Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 31-й де́нь.
Святы́хъ чудотво́рцевъ и безсре́брениковъ Ки́ра и Іоа́нна.

[ВЕЧЕРЪ,]
На Го́споди воззва́хъ: стихи́ры безсре́брениковъ на 6, гла́съ 1. Подо́бенъ: Небе́сныхъ чино́въ.

Чуде́съ луча́ми облиста́вше вселе́нную всю́,* Ки́ре и Іоа́нне,* пресвѣ́тліи свѣти́льницы,* небеси́ уподо́бистеся благода́тію,* высо́каго жи́тельства добродѣ́тельми,* звѣ́зды предлага́еми. [Два́жды.]

Дождеро́дныя о́блаки, преизя́ществующа* многотеку́щими благода́тей чудесы́,* му́ченицы Госпо́дни,* всю́ зе́млю мы́сленно напая́ете,* здра́вая пѣснопѣ́нія Бо́гу* приноси́ти понужда́юща.

Исцѣля́ти стра́сти души́ и тѣлесе́* хи́трость отъ Бо́га и́стинно пріе́мше,* му́ченицы Госпо́дни,* преесте́ственно исцѣля́ете вся́* не человѣ́ческими лѣчба́ми враче́бными,* но Боже́ственными вдохнове́ньми.

Небе́сныя си́лы обходя́ще,* свѣтосія́нніи свѣти́льницы, Ки́ре и Іоа́нне,* до́бліи страда́льцы,* су́щихъ на земли́ исцѣля́ете тѣлеса́* и душе́вныя я́звы Христа́ ра́ди.* Его́же моли́те спасти́ на́съ.

Яко пото́ку сла́вы послѣ́дующе, Христу́,* исто́чницы безсме́ртія яви́стеся всѣ́мъ,* сла́дкія источа́ете струи́* тѣле́сныя и душе́вныя,* цѣле́бная врачева́нія,* и́же крове́й струи́ за Христа́ излія́вше усе́рднѣйше.

Сла́ва, гла́съ 8:

Дво́ица му́чениковъ дне́сь возсія́ на́мъ, душе́вныя болѣ́зни на́ша исцѣля́юща, Ки́ръ и Іоа́ннъ чудодѣ́йственніи. Овъ, у́бо равноа́нгельное облобыза́въ, еди́нственное житіе́ да́же до конца́ пожи́въ, кро́вію му́ченическою присвоя́ется Христу́; о́въ же, въ во́инскихъ просія́въ сосло́віихъ, небе́снымъ воинствосло́віямъ градопису́ется. Тѣ́мже и въ па́мяти и́хъ исцѣле́нія подаю́тъ вѣ́рою соверша́ющимъ, моля́щеся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Не терплю́, Ча́до, ви́дящи Тя́* на дре́вѣ усну́вша,* бо́дрость всѣ́мъ даю́щаго,* я́ко да и́же дре́вле преступле́нія плодо́мъ* сно́мъ поги́бельнымъ усну́вшимъ,* Боже́ственную и спаси́тельную* бо́дрость пода́си, —* Дѣ́ва глаго́лаше, пла́чущи,* Юже велича́емъ.

На стихо́внѣ окто́иха. Сла́ва, гла́съ 2:

Пріиди́те, вѣ́рныхъ сосло́віе, дне́сь, пѣ́сньми вѣнча́имъ Ки́ра со Іоа́нномъ, ра́таи благода́ти и да́тели прося́щихъ оби́льнѣйшія, многообра́знѣ бо всѣ́мъ яви́шася вра́чеве пресвѣ́тліи. Тѣ́мже и мо́лятъ о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Гро́здъ всезрѣ́лый, Чи́стая, Его́же невоздѣ́ланно во утро́бѣ плодоноси́ла еси́, на дре́вѣ я́ко узрѣ́ла еси́ Сего́ повѣ́шена, рыда́ющи, восклица́ла еси́ и взыва́ла еси́: Ча́до, сла́дость иска́пай, е́юже оты́мется пія́нство вся́кое страсте́й, Благодѣ́телю, Мене́ ра́ди, Тебе́ ро́ждшія, Твои́мъ благоутро́біемъ умоля́емь.

Тропа́рь, гла́съ 5:

Чудеса́ святы́хъ Твои́хъ му́ченикъ стѣ́ну необори́му на́мъ дарова́вый, Христе́ Бо́же, тѣ́хъ моли́твами совѣ́ты язы́ковъ разори́, ца́рства ски́птры укрѣпи́, я́ко Еди́нъ Бла́гъ и Человѣколю́бецъ.


НА УТРЕНИ,
Оба кано́на окто́иха и святы́хъ на 6, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Вла́сть на ле́сть воспрія́лъ еси́, Ки́ре блаже́нне, сострада́льца болѣ́зней имѣ́въ Іоа́нна сла́внаго. Тѣ́мъ сла́дости лу́чшія на небесѣ́хъ наслажда́етеся.

Во́инствомъ духо́внымъ препоя́сався, Ки́ре всече́стне, земно́е же во́инство оста́вивъ, Іоа́нне всехва́льне, на де́моны взя́сте отъ Христа́ побѣди́тельная.

Ѳе́клинѣ добродѣ́тели поревнова́вше, жены́ боже́ственныя, въ дѣ́вственную равноа́нгельную оде́жду благоче́стно одѣ́яшася, му́ченическимъ же жела́ніемъ къ подвиго́мъ совлеко́шася.

Богоро́диченъ: Безсѣ́менно Отчею во́лею отъ Боже́ственнаго Ду́ха Бо́жіяго зачала́ еси́ Сы́на и пло́тію породила́ еси́, изъ Отца́ безма́терня, на́съ ра́ди изъ Тебе́ безо́тча.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Плотско́ю не́мощію, укрѣпля́еми Христо́выми страстьми́, благосла́вніи му́ченицы человѣкоубíйцу низложи́ша.

Болѣ́зней пло́ти и нетлѣ́нныя сла́дости Ду́хомъ Христо́вы му́ченицы пріе́млюще, ра́довахуся.

Укрѣпи́ся немощно́е же́нскаго кресто́мъ естества́, тѣ́мже врага́ змíя му́жески побѣди́ша.

Богоро́диченъ: Ты́ еди́на земны́мъ па́че естества́ благи́хъ хода́таица, Ма́ти Бо́жія, была́ еси́, тѣ́мже Ти́, — ра́дуйся, — взыва́емъ.

Сѣда́ленъ, гла́съ 4. Подо́бенъ: Вознесы́йся.

До́лу влеку́щія сла́сти попра́вше, къ муче́нія страда́льцы Боже́ственнѣй высотѣ́ свѣ́тло взя́стеся благода́тію, Ки́ре и Іоа́нне, вселе́нныя свѣти́льницы. Тѣ́мже мо́лимся омраче́нія грѣха́ и неду́говъ изба́вити ны́, су́щаго надъ всѣ́ми Бо́га моля́ще. [Два́жды.]

Сла́ва, и ны́нѣ, богоро́диченъ:

По Бо́зѣ въ Тво́й, Богоро́дице, прибѣ́гъ, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́къ, и трепе́щу, моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Изъ Безнача́льнаго Отца́ рожде́ннаго, напослѣ́докъ Тя́ пло́тію ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко, сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Невече́рнія благода́ти свѣтозаре́ніе враги́ низложи́ любомра́чныя льсти́, сея́ ратобо́рцы, свѣти́льники сія́ющія, Ки́ра и Іоа́нна показа́вши.

Услади́шася Тро́ическимъ раче́ніемъ, и отъ Нея́ му́ченицы зѣло́ возлю́блени бы́вше, Ки́ръ же и Іоа́ннъ, соедине́ніемъ лу́чшимъ орга́ни Бо́жіи показа́стеся.

Яко че́стенъ ва́шъ хра́мъ, отгони́теленъ лука́выхъ духо́въ, отгоня́етъ неду́ги всѣ́хъ боля́щихъ, непобѣди́міи му́ченицы, благода́ть исцѣле́нія подава́етъ.

Богоро́диченъ: Неискусобра́чно родила́ еси́, о Дѣ́во, и по рождествѣ́ яви́лася еси́ дѣ́вствующи па́ки; тѣ́мже немо́лчными гла́сы, — ра́дуйся, — Тебѣ́, Влады́чице, вѣ́рою несомнѣ́нною взыва́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тя́, Спа́се, дво́ица му́чениковъ возжелѣ́, Ты́, Святы́й во святы́хъ, Ки́ра и Іоа́нна досто́йно поче́лъ еси́.

Твое́ дѣ́ло, Бла́же, врага́ потребле́ніе, Ты́ му́ченики благоче́стія Кресто́мъ содѣ́лалъ еси́ и сла́вою вѣнча́лъ еси́.

Тя́ еди́наго люби́ти небоя́зненнымъ мудрова́ніемъ, пома́завшеся дѣ́вствомъ, Іоа́ннъ и Ки́ръ му́жество содѣ́лаша.

Богоро́диченъ: Тя́ ору́жіе непобѣди́мое на враги́ предлага́емъ, Тя́ тве́рдость и наде́жду на́шего спасе́нія, Богоневѣ́сто, и́мамы.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Пожре́тися му́ченицы за Христа́ изво́лиша, не́жели и́доломъ пожре́ти, лука́ваго же мучи́теля привести́, за милосе́рдіе за ны́ поже́ршагося, я́ко овча́.

Изнемого́ша и́же неща́дно му́ченики стру́жущіи, стру́жемымъ же стрѣ́лы я́звы младе́нецъ быва́ху: пресла́вно бо утвержда́хуся Боже́ственнымъ Ду́хомъ.

Го́спода и Царя́ всея́ тва́ри исповѣ́давшая вѣ́рою дво́ица единому́дренная и единострада́льная беззако́ннымъ да́же до кро́ве сопроти́вишася.

Богоро́диченъ: О, чу́до, всѣ́хъ чуде́съ новѣ́йшее! Яко Дѣ́ва во утро́бѣ вся́ческая Содержа́щаго, неискусому́жно заче́нши, не тѣсновмѣсти́.

Конда́къ, гла́съ 3. Подо́бенъ: Дѣ́ва дне́сь.

Отъ Боже́ственныя благода́ти да́ръ чуде́съ пріе́мши, святíи, чудодѣ́йствуете непреста́нно, вся́ на́ша стра́сти рукодѣ́йствомъ сѣку́ще неви́димымъ, Ки́ре богому́дре со Іоа́нномъ сла́внымъ: вы́ бо Боже́ственніи вра́чеве есте́.

Икосъ:

Са́ми себе́ Бо́гу возло́жше, святíи, вся́кое искуше́ніе лю́тыхъ Его́ ра́ди претерпѣ́сте, уме́рше усе́рдно, му́ченицы до́бліи, и по кончи́нѣ всѣ́мъ источа́ете Боже́ственная дарова́нія, су́щимъ въ разли́чныхъ неду́зѣхъ, и отъ мно́гихъ исцѣля́юще зо́лъ, отъ ни́хже еди́нъ и пе́рвый е́смь а́зъ, окая́нный. Тѣ́ломъ бо и душе́ю отъ я́звъ лю́тыхъ болѣ́зную и вѣ́рою ва́мъ вопію́: исцѣли́те мя́, вы́ бо Боже́ственніи вра́чеве есте́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Извѣ́сивше я́ко въ преклоне́ніи мѣ́рила мудрова́ніе, тягото́ю пречи́стыя сла́вы страда́льцы возвыша́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Не невѣ́дуще супоста́тнаго умышле́ній, вся́къ ра́нъ ви́дъ и ласка́ній поплева́вше, му́ченицы: благослове́нъ еси́, — вопія́ху, — въ хра́мѣ сла́вы Твоея́, Го́споди.

Терпѣ́ніемъ ра́нъ вѣнча́еми, Іоа́ннъ же и Ки́ръ, защи́тницы, Тро́ицѣ взыва́ху: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, — ра́дуйся, — Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ко отверже́нію у́бо нечести́віи естество́мъ су́щаго Бо́га призыва́ху лю́тѣ; но непобѣ́дніи му́ченицы тва́рію явля́ху всѣ́хъ Зижди́теля су́ща, взыва́юще: благослови́те, вся́ дѣла́ Госпо́дня, Го́спода.

Неи́стовствующіися ле́стію гнѣ́вно, земна́я му́дрствующіи мучи́теліе и́же житіе́ иму́щія на небесѣ́хъ неразори́мо сме́ртію къ жи́зни отсыла́ху, взыва́ющія: благослови́те, вся́ дѣла́ Госпо́дня, Го́спода.

Мо́щи му́чениковъ блиста́нія чудесъ явишася вселеннѣй, Христе, злодемона мечтанную ле́сть посрамля́юще, вопію́щимъ же благолѣ́пно исцѣле́нія подава́юще: благослови́те, вся́ дѣла́ Госпо́дня, Го́спода.

Богоро́диченъ: Безъ ма́тере изъ Отца́ Сло́во Сы́й, пе́рвѣе, безъ отца́ бы́сть изъ Тебе́, второ́е, Всечи́стая, вопло́щся пе́рвѣе Безпло́тный, за благоутро́біе восхотѣ́въ спасти́ пою́щія: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Послушли́ва до сме́рти дво́ица непобѣди́мыхъ му́чениковъ яви́ся, Іоа́нна и Ки́ра, Влады́чнимъ Боже́ственнымъ велѣ́ніемъ, тѣ́мже въ ру́цѣ Зижди́теля своя́ ду́ши преда́ша.

Свѣти́ла сія́ютъ два́, чуде́съ сія́нія, отъ Исто́чника еди́наго свѣтоно́снаго, немощны́мъ источа́юща нетлѣ́нную благода́ть, я́же досто́йно велича́емъ.

Еди́ницу у́бо Боже́ственнаго существа́, но ѵпоста́сьми Тро́ицу, непобѣди́мыхъ му́ченикъ дво́ица му́жески богосло́вяше: воплоще́ннаго же Сло́ва, Еди́наго Христа́ во двою́ естеству́.

Богоро́диченъ: Пощади́ мя, Христе́, егда́ пріи́деши суди́ти мíръ со сла́вою, разрѣши́ мглу́ страсте́й мои́хъ, мольба́ми ро́ждшія Тя́ и честны́хъ му́ченикъ Твои́хъ, я́ко Бла́гъ и Многоми́лостивъ.

Свѣти́ленъ. Подо́бенъ: Не́бо звѣзда́ми.

Чудодѣ́йственніи свѣти́льницы, Ки́ре со Іоа́нномъ, душе́вныя на́ша неду́ги и тѣле́сныя исцѣли́те, отъ Го́спода пріе́мше благода́ть исцѣле́ній.

Сла́ва, и ны́нѣ, богоро́диченъ:

Отъ Бо́га мíрови пода́нныхъ благи́хъ Ты́ вина́ была́ еси́, Богоро́дице, но и ны́нѣ моли́ о о́бщемъ спасе́ніи благопремѣ́ннаго Бо́га.

На стихо́внѣ окто́иха. Сла́ва, гла́съ 4:

Достохва́льными пѣ́сньми, вѣ́рніи, возвели́чимъ Ки́ра и Іоа́нна, въ ду́сѣ единокро́вныя и по пло́ти братому́дрыя, съ ни́ми же Аѳана́сію до́блюю похваля́юще и прозябе́ніе ея́: Ѳеодо́тію, Евдоксíю и Ѳеокти́сту, страстоте́рпицы и приснодѣ́вы, моля́щія Христа́ о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Зва́нный свы́ше.

Не рыда́й Мене́, Ма́ти,* зря́щи на дре́вѣ повѣ́шена Твоего́ Сы́на и Бо́га,* на вода́хъ повѣ́сившаго зе́млю неодержи́мо* и всю́ тва́рь созда́вшаго,* и́бо воскресну́, и просла́влюся,* и а́дова ца́рствія сокрушу́ крѣ́постію,* и погублю́ того́ си́лу,* и свя́занныя изба́влю* отъ злодѣ́йства его́,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.


НА ЛИТУРГІИ,

Блаже́нна окто́иха, на 4, и святы́хъ отъ кано́на, пѣ́снь 3-я, на 4. Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ къ Кори́нѳяномъ, зача́ло 153. Аллилу́ія, гла́съ 2: Се́ что́ добро́, или́ что́ красно́, но е́же жи́ти бра́тіи вку́пѣ. Ева́нгеліе Матѳе́я, зача́ло 34, отъ полу́. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 326об. – 330 об.

/ Къ оглавленію раздѣла /


Наверхъ / Къ титульной страницѣ

0