Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 27-й де́нь.
Пренесе́ніе моще́й [и́же] во святы́хъ отца́ на́шего Іоа́нна Златоу́стаго.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Звѣзду́ незаходи́мую,* заря́ми просвѣща́ющу уче́ній* всю́ подсо́лнечную,* покая́нія проповѣ́дателя,* гу́бу всезлату́ю,* мокроту́ лю́таго отча́янія изъе́млющую* и ороша́ющую сердца́, иста́явшая грѣхи́,* Іоа́нна досто́йно* златослове́снаго почестви́мъ.

Земны́й а́нгелъ и небе́сный человѣ́къ,* ла́стовица благоглаго́лива и многогла́сна,* добродѣ́телей сокро́вище,* ка́мень неразсѣ́дный,* вѣ́рныхъ воображе́ніе, му́ченикомъ подо́бенъ,* равностоя́тель святы́хъ а́нгеловъ,* апо́столовъ единонра́вный,* въ пѣ́снехъ да возвели́чится Златоу́стъ.

Ины стихи́ры, гла́съ то́йже. Подо́бенъ: Зва́нный свы́ше.

Свяще́ннѣйшее соста́вимъ ликова́ніе:* вѣне́цъ бо златозра́чный Це́ркве Христо́вы* на сла́ву ца́рску дне́сь* отъ Кома́нъ ко гра́ду прихо́дитъ Ца́рствующему,* свѣ́титъ, сія́я свы́ше* въ возвраще́ніи свое́мъ,* къ Ца́рствію невеще́ственному вѣ́рныхъ вво́дитъ* и всѣ́хъ присвоя́етъ Царю́.* Тѣ́мже вопіе́мъ:* златоиме́нне о́тче,* боже́ственный Златоу́сте всезлаты́й,* умоли́ спасти́ и просвѣти́ти ду́ши на́ша. [Два́жды.]

Яко не́бо свѣ́тлое церко́вное,* за́падъ, о Златоу́сте!* заточе́ніе подъя́лъ еси́ суро́вѣйшее,* возсіява́еши ны́нѣ, ра́дуяся,* тва́ри незаходи́мое, грѣ́еши,* украша́емь чуде́съ звѣзда́ми, му́дре,* но́сиши Христа́, пресвѣтлѣ́юща со́лнца о́бразомъ,* просвѣща́ющаго ны́нѣ твое́ возвраще́ніе.* Тѣ́мже вопіе́мъ:* свѣтоза́рнѣйшій свѣтосло́ве, Златоу́сте всему́дре,* моли́ спасти́ и просвѣти́ти ду́ши на́ша.

Ны́нѣ не́бо со а́нгелы лику́етъ,* съ тва́рію веселя́тся человѣ́честіи собо́ри,* и́же бо на земли́, небомы́сленныя показу́я вся́* лѣ́ствицею боже́ственною честны́хъ глаго́лъ свои́хъ,* се́й къ горѣ́ возше́ствіемъ* богоше́ственныхъ степе́ней,* я́ко Іа́ковъ но́вый,* показу́етъ а́нгеловъ боже́ственныхъ,* ра́дующихся о преложе́ніи его́.* Тѣ́мъ вопіе́мъ:* всеблаже́нне, невеще́ственныхъ а́нгеловъ собесѣ́дниче Златосло́ве,* моли́ спасти́ся душа́мъ на́шимъ.

Сла́ва, гла́съ то́йже. Самогла́сенъ. Космы́ Вести́тора:

Не подоба́ше тебѣ́, Златоу́сте, Ца́рскій гра́дъ оста́вившу, жи́ти въ Кома́нѣхъ, отону́дуже Бо́гомъ приведе́нное ца́рское всечрежде́ніе па́ки тя́ возврати́ въ Ца́рскій гра́дъ. Возвесели́ся же и Це́рковь, ви́дѣвши тя́, исповѣ́дающися и глаго́лющи: вели́читъ сла́ва моя́ Го́спода, отда́вшаго ми́ невѣстовожда́ и утвержде́ніе вѣ́ры, прія́тіе досто́инствъ мои́хъ и воспоко́й мои́хъ скра́ній, высоту́ смиренному́дрія, и глубину́ ми́лостыни, и широту́ моея́ нищеты́, и долготу́ покая́нія. Тѣ́мже мо́лимъ тя́, преподо́бне о́тче, ми́ръ испроси́ и ве́лію ми́лость душа́мъ на́шимъ.

И ны́нѣ, богоро́диченъ:

Иже Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].

Вхо́дъ. Проки́менъ дне́ и чте́нія.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуется Це́рковь Христо́ва, на свѣ́щникъ свяще́нный взира́ющи, тя́, свѣти́льника свѣтоно́снаго, его́же низложи́вше врази́, подъ спу́домъ молча́нія скры́ша, почита́етъ на горѣ́ тя́ добродѣ́телей, о́тче преподо́бне, я́ко Боже́ственное сія́ніе, вселе́нныя концы́ па́че со́лнца облиста́юща чудесы́. Дне́сь недаропрія́тный Бо́жій су́дъ показу́етъ пра́вду съ высоты́ твою́, я́ко полу́дне пресвѣ́тлое, и подава́етъ су́щимъ въ мíрѣ ми́ръ и ве́лію ми́лость.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Мíра пшеницомѣ́ритель, вѣ́рніи, и́же сла́достію небе́сною Ду́ха сердца́ напита́я всѣ́хъ, не изъ Еги́пта прихо́дитъ: Іо́сифъ же но́вый проявля́яся, въ честны́хъ моще́хъ отъ Кома́нъ прихо́дитъ, лю́тыхъ бу́рю и пучи́ну дне́сь печа́лей отсѣка́я моли́твами. Сего́ у́бо ублажи́мъ и вѣ́рою возопіи́мъ: пріиди́, блаже́нне, посреди́ соверша́ющихъ па́мять твою́, тѣ́мъ спасе́ніе подава́я бога́тно и ве́лію ми́лость.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

То́читъ, я́ко мѵрополо́жница кра́сная, чуде́съ Боже́ственнаго мѵ́ра, Златоу́сте, ра́ка твоя́ мíру, и врачева́ній струя́ми ду́ши благоуха́етъ честву́ющихъ тя́, Христо́выми благода́тьми, я́ко невеще́ственными арома́ты, обогати́лъ еси́, благово́ніе же да́руеши присноживу́щее вѣ́рою притека́ющимъ. Тѣ́мже, наслажда́ющеся благода́тей твои́хъ, прему́дре, и пречи́стыхъ и боже́ственныхъ напита́вшеся моще́й твои́хъ, вѣ́рно про́симъ душа́мъ на́шимъ да́ти ве́лію ми́лость.

Сла́ва, гла́съ 6:

Преподо́бне треблаже́нне, святѣ́йшій о́тче, па́стырю до́брый и Началопа́стыря Христа́ учениче́, положи́вый ду́шу за о́вцы: ты́ и ны́нѣ, всехва́льне Іоа́нне Златоу́сте, проси́ моли́твами твои́ми дарова́ти на́мъ ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь святи́теля, гласъ 8:

Устъ твои́хъ, я́коже свѣ́тлость огня́ возсія́вши, благода́ть вселе́нную просвѣти́: не сребролю́бія мíрови сокро́вища сниска́, высоту́ на́мъ смиренному́дрія показа́, но, твои́ми словесы́ наказу́я, о́тче Іоа́нне Златоу́сте, моли́ Сло́ва, Христа́ Бо́га, спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 4:

Яко златоза́ренъ же и красе́нъ златоглаго́ливъ орга́нъ, боже́ственно поя́ Це́ркви, отъ Бо́га, Златоу́сте, дарова́лся еси́, ла́стовица благоглаго́лива, златозаря́ющи у́мъ, блаже́нне, златооде́жденъ, цѣвни́це покая́нія, тебе́ честву́ющія спаса́й отъ искуше́ній твои́ми моли́твами, па́стырю досточу́дне. [Два́жды.]

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣ́гъ смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́къ и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Боже́ственнымъ судо́мъ Христо́вы па́ствы досто́инъ бы́въ, досточу́дне па́стырю, я́коже во́лки, отъ нея́ пра́щею слове́съ твои́хъ отгна́лъ еси́, облича́я неща́дно пребеззако́ннующія, му́дре. Отъ ни́хже и отгна́вся за́вистію, Златоу́сте, да́льный пу́ть ше́ствовалъ еси́ твердоу́мнѣ по Не́мъ, въ Не́мже и у́мерлъ еси́, но возврати́лся еси́ съ вели́кою сла́вою, подая́ Боже́ственная дарова́нія. [Два́жды.]

Сла́ва и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́меннѣмъ зача́тіи Твое́мъ, Богоро́дице, купину́, огне́мъ неопа́льную, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки пребыва́етъ Дѣ́ва.

[Велича́ніе:

Велича́емъ тя́, святи́телю о́тче Іоа́нне Златоу́сте, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Священнонача́льствомъ и́стиннымъ житіе́ уясни́лъ еси́, Госпо́дне благоче́стно сло́во всѣ́ялъ еси́ человѣ́комъ, Златоу́сте, Ду́ха заре́ю излива́я уче́ній ту́чи земли́, прему́дре, насади́въ обы́чаи бла́ги. Тѣ́мже, вѣ́рою пріе́мше ра́зума плоды́, вкуси́вше, позна́хомъ Боже́ственныя сла́вы наслажде́ніе. [Два́жды.]

Сла́ва, и ны́нѣ, богоро́диченъ:

Благодари́мъ Тя́ при́сно, Богоро́дице, и велича́емъ, Пречи́стая, и покланя́емся, воспѣва́юще Рождество́ Твое́, Благода́тная, вопію́ще непреста́нно: спаси́ ны́, Дѣ́во Всеми́лостивая, я́ко Блага́я, и де́моновъ исхи́ти словоположе́нія стра́шнаго въ ча́съ испыта́нія, да не посрами́мся, раби́ Твои́.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́ живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Труба́ златогла́сная показа́лся еси́, златоглаго́ливе Златоу́сте, златодѣ́йствуя сердца́ вѣ́рныхъ златотру́дными твои́ми уче́ніи: проро́чески бо изы́де вѣща́ніе исправле́ній твои́хъ, преподо́бне о́тче, и мíра всего́ концы́ просвѣти́лъ еси́.

Кано́нъ Пресвяты́я Богоро́дицы со ирмосо́мъ на 6 и свята́го на 8.

Кано́нъ Богоро́дицы, его́же краегране́сіе: Ра́дуйся, ра́дости селе́ніе, печа́ли разрѣше́ніе. Іоа́нново. Гласъ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Ра́дуйся, кля́твы дре́внія избавле́ніе и благослове́нія исто́чниче; ра́дуйся, Жи́зни Ма́ти, а́да разруше́ніе, сме́рти убіе́ніе; ра́дуйся, разрѣше́ніе ско́рби, ра́дости вмѣсти́лище простра́нное; ра́дуйся, Богоро́дице Всепѣ́тая.

Колесни́це Сло́ва слове́сная и одушевле́нная, ра́дуйся, Всенепоро́чная; Дави́дская, ра́дуйся, колесни́це многоиме́нная, колесни́це, тма́ми назнамена́тельная; ра́дуйся, безъ сужде́нія херуви́мы превыша́ющая и серафи́мы превосходя́щая.

Свяще́ннѣйшая у́мныхъ си́лъ, ра́дуйся, Богоневѣ́стная; ра́дуйся, созда́ннаго вся́каго естества́ вы́шшая; ра́дуйся, Бо́жія пала́то; ра́дуйся, о́гненный престо́ле; ра́дуйся, свѣти́льниче многосвѣ́тлый; ра́дуйся, тма́ми имени́тая Влады́чице.

Же́злъ изъ ко́рене Іессе́ева израсти́вшая, ра́дуйся, Нескве́рная; ра́дуйся, прозябе́ніе жезла́ Ааро́нова, прописа́вшая дре́вле та́инственно же и глубо́цѣ: я́коже бо о́ный орѣ́хи, та́ко Ты́ Христа́ процвѣла́ еси́.

Кано́нъ свята́го, его́же краегране́сіе: Всезлату́ю пою́ тя́ Боже́ственную цѣвни́цу. Творе́ніе Іо́сифово. Гла́съ 6.
Пѣ́снь 1.

Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма, и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

Невече́рнія, преподо́бне, зари́ исполня́емь, и престо́лу Боже́ственному предстоя́ при́сно со всѣ́ми избра́нными, на́мъ, вѣ́рно чту́щимъ тя́ и боже́ственное твое́ соверша́ющимъ возвраще́ніе, дарова́ти моли́ ми́ръ и ве́лію ми́лость.

Земля́ лику́етъ, и не́бо съ человѣ́ки ра́дуется, съ на́ми боголѣ́пно въ твое́мъ, му́дре, святѣ́мъ пра́здницѣ, въ не́мже свяще́нное твое́ тѣ́ло возврати́ся къ твоему́ ста́ду, сла́вне Златоу́сте, Ду́ха че́стное жили́ще.

Ума́ твоего́ боже́ственная, блаже́нне, блиста́нія многоко́зненный не терпя́, искуше́нія воздвиза́етъ на тя́, я́коже дре́вле на Іова, но у́бо омрачи́ся мно́жае: се́ бо по заточе́ніи свѣтлѣ́йшій въ па́ству твою́ вше́лъ еси́.

Всезлаты́ми словесы́ твои́ми помышле́нія, Златосло́ве, позлати́лъ еси́ вѣ́рныхъ и, заточе́нъ бы́въ отъ ста́да зави́стно, Бо́жіимъ же манове́ніемъ па́ки къ сему́ по погребе́ніи возврати́лся еси́, свѣ́тло восхваля́емь, всеблаже́нне Златоу́сте.

Богоро́диченъ: Святѣ́йши яви́лася еси́ херуви́мовъ, Пресвята́го ро́ждши Бо́га: Его́же моли́, я́ко всѣ́хъ Творца́, Чи́стая, освяти́ти вся́, святы́ми Тя́ гла́сы ублажа́ющія, отце́въ похвало́, человѣ́ковъ по́моще.

Другíй кано́нъ свята́го, его́же краегране́сіе: Златоязы́чному тре́тіе воспою́ пѣ́ніе. Гла́съ 3.
Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Боговѣща́нная уста́, златогла́сный орга́не, свѣ́тлостію слове́съ мо́й просвѣти́ мольба́ми твои́ми у́мъ, я́ко да воспою́ возвраще́нія твоего́ па́мять, Іоа́нне, благода́ти Боже́ственныя тезоиме́нне.

Яко звѣзда́ свѣтоно́сна, я́ко просвѣща́ющее человѣ́ки со́лнце, я́ко свѣти́ло благоче́стія, подъ зе́млю заше́дъ, преподо́бне, зако́ны есте́ственными, па́ки возсія́лъ еси́ на́мъ, ча́домъ твои́мъ, посыла́я чуде́съ оби́льная озаре́нія.

Златоглаго́ливымъ твои́мъ язы́комъ уче́ній испо́лнилъ еси́ всю́ подсо́лнечную и златы́ми у́ды исцѣле́ній зари́ всѣ́мъ облиста́лъ еси́, страда́ній тмѣ́ изче́знути творя́, преподо́бне, возвраще́ніемъ твои́мъ.

Богоро́диченъ: Витíйствуя Боже́ственная, еди́нственную Ѵпоста́сь сказа́лъ еси́, Сло́во, а́ще и сугу́бъ бѣ́, изъ Пречи́стыя проше́дый, пло́ть пріе́мъ, Юже благослови́мъ непреста́нно и вѣ́рно сла́вимъ, боже́ственный Златоу́сте.

Катава́сія: Су́шу глубороди́тельную зе́млю...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Крѣпча́йшее ору́жіе, ра́дуйся, вѣ́рныхъ Влады́чице; ра́дуйся, крѣ́пкое предста́тельство; ра́дуйся, заступле́ніе; ра́дуйся, по́мощь грѣ́шныхъ; ра́дуйся, стѣно́ призыва́ющихъ Тя́; ра́дуйся, мíра ра́дость.

Спасе́нія человѣ́ческаго, ра́дуйся, крѣ́пкое утвержде́ніе; ра́дуйся, Ада́ма и Евы воззва́ніе, Еюже воспрія́ша дре́внее благонаслѣ́діе; ра́дуйся, отве́рзшая па́ки ра́й.

Ра́дуйся, неопали́мая купино́; ра́дуйся, Свѣ́та колесни́це; ра́дуйся, Со́лнца о́блаче; ра́дуйся, пресла́вное и вездѣ́ проповѣ́данное Царе́во сѣда́лище; ра́дуйся, гра́де одушевле́нный Христа́, жива́го Бо́га.

Неискусобра́чная Ма́ти, ра́дуйся, Чи́стая Влады́чице; ра́дуйся, неора́нная ни́во и невоздѣ́ланная, воздѣ́лавшая Воздѣ́лателя всѣ́хъ; ра́дуйся, земле́, Истину возсія́вшая.

Инъ.

Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й Себе́ предпожре́, — яди́те, — вопія́, — Тѣ́ло Мое́ и вѣ́рою утверди́теся.

Бы́лъ еси́ прія́телище Бо́жіе чи́стое и догма́товъ испыта́лъ еси́ глубину́, блаже́нне Златоу́сте, зломы́слящихъ потопля́я умы́, вѣ́рныхъ же напая́я сердца́, тѣ́мже честно́е твое́ дне́сь пра́зднуемъ возвраще́ніе.

Златы́й орга́нъ, возглаша́ющій на́мъ неизрече́нная, бы́лъ еси́ ты́, блаже́нне Златоу́сте, сего́ ра́ди пое́мъ тя́ вѣ́рно въ возвраще́ніе твои́хъ моще́й, а́нгеле Бо́жій земны́й и человѣ́че небе́сный.

Глаго́лы жи́зни отры́гнулъ еси́ вѣ́рнымъ и, непра́ведно зави́дѣнъ бы́въ, всеблаже́нне, въ да́льная заточе́нъ бы́сть изгна́нія и въ ско́рби мно́ги, но вседѣ́тельнымъ манове́ніемъ па́ки по кончи́нѣ, преподо́бне, твоему́ ста́ду подава́ешися.

Богоро́диченъ: Высоту́ неизрече́ннаго и глубину́ Твоего́ Рождества́ кто́ сказа́ти и́мать, Отрокови́це? Бо́га бо родила́ еси́ па́че сло́ва и ума́ всего́, изба́вльшаго отъ тли́ человѣ́ки. Тѣ́мже по до́лгу, вси́ вѣ́рніи, Тя́ блажи́мъ.

Инъ.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Въ заточе́нія тя́ сокры́ верте́пѣхъ, свѣти́льника всесвѣ́тлаго, цари́ца ослѣ́пшая; Христо́съ же на высоча́йшемъ тя́ свѣ́щницѣ, и па́ки возвра́щь, поставля́етъ.

Иска́пая струи́ чуде́съ и рѣ́ки пролива́я врачева́ній, возврати́лся еси́, Златоу́сте, вѣ́рно честву́ющимъ возвраще́нія твоего́ па́мять, Іоа́нне.

Златоте́чный Ни́лъ наводня́яй въ словесѣ́хъ же и чудесѣ́хъ возврати́ся; да стеце́мся и вѣ́рно почерпе́мъ оби́льно вси́, во всѣ́хъ да насы́тимся.

Богоро́диченъ: Земно́е естество́ не мо́жетъ Тя́ воспѣ́ти, Юже а́нгели пою́тъ, я́ко Бо́га пло́тію роди́вшую: оба́че вѣ́рно, раби́ Твои́, дерза́емъ пѣ́ти Тя́ и сла́вити.

Катава́сія: Утвержде́ніе на Тя́ надѣ́ющихся...

Сѣда́ленъ, гла́съ 8. Подо́бенъ: Прему́дрости.

Юже съ высоты́ му́дрость увѣ́дѣвъ и благода́ть слове́съ отъ Бо́га, всѣ́мъ просія́лъ еси́, я́ко зла́то въ горни́лѣ, и Святу́ю Тро́ицу во Еди́нствѣ проповѣ́далъ еси́, сребролю́бную ле́сть устрѣли́въ словесы́ твои́ми. Тѣ́мже и ре́вностію цари́цу обличи́въ, Аріево посрами́лъ еси́ иноплеме́нное мудрова́ніе. Іоа́нне Златоу́сте, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Отъ Тро́ицы Еди́наго преесте́ственно заче́нши, Дѣ́во, и чу́дно Сего́ породила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ человѣ́ческое естество́, дре́вле изгна́нное. Тѣ́мже, соше́дшеся, Рождество́мъ Твои́мъ вси́ спа́сшіися, Всенепоро́чная, Твои́мъ словесе́мъ послѣ́дующе, до́лжно Тя́ ублажа́емъ, моля́ще Христа́ Бо́га прегрѣше́ній оставле́ніе дарова́ти вѣ́рою Тя́ сла́вящимъ, Ма́терь Его́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Восто́къ Оте́ческаго озаре́нія и со́лнце Возсія́вшаго пре́жде денни́цы отъ Отца́, ра́дуйся, Богоро́дице, о́блаче ле́гкій и одушевле́нный, Дѣ́во; ра́дуйся, Ма́ти, ра́дуйся, Благослове́нная, ра́дуйся, Препросла́вленная, Всенепоро́чная.

Ты́ злата́я кади́льнице, Влады́чице, нестерпи́маго и невеще́ственнаго Угля, Имже сожже́ся раздра́нное Ада́мова преслуша́нія рукописа́ніе. Тѣ́мже — ра́дуйся! — вопію́ Ти́, Еюже всѣ́мъ даде́ся ра́дость, и сла́дость ра́йская, и воспрія́тіе.

Ты́ человѣ́ковъ сла́ва, и че́сть, и хвала́, и а́нгеловъ вѣне́цъ, и діади́ма. Тѣ́мже земля́ и не́бо, еди́ну Це́рковь соста́вльше, всесли́чное — е́же ра́дуйся! — Тебѣ́ вопіе́мъ; ра́дуйся, Влады́чице мíра, ра́дуйся, всѣ́хъ человѣ́ковъ по́моще.

Одръ честны́й, его́же Соломо́нъ предпрописа́, окружа́емый си́льными шестидесятьми́; ра́дуйся, Дѣ́во, киво́те позлаще́нный у́мнаго свяще́нія; клеще́ Боже́ственная, ра́дуйся; ра́дуйся, купино́ огнено́сная, ра́дуйся, две́ре, и лѣ́ствице, и мо́сте.

Инъ.

Ирмо́съ: Прови́дѣвъ проро́къ та́йну Твою́ неизрече́нную, Христе́, провозгласи́: положи́лъ еси́ тве́рдую любо́вь крѣ́пости, Отче Ще́дрый, Единоро́днаго бо Сы́на, Благíй, очище́ніе въ мíръ посла́лъ еси́.

Уста́ огнедохнове́нная и язы́къ стяжа́въ, о́тче преподо́бне, писа́нія я́сность разшири́лъ еси́ я́вѣ и у́мерлъ еси́ въ непра́веднѣмъ заточе́ніи. Дне́сь на́мъ блаже́нное подаде́ся, я́ко да́ръ, тѣ́ло твое́.

Сказа́тель неизглаго́ланныхъ да возвели́чится ны́нѣ Златоу́стый: се́ бо по вре́меннѣй сме́рти до́брѣ Бо́жіимъ манове́ніемъ па́ки прихо́дитъ къ Ца́рскому гра́ду, свяще́нно пѣ́сньми Боже́ственными честву́емь.

Умъ, облиста́емь заре́ю Всесвята́го Ду́ха, имѣ́я, просвѣща́еши подсо́лнечную Боже́ственными уче́ніи и тму́ отго́ниши нече́стія, о́тче свяще́нне Златоу́сте, святы́хъ а́нгеловъ собесѣ́дниче.

Блаже́нъ яви́лся еси́ пра́вды ра́ди, преподо́бне, отъ па́ствы отгна́нъ за́вистію лука́вою, и ны́нѣ же возвраща́яся, и отъ всѣ́хъ пѣ́сньми свяще́нными почита́емь му́дре, святи́телю Госпо́день Златоу́сте.

Богоро́диченъ: Изъ Тебе́, Дѣ́во, спасе́ніе мíру пріи́де и яви́ся, изъ Тебе́ избавле́ніе возсія́, Христо́съ: тѣ́мъ Тя́ по до́лгу пѣсносло́вимъ, всѣ́хъ свяще́нныхъ похвало́, Чи́стая, и вѣ́рныхъ свяще́нное очисти́лище.

Инъ.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Слове́съ рачи́теліе, слове́съ вели́каго украси́теля словесы́ свяще́нными, ра́достнѣ па́ки возвраща́ющася, пріиди́те, да почита́емъ, словеса́ суему́дренная прему́дростію слове́съ буесло́вившей обличи́вшаго.

Обогати́вый на́съ уче́ній бога́тствомъ, Златоу́сте, ру́ку же востяга́еши, тя́жестно лихоима́нія бога́тствомъ отягча́вшую, облича́яй явле́ннѣйше и со еди́нѣмъ то́кмо бога́тствомъ Боже́ственныя благода́ти.

Лу́къ си́льныхъ лю́тости мучи́тельскія сокруши́ся, ты́ же, въ не́мощи пло́ти а́нгельски пожи́въ, превозмо́глъ еси́, моле́бники, Златоу́сте, су́щія пре́жде гони́тели, имѣ́яй, свяще́ннѣйше.

Богоро́диченъ: Чи́ни у́мніи пѣснопѣ́ніи Тя́ хва́лятъ, Отрокови́це: Его́же бо не мо́гутъ зрѣ́ти, изъ чи́стыя утро́бы Твоея́ породила́ еси́, пло́ть воспріе́мша неизмѣ́нно, Всечи́стая Богоневѣ́сто.

Катава́сія: Покры́ла е́сть небеса́...

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Мы́сленныя сатра́пы и мучи́тельныя возду́шныя полки́ проити́ безъ печа́ли во вре́мя исхо́да моего́ пода́ждь, да Тебѣ́, — е́же ра́дуйся, — ра́достно, Влады́чице, воззову́, — ра́дуйся, всѣ́хъ наде́ждо непосты́дная.

Яко ра́дость заче́ншая, ра́дуйся, Пренепоро́чная, ра́дуйся, Пречи́стая; ра́дуйся, чистоты́ порфирови́дный цвѣ́те сладково́нный; ра́дуйся, дѣ́вства червленоомоче́нный багря́ный ши́пче и Бо́жіе благово́нное обоня́ніе.

Та́инственная мѵрополо́жнице, ра́дуйся, сладково́нное мѵ́ро врѣ́ющая; ра́дуйся, Боже́ственный исто́чниче, во́ду жи́ву источа́ющій; ра́дуйся, гро́здъ жи́зненный плодонося́щая, невоздѣ́ланная лозо́, Влады́чице.

Непрохо́дная две́рь, ра́дуйся, Еюже про́йде Христо́съ Госпо́дь; ра́йскія две́ри отве́рзшая, ра́дуйся, Рождество́мъ Твои́мъ; ра́дуйся, Еюже ра́дуются небеса́ и земля́ ликовству́етъ, го́рняя съ до́льними совоку́пльшая.

Инъ.

Ирмо́съ: Сою́зомъ любве́ связу́еми, апо́столи, влады́чествующему всѣ́ми себе́ Христу́ возло́жше, кра́сны но́ги очища́ху, благовѣству́юще всѣ́мъ ми́ръ.

Свѣти́льникъ яви́лся еси́ всѣ́мъ, сія́я въ нощи́ житія́ су́щимъ, облиста́я лучи́ Боже́ственныхъ слове́съ, о́тче Златоу́сте, и озаря́я помышле́нія на́ша. Тѣ́мже по до́лгу тя́ пѣсносло́вимъ.

Бога́тство слове́съ разда́лъ еси́, обогати́въ смы́слы, преподо́бне, а́лчущія, Златоглаго́ливе, и, непра́ведно заточе́нъ, судо́мъ пра́веднымъ па́ки возврати́лся еси́ къ твоему́ ста́ду, ра́дующуся твои́ми вели́чіи.

Якоже розга́ многопло́дня, умиле́нія вино́ прине́слъ еси́ и, цари́цу облича́я, виногра́дъ вдови́цы восхи́тившую, заточе́нъ бы́лъ еси́, о́тче Златоу́сте. Тѣ́мже возвраще́ніе твое́ честву́емъ.

Богоро́диченъ: Во́инства безпло́тныхъ Его́же не мо́гутъ ви́дѣти, Влады́чице, во объя́тіихъ Твои́хъ я́ко Младе́нца вмѣсти́вшася, въ Тебѣ́ носи́ла еси́ за благоутро́біе пло́тію обнища́вша, я́ко да обнища́вшій мíръ обогати́тъ.

Инъ.

Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.

Якоже весна́, яви́лся еси́, благоуха́я та́инственнѣ цвѣ́ты благода́тей вѣ́рныхъ мно́жества, разрѣша́я злы́хъ зи́му, о́тче, въ возвраще́ніи твое́мъ.

Боже́ственная струя́, исто́чникъ дарова́ній возврати́ся: жа́ждущіи, пріи́дите, во́ду жи́зни почерпи́те вѣ́рою, боже́ственнѣ веселя́щеся.

Заше́дъ, сокры́лся еси́, увы́ мнѣ́! добро́та моя́, но возврати́лся еси́ мнѣ́, вожделѣ́нне, во вре́мя свое́, — Христо́ва Це́рковь вопіе́тъ ти́ возврати́вшемуся.

Богоро́диченъ: Ми́лостива мнѣ́ сотвори́ проше́дшаго изъ Твоея́ утро́бы, Всенепоро́чная, Плотоно́сца Сло́ва, Его́же въ хра́мѣ Симео́нъ на руку́ держа́, я́ко Созда́теля велича́ше.

Катава́сія: Яко ви́дѣ Иса́ія...

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Одушевле́нный, ра́дуйся, Влады́чице, сосу́де, червлени́ца, отъ Твои́хъ пречи́стыхъ крове́й порфирови́дную червле́нную багряни́цу всѣ́хъ Царю́ обагри́вшая и наготу́ Ада́мову покры́вшая, ра́дуйся, Всепѣ́тая.

Укрѣпля́етъ у́бо человѣ́ческая сердца́ есте́ственнѣ чу́вственный хлѣ́бъ, Отрокови́це, христіа́нскія же ду́ши утвержда́етъ Твое́ воспѣва́емое свято́е и́мя. Отону́дуже и ра́достнѣ вся́къ язы́къ, — е́же ра́дуйся, — взыва́етъ Ти́.

Свѣти́льниче златоза́рный, ра́дуйся; киво́те боговмѣсти́мый, ра́дуйся; ра́дуйся, ски́ніе; ра́дуйся, горо́ свята́я; ра́дуйся, Бо́га жива́го гра́де одушевле́нный; пала́то, ра́дуйся, Христо́ва; ра́дуйся, хра́ме Боже́ственный многосвѣ́тлый.

Пречи́стая, Пренепоро́чная, ра́дуйся, естества́ изря́дный цвѣ́те; ра́дуйся, о́бщее человѣ́ческаго ро́да любоче́стіе и благода́ть богода́нная, обезче́щенное человѣ́ческое естество́ поче́тшая, ра́дуйся, Рождество́мъ Твои́мъ.

Инъ.

Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

Источи́ язы́къ тво́й, всеблаже́нне Златоу́сте, струи́ всезлаты́я Це́ркви и а́лчущая сердца́ обогаща́етъ, свяще́нно сла́вящая тя́.

Честна́, всеблаже́нне, сме́рть твоя́ предъ Бо́гомъ яви́ся на́шимъ, въ не́йже сла́вится па́ки прише́ствіемъ твои́мъ, о́тче, ко престо́лу твоему́, Златоу́сте.

Блаже́нъ гро́бъ, и́же честно́е твое́ содержи́тъ тѣ́ло, я́ко обогаща́я чудодѣ́йствіи притека́ющія вѣ́рою, всеблаже́нне, святи́телю Златоу́сте.

Богоро́диченъ: Высоча́йшаго ро́ждши, Пресвята́я Богоневѣ́сто, до́лѣ лежа́щее естество́ на́ше къ небеси́ возво́диши, тѣ́мже тя́ по до́лгу сла́вимъ.

Инъ.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Отсѣка́етъ тя́ отъ Це́ркве Христо́вы безу́мная цари́ца, свѣрѣ́но облича́ющая, но а́біе сама́ отсѣка́ется, ты́ же облича́еши ю́ и по сме́рти, чуде́сное пресѣче́ніе содѣ́лавый.

Орга́нъ показа́лся еси́ Вседѣ́тельнаго, Златоу́сте, Ду́ха, зѣло́ благосли́чнѣйше глася́щій; глуха́ же быва́етъ мучи́тельница, я́коже а́спида проте́къ обава́ніемъ, и зѣло́ окая́нною возмѣря́ется е́й сме́ртію.

Ме́ртвости, а́ще и у́мре, не пострада́ти ему́ я́вѣ научи́ цари́ Златоу́стый. Тѣ́хъ бо повелѣ́ніемъ не повину́вся пре́жде, на моле́нія же тѣ́хъ возврати́ся пото́мъ.

Богоро́диченъ: Еди́наго Тя́, су́щаго отъ Дѣ́вы, помышля́я, а́ще и пло́ть прія́лъ еси́, и сугу́бъ бы́лъ еси́, дале́че отрази́ и сѣче́ніе, и сли́тіе Златоу́стый Іоа́ннъ, Богочеловѣ́че Іису́се.

Катава́сія: Возопи́ къ Тебѣ́...

Конда́къ, гла́съ 1. Подо́бенъ: Ли́къ а́нгельскій.

Возвесели́ся та́инственно честна́я Це́рковь возвраще́ніемъ честны́хъ твои́хъ моще́й, и, сія́ сокры́вши, я́ко зла́то многоцѣ́нное, пою́щимъ тя́ неоску́дно подава́етъ моли́твами твои́ми исцѣле́ній благода́ть, Іоа́нне Златоу́сте.

Икосъ:

Свѣща́ дѣ́лъ мои́хъ дряхла́ бы́сть, Іоа́нне Златоу́сте, и ужаса́юся къ срѣ́тенію свяще́нныхъ твои́хъ моще́й, но ты́ са́мъ наста́ви мя́ и стези́ моя́ испра́ви, покая́нія подая́ ми́ вре́мя, всесвя́те, я́ко Того́ еси́ проповѣ́дникъ Боже́ственный, и страсте́й мои́хъ многови́дныхъ ути́ши бу́рю и, отъ сѣ́тей веліа́ровыхъ исхи́тивъ мя́, въ коне́цъ спаси́ мя́, я́ко да пою́ твое́ досто́йнѣ сла́вное возвраще́ніе, я́ко пре́жде и успе́ніе дерзну́въ просла́вихъ, Іоа́нне Златоу́сте.

Пѣ́снь 7.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Еди́на Неискусому́жная и еди́на Нетлѣ́нная, ра́дуйся, Влады́чице, Дѣ́во и Ма́ти Сынороди́тельнице и Неискусобра́чная; стра́нное, ра́дуйся, и стра́шное та́инство; ра́дуйся, а́нгеловъ сла́досте; ра́дуйся, человѣ́ковъ ра́досте.

Сіо́не, гра́де одушевле́нный Царя́ царе́й — Христа́, о не́мже глаго́лашася пресла́вная, ра́дуйся, Богоневѣ́сто; ра́дуйся, лѣ́ствице, е́юже восхо́димъ на не́бо отъ земли́ и отъ тли́ въ жи́знь.

Цвѣтни́къ богонасажде́нъ, благово́нный вертогра́дъ боговоздѣ́ланный показа́лася еси́, Дѣ́во, безсме́ртія цвѣ́тъ процвѣ́тшая. Тѣ́мъ согла́сно, — е́же ра́дуйся, — Тебѣ́ зове́мъ; ра́дуйся, ра́дости пода́тельнице, ра́дуйся, исто́чниче сла́дости.

Пречестна́я Влады́чице, отъ безче́стія мя́ страсте́й изба́ви, да ра́достно Тебѣ́, — е́же ра́дуйся, — взыва́ю; ра́дуйся, святы́ни исто́чниче; ра́дуйся, сокро́вище вся́кія чистоты́; ра́дуйся, прія́телище Бо́жіе; ра́дуйся, вмѣсти́лище Христо́во.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Чудодѣ́йствіи сія́я, богосло́віемъ украша́яся златоза́рнымъ, му́дре, заточе́ніемъ лю́тымъ преда́лся еси́; отъ ни́хже возвраща́яся, отъ всѣ́хъ просла́вился еси́.

Изсѣка́еши коре́нія зло́бы сѣки́рою Боже́ственныхъ уче́ній твои́хъ и насажда́еши душа́мъ Боже́ственное зна́ніе, святи́телю Златоу́сте. Тѣ́мъ твои́хъ возвраще́ніе моще́й прославля́емъ.

Преподо́бне, возврати́вся, разстоя́щаяся умири́лъ еси́ и положи́лся еси́ въ хра́мѣ прему́дрыхъ апо́столовъ, Златоу́сте, и́хже честно́ю обогати́лся еси́ вла́стію, всехва́льне.

Богоро́диченъ: Пресу́щественныя Тро́ицы Еди́наго родила́ еси́, Всечи́стая, Іису́са Христа́, Его́же моли́ премно́гая моя́ прегрѣше́нія за милосе́рдіе неизрече́нное прости́ти, Всенепоро́чная.

Инъ.

Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, — благослове́нъ еси́, — взыва́ющія, — Бо́же оте́цъ на́шихъ.

Чу́жду сотвори́ти вдови́цу, прему́дре, непроще́нну бы́ти повѣ́дающа отъ свои́хъ е́й, чу́жда тя́ твори́тъ отъ ца́рствующаго гра́да вседе́рзая жена́, чу́жда быва́етъ и сама́ Боже́ственныя благода́ти, отчужди́вшая себе́ отъ прему́дрыхъ уче́ній твои́хъ.

Но возврати́лся еси́ сла́достенъ, я́коже со́лнце, о́блаки покры́то бы́вшее, зѣло́ велича́йшій свѣти́льниче, свѣтоно́сныхъ та́йнымъ свѣтозаре́ніемъ златы́хъ уче́ній твои́хъ просвѣти́вшимся всѣ́мъ, Іоа́нне Златоу́сте.

Простира́ю ти́ дла́ни моя́, Златоу́сте, вну́трь огра́дъ мои́хъ тя́ прія́ти, невѣстово́дца, возвраща́ющася свѣ́тлѣ, зѣло́ любе́зна, я́ко лѣ́ты закоснѣ́вшаго, — Це́рковь вопіе́тъ ти́, пра́зднующи дне́сь.

Богоро́диченъ: Яко та́йная клеща́ нѣ́кая, Угль нося́щая мы́сленный, гряде́ши ко хра́му, Его́же, Симео́нъ просвѣти́ся, на ру́цѣ, Пречи́стая, пріе́мъ, и о зна́меніихъ стра́сти Его́ проро́чествовати и́мать зѣло́ яснѣ́йше.

Катава́сія: Тебе́, во огни́ ороси́вшаго...

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Изъ Іессе́ева ко́рене, ра́дуйся, же́злъ прозя́бшая; ра́дуйся, ненапое́нно цвѣтонося́щая цвѣ́тъ Христа́ кра́сный; ра́дуйся, ту́чная горо́; ра́дуйся, присѣ́нная; ра́дуйся, горо́ Бо́жія, въ Не́йже обита́ти Сло́во пре́жде всѣ́хъ благоволи́ вѣко́въ.

Желѣ́знымъ Твои́мъ жезло́мъ держа́внаго заступле́нія, я́ко ла́ющія псы́, я́ко рыка́ющія звѣ́ри, окружа́ющіи смире́нную мою́ ду́шу, отжени́ стра́сти, лю́тѣ обле́гшія мя́, да Тебѣ́, — е́же ра́дуйся, — Дѣ́во, зову́.

Украси́лася еси́ вся́, кра́снаго добро́тами па́че сыно́въ человѣ́ческихъ Христа́ ро́ждшая, Яже въ жена́хъ кра́сная. Тѣ́мъ Тебѣ́, — е́же ра́дуйся, — зове́мъ, ра́дующеся; ра́дуйся, Богоро́дице Чи́стая Обра́дованная; ра́дуйся, всея́ тва́ри Сла́внѣйшая.

Даніи́лъ ю́же ви́дѣ го́ру, пре́жде несѣко́мую, Богороди́тельнице, ра́дуйся, отъ нея́же отсѣче́ся краеуго́льный Ка́мень; ра́дуйся, богопрія́тная углено́сная клеще́; ра́дуйся, невеще́ственныхъ а́нгелъ Святѣ́йшая; ра́дуйся, тва́ри Честнѣ́йшая.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Рѣши́ти же и вяза́ти, преподо́бне, имѣ́я вла́сть, вся́ разрѣши́ прегрѣше́нія Боже́ственное твое́ возвраще́ніе свѣ́тло пра́зднующихъ и Ца́рствія сподо́битися небе́снаго умоли́ пою́щимъ во умиле́ніи се́рдца: Го́спода по́йте, дѣла́, и превозноси́те во вся́ вѣ́ки.

Въ заточе́ніи претерпѣ́лъ еси́, о́тче богому́дре, болѣ́зни, въ не́мже пріе́мь блаже́нную, Златоу́сте, и сла́вную кончи́ну, хотѣ́ніемъ Боже́ственнымъ па́ки возвраща́ешися къ твоему́ Боже́ственному престо́лу, честву́емь отъ пою́щихъ: Го́спода по́йте, дѣла́, и превозноси́те во вся́ вѣ́ки.

Глаго́ловъ стрѣ́лы терпѣ́ти, преподо́бне, твои́хъ не могíй, змíй льсти́вый испроша́етъ искуси́ти тя́, я́коже Іова до́бляго, но побѣжде́нъ бы́сть твои́мъ Христа́ ра́ди терпѣ́ніемъ, вели́къ я́влься смѣ́хъ тебѣ́, вѣ́рою пѣснопою́щу: Го́спода по́йте, дѣла́, и превозноси́те во вся́ вѣ́ки.

Тро́иченъ: Безнача́льне Отче, и Собезнача́льне Сы́не, и Боже́ственный Ду́ше, Тро́ице Нераздѣ́льная, еди́но естество́, еди́на си́ла и еди́на вла́сть, Тя́ пою́щія испо́лни вся́кихъ бла́гъ и муче́нія изба́ви непреста́нно пою́щія: Го́спода по́йте, дѣла́, и превозноси́те во вся́ вѣ́ки.

Богоро́диченъ: Разумѣ́ти не мо́жетъ у́мъ человѣ́ческій е́же па́че ума́ и сло́ва, Отрокови́це, та́инство неизрече́ннаго Твоего́ рождества́: Бо́гъ бо Плотоно́сецъ изъ Тебе́ яви́ся, спаса́я па́дшія во тлю́ и на пе́рвое досто́инство возводя́ пою́щія: Го́спода по́йте, дѣла́, и превозноси́те во вся́ вѣ́ки.

Инъ.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Сосца́ми благоче́стія, о́тче преподо́бне, воспита́вшую тя́ пита́еши Це́рковь, отдая́ седмокра́тнымъ хлѣ́бомъ Боже́ственныя благода́ти, твою́, пита́телю, сла́дость пролива́я, я́ко питіе́ же врачева́ній, всеблаже́нне Златоу́сте.

Во всю́ зе́млю произы́де, о́тче, вѣща́ніе твои́хъ догма́товъ, безу́мная же цари́ца тя́ изгна́ти мѣ́стнѣ повелѣ́, но солга́ся: ты́ бо, я́ко исполи́нъ высокоте́ченъ, вездѣ́ осіява́еши слове́съ твои́хъ луча́ми.

Да просвѣти́тся дне́сь сосло́віе вѣ́рныхъ, съ весе́ліемъ срѣта́юще преизря́днѣйшаго учи́телей: пріи́де бо и тѣле́снѣ настои́тъ, раздая́ всѣ́мъ благода́ть оби́льную, ея́же да наслади́мся, ра́дующеся бога́тно.

Богоро́диченъ: Зрю́ Тя́ на рука́хъ Ма́терскихъ, вѣ́мъ же Тя́ непристу́пна Божества́ естество́мъ. Ка́ко у́бо, Сло́ве, рука́ми держи́мь еси́, Иже въ руцѣ́ всю́ тва́рь и́маши? — рече́ Симео́нъ, Богочеловѣ́че, неизрече́нную Твою́ сла́вя си́лу.

Катава́сія: Нестерпи́мому огню́...

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Се́ вси́ ро́ди блажа́тъ Тя́, Присноблаже́нную, я́коже прорекла́ еси́, Богороди́тельнице, отъ Боже́ственнаго Ду́ха, и, я́ко ро́ждшей Ра́дость, — е́же ра́дуйся, — вопію́тъ Ти́; — ра́дуйся, жи́зни сокро́вище, ра́дуйся, исто́чниче, душе́вный ме́дъ источа́ющая.

Испра́вила еси́, Влады́чице Чи́стая, пра́отца Ада́ма поползнове́ніе и прама́тере Евы печа́ль въ ра́дость обрати́ла еси́. Тѣ́мже я́ко ра́дости вино́внѣй, — е́же ра́дуйся, — вопіе́мъ Ти́; — ра́дуйся, ра́досте вѣ́рныхъ, ра́дуйся, христіа́нъ весе́ліе.

Досто́йно е́сть, — е́же ра́дуйся, — вопи́ти Тебѣ́, въ Тебѣ́ бо суще́ственнѣ присносу́щная Ра́дость всели́ся, Дѣ́во Отрокови́це Богороди́тельнице; ра́дуйся, раю́ сла́дости; ра́дуйся, златостру́йный безсме́ртія исто́чниче; ра́дуйся, питіе́ и́стинное пролива́ющая.

Пронза́етъ мое́ сла́дкою стрѣло́ю се́рдце Твое́ жела́ніе, Всепѣ́тая, и понужда́етъ мя́, — ра́дуйся, — зва́ти Тебѣ́ всегда́ и вопи́ти, — ра́дуйся, ти́хое приста́нище; ра́дуйся, потопи́вшая мы́сленнаго фарао́на, сладча́йшее непроходи́мое мо́ре.

Инъ.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Свяще́нства бы́лъ еси́ пра́вило, богоглаго́ливе, одѣ́янъ пра́вдою, я́коже боже́ственною оде́ждею, и обогати́въ словесы́ твои́ми Це́рковь, и писа́нія обнажи́въ у́мъ духо́вно. Тѣ́мже твое́ возвраще́ніе, о́тче, торжеству́емъ.

Красе́нъ, я́коже славíй, о́тче, яви́лся еси́, боже́ственную ве́сну покая́нія сказу́я зимѣ́ грѣхо́внѣй рабо́тающимъ; заточе́нъ же бы́въ навѣ́томъ льсти́ваго, му́дре, па́ки притека́еши, ра́дуяся, къ жела́ющему тя́ ста́ду, блаже́нне Златоу́сте.

Игра́ютъ дне́сь всѣ́хъ сердца́, зря́ще чи́стаго тя́, преподо́бне, жениха́, твое́й невѣ́стѣ Це́ркви подае́ма благода́тію, и Да́теля благи́хъ пою́тъ непреста́нными гла́сы, тебе́ же восхваля́ютъ досто́йно и ублажа́ютъ.

Пріи́де свѣти́льникъ на свѣ́щницѣ положи́тися отъ Кома́нъ, приспѣ́ украше́ніе Бо́жія Це́ркве, воспо́йте Го́споду, по́йте съ весе́ліемъ, и, срѣ́теніе творя́ще ему́ духо́вное, вси́ возопіи́мъ: о́тче, моли́твами твои́ми спаси́ на́съ.

Богоро́диченъ: Свѣтлѣ́йшими, Отрокови́це, блиста́ніи Ро́ждшагося изъ Тебе́ неизрече́нно просвѣти́, Свята́я Богоро́дице, ду́шу мою́, вся́цѣми преступле́ньми, Всечи́стая, омраче́нную и не хотя́щую сотвори́ти до́брое, я́ко да непреста́нно возвѣща́ю вели́чія Твоя́.

Инъ.

Ирмо́съ: Но́вое чу́до и боголѣ́пное! Дѣви́ческую бо две́рь затворе́нную я́вѣ прохо́дитъ Госпо́дь, на́гъ во вхо́дѣ, и Плотоно́сецъ яви́ся во исхо́дѣ Бо́гъ, и пребыва́етъ две́рь затворе́на. Сію́ неизрече́нно я́ко Богома́терь велича́емъ.

Во́инство а́нгеловъ, собо́ръ проро́ковъ, апо́столовъ же и му́чениковъ боже́ственный ли́къ съ на́ми веселя́тся свѣ́тло, сообща́ющеся пра́зднику, всеблаже́нне, и пѣ́ній твои́хъ свою́ непщу́юще благода́ть: всѣ́хъ бо имѣ́лъ еси́ въ себѣ́, житіе́ изобража́я.

Се́ мíра возсія́ свѣ́тъ, превысо́кая яви́ся въ не́мъ Боже́ственная свѣща́, сладкотво́рная пучи́на Боже́ственныхъ даро́въ. Да напита́емся, пріиди́те, свѣ́та, бра́тіе, да согрѣ́емся, да почерпе́мъ, отъ се́рдца пѣ́сньми вси́ златоглаго́ливаго велича́юще.

Яко двѣ́ ца́тѣ, тебѣ́ пѣ́ніе сіе́ отъ недосто́йныя и окая́нныя души́ моея́, отъ вся́кихъ у́бо благи́хъ окая́ннѣ вдо́вствующія, отъ усе́рдія же Боже́ственнаго бога́тства принося́щія сіе́, бла́гости подража́ніемъ Боже́ственныя пріими́, благода́ть проти́ву воздая́ ми́ богатода́рную.

Богоро́диченъ: Ступа́я, трясу́ся, — рече́ Симео́нъ, — колеба́тися же Творя́щаго свы́ше призира́ніемъ то́кмо все́й земли́, держа́ на руку́, укрѣпля́емь е́смь, Твое́ рожде́ніе, Дѣ́во, отъ трясу́щіяся уже́ пло́ти отпуща́емь, извѣще́нію хотя́щихъ ми́ бы́ти уже́ сбыва́ющуся, ра́дуяся, ношу́, и су́щимъ во а́дѣ избавле́ніе благовѣству́я.

Катава́сія: Въ зако́нѣ сѣ́ни и писа́ній...

Свѣти́ленъ. Подо́бенъ: Жены́, услы́шите.

Ра́дуйся, гра́де градо́въ всѣ́хъ Ца́рствующій, я́ко до́браго твоего́ па́стыря и пастыренача́льника тѣ́ло воспріе́мый дне́сь, тя́ и мíръ ве́сь пра́вяща и спаса́юща медото́чными Златоу́стаго, и восплеща́й пѣ́сньми. [Два́жды.]

Сла́ва, и ны́нѣ, богоро́диченъ:

Ра́дуйся, Бо́жія пала́то, ра́дуйся, горо́ присѣ́нная; ра́дуйся, неопали́мая купино́, ра́дуйся, престо́ле сла́вы; ра́дуйся, Боже́ственная трапе́зо, ра́дуйся, ста́мно всезлата́я; ра́дуйся, свѣти́льниче всесвѣ́тлый, ра́дуйся, ле́гкій о́блаче, Дѣ́во Ма́ти Марíе.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Зла́та свѣтлѣ́е* свяще́нная твоя́ уче́нія,* пролива́ема, прему́дре,* обогаща́етъ, Златоу́сте, а́лчущія ра́зумы* и отго́нитъ страсте́й мглу́* и сребролю́бія го́рькую зи́му.* Тѣ́мже тя́ ублажа́емъ по до́лгу* и возвраще́ніе твои́хъ моще́й почита́емъ,* я́ко исто́чникъ свяще́нія.

Непра́ведно отъ па́ствы твоея́* отгна́нъ бы́въ, о́тче преподо́бне,* претерпѣ́лъ еси́ въ ско́рбехъ и го́рькихъ заточе́ніихъ,* въ ни́хже сподо́бился еси́ блаже́нныя кончи́ны,* я́ко до́бръ страда́лецъ,* попра́вый многоко́зненнаго.* Тѣ́мже возвраще́ніемъ твои́мъ Це́рковь ра́дуется,* ю́же, я́ко зла́томъ, украси́лъ еси́* прему́дрыми уче́ніи твои́ми.

Сто́лпъ о́гненный,* рѣка́, я́же вода́ми уче́ній теку́щи,* у́мъ небе́сный,* богосло́вія всезлата́я уста́,* грѣ́шниковъ пору́чникъ,* покая́нія проповѣ́дникъ боже́ственный,* свѣти́льникъ пресвѣтлѣ́йшій,* небе́сный человѣ́къ,* блаже́нный дне́сь да воспое́тся Златоу́стый.

Яко украше́ніе ца́рское,* Ца́рскій гра́дъ, твоя́ мо́щи пріе́мъ, Златоу́сте,* си́ми украша́ется* и, хваля́ся о словесѣ́хъ твои́хъ,* вселе́нную созыва́етъ на весе́ліе* и боже́ственное прича́стіе оби́льныхъ дарова́ній твои́хъ,* велегла́сно зовы́й:* Іису́се Преблагíй,* Ты́ еси́ сла́ва рабо́въ Твои́хъ.

Сла́ва, гла́съ то́йже, самогла́сенъ. Ге́рманово:

Отче Златоу́сте, я́ко рѣка́ богото́чная, изъ Еде́ма та́инственно исходя́щи, въ нача́ла четы́ри, претека́я твои́ми словесы́ земны́я концы́, вся́каго вѣ́рнаго напои́лъ еси́ всезлаты́мъ уче́ніемъ твои́мъ. Тѣ́мъ, возвраще́ніе твои́хъ боже́ственныхъ моще́й на́мъ я́вѣ гра́дски написа́въ, ны́нѣ моли́ спасти́ся душа́мъ на́шимъ, Іоа́нне, воспѣва́ющихъ тя́.

И ны́нѣ, богоро́диченъ:

Отъ всѣ́хъ бѣ́дъ рабы́ Твоя́ [сохраня́й, Благослове́нная Богоро́дице, да Тя́ сла́вимъ, наде́жду ду́шъ на́шихъ].

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 286 – 300.

/ Къ оглавленію раздѣла /


Наверхъ / Къ титульной страницѣ

0