просвѣща́еши зову́щія: благослове́нъ еси́ въ хра́мѣ сла́вы Твоея́, Го́споди.

Па́мять честну́ю творя́ще безме́здниковъ, ра́достію вопіе́мъ Ти́, Ще́дре: благослове́нъ еси́, Го́споди, Бо́же оте́цъ на́шихъ.

Богоро́диченъ: Же́злъ изъ ко́рене Іессе́ева Ты́ прозябла́ еси́, цвѣ́та Христа́ израсти́вши, Марíе, я́ко цвѣтцы́, чудесы́ украси́вшаго Своя́ безсре́бреники уго́дныя.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

На́зи вся́кія яви́стеся вра́жія зло́бы, святíи, Боже́ственнымъ Ду́хомъ, на́мъ бы́вше оде́жда спасе́нія, и оставле́нія вина́, и лю́тыхъ премѣне́ніе, вопію́щимъ: вся́ дѣла́, благослови́те, Госпо́дня, Го́спода.

Сы́нове по прича́стію Бо́жію, Даміа́не и Космо́, бы́вше, вѣ́рою оте́ческій жре́бій ны́нѣ обрѣто́сте, небе́сное наслажде́ніе и чуде́съ свѣ́тлое вои́стинну дѣ́йство, и вопіе́те: вся́ дѣла́, благослови́те, Госпо́дня, Го́спода.

Кропле́ньми ва́шими боголѣ́пными скве́рну омы́йте душе́вную на́шу, и болѣ́зненныя, святíи, прожени́те стра́сти, и де́монская стремле́нія отыми́те, я́ко предста́теліе и я́ко цѣли́теліе на́ши ми́лостивіи.

Яко кри́нъ, я́ко цвѣ́тъ мы́сленный, я́ко шипцы́, Ду́хомъ укра́шени, на́мъ яви́стеся, святíи, благово́ніе воспуща́юще и злосмра́діе страсте́й отгоня́юще, вопію́щимъ: вся́ дѣла́, благослови́те, Госпо́дня, Го́спода.

Житіе́ у́бо па́че человѣ́къ, и добродѣ́тельную жи́знь, кíй человѣ́къ безме́здниковъ не восхва́литъ? Ве́лія бо чудеса́ на земли́ творя́ху при́сно: Го́спода по́йте, и превозноси́те Его́ во вѣ́ки.

Богоро́диченъ: Умерщвля́ется сме́рть Тобо́ю, Жи́знь бо родила́ еси́ Ѵпоста́сную — Христа́ Бо́га, Пречи́стая, и предста́тели жи́зни на́шея показа́вшаго, безсре́бреники врачи́, вопію́щимъ: благослове́нъ, Пречи́стая, Пло́дъ Твоего́ чре́ва.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Се́ ны́не что́ добро́, или́ что́ красно́, я́коже пи́шетъ, но то́кмо, е́же жи́ти ны́нѣ бра́тіи въ единомышле́ніи, въ мѣ́стѣ свѣтоза́рнѣ, въ се́лѣхъ небе́сныхъ, въ сла́вѣ неувяда́ющей, я́же по достоя́нію ублажа́емъ.

Яко вели́къ сíй хра́мъ, чудесы́ всегда́ украша́емь, въ о́ньже при́сно приходя́ще, Космо́ и Даміа́не досточу́дніи, здра́віе тре́бующимъ подава́ете, тѣ́мже досто́йно блажи́ми есте́.

Дне́сь сра́дуются на́мъ, блаже́нніи, въ па́мяти ва́шей, а́нгели и боже́ственніи апо́столи, проро́цы и преподо́бніи и вси́ пра́ведницы, съ ни́миже ра́достно водворя́ющеся, за ве́сь мíръ моли́теся.

Боже́ственная дво́ице и свѣтоза́рная, безсре́бренніи, и богоно́сніи, и всечестнíи, оставле́ніе согрѣше́ній, и исправле́ніе житія́ испроси́те, и всѣ́хъ лю́тыхъ избавле́ніе восхваля́ющимъ ва́съ всегда́.

Богоро́диченъ: Свѣ́та жили́ще, Чи́стая, была́ еси́, вся́ озари́вшаго и свѣтоно́сны и свя́ты показа́вшаго, ны́нѣ тму́ отъе́млюща страсте́й душетлѣ́нныхъ Ду́хомъ, Пречи́стая еди́на Приснодѣ́во.

Свѣти́ленъ. Подо́бенъ: Небо звѣзда́ми.

Ко́е дово́льно бу́детъ сло́во безсре́бреникъ изрещи́ благода́ть исцѣле́ній? Ибо су́ть по Бо́зѣ все́й вселе́ннѣй вра́чеве и спаси́теліе. [Два́жды.]

[Сла́ва, и ны́нѣ,] богоро́диченъ:

Держа́внымъ Твои́мъ кро́вомъ отъ вра́гъ навѣ́та на́съ, Чи́стая, Твоя́ рабы́, сохрани́ вся́ невре́дны, Тя́ бо стяжа́хомъ еди́ну прибѣ́жище въ ско́рбехъ.

На хвали́техъ стихи́ры на 4, гла́съ 1. Самогла́сно:

Благода́ть исцѣле́ній отъ Бо́га пріе́мше, безсре́бренно стра́сти ду́шъ и тѣле́съ на́шихъ те́плѣ исцѣля́ете, всекра́сніи безсре́бреницы, тѣ́мже ва́ми Христо́съ вѣ́рнымъ да́нное здра́віе да́руя, свѣти́ла неле́стная ва́съ показу́етъ вселе́ннѣй. Того́ умоли́те, спасти́ся душа́мъ на́шимъ.

Отъ вы́шняго про́мысла бе́здну исцѣле́ній поче́рпше, всѣ́мъ источа́ете вѣ́рнымъ исцѣле́нія, безсре́бреницы, преесте́ственнѣ бо неду́гующихъ стра́сти рукодѣ́йствіи та́инственными, отъ сокро́вищъ Ду́ха лѣчбы́ предлага́юще спаси́тельныя, стра́ждущихъ исцѣля́ете. Тѣ́мже хра́мъ че́стенъ бы́сте Живонача́льныя Тро́ицы, въ ва́съ бо я́вѣ оби́тель сотвори́, Ейже моли́теся спасти́ся душа́мъ на́шимъ.

Гла́съ 2.

Ѳеофа́ново: Любо́вію боже́ственною и жела́ніемъ бу́дущихъ, дѣ́тельнѣ пожи́вше, спаси́тельныя пути́ испра́висте. Тѣ́мже, чистоту́ душе́вную нескве́рно соблю́дше, ве́щнымъ до конца́ проти́ву ста́сте, Ду́хомъ же Боже́ственнымъ позла́щшеся, беззла́тно исцѣле́ніе неду́гующимъ подае́те, дво́ице свяще́нная, свѣтоза́рное собра́ніе, просвѣще́нный боже́ственный сопру́же, безсре́бреницы, въ ско́рбехъ и болѣ́знехъ посѣща́юще на́съ и ду́шъ на́шихъ неду́ги безме́здно исцѣля́юще.

Ге́рманово: Вели́кимъ сподо́бльшеся даро́мъ, прехва́льніи, въ смире́нномъ житіи́ на земли́ пожи́сте и, проходя́ще всю́ду, ту́не боля́щихъ стра́сти исцѣля́юще, яви́стеся а́нгеломъ собесѣ́дницы, Космо́ съ Даміа́номъ му́дрымъ, бра́тія прекра́сніи, и на́ша стра́сти моли́твами ва́шими исцѣли́те.

Сла́ва, гла́съ 4. Ѳеофа́ново:

Исто́чникъ исцѣле́ній иму́ще, святíи безсре́бреницы, исцѣле́ніе подае́те всѣ́мъ тре́бующимъ, я́ко вели́кимъ даро́мъ сподо́бльшеся отъ приснотеку́щаго исто́чника — Спа́са Христа́. Рече́ бо къ ва́мъ Госпо́дь, я́ко единоревни́телемъ апо́столовъ: се́ да́хъ ва́мъ вла́сть надъ ду́хи нечи́стыми, я́коже тѣ́хъ изгони́ти и исцѣли́ти вся́къ неду́гъ и вся́кую я́зю. Тѣ́мже, въ повелѣ́ніихъ Его́ до́брѣ пожи́вше, ту́не прія́сте, ту́не подае́те, исцѣля́юще стра́сти ду́шъ и тѣле́съ на́шихъ.

И ны́нѣ, богоро́диченъ, гла́съ то́йже:

[Еди́на Чи́стая и Пречи́стая Дѣ́во, Яже Бо́га безсѣ́менно ро́ждшая, моли́ спасти́ся душа́мъ на́шимъ.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ къ Кори́нѳяномъ, зача́ло 153. Аллилу́ія, гла́съ 4: Се́ что́ добро́, или́ что́ красно́, но е́же жи́ти бра́тіи вку́пѣ. Ева́нгеліе Матѳе́я, зача́ло 34, отъ полу́. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Слу́жба и Ака́ѳистъ святы́мъ безсре́бренникомъ и чудотво́рцемъ Космѣ́ и Даміа́ну. — М.: Сѵнода́льная тѵпогра́фія, 1913. — Л. 2 – 15, 39 – 43 об.

/ Къ оглавленію раздѣла /


Наверхъ / Къ титульной страницѣ

0