Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 29-й де́нь.
Пренесе́ніе моще́й свята́го священному́ченика Игна́тія Богоно́сца.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Богосло́вовъ кра́йній бы́въ прее́мникъ,* о́ныхъ стопа́мъ послѣ́довалъ еси́,* отъ восто́ка устреми́вся,* и на за́падѣ явля́яся,* и просвѣща́я мо́лніями* боже́ственнаго проповѣ́данія:* идѣ́же, всему́дре, отъ мíра у́бо заше́дъ,* къ Бо́гу же возсія́лъ еси́,* сія́ніемъ вѣнча́емь благода́ти.

Свяще́ннѣ отда́шася твоя́ гра́ду твоему́ мо́щи,* богоно́се всему́дре,* страда́нія ра́ди освяще́ны свѣтлѣ́е* и благода́тію сія́ющія,* возвраще́ніемъ на́мъ* торжества́ хода́тая содѣ́лавша,* весе́лія наполня́юще богодохнове́ннаго* и обоня́ніемъ насыща́юще* благоче́стно тя́ почита́ющія.

Отъ восто́ка у́бо* пе́рвѣе денни́ца, Игна́тіе,* на за́падѣхъ просія́лъ еси́ свѣтлѣ́йше,* ны́нѣ же боже́ственныхъ моще́й твои́хъ возвраще́ніемъ* зари́ на земли́ отъ ве́чера просте́рлъ еси́* и мо́лишися Христу́* отъ тли́ и бѣ́дъ изба́вити* вѣ́рою соверша́ющихъ* всечестну́ю па́мять твою́.

Сла́ва, гла́съ 8. Анато́ліево:

Богоно́се Игна́тіе, твоего́ жела́емаго Христа́ вперси́въ, мзду́ воспрія́лъ еси́ священнодѣ́йства Ева́нгелія Христо́ва, е́же сконча́тися кро́вію. Тѣ́мъ, пшени́ца бы́въ безсме́ртнаго Дѣ́лателя, зубы́ звѣре́й сомлѣ́лся еси́ и хлѣ́бъ сла́докъ Тому́ показа́лся еси́. Моли́ о на́съ, страда́льче блаже́нне.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ми очесы́ ви́дится, о Влады́ко!* Содержа́й всю́ тва́рь* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущи, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

На стихо́внѣ окто́иха. Сла́ва, гла́съ 1. Студи́тово:

О, тве́рдыя и адама́нтскія твоея́ души́, достоблаже́нне Игна́тіе! Ты́ бо, къ су́щему твоему́ Рачи́телю неосла́бно имѣ́я жела́ніе, глаго́лалъ еси́: нѣ́сть во мнѣ́ о́гнь любовеще́ственъ, вода́ же па́че жива́я и глаго́лющая во мнѣ́, вну́трь ми́ глаго́лющи: гряди́ ко Отцу́. Тѣ́мже, Боже́ственнымъ Ду́хомъ распаля́емь, звѣ́ри изво́лилъ еси́ мíра тя́ скорѣ́е разлучи́ти и къ жела́емому препосла́ти Христу́, Его́же моли́ спасти́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

У Креста́ предстоя́щи* Сы́на и Бо́га Твоего́* и долготерпѣ́ніе Того́ смотря́ющи,* глаго́лала еси́, пла́чущи,* Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно,* Сло́ве Бо́жій,* да спасе́ши человѣ́чество?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ, сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Игна́тіе. Моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха и свята́го на 6, его́же краегране́сіе: Игна́тія восто́чную въ пѣ́снехъ звѣзду́ пою́. Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Напра́вивъ къ добродѣ́тели житіе́ мое́, свѣ́томъ озари́ всели́вшіяся благода́ти въ тебѣ́, богоно́се Игна́тіе, и страсте́й смуще́ніе твои́ми моли́твами разори́.

Якоже земля́ ро́днѣйшая, бы́лъ еси́, стори́чествующи плодонося́й сѣ́мя Христу́, богоно́се Игна́тіе, ду́ши напоя́ющему одожде́ніемъ Ду́ха.

Разумѣ́въ прозна́тельною си́лою твоея́ благоро́діе души́, всѣ́хъ Влады́ка и Бо́гъ, богоно́се Игна́тіе, сія́ньми благода́ти богосвѣ́тлыми просвѣти́.

Луча́ми у́мнаго осія́емь Со́лнца, всему́дре, отъ восто́ка устреми́вся свѣ́тло, я́коже чу́вственное со́лнце, мра́къ за́падный озаря́я проповѣ́даніемъ.

Богоро́диченъ: Тро́ицы Пребоже́ственныя, Всечи́стая, Еди́наго родила́ еси́, изъ Тебе́ пло́тію я́вльшагося по на́мъ благоволе́ніемъ Роди́теля и содѣ́йствомъ Ду́ха Всесвята́го, Богоневѣ́сто.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Исцѣли́ у́мъ мо́й, озло́бленный лю́тыми страстьми́ плотски́ми, Игна́тіе, му́чениче Христо́въ всеприснопа́мятне.

Единому́дренна тя́ Христо́съ апо́столовъ до́брѣ вѣ́дый, поста́ви, боже́ственнымъ свѣ́томъ сія́юща всѣ́мъ Це́рквамъ учи́теля.

Умерщвля́ема тебе́ ра́ди Жизнода́вца зря́, поте́клъ еси́ Того́ ра́ди сме́рть любо́вію претерпѣ́ти, Игна́тіе.

Богоро́диченъ: Сло́во Отчее, предочи́стившися, о Чи́стая, Ду́хомъ, слове́снаго естества́ на благодѣя́ніе родила́ еси́.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственнымъ Ду́хомъ просвѣще́нъ, сверѣ́пство мучи́телей дерзнове́ніемъ па́стырскимъ велему́дренно посрами́лъ еси́ и, преве́зся пре́лести пучи́ну, ко приста́нищу Боже́ственному дости́глъ еси́, о́тче преподо́бне, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ, вочеловѣ́чся, пребы́сть, Иже по Рождествѣ́ Ма́терь Тя́ Дѣ́ву, я́ко пре́жде Рождества́, сохрани́въ Всенепоро́чну, Еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена Иже изъ Нея́ безболѣ́зненно прозя́бшаго, матеролѣ́пно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Богоно́сецъ нарица́емь тезоиме́нно, во Христа́ бо одѣ́яся житіе́мъ, вся́ помазу́еши свѣ́тло, му́чениковъ утвержде́ніе, жела́ніемъ вѣнцы́ воспрія́ти.

Вжиля́емь, Игна́тіе, си́лою на Крестѣ́ пригво́ждшагося тебе́ ра́ди, богоно́се, звѣ́ри бо изво́лилъ еси́ мíра отлучи́ти тя́ къ твоему́ жела́емому Рачи́телю.

Возжела́въ красоты́ Влады́чни и къ Нему́ раче́ніе неосла́бно имѣ́я, Сего́ страда́ніемъ усе́рдно поревнова́лъ еси́, му́чениче богоно́се Игна́тіе.

Укра́шенъ багряни́цею твои́хъ крове́й, святи́телю, и ма́стію свяще́нства, таи́нниче, сія́еши, Христу́ зовы́й, ра́дуяся: сла́ва си́лѣ Твое́й, Го́споди.

Богоро́диченъ: Изъ не су́щихъ вся́ческая Боже́ственною си́лою содѣва́я, роди́ся изъ Тебе́, Богома́ти, мíръ просвѣща́я свѣ́тлыми луча́ми Божества́ и богоразу́мія свѣ́тлостію.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ны́нѣ ты́, лице́мъ къ лицу́ Христа́ зря́, Игна́тіе, зерца́ломъ вои́стинну разрѣ́шшимся, соедини́лся еси́ твоему́ Рачи́телю.

Привле́клъ еси́ просвѣще́ніе отъ исто́чника свѣтода́тельнаго, Игна́тіе: пречи́стыми бо тя́ Христо́съ дла́ньми держа́въ, освяти́.

Умъ Ду́хомъ Бо́жіимъ стяжа́въ просвѣще́нъ, Игна́тіе, богопи́санныя посыла́еши, я́ко скрижа́ли, зако́ны благода́ти.

Богоро́диченъ: Свы́ше Тебѣ́ гла́съ ра́достно возопи́ а́нгелъ, Богоро́дице, Влады́ки неизрече́нно возвѣща́я Тебѣ́ зача́тіе.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Му́дрости е́ллинскія разори́лъ еси́ догма́ты, Ѵпоста́сную имѣ́я Бо́жію му́дрость, священнотаи́нниче, и съ шу́момъ пре́лести па́мять погуби́лъ еси́.

Не преста́й о соверша́ющихъ па́мять твою́ моля́ся, всеблаже́нне, напа́стей изба́витися лютѣ́йшихъ и бѣ́дъ, свяще́нникъ яви́вся богопрія́тенъ.

Му́жествомъ и му́дростію преизя́ществовавъ, преподо́бне, пра́вды же добро́тою, богоно́се му́чениче, и цѣлому́дрія, и окруже́ніемъ добродѣ́телей яви́лся еси́ украша́емь.

Богоро́диченъ: Тя́ еди́ну посредѣ́ те́рнія обрѣ́тъ, я́ко пречи́стый кри́нъ и удо́льный цвѣ́тъ, о Богома́ти, Жени́хъ изъ утро́бы Твоея́, Сло́во, происхо́дитъ.

Конда́къ, гла́съ 4. Подо́бенъ: Яви́лся еси́ дне́сь.

Отъ восто́ка дне́сь возсія́лъ еси́ и тва́рь всю́ просвѣти́вый уче́ньми, му́ченичествомъ украси́ся богоно́сный и боже́ственный Игна́тій.

Икосъ:

Іеремíю Бо́гъ изъ утро́бы освяти́въ, и пре́жде, е́же роди́тися, вѣ́дый, я́ко Провѣ́децъ, прія́телище бы́ти того́ Ду́ха Свята́го, наполня́етъ сего́ а́біе отъ ю́ностна житія́ и проро́ка же сего́ и проповѣ́дника всѣ́мъ предвозвѣща́ти посыла́етъ свято́е на зе́млю Свое́ прише́ствіе: ро́ждся у́бо и Са́мъ Бо́гъ отъ Дѣ́вы, къ про́повѣди прише́дъ, обрѣ́те отъ младе́нства досто́йна Своея́ благода́ти ученика́, богоно́снаго и боже́ственнаго Игна́тія.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Свяще́нства укра́шенъ мѵ́ромъ, преподо́бне, боже́ственнымъ и му́ченическою кро́вію удобре́нъ, во обои́хъ просія́лъ еси́, — благослове́нъ еси́ въ хра́мѣ, — зовы́й, — сла́вы Твоея́, Го́споди.

Законоположе́ніемъ просвѣти́въ мíръ ве́сь, хлѣ́бомъ небе́снымъ напита́лъ еси́ вѣ́рныя, Влады́цѣ твоему́ зову́щія: благослове́нъ еси́ въ хра́мѣ сла́вы Твоея́, Го́споди.

Свѣтолу́чными заря́ми, всеблаже́нне, просвѣща́емь, заре́ю свѣтонача́льнаго ли́тія осія́вся, небе́сное прія́лъ еси́, ра́дуяся, наслажде́ніе, богоно́се, му́чениковъ похвало́.

Пшени́ца сы́й Бо́жія, я́коже ре́клъ еси́, всеприснопа́мятне, челюстьми́ сомле́нъ бы́лъ еси́, му́чениче, звѣре́й и Пита́ющему вся́ческая Боже́ственною бла́гостію чистѣ́йшій хлѣ́бъ бы́лъ еси́.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Стоя́ на суди́щи, му́дре, Тро́ицу несозда́нную богосло́вилъ еси́ ума́ чистото́ю, свя́те, мы́сленною же свѣ́тлостію не устраши́вся мучи́тельскихъ престо́ловъ суровства́, но вопія́лъ еси́: благослови́те, вся́ дѣла́ Госпо́дня, Го́спода.

Упра́вивъ разу́мнѣ тво́й у́мъ боже́ственными догма́ты, блаже́нне Игна́тіе, злоде́мона томи́теля, пре́лести предста́теля, му́дрости то́ки весьма́ потопи́лъ еси́, вопія́: благослови́те, вся́ дѣла́ Госпо́дня, Го́спода.

Безмѣ́рнымъ сія́я свѣ́томъ Божества́, му́чениче непобѣди́ме, безбо́жія непостоя́нную прогна́лъ еси́ тму́, посла́нія свѣтови́дная посыла́я пою́щимъ: благослови́те, вся́ дѣла́ Госпо́дня, Го́спода.

Неи́стовства и зія́нія звѣре́й не устраши́лся еси́, боже́ственный Игна́тіе, Высоча́йшаго бо си́ла, изъ Дѣ́вы возсія́вши, всеору́жіемъ Креста́ тя обложи́, пою́ща: благослови́те, вся́ дѣла́ Госпо́дня, Го́спода.

Богоро́диченъ: Ты́ Еди́на во всѣ́хъ ро́дѣхъ, Дѣ́ва Пречи́стая, Ма́ти яви́лася еси́ Бо́жія, Ты́ Божества́ была́ еси́ жили́ще, Всенепоро́чная, не опали́вшися огне́мъ Непристу́пнаго Свѣ́та. Тѣ́мже вси́ Тя́ благослови́мъ, Марíе Богоневѣ́стная.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Раче́ніе боже́ственнѣйшее, блаже́нне, удержа́въ души́ твоея́, мíра веще́ственныя печа́ли огне́мъ невеще́ственнымъ вся́ попали́ и жела́ній кра́ю вѣнцено́сца тя́ предста́ви.

Въ приста́нище свѣ́тло устреми́лся еси́ тиша́йшее, богоно́се, бу́ри волне́ній избѣ́гъ, стремле́нія сверѣ́пыхъ и слове́сныхъ звѣре́й, и ны́нѣ наслажда́ешися, пріи́мъ вѣ́чное наслажде́ніе.

Испещре́ннымъ украша́емь вѣнце́мъ, священнотаи́нниче, преизя́ществуеши: свяще́нства бо въ тебѣ́ въ еди́но сни́деся и свидѣ́тельства сла́ва, и обои́ми я́ко прича́стникъ твоему́ Влады́цѣ спросла́вился еси́.

Яко священноявле́нъ сы́й, дерзнове́ніе имѣ́я къ твоему́ Влады́цѣ и Бо́гу, соверша́ющимъ вѣ́рою па́мять твою́ отъ напа́стей, Игна́тіе, ны́нѣ изба́витися моли́ся.

Богоро́диченъ: Угаси́ страсте́й мои́хъ пла́мень росолу́чною Твое́ю моли́твою, я́же во утро́бѣ пріе́мши о́гнь Боже́ственный неопа́льно, Всечи́стая: Тя́ бо наде́жду и́мамъ спасе́нія моего́, Богоневѣ́сто.

Свѣти́ленъ. Подо́бенъ: Свѣ́те неизмѣ́нный.

Имать свѣ́тлый пра́здникъ тво́й Христо́ва Це́рковь, я́ко неотъе́млемое бога́тство, твоя́ пріе́мши боже́ственныя мо́щи, идѣ́же и мѵ́ро источа́ютъ всѣ́мъ, Игна́тіе богоно́се.

Сла́ва, и ны́нѣ, богоро́диченъ:

Свѣ́тъ, возсія́вый безлѣ́тнѣ отъ Отца́ пре́жде вѣ́къ, въ лѣ́та ны́нѣ напослѣ́докъ изъ Тебе́, Дѣ́во, изы́де на спасе́ніе мíра, къ Нему́же не преста́й о лю́дехъ Твои́хъ моли́ти.

На стихо́внѣ окто́иха. Сла́ва, гла́съ 1. Студи́тово:

Сто́лпъ одушевле́нъ и вдохнове́нный о́бразъ, лѣ́тній тво́й наста́ пра́здникъ, богоно́се Игна́тіе, та́инства твоя́ и до́блести твоя́ проповѣ́дающій, е́же за вѣ́ру да́же до кро́ве противостоя́ніе. Блаже́нный о́нъ и приснопа́мятный гла́съ, и́же я́ко пшени́ца е́смь Бо́жія, глаго́лющій, и зубы́ звѣре́й мелю́ся. Тѣ́мже подража́тель стра́сти Христа́ твоего́ бы́въ, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Заколе́ніе Твое́ непра́ведное, Христе́,* Дѣ́ва зря́щи, пла́чущи, вопія́ше Ти́:* Ча́до сладча́йшее,* ка́ко безъ пра́вды умира́еши?* Ка́ко на дре́вѣ ви́сиши,* всю́ зе́млю повѣ́сивый на вода́хъ?* Не оста́ви Мене́ еди́ну,* Благодѣ́телю Многоми́лостиве,* Ма́терь и рабу́ Твою́, молю́ся.


НА ЛИТУРГІИ,

Блаже́нна окто́иха, на 4 и свята́го пѣ́снь 3-я, на 4. Проки́менъ, гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ ко Евре́емъ, зача́ло 311. Аллилу́ія, гла́съ 4: Пра́ведникъ, я́ко фи́никсъ, процвѣте́тъ и, я́ко ке́дръ, и́же въ Лива́нѣ, умно́жится. [Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.] Ева́нгеліе Ма́рка, зача́ло 41. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 304 – 308.

/ Къ оглавленію раздѣла /


Наверхъ / Къ титульной страницѣ

0