Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 28-й де́нь.
Слу́жба преподо́бному отцу́ на́шему Ефре́му Пече́рскому, бы́вшему евну́ху кня́зя Кíевскаго Изясла́ва, послѣди́ же епи́скопу Перея́славскому.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 8], гла́съ 4. Подо́бенъ: Зва́нный свы́ше.

Егда́ Ду́ха Свята́го пома́заніемъ избра́нъ бы́лъ еси́, Ефре́ме преподо́бне, пасти́ слове́сное ста́до небе́снаго Царя́, тогда́, я́ко до́брый па́стырь и учи́тель, вруче́нныя тебѣ́ о́вцы непреста́нно благи́мъ наказа́ніемъ наставля́я, вразумля́лъ еси́, и, сло́вомъ утѣше́нія пита́я, утвержда́лъ еси́, сама́го себе́ и́мъ о́бразъ сло́вомъ и дѣ́ломъ показу́я, и, до́брѣ на па́житехъ духо́вныхъ упа́съ, приве́лъ еси́ цѣ́лы къ проше́дшему небеса́ па́стырей Нача́льнику, Христу́ Бо́гу, Его́же моли́ сохрани́ти и спасти́ и на́съ отъ враго́въ невреди́мыхъ. [Три́жды.]

Егда́ благоволе́ніе Бо́жіе разжже́ всѣ́хъ сердца́ въ любо́вь къ тебѣ́, о́тче преблаже́нне, тогда́ по жела́нію діади́му нося́щаго о́бщимъ всѣ́хъ совѣ́томъ поста́вленъ бы́лъ еси́ архіере́й сла́вному гра́ду, въ не́мже да вѣ́рнѣ, я́ко вѣ́рный ра́бъ, Влады́цѣ своему́ послужи́ши, ве́ліе тща́ніе о созида́ніи въ еписко́піи свое́й хра́мовъ имѣ́лъ еси́ и сіе́ па́че всѣ́хъ честнѣ́йшее и любе́знѣйшее дѣ́ло себѣ́ вмѣни́лъ еси́, е́же умно́жити хвале́ніе въ сла́ву Христа́ Бо́га на́шего, Его́же моли́ спасти́ и просвѣти́ти ду́ши на́ша. [Два́жды.]

Сла́ва, гла́съ 6:

Святи́телей удобре́ніе, преблаже́нне о́тче свяще́ннѣйшій, изря́дный учениче́ Христо́въ, па́стырю до́брый, упасы́й ста́до свое́ на па́житехъ духо́вныхъ, Ефре́ме досточу́дне, ны́нѣ со святи́тели предстоя́ престо́лу Христо́ву, не преста́й моля́ся о на́съ, пою́щихъ честно́е твое́ успе́ніе.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́, и чте́нія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 6. Подо́бенъ: Все́ отло́жше.

Чистото́ю житія́ твоего́ и свѣ́тлостію многотру́дныхъ твои́хъ по́двигъ озари́въ ви́дящихъ благолѣ́піе лица́ твоего́, всѣ́хъ въ любо́вь свою́ привле́клъ еси́, бы́лъ бо еси́, я́ко свѣтоза́рное со́лнце, сы́нъ су́щи невече́рняго Свѣ́та, и вше́лъ еси́, идѣ́же облиста́етъ Свѣ́тъ непристу́пный, тѣ́мъ, я́ко имы́й дерзнове́ніе ко Христу́ Бо́гу, моли́ся о почита́ющихъ твою́ па́мять честну́ю, Ефре́ме, о́тче свяще́ннѣйшій.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Ти́хостію и ра́зумомъ смиренному́дрія твоего́ къ Высоча́йшему Уму́ возше́дши, вше́лъ еси́ во свята́я святы́хъ, я́ко архіере́й преподо́бенъ и я́ко священнотаи́нникъ благосла́венъ, причасти́лся еси́ Святы́хъ Та́инъ, отню́дуже свѣ́томъ Боговидѣ́нія озари́лся еси́, тѣ́мъ со дерзнове́ніемъ моли́ся о на́съ, пою́щихъ па́мять твою́, Ефре́ме досточу́дне.

Сти́хъ: Восхва́лятся преподо́бныя во сла́вѣ, и возра́дуются на ло́жахъ свои́хъ.

Ве́сь ра́зумъ и тща́ніе ко благолѣ́пію Це́ркве Христо́вы воспрія́лъ еси́, ю́же, я́ко невѣ́сту, всезлато́ю гри́вною уче́нія твоего́ украси́лъ еси́ и, богодухнове́нными твои́ми словесы́ опоя́савъ, предста́вилъ еси́ всекра́сну Влады́цѣ своему́, Ему́же ны́нѣ прилѣ́жно моли́ся отъ тли́ и бѣ́дъ изба́витися вѣ́рою соверша́ющимъ всечестну́ю па́мять твою́, святи́телю Ефре́ме блаже́ннѣйшій.

Сла́ва, гла́съ то́йже:

Въ благонаро́читый де́нь пра́здника твоего́, о́тче преподо́бне, ра́дуются согла́сно и игра́ютъ Россíйстіи собо́ри и та́йно лику́етъ Христо́ва Це́рковь, похва́льная тебѣ́ принося́щи и Христа́ Бо́га въ па́мяти твое́й прославля́ющи.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь, гла́съ 8:

Ду́хомъ горя́ путеше́ствія къ святы́мъ мѣста́мъ, стра́нствовалъ еси́ въ гре́ческую зе́млю, святи́телю Ефре́ме, отню́дуже со мно́гою по́льзою возвраща́яся, уста́въ свята́го Студíйскаго монастыря́ списа́въ, а́ки нѣ́кій многоче́стенъ да́ръ, сѣ́мо прине́слъ еси́, и́мже и дне́сь Це́рковь Россíйская управля́ема сла́витъ тебе́, и́стиннаго о не́й промы́сленника.

Сла́ва, и ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Въ вы́шнихъ предстоя́ ны́нѣ Непристу́пному Свѣ́ту, на́мъ, па́мять твою́ восхваля́ющимъ, Ефре́ме, о́тче свяще́ннѣйшій, моли́ улучи́ти благода́ть и очище́ніе прегрѣше́ній, въ де́нь же стра́шнаго испыта́нія ве́лію ми́лость, да сподо́бимся съ тобо́ю сла́вити вси́ Еди́наго Человѣколю́бца. [Два́жды.]

Сла́ва, и ны́нѣ, богоро́диченъ:

Всѣ́хъ Созда́тель и Спаси́тель мíра, пре́жде вѣ́къ отъ Оте́ческихъ нѣ́дръ рожде́йся, То́йже въ лѣ́то отъ Тебе́ произше́дъ, Богоневѣ́стная Дѣ́во, обнови́ истлѣ́вшее человѣ́ческое естество́ и Тебе́ показа́ всѣ́мъ спасе́нія на́шего Хода́таицу.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Жесто́кій пу́ть въ жи́зни се́й ше́ствовалъ еси́, о́тче, и вожделѣ́ннаго приста́нища мно́гими труды́ свои́ми дости́глъ еси́, и, вше́дъ въ вы́шнее простра́нство небе́сное, на́мъ оста́вилъ еси́ лѣ́стницу добродѣ́тельнаго восхожде́нія твоего́, Ефре́ме, па́стырю блаже́ннѣйшій. [Два́жды.]

Сла́ва, и ны́нѣ, богоро́диченъ:

Простра́ннымъ путе́мъ разли́чныхъ собла́знъ ходя́щу и къ спасе́нному приста́нищу улучи́ти не могу́щу, предста́ни ми́ ско́ро, Пречи́стая Дѣ́во: Ты́ бо еси́ Руководи́тельница Блага́я всѣ́мъ, Тебе́ призыва́ющимъ.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Душе́вныхъ и тѣле́сныхъ страсте́й отсѣче́ніемъ въ пра́вду евну́хъ проименова́нъ бы́лъ еси́, преподо́бне. Тѣ́мъ, я́ко потопле́нія стра́стнаго мо́ря избѣжа́вый, потщи́ся о на́съ, любо́вію почита́ющихъ па́мять твою́, мольбу́ сотвори́ти ко Христу́ Бо́гу, да пріи́мемъ благода́ть, и ми́лость, и страсте́й всѣ́хъ свобожде́ніе. [Два́жды.]

Сла́ва, и ны́нѣ, богоро́диченъ:

Мо́лимъ Тя́ прилѣ́жно, Богоневѣ́стная Дѣ́во, я́ко иму́щая дерзнове́ніе къ Сы́ну Своему́ и Бо́гу, при́сно моли́ за ны́, непотре́бныя рабы́ Твоя́, да обря́щемъ благода́ть и ми́лость въ де́нь Су́дный.

Та́же степе́нна, 1-й антифо́нъ 4-го гла́са. Проки́менъ, гла́съ то́йже: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Услы́шите сія́, вси́ язы́цы, внуши́те, вси́, живу́щіи [по вселе́ннѣй]. Вся́кое дыха́ніе да хва́литъ Го́спода... Ева́нгеліе о́бщее святи́телю: [Іоа́нна, зача́ло 35 отъ полу́].

По 50-мъ псалмѣ́ стихи́ра, гла́съ 6:

Святи́телей удобре́ніе, [преблаже́нне о́тче свяще́ннѣйшій, изря́дный учениче́ Христо́въ, па́стырю до́брый, упасы́й ста́до свое́ на па́житехъ духо́вныхъ, Ефре́ме досточу́дне, ны́нѣ со святи́тели предстоя́ престо́лу Христо́ву, не преста́й моля́ся о на́съ, пою́щихъ честно́е твое́ успе́ніе].

Кано́нъ Богоро́дицы со ирмосо́мъ на 6 и свята́го на [8], гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Гряди́, Бо́гомъ со́бранная Це́рковь Христо́ва, и пѣ́сненными вѣнцы́ вѣнча́й вѣнча́ннаго свы́ше благода́тію святи́телемъ удобре́ніе, Ефре́ма чу́днаго, побѣ́дное принося́щи хвале́ніе Бо́гу, я́ко просла́вися.

Ты́, свяще́ннѣйшій о́тче, нося́ Учи́телевъ о́бразъ кро́тости и смире́нія, оте́цъ ни́щимъ, сирота́мъ и вдови́цамъ бы́лъ еси́ и оби́димымъ ско́рый засту́пникъ.

По достоя́нію зва́нъ бы́лъ еси́ отъ Вели́каго Архіере́я, Иже сѣ́де одесну́ю Отца́ на высо́кихъ, пасти́ избра́нное Его́ ста́до, е́же снабдѣ́ Кро́вію Свое́ю, и сіе́ упа́съ до́брѣ, вше́лъ еси́ въ небе́сная предстоя́ти со святи́тели па́стырей Нача́льнику — Христу́.

Па́стырскимъ вѣнце́мъ тво́й ве́рхъ обложе́нъ ви́дя, свя́те, херуви́мъ отве́рзе тебѣ́ Еде́мская врата́. И вше́лъ еси́, идѣ́же дре́во жи́зни и пото́къ сла́дости безконе́чныя избра́нныхъ насыща́етъ.

Богоро́диченъ: Отве́рзшая всѣ́мъ врата́ небе́сная Рождество́мъ Твои́мъ, Ма́ти Дѣ́во, отве́рзи на́мъ две́ри ми́лости Твоея́ и введи́ на́съ въ Оте́чество небе́сное.

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Лу́къ напряже́нъ, у́мъ сво́й имѣ́лъ еси́ отъ ю́ности, о́тче, подража́ти а́нгельскому житію́, тѣ́мъ, оста́вивъ служи́ти кня́зю Изясла́ву, прише́лъ еси́ ко Анто́нію въ пеще́ру и отъ него́ научи́лся, ка́ко на врага́ препоя́сатися си́лою.

Любо́вію ко Христу́ распали́вся и обнажи́вся мíра, обле́клся еси́ въ ри́зу спасе́нія и, шле́мъ на главу́ твою́ рука́ма блаже́ннаго Ни́кона возложи́въ, пожи́лъ еси́, а́ки а́нгелъ, на земли́, бы́въ внѣ́ мíра и пло́ти.

Ви́дя тя́, преподо́бне, лю́тый веліа́ръ, я́ко, презрѣ́въ мíръ, причти́лся еси́ ко ста́ду свято́му богоно́сныхъ оте́цъ, умы́сли о́но распу́дити, но ты́, пріе́мь ору́жіе — моли́тву, по́стъ и бдѣ́ніе, препоя́сался еси́ на него́ духо́вною си́лою.

Бы́лъ еси́, повину́яся во все́мъ наказа́нію отца́ твоего́, преподо́бнаго Анто́нія, я́ко и́стиненъ подража́тель Іису́су, да́же до сме́рти послушли́ву, тѣ́мже превозне́слся еси́ отъ Него́ на добродѣ́тели, препоя́санъ си́лою.

Богоро́диченъ: Немощству́я душе́ю и тѣ́ломъ, къ Тебѣ́, я́ко къ си́льной и многомо́щной Цари́цѣ, Богоро́дице, всеусе́рдно притека́ю и молю́ся Ти́: си́лою свы́ше на добродѣ́тели препоя́сати мя́ благоволи́, да благода́рно воспою́ Твою́ бла́гость, Препѣ́тая.

Сѣда́ленъ, гла́съ 2:

Моли́твенника те́пла, и церко́внаго благолѣ́пія люби́теля, святи́телемъ удобре́ніе, іера́рха Бо́жія Ефре́ма во дне́шній де́нь хвала́ми почти́мъ: то́й бо, на земли́ во пло́ти безпло́тнымъ уподо́бився, глаго́ломъ те́плыя моли́твы посѣ́клъ вся́ плотскíя стра́сти и прія́ дерзнове́ніе всѣ́мъ въ ну́ждахъ посо́бствовати. [Два́жды.]

Сла́ва, и ны́нѣ, богоро́диченъ:

Къ Тебѣ́, Моли́твенницѣ те́плой и неруши́мой Стѣнѣ́, всеусе́рдно прибѣга́емъ, Благослове́нная Богоро́дице Дѣ́во, по́мощи прося́ще, изба́ви на́съ отъ бѣ́дъ и скорбе́й безмѣ́рныхъ: и́маши бо благода́ть и си́лу всѣ́мъ въ ну́ждахъ посо́бствовати.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Услы́шавъ, о́тче, а́нгельское житіе́ оте́цъ богоно́сныхъ, возгорѣ́лся еси́ ду́хомъ къ святы́мъ мѣсто́мъ, жела́я бы́ти житія́ си́хъ самови́децъ и добродѣ́телемъ и́хъ подража́тель.

Въ ца́рствующій гра́дъ гре́ческія страны́ хотя́ путьше́ствовати, жела́лъ еси́, преподо́бне, наста́вника своего́ благослове́нія и моли́твы, вѣ́дый, я́ко съ благослове́ніемъ сѣ́яй благослове́нныя пожина́етъ кла́сы.

Пріе́мь, свя́те, двѣ́ крилѣ́ — благослове́ніе и моли́тву отца́ своего́, а́ки го́лубь изъ ковче́га, излетѣ́лъ еси́ въ гре́ки, ища́ мы́сленныя вѣ́тви добродѣ́телей и по́льзы оте́цъ богоно́сныхъ.

Обрѣ́тъ, е́же жела́лъ еси́, прему́дре, ви́дѣвъ святолѣ́пныхъ оте́цъ, а́ки ке́дры въ Лива́нѣ, или́ фи́ники посредѣ́ рая́ Бо́жія процвѣ́тшіи, отъ и́хъ же цвѣто́въ прине́слъ еси́ на́мъ плоды́ — Студíйскаго монастыря́ уста́вы.

Богоро́диченъ: Дре́во души́ моея́, лѣ́ностію непло́дное, вра́гъ всезло́бный сотвори́, но да не посѣче́тся, я́ко о́ная смоко́вница, напо́й отъ исто́чника бла́гости Твоея́, Ма́ти Дѣ́во, да принесу́ пло́дъ во вре́мя свое́ — житіе́ испра́вленно.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Свѣ́та Пода́тель — Іису́съ, ви́дя ду́шу твою́, чистото́ю блеща́щуюся, не даде́ тебѣ́ бы́ти подъ спу́домъ, но поста́ви тя́ на свѣ́щницѣ архіере́йства, да свѣ́тиши въ Це́ркви Его́, ю́же снабдѣ́ честно́ю Свое́ю Кро́вію.

Возра́довася гра́дъ Перея́славль, пріе́мь тя́ свѣти́льника свои́мъ гра́жданомъ, и исплете́ тебѣ́ вѣне́цъ похвалы́, я́ко просвѣти́лъ еси́ богодухнове́нными словесы́, па́че же о́бразомъ чи́стаго житія́ твоего́.

Жезло́мъ па́стырскимъ мы́сленнаго во́лка прогна́лъ еси́ дале́че отъ ста́да своего́, о́тче, е́же на духо́вную па́жить уче́нія безмяте́жно изве́дъ, подтвержда́лъ еси́ дѣ́тельными свои́ми и богодухнове́нными труды́.

Обте́клъ еси́, а́ки оре́лъ, кру́гъ еписко́піи твоея́, разгоня́я мы́сленныя вра́ны, ду́хи зло́бы поднебе́сныя, птенцы́ же своя́ во единомы́сліи защища́я отъ всѣ́хъ вра́жіихъ навѣ́товъ.

Богоро́диченъ: Вра́гъ мы́сленный мно́жицею зло́бными кова́рствы на ны́ напа́даетъ, тща́щися въ снѣ́дь себѣ́ похи́тити, но Ты́, Чадолюби́вая Ма́ти, не преда́ждь на́съ ловле́нію того́, и́бо, а́ки пти́ца, здѣ́ создала́ еси́ Себѣ́ хра́мину и го́рлица гнѣздо́ — оби́тель сію́, идѣ́же положи́ла еси́ ны́, а́ки птенцы́, Твоя́ пѣвцы́.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Ко Го́споду любо́вію и моле́ніемъ распаля́емь, мно́гія воздви́глъ еси́ це́ркви, въ ни́хже о всѣ́хъ слове́сныхъ твои́хъ овца́хъ приноси́лъ еси́ безкро́вныя же́ртвы; помоли́ся ны́нѣ и о на́съ, мо́лимтися, да въ ду́сѣ сокруше́нномъ здѣ́ принесе́мъ хвале́ніе на́шему Влады́цѣ.

Украси́въ, а́ки невѣ́сту кра́сну, благолѣ́піемъ и разли́чными ша́рами Це́рковь Христо́ву, бы́лъ еси́ въ не́й, а́ки златоза́рный свѣти́льникъ, добродѣ́тельми сія́я, богому́дре Ефре́ме. Свѣтоно́сными твои́хъ моли́твъ луча́ми, въ достолѣ́пную ти́ похвалу́ просвѣти́ у́мъ тя́ хва́лящихъ.

Сѣдя́ на престо́лѣ твое́мъ, о́тче свяще́ннѣйшій, мно́гихъ, во тмѣ́ грѣхолю́бія сѣдя́щихъ, уче́ніемъ къ покая́нію возста́вилъ еси́: на́съ, прегрѣше́ньми па́дшихъ, возста́ви, да во гла́сѣ хвале́нія и́стиннымъ ду́хомъ принесе́мъ житія́ исправле́ніе на́шему Влады́цѣ.

Мно́гія труды́ и по́двиги о ста́дѣ твое́мъ, блаже́нне, подъя́лъ еси́, доне́лѣже е́ отъ собла́знъ мы́сленнаго врага́ очи́стилъ; на́съ, тмо́ю грѣхолю́бія омраче́нныхъ, наста́ви къ свѣ́ту покая́нія моли́твами твои́ми, Ефре́ме досточу́дне.

Богоро́диченъ: Лю́тыми и безчи́сленными страстьми́ одержи́ми, вопіе́мъ къ Тебѣ́, въ ро́дѣхъ всѣ́хъ Преблаже́нная Ма́ти Бо́га на́шего, возведи́ на́съ къ свѣ́ту безстра́стія, да во гла́сѣ хвале́нія принесе́мъ Ти́ смире́нныя на́ша моли́твы.

Конда́къ, гла́съ 8:

Це́ркви Правосла́вной Россíйской по жела́нію богоно́снаго Ѳеодо́сія уста́въ Студíйскій прине́сшаго, во святи́телехъ же свѣ́тло просія́вшаго и ста́до свое́ до́брѣ упа́сшаго, восхваля́емъ тя́, Ефре́ме, я́ко моля́щася Го́сподеви о всѣ́хъ на́съ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Ду́шу твою́ благово́нными цвѣ́ты, посто́мъ, моли́твою и смиренному́дріемъ украси́въ, предста́вилъ еси́ ю́, а́ки невѣ́сту чи́сту, Влады́цѣ своему́, Ему́же предстоя́, пое́ши: благослове́нъ Бо́гъ оте́цъ на́шихъ.

Якоже въ жи́зни се́й любо́вію къ наста́внику своему́, блаже́нному Ѳеодо́сію, привяза́лся еси́, та́ко и по кончи́нѣ неотсту́пенъ пребыва́я, на пренесе́ніе моще́й того́ съ про́чіими епи́скопы приспѣ́лъ еси́, и́хже нетлѣ́ніе ви́дѣвъ, воспѣ́лъ еси́: благослове́нъ Бо́гъ оте́цъ на́шихъ.

Отъ ю́ности зва́нію Влады́ки своего́ послѣ́довавъ, по мно́гихъ твои́хъ трудѣ́хъ, я́же на престо́лѣ еписко́піи Перея́славскія подъя́лъ еси́, позва́нъ еси́ на престо́лъ небе́сный въ ра́йское селе́ніе, идѣ́же со святи́тели и преподо́бныхъ чи́ны пое́ши: благослове́нъ Бо́гъ оте́цъ на́шихъ.

Зубы́ скрежета́ху возду́шніи бѣ́сове, ви́дяще тя́, отъ земны́хъ къ вѣ́чной жи́зни а́нгелами проводи́ма, но отдале́че стоя́ху: непристу́пенъ бо и́мъ бы́лъ еси́, огражде́нъ небе́снымъ свѣ́томъ, идѣ́же и о на́съ моли́ся, о́тче свяще́ннѣйшій Ефре́ме.

Богоро́диченъ: Яря́щіяся на мя́ враги́ посрами́, Богоневѣ́стная Дѣ́во, зу́бы и́хъ сотри́ и члено́вныя льво́въ мы́сленныхъ сокруши́, молю́ся Ти́, да безъ стра́ха и навѣ́та си́хъ, воспою́: Госпоже́, Благослове́нна еси́.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Яко благолѣ́піемъ Це́рковь Христо́ву, свя́те, украси́лъ еси́, сего́ ра́ди и Христо́съ по кончи́нѣ твое́й украси́ хра́мъ души́ твоея́, тѣ́ло твое́ нетлѣ́ніемъ поче́тше, его́же ра́цѣ кла́няющеся, пое́мъ съ пою́щими Го́сподеви во вся́ вѣ́ки.

Отъ си́льнаго воево́ды чино́въ небе́сныхъ, въ его́же и́мя хра́мъ кра́сенъ созда́лъ еси́, введе́нъ еси́, Ефре́ме, въ хра́мъ торжеству́ющихъ пѣ́ти Го́спода во вѣ́ки.

Апо́столовъ Первозва́нный, ему́же до́мъ моли́твенный при вратѣ́хъ созда́лъ еси́, съ великому́ченикомъ Ѳео́доромъ предусрѣто́ша тя́, о́тче, и любе́зно прія́ша въ до́мъ Бо́жій небе́сный, съ собо́ю пѣ́ти Го́спода во вѣ́ки.

О на́съ, святи́телю Ефре́ме, я́ко имы́й дерзнове́ніе къ Живонача́льнѣй Тро́ицѣ, не преста́й моля́щи, да сподо́бимся дости́гнути въ мѣ́сто кро́ва ди́вна, да́же до до́му Бо́жія, идѣ́же гла́съ ра́дованія и пресла́дкимъ шу́момъ пою́тъ Го́спода во вѣ́ки.

Богоро́диченъ: Еди́но Божество́, Тро́ице Свята́я, моле́ніемъ Пречи́стыя Богоро́дицы и уго́дника Твоего́ Ефре́ма въ ра́йскихъ селе́ніихъ на́мъ да́руй Тя́ пѣ́ти во вѣ́ки вся́.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Оста́вивъ земны́я предѣ́лы, вше́лъ еси́ въ небе́сная селе́нія, идѣ́же живо́тнаго дре́ва наслажда́яся, моли́ не лиши́тися и на́мъ прича́стія о́наго, Ефре́ме преблаже́нне.

Ра́дуется гра́дъ Перея́славль, помина́я тя́, па́стыря своего́, мы́ же торжеству́емъ, веселя́щеся, и кла́няемся моще́мъ твои́мъ, нетлѣ́ніе тѣ́хъ ви́дяще, о́тче свяще́ннѣйшій.

Не мо́жетъ пеще́ра моще́й твои́хъ, преподо́бне, укры́ти, не бо́ утаи́тъ свѣти́льника, въ не́й тебе́ горя́ща, я́ко то́й похвала́ еси́ и украше́ніе.

Нетлѣ́ніе моще́й твои́хъ, свя́те, ви́дяще, свѣ́тъ добродѣ́телей твои́хъ помина́емъ и сла́вимъ Отца́ Небе́снаго, я́ко подаде́ тебѣ́ просія́ти предъ а́нгелы и человѣ́ки.

Богоро́диченъ: Нетлѣ́ннымъ Рождество́мъ Твои́мъ, Пречи́стая, отъ тлѣ́нія свобо́ждшеся, воспѣва́емъ немо́лчными гла́сы и, покланя́ющеся Рождеству́ Твоему́, Тя́, Богоро́дице, велича́емъ.

Свѣти́ленъ:

Чистоты́ твоея́, о́тче, раче́ніемъ, отгна́лъ еси́ тму́ плотскíя стра́сти и показа́лся еси́, я́ко свѣтоза́рная звѣзда́, просвѣща́ющая на́ша мы́сли и сердца́, Ефре́ме му́дре, отце́въ сла́во и преподо́бныхъ украше́ніе. [Два́жды.]

Сла́ва, и ны́нѣ, богоро́диченъ:

Вся́ красна́ и безъ поро́ка су́щи, а́нгеловъ честнѣ́йшая Дѣ́во, души́ моея́ безобра́зіе благода́тію Твое́ю въ благообра́зіе претвори́: Ты́ бо всѣ́мъ еси́ украше́ніе и похвала́.

На хвали́техъ стихи́ры, гла́съ 1. Подо́бенъ: Небе́сныхъ чино́въ.

Мѵ́ромъ, богому́дре, свы́ше пріе́мь пома́заніе свяще́нное, бы́лъ еси́ па́стырь Христо́ву ста́ду, е́же упа́съ на па́житехъ ева́нгельскаго уче́нія, и, приве́дъ всецѣ́ло къ па́стырей Нача́льнику, прія́лъ еси́ возме́здіе до́брыхъ дѣ́лателей, съ ни́миже ны́нѣ ликовству́я, помяни́ чту́щихъ любо́вію па́мять твою́, святи́телю Ефре́ме. [Два́жды.]

До́мъ Ду́ха Пресвята́го бы́лъ еси́, его́же пе́рвѣе водо́ю смире́нія предочи́стивъ и мѵ́ромъ благода́ти и чистоты́ душе́вныя пома́завъ, свѣще́ю добродѣ́телей просвѣти́лъ еси́, и, прише́дъ, Оте́цъ съ Сы́номъ оби́тель въ тебѣ́ сотвори́, тѣ́мже мо́лимъ тя́, о́тче свяще́ннѣйшій, моли́ся Христу́ Бо́гу, да пріи́мемъ и мы́ благода́ть тобо́ю и ве́лію ми́лость.

Яко благоче́стія учи́теля, и виногра́да Христо́ва вѣ́рна дѣ́лателя, и святи́теля прече́стна, въ лѣ́тнюю па́мять соше́дшеся дне́сь, лю́діе, ублажи́мъ пѣ́сньми и пѣ́ніи, глаго́люще: о́тче преподо́бне Ефре́ме, не забу́ди на́съ, любо́вію чту́щихъ твое́ успе́ніе, но моли́ся Христу́ Бо́гу дарова́ти на́мъ ве́лію ми́лость.

Сла́ва, гла́съ 2:

Святи́теля Христо́ва, богоно́снаго отца́ на́шего Ефре́ма, пріиди́те дне́сь, празднолю́бныхъ собо́ри, пѣ́сненными похвала́ми воспое́мъ, глаго́люще: ра́дуйся, па́стырю и наста́вниче слове́сныхъ ове́цъ Христо́выхъ избра́ннѣйшій; ра́дуйся, святи́телей честно́е удобре́ніе; ра́дуйся, пресвѣ́тлый свѣти́льниче и краси́телю церко́вный; ра́дуйся, моле́бниче те́плый всѣ́мъ, вѣ́рно къ тебѣ́ прибѣга́ющимъ. На́съ ны́нѣ, любо́вію па́мять твою́ пра́зднующихъ и ра́достною душе́ю къ ра́цѣ моще́й твои́хъ припа́дающихъ, моли́твами твои́ми отъ бѣ́дъ изба́ви и моли́ся Христу́ Бо́гу умири́ти мíръ и спасти́ ду́ши на́ша.

И ны́нѣ, богоро́диченъ:

Спаси́ отъ бѣ́дъ рабы́ Твоя́, [Богоро́дице Дѣ́во, я́ко вси́ по Бо́зѣ къ Тебѣ́ прибѣга́емъ, я́ко къ неруши́мѣй стѣнѣ́ и предста́тельству].

Славосло́віе вели́кое. [Ектеніи́] и отпу́стъ.



НА ЛИТУРГІИ,

[Блаже́нна, отъ кано́на свята́го пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Слу́жбы преподо́бнымъ отце́мъ Пече́рскимъ, и́хже мо́щи въ Бли́жней и Да́льней пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1855. — Л. 42 – 46 об.

/ Къ оглавленію раздѣла /


Наверхъ / Къ титульной страницѣ

0