Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 28-й де́нь.
Слу́жба преподо́бному и богоно́сному отцу́ на́шему Ефре́му, архимандри́ту Новото́ржскому, чудотво́рцу,
соста́вившему оби́тель святы́хъ страстоте́рпцевъ Христо́выхъ Бори́са и Глѣ́ба, во гра́дѣ, нарица́емомъ Торжкѣ́.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1. Подо́бенъ: Небе́сныхъ чино́въ.

Умъ просвѣще́нъ стяжа́въ,* ду́шу луча́ми добродѣ́телей озари́лъ еси́,* плотска́я же взыгра́нія воздержа́ніемъ умертви́въ,* свѣти́льникъ пресвѣ́тлый яви́лся еси́ въ по́стницѣхъ.* Тѣ́мъ ны́нѣ во Ца́рствіи Бо́жіи* пи́щи приснопребыва́ющія насыща́ешися* Боже́ственною сла́вою озаря́емь.

Тро́ица Безнача́льная и Единосу́щная* избра́ тя́ въ свяще́нное Себѣ́ селе́ніе,* отъ мяте́жъ бо жите́йскихъ уклони́вся се́рдцемъ,* безпло́тныхъ во пло́ти подража́лъ еси́, богоно́се,* съ ни́миже ны́нѣ на небеси́* жи́знь вѣ́чную пріобрѣ́лъ еси́.

Сла́ва, гла́съ 6:

Пріиди́те, мона́шествующихъ собо́ри, Ефре́ма, благоче́стію подража́теля, пѣ́сньми и пѣ́ньми восхва́лимъ, и, честну́ю его́ и многоцѣле́бную ра́ку обстоя́ще, любе́зно рце́мъ: ра́дуйся, богому́дре о́тче Ефре́ме, оби́тели свое́й пресвѣ́тлый свѣти́льниче; ра́дуйся, чи́стый чистѣ́йшаго Свѣ́та прича́стниче; ра́дуйся, Тро́ицы вѣ́рный служи́телю, Ейже ны́нѣ предстоя́ со а́нгелы, моли́ся дарова́ти душа́мъ на́шимъ ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще* Ду́ху Пресвято́му,* прему́дре Ефре́ме, бы́лъ еси́.* Тѣ́мже и на́съ до́мы Тому́ содѣ́лай,* святу́ю твою́ па́мять пра́зднующихъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ и сокро́вище добродѣ́телей,* по́стникомъ сла́ва* и преподо́бнымъ похвала́,* соверше́нный вѣ́рою* ты́ еси́, Ефре́ме преподо́бне.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

До́мъ неоску́дныя благода́ти* и гра́ду на́шему утвержде́ніе* иму́ще тя́, о́тче, мо́лимся:* возвы́си ро́гъ христіа́нъ правосла́вныхъ* моли́твами твои́ми ко Го́споду.

Сла́ва, гла́съ 2:

Яко фи́никсъ, насажде́нный въ дому́ Бо́жіи, добродѣ́телію процвѣ́лъ еси́, Ефре́ме всехва́льне. Кре́стное бо ору́жіе воспріи́мъ, сосу́дъ яви́лся еси́ Ду́ху Свято́му и страсте́й бе́здны изсуши́лъ еси́ воздержа́ніемъ мно́гимъ. Тѣ́мже моли́ся о на́съ ко Го́споду, вѣ́рою и любо́вію пра́зднующихъ всечестну́ю па́мять твою́.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Тропа́рь преподо́бнаго, гла́съ 1:

Боже́ственною свы́ше просвѣти́вся благода́тію, преподо́бне, мно́гимъ терпѣ́ніемъ во вре́менной жи́зни по́двигъ соверши́лъ еси́. Тѣ́мже источа́еши чуде́съ благода́ть всѣ́мъ, съ вѣ́рою приходя́щимъ къ ра́цѣ моще́й твои́хъ, Ефре́ме преблаже́нне. Сего́ ра́ди зове́мъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва.

Преподо́бне о́тче Ефре́ме преблаже́нне,* ты́, отъ ю́ности Христа́ Бо́га возлюби́въ* и ле́гкое Его́ и́го на себе́ воспрія́въ,* кре́стъ сво́й на ра́мо взе́мъ, поне́слъ еси́,* Боже́ственною бо си́лою вооружи́вся,* на сла́дость вре́менную ника́коже воззрѣ́лъ еси́,* терпѣ́ніемъ же свои́мъ, посто́мъ, и бдѣ́ніемъ,* и ча́стыми моли́твами* пло́ть свою́ ду́хови покори́лъ еси́* и сего́ ра́ди бы́лъ еси́ упра́вленъ во Ца́рствіе Бо́жіе,* идѣ́же ны́нѣ предстоя́ во сла́вѣ,* моли́ Христа́ Бо́га спасти́ся душа́мъ на́шимъ. [Два́жды.]

Преподо́бне о́тче Ефре́ме всехва́льне,* ты́, Христа́ Бо́га возлюби́въ* и се́рдце свое́ Боже́ственными заря́ми просвѣти́въ,* свѣтови́дѣнъ ве́сь вои́стинну бы́лъ еси́.* Тѣ́мъ по достоя́нію блаже́нныя жи́зни сподо́бился еси́,* ея́же прича́стники и на́съ содѣ́лай,* притека́ющихъ съ вѣ́рою къ честны́мъ моще́мъ твои́мъ,* непреста́нными твои́ми ко Го́споду моли́твами.

Преподо́бне о́тче Ефре́ме пресла́вне,* ты́ любве́ ра́ди Христо́вы,* вся́, я́же на земли́, презрѣ́въ, оста́вилъ еси́* и, по́стническими труды́ житіе́ украси́въ,* у́мъ сво́й безстра́стіемъ просвѣти́лъ еси́.* Сего́ ра́ди по́стниковъ похвала́* и мона́шествующихъ удобре́ніе бы́лъ еси́.* Съ ни́миже ны́нѣ моли́ Христа́ Бо́га* спасти́ся душа́мъ на́шимъ.

Ины стихи́ры, гла́съ 4. Подо́бенъ: Яко до́бля.

Яко до́бля па́стыря тя́ и наста́вника на́шего,* преподо́бне о́тче Ефре́ме преблаже́нне,* соше́дшеся дне́сь въ честнѣ́мъ хра́мѣ твое́мъ* и чудотво́рную ра́ку моще́й твои́хъ обстоя́ще,* вѣ́рою и любо́вію сія́ облобыза́емъ,* пѣ́сньми и пѣ́ніи прославля́я Просла́вльшаго тя́* и дарова́вшаго тя́ Це́ркви Свое́й пресвѣ́тлое свѣти́ло,* сему́ гра́ду утвержде́ніе* и моли́твенника о душа́хъ на́шихъ. [Два́жды.]

Яко до́брый дѣ́латель виногра́да Христо́ва,* виногра́дъ добродѣ́телей изъ Угорскія земли́ прене́слъ еси́* и насади́лъ еси́ его́ при исхо́дищахъ воды́ присноживо́тныя,* и́же даде́ во вре́мя свое́ спаси́тельный пло́дъ,* его́же, правосла́вныхъ собо́ръ, причаща́ющеся,* духо́вное и тѣле́сное исцѣле́ніе пріе́млемъ,* о́бщаго Врача́ ду́шъ на́шихъ, Христа́, прославля́юще,* Ему́же ны́нѣ со а́нгелы предстои́ши* и мо́лишися о душа́хъ на́шихъ.

Яко свѣтоблиста́тельная заря́,* просія́лъ еси́ на тве́рди Це́ркве Христо́вы.* По́стническими труды́ житіе́ твое́ украси́лъ еси́,* у́мъ надъ страстьми́ воцари́въ* и пло́ть порабо́тивъ ду́хови,* во пло́ти живя́ на земли́,* земны́й а́нгелъ и небе́сный человѣ́къ бы́лъ еси́.* Тѣ́мже, тѣ́ломъ со земны́ми водворя́яся,* ду́хомъ съ вы́шними мо́лишися о душа́хъ на́шихъ.

Сла́ва, гла́съ 8:

Преподо́бне и богоно́се о́тче Ефре́ме, ты́, пресла́вныхъ Христо́выхъ му́чениковъ, Рома́на и Дави́да, непра́ведное отъ бра́та своего́ заколе́ніе узрѣ́въ, боже́ственнымъ жела́ніемъ распали́лся еси́ и, земна́я вся́ мудрова́нія жите́йская, я́ко паучи́ну, ни во что́ вмѣни́въ, Христа́ еди́наго возлюби́лъ еси́. Сего́ ра́ди приста́нища доше́дъ, це́рковь прекра́сну страстоте́рпцемъ Христо́вымъ воздви́глъ еси́ и, оби́тель че́стну соста́вивъ, мно́жества мона́ховъ наста́вникъ бы́лъ еси́, идѣ́же ны́нѣ лежи́тъ всечестно́е и свято́е тѣ́ло твое́, Ефре́ме, о́тче на́шъ, притека́ющимъ съ вѣ́рою исцѣле́ніе неоску́дно подава́ющее и душетлѣ́нныя стра́сти и бѣсо́въ мно́жества прогоня́ющее. Тѣ́мъ, христоимени́тое мона́ховъ мно́жество, твои́ми чудесы́ удивля́емо, ра́достно отъ души́ вопіе́тъ къ тебѣ́: богоблаже́нне и преподо́бне о́тче на́шъ Ефре́ме, моли́ Христа́ Бо́га умири́ти мíръ и спасти́ ду́ши на́ша.

И ны́нѣ, богоро́диченъ:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Та́же вхо́дъ, и проки́менъ дне́, и чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Наста́, богоно́се, со́лнца свѣтлѣ́йшій тво́й пра́здникъ, озаря́яй приходя́щія къ тебѣ́ съ вѣ́рою: душе́внымъ бо страсте́мъ и тѣле́снымъ подае́ши исцѣле́ніе отъ свята́го твоего́ тѣлесе́, Ефре́ме преподо́бне, моли́твенниче о душа́хъ на́шихъ.

Чу́вственныя стра́сти укроти́въ воздержа́нія брозда́ми, о́тче Ефре́ме, и ре́вность на земли́ безпло́тныхъ показа́въ, все́ жела́ніе плотско́е ду́хови покори́лъ еси́. Тѣ́мже ны́нѣ во дво́рѣхъ небе́сныхъ водворя́яся, моли́ о душа́хъ на́шихъ.

Свѣ́тлая твоя́ па́мять, преподо́бне о́тче Ефре́ме, просвѣща́етъ сердца́ на́ша. Зря́ще бо честну́ю твою́ ра́ку, врачевство́ страсте́мъ, неудо́бь цѣли́мымъ, пріе́млемъ. Сего́ ра́ди прославля́емъ просла́вльшаго тя́ Го́спода, Его́же моли́ спасти́ и просвѣти́ти ду́ши на́ша.

Гла́съ 8:

Преподо́бне о́тче, всече́стне Ефре́ме, Боже́ственною добродѣ́телію, я́коже колесни́цею, на высоту́ небе́сную восте́клъ еси́, идѣ́же ду́хомъ побѣ́дныя по́чести пріе́мля, тѣ́ло твое́ многотру́дное, я́ко мѵ́ро многоцѣ́нное, во гро́бѣ оста́вилъ еси́, болѣ́зней исцѣле́нія источа́ющее и ду́хи лука́вствія прогоня́ющее. Тѣ́мже тя́ ублажа́емъ, всече́стне.

Сла́ва, гла́съ 6:

Ра́дуйся и весели́ся, Россíйская всеосвяще́нная Це́ркве со свяще́нники и кня́зи благочести́выми, мона́си же и простíи, блаже́ннаго Ефре́ма дне́сь па́мять почита́юще, духо́вно соше́дшеся, пра́зднуимъ, и, честны́й его́ гро́бъ обстоя́ще, любе́зно поклони́мся, и, моля́щеся, усе́рдно зове́мъ: ра́дуйся, преблаже́нне Ефре́ме, свѣти́льниче пресвѣ́тлый, врачу́ боля́щимъ и моли́твенниче ко Спа́су Христу́ Бо́гу на́шему о и́же вѣ́рою и любо́вію притека́ющихъ къ ра́цѣ моще́й твои́хъ.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 5. Подо́бенъ: Ра́дуйся.

Съ вѣ́рою и любо́вію, празднолю́бцы, соше́дшеся,* псалмы́ и пѣ́сньми восхва́лимъ дне́сь* небе́снаго человѣ́ка и земна́го а́нгела.* О, всеблаже́нне преподо́бне,* по́стникомъ похвало́,* моли́ся о на́съ ко Го́споду, Ефре́ме, о́тче на́шъ,* поми́ловатися душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Честны́й и свѣтоно́сный, преподо́бне, тво́й пра́здникъ,* испо́лненъ е́сть ра́дости и весе́лія духо́внаго.* Тѣ́мже соше́дшеся, мона́ховъ мно́жество* и христоимени́тіи лю́діе,* любо́вію восхваля́юще,* ублажи́мъ неизрече́нная чудодѣя́нія твоя́,* и́миже, я́ко кри́нъ во удо́лѣ, процвѣ́лъ еси́,* облагоуха́яй ду́ши на́ша и чу́вства,* Ефре́ме о́тче на́шъ,* моли́ спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Боже́ственнымъ уязви́вся жела́ніемъ,* преподо́бне о́тче на́шъ Ефре́ме,* и кре́стъ сво́й на ра́мо воспріи́мъ,* невозвра́тно послѣ́довалъ еси́ Влады́цѣ Христу́* и плотска́я вся́ мудрова́нія умертви́лъ еси́.* Сего́ ра́ди наслѣ́довалъ еси́ кро́ткихъ зе́млю.* Тѣ́мъ неизрече́ннаго о́наго весе́лія наслажда́яся,* помина́й на́съ, творя́щихъ всечестну́ю па́мять твою́.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ефре́ме, твое́ю бо стезе́ю пра́во вои́стинну ходи́ти позна́хомъ, блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь преподо́бнаго, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 3:

Якоже безпло́тенъ, о́тче, на земли́ пожи́лъ еси́ и превознося́щагося врага́ смири́лъ еси́ вы́ю. Тѣ́мже ны́нѣ съ невеще́ственными во́инствы водворя́яся, блаже́нне, и та́мо су́щаго блаже́нства наслажда́яся, помина́й на́съ, дне́сь пра́зднующихъ па́мять твою́, да вси́ ра́достными гла́сы воспѣва́емъ Го́спода, неоску́дную благода́ть исцѣле́ній тебѣ́ дарова́вшаго. [Два́жды.]

Сла́ва, и ны́нѣ, богоро́диченъ:

Боже́ственная была́ еси́ сѣ́нь Сло́ва, еди́на Пречи́стая Дѣ́во, чистото́ю а́нгелы превосходя́щая, мене́, па́че всѣ́хъ пе́рсть бы́вшаго, оскверне́нна плотски́ми прегрѣше́ніи, очи́сти Твои́ми моли́твами, Боже́ственными вода́ми омыва́ющи и подаю́щи, Чи́стая, ве́лію ми́лость.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Благоче́стно кре́стъ сво́й взе́мъ, Христу́ послѣ́довалъ еси́, воздержа́ніемъ плотска́я мудрова́нія умертви́въ, и, на добродѣ́тели лѣ́ствицу возше́дъ, Влады́ку и Го́спода возвели́чилъ еси́, и Его́ уго́дникомъ, Рома́ну и Дави́ду, хра́мъ че́стенъ воздви́глъ еси́, въ не́мже ны́нѣ твоя́ честны́я мо́щи лежа́тъ, источа́юще исцѣле́нія съ вѣ́рою притека́ющимъ къ тебѣ́, о́тче на́шъ, Ефре́ме преподо́бне. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Пресу́щественнаго Бо́га ро́ждшая человѣ́комъ, со преподо́бнымъ Того́ непреста́нно моли́ о на́съ, согрѣше́ніемъ оставле́ніе и житія́ исправле́ніе на́мъ пре́жде конца́ дарова́ти, вѣ́рою пою́щимъ Тя́ по до́лгу, еди́на Всепѣ́тая.

[Велича́ніе:

Ублажа́емъ тя́, преподо́бне о́тче Ефре́ме, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8:

Ца́рствовавъ надъ страстьми́ плотски́ми, а́нгеломъ подо́бно житіе́ на земли́ имѣ́лъ еси́ и, и́ноковъ мно́жество собра́въ, уче́ніемъ твои́мъ просвѣти́лъ еси́, преподо́бне, въ тріе́хъ бо Ѵпоста́сѣхъ Еди́наго Бо́га сла́вити наказа́лъ еси́. Ему́же ны́нѣ предстоя́ во сла́вѣ вѣ́чнѣй, о́тче на́шъ Ефре́ме богоно́се, моли́ согрѣше́ніемъ оставле́ніе дарова́ти съ вѣ́рою притека́ющимъ къ ра́цѣ моще́й твои́хъ и почита́ющимъ всечестну́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и ковче́гъ, всесвяту́ю го́ру, свѣ́тлый о́блакъ, воспои́мъ Марíю, неопали́мую купину́, слове́сный ра́й, Евино воззва́ніе, вселе́ннѣй все́й вели́кій сосу́дъ, я́ко спасе́ніе въ не́мъ содѣ́лася мíрови и оставле́ніе дре́внихъ согрѣше́ній. Ейже усе́рдно возопіи́мъ: моли́ Христа́ Бо́га согрѣше́ніемъ оставле́ніе дарова́ти благоче́стно покланя́ющимся Пресвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, мíра красоту́ и пи́щи вре́менное наслажде́ніе возненави́дѣвъ, мона́шеское житіе́ па́че возлюби́лъ еси́, тѣ́мъ а́нгеломъ собесѣ́дникъ бы́ти сподо́бился еси́, и свѣти́льникъ многосвѣ́тлый бы́лъ еси́ Россíйскія земли́. Помина́й на́съ, соверша́ющихъ всечестну́ю па́мять твою́: мы́ бо, ча́да твоя́ и о́вцы слове́сныхъ твои́хъ уче́ній, тебе́ на по́мощь призыва́емъ, прося́ще тобо́ю отъ Христа́ Бо́га прія́ти ми́ръ и ве́лію ми́лость.

Кано́нъ Богоро́дицы со ирмосо́мъ на 6, его́же краестро́чіе сицево́: Четве́ртая пѣ́снь Всехва́льнѣй Отрокови́цѣ. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Сотрясо́шася лю́діе, смято́шася язы́цы, ца́рствія же держа́вная уклони́шася, Чи́стая, отъ стра́ха Рождества́ Твоего́: пріи́де бо Ца́рь мо́й, и низложи́ мучи́теля, и мíръ отъ тли́ изба́ви.

Жили́ще Свое́ Живы́й въ вы́шнихъ, къ человѣ́комъ соше́дъ, освяти́, Христе́, и непоколеби́мо яви́: Еди́на бо по рождествѣ́ дѣ́вства сокро́вище, Зижди́теля ро́ждши, пребыла́ еси́.

И преподо́бнаго кано́нъ на 8, гла́съ то́йже.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Твоя́ похвалы́ хотя́щему нача́ти, Ефре́ме, моли́твами свои́ми посли́ ми́ благода́ть Ду́ха, стра́сти души́ и тѣлесе́ очища́ющую и у́мъ просвѣща́ющую, я́ко да, ра́дуяся, воспою́ твоя́ по́двиги, преподо́бне.

Просвѣще́ніемъ Трисо́лнечнаго Божества́ озари́вся, прему́дре, свѣти́льникъ свѣтоза́рный яви́лся еси́, просвѣща́яй вѣ́рою чту́щихъ свѣтоно́сную па́мять твою́.

Ве́сь Тро́ицы бы́въ жили́ще, та́мо все́ душе́вное жела́ніе возложи́лъ еси́, преподо́бне. Сего́ ра́ди безсме́ртную воспрія́лъ еси́ па́мять и жи́знь неконча́емую.

Богоро́диченъ: Безъ сѣ́мене Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію родила́ еси́: Иже изъ Отца́ безъ ма́тере, на́съ же ра́ди изъ Тебе́ безъ отца́.

Пѣ́снь 3.

Ирмо́съ: Съ высоты́ снизше́лъ еси́ во́лею на зе́млю превы́шше вся́каго нача́ла и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ, па́че Тебе́, Человѣколю́бче.

Очища́ется человѣ́ковъ существо́, Тобо́ю присовоку́пльшееся нестерпи́мому Боже́ственному огню́, я́ко сокрове́нный, Пречи́стая Дѣ́во, въ Тебѣ́ хлѣ́бъ испе́кшійся, Иже и Тебе́ неврежде́нну сохра́ншему.

Ка́я Сія́, Яже вои́стинну бли́зъ Бо́га? Яко превозше́дши вся́ а́нгельскія чи́ны, Еди́на добро́тою дѣ́вства, я́ко Ма́ти сія́ющи Вседержи́теля.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Напо́лнивъ се́рдце свое́ сле́зными пото́ки, преподо́бне Ефре́ме, плодоно́сно вся́кихъ добродѣ́телей содѣ́лалъ еси́ то́, износя́щее чуде́съ твои́хъ показа́ніе, преблаже́нне.

Ны́нѣ, преподо́бне о́тче Ефре́ме, съ ли́ки проро́ковъ, и апо́столовъ, и му́чениковъ, преподо́бныхъ же и пра́ведныхъ во свѣ́тѣ Святы́я Тро́ицы соводворя́яся, помина́й ча́дъ свои́хъ, вѣ́рно творя́щихъ па́мять твою́.

Воздержа́ніемъ кра́йнимъ пло́ть свою́ умертви́лъ еси́, преподо́бне Ефре́ме. Сего́ ра́ди, Ду́хомъ Боже́ственнымъ окрили́вся, дости́глъ еси́ священнонача́льныхъ служи́телей, идѣ́же небе́сныхъ Бо́жіихъ безпло́тныхъ ра́дованія.

Богоро́диченъ: Неора́нныя ни́вы бразда́ яви́лася еси́, Кла́съ живо́тный ро́ждшая и всѣ́мъ причаща́ющимся безсме́ртію Хода́тая, во святы́хъ Свята́го и на святы́хъ Почива́ющаго.

Сѣда́ленъ, гла́съ 4:

Страстно́е покори́лъ еси́ плотско́е мудрова́ніе и ху́ждшее порабо́тилъ еси́ лу́чшему, о́тче Ефре́ме пресла́вне, сокруши́лъ еси́ бѣсо́вскія ко́зни посто́мъ и возсія́лъ еси́ въ мíрѣ, я́ко луча́ со́лнечная, сія́ніи твои́хъ добродѣ́телей. Сего́ ра́ди тя́ воспѣва́емъ. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непостижи́мое, Имже изба́вихомся льсти́ діа́воли и вся́кихъ бѣ́дъ. Влады́чице Богоро́дице, вѣ́рно вопіе́мъ Ти́: поми́луй ста́до Твое́, еди́на Пречи́стая.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Поживе́ съ человѣ́ки, ви́димь бы́въ Неви́димый, во зра́цѣ Сы́й непостижи́маго Божества́, и, вообра́жся изъ Тебе́, Отрокови́це, въ чужде́е, вѣ́дущихъ Тя́ чи́стую Богома́терь спаса́етъ.

Прія́тъ въ веще́ственнѣ Дѣ́ва невеще́ственнаго въ прича́стіи вещества́, Младе́нца отъ Нея́ бы́вша, тѣ́мже во дву́ Существу́ Еди́нъ познава́ется, Плотоно́сецъ Бо́гъ и Человѣ́къ пресу́щественный.

По рождествѣ́ Тя́ Дѣ́ву Иже въ Дѣ́ву Тя́ всели́ся, и ро́ждся безъ сѣ́мене Сло́во, и Бо́гъ пребы́сть, и въ рождествѣ́ Дѣ́ву сохрани́, я́ко Влады́ка и Зижди́тель всея́ тва́ри.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Житіе́ твое́, о́тче Ефре́ме, чу́дно на земли́ показа́лъ еси́, вели́кое поще́ніе и смире́ніе, сего́ ра́ди на небесѣ́хъ жи́знь вѣ́чную наслѣ́довалъ еси́, моли́ спасти́ся отъ бѣ́дъ пою́щимъ тя́.

Посто́мъ и моли́твами тѣ́ло твое́, о́тче Ефре́ме, изнури́лъ еси́, сего́ ра́ди сподо́бился еси́ ви́дѣти неизрече́нная блага́я, я́же святы́мъ угото́вана, съ ни́миже, о́тче, о на́съ моли́ся.

Ду́ху Пресвято́му хра́мъ, о́тче, бы́лъ еси́, и живо́тныхъ во́дъ рѣка́ наполня́ема, и основа́ніе Це́ркве непоколеби́мо, и и́ночествующихъ утвержде́ніе, Ефре́ме преподо́бне.

Богоро́диченъ: Покро́въ, и заступле́ніе, и прибѣ́жище бу́ди ми́, Дѣ́во, рабу́ Твоему́, и исцѣли́ мя́, Влады́чице, отъ безмѣ́рныхъ зо́лъ мои́хъ воспѣва́ти Тя́, Пречи́стая: сла́ва Рождеству́ Твоему́.

Пѣ́снь 5.

Ирмо́съ: Ны́нѣ воста́ну, проро́чески рече́ Бо́гъ, ны́нѣ просла́влюся, ны́нѣ вознесу́ся, па́дшаго пріе́мъ отъ Дѣ́вы и къ свѣ́ту у́мному вознося́й Моего́ Божества́.

До́мъ Тя́ сла́вы, го́ру Бо́жію святу́ю, Чи́стая, невѣ́сту, черто́гъ, хра́мъ освяще́нія Сы́нъ Бо́жій, въ Тя́ всели́выйся, и ра́й сла́дости присносу́щныя на́мъ содѣ́ла.

Пло́ть отъ кро́ве дѣ́вственныя прія́лъ еси́, Христе́, безсѣ́менну, пречи́сту, ѵпоста́сну, слове́сну и у́мну, одушевле́нну, дѣ́йственну, хотѣ́тельну, самовлады́чну и самовла́стну.

Мучи́телей ра́зумъ дѣ́вственное посрами́ чре́во: Младе́нецъ бо я́зву а́спидную душегу́бную испыта́ руко́ю и, отсту́пника го́рдаго низло́жъ, вѣ́рныхъ подъ но́зѣ покори́.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Яко преоби́дѣвъ тлѣ́нная, вѣ́чная, о́тче, воспрія́лъ еси́ по нело́жному словеси́: проси́те и пріи́мете. Тѣ́мже, я́ко проси́лъ еси́, сія́ по досто́инству прія́лъ еси́.

Мѣ́сто, е́же сподо́бися прія́ти честны́я мо́щи твоя́, преподо́бне, освяти́ся и по мно́гимъ страна́мъ прославля́емо е́сть, я́ко въ себѣ́ мо́щи твоя́ иму́щее.

Исцѣле́нія содѣ́ловаютъ честны́я мо́щи твоя́, Ефре́ме, и отго́нятъ разли́чныя неду́ги отъ человѣ́къ, и укрѣпля́ютъ у́мъ и́хъ восхвали́ти труды́ твоя́, всече́стне.

Богоро́диченъ: Христа́ на́мъ ро́ждшая, Пречи́стая Дѣ́во, Богора́дованная Влады́чице, спаси́ гра́дъ и лю́ди, на Тя́ упова́ющія, Богоро́дице Всенепоро́чная.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Дре́вле у́бо прельсти́ мя́ змíй и умори́ мя́ прама́терію мое́ю Евою, ны́нѣ же, Чи́стая, Тобо́ю Созда́вый мя́ изъ нетлѣ́нія воззва́.

Бе́здна Тя́ бе́здну неизрече́нно благоутро́бія, Отрокови́це, избра́нную показа́ чуде́съ, и́бо изъ Тебе́ мо́лніею Божества́ би́серъ Христо́съ возсія́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Моли́твами предваря́я къ Бо́гу и Тому́ предстоя́ со а́нгелы, за ве́сь мíръ помоли́ся, бра́нь непрія́зненну всю́ду потреби́ти и побѣ́ду извѣ́стну да́ти на супоста́ты Благовѣ́рному Импера́тору на́шему.

Гро́бъ честна́го твоего́ тѣлесе́ показа́лъ еси́ вѣ́рнымъ лю́демъ душа́мъ освяще́ніе, тѣлесе́мъ здра́віе и отъ страсте́й избавле́ніе: отъ твои́хъ бо моще́й исцѣле́нія почерпа́емъ.

Глаго́ловъ и зако́новъ Влады́чнихъ испо́лнитель бы́въ, испо́лнился еси́, преподо́бне о́тче Ефре́ме, Боже́ственныхъ даро́въ. Тѣ́мъ и чуде́съ лучи́ всѣ́мъ испусти́лъ еси́.

Богоро́диченъ: Изсуши́вшая сады́ безбо́жныхъ люде́й, Пренепоро́чная Дѣ́во, Свои́мъ Прозябе́ніемъ, прозя́бшую во мнѣ́ зло́бу искорени́, Богоневѣ́сто.

Конда́къ, гла́съ 8:

Яко богоявле́нная Россíйская звѣзда́, дне́сь сія́я чудесы́, яви́лся еси́, преподо́бне о́тче Ефре́ме. Тѣ́мъ не преста́й моля́ся о ста́дѣ свое́мъ, сохраня́яй оте́чество твое́, гра́дъ же и лю́ди, и́же тебе́ вѣ́рою почита́ющихъ и къ честны́мъ моще́мъ твои́мъ усе́рдно притека́ющихъ, да велегла́сно тебѣ́ вопіе́мъ: ра́дуйся, богому́дре Ефре́ме, о́тче на́шъ.

Икосъ:

Яко свѣти́льникъ всесвѣ́тлый и во пло́ти а́нгелъ, яви́лся еси́, преподо́бне, и, я́ко живота́ дре́во ра́йское, вѣ́рою бы́въ возраща́емь, поще́ніемъ и моли́твами свои́ми процвѣ́лъ еси́. Сего́ ра́ди небе́сную благода́ть пріи́мъ, вра́чь изря́дный боля́щимъ показа́лся еси́. Исцѣля́еши бо тѣлеса́ неду́жныхъ и ду́ши вѣ́рою притека́ющихъ къ ра́цѣ моще́й твои́хъ. Тѣ́мъ, мо́лимся, моли́ся о ста́дѣ свое́мъ и сохраня́й оте́чество свое́, гра́жданъ же и лю́ди, да зове́мъ ти́: ра́дуйся, преподо́бне Ефре́ме, о́тче на́шъ.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Привлачи́тъ мя́ къ пѣ́нію любо́вь дѣ́вственная, о́гнь, и́же въ се́рдцы, вопи́ти Ма́тери и Дѣ́вѣ: Благослове́нная, Госпо́дь си́ламъ съ Тобо́ю.

Превы́шши тва́ри яви́лася еси́, я́ко Творца́ ро́ждши и Го́спода. Тѣ́мже Ти́ вопію́: Богоро́дице Благослове́нная, Госпо́дь си́ламъ съ Тобо́ю.

Тро́иченъ: Госпо́дство Тя́ Еди́но чты́й, въ Тріе́хъ Свяще́ніихъ нераздѣ́льно, воспѣва́ю Тріѵпоста́сное Естество́, Благослове́нная, взыва́я Тебѣ́, Яже вся́ управля́ющая.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Прилѣ́жныя моли́твы, по́двиги же и труды́ твоя́ почита́юще, сла́дости уче́нія твоего́ почерпа́емъ, преподо́бне о́тче Ефре́ме, и́мже и научи́лъ еси́ воспѣва́ти Тріѵпоста́сное Существо́: оте́цъ на́шихъ Бо́же, благослове́нъ еси́.

Чу́дно житіе́ твое́ и кончи́на безсме́ртна, преподо́бне о́тче Ефре́ме. Сего́ ра́ди тя́ Христо́съ свы́ше украси́ вѣнце́мъ пресвѣ́тлымъ и чуде́съ дѣя́ніемъ обогати́, и́миже просвѣща́еши на́съ, науча́я вопи́ти: благослове́нъ Бо́гъ оте́цъ на́шихъ.

Яви́лся еси́ гра́ду на́шему, Ефре́ме богоблаже́нне, сто́лпъ непоколеби́мъ, стѣна́ неруши́мая, вели́кое избавле́ніе отъ бѣ́дъ и исто́чникъ благода́ти неоску́дный, подаю́щи всѣ́мъ исцѣле́ніе, зову́щимъ при́сно: оте́цъ на́шихъ Бо́же, благослове́нъ еси́.

Богоро́диченъ: Безъ сѣ́мене Отчею во́лею заче́нши Творца́ всѣ́хъ, Христа́ Бо́га, неизрече́нно родила́ еси́, Его́же моли́, я́ко дерзнове́ніе иму́щи къ Нему́, да ны́ спасе́тъ, вопію́щихъ Ему́: Бо́же, благослове́нъ еси́.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Отъ ребра́ Ада́мова созда́вый Тя́ отъ Твоего́ дѣ́вства воплоти́ся, Иже всѣ́хъ Госпо́дь, Его́же пою́ще, вопіе́мъ: вся́ дѣла́, благослови́те, по́йте Го́спода и превозноси́те Его́ во вѣ́ки.

Въ сѣ́ни Авраа́мъ узрѣ́ е́же въ Тебѣ́, Богоро́дице, та́инство, Сы́на бо Твоего́ безпло́тнаго прія́тъ, поя́: вся́ дѣла́, благослови́те, по́йте Го́спода и превозноси́те Его́ во вѣ́ки.

Равночи́сленныя Тро́ицы спасло́ е́сть Твоего́ дѣ́вства проображе́ніе, въ дѣ́вственныхъ бо тѣлесѣ́хъ попира́ху пла́мень, Отрокови́це, вопію́ще: благослови́те, по́йте Го́спода и превозноси́те Его́ во вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Любо́вію и вѣ́рою чту́ще па́мять твою́, прилѣ́жно мо́лимъ тя́, преподо́бне о́тче Ефре́ме: непреста́нно за ны́ Христа́ Бо́га моли́ вку́пѣ съ Рома́номъ и Дави́домъ, непра́ведное заколе́ніе любве́ ра́ди Бо́жія претерпѣ́вшими, и́мже и хра́мъ че́стенъ воздви́глъ еси́ во сла́ву Христа́ Бо́га, поя́ при́сно: вся́ дѣла́ Госпо́дня, Го́спода по́йте и превозноси́те Его́ во вѣ́ки.

Лику́ютъ на небесѣ́хъ чи́нове а́нгельстіи, блаже́нне Ефре́ме, и вѣ́рныхъ собо́ри на земли́ твою́ па́мять похваля́ютъ, пою́ще: благослови́те, вся́ дѣла́ Госпо́дня, Го́спода.

Помоли́ся Христу́ Бо́гу, всеблаже́нне Ефре́ме, о приходя́щихъ къ тебѣ́ съ вѣ́рою и хотя́щихъ отъ тебе́ почерпсти́ исцѣле́нія неоску́днаго и благода́ти, пою́щихъ: благослови́те, вся́ дѣла́ Госпо́дня, Го́спода.

Богоро́диченъ: Изъ пречи́стаго Твоего́ чре́ва, Богома́ти Влады́чице, небе́снаго дождя́ Ка́пля на́мъ ука́ну на омове́ніе скве́рнъ душе́вныхъ, на здра́віе тѣлесе́мъ и на прогна́ніе лука́выхъ духо́въ. Тѣ́мже Тя́ блажи́мъ, Чи́стую, во вѣ́ки.

Пѣ́снь 9.

Ирмо́съ: Сокрове́нное Бо́жіе неизрече́нное въ Тебѣ́ соверша́ется я́вственное та́инство, Дѣ́во Пречи́стая, и́бо Бо́гъ изъ Тебѣ́ воплоти́ся за милосе́рдіе, Тѣ́мже Тя́ я́ко Богоро́дицу велича́емъ.

Зри́мъ, я́ко кри́нъ, Тя́, ри́зою обагре́ною украше́ну, Пречи́стая, Боже́ственнаго Ду́ха, посредѣ́ те́рнія сія́ющу и благоуха́нія исполня́ющу и́же Тебе́ и́скренно велича́ющихъ.

Тлѣ́нное пріи́мъ человѣ́ческое естество́ изъ Твоего́, Всенепоро́чная, чре́ва Нетлѣ́нный, въ Себѣ́ показа́ нетлѣ́нно за благоутро́біе, тѣ́мже Тя́ я́ко Богоро́дицу велича́емъ.

Яже всѣ́ми влады́чествующая тва́рьми, лю́демъ Твои́мъ да́руй побѣ́дное одолѣ́ніе, врага́ полага́ющи примири́тельна Це́ркви, да Тя́ я́ко Богоро́дицу велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

На земли́, я́ко а́нгелъ, пожи́лъ еси́ пло́тію и, я́ко безпло́тенъ, безпло́тныя враги́ подъ но́зѣ свои́ покори́лъ еси́, чистоту́ стяжа́въ посто́мъ и моли́твами. Тѣ́мъ ны́нѣ со а́нгелы на небесѣ́хъ свѣ́тло лику́я, за ны́ Христо́ви помоли́ся.

Ны́нѣ вхо́дятъ во святы́й хра́мъ се́й ца́ріе и кня́зи, бога́тіи же и убо́зіи, и́же вси́, припа́дающе къ честны́мъ моще́мъ твои́мъ, про́сятъ отъ тебе́ получи́ти здра́віе тѣлесе́мъ и спасе́ніе душа́мъ твои́ми къ Бо́гу моли́твами.

Ны́нѣ у́бо помоли́ся Го́споду, всечу́дне Ефре́ме, я́ко да прикоснове́ніемъ свяще́нныхъ моще́й твои́хъ слѣпíи воспріи́мутъ прозрѣ́ніе, хромíи хожде́ніе и неду́жніи вси́ здра́віе и исцѣле́ніе твои́ми къ Бо́гу моли́твами.

Богоро́диченъ: Яже всѣ́ми влады́чествующая тва́рьми, лю́демъ Твои́мъ да́руй побѣ́ду и одолѣ́ніе, непокори́выя враги́ покоря́я подъ но́зѣ Вѣ́рному Импера́тору на́шему, да Тя́ вси́ я́ко Богоро́дицу велича́емъ.

Свѣти́ленъ:

Мірска́го пристра́стія, я́ко отъ скве́рны, уклони́вся, а́лчбою и жа́ждою пло́ть свою́ увяди́лъ еси́, о́тче. Тѣ́мъ небе́сною сла́вою со а́нгелы обогати́лся еси́, съ ни́миже непреста́нно моли́ о на́съ Христа́ Бо́га, преподо́бне Ефре́ме. [Два́жды.]

Сла́ва, и ны́нѣ, богоро́диченъ:

Тя́ Предста́тельницу, вси́ грѣ́шніи, и́мамы, о Пресвята́я Дѣ́во Влады́чице! Ты́ ми́ благопремѣ́нна сотвори́ Сы́на Твоего́ Ма́терними Свои́ми моли́твами.

На хвали́техъ стихи́ры на 4, гла́съ 5. Подо́бенъ: Преподо́бне о́тче.

Преподо́бне о́тче и богоно́се Ефре́ме,* во вре́меннѣй жи́зни подвиза́вся,* моли́твами, посто́мъ и воздержа́ніемъ мно́гимъ* ду́шу свою́ съ тѣ́ломъ очи́стилъ еси́.* Сего́ ра́ди Ду́ху Свято́му прекра́сная оби́тель яви́лся еси́,* Иже сла́вна тя́, преблаже́нне, вселе́ннѣй содѣ́ла* и въ чудесѣ́хъ вели́каго свѣти́льника показа́,* просвѣти́вшаго су́щихъ во мра́цѣ.* Тѣ́мъ мы́ я́ко наста́вника тя́ мона́ховъ* велему́дренно ублажа́емъ. [Два́жды.]

Преподо́бне о́тче и богоно́се Ефре́ме,* ты́, на Бо́га упова́ніе во все́мъ возложи́въ,* це́рковь прекра́сну страстоте́рпцемъ Христо́вымъ Рома́ну и Дави́ду воздви́глъ еси́,* идѣ́же и оби́тель че́стну соста́вилъ еси́,* въ пребыва́ніе хотя́щимъ спасти́ся,* са́мъ о всѣ́хъ моле́ніе принося́ ко Влады́цѣ, Христу́ Бо́гу на́шему,* Ему́же моли́ся, преподо́бне,* пода́ти душа́мъ на́шимъ ми́ръ и ве́лію ми́лость.

Преподо́бне о́тче и богоно́се Ефре́ме,* свѣти́льника тя́ стяжа́вше,* свяще́нную твою́ па́мять восхваля́емъ вси́,* свяще́нными пѣ́сньми тя́ ублажа́юще.* Ты́ це́рковь Бо́жію украси́лъ еси́* и ча́да твоя́ уче́ньми просвѣти́лъ еси́.* Тѣ́мъ, ны́нѣ любо́вію и со стра́хомъ* припа́дающе къ честны́мъ моще́мъ твои́мъ, преподо́бне,* мо́лимся тобо́ю прія́ти на́мъ ве́лію ми́лость.

Сла́ва, гла́съ 6:

Преподо́бне о́тче Ефре́ме, не да́лъ еси́ сна́ свои́ма очи́ма, ни вѣ́ждома свои́ма дрема́нія, до́ндеже ду́шу и тѣ́ло отъ страсте́й свободи́въ, угото́валъ еси́ себе́ Пресвятѣ́й Тро́ицѣ жили́ще, прише́дъ бо, Христо́съ со Отце́мъ и Ду́хомъ оби́тель въ тебѣ́ сотвори́. Тѣ́мъ, я́ко имѣ́яй дерзнове́ніе ко Го́споду, великопроповѣ́дниче Христо́въ преподо́бне Ефре́ме, моли́ся о душа́хъ на́шихъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Славосло́віе вели́кое. Та́же тропа́рь. Сла́ва, и ны́нѣ, богоро́диченъ. Ектеніи́, отпу́стъ и ча́съ 1-й.



НА ЛИТУРГІИ,

Блаже́нна отъ кано́на, пѣ́снь 3-я и 6-я. [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба преподо́бному отцу́ на́шему Ефре́му, архимандри́ту Новото́ржскому, чудотво́рцу. — Изда́ніе тре́тіе. — М.: Сѵнода́льная Тѵпогра́фія, 1895. — Л. 2 – 26.

/ Къ оглавленію раздѣла /


Наверхъ / Къ титульной страницѣ

0