Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 31-й де́нь.
Слу́жба и́же во святы́хъ отца́ на́шего Ники́ты епи́скопа, Новгоро́дскаго чудотво́рца.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.

Преподо́бне о́тче,* богоблаже́нне святи́телю Ники́то,* прилѣ́жныя моли́твы* за лю́ди твоя́ Бо́гу приноси́лъ еси́,* и, бездо́ждію нѣ́когда бы́вшу,* ты́, Влады́ку Христа́ умоли́въ,* до́ждь съ небесе́ све́лъ еси́,* и ча́да твоя́ возвесели́лъ еси́,* и благодаре́ніе Бо́гу возсыла́ти* вся́ научи́лъ еси́.* И ны́нѣ о ста́дѣ твое́мъ прилѣ́жно моли́ся,* спасти́ся душа́мъ на́шимъ. [Два́жды.]

Богоблаже́нне о́тче,* святи́телю Ники́то,* человѣ́че небе́сный,* земны́й а́нгеле,* дѣ́лателю виногра́да Христо́ва,* у́ме боже́ственный,* духо́вный орга́не,* свѣти́льниче многосвѣ́тлый,* любве́ струя́ неистощи́мая,* ви́дя гра́да запале́ніе* и лю́ди, въ печа́ли и тузѣ́ пребыва́ющія,* прилѣ́жно Христу́ моли́лся еси́,* и пла́мень угаси́лъ еси́,* и отъ ско́рби на ра́дость лю́ди твоя́ премѣни́лъ еси́. [Два́жды.]

Сла́ва, гла́съ 6:

Свяще́нная и сла́вная Це́рковь Вели́каго Нова́града, архіере́й же, и свяще́нныхъ собо́ри, и мно́жество наро́да, свѣ́тло торжеству́юще въ па́мять святи́теля Ники́ты, съ любо́вію взыва́юще: ра́дуйся, пресвѣ́тлый свѣти́льниче и моли́твенниче те́плый, мно́га бо лѣ́та сокрове́ны бы́ша честны́я твоя́ мо́щи, ны́нѣ же обрѣто́шася цѣ́лы и неразруши́мы и па́че со́лнца сія́ющи, я́же любе́зно лобыза́емъ, освяще́ніе пріе́млюще и глаго́люще: сія́ су́ть ча́да твоя́, святи́телю, я́же Ева́нгеліемъ породи́лъ еси́ и въ правосла́віи утверди́лъ еси́. И ны́нѣ моли́ся Го́споду спасти́ся душа́мъ на́шимъ.

И ны́нѣ, богоро́диченъ.
Вхо́дъ. Проки́менъ дне́. И чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ры, гла́съ 2. Подо́бенъ: Егда́ отъ дре́ва.

Боже́ственная благода́ть духо́вная пома́за тя́ мѵ́ромъ разу́мнымъ, святи́телю, Вели́кому Нову́граду первопресто́льника, и богоуго́дное твое́ житіе́ прекра́сна тя́, богому́дре, показа́. Святи́телей бы́лъ еси́ благолѣ́піе, преподо́бныхъ украше́ніе, и ны́нѣ мíръ ве́сь просвѣща́еши чуде́сными заря́ми. Тѣ́мъ па́мять твою́, Ники́то, торжеству́емъ.

По честнѣ́мъ твое́мъ преставле́ніи мно́га лѣ́та сокрове́ны бы́ша честны́я мо́щи твоя́, святи́телю Ники́то, ны́нѣ же обрѣто́шася цѣ́лы и невреди́мы, и, я́ко светоза́рное со́лнце, сія́юще, вѣ́рныхъ сердца́ просвѣща́юще и ве́сь мíръ озаря́юще. Тѣ́мже ра́достно соверша́емъ пречестну́ю па́мять твою́.

Яко свѣща́ пресвѣ́тлая, и я́ко свѣти́льникъ всемíрный, и я́ко заря́ прекра́сная, и я́ко звѣзда́ незаходи́мая, посреди́ вели́кія Це́ркве просія́ша честны́я мо́щи твоя́, святи́телю, свѣтоно́сными блиста́ніи ста́до твое́ просвѣща́юще и вся́, со стра́хомъ прикаса́ющіяся и уми́льно вопію́щія: со́нъ че́стенъ предъ Го́сподемъ сме́рть преподо́бныхъ Его́.

Сла́ва, гла́съ то́йже:

Зако́ны соблю́лъ еси́ духо́вныя, лю́ди твоя́ благоче́стію научи́лъ еси́, первосвяти́тельствуя Вели́кому Нову́граду, и тѣ́ло твое́ въ не́мъ положи́лъ еси́, я́ко да́ръ освяще́нъ, и сіе́ мно́гими лѣ́ты сокрове́но бы́сть, ны́нѣ же обрѣ́теся цѣ́ло и нетлѣ́нно. Приходя́щіи же къ ра́цѣ твое́й, лобза́юще, освяща́ются, съ вѣ́рою и любо́вію вопію́ще: о́тче на́шъ, святи́телю Ники́то, моли́ спасти́ся душа́мъ на́шимъ.

И ны́нѣ, богоро́диченъ.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, свяще́нная главо́,* архіере́ю Ники́то, святи́телемъ удобре́ніе,* по́стникомъ украше́ніе, свяще́нникомъ благолѣ́піе,* Вели́кому Нову́граду утвержде́ніе:* на земли́ бо, я́ко а́нгелъ, пожи́лъ еси́,* беззло́біемъ и пра́вдою укра́шенъ,* свѣти́ло вели́кое яви́вся на́мъ* и мíръ ве́сь просвѣща́я преди́вными чудесы́.* Тѣ́мже моли́ся Христо́ви* дарова́ти душа́мъ на́шимъ ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, свяще́нная главо́,* по́стниковъ непоколеби́мый сто́лпе,* а́нгеловъ собесѣ́дниче.* Пречи́сто зерца́ло Ду́ха Пресвята́го яви́лся еси́* и, Того́ заря́ми при́сно облиста́яся,* вѣ́рныхъ сердца́ озаря́еши,* болѣ́зни облегча́еши, неду́ги отгоня́еши.* Тѣ́мже моли́ся* дарова́ти душа́мъ на́шимъ ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, свяще́нная главо́,* святи́телю богопрія́тне,* сто́лпе непревра́тный,* непоколеби́мо основа́ніе вѣ́ры,* церко́вное украше́ніе, святи́телей удобре́ніе,* сла́ва пра́ведныхъ.* Тѣ́мже тя́ ублажа́емъ, моле́бно воспѣва́юще:* святи́телю богодохнове́нне,* моли́ся Христу́* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Человѣ́че небе́сный, земны́й а́нгеле, дѣ́лателю виногра́да Христо́ва, уясни́лъ еси́ вѣ́рныхъ сердца́ медото́чными уче́ніи, и вся́ благолѣ́пно просвѣти́лъ еси́, и ны́нѣ отъ Христа́ неувяда́емымъ увя́злся еси́ вѣнце́мъ, моли́ о душа́хъ на́шихъ.

И ны́нѣ, богоро́диченъ.

Тропа́рь, гла́съ 4:

Наслади́вся, богому́дре, воздержа́нія и жела́ніе пло́ти твоея́ обузда́въ, на престо́лѣ святи́тельства сѣ́лъ еси́, и я́ко звѣзда́ многосвѣ́тлая, просвѣща́я вѣ́рныхъ сердца́ заря́ми чуде́съ твои́хъ, о́тче на́шъ, святи́телю Ники́то, и ны́нѣ моли́ Христа́ Бо́га, да спасе́тъ ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 3:

Яко пресвѣ́тло со́лнце, возсія́въ, лю́ди твоя́ просвѣти́лъ еси́ уче́ніи слове́съ твои́хъ, страсте́й очерне́ніе потреби́лъ еси́, святи́телю Ники́то, моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

По 2-й стихоло́гіи сѣда́ленъ, гла́съ 4:

Отъ искуше́ній лука́ваго прему́дренно себе́ соблю́лъ еси́, святи́телю, и вконе́цъ того́ низложи́лъ еси́, и Христо́вы Це́ркве сто́лпъ и утвержде́ніе бы́лъ еси́, тѣ́мже, соше́дшеся, па́мять твою́ почита́емъ, богому́дре. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ, мольбу́ пріе́мши отъ на́съ: не преста́й моля́щи Человѣколю́бца спасти́ся рабо́мъ Твои́мъ.

По поліеле́и сѣда́ленъ, гла́съ 8:

Смире́ніемъ Влады́цѣ Христу́ послѣ́довавъ, воздержа́ніемъ житіе́ украси́лъ еси́ и, отъ Сего́ му́дрости сло́во ввѣря́я, къ добродѣ́тели наказа́тель яви́лся еси́. Тѣ́мже вопіе́мъ ти́: святи́телю Ники́то, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 11.

По 50-мъ псалмѣ́ стихи́ра, гла́съ 6:

Ду́ха Свята́го благода́ть въ твои́хъ устна́хъ излія́ся, о́тче Ники́то святи́телю, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную, во Еди́но Божество́.

Кано́нъ Богоро́дицы со ирмосо́мъ на 6 и свята́го два́ кано́на на 8.

Кано́нъ свята́го: пѣ́ніе моле́бно, сложено́ по а́збуцѣ, совершено́ же и́менемъ списа́вшаго. Гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Агнче непоро́чный, Бо́жій Сло́ве, отве́рзи моя́ недосто́йная уста́, да возмогу́ воспѣ́ти святи́теля Ники́ту, Твоего́ уго́дника.

Болѣ́зньми по́стническими ду́шу просвѣти́въ, преподо́бне, я́ко чи́сту же́ртву Христу́ предста́вилъ еси́, ра́дуяся, поя́: сла́вно бо просла́вися.

Воздержа́ніемъ тѣ́ло ду́ху порабо́тилъ еси́, ду́шу же равноа́нгельну сотвори́лъ еси́. Помина́й вѣ́рою чту́щія тя́, поя́ Бо́гу: сла́вно бо просла́вися.

Богоро́диченъ: Господороди́тельнице Влады́чице Марíе, моли́, Его́же родила́ еси́, Бо́га и Царя́ на́шего, да ми́лостивъ бу́детъ на́мъ въ де́нь Су́дный.

Другíй кано́нъ, сложе́нъ та́коже по а́збуцѣ воспятослове́сно. Гла́съ 7.
Пѣ́снь 1.

Ирмо́съ: Поспѣшествова́вшему Бо́гу во Еги́птѣ Моисе́ови, извести́ Изра́иля, Тому́ Еди́ному пои́мъ, я́ко просла́вися.

Щедро́ты Твоя́ призыва́емъ, Го́споди, да досто́йно пѣ́ніе принесе́мъ уго́днику Твоему́, святи́телю Ники́тѣ, Тя́ воспѣва́юще, я́ко просла́вися.

Ше́ствіе твое́ до́брѣ сконча́лъ еси́ и на небеса́ возше́лъ еси́, престо́лу Влады́чню предстоя́, со а́нгелы Того́ воспѣва́еши, я́ко просла́вися.

Что́ шу́мъ пра́зднующихъ быва́етъ и лю́діе свѣ́тло торжеству́ютъ? Дне́сь бо обрѣто́шася честны́я мо́щи святи́теля Ники́ты, и вси́ ра́достно вопію́тъ Христу́, я́ко просла́вися.

Богоро́диченъ: Цари́цу и Влады́чицу Тя́ имену́емъ, Дѣ́во, подъ кро́въ Тво́й прибѣга́юще и по́мощи отъ Тебе́ прося́ще, Сы́ну Твоему́ воспѣва́юще, я́ко просла́вися.

Катава́сія: Су́шу глубороди́тельную зе́млю...

Пѣ́снь 3.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Дѣ́латель бы́въ за́повѣдей Госпо́днихъ, непреста́нно въ ни́хъ поуча́яся, о́тче Ники́то, сего́ ра́ди вше́лъ еси́ въ небе́сная, вопія́ ра́достно: нѣ́сть свя́тъ и нѣ́сть пра́веденъ, па́че Тебе́, Го́споди.

Егда́, зави́дѣвъ тебе́, прелука́вый хотя́ше запя́ти отъ добродѣ́телей, сопротивоста́въ, преподо́бне, безъ вѣ́сти того́ сотвори́лъ еси́, Христу́ вопія́: нѣ́сть свя́тъ и нѣ́сть пра́веденъ, па́че Тебе́, Го́споди.

Житіе́мъ добродѣ́тельнымъ Бо́гу угоди́лъ еси́, веліа́ра посрами́въ, и Христу́ возопи́лъ еси́: нѣ́сть свя́тъ и нѣ́сть пра́веденъ, па́че Тебе́, Го́споди.

Богоро́диченъ: Зачала́ еси́ Отчее Сло́во Ѵпоста́сное, Его́же моли́, Богоро́дице, изба́вити отъ бѣ́дъ рабы́ Твоя́, вои́стинну призыва́ющія Тя́.

Инъ.

Ирмо́съ: Утверди́ся вѣ́рою Христо́ва Це́рковь, и́бо непреста́нно пѣ́сньми вопіе́тъ, пою́щи: Свя́тъ еси́, Го́споди, и Тя́ пое́тъ ду́хъ мо́й.

Отъ земны́хъ нѣ́дръ воспріе́млемъ, я́ко да́ръ освяще́нъ, честны́я мо́щи твоя́, святи́телю, и отъ си́хъ освяще́ніе пріе́млемъ, Христа́ воспѣва́юще: Свя́тъ еси́, Го́споди, спаса́яй ду́ши на́ша.

Хра́мъ Свята́го Ду́ха отъ ю́ности бы́лъ еси́, о́тче, сего́ ра́ди и по сме́рти соблюде́ся тѣ́ло твое́ нетлѣ́нно, и, сіе́ ра́достно лобыза́юще, вопіе́мъ Христу́: Свя́тъ еси́, Го́споди, спаса́яй ду́ши на́ша.

Фарисе́йское тщесла́віе отри́нувше, со смире́ніемъ и ра́достію цѣлу́емъ честны́я твоя́ мо́щи, святи́телю Ники́то, Христу́ вопію́ще: Свя́тъ еси́, Го́споди, спаса́яй ду́ши на́ша.

Богоро́диченъ: Укра́шена ря́снами чистоты́, Пречи́стая Отрокови́це, благослове́нная Влады́чице, Предста́тельнице ро́да на́шего.

Катава́сія: Утвержде́ніе на Тя́...

Сѣда́ленъ, гла́съ 1:

Яко са́дъ присноцвѣту́щь, лю́ди твоя́ сотвори́лъ еси́, сія́ во благоче́стіи возрасти́въ, умно́жилъ еси́, и отъ сего́ вѣ́ренъ ра́бъ и дѣ́латель виногра́да Христо́ва показа́лся еси́, и трудо́мъ возме́здіе досто́йно воспрія́лъ еси́, святи́телю, моли́ Христа́ Бо́га, да спасе́тъ ду́ши на́ша. [Два́жды.]

Сла́ва, и ны́нѣ, богоро́диченъ:

Всѣ́хъ Творца́, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ Твои́хъ заче́нши, безъ нетлѣ́нія родила́ еси́. Его́же сла́вяще, Тя́ воспѣва́емъ, Дѣ́во, я́ко пала́ту Царя́ всѣ́хъ и мíра заступле́ніе.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Зако́номъ оте́ческимъ послѣ́дуя и си́хъ житіе́ подража́я, непреста́нно Христу́ взыва́лъ еси́: сла́ва си́лѣ Твое́й.

Изъ мла́да Христа́ возлюби́лъ еси́, сего́ ра́ди я́ко рачи́теля Своего́ возлюби́ тя, къ Нему́же вопіе́ши: сла́ва си́лѣ Твое́й.

Исполня́я зако́ны боже́ственныя, преиспо́лнился еси́ дарова́ній боже́ственныхъ, святи́телю Ники́то, вѣ́рно взыва́еши: сла́ва си́лѣ Твое́й, Го́споди.

Богоро́диченъ: Кади́льнице всезлата́я, Марíе Всенепоро́чная, Христа́ моли́, Его́же родила́ еси́, изба́вится на́мъ отъ бѣ́дъ и огня́ вѣ́чнующаго.

Инъ.

Ирмо́съ: Плотско́е прише́ствіе Твое́, Христе́, увѣря́я, проро́къ Авваку́мъ взыва́ше: сла́ва си́лѣ Твое́й, Го́споди.

Тя́ моли́твенника непосты́дна ко Влады́цѣ стяжа́хомъ, святи́телю, моли́ о воспѣва́ющихъ па́мять твою́, изба́вити въ бу́дущемъ Судѣ́ вѣ́чнующаго осужде́нія.

Свѣ́тлыми сія́ньми провозсія́вшія честны́я твоя́ мо́щи отъ мно́гихъ бо лѣ́тъ бы́ша сокрове́ны, ны́нѣ же, я́ко заря́ пресвѣ́тла, просвѣща́ютъ и освяща́ютъ пою́щія тя́.

Ра́дость, и весе́ліе, и ра́дованіе неизрече́нно твоему́ ста́ду, святи́телю, показа́ся обрѣ́теніе честны́хъ моще́й твои́хъ, въ не́же испроси́ на́мъ оставле́ніе грѣхо́въ и вели́кую ми́лость.

Богоро́диченъ: Правосла́вною вѣ́рою и любо́вію притека́ющихъ Ти́ и со стра́хомъ пою́щихъ Тя́ моле́бный гла́съ услы́ши, Влады́чице.

Катава́сія: Покры́ла е́сть небеса́...

Пѣ́снь 5.

Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.

Лу́къ врага́ сокруши́лъ еси́, и бра́нь его́ до конца́ разори́лъ еси́, и соверше́нія добродѣ́телей, преподо́бне, дости́глъ еси́.

Моли́твою возше́лъ еси́ на небе́сная, идѣ́же съ ли́ки оте́цъ пребыва́я, весели́шися. Помина́й, преподо́бне, па́мять твою́ свѣ́тло торжеству́ющія.

Неизрече́нныхъ та́инъ Христо́выхъ служи́тель бы́ти сподо́бился еси́ и, сія́ принося́ Бо́гу, за мíръ прилѣ́жно моли́лся еси́.

Богоро́диченъ: Упова́ніе и наде́жда на́ша Ты́ еси́, Пречи́стая Влады́чице, спаси́ Импера́тора Правосла́внаго и лю́ди Твоя́, моля́щіяся и и́мя Твое́ призыва́ющія.

Инъ.

Ирмо́съ: Утренююще, Сло́ве, въ сла́ву Твою́ и хвалу́, восхваля́емъ непреста́нно о́бразъ Креста́ Твоего́, его́же да́лъ еси́ на́мъ ору́жіе въ по́мощь.

Умиле́нія исто́чникъ мнѣ́ испроси́, въ честнѣ́мъ твое́мъ торжествѣ́, святи́телю Ники́то, да отмы́ю скве́рну души́ моея́ и покая́ніе моли́твами твои́ми обря́щу на по́мощь ору́жіе.

Нова́града бы́въ первосвяти́тель и́стиненъ, облагово́ни на́ша чу́вства душе́вная, да моли́твы твоя́ предста́виши на́мъ на по́мощь ору́жіе.

Мно́жествомъ искуше́ній содержи́мь е́смь, на тя́ наде́жду возлага́ю, святи́телю Ники́то, да предста́виши ми́ моли́тву твою́ на по́мощь ору́жіе.

Богоро́диченъ: Лѣ́ствица прообража́ше Тя́ патріа́рха Іа́кова, Всенепоро́чная Влады́чице, Бо́жіе схожде́ніе на́мъ я́вѣ сказу́ющи.

Катава́сія: Яко ви́дѣ Иса́ія...

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Предызбра́нъ бы́въ Боже́ственною благода́тію, во е́же па́ствити ста́до христоимени́то, ты́ же, преподо́бне, я́ко па́стырь и́стиненъ, прилѣ́жно о ста́дѣ попече́ніе имѣ́лъ еси́.

Разу́мнѣ разсужда́я, ча́да твоя́ и ча́сто наказу́я духо́вными словесы́, да пребу́дутъ тве́рдо соблюда́юще вѣ́ру правосла́вную.

Святи́тельства че́стію почте́нъ, прилѣ́жно моле́ніе за лю́ди твоя́ приноси́лъ еси: да ми́лостива Бо́га обря́щутъ въ де́нь Су́дный.

Богоро́диченъ: Ты́ еси́, Пречи́стая Богоро́дице, прибѣ́жище на́ше и утвержде́ніе, моли́ Сы́на Твоего́ и Бо́га на́шего пода́ти на́мъ спасе́ніе и грѣхо́въ оставле́ніе.

Инъ.

Ирмо́съ: Пла́вающаго въ молвѣ́ жите́йскихъ попече́ній, съ корабле́мъ потопля́ема грѣхи́ и душетлѣ́нному звѣ́рю примета́ема, я́ко Іо́на, Христе́, вопію́ Ти́: изъ смертоно́сныя глубины́ возведи́ мя.

Крѣ́пость и утвержде́ніе испроси́ Вѣ́рному Импера́тору на́шему, святи́телю Ники́то: да моли́твами твои́ми христіа́нскій ро́дъ въ тишинѣ́ пребу́детъ, воспѣва́ющій тя́, я́ко те́пла засту́пника.

Изба́витися ста́ду твоему́ вся́каго озлобле́нія и ско́рби моли́ся, святи́телю Ники́то: ты́ бо еси́ наде́жда непосты́дна, упова́ніе извѣ́стно и стѣна́ необори́мая.

И на́мъ, пою́щимъ и сла́вящимъ твою́ па́мять, испроси́, святи́телю Ники́то, грѣхо́въ разрѣше́ніе, суда́ и му́ки избавле́ніе и Ца́рствія небе́снаго сподо́битися.

Богоро́диченъ: Земноро́дныхъ естество́ на не́бо Тобо́ю взы́де, пала́та бо Царе́ва обрѣла́ся еси́, Богоро́дице, тѣ́мже согла́сно воспѣва́емъ Тя́.

Катава́сія: Возопи́ къ Тебѣ́...

Конда́къ, гла́съ 6. Подо́бенъ: Еже о на́съ.

Архіере́йства са́номъ почти́вся и чи́стѣ Чистѣ́йшему предстоя́, прилѣ́жно моле́ніе за лю́ди твоя́ приноси́лъ еси́, я́ко и до́ждь моли́твою све́лъ еси́, овогда́ же и гра́да запале́нія угаси́лъ еси́. И ны́нѣ, святи́телю Ники́то, моли́ Христа́ Бо́га спасти́ Импера́тора Правосла́внаго [и́мярекъ] и лю́ди твоя́ моля́щіяся, да вси́ вопіе́мъ ти́: ра́дуйся, святи́телю о́тче преди́вный.

Икосъ:

Кто не почуди́тся, кто́ не просла́витъ неизслѣ́димую и несказа́нную глубину́ милосе́рдія Твоего́, Христе́ Бо́же? Яко просла́вилъ еси́ въ послѣ́днемъ ро́дѣ уго́дника Твоего́, святи́теля Ники́ту, его́же обрѣто́шася честны́я мо́щи цѣ́лы и неразруши́мы. Ему́же рече́мъ: егда́ во пло́ти бы́лъ еси́, преподо́бне, дѣ́ланіи боже́ственными ду́шу предочи́стилъ еси́, святи́тельства па́ству воспріи́мъ, сосу́дъ избра́нъ Боже́ственнаго Ду́ха показа́лся еси́ и ста́до твое́ до конца́ въ вѣ́рѣ утверди́лъ еси́. Тѣ́мъ ра́дуйся, о́тче преди́вный.

Пѣ́снь 7.

Ирмо́съ: Тріе́ о́троцы въ пещи́, Тро́ицу прообрази́вше, преще́ніе о́гненное попра́ша и, пою́ще, вопія́ху: благослове́нъ еси́, Бо́же оте́цъ на́шихъ.

Уясня́ютъ, воспѣва́юще, а́нгельстіи чи́ни па́мять твою́, Ники́то святи́телю, и мы́, земнíи, уми́льное вопіе́мъ: испроси́ на́мъ оставле́ніе согрѣше́ній и благи́хъ наслажде́ніе.

Фара́она мы́сленнаго побѣди́лъ еси́, отъ Христа́ дерзнове́ніе пріи́мъ, и ве́ліе ра́дованіе святы́мъ а́нгеломъ сотвори́лъ еси́, поя́: оте́цъ на́шихъ Бо́же, благослове́нъ еси́.

Херуви́му подо́бяся, легко́ на высоту́ возше́лъ еси́ и ны́нѣ со безпло́тными водворя́ешися, Христу́ вопія́: оте́цъ на́шихъ Бо́же, благослове́нъ еси́.

Богоро́диченъ: Отъ утро́бы Твоея́ про́йде у́мное, Богоро́дице, Со́лнце, Сего́ моли́, я́ко Сы́на Твоего́ и Го́спода, пода́ти на́мъ скорбе́й разрѣше́ніе и болѣ́зней облегче́ніе, да ра́достно отъ души́ вопіе́мъ Христу́: отце́въ на́шихъ Бо́же, благослове́нъ еси́.

Инъ.

Ирмо́съ: Пе́щь о́троцы огнепа́льну дре́вле росоточа́щу показа́ша, еди́наго Бо́га воспѣва́юще и глаго́люще: превозноси́мый отце́въ Бо́гъ и препросла́вленъ.

Зѣ́льнымъ воздержа́ніемъ тѣ́ло умертви́лъ еси́, ду́шу же просвѣти́лъ еси́ и равноа́нгельну сотвори́лъ еси́, Бо́гу вопія́: отце́въ на́шихъ Бо́же, благослове́нъ еси́.

Жезло́мъ па́стырскимъ, святи́телю, до́брѣ лю́ди твоя́ упа́слъ еси́, отъ ни́хже я́ко вѣ́ренъ па́стырь Христу́ возопи́лъ еси́: отце́въ на́шихъ Бо́же, благослове́нъ еси́.

Егда́ ся́деши суди́ти вся́ческая на престо́лѣ сла́вы Твоея́, тогда́ пощади́ рабы́ Твоя́, Влады́ко, моли́твами уго́дника Твоего́, святи́теля Ники́ты, да вси́ уми́льно вопіе́мъ Ти́: отце́въ на́шихъ Бо́же, благослове́нъ еси́.

Богоро́диченъ: Добро́та честны́хъ и святы́хъ а́нгелъ, ра́дованіе человѣ́ковъ Ты́ еси́, Дѣ́во Богоро́дице, Ты́ мя къ жи́зни наста́ви, Сы́ну Твоему́ вопію́ща: отце́въ на́шихъ Бо́же, благослове́нъ еси́.

Катава́сія: Тебе́, во огни́ ороси́вшаго...

Пѣ́снь 8.

Ирмо́съ: Веще́ственного огня́ пла́мень невеще́ственнымъ увяди́ша богозри́міи о́троцы и поя́ху: благослови́те, вся́ дѣла́ Госпо́дня, Го́спода.

Импера́тору Богому́дрому, благоче́стію Содержи́телю, испроси́, Ники́то святи́телю, ми́ръ, здра́віе, спасе́ніе и на враги́ одолѣ́ніе, да въ ра́дости душе́внѣй возопіе́мъ: благослови́те, вся́ дѣла́ Госпо́дня, Го́спода.

Чу́вственныя стра́сти побѣди́въ, чистото́ю, я́ко со́лнце, возсія́лъ еси́, чи́сто житіе́ до конца́ сохрани́лъ еси́ и Бо́гу тѣ́мъ угоди́лъ еси́. Ему́же вопіе́мъ: благослови́те, вся́ дѣла́ Госпо́дня, Го́спода.

Шу́мъ пра́зднующихъ слы́шати, святи́телю, сподо́бился еси́: шу́іяго стоя́нія изба́ви мя́ и страсте́й треволне́нія и къ приста́нищу покая́нія наста́ви мя́, да тя́ сла́влю во вся́ вѣ́ки.

Богоро́диченъ: Ще́драго и человѣколюби́ваго Бо́га роди́ти, Богоро́дице, сподо́билася еси́, Того́ моли́, Неискусобра́чная Отрокови́це, низпосла́ти на́мъ, вѣ́рнымъ, ве́лію ми́лость.

Инъ.

Ирмо́съ: Въ пещи́ о́троки подража́юще, духо́вную ро́су пріе́мшіи, вѣ́рою зове́мъ: благослови́те, дѣла́ Госпо́дня, Го́спода.

Го́споду просла́вльшу уго́дника Своего́ святи́теля Ники́ту, мно́гимъ бо лѣ́томъ преше́дшимъ сокрове́ны бы́ша честны́я его́ мо́щи, ны́нѣ же вси́, я́вѣ зря́ще, согла́сно воспѣва́ютъ: благослови́те, дѣла́ Госпо́дня, Го́спода.

Уви́дѣхомъ и почуди́хомся, па́че же стра́хомъ и ра́достію объя́ти бы́хомъ, я́ко по толи́цѣхъ лѣ́тѣхъ обрѣто́шася честны́я мо́щи святи́теля Ники́ты цѣ́лы и неразруши́мы, и вси́ единогла́сно возопи́хомъ: благослови́те, дѣла́ Госпо́дня, Го́спода.

Бо́жіимъ манове́ніемъ послѣ́днему ро́ду явле́ны бы́ша честны́я мо́щи святи́теля Ники́ты, си́мъ у́бо прикаса́ющіися, освяще́ніе пріе́млемъ, Христа́ воспѣва́юще во вѣ́ки.

Богоро́диченъ: Ада́ма но́ваго родила́ еси́, пре́жде Ада́ма бы́вшего, Сего́ моли́, Богоро́дице, да спасе́тъ ду́ши на́ша.

Катава́сія: Нестерпи́мому огню́...

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Мо́ре жите́йское преплы́въ воздержа́ніемъ, дости́глъ еси́ широты́ ра́йскія, идѣ́же со а́нгелы при́сно весели́шися.

Ра́ка моще́й твои́хъ, святи́телю, дража́йши сапфи́ра показа́ся, чудотвори́ва бо бѣ́ и исцѣле́нія источа́ющи. Ея́же облобыза́юще съ вѣ́рою, приходя́щіи ра́достно отъ души́ вопію́тъ: со́нъ че́стенъ предъ Го́сподемъ сме́рть преподо́бныхъ Его́.

Крестоно́сно предстои́ши престо́лу Вседержи́теля, сла́вою осіява́емь Свѣ́та Присносу́щнаго. Моли́ся, Ники́то святи́телю, о чту́щихъ вѣ́рно па́мять твою́.

Богоро́диченъ: Лу́къ сокруши́ся лука́ваго одолѣ́ніемъ Сы́на Твоего́ и Бо́га на́шего, чу́дна побѣ́да, Богоро́дице, и ди́вно одолѣ́ніе содѣ́яся, Влады́чице, во спасе́ніе ду́шъ на́шихъ.

Инъ.

Ирмо́съ: Па́че естества́ Ма́терь и по естеству́ Дѣ́ву, еди́ну въ жена́хъ Благослове́нную, пѣ́сньми, вѣ́рніи, Богоро́дицу велича́емъ.

Львы́ укроти́ Даніи́лъ дре́вле, ты́ же, святи́телю Ники́то, неви́димаго врага́, зія́ющаго на тя́, че́люсти сокруши́лъ еси́ и безъ вѣ́сти того́ сотвори́лъ еси́ моли́твами твои́ми.

Крѣ́пкою твое́ю моли́твою, святи́телю, я́звы души́ моея́ исцѣли́, и находя́щихъ искуше́ній изба́ви мя́, молю́ся, и се́рдца моего́ напра́ви стезю́ на Бо́жія за́повѣди пресвѣ́тлыя, да тя́ непреста́нно велича́ю.

Разжени́ мно́жество зо́лъ мои́хъ, святи́телю, богопрія́тными твои́ми моли́твами, одожди́ ми ка́пли покая́нія: бою́ся бо та́мошняго суди́ща, въ не́мже Судія́ хо́щетъ суди́ти всему́ мíру.

Богоро́диченъ: Милосе́рдіе на рабы́ Твоя́, Чи́стая, простри́, при́сно моля́щія Тя́, стра́шныя му́ки избавля́ющи моли́твами Твои́ми.

Ката́васія: Въ зако́нѣ сѣ́ни и писа́ній...

Свѣти́ленъ:

Плотска́я мудрова́нія ду́ху повину́лъ еси́ и, я́ко зла́то, огне́мъ искуси́вся, прія́телище бы́лъ еси́ Ду́ху Пресвято́му, о́тче Ники́то святи́телю. [Два́жды.]

Сла́ва, и ны́нѣ, богоро́диченъ:

Тя́ пѣ́сньми ублажа́емъ, Дѣ́во, Бо́га бо роди́вши, на руку́ носи́ла еси́, Того́ моли́ за ду́ши на́ша.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Свѣти́льникъ тя́ стяжа́вше,* свяще́нную твою́ па́мять восхваля́емъ,* свяще́нно ублажа́юще,* Це́рковь бо Христо́ву украси́лъ еси́* и лю́ди твоя́ просвѣти́лъ еси́,* вруче́нный тебѣ́ тала́нтъ умно́живъ,* ра́дости сподо́бился еси́ Го́спода твоего́.* И ны́нѣ, святи́телю, моли́ся* о душа́хъ на́шихъ. [Два́жды.]

Воздержа́ніемъ до́брѣ воспита́вся,* въ пресла́вную добродѣ́телей высоту́ возше́лъ еси́,* святи́тельства оде́ждею, пребога́те,* и вѣнце́мъ добродѣ́телей укра́шенъ.* Благода́тію Боже́ственнаго Ду́ха осія́емь,* просвѣти́ моли́твами твои́ми, святи́телю Ники́то,* достодо́лжно восхваля́ющихъ* свяще́нную и честну́ю па́мять твою́.

Яко зла́то чи́сто, обрѣто́хомъ* честны́я твоя́ мо́щи, Ники́то святи́телю,* и си́хъ любо́вію почита́емъ,* торжеству́юще ра́достно* и я́ко свяще́ніе душа́мъ обнося́ще,* Христа́ прославля́емъ,* просла́вльшаго тя́, уго́дника Своего́,* да и на́съ сподо́битъ вѣ́чнаго наслажде́нія.

Сла́ва, гла́съ 8:

Блага́го Бо́га вѣ́рный ра́бе, виногра́да Его́ прилѣ́жный дѣ́лателю, до́брѣ ста́до упа́слъ еси́, и ева́нгельскими словесы́ люде́й твои́хъ сердца́ напои́лъ еси́, и сѣ́мя благоче́стія въ ни́хъ возрасти́лъ еси́. И ны́нѣ предстоя́ Христу́, моли́ся, святи́телю Ники́то, спасти́ и просвѣти́ти ду́ши на́ша.

И ны́нѣ, богоро́диченъ: Влады́чице, пріими́ моли́тву ра́бъ Твои́хъ...
Славосло́віе вели́кое. [Ектеніи́ и отпу́стъ.]



НА ЛИТУРГІИ,

Слу́жба іера́рховъ: [Блаже́нна отъ кано́на 1-го, пѣ́снь 3-я и 2-го кано́на пѣ́снь 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1863. — Л. 174 об. – 178 об.

/ Къ оглавленію раздѣла /


Наверхъ / Къ титульной страницѣ

0