Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 28-й де́нь.
Преподо́бнаго отца́ на́шего Ефре́ма Си́рина.

[НА ВЕЧЕРНИ,]
На Го́споди воззва́хъ, стихи́ры на 6, гла́съ 1. Подо́бенъ: Небе́сныхъ чино́въ.

Ра́йскія добро́ты смотря́я* и бога́тно наслади́вся нетлѣ́нныхъ цвѣтнико́въ,* процвѣ́лъ еси́ мíру ра́зумъ Бо́жій,* его́же причаща́ющеся, преподо́бне, духо́вною любо́вію,* душа́ми возраста́емъ духо́вно.

Судіи́ прише́ствіе написа́въ,* сле́зными струя́ми* ду́шъ свѣщи́ запали́ти науча́еши,* всѣ́мъ вопія́ Жениха́ прише́ствіе,* да оде́ждемся вси́ оде́ждею свѣ́тлою,* срѣ́сти Жениха́ Христа́.

Воздержа́ніемъ тѣ́ло огради́въ,* страсте́й движе́нія умертви́лъ еси́, о́тче,* моли́твами и бдѣ́ньми.* Тѣ́мже въ тя́ Ду́ха си́ла все́льшаяся* показа́ мы́сленна тя́ свѣти́льника* и всемíрнаго.

Сла́ва, гла́съ 6:

Смы́сленно мяте́жныхъ житія́ отступи́въ, Ефре́ме приснопа́мятне, любомолча́ніемъ пусты́ню дости́глъ еси́ и, тоя́ ра́ди къ Бо́гу дѣ́тельнѣ возводи́мь, мíру просія́лъ еси́ свѣти́ло, и глаго́лы живо́тныя человѣ́комъ источи́лъ еси́. Тѣ́мже не преста́й моли́твами твои́ми утвержда́я на́съ, отъ вре́да чужда́го изба́вити ду́ши на́ша, преподо́бне о́тче.

И ны́нѣ, богоро́диченъ или́ крестобогоро́диченъ:

На дре́вѣ Живо́тъ на́шъ зря́щи, Всенепоро́чная Богоро́дице, ви́сящъ, ма́терски рыда́ющи, вопія́ла еси́: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ окто́иха. Сла́ва, гла́съ 4. Анато́ліево:

Проро́чески омака́я посте́лю слеза́ми и поуче́ніемъ житія́ творя́ покая́ніе, Суда́ стра́хъ дѣ́лы на́мъ отъ слове́съ показа́лъ еси́, и твою́ почита́емъ вси́, соше́дшеся, всеблаже́нне, па́мять, пресла́вныхъ дѣя́ній самодѣ́телю Госпо́день, Ефре́ме приснопа́мятне. Тѣ́мже и ны́нѣ мо́лимъ тя́: моли́ся Христу́ Бо́гу о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не вожделѣ́ннѣйше,* ка́ко на дре́вѣ Кре́стнѣмъ повѣ́шенъ еси́, Долготерпѣли́ве?* Ка́ко ру́ки и но́ги Твоя́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Ефре́ме, о́тче на́шъ, моли́ Христа́ Бо́га спасти́ся душа́мъ на́шимъ.


НА УТРЕНИ
Оба кано́на окто́иха, и свята́го на 6. Его́же краегране́сіе: Ефре́ма честву́ю, у́мнаго Евфра́та. Ѳеофа́ново. Гла́съ 6.


Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Евфра́тскимъ одожде́ніемъ твои́хъ моли́твъ ду́шу мою́ напо́й, изсо́хшую зно́емъ страсте́й, и сло́во ми́ вдохни́, тво́й восхваля́ющу пра́здникъ, всеблаже́нне.

Свѣ́тъ мы́сленный облиста́въ, свѣ́тлое яви́лся еси́ со́лнце свѣтолу́чными добродѣ́тельми и уче́ній добро́тами, Ефре́ме, озаря́я вѣ́рныхъ все́ исполне́ніе.

Струя́ми сле́зъ пла́мень страсте́й погаси́въ, бы́лъ еси́ сосу́дъ че́стенъ, Ефре́ме, Свята́го Ду́ха, исто́чники источа́я уче́ній, богоблаже́нне.

Богоро́диченъ: Нетлѣ́нно Сло́во во утро́бѣ пріи́мши, родила́ еси́ избавля́ющаго отъ тли́, Тому́ служа́щія при́сно, Ма́ти Дѣ́во Чи́стая, две́ре и́стинно Жи́зни.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ти́ны вся́кія страстны́я себе́ очи́стивъ, яви́лся еси́ прія́телище добродѣ́телей я́ко и́стинно и сосу́дъ вмѣсти́теленъ дарова́ній Свята́го Ду́ха.

Ника́коже сна́ очи́ма да́въ, хра́мъ яви́лся еси́ Святы́я Тро́ицы, и прему́дрости сокро́вище, мíръ обогаща́я златоза́рными уче́ніи, блаже́нне.

Познава́етъ друга́го тя́ Христо́ва честна́я Це́рковь златото́чнаго Евфра́та, наводня́юща му́дрыхъ уче́ній пото́ками и тва́рь всю́ напоя́юща.

Богоро́диченъ: Во двою́ естеству́ Еди́ный отъ Святы́я Тро́ицы, изъ чи́стыхъ Твои́хъ крове́й вопло́щся, боголѣ́пно про́йде, су́щія отъ Ада́ма спаса́я, Всечи́стая, благода́тію.

Сѣда́ленъ, гла́съ 5. Подо́бенъ: Собезнача́льное Сло́во.

Сокро́вище прему́дрости, та́инъ Христо́выхъ ча́шу боже́ственнаго умиле́нія, воспои́мъ, вѣ́рніи, въ па́мяти его́: тезоиме́нно бо при́сно сердца́ вѣ́рныхъ весели́тъ словесы́ боже́ственными Ефре́мъ, я́ко дѣ́латель и таи́нникъ Госпо́днихъ открове́ній. [Два́жды.]

Сла́ва, и ны́нѣ, богоро́диченъ:

Те́плая Предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище притека́ющихъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы, ми́ръ да́ти мíру, и спасе́ніе, и ве́лію ми́лость.

Крестобогоро́диченъ:

Кресто́мъ Сы́на Твоего́, Богоблагода́тная, и́дольская пре́лесть вся́ упраздни́ся и де́монская крѣ́пость попра́ся, сего́ ра́ди, вѣ́рніи, по до́лгу Тя́ при́сно пое́мъ, и благослови́мъ, и, Богоро́дицу вои́стинну исповѣ́дающе, Тя́ велича́емъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Глаго́ловъ си́ла твои́хъ протече́ ве́сь мíръ, высокотво́рнымъ сія́ніемъ смире́нія сліпоту́ ду́шъ отгоня́щи, блаже́нне.

Непоро́чно соверши́лъ еси́ житіе́, слеза́ми себе́ омыва́я и Судіи́ всѣ́мъ прише́ствіе напису́я словесы́ му́дрыми, богоявле́ніе досточу́дне.

Ви́дѣвъ твоего́ Госпо́дь смире́нія пресла́вную высоту́, высокотво́рное сло́во тебѣ́ да́руетъ, и́мже ересе́й лю́тая смири́шася возноше́нія.

Укрѣпи́вся благода́тію Вседержи́теля, къ нача́ломъ ополчи́лся еси́ де́монскимъ, о́тче, и побѣди́лъ еси́, о на́съ моля́ся те́плѣ, восхваля́ющихъ тя́.

Богоро́диченъ: Яко Боже́ственный хра́мъ, я́ко го́ру святу́ю, я́ко исто́чникъ нетлѣ́нія, я́ко избра́нну еди́ну бы́вшую Зижди́телю на́шему Бо́гу, Дѣ́ву ублажи́мъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Сле́зъ пото́ками сласте́й до конца́, о́тче, изсуши́лъ еси́ пучи́ну и истече́ніи твои́хъ уче́ній ересе́й пото́ки, блаже́нне, потопи́лъ еси́.

Умъ тво́й манове́ніемъ е́же къ Бо́гу, о́тче, просвѣща́емь, Ефре́ме, богови́дѣнъ ве́сь бы́сть, я́коже зерца́ло Боже́ственнаго Ду́ха, невеще́ственно явле́нія пріе́мля.

Хра́мъ бы́лъ еси́ вмѣсти́теленъ, о́тче, Тро́ицы вои́стинну и испещре́нъ благода́тію, и озаре́ніемъ чи́стыхъ добродѣ́телей, и уче́ній цѣ́лостію.

Богоро́диченъ: Ме́ртва мя́ показа́ во Еде́мѣ вкуше́ніе дре́ва лука́вымъ навѣ́томъ змíя, Ты́ же, Жизнода́теля Христа́ ро́ждши, оживи́ла мя́ еси́, Еди́на Богора́дованная.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Не песо́къ основа́ніе, но вѣ́ру нерасте́рзну, богоно́се, положи́въ, отъ вра́жіихъ вся́ческихъ навѣ́товъ непрекло́ненъ пребы́лъ еси́, непобѣди́мою дла́нію окормля́емь.

Язы́къ тво́й, я́ко тро́сть пи́сменника скоропи́сца, вои́стинну бы́сть, повѣству́ющъ, ра́зумъ всеблагочести́въ, на скрижа́лѣхъ начерта́ющь серде́чныхъ, о́тче, зако́нъ Ду́ха.

Твою́ пла́вающіи догма́товъ тишину́, Ефре́ме богому́дре, пучи́ны треволне́ній избавля́ются душевре́дныхъ и бу́ри ересе́й, возни́чуще, вѣ́рою спаса́ются.

Богоро́диченъ: Вся́кія вы́шши разумѣва́емыя, я́ко Бо́гъ, и ви́димыя тва́ри, вопло́щся, про́йде изъ Твоего́ чре́ва, соблю́дъ Тя́ нетлѣ́нну, я́коже бѣ́ пре́жде Рождества́, Ма́ти Дѣ́во.

Конда́къ, гла́съ 2. Подо́бенъ: Вы́шнихъ ища́.

Ча́съ при́сно прови́дя Суда́, рыда́лъ еси́ го́рько, Ефре́ме, я́ко любобезмо́лвный, дѣ́лателенъ же бы́лъ еси́ въ дѣ́лѣхъ учи́тель, преподо́бне. Тѣ́мже, о́тче всемíрный, лѣни́выя воздвиза́еши къ покая́нію.

Икосъ:

Отъ во́дъ благода́ти твоея́ иска́пи въ ду́шу мою́, омыва́я ю́ отъ вся́кія скве́рны нечи́стыя, я́ко да отъ си́хъ очи́стится и, ревни́тельно житіе́ по всему́ духо́вно про́чее лѣ́то сконча́вши, сла́дости боже́ственныя наслади́тся, ея́же наслади́лся еси́ и напои́лъ еси́ вся́, отъ страсте́й пали́мыя. Се́ бо словесы́ твои́ми лѣни́выя воздвиза́еши къ покая́нію.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Законоположи́тель мона́шествующихъ извѣ́стнѣйшій яви́лся еси́, прече́стне, изыма́тель же отъ вра́жіихъ вся́ческихъ сплете́ній. Тѣ́мже твою́ почита́ютъ честну́ю и свяще́нную на земли́, блаже́нне, па́мять.

Изря́денъ Ду́ха, приснопа́мятне, орга́нъ бы́лъ еси́, возглаша́ющій твои́ми всегда́ дохнове́ньми, и пѣ́снь спаси́тельную на́мъ покая́нія пѣснопоя́, воспѣва́ющимъ тя́.

Богоро́диченъ: Па́че сло́ва Твое́ зача́тіе, Богоневѣ́сто, Бо́га бо Сло́ва родила́ еси́, изба́вльшаго отъ безслове́сія вся́ человѣ́ки и сло́во подаю́ща вопи́ти: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Свѣтоно́сенъ я́ко ино́е показа́лся еси́ со́лнце, уче́ній лучи́ испуща́я конце́мъ, тму́ несвѣ́тлую отгна́лъ еси́, блаже́нне, вся́каго грѣха́ свѣ́томъ покая́нія.

Струя́ми боже́ственныхъ догма́товъ окружа́емь, я́коже ина́я рѣка́, изъ Еде́ма теку́щи, лице́ земли́ напая́я, чу́дне, и нече́стія пле́велы подавля́я.

Богоро́диченъ: Истинную Богоро́дицу исповѣ́дающе Тя́, а́нгельски, е́же ра́дуйся, вѣ́рою вопіе́мъ Ти́: еди́на бо Ра́дость на земли́ родила́ еси́, Обра́дованная, при́сно Благослове́нная.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Уязви́вся любо́вію Вседержи́теля, все́ твое́ житіе́, рыда́я, сконча́лъ еси́, вопія́ со у́жасомъ, преподо́бне: осла́би во́лны Твоея́, Спа́се, благода́ти, се́ю мя́ бога́тно соблюда́я въ бу́дущей жи́зни.

Сла́дко сло́во твое́, умиле́нія пода́тельно, испо́лнено просвѣще́нія притека́ющимъ, богоно́се Ефре́ме досточу́дне, непоро́чно же житіе́, всѣ́ми украша́емо богосія́нными добродѣ́тельми и просвѣща́емо.

Хра́мъ Ду́ха бы́лъ еси́ и рѣка́, во́дъ живото́чныхъ исполня́ема, Це́ркве основа́ніе незы́блемое, утвержде́ніе мона́шествующихъ, струя́ приснотеку́щая боже́ственнаго умиле́нія, Ефре́ме досточу́дне.

Богоро́диченъ: Разумѣ́ти не мо́жетъ у́мъ человѣ́ческій е́же па́че ума́ Рождества́ Твоего́, Дѣ́во, та́инство: Бо́гъ бо, всели́вся во утро́бу Твою́, ключа́ дѣ́вства не поколеба́, я́коже вѣ́сть Еди́нъ Са́мъ Непостижи́мый.

Свѣти́ленъ. Подо́бенъ: Не́бо звѣзда́ми.

Ча́ша сокрове́нныхъ Христо́вы му́дрости сокро́вищъ, Ефре́ме, твои́мъ умиле́ніемъ, преподо́бне о́тче, яви́лся еси́ и уче́ніи твои́ми боже́ственными ду́ши вѣ́рныхъ весели́ши.

Богоро́диченъ:

Держа́внымъ Твои́мъ кро́вомъ отъ враго́въ навѣ́та ны́, Чи́стая, Твоя́ рабы́, сохрани́ вся́ невреди́мы: Тя́ бо еди́ну и́мамы прибѣ́жище въ ну́ждахъ.

На стихо́внѣ окто́иха. Сла́ва, гла́съ 2. Кипріа́ново.

Якоже фи́никсъ, дави́дски процвѣ́лъ еси́, преподо́бне о́тче, язы́ки ху́лящихъ отсѣ́клъ еси́ мече́мъ, Ефре́ме, бе́здны страсте́й изсуши́лъ еси́ воздержа́ніемъ, орга́нъ яви́лся еси́ Свята́го Ду́ха, кре́стное ору́жіе пріе́мъ. Христа́ непреста́нно моли́ о на́съ, вѣ́рою соверша́ющихъ при́сно честну́ю па́мять твою́.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Доса́ды претерпѣ́вшаго мно́ги и на Кре́стъ возвы́шеннаго вся́ческихъ Творца́ ви́дѣвши, Всечи́стая, стеня́ше, глаго́лющи: препѣ́тый Го́споди, Сы́не и Бо́же Мо́й, ка́ко, почести́ хотя́ созда́ніе Твое́, Влады́ко, терпи́ши пло́тію безче́стіе? Сла́ва мно́гому благоутро́бію и соше́ствію Твоему́, Человѣколю́бче.


НА ЛИТУРГІИ

Блаже́нна окто́иха на 4 и свята́го, пѣ́снь 3-я, на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 300 – 304.

/ Къ оглавленію раздѣла /


Наверхъ / Къ титульной страницѣ

0