Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 26-й де́нь.
Преподо́бнаго отца́ на́шего Ксенофо́нта и дружи́ны его́.

[ВЕЧЕРЪ,]
На Го́споди воззва́хъ: стихи́ры окто́иха 3 и свята́го 3, гла́съ 2. Подо́бенъ: Егда́ отъ дре́ва.

Сія́я досто́инствомъ души́, ми́лостынею и вѣ́рою тебе́ сама́го просвѣти́лъ еси́: ра́дуяся бо, расточи́лъ еси́ бога́тство ни́щимъ, во вѣ́ки же пребыва́етъ твоя́ пра́вда, Свѣ́тъ тебѣ́ возсія́вшій, о́тче, невече́рній, идѣ́же преподо́бныя твоя́ дѣ́ти зри́ши и сія́ ро́ждшую, во гра́дѣ небе́снѣмъ живу́щія.

Сла́ву презрѣ́вше тлѣ́нную, сла́вы нетлѣ́нныя и боже́ственныя удосто́истеся: всю́ бо попра́вше житія́ красоту́, и́стинно прекра́снаго Христа́, богоно́сніи, вельми́ возжела́сте, ва́съ спа́сшаго отъ мірска́го треволне́нія и бу́ри и въ ти́хое и свѣтоно́сное житіе́ напра́вльшаго, пребога́тіи.

Стра́сти умертви́вше плотскíя, въ безстра́стія ри́зы одѣ́ястеся, житія́ чистото́ю сія́ истка́вше, житіе́ равноа́нгельное, въ тѣлеси́ су́ще еще́, крѣпкому́дренніи, показа́вше, сла́вы удосто́истеся вси́ а́нгельскія въ вы́шнихъ, Боже́ственныя наслажда́ющеся свѣ́тлости.

Сла́ва, и ны́нѣ, богоро́диченъ:

Еди́на Невмѣсти́маго Бо́га нетѣсновмѣ́стно во чре́вѣ плодоноси́ла еси́, Человѣ́ка бы́вша за бла́гость, Всесвята́я Богоневѣ́сто. Тѣ́мже молю́ Тя: утѣсня́ющихъ мя́ страсте́й измѣни́, я́ко да тѣ́сную и пра́вую стезю́ ше́ствовавъ, дости́гну, я́же къ жи́зни, Дѣ́во, водя́щую.

Крестобогоро́диченъ:

Гро́здъ всезрѣ́лый, Чи́стая, Его́же невоздѣ́ланно во утро́бѣ плодоноси́ла еси́, на дре́вѣ я́ко узрѣ́, Сего́ повѣ́шена, рыда́ющи, восклица́ла еси́ и взыва́ла еси́: Ча́до, сла́дость иска́пай, е́юже оты́мется пія́нство вся́кое страсте́й, Благодѣ́телю, Мене́ ра́ди, Тебе́ ро́ждшія, Свои́мъ благоутро́біемъ умоля́емь.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ мíрѣ упра́ви живо́тъ на́шъ.


НА УТРЕНИ,
Оба кано́на окто́иха. И святы́хъ кано́нъ на 4, его́же краегране́сіе: Ксенофо́нта пою́ съ сожи́тельницею же и ча́ды. Творе́ніе Ѳеофа́ново, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Дре́ва жи́зни и ра́йскаго вои́стинну наслажде́нія вседомо́внѣ, всему́дріи, ны́нѣ воспріе́мше, ва́съ восхваля́ющія моли́те спасти́, къ Человѣколю́бцу.

Въ пути́ за́повѣдей Твои́хъ ше́ствуя те́плѣ, Тво́й ра́бъ, Влады́ко, оби́тели дости́же, сугу́бымъ жела́ніемъ жи́зни вѣ́чныя наслажда́яся.

Но́вую ски́нію Авраа́мову показа́лъ еси́ тво́й до́мъ всѣ́мъ, тѣ́мже, чу́дне, во Авраа́млихъ нѣ́дрѣхъ досто́йно и пра́ведно воспочи́лъ еси́.

Богоро́диченъ: Ве́сь въ Тя́ всели́вся, Всенепоро́чная, всего́ мя́, человѣ́ка, вообрази́, изъ Отца́ возсія́вый пре́жде всѣ́хъ вѣ́къ, Сло́во Безнача́льное.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Свѣтлѣ́йшими досто́инствы почте́нъ, свѣтоно́снымъ житіе́мъ украси́вся, дѣя́ніе бо восхожде́ніе видѣ́нія, вопія́, показа́лъ еси́: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Яко всѣ́хъ строи́тель бы́въ, всѣ́хъ попече́ніе прія́лъ еси́, тре́бующимъ бога́тство твое́ раздая́, пріе́мля любому́дренно мона́шествующихъ чи́ны, о́тче преподо́бне.

Зако́нами пита́яся Влады́ки, въ зако́нѣ и поуче́ніемъ, и наказа́ніемъ Госпо́днимъ наказа́лъ еси́ твоя́ дѣ́ти, зовы́й, чу́дне: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Богоро́диченъ: Еди́ну дѣ́вствующую по рождествѣ́ Марíю, святы́хъ святѣ́йшую, су́щую неискусобра́чную Богоро́дицу, пріиди́те, воспои́мъ, вѣ́рніи, зову́ще: ра́дуйся, Ма́ти Чи́стая, ра́дуйся, Влады́чице.

Конда́къ, гла́съ 4. Подо́бенъ: Яви́лся еси́.

Въ за́повѣдехъ бо́дрствовалъ еси́ Влады́чнихъ, ни́щимъ расточи́вый твое́ бога́тство, блаже́нне, ти́хо съ сопру́жницею и ча́ды твои́ми, тѣ́мже наслѣ́дуете Боже́ственное наслажде́ніе.

Та́же сѣда́ленъ, гла́съ 8. Подо́бенъ: Прему́дрости.

Въ за́повѣдехъ Влады́ки бдя́й, подо́бными же нра́вы дѣ́ти твоя́ наказу́я, блаже́нне Ксенофо́нте, и сопру́жницу, съ ни́миже вы́шнее наслѣ́довалъ еси́ Ца́рствіе, напа́стей вся́ческихъ оста́вивъ обурева́ніе. Тѣ́мже восхваля́емъ благоче́стно ва́съ вси́, и любо́вію почита́емъ, и вѣ́рно взыва́емъ: богоно́сніи всеблаже́нніи, моли́теся Христу́ Бо́гу грѣхо́въ оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́менно ро́ждшую Бо́га пло́тію, вси́ блажи́мъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га прегрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Спа́сшеся отъ бу́ри жите́йскія, въ приста́нище благоче́стія устреми́стеся, дѣ́ти блаже́ннѣйшіи.

Научи́вшеся зна́нію боже́ственныхъ и человѣ́ческихъ, Бо́гу служи́ти изво́листе.

Изъ бе́здны, преподо́бніи, мірскíя изба́вльшеся пресла́вно, ко благи́хъ бе́зднѣ пріидо́сте.

Богоро́диченъ: Изба́вленніи кро́вію, отъ ре́бръ излія́нною Сы́на Твоего́, Богома́ти, вси́ Тя́ блажи́мъ.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Къ неги́бнущей преходя́й жи́зни, потща́лся еси́ дости́гнути свяще́нный, Арка́діе, гра́дъ и Гро́бу Су́щія Жи́зни поклони́лся еси́.

Яко благолѣ́пный вои́стинну бы́вшій о тебѣ́ про́мыслъ, и чу́дно, и препросла́вленно окормле́ніе боже́ственное всѣ́хъ Влады́ки, всеблаже́нне Арка́діе!

Тобо́ю промышля́яй, Иже на объя́тіихъ Симео́новыхъ пе́рвѣе возлегíй, боже́ственнаго ста́рца, ста́рцу тя́ боже́ственному, Арка́діе, приво́дитъ, Христо́съ путево́ждствова.

Богоро́диченъ: Сы́на Безнача́льнаго и Соприсносу́щнаго Отцу́ родила́ еси́ преесте́ственно, изъ Тебе́ воплоще́нна, Всенепоро́чная Отрокови́це. Тѣ́мже Богоро́дицу Чи́стую Тя́ проповѣ́дуемъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Блаже́нныя жи́зни жела́я, къ мона́шествующихъ притека́еши собо́ру, жи́тельное дохнове́ніе споспѣ́шника, Іоа́нне, творя́.

Человѣкоубíйцы зло́бы ме́ртвость и смертоно́сный я́дъ отве́ргъ, къ Живоно́сному Гро́бу Христо́ву, Іоа́нне, прите́клъ еси́.

Іоа́ннову житію́ поревнова́лъ еси́, и́бо, я́ко о́нъ, въ пусты́ню всели́лся еси́ и чи́стѣ пожи́лъ еси́, Іоа́нне, Христу́ очища́яся.

Богоро́диченъ: Не́бо простры́й хотѣ́ніемъ, друго́е не́бо содѣ́ла одушевле́нно: Тя́, Богома́ти Чи́стая, и изъ Тебе́ су́щимъ во тмѣ́ возсія́.

Конда́къ, гла́съ 4. Подо́бенъ: Яви́лся еси́ дне́сь.

Жите́йскаго мо́ря избѣ́гше, Ксенофо́нтъ пра́ведный съ сопру́жницею честно́ю на небесѣ́хъ свеселя́тся съ ча́ды, Христа́ велича́юще.

Икосъ:

Стра́ненъ пу́ть боголѣ́пно, Ксенофо́нте, ше́ствовалъ еси́, и съ сопру́жницею забы́сте естество́, я́коже безтѣле́сніи я́вѣ, на земли́ я́вльшеся; тѣ́мже и две́ри небе́сныя ва́мъ отверзо́шася, и со а́нгелы лику́ете, я́ко виногра́да бы́вше Госпо́дня боже́ственніи дѣ́лателе, и съ ча́ды. Моли́теся у́бо Христу́ дарова́ти зарю́ просвѣще́нія омраче́ннымъ на́шимъ сердца́мъ, па́мять ва́шу творя́щимъ свѣтоно́сную, Вѣнцеда́теля Христа́ велича́юще.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Ума́ чистото́ю богоно́сный ва́ше соше́ствіе зря́, провозвѣсти́: Бо́гъ бо пра́ведный, благоче́стіе ва́ше боже́ственнѣ возмзди́въ, во еди́но, я́ко Ми́лостивъ, собра́.

Ре́вность зря́ благоче́стія, жела́ніе пріе́мъ, вѣ́ру призрѣ́въ ва́шу, Человѣколю́бецъ, вся́ собра́ во еди́ну трапе́зу ва́съ, я́ко Благодѣ́тель и Препросла́вленный.

Богоро́диченъ: Наде́жда непосты́дная, наде́жда извѣ́стная, и стѣна́ непоколеби́мая, и покро́въ, и помо́щница бу́ди ми́, Всенепоро́чная, упова́ющему на Тя́: на Тя́ бо возлага́ю, Чи́стая, всю́ наде́жду спасе́нія моего́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Пе́щь, зѣло́ огне́мъ распаля́емую, разлуче́ніе отъ дру́гъ дру́га крѣ́пко претерпѣ́сте, утро́бами бо растерза́еми и душа́ми распаля́еми, остно́мъ сро́дства страда́нія му́чениковъ подъя́сте.

Свы́ше ва́съ о́блакъ росода́тельный человѣколю́бія осѣни́ въ гора́хъ Сіо́нскихъ, идѣ́же роса́ Ду́ха ученики́ просвѣти́, зову́щія: благослови́те, вся́ дѣла́ Госпо́дня, Го́спода.

Ми́лостива на́мъ и благосе́рда бы́ти Благодѣ́теля моли́те, отцы́ всебога́тіи, ва́шу торжеству́ющимъ свяще́нную па́мять, естество́мъ соедине́нныхъ и совоку́пленныхъ благода́тію.

Богоро́диченъ: Единоро́днаго Сы́на и Бо́га Сло́ва, пре́жде вѣ́къ изъ Безнача́льнаго Отца́ неизрече́нно возсія́вшаго, тва́ри перворо́дна бы́вша, родила́ еси́, тѣ́мъ Тя́, Богома́ти, вси́ язы́цы, сла́вимъ.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

На ра́мѣхъ взе́мше Христо́въ Кре́стъ, вои́стинну ше́ствовасте стезе́ю воздержа́нія, вся́ку добродѣ́тель соверша́юще, до́ндеже са́мую и́стинно нестарѣ́емую жи́знь прія́сте, вседомо́внѣ вѣнчава́еми.

Огоспо́дствовавше плотско́му мудрова́нію, Ду́ха бога́тство сокро́вищетвовасте, благода́ть врачева́ній пріе́мше отъ Исто́чника дарова́ній, къ Нему́же ны́нѣ преше́дше, вѣ́чно почива́ете.

Побѣди́вше кова́рства зміи́ная, на коне́цъ почесте́й, преподо́бніи, нареко́стеся, пра́вды вѣнцы́ отъ Христа́ пріе́мше досто́йно. Его́же ны́нѣ моли́те, е́же спасти́ ду́ши на́ша.

Богоро́диченъ: Безма́терня пе́рвѣе по пе́рвому рожде́нію, на́съ ра́ди воплоще́нна, ражда́еши безъ отца́, во двою́ познава́ема естеству́, Боже́ственнѣмъ и человѣ́честѣмъ, и си́ми вѣ́руема дѣ́йствы, Богоневѣ́сто.

Свѣти́ленъ. Подо́бенъ: Не́бо звѣзда́ми.

Расточи́лъ еси́ бога́тство ни́щимъ богоуго́дно и вседомо́внѣ присво́ился еси́, о Ксенофо́нте, Го́споду, Его́же моли́, всеблаже́нне, отъ страсте́й на́съ изба́вити.

Богоро́диченъ: Во́инства а́нгеловъ и святы́хъ ли́ки превзыдо́ша и́стинно вели́чія Твоя́, Чи́стая. Тѣ́мже Христа́ умоли́ о лю́дехъ согрѣ́шшихъ.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 282 об. – 286.

/ Къ оглавленію раздѣла /


Наверхъ / Къ титульной страницѣ

0