Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 25-й де́нь.
Слу́жба на де́нь преставле́нія и́же во святы́хъ отца́ на́шего Моисе́я, архіепи́скопа Новгоро́дскаго, чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Иже отъ любве́ пѣ́ніе принося́щихъ ти́ не забу́ди, святи́телю, но моле́ніе простри́ ко Го́споду и изба́ви на́съ бѣсо́вскаго нахожде́нія и лю́таго озлобле́нія, да не посра́млени бу́демъ въ де́нь стра́шнаго испыта́нія.

Исцѣле́ній и чуде́съ да́ромъ просла́ви тя́ Госпо́дь по сме́рти твое́й, Его́же сла́ву, блаже́нне, сло́вомъ и житіе́мъ твои́мъ повѣ́далъ еси́, се́ бо яви́ на́мъ честны́я мо́щи твоя́, я́ко сокро́вище некра́домо, къ ни́мже притека́юще, пріе́млемъ благода́ть, Моисе́е святи́телю.

Сла́ва, гла́съ 5:

Дне́сь воспое́мъ святи́теля, благоче́стія наста́вника, Це́ркве столпа́ непоколе́блема, исто́чника исцѣле́ній неизчерпа́ема, проли́тіе дарова́ній духо́вныхъ, вели́кому же Новугра́ду просвѣти́теля и о всѣ́хъ моли́твенника те́пла, къ нему́же возопіе́мъ: святи́телю Моисе́е, не преста́й моля́ся о душа́хъ на́шихъ.

И ны́нѣ, богоро́диченъ:

Ра́дуйся, вселе́нныя похвало́; ра́дуйся, хра́ме Госпо́день; ра́дуйся, горо́ пріосѣне́нная; ра́дуйся, всѣ́хъ прибѣ́жище; ра́дуйся, свѣ́щниче златы́й; ра́дуйся, сла́во правосла́вныхъ честна́я; ра́дуйся, Марíе, Ма́ти Христа́ Бо́га; ра́дуйся, раю́; ра́дуйся, боже́ственная трапе́зо; ра́дуйся, сѣ́не; ра́дуйся, ру́чко всезлата́я; ра́дуйся, всѣ́хъ упова́ніе.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Ду́ха Пресвята́го, соверше́нный вѣ́рою Христу́ Бо́гу, Правосла́вія утвержде́ніе показа́лся еси́, Моисе́е прехва́льне.

Сти́хъ: Свяще́нницы Твои́ облеку́тся пра́вдою, и преподо́бніи Твои́ возра́дуются.

До́мъ прему́дрости Бо́жія, ея́же при́сно наслажда́емся, и вѣ́ры и́стинный учи́тель яви́лся еси́, достоблаже́нне.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

До́мъ неоску́дныя благода́ти, и гра́дъ крѣ́пкій, и на враги́ побѣ́да, возвы́си ро́гъ Благочести́ваго Импера́тора на́шего [и́мярекъ] моли́твами твои́ми ко Го́споду.

Сла́ва, гла́съ 6:

Излія́ся благода́ть во устну́ твое́ю, преподо́бне о́тче, святи́телю Моисе́е, и бы́лъ еси́ па́стырь Христо́вѣй Це́ркви, уча́ своя́ слове́сныя о́вцы вѣ́ровати во Единосу́щную и Нераздѣли́мую Тро́ицу, во Еди́но Божество́.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святи́телемъ Моисе́емъ поми́ловати ду́ши на́ша.

Тропа́рь, гла́съ 8:

Чистоты́ ра́ди житія́ твоего́, поще́нія же, и моли́твъ, и трудо́въ, сосу́дъ благопотре́бенъ бы́лъ еси́ Влады́цѣ Христу́, Иже дарова́ тя́ ста́ду твоему́, я́ко сокро́вище неотъе́млемо, чудесы́ всѣ́хъ обогаща́юща. Тѣ́мъ и мы́, соше́дшеся къ ра́цѣ моще́й твои́хъ, вѣ́рою и любо́вію вопіе́мъ: моли́ о на́съ, пречестны́й архіере́ю Моисе́е, о́тче на́шъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры [на 8], гла́съ 2. Подо́бенъ: Егда́ отъ дре́ва.

Отъ ю́ности, преподо́бне, кра́сная мíра презрѣ́лъ еси́ и, Христо́ви прилѣпи́вся, поще́ніемъ, и бдѣ́ніемъ, и моли́твами непреста́нными Тому́ угоди́лъ еси́, Безкро́вныя Же́ртвы принося́ Ему́ и о все́мъ мíрѣ моля́ся, Моисе́е преблаже́нне, и ны́нѣ моли́ся Го́сподеви, спасти́ся душа́мъ на́шимъ. [Три́жды.]

Оттря́съ, я́ко лѣ́ностный со́нъ, мірска́я треволне́нія, и къ ти́хому приста́нищу притече́, и́го Христо́во на ра́мо возложи́въ, жела́тельно Тому́ послѣ́довалъ еси́, по́мощь имѣ́я Ро́ждшую Того́ Богоро́дицу, Всемíрную Засту́пницу, ста́до свое́ до́брѣ упа́слъ еси́, и ко Христу́ приве́лъ еси́, и ны́нѣ моли́ся Го́сподеви, спасти́ся душа́мъ на́шимъ. [Три́жды.]

Избра́нъ Бо́гомъ бы́въ, пресла́вне, и чи́стѣ Тому́ послужи́въ, яви́лся еси́ ве́сь освяще́нъ, святи́телю, предстоя́ дне́сь престо́лу Святы́я Тро́ицы, созерца́я добро́ту неизрѣче́нную и наслажда́яся весе́лія присносу́щнаго и ра́дости несказа́нныя. Тѣ́мже вопіе́мъ ти́: моли́ся Го́сподеви, Моисе́е приснопа́мятне, спасти́ся душа́мъ на́шимъ. [Два́жды.]

Сла́ва, гла́съ 6:

Свѣ́тлое и свѣтоно́сное дне́сь, бра́тіе, торжество́ въ па́мять преди́внаго святи́теля Моисе́я ра́достно соверша́юще и пѣ́сни плету́ще, псало́мски взыва́емъ Христо́ви и, побѣ́дныя о́бразы принося́ще, глаго́лемъ: кто́ подо́бенъ Тебѣ́, Го́споди, прославля́яйся во святы́хъ и удивля́яй на ни́хъ ми́лости Твоя́? Якоже сего́ до́бляго святи́теля просла́вилъ еси́ и по сме́рти чудесы́ обогати́лъ еси́, яви́въ на́мъ честны́я его́ и многоцѣле́бныя мо́щи, отъ ни́хже пріе́млемъ исцѣле́нія душа́мъ же и тѣлесе́мъ, и бѣсо́вскихъ навѣ́тъ избавля́емся. Къ нему́же возопіи́мъ: ра́дуйся, свяще́нная главо́, па́стырю на́шъ и учи́телю до́брый, подража́вый Истиннаго Па́стыря, Христа́, ста́до упа́слъ еси́ до́брѣ, и къ премíрному Ца́рствію наста́вилъ еси́, и ны́нѣ моли́ся ко Го́споду спасти́ Импера́тора правосла́внаго, гра́дъ тво́й и страну́, въ не́йже при́сно почита́ется па́мять твоя́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и паримíи три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Богому́дре святи́телю Моисе́е, ты́, твои́ми моли́твами и посто́мъ, бдѣ́ніемъ же и ми́лостынею Бо́гови соедини́вся, до́мъ Ду́ху Пресвято́му и жили́ще показа́лся еси́, тѣ́мже и архіере́й Це́ркве Христо́вы, о́тче, бы́лъ еси́, моли́ у́бо спасти́ся душа́мъ на́шимъ.

Повину́яся за́повѣди Го́спода Іису́са, отъ ю́ности Того́ стопа́мъ, святи́телю, послѣ́довалъ еси́, тѣ́мже отъ Него́ благода́ть прія́лъ еси́ дѣ́йствовати пресла́вная чудеса́ и ду́хи прогоня́ти лука́выя отъ всѣ́хъ, и́же любо́вію чту́щихъ тя́.

Кро́токъ и незло́бивъ во все́мъ житіи́ твое́мъ бы́лъ еси́, святи́телю Моисе́е, сего́ ра́ди и обрѣ́лъ еси́ вожделѣ́нный на небесѣ́хъ поко́й. Тѣ́мже почита́емъ святу́ю па́мять твою́, богоблаже́нне и всече́стне.

Гла́съ 4:

Моисе́я блаже́ннаго свяще́нную па́мять дне́сь соверша́юще, боже́ственными пѣ́сньми, пріиди́те, вси́ почти́мъ, я́ко архіере́я вели́каго, о на́съ всегда́ моля́щася ко Го́споду, да пода́стъ мно́жество щедро́тъ и спасе́ніе душа́мъ на́шимъ.

Сла́ва, гла́съ то́йже:

Ева́нгельскихъ уче́ній рачи́теля и Христо́вымъ за́повѣдемъ подража́теля дне́сь обстоя́ще ра́ку, исцѣле́нія пріе́млемъ незави́стно. Тѣ́мже, вѣ́рно торжеству́юще, любо́вію возопіи́мъ къ нему́: ра́дуйся, Моисе́е, о́тче на́шъ, я́ко въ тлѣ́ннѣмъ се́мъ житіи́ Христо́ви усе́рдно послужи́лъ еси́, отъ Него́же и вѣне́цъ нетлѣ́нный въ безконе́чнѣмъ Ца́рствіи прія́лъ еси́, идѣ́же ны́нѣ наслажда́ешися, со а́нгелы лику́я, со проро́ки и апо́столы Го́сподеви моля́ся, блаже́нне, Импера́тору правосла́вному низпосла́ти ми́ръ и спасе́ніе, и душа́мъ на́шимъ ве́лію ми́лость.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ утвержде́ніе вели́кому Нову́граду, Го́споди, ди́внаго Твоего́ святи́теля Моисе́я, неистощи́мое сокро́вище, изоби́льна чуде́съ мно́гихъ, крѣ́пка побо́рника и засту́пника, его́же моли́твами спаси́ Импера́тора на́шего и лю́ди, Іису́се Всецарю́ и Спа́се ду́шъ на́шихъ.

Сти́хъ: Свяще́нницы Твои́ облеку́тся пра́вдою, и преподо́бніи Твои́ возра́дуются.

Да́лъ еси́ украше́ніе, Го́споди, оби́тели архистрати́га Твоего́ цѣльбоно́сныя мо́щи Моисе́я святи́теля, содѣ́йственника быва́юща чудесе́мъ мно́гимъ и моля́щася Тебѣ́ непреста́нно, Іису́су Человѣколю́бцу, Спа́су душа́мъ на́шимъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Да́лъ еси́ зна́меніе вѣ́рующимъ въ Тя́ тве́рдо, Го́споди, и́стиннымъ Твои́мъ уго́дникомъ, пріе́млютъ бо исцѣле́нія душа́мъ же и тѣлесе́мъ съ вѣ́рою притека́ющіи къ ни́мъ. Тѣ́мже у́бо и мы́, дне́сь соше́дшеся къ ра́цѣ Моисе́я святи́теля, вѣ́рно Ти́ вопіе́мъ: того́ моли́твами спаси́ на́съ, Іису́се Человѣколю́бче, Спа́се ду́шъ на́шихъ.

Сла́ва, гла́съ 5:

Что́ шу́мъ пра́зднующихъ быва́етъ и и́ноцы ра́достію веселя́тся? — Дне́сь обрѣто́хомъ, — глаго́лютъ, — сокро́вище некра́домо, цѣле́бъ пода́тельныя мо́щи Моисе́я, вели́каго святи́теля. Се́й бо во вре́меннѣмъ житіи́ потруди́ся и прему́дрости Бо́жія престо́лъ украси́лъ е́сть, ны́нѣ же престо́лу Госпо́дню предстои́тъ съ первопресто́льники Це́ркве Россíйскія, къ ни́мже возопіе́мъ въ пѣ́снехъ, ра́дующеся: ра́дуйся, отце́мъ сла́во, Пе́тре, рукоположе́ніемъ освяти́вый отца́ на́шего; ра́дуйся, до́брый учи́телю Алексíе, на престо́лъ его́ па́ки взы́тіе благослови́вый; ра́дуйся, Моисе́е, и́хъ ревни́телю, и вку́пѣ съ ни́ми моли́ся Го́сподеви спасти́ся душа́мъ на́шимъ.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

На благослове́ніи хлѣ́бовъ: Тропа́рь святи́телю, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь святи́телю, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1. Подо́бенъ: Небе́сныхъ чино́въ.

Разу́мнаго адама́нта, до́бляго святи́теля, Моисе́я дне́сь, вѣ́рніи, почти́мъ, свѣ́тло пра́зднующе всечестну́ю па́мять его́, то́й бо моли́твами свои́ми къ Бо́гу отъ свои́хъ многоцѣле́бныхъ моще́й подава́етъ на́мъ неоску́дно исцѣле́нія исто́чникъ, велегла́сно на́съ науча́я Христо́ви вопи́ти: прославля́яй святы́хъ Твои́хъ, Го́споди, сла́ва Тебѣ́. [Два́жды.]

Сла́ва, и ны́нѣ, богоро́диченъ:

Спасе́нія на́шего хода́таица Ты́ яви́лася еси́, Всенепоро́чная, ду́шу мою́ окая́нную изба́ви бѣсо́вскаго мучи́тельства и пода́ждь ми́ прегрѣше́ній очище́ніе: ра́звѣ бо Тебе́, раби́ Твои́, не имѣ́емъ помо́щницы.

По 2-мъ стихосло́віи сѣда́ленъ, гла́съ 5:

Су́етныя му́дрости возгнуша́вся, и́стиннымъ послѣ́дуя ева́нгельскимъ за́повѣдемъ, преблаже́нне святи́телю Моисе́е, це́рковь Прему́дрости Бо́жія украси́лъ еси́ и сла́вити Тро́ицу Единосу́щную лю́ди своя́ научи́лъ еси́, Юже моли́ о чту́щихъ тя́. [Два́жды.]

Сла́ва, и ны́нѣ, богоро́диченъ:

Дѣ́вствуеши ро́ждши, Дѣ́во Всенепоро́чная, Неискусому́жная Ма́ти: му́жеска ло́жа не пріе́мши, родила́ еси́ Бо́га воплоще́нна, Его́же моли́ о пою́щихъ Тя́.

[Велича́ніе:

Велича́емъ тя́, святи́телю о́тче Моисе́е, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй.]

По поліеле́и сѣда́ленъ, гла́съ 8:

Лука́ваго лови́тельства изба́ви ста́до твое́, о́тче, совѣ́ты льсти́ваго разруши́ моли́твами твои́ми и язы́ковъ шата́нія низложи́, я́коже дре́вле вооружи́вшихся на твою́ оби́тель, и разбо́йнически прише́дшихъ обличи́лъ еси́, ста́до же твое́ отъ злы́хъ невреди́мо спа́слъ еси́, чи́стаго ра́ди житія́ твоего́ нетлѣ́нный вѣне́цъ пріи́мъ отъ руки́ Вседержи́теля, сего́ ра́ди вопіе́мъ ти́: Моисе́е преблаже́нне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Просвѣти́ ду́шу мою́ омраче́нную, Ма́ти Богоро́дице, и лю́таго видѣ́нія изба́ви, я́ко да во хвале́ніи сла́влю Тя́, Всенепоро́чная, и, дерза́ющи, со а́нгеломъ вопію́ Ти вѣ́рно: благослове́нъ Пло́дъ Твоего́ чре́ва.

[Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Вся́кое дыха́ніе... Ева́нгеліе Іоа́нна, зача́ло 35 отъ полу́.]

По 50-мъ псалмѣ́ стихи́ра, гла́съ 6:

Дне́сь, празднолю́бныхъ собо́ры, ра́достно духо́вный ли́къ соста́вльше, не въ кимва́лѣхъ іуде́йскихъ, ни въ орга́нѣхъ лати́нскихъ, но въ сокруше́ніи ду́шъ и серде́цъ на́шихъ восхва́лимъ Христа́ Бо́га на́шего, прославля́ющаго ди́внаго Своего́ уго́дника, святи́теля Моисе́я, его́же ны́нѣ многоцѣле́бную ра́ку обстоя́ще и любе́зно лобыза́юще, возопіи́мъ: О, пречестны́й и вели́кій архіере́ю Моисе́е, па́стырю и учи́телю на́шъ! Яко имѣ́я дерзнове́ніе ко Христу́ Бо́гу, ми́ръ мíрови испроси́ и душа́мъ на́шимъ ве́лію ми́лость.

Кано́нъ [Богороди́цы со ирмосо́мъ на 6, и свята́го на 8], гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Іису́су: Отве́рзи устнѣ́ мои́, Го́споди, и просвѣти́ смы́слъ мо́й омраче́нный, разрѣши́ ю́зу язы́ка моего́, я́ко да свѣ́тлѣ и ра́достнѣ восхвалю́ до́бляго святи́теля Моисе́я, Твоего́ уго́дника.

Аще и не кра́сно приноси́мое тебѣ́ пѣ́ніе, но отъ усе́рдія пріими́, о́тче, я́коже двѣ́ ца́ты вдови́цы прія́тъ Христо́съ, и не лише́нна мя́ сотвори́ твои́хъ даро́въ, и согрѣше́ніемъ мои́мъ испроси́ проще́ніе твои́ми къ Бо́гу моли́твами.

Блага́го Бо́га подража́тель бы́лъ еси́, преблаже́нне Моисе́е, милосе́рдіе къ ни́щимъ и любо́вь нелицемѣ́рну ко всѣ́мъ стяжа́въ, помина́я и дѣ́ломъ показу́я рече́нная: возлю́биши и́скренняго твоего́, я́ко са́мъ себе́.

Богоро́диченъ: Всепѣ́тая Богоро́дице, Яже Всеми́лостиваго Бо́га ро́ждшая, ду́шу мою́, омраче́нную бѣсо́вскими прило́ги, просвѣти́, Всенепоро́чная, и ума́ моего́ я́звы уврачу́й, и заступи́ мя, я́ко да по достоя́нію сла́влю Тя́.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Го́спода своего́ во́лю сотвори́въ, сугу́бъ тала́нтъ пріобрѣ́лъ еси́, сего́ ра́ди благíй о́нъ слы́шиши гла́съ: до́брый ра́бе и вѣ́рный, вни́ди въ ра́дость Го́спода твоего́.

Душе́вную чистоту́ стяжа́въ, безъ нея́же никто́же у́зритъ Го́спода, Моисе́е, о́тче на́шъ, стра́сти окая́нныя души́ моея́ и сла́сти тѣле́сныя утоли́ моли́твами твои́ми.

Христу́ Бо́гу производя́щу тя́ на лу́чшая, мірска́я вся́ оплева́лъ еси́ и, благíй яре́мъ на ра́мо взе́мъ, усе́рдно Тому́ послѣ́довалъ еси́.

Богоро́диченъ: Живо́тъ ро́ждшая соста́вны́й, Дѣ́во Всенепоро́чная, се́рдца моего́ стру́пы исцѣли́ хода́тайствы Твои́ми, е́же къ Сы́ну Твоему́, Богоблагода́тная.

[Сѣда́ленъ, гла́съ 1. Подо́бенъ: Небе́сныхъ чино́въ.

Разу́мнаго адама́нта, до́бляго святи́теля, Моисе́я дне́сь, вѣ́рніи, почти́мъ, свѣ́тло пра́зднующе всечестну́ю па́мять его́, то́й бо моли́твами свои́ми къ Бо́гу отъ свои́хъ многоцѣле́бныхъ моще́й подава́етъ на́мъ неоску́дно исцѣле́нія исто́чникъ, велегла́сно на́съ науча́я Христо́ви вопи́ти: прославля́яй святы́хъ Твои́хъ, Го́споди, сла́ва Тебѣ́. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію мо́лимъ вси́ и Дѣ́ву вои́стинну, въ щедро́ты Твоя́ вопіе́мъ, любо́вію прибѣга́юще въ Твою́ бла́гость, Тя́ бо и́мамы, грѣ́шніи, засту́пницу, Тебе́ стяжа́хомъ въ напа́стехъ спасе́ніе, еди́ну Пречи́стую.]

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Зѣ́льныхъ ра́ди поше́ній, и моли́твъ непреста́нныхъ, и чистоты́ серде́чныя всели́ся въ тя́ Христо́съ, преблаже́нне святи́телю Моисе́е, на Него́же наде́жду всю́ возложи́лъ еси́.

Земна́я отри́нувъ, небе́сная наслѣ́довалъ еси́, отъ си́лы бо въ си́лу восходя́, къ премíрному Ца́рствію пресели́лся еси́, идѣ́же терпѣ́нія ра́ди твоего́ угото́вася ти́ вѣне́цъ нетлѣ́нный и вѣ́чное весе́ліе.

Изволе́ніемъ Бо́жіимъ и избра́ніемъ по́стниковъ сосло́вія па́стырь поставля́ешися и наста́вникъ, и́же ко спасе́нію, вводя́ ста́до твое́ во огра́ду небе́сную.

Богоро́диченъ: И ражда́еши, и дѣ́вствуеши, Дѣ́во Всенепоро́чная, иску́са бо му́жеска не пріе́мши, родила́ еси́ Бо́га воплоще́нна, Его́же моли́ о пою́щихъ Тя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Крѣ́пко вооружи́вся на неви́димыя враги́, я́коже тве́рдый адама́нтъ, вы́я и́хъ сокруши́лъ еси́, го́рдостная шата́нія утоли́лъ еси́, Го́споду тя́ прославля́ющу.

Отъ лука́выхъ бѣсо́въ ла́янія ста́до твое́ сохраня́я, и́стиннаго Па́стыря — Христа́ — и́стинный учени́къ бы́лъ еси́, святи́телю Моисе́е, сего́ ра́ди избра́ніемъ первосвяти́теля Петра́ намѣ́стникъ блаже́ннаго святи́теля Іоа́нна въ це́ркви Прему́дрости Бо́жія устроя́ешися.

Ми́лостивно наказу́я, о́тче, о Христѣ́ поруче́нное тебѣ́ ста́до, упа́слъ еси́ на па́житехъ зако́на живоно́снаго: тобо́ю бо о́бразъ показа́лъ еси́, возвѣща́я пу́ть ко спасе́нію и е́же отъ злы́хъ премѣне́нію.

Богоро́диченъ: На́шего спасе́нія Хода́таица Ты́ яви́лася еси́, Всенепоро́чная, ду́шу мою́ окая́нную изба́ви бѣсо́вскаго мучи́тельства и пода́ждь прегрѣше́ніемъ очище́ніе: ра́звѣ бо Тебе́, раби́ Твои́, не и́мамы помо́щницы.

Пѣ́снь 6.

Ирмо́съ: Да не погрузи́тъ мене́ бу́ря водна́я, ниже́ пожре́тъ мене́ глубина́, отве́рженъ бо е́смь во глубины́ се́рдца морска́го зо́лъ мои́хъ. Тѣ́мъ зову́, я́ко Іо́на: да взы́детъ отъ тли́ зо́лъ живо́тъ мо́й къ Тебѣ́, Бо́же.

Злíи человѣ́цы пріидо́ша ко оби́тели, въ не́йже твое́ честно́е тѣ́ло положено́ бы́сть, святи́телю Моисе́е, не вѣ́дуще, я́ко ты́ заступа́еши ста́до твое́ и по отше́ствіи твое́мъ отъ житія́ твоего́. Ты́ же, еди́наго коего́ждо и́хъ, ми́лостивно наказа́въ, на пу́ть пра́вый наста́вилъ еси́.

Почто́ совѣща́етеся, злíи, ка́ко дерзну́сте умы́слити зла́я на оби́тель мою́? — святи́тель Моисе́й глаго́лаше. — Или́ не вѣ́сте си́лы непобѣди́маго воево́ды Госпо́дня, вели́каго арха́нгела Михаи́ла? Аще не пока́етеся, то́ вси́ здѣ́ лю́тѣ поги́бнете. — Они́ же, съ пла́чемъ и слеза́ми пока́явшеся тебѣ́ и ви́дѣвше тя́, моля́щася о ни́хъ, Бо́гу хвалу́ возсыла́ху.

Ра́зумъ отъ Бо́га пріи́мъ, благочести́выя па́че приводя́ къ благоразу́мію, нечести́вымъ же уста́ загражда́я, Моисе́е святи́телю: го́рдостнаго бо епи́скопа, бы́вша во оби́тели твое́й и уничижи́вша тя́, ума́ отъя́тіемъ смири́въ, во святи́тельствѣ непотре́бна сотвори́лъ еси́.

Богоро́диченъ: Святѣ́йшая херуви́мъ и серафи́мъ яви́лася еси́, Пречи́стая, Зижди́теля бо и́хъ несказа́нно родила́ еси́, не опа́льшися огне́мъ Божества́, и ны́нѣ блажа́тъ Тя́ вси́ ро́ди, я́коже прорекла́ еси́, Всепѣ́тая.

Конда́къ, гла́съ 3:

Яко вѣнце́мъ пресвѣ́тлымъ украси́вся дне́сь, вели́кій Новгра́дъ лику́етъ въ па́мять па́стыря своего́ и учи́теля, и, я́ко діади́му ца́рскую возложи́вши, честна́я о́на оби́тель свѣ́тло ра́дуется: просла́ви бо тя́ Бо́гъ, уго́дника Своего́, и прояви́ послѣ́днему ро́ду на́шему цѣльбоно́сныя мо́щи твоя́, святи́телю Моисе́е, Це́рковь же Бо́жія весели́тся, созыва́ющи и́нокъ сосло́віе велегла́сно вопи́ти: ра́дуйся, гра́ду твоему́ и оби́тели похвало́ и всея́ Россíйскія страны́ пресвѣ́тлый свѣти́льниче.

Икосъ:

Яко изъ мра́чна о́блака пресвѣ́тлая звѣзда́ возсія́, та́ко ны́нѣ отъ вели́каго Новагра́да небе́снаго Ца́рствія граждани́нъ произы́де, вели́кій Моисе́й, и всѣ́хъ озари́ чуде́съ луча́ми, и́же съ вѣ́рою приходя́щихъ къ цѣльбоно́сному его́ гро́бу и любе́зно цѣлу́ющихъ ра́ку моще́й его́, ю́же и мы́, обстоя́ще, дне́сь серде́чною любо́вію вѣ́рно возопіи́мъ: ра́дуйся, я́ко отъ мла́дости Бо́гу порабо́талъ еси́; ра́дуйся, я́ко мірска́я вся́ оплева́лъ еси́; ра́дуйся, я́ко Христо́въ яре́мъ на ра́мо взе́мъ, усе́рдно Тому́ послѣ́довалъ еси́; ра́дуйся, я́ко вруче́нное тебѣ́ ста́до до́брѣ упа́слъ еси́; ра́дуйся, я́ко престо́ломъ намѣ́стникъ бы́въ блаже́ннаго Іоа́нна, того́ стопа́мъ послѣ́довалъ еси́; ра́дуйся, Прему́дрости Бо́жія престо́лъ украси́вый; ра́дуйся, чудесы́ гра́дъ сво́й озари́вый; ра́дуйся, ни́щихъ и а́лчущихъ пита́телю; ра́дуйся, сирота́мъ печа́льнымъ и вдови́цамъ утѣше́ніе; ра́дуйся, я́ко спа́слъ еси́ му́жа, отъ потопле́нія водна́го погря́знути уже́ хотя́ща; ра́дуйся, я́ко того́же сохрани́лъ еси́ отъ иноплеме́нныхъ разбо́йникъ; ра́дуйся, засту́пниче гра́ду твоему́ и всѣ́мъ, живу́щимъ въ не́мъ, и моли́твенниче те́плый ко Влады́цѣ Христу́ Бо́гу; ра́дуйся, па́стырю до́брый, во все́мъ подража́яй Влады́цѣ твоему́, Его́же моли́ о чту́щихъ святу́ю па́мять твою́, да вси́ въ весе́ліи се́рдца вопіе́мъ ти́: ра́дуйся, святи́телю Моисе́е, вели́кому Новугра́ду похвало́ и всея́ Россíйскія земли́ пресвѣ́тлый свѣти́льниче.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Терпѣ́нія ра́ди твоего́ и му́жества возлюби́ тя́ Иже надъ всѣ́ми су́щій Бо́гъ и чудесы́ обогати́лъ тя́ е́сть, пою́ща: препѣ́тый Го́споди, Бо́же оте́цъ, благослове́нъ еси́.

Устроя́етъ тя́ Госпо́дь Це́ркви Своея́ архіере́я, слове́снымъ овца́мъ па́стыря всеизря́дна, ты́ же, прему́дре Моисе́е, святи́тельства па́ству пріи́мъ, въ бо́льшія по́двиги вда́лся еси́, Христо́ви поя́: препѣ́тый Го́споди, Бо́же оте́цъ, благослове́нъ еси́.

Уже́ погря́знути хотя́ше во глубинѣ́ во́днѣй, его́же ты́, святи́телю, а́біе отъ потопле́нія спа́слъ еси́, подъ ру́цѣ подъе́мля и держа́, до́ндеже па́ки прія́ша его́ въ ладію́. Та́кожде и мене́, погря́знути хотя́ща въ ти́нѣ беззако́ній мои́хъ, спаси́, и соблюди́, и умоли́ Влады́ку Христа́, да пріи́метъ мя́ въ вѣ́чныя жи́зненныя кро́вы, пою́ща: препѣ́тый Го́споди, Бо́же оте́цъ, благослове́нъ еси́.

Богоро́диченъ: Фарисе́йскаго бу́яго киче́нія ненави́дѣти ми́ сотвори́, Богоро́дице, и мытаре́ву смире́нію поревнова́ти сподо́би, умоли́, Его́же родила́ еси́, Христа́, да просвѣти́тъ ду́шу мою́ омраче́нную и лю́таго паде́нія изба́витъ, я́ко да во явле́ніи сла́влю Тя́, Всенепоро́чная, Сы́ну Твоему́ вопія́: препѣ́тый Го́споди, Бо́же оте́цъ, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Хра́мъ Свято́му Ду́ху, святи́телю Моисе́е, сотвори́лъ, и са́мъ во оби́тель Тому́ бы́лъ еси́, тѣ́мже и на́съ моли́твами твои́ми селе́нія Ему́ содѣ́лай и отъ вся́кихъ напа́стей и озлобле́нія изба́ви, я́ко да пое́мъ въ ра́дости се́рдца: благослови́те, вся́ дѣла́ Госпо́дня, Го́спода.

Отве́рзи на́мъ ра́йскій вхо́дъ моли́твами твои́ми, святи́телю Моисе́е, и не пре́зри на́съ въ ско́рбехъ мно́зѣхъ, тебе́ бо засту́пника гра́ду твоему́ живу́щіи въ не́мъ, и́мамы, я́ко да въ ра́дости се́рдца пое́мъ: благослови́те, вся́ дѣла́ Госпо́дня, Го́спода.

Царю́ Небе́сному Влады́цѣ и Бо́гу моля́ся, гряду́щаго ку́плю дѣ́яти отъ потопле́нія и отъ разбо́йникъ спа́слъ еси́, по́мощь имѣ́я и заступле́ніе Бо́жія Ма́тере. То́й бо не вѣ́дяше, кто́ е́сть спаса́яй его́, до́ндеже ты́, святи́телю Моисе́е, яви́вся ему́ въ то́нцѣ снѣ́, сказа́лъ еси́, я́ко тобо́ю сотвори́ Бо́гъ избавле́ніе ему́, и заповѣ́далъ еси́ сотвори́ти покро́въ на честнѣ́й ра́цѣ твое́й. Онъ же въ ра́дости повелѣ́нная тобо́ю сотвори́, поя́ Го́сподеви: благослови́те, вся́ дѣла́ Госпо́дня, Го́спода.

Богоро́диченъ: Чи́стая и Сла́вная Влады́чице, Ма́ти Бо́га Вы́шняго, щедро́ты низпосли́ на́мъ отъ неистощи́мыхъ сокро́вищъ Твои́хъ и пода́ждь въ ну́ждахъ терпѣ́ніе, да въ весе́ліи пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ше́ствовати на́съ сотвори́ во слѣ́дъ сохрани́вшихъ за́повѣди Бо́га на́шего, и спаси́ моли́твами твои́ми, святи́телю Моисе́е, па́стырю и учи́телю на́шъ, отъ всѣ́хъ зо́лъ, находя́щихъ на ны́, и наста́ви на пу́ть живота́, моля́ся о на́съ Человѣколю́бцу Бо́гу и Спа́су ду́шъ на́шихъ.

Ще́драго Человѣколю́бца Бо́га моли́ о на́съ, па́стырю на́шъ до́брый, тезоимени́тый Богови́дцу, святи́телю Моисе́е: и́мать бо послу́шати Ма́тере Своея́, Засту́пницы гра́да на́шего, и твои́хъ пречестны́хъ моле́ній и поми́луетъ на́съ.

Ле́гко, я́коже оре́лъ кри́лома, на небе́сную высоту́ дости́глъ еси́ и терпѣ́нія и чи́стаго ра́ди житія́ твоего́ по́честь прія́лъ еси́ отъ Мздовоздая́теля, и ны́нѣ Госпо́дь яви́ на́мъ цѣльбоно́сныя мо́щи твоя́, точа́щія исцѣле́нія съ вѣ́рою приходя́щимъ. Тѣ́мже мо́лимъ тя́, святи́телю Моисе́е: помяни́ на́съ, и́же вѣ́рою чту́щихъ тя́ и достодо́лжно ублажа́ющихъ тя́.

Богоро́диченъ: Изъ пречи́стыхъ ложе́снъ Твои́хъ про́йде у́мное Со́лнце, Богоро́дице, просвѣща́я и́же во тмѣ́ сѣдя́щихъ, омраче́нныя невѣ́дѣніемъ, и приводя́ къ свѣ́ту богоразу́мія, страда́вшимъ Его́ ра́ди нетлѣ́нныя вѣнцы́ подава́я и вѣ́чное ра́дованіе. Его́же моли́ о на́съ, Влады́чице, не лиши́ти на́съ десна́го стоя́нія въ ча́съ испыта́нія, да Тя́ вси́ велича́емъ.

Свѣти́ленъ:

Ско́ро предвари́, святи́телю Моисе́е, вѣ́рнымъ побо́рниче, и Христа́ Бо́га умоли́ покори́ти подъ но́зѣ Импера́тору на́шему иноплеме́нныя язы́ки, да навы́кнутъ сла́вити Святу́ю Тро́ицу; на́съ же, чту́щихъ твою́ святу́ю па́мять, спаса́й отъ вся́каго зла́. [Два́жды.]

Сла́ва, и ны́нѣ, богоро́диченъ:

Всеблага́я Влады́чице, Яже Ще́драго Бо́га пло́тію ро́ждшая, поми́луй на́съ, озло́бленныхъ прило́ги лука́ваго, и устра́ншихся за́повѣдей Сы́на Твоего́ и Бо́га на́шего, и грѣху́ порабо́тившихъ себе́, Свои́мъ хотѣ́ніемъ привлецы́, Пречи́стая, къ повелѣ́ніемъ Бо́жіимъ и не лиши́ на́съ вѣ́чнаго наслажде́нія моли́твами Твои́ми.

На хвали́техъ стихи́ры на 4, гла́съ 8:

Неукло́нно, преблаже́нне, пу́ть жи́зненный ше́ствовалъ еси́, по́стническими боре́ніи вся́ плотска́я мудрова́нія умертви́лъ еси́, кра́сная мíра оста́вилъ еси́, небе́сную красоту́ возлюби́лъ еси́, идѣ́же со а́нгелы лику́еши, святи́телю Моисе́е, моли́ спасти́ся душа́мъ на́шимъ. [Два́жды.]

Въ ю́ности цѣлому́дріе стяжа́лъ еси́, въ ста́рости ра́зумъ обостри́лъ еси́, ду́шу пресвѣ́тлу сотвори́лъ еси́, архіере́йства са́нъ воспрія́лъ еси́, це́рковь добро́тами украси́лъ еси́, сего́ ра́ди тя́ почита́емъ, святи́телю богому́дре, ты́ же не преста́й моля́ся о творя́щихъ па́мять твою́.

Собери́теся, празднолю́бцы, дне́сь въ па́мять Моисе́я святи́теля, и сію́ ку́пно вси́ торжеству́йте: се́ бо благоче́стія подража́тель и о ста́дѣ свое́мъ те́плый моли́твенникъ, Россíйскія страны́ удобре́ніе, вели́кому же Нову́граду похвала́ и утвержде́ніе, къ нему́же возопіи́мъ: святи́телю, моли́ Христа́ Бо́га о чту́щихъ святу́ю па́мять твою́.

Сла́ва, гла́съ 6:

Отрокъ яви́лся еси́ смире́нъ, беззло́біемъ украша́яся, сего́ ра́ди Христо́съ Бо́гъ овца́мъ Свои́мъ па́стыря тя́ поста́ви, я́ко неизче́тно бога́тство Свои́хъ даро́въ яви́ тя́ вели́кому Нову́граду, обурева́емымъ въ ско́рбехъ ти́хое приста́нище. И ны́нѣ, святи́телю Моисе́е, не премолчи́, вопія́ за ны́ ко Го́споду.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святи́телемъ Моисе́емъ поми́ловати ду́ши на́ша.

Славосло́віе вели́кое [ектеніи́] и отпу́стъ.



НА ЛИТУРГІИ,

Слу́жба святи́тельская: [Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Слу́жба и Ака́ѳистъ на де́нь преставле́нія и́же во святы́хъ отца́ на́шего Моисе́я, архіепи́скопа Новгоро́дскаго, чудотво́рца.. — Изда́ніе тре́тіе. — СПб: Сѵнодальная Тѵпогра́фія, 1897. — С. 3 – 20, 37 – 42.

/ Къ оглавленію раздѣла /


Наверхъ / Къ титульной страницѣ

0