Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 25-й де́нь.
Иже во святы́хъ отца́ на́шего Григо́рія, архіепи́скопа Константи́на гра́да, Богосло́ва.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 4. Подо́бенъ: Яко до́бля.

Богосло́вными твои́ми устны́,* богосло́ве Григо́ріе,* богосло́внымъ язы́комъ твои́мъ изъяви́лъ еси́* въ Тро́ицѣ пое́маго* Бо́га Единосу́щнаго,* Отца́, и Сы́на, и Ду́ха Свята́го,* изсуши́лъ еси́ бу́йство е́ллиновъ и лжу́,* и́стину проповѣ́дуя* боговѣща́нными твои́ми глаго́лы.

И ви́дъ тво́й че́стенъ,* и зра́къ говѣ́инъ,* свяще́нный Григо́ріе,* сего́ ра́ди тя́ ра́достными пѣснопѣ́ньми почита́емъ и глаго́лемъ:* ра́дуйся, звѣздо́ у́мная,* озаря́ющая концы́ свѣ́тлостію* прему́дрыхъ твои́хъ глаго́ловъ;* ра́дуйся, трубо́, проповѣ́дующая мíру* Іису́совы за́повѣди.

Многогла́сный орга́нъ,* гу́сль мусикíйскую настро́енную,* свирѣ́ль же и цѣвни́цу сладкоды́шащую,* іера́рховъ превысоча́йшаго,* вели́каго учи́теля Це́ркве Христо́вы,* да похва́лимъ, пою́ще:* ра́дуйся, благода́ти Боже́ственныя глубино́,* ра́дуйся, высото́ небе́сныхъ разумѣ́ній,* о́тче отце́въ Григо́ріе.

Пра́щею слове́съ твои́хъ* боже́ственныхъ, богодохнове́нне,* держа́вно, пресла́вне, порази́лъ еси́,* я́коже во́лка, Арія,* и дале́че отгна́въ отъ ста́да Христо́ва,* па́стырю всеизря́днѣйшій,* твоя́ о́вцы согрѣва́я и прохлажда́я* зла́комъ Тро́ицы Единосу́щныя.* Сего́ ра́ди тя́ почита́емъ,* па́стырю па́стырей Григо́ріе.

Сла́ва, гла́съ 6:

Іера́рховъ нача́льника, патріа́рховъ че́сть, таи́нника богови́дцевъ и разумѣ́ній Христо́выхъ ума́ кра́йнѣйшаго, соше́дшеся, о богому́дріи, духо́вными похвала́ми да похва́лимъ, глаго́люще: ра́дуйся, богосло́вія исто́чниче, прему́дрости рѣко́ и струя́ боже́ственнаго ра́зума; ра́дуйся, звѣздо́ свѣтлѣ́йшая, я́ко ве́сь мíръ озаря́еши твои́ми догма́ты; ра́дуйся, благоче́стія побо́рниче вели́кій и нече́стія прогони́телю до́блественный. Но, о всему́дре богосло́ве Григо́ріе, не преста́й моля́ся Христу́ Бо́гу о и́же вѣ́рою и любо́вію соверша́ющихъ при́сно богоуго́дную и честну́ю па́мять твою́!

И ны́нѣ, [богоро́диченъ]:

Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Другíй сы́нъ гро́мовъ,* яви́лся еси́* отъ промышле́нія Бо́жія,* и богосло́въ, Григо́ріе, мíру,* и учени́къ, и напе́рсникъ.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Яко сія́ніе мо́лніи,* изы́де твое́ вѣща́ніе,* вѣ́рныя у́бо озаря́ющее,* еретики́ же низлага́ющее,* громо́вными стрѣла́ми.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

Умъ тво́й огнесія́ненъ,* пламеноно́сна уста́,* и́мже ерети́чествующихъ,* Григо́ріе, попаля́ются* безбо́жная уче́нія.

Сла́ва, гла́съ и подо́бенъ то́йже:

Тро́ицу Честну́ю,* Отца́, Сло́во, Ду́ха,* боже́ственный богосло́въ* научи́ вѣ́ровати,* Еди́наго Бо́га Нераздѣ́льнаго.

И ны́нѣ, [богоро́диченъ]:

Еди́наго Вседѣ́тельныя* Тро́ицы проповѣ́дуя,* изъ Дѣ́вы прозя́бшаго,* еретико́въ загражда́еши,* Григо́ріе, уста́.

Тропа́рь, гла́съ 1:

Па́стырская свирѣ́ль богосло́вія твоего́ ри́торовъ побѣди́ трубы́, я́коже бо глубины́ Ду́ха изыска́вшу, и добро́ты вѣща́нія приложи́шася тебѣ́. Но моли́ Христа́ Бо́га, о́тче Григо́ріе, спасти́ся душа́мъ на́шимъ.

Сла́ва, и ны́нѣ, богоро́диченъ:

Гавріи́лу вѣща́вшу [Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 1. Подо́бенъ: Всехва́льніи му́ченицы.

Отче Григо́ріе,* твои́хъ усте́нъ* ни хода́тай забве́нія гро́бъ затвори́:* богосло́вія бо яви́лся еси́ уста́,* благоче́стія догма́ты* и ны́нѣ вселе́ннѣй вѣща́я.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]

Отче Григо́ріе,* му́дрѣ пло́ти уклони́лся еси́* благопребыва́тельнаго и навѣ́тнаго,* на неботе́чную же всѣ́дъ* четвероко́нную добродѣ́телей колесни́цу,* впери́лся еси́* къ добро́тѣ неизрече́ннѣй.* Ея́же насыща́яся,* ны́нѣ подае́ши душа́мъ на́шимъ* ми́ръ и ве́лію ми́лость.

Отче Григо́ріе,* Бо́гу и человѣ́комъ* бы́лъ еси́ вѣ́ренъ хода́тай благода́тію,* и ны́нѣ благоми́лостивна* благодерзнове́нными моли́твами* положи́въ на́мъ Христа́,* не преста́й Го́спода моля́, преподо́бне,* дарова́ти душа́мъ на́шимъ* ми́ръ и ве́лію ми́лость.

Ины стихи́ры, гла́съ 2. Подо́бенъ: Кíими похва́льными.

Пріиди́те, свяще́нными пѣ́сньми да восхва́лимъ богоглаго́ливаго Григо́рія, о́ко благода́ти и всему́драя уста́ Ду́ха Свята́го, свѣ́тлаго свѣти́льника вселе́нныя, ве́ліе Це́ркве оглаше́ніе, сла́ву Правосла́вія, всечу́дную богосло́вія струю́, Боже́ственныхъ догма́товъ приснотеку́щую рѣку́, исто́чникъ, всегда́ кипя́щій нетлѣ́нія боже́ственныя во́ды. [Два́жды.]

Любо́вію духо́вною дне́сь да воспои́мъ іера́рха, апо́столовъ единонра́внаго и благоче́стія побо́рника, благоглаго́ланія наводне́ніе, пото́къ учи́тельства, зѣло́ сладча́йшій, слове́съ высокоглаго́льныхъ тве́рдость, небогро́мная уста́, огнеды́шущій язы́къ, прему́дрости сокро́вище, Сло́ва проповѣ́дника, вѣ́рныхъ удобре́ніе.

Пѣ́сньми до́лжными вси́ да восхва́лимъ богосло́ва, Христо́вы па́ствы стра́жа, ловца́ волко́въ и всему́драго пле́веловъ любодѣ́йчищныхъ исторга́теля, сѣ́ятеля же пра́выхъ догма́товъ всечу́днаго, отгони́теля ерети́чествующихъ зѣло́ крѣпча́йшаго, возрасти́вшаго же и́стинно бо́дростію боже́ственною Христо́вы тала́нты, я́коже лѣ́по, и мíръ просвѣти́вшаго уче́ній Боже́ственными свѣтлостьми́.

Сла́ва, гла́съ 8:

Бо́дрый язы́къ тво́й ко уче́нію, во ушесѣ́хъ серде́чныхъ возглаша́ющій, лѣни́выхъ ду́ши возставля́етъ, и боговѣща́нными глаго́лы лѣ́ствица обрѣта́ется, отъ земли́ къ Бо́гу возводя́щая. Тѣ́мже, Григо́ріе Богосло́ве, не преста́й моля́ся Христу́ отъ бѣ́дъ спасти́ ду́ши на́ша.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. И чте́нія.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. Та́же стихи́ры свята́го, гла́съ 4, самогла́сны. Анато́лія:

Сло́вомъ Бо́жіимъ отве́рзъ уста́ твоя́, прему́дрости привле́клъ еси́ Ду́ха и, по́лнъ благода́ти бы́въ, боже́ственная возгремѣ́лъ еси́ уче́нія, треблаже́нне Григо́ріе, и, а́нгельскимъ совоку́плься си́ламъ, Тро́ическій проповѣ́далъ еси́ Свѣ́тъ и Нераздѣ́льный. Тѣ́мже, твои́ми осія́вшеся богоглаго́ланіи, Тро́ицѣ покланя́емся, во Еди́номъ Божествѣ́ познава́емѣй, во спасе́ніе ду́шъ на́шихъ.

Огненнымъ язы́комъ твои́мъ богоглаго́ливымъ, Григо́ріе, богобо́рная попали́лъ еси́ ерети́чествующихъ языкобо́лія, боже́ственная я́ко и́стинно яви́лся еси́ уста́, Ду́хомъ возглаго́лавшая вели́чія Бо́жія и писа́ньми вообрази́вшая сокрове́ннотайныя Тро́ицы Единоси́льное Существо́, и, Трисо́лнечнымъ свѣ́томъ просвѣти́въ земны́й мíръ, мо́лишися непреста́нно о душа́хъ на́шихъ.

Сла́ва, гла́съ то́йже:

Боже́ственными дѣя́ньми тѣ́ло съ душе́ю зако́нно очи́стивъ, богосло́вія предѣ́лы проше́лъ еси́, боже́ственнымъ та́йнонаучая, богоявле́нне Григо́ріе, и, въ незаходи́мый вше́дъ мра́къ, богоначерта́нное прія́лъ еси́ законоположе́ніе, Единосу́щную напи́сану Тро́ицу. Ейже покланя́ющеся тобо́ю, воспѣва́юще, глаго́лемъ: въ Тро́ицѣ разумѣва́емая Еди́нице, поми́луй на́съ.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, богосло́вія исто́чниче и богозрѣ́нія высо́каго оби́тель: вы́шнюю бо глубину́, о́тче, съ благочести́вымъ по́мысломъ испыта́въ, всѣ́мъ уясни́лъ еси́ въ Тріе́хъ Со́лнцѣхъ Еди́но Свѣ́та бы́ти растворе́ніе, соединя́емое то́ждествомъ Божества́, тро́ичествуемое же честны́ми Ѵпоста́сьми, житія́ у́бо чистото́ю и слове́съ свѣ́тлостію чествова́ти науча́я Тро́ицу Всесвяту́ю, богодохнове́нне. Отъ Нея́же низпосла́тися душа́мъ на́шимъ моли́ ве́лію ми́лость.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Заре́ю богосло́вія твоего́ ересе́й темнонеи́стовство разруши́лъ еси́, исто́чникъ бо озаре́ній богочести́вымъ по́мысломъ, богосло́ве, предвари́въ и богому́дрымъ, свѣ́тлостемъ су́щимъ, отону́ду подава́емымъ, пріобщи́лся еси́. Просія́теленъ бо тво́й у́мъ, я́коже зерца́ло, содѣ́лавый, Тро́ичный Божества́, о́тче, Свѣ́тъ и Нераздѣ́льный прія́лъ еси́ свѣтлѣ́йшій, и Лучу́, бога́тно еди́нственную, вмѣсти́лъ еси́, Юже ны́нѣ умоли́ душа́мъ на́шимъ дарова́ти ве́лію ми́лость.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

Ра́дуйся, рѣко́ Бо́жія, я́же при́сно полна́ во́дъ благода́ти, вся́къ веселя́щая гра́дъ Царя́ Христа́ боже́ственными словесы́ и уче́ньми; сла́достный пото́къ, неисчерпа́емая пучи́на, догма́товъ извѣ́стный храни́тель зако́нный; теплѣ́йшій Тро́ицы побо́рникъ, орга́нъ Ду́ха Свята́го, у́мъ бо́дрый, благогла́сный язы́къ, глубину́ писа́ній сказу́ющій. Христа́ ны́нѣ моли́ душа́мъ на́шимъ дарова́ти ве́лію ми́лость.

Сла́ва, гла́съ 8:

Сердца́ вѣ́рныхъ земледѣ́лая язы́комъ твои́мъ, Григо́ріе, благоче́стія въ ни́хъ присноцвѣту́щія израсти́лъ еси́ плоды́ Бо́гу, терно́вныя е́реси посѣка́я изъ ко́рене и украша́я смы́слы чистото́ю. Тѣ́мже, пріе́мля на́ша похвалы́, боже́ственная цѣвни́це, бо́дрое о́ко, па́стырей па́стырь, волко́въ лове́цъ, моли́ся прилѣ́жно, богосло́ве, Сло́ву о душа́хъ на́шихъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь, гла́съ 1: Па́стырская свирѣ́ль... [пи́санъ на ма́лѣй вече́рни], два́жды. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ: Гавріи́лу вѣща́вшу...

По 1-й стихоло́гіи сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственное осія́ніе наслѣ́дствовавъ, житіе́ невеще́ственно изобучи́лъ еси́, единоиме́ннымъ свяще́нствомъ преизя́ществовавъ, преесте́ственно бо уясни́въ догма́ты, правосла́віемъ вѣ́ру утверди́лъ еси́, о́тче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва:

Сто́лпъ бы́лъ еси́ Це́ркве, бога́тство некра́домо благоче́стія яви́лся еси́, богосло́ве Григо́ріе, безстра́стіемъ уясни́въ житіе́ твое́ и Тро́ицы изъясни́въ догма́ты. Отче преподо́бне, Христа́ Бо́га моли́ дарова́ти на́мъ ве́лію ми́лость.

И ны́нѣ, богоро́диченъ:

Боже́ственная ски́нія была́ еси́ Сло́ва, еди́на Всечи́стая Дѣ́во Ма́ти, чистото́ю а́нгелы превозше́дшая. Па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Бо́дрствовавъ сло́вомъ и́стины, Тро́ическую держа́ву богосло́вивъ, Аріево злоче́стіе и пребеззако́нное злосла́віе низложи́въ, я́ко благоче́стія до́блественникъ и побо́рникъ, святи́телю, просвѣти́лъ еси́ во тмѣ́ невѣ́дѣнія сѣдя́щія. [Два́жды.]

Сла́ва, и ны́нѣ, богоро́диченъ:

Души́ моея́ стра́сти многоболѣ́зненныя и пло́ти моея́ неду́ги вско́рѣ исцѣли́, ума́ моего́ блуже́нія уста́ви, Всенепоро́чная, и въ тишинѣ́ помысло́въ моли́твы приноси́ти чи́сты Царю́ вся́ческихъ сподо́би, Богоро́дице, и испроси́ти прегрѣше́ній оставле́ніе.

По поліеле́и сѣда́ленъ, гла́съ 8. Подо́бенъ: Прему́дрости.

Облича́я ле́сть злочести́выхъ, писа́нія отверза́я боголѣ́пно, посла́лъ еси́ догма́ты, па́че ме́да наслажда́ющія вѣ́рныхъ сердца́, я́вѣ, досточу́дне, Тро́ицѣ служи́ти во еди́нствѣ Божества́. Тѣ́мже Спа́са о́бразъ на ико́нѣ предста́вилъ еси́ облобыза́ти имуществи́тельно человѣ́чество, богосло́ве Григо́ріе. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Егда́ пріи́детъ суди́ти всю́ зе́млю всѣ́хъ Влады́ка и Творе́цъ, овца́мъ мя́ сопричти́ десны́мъ, осужде́ннаго, и кромѣ́шнія тмы́, и вся́каго муче́нія твоего́ непотре́бнаго раба́ исхи́ти, молю́ся. Да благода́рно велича́ю бога́тство Твоея́ бла́гости, Богоро́дице Всенепоро́чная, и вопію́ Ти, ра́дуяся: моли́ся Христу́ Бо́гу, прегрѣше́ній оставле́ніе да́ти мнѣ́, Тебе́ бо и́мамъ наде́жду, ра́бъ Тво́й.

И чте́мъ отъ житія́ свята́го.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те вси́, живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Преподо́бне треблаже́нне, святѣ́йшій о́тче, па́стырю до́брый и Началопа́стыря Христа́ учениче́, положи́вый ду́шу за о́вцы, ты́ и ны́нѣ, всехва́льне богосло́ве Григо́ріе, проси́ моли́твами твои́ми дарова́ти на́мъ ве́лію ми́лость.

Кано́нъ Пресвяты́я Богоро́дицы со ирмосо́мъ на 6 и свята́го два́, на 8.

Кано́нъ Богоро́дицы, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пречи́стая Богоро́дице, вопло́щшееся Присносу́щное и Пребоже́ственное Сло́во па́че естества́ ро́ждшая, пое́мъ Тя́.

Гро́здъ Тя́ живоно́сенъ, всемíрнаго иска́пающь сла́дость спасе́нія, Дѣ́ва Христа́ роди́.

Ро́дъ Ада́мль, къ су́щему па́че ума́ блаже́нству Тобо́ю возведе́нный, Богоро́дице, досто́йно сла́витъ Тя́.

Та́же кано́нъ свята́го, его́же краегране́сіе: Богоглаго́ливаго Григо́рія приснопа́мятнаго пою́. Творе́ніе Ѳеофа́ново, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Богосло́ва втора́го, столпа́ Свѣ́та небе́снаго, му́дрости Бо́жія трубу́, пріиди́те, сего́ слове́съ рачи́теліе, любо́вію соше́дшеся, восхва́лимъ того́, я́ко богопроповѣ́дника.

Сло́во Отчее Безнача́льное, всѣ́хъ я́ко Бо́гъ промы́сленникъ, промысли́тельною си́лою тя́, блаже́нне, Це́ркви, я́коже ма́тери, сло́вомъ и му́дростію облагодати́въ тво́й у́мъ, да́ръ да́руетъ.

Умъ влады́ку творя́, стра́сти плотскія удержа́лъ еси́ и, вмѣсти́теленъ бы́въ Боже́ственныхъ озаре́ній, Еди́наго Бо́га въ Тріе́хъ Ли́цѣхъ просвѣти́лъ еси́ ны́ че́ствовати, Григо́ріе.

Богоро́диченъ: Бо́жія му́дрость хра́мъ Себѣ́ созда́, въ Твое́й всенепоро́чнѣй утро́бѣ всели́вшися, Благода́тная, и па́че ума́ Сему́ соедини́вшися по Ѵпоста́си, Чи́стая, яви́ся я́ко Человѣ́къ.

Инъ кано́нъ, творе́ніе Космы́ мона́ха, гла́съ то́йже.
Пѣ́снь 1.

Ирмо́съ: Похвалу́ богови́децъ Моисе́й Изра́илю предвозглаша́етъ, начина́етъ же Маріа́мъ прему́дрымъ жена́мъ пѣ́снь побѣ́дную: Изба́вителю Бо́гу вси́ воспои́мъ.

Изба́ву началоро́днаго, о на́шихъ же страсте́хъ кро́вь Богото́чную, ста́лъ еси́, въ же́ртву принося́, и ны́нѣ вѣ́рнымъ, Григо́ріе всему́дре, Бо́га пода́ждь на́мъ удобопримири́тельна.

Скрижа́ли богоначерта́нныя, во мра́къ Мои́сей вше́дъ, прія́тъ нѣ́когда, ты́ же, во умѣ́ поста́вивъ богопрія́тную трапе́зу, прилѣ́жно Бо́га умоли́лъ еси́.

Богоро́диченъ: Хотя́ за благоутро́біе Свое́ отъ сме́рти и тли́ па́ки воззва́ти естество́ человѣ́ческое, Пребоже́ственный, Дѣ́во Всенепоро́чная, въ чи́стую утро́бу Твою́ всели́ся.

Катава́сія: Су́шу глубороди́тельную зе́млю...

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Да́ждь на́мъ по́мощь Твои́ми моли́твами, Всечи́стая, прило́ги отража́ющи лю́тыхъ обстоя́ній.

Евы прама́тере Ты́ исправле́ніе была́ еси́, Нача́льника жи́зни, мíру Христа́, Богоро́дице, ро́ждши.

Препоя́ши мя́ си́лою, Всечи́стая, Яже и́стинно Бо́га ро́ждши пло́тію, Отчую Ѵпоста́сную Си́лу.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Имѣ́я прему́дрости исто́чникъ, непреста́нно источа́ющь твои́хъ всему́дрыхъ уче́ній, Христо́ву Це́рковь, всеблаже́нне, испо́лнилъ еси́, надъ всѣ́ми вопію́щую Бо́гу: свя́тъ еси́, Го́споди.

Благоче́стія велегла́сенъ проповѣ́дникъ и благознамени́тъ богосло́вія богосло́въ, сокро́вище боговидѣ́нія оби́льно предлага́ется и раздае́тъ бога́тно на́мъ бога́тство неотъе́млемо.

Ри́торъ огнедухнове́нный, боговѣща́нная цѣвни́ца благода́ти, богосло́внымъ вдохнове́ніемъ и вѣща́ніемъ богодухо́внымъ благознамени́тѣ возшумѣ́въ, Тріѵпоста́снаго Существа́ на́мъ пѣ́снь воспѣ́.

Богоро́диченъ: Богороди́тельнице, Цари́це всея́ тва́ри, Царя́ вся́ческихъ моля́щи не преста́й, Христа́, Его́же на́мъ родила́ еси́ на спасе́ніе су́щихъ на земли́, спасти́ пою́щія Тя́.

Инъ.

Ирмо́съ: Пре́жде зача́тія честна́го Саму́ила несомнѣ́нно Бо́гу обѣща́вши священнома́ти Анна, ны́нѣ ра́дующися, пое́тъ съ на́ми: утверди́ся въ Го́сподѣ се́рдце мое́.

Иже пре́жде изы́тія изъ утро́бы ро́ждшей тя́ бы́лъ еси́ предвозвѣще́нъ, преподо́бне о́тче, пронарече́ніе нося́ досто́йное, священнонача́льниче прему́дре. Вседу́шно, — ра́дуйся, о́тче, — тебѣ́ зове́мъ.

Иже пре́жде да́же изво́лити лука́вая, супру́жницу и споспѣ́шницу избра́лъ еси́ изъявле́ньми боже́ственными — богови́дную чистоту́ и цѣлому́дріе, побо́рниче вѣ́рныхъ. Веселя́щеся, — ра́дуйся, о́тче, — тебѣ́ зове́мъ.

Богоро́диченъ: Евы прама́тере испра́вила еси́ пре́жде бы́вшее поползнове́ніе, пріе́мши въ Себѣ́ низве́рженныя восправля́ющее Сло́во Отчее непобѣди́мою си́лою, Ма́ти Дѣ́во.

Катава́сія: Утвержде́ніе на Тя́ надѣ́ющихся...

Сѣда́ленъ, гла́съ 8. Подо́бенъ: Прему́дрости.

Отве́рзъ уста́ сло́вомъ Бо́жіимъ, отры́гнулъ еси́ прему́дрость, проповѣ́дниче Свѣ́та, и мудрова́ніе Боже́ственное вселе́ннѣй всѣ́ялъ еси́, отце́въ вои́стинну утверди́лъ еси́ догма́ты, по Па́влу яви́лся еси́ вѣ́ры побо́рникъ. Тѣ́мъ и а́нгеловъ сограждани́нъ еси́ и си́хъ собесѣ́дникъ яви́вся, блаже́нне, богосло́ве Григо́ріе, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Помышле́ньми попо́лзся лука́выми, во глубину́ впадо́хъ грѣхо́вную и, стеня́, зову́ Ти́ отъ се́рдца, Всечи́стая: на мнѣ́ удиви́ бога́тую ми́лость, и Твоего́ благоутро́бія безмѣ́рную пучи́ну, и щедро́тъ Твои́хъ неисчи́сленное бога́тство и да́ждь ми́ покая́ніе и прегрѣше́ній проще́ніе, да любо́вію зову́ Тебѣ́: моли́ Христа́ Бо́га прегрѣше́ній оставле́ніе дарова́ти мнѣ́, Тя́ бо наде́жду имѣ́ю, ра́бъ Тво́й.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Кла́съ возрасти́вшая животво́рный, неора́нная ни́во, Подаю́щаго мíру жи́знь, Богоро́дице, спаса́й пою́щія Тя́.

Богоро́дицу Тя́, Всечи́стая, просвѣ́щшіися вси́, зна́емъ: Со́лнце бо пра́вды родила́ еси́, Приснодѣ́во.

Очище́ніе на́мъ да́руй на́шихъ невѣ́дѣніи, я́ко Безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Таи́нникъ Тро́ицы бы́въ, Сея́ просвѣти́лъ еси́ вселе́нную ра́зумомъ, му́дре, догма́товъ лучи́ изблиста́я, преподо́бне, твоего́ извѣ́стнаго учи́тельства, ему́же поуча́ющеся при́сно, вси́ благоче́стно восхваля́емъ тя́.

Утро благоче́стія свѣ́тлое, зарю́ трисо́лнечную въ себе́ пріе́мъ, возсія́лъ еси́, и но́щь мра́чную злочести́выхъ ересе́й заре́ю твои́хъ догма́товъ му́дрыхъ отгна́лъ еси́, и ду́ши, о́тче, вѣ́рныхъ уясни́лъ еси́.

Умъ Пресу́щный, исто́чникъ Сло́ва и Ду́ха, изъ Присносу́щнаго богосло́внымъ гро́момъ, всеблаже́нне, богосло́вствуя, благоче́стно научи́лъ еси́, сему́ отъ Него́ науча́емь, я́ко предочи́стивъ тво́й у́мъ вѣ́щныхъ, о́тче, прія́тій.

Возше́лъ еси́ на го́ру добродѣ́телей, отъ до́льныхъ пресели́вся и ме́ртвыхъ дѣ́лъ отступи́въ, и скрижа́ли, руко́ю Бо́жіею напи́санныя, догма́ты твоего́ чи́стаго богосло́вія прія́лъ еси́, тайноводи́телю Боже́ственныхъ та́инствъ, Григо́ріе.

Богоро́диченъ: Ра́зумомъ па́дшаго Ада́ма возста́вила еси́, Всенепоро́чная, Ѵпоста́сную ро́ждши Жи́знь изъ ложе́снъ дѣви́ческихъ, очище́нныхъ Ду́хомъ, и къ безстра́стнѣй, и боже́ственнѣйшей, и нетлѣ́ннѣй пи́щи сего́ возвела́ еси́, Влады́чице.

Инъ.

Ирмо́съ: Съ чу́днымъ ста́въ Авваку́момъ на Боже́ственнѣй твое́й стра́жи, Григо́ріе, и Су́щаго на ра́мѣхъ херуви́мскихъ позна́въ, всемíрнаго бы́лъ еси́ возвѣсти́тель спасе́нія, при́сно зовы́й: сла́ва си́лѣ Твое́й, Го́споди.

Бли́зъ явля́ющимся и предъ Бо́гомъ стоя́щимъ чинонача́ліемъ подо́бяся, всему́дре, я́же вы́шше тѣ́хъ умо́мъ облета́я, во глубину́ же не дости́глъ еси́ превысоча́йшее стоя́ніе, отто́лѣ бога́тство нося́ человѣ́комъ неотъе́млемое.

Въ непостижи́мый вше́дъ мра́къ и, я́ко изъ пеще́ры ка́менны, узрѣ́въ за́дняя, срастворе́нное веще́ственное Невеще́ственному Естеству́, и несли́тнаго смѣше́нія бы́лъ еси́ сказа́тель, Христо́въ уго́дникъ, Того́ рабо́мъ Его́ умоля́етъ бы́ти ми́лостива.

Богоро́диченъ: Гора́ показа́лася еси́ Ты́ мы́сленная, отъ нея́же отсѣче́ся неизрече́нно честны́й Ка́мень, истня́я мра́чныя пре́лести о́бразъ и просвѣще́ніемъ благода́ти озаря́я вѣ́рою при́сно вопію́щія: сла́ва си́лѣ Твое́й, Го́споди.

Катава́сія: Покры́ла е́сть небеса́...

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Утоли́ нестерпи́мую бу́рю страсте́й мои́хъ, Яже Бо́га Ро́ждшая, Ко́рмчію и Го́спода.

Слу́жатъ Рождеству́ Твоему́, Пречи́стая Богоро́дице, а́нгельстіи чи́ни и человѣ́ковъ собо́ри.

Марíе Богоро́дице Безневѣ́стная, упова́нія враго́въ осуети́, а пою́щія Тя́ возвесели́.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Глаго́лъ твои́хъ Боже́ственное вѣща́ніе и догма́товъ благода́ть Боже́ственная, я́ко ско́рость мо́лніи, всю́ обтече́ зе́млю, Тро́ицѣ во Еди́ницѣ, Еди́ницѣ въ Тро́ицѣ, покланя́тися, богосло́ве, богосло́вствуя и науча́я на́съ.

Возжела́лъ еси́ и́стинно му́дрости Бо́жія, и слове́съ добро́ту возлюби́лъ еси́, и всѣ́хъ предпочти́лъ еси́ кра́сныхъ, су́щихъ на земли́, тѣ́мже тя́ вѣнце́мъ, всеблаже́нне, дарова́ній благолѣ́пно украси́ и богосло́ва содѣ́ла.

Разу́мно ты́ Су́щаго, я́ко дре́вле Моисе́й, ви́дѣти, богоглаго́ливе, вожделѣ́лъ еси́, и Сего́ за́дняя, ка́менемъ покры́вся, ви́дѣти сподо́бился еси́, и пучи́ны научи́лся еси́ Боже́ственныя му́дрости, непости́жно явля́емыя.

Богоро́диченъ: Иже дре́вле Еву, прама́терь Твою́, Созда́вый изъ Тебе́ зи́ждется, тоя́ осужде́ніе и преслуша́ніе я́вѣ исцѣля́я и разрѣша́я, я́ко Ще́дръ и Влады́ка всѣ́хъ, Богороди́тельнице Ма́ти Дѣ́во.

Инъ.

Ирмо́съ: Угль горя́щій, и́же Иса́іинымъ устно́мъ серафи́мъ приложи́ нѣ́когда, клеще́ю взе́мъ и приложе́нъ: о́нъ же, очище́нъ, — пра́вдѣ научи́теся, — всѣ́мъ проповѣ́даше.

Всему́ огню́ боговидѣ́нія, всеблаже́нне Григо́ріе, присту́пль, чистото́ю ума́ же и души́, несы́тнѣ самору́чно Трисія́нный поче́рплъ еси́ Свѣ́тъ Равнови́дный.

Заря́ми объя́тъ Трисо́лнечнаго озаре́нія, отъ облиста́нія же разжже́нъ и Боже́ственными луча́ми у́мъ освѣща́я, и противосія́тельныя лучи́ всѣ́мъ изблиста́лъ еси́.

Богоро́диченъ: Свѣ́тъ отъ Свѣ́та, Отчее Единоро́дное Сло́во Безнача́льное пріе́мши, Ма́ти Дѣ́во, две́рь Свѣ́та я́вѣ была́ еси́, пра́вды Со́лнце всѣ́мъ возсія́вши.

Катава́сія: Яко ви́дѣ Иса́ія...

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Хра́мъ Тя́ Бо́жій, и ковче́гъ, и черто́гъ одушевле́нный, и две́рь небе́сную, Богоро́дице, вѣ́рніи, возвѣща́емъ.

Идоловъ разруши́тель я́ко Бо́гъ, бы́вшее Рождество́ Твое́, Марíе Богоневѣ́сто, покланя́емо е́сть со Отце́мъ и Ду́хомъ.

Сло́во Бо́жіе Тя́ земны́мъ, Богоро́дице, показа́ небе́сную лѣ́ствицу: Тобо́ю бо къ на́мъ сни́де.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Струя́ми му́дрыхъ уче́ній твои́хъ, всему́дре, Аріевъ у́мъ му́тнѣйшій изсуши́лъ еси́, въ тишинѣ́ храня́ па́ству твою́ непотопле́нну, я́коже слове́сный ковче́гъ, въ не́мже благоче́стія сѣ́мена положи́лъ еси́ добро́тою слове́съ твои́хъ.

Да Честны́я Тро́ицы осія́ніемъ обогати́ши у́мъ, о́тче, уясни́лъ еси́, я́коже нескве́рное и новоочище́нное зерца́ло, воздержа́ніемъ изря́днымъ содѣ́лавъ. Тѣ́мже и богови́днѣйшій показа́лся еси́ Боже́ственными явле́ньми.

Ве́сь сраствори́вся заре́ю Ду́ха, бы́лъ еси́ свѣти́льникъ, о́тче, всесвѣ́телъ, свѣ́тлостію твои́хъ слове́съ просвѣща́яй концы́ и богосло́вія чистото́ю украша́яй кра́сное торжество́ вѣ́рныхъ, богосло́ве Григо́ріе.

Но́въ Самуи́лъ богода́ненъ яви́лся еси́, да́нъ Бо́гу, и пре́жде зача́тія, всеблаже́нне, цѣлому́дріемъ и чистото́ю украша́емь и свяще́нства всесвято́ю оде́ждею, о́тче, удобре́нъ, хода́тайствуя Зижди́телю и зда́нію.

Богоро́диченъ: Сви́токъ чи́стъ, Сло́во пріе́мый напи́санное, пре́жде неопи́санное, Божество́мъ, предзна́лася еси́ проро́ки и пе́рвѣе, Ма́ти Дѣ́во, Марíе Богоневѣ́сто: Ты́ бо Неодержи́маго во утро́бѣ Твое́й несказа́нно вмѣсти́ла еси́.

Инъ.

Ирмо́съ: Иже въ по́нтѣ подъе́мый заключе́ніе убѣжа́ніемъ бу́ри и верже́ніемъ жре́бія и усты́ я́тъ бы́въ морска́го звѣ́ря, невреди́мь пребы́въ, но вопія́ше Іо́на: къ Тебѣ́ живо́тъ мо́й да взы́детъ, Христе́.

Потопле́нъ ра́зумомъ не бы́въ, и до дна́ испыта́въ глубины́ Бо́жія, и отто́лѣ би́серъ поче́рпъ ты́ Влады́цѣ, и молча́ніе, я́коже сло́во, Григо́ріе, положи́лъ еси́ всеизря́днѣйше.

Моли́твою чи́стою сверѣ́пѣющееся ути́шилъ еси́ мо́ре и, стра́нныхъ оплева́въ слове́съ слати́ну, ты́ Влады́цѣ, я́ко небе́сная ка́пля, лю́ди вѣ́рныя испра́вилъ еси́, Григо́ріе.

Богоро́диченъ: Непости́жное человѣ́ческими по́мыслы та́инство, Ма́ти Бо́жія, неизрече́ннаго и стра́шнаго рожде́нія Твоего́: Ты́ бо, Дѣ́во, всѣ́хъ Творца́ ро́ждши, Дѣ́ва пребыла́ еси́.

Катава́сія: Возопи́ къ Тебѣ́...

Конда́къ, гла́съ 3. Подо́бенъ: Дѣ́ва дне́сь.

Богосло́внымъ язы́комъ твои́мъ сплете́нія ри́торская разруши́вый, сла́вне, правосла́вія оде́ждею, свы́ше истка́нною, Це́рковь украси́лъ еси́, ю́же и нося́щи, съ на́ми зове́тъ, твои́ми ча́ды: ра́дуйся, о́тче, богосло́вія у́ме кра́йнѣйшій.

Икосъ:

Отъ богосло́вныя и высо́кія му́дрости твоея́ испо́лни мо́й у́мъ, убо́гій и стра́стный, я́ко да воспою́ житіе́ твое́, о́тче: не могу́ бо сло́ва принести́ тебѣ́, а́ще не ты́ пода́си ми́ крѣ́пость сло́ва, и ра́зумъ, и му́дрость, я́ко да отъ твои́хъ твоя́ принесу́ тебѣ́, и отъ бога́тства добродѣ́телей твои́хъ отту́ду обря́щу вину́, и увѣнча́ю честну́ю и святу́ю твою́ главу́, съ вѣ́рными взыва́я: ра́дуйся, о́тче, богосло́вія у́ме кра́йнѣйшій.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Изъ дѣ́вственныхъ ложе́снъ воплоти́вся, яви́лся еси́ на спасе́ніе на́ше. Тѣ́мже Твою́ Ма́терь вѣ́дяще Богоро́дицу, правосла́вно зове́мъ: отце́въ на́шихъ Бо́же, благослове́нъ еси́.

Же́злъ прорасти́ла еси́, Дѣ́во, отъ ко́рене Іессе́ева, Всеблаже́нная, пло́дъ цвѣтонося́щій спаси́тельный вѣ́рою Сы́ну Твоему́ зову́щимъ: отце́въ на́шихъ Бо́же, благослове́нъ еси́.

Прему́дрости испо́лни вся́ и си́лы Боже́ственныя, Ѵпоста́сная му́дросте Высоча́йшаго, Богоро́дицею, вѣ́рою Тебѣ́ пою́щихъ: отце́въ на́шихъ Бо́же, благослове́нъ еси́.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Все́ жела́ніе и сла́дость я́вѣ сло́во твое́, все́, Григо́ріе, по́лно весе́лія и свѣ́тлости, благоуха́нія насыща́я вѣ́рою пою́щія: отце́въ Бо́же, благослове́нъ еси́.

Умо́мъ просвѣще́ннымъ Исто́чника просвѣще́ній дости́глъ еси́ и, отону́дными мо́лніями распаля́емь, опали́лъ еси́ Евно́міево языкобо́ліе, Тро́ицѣ вопія́: отце́въ Бо́же, благослове́нъ еси́.

Отве́рзъ хля́би бе́здны му́дрыхъ догма́товъ твои́хъ, заусти́въ же исто́чника му́дрости, покры́лъ еси́ пре́лести началовожди́, облиста́емь вѣ́чнымъ Свѣ́томъ и Трисо́лнечнымъ.

Богоро́диченъ: Яко до́ждь на руно́, низше́дъ, въ Твою́ всели́ся утро́бу ми́ра рѣка́, исто́чникъ бла́гости, Иже ка́пли дожде́вныя исчита́я, отце́въ Бо́же, благослове́нъ еси́.

Инъ.

Ирмо́съ: Проидо́ша, я́ко черто́гъ, пе́щный пла́мень нестерпи́мый и́же за благоче́стіе иногда́ о́троцы святíи, показа́вшеся я́вѣ, и, согла́сно воспѣва́юще, пѣ́снь поя́ху: отце́въ Бо́же, благослове́нъ еси́.

Непра́ведныхъ иге́моновъ предъ суди́щами ста́въ, Григо́ріе, ерети́чествующихъ огня́ лютѣ́е ды́шущая стремле́нія благоче́стіемъ соже́глъ еси́, Тро́ицѣ вопія́: отце́въ Бо́же, благослове́нъ еси́.

Тро́ицу Всесвяту́ю — догма́товъ благочести́выхъ, Григо́ріе, нему́тный Исто́чникъ, отъ усте́нъ излія́вый на зе́млю, цвѣтоно́сну, жесто́кую напая́я, показа́лъ еси́: отце́въ Бо́же, благослове́нъ еси́.

Богоро́диченъ: Умерщвля́ется пра́отецъ, я́ко безвре́меннѣ са́да вкуси́вый; Ты́ же безконе́чную Жи́знь, о Дѣ́во, прозя́бшая, въ раи́ сего́ обита́ти возста́вила еси́, Богороди́тельнице Чи́стая Благослове́нная.

Катава́сія: Тебе́, во огни́ ороси́вшаго...

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Проти́вныхъ льсти́тельныя и пла́менныя на на́съ угаси́ стрѣ́лы, я́ко да пое́мъ Тя́, Чи́стая, во вѣ́ки.

Преесте́ственнѣ Содѣ́теля и Спа́са, Бо́га Сло́ва родила́ еси́, Дѣ́во, тѣ́мже Тя́ пое́мъ и превозно́симъ во вся́ вѣ́ки.

Просвѣти́тельную Тя́ и златоза́рную все́льшійся въ Тя́ Свѣ́тъ непристу́пный, Дѣ́во, показа́ свѣщу́ во вся́ вѣ́ки.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Ра́вно Отцу́ Сло́во и Ду́хъ бла́гостію и ца́рствомъ, благочести́во научи́лъ еси́, су́щественно и есте́ственно то́ждество зна́я и едине́ніе. Тѣ́мже вопіе́ши, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Сла́вы а́нгельскія удосто́ился еси́, я́ко бо а́нгелъ, просія́лъ еси́ мíру, Тро́ицѣ, всему́дре, очи́стивъ прилѣ́жно ду́шу же, и тѣ́ло, и мы́сль. Ейже ны́нѣ воспѣва́еши, веселя́ся: да благослови́тъ тва́рь вся́ Го́спода и превозно́ситъ во вся́ вѣ́ки.

Ми́лостива моли́твами твои́ми Влады́ку содѣ́лавъ, испроси́, о́тче, прегрѣше́ній оставле́ніе вѣ́рою свяще́нную и всепра́зднственную твою́ па́мять пра́зднующимъ. Въ не́йже, веселя́щеся, воспѣва́емъ: да благослови́тъ тва́рь вся́ Го́спода и превозно́ситъ во вся́ вѣ́ки.

Таи́нникъ Тріѵпоста́снаго Единонача́лія и Божества́, су́щаго въ Тро́ицѣ, добродѣ́телей обуче́ньми бы́въ, Тро́ическій богосло́въ показа́лся еси́, всеблаже́нне. И ны́нѣ воспѣва́еши, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Иже арха́нгельскими пѣсносло́віи сла́вимое бога́тное Сло́во на́съ ра́ди обнища́, Тя́ Ма́терь, добро́ту Іа́ковлю благослове́нную, избра́въ. Тѣ́мже, воспѣва́юще, пое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ.

Ирмо́съ: Иже пи́щею не оскверни́вшіися о́троцы ца́рскія трапе́зы, во о́гнь, ра́дующеся, внидо́ша нѣ́когда и, въ пла́мени ороша́еми, усе́рдно поя́ху: благослови́те, дѣла́ Госпо́дня, Го́спода.

Вавило́нскаго, о́тче, пла́мене превозвы́сився и па́че того́ благоче́стіемъ распали́вся, Тро́ическій неботаи́нникъ показа́вся и проповѣ́дникъ, вопіе́ши: благослови́те, дѣла́ Госпо́дня, Го́спода.

Напа́стныя разли́чнѣ, о́тче, и желѣ́зныя пе́щи о́гнь угаша́я, удо́бно напа́стей произше́дъ, къ небеси́ возлетѣ́лъ еси́, вопія́: благослови́те, вся́ дѣла́ Госпо́дня, Го́спода.

Богоро́диченъ: Златови́дный свѣти́льникъ Твое́ знамени́тельнѣ явля́ше Боже́ственное Рождество́, Непоро́чная Чи́стая: Ты́ бо Свѣ́тъ непристу́пный мíрови возсія́ла еси́, Ему́же вопіе́мъ: по́йте, вся́ дѣла́ Госпо́дня, Го́спода.

Катава́сія: Нестерпи́мому огню́...

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ра́дости и весе́лія полна́ е́сть па́мять Твоя́ приступа́ющимъ, исцѣле́нія точа́щи, и благоче́стно Богоро́дицу Тя́ возвѣща́ющимъ.

Псалмы́ Тя́ воспѣва́емъ, Обра́дованная, и немо́лчно, — е́же ра́дуйся! — зове́мъ: Ты́ бо источи́ла еси́ всѣ́мъ ра́дость.

Красе́нъ, Богоро́дице, прорасте́ Пло́дъ Тво́й, не тли́ причаща́ющимся хода́тайственъ, но жи́зни, вѣ́рою Тя́ велича́ющимъ.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Дае́тъ тебѣ́ жи́знь нетлѣ́нную Нача́льная Тро́ица, Юже богосло́вилъ еси́, пріе́мши, Ея́ ра́ди по́двиги твоя́, и уче́нія, и боре́нія, Ейже ны́нѣ, о́тче, предстои́ши, о мíрѣ моли́твенникъ изя́щнѣйшій.

Заре́ю Трисія́нныя свѣ́тлости, отъ Еди́наго происходя́щею Божества́, осія́емь, священнотаи́нниче Григо́ріе, пою́щія тя́ вѣ́рою спаса́й и твои́хъ догма́товъ богосло́віемъ свѣтово́ждствуй.

Тече́ніе до́брое соверши́лъ еси́, за Нача́льную Тро́ицу подвиза́вся, и обоже́ніе я́ко богосло́въ получи́лъ еси́, и боже́ственнаго твоего́ жела́нія исполне́ніе прія́лъ еси́ досто́йно, Це́рквей благоукраше́ніе.

Богоро́диченъ: О, стра́шнаго Твоего́ чудесе́! Ты́ бо, Дѣ́во Богоро́дице, та́инство, пре́жде родо́въ и пре́жде вѣко́въ сокрове́нное въ Бо́зѣ, вся́ческая Созда́вшемъ, ро́ждши Бо́га Сло́ва, несказа́нно яви́ла еси́.

Инъ.

Ирмо́съ: Иже вы́шнюю глубину́ Боже́ственнаго непостиже́нія благоче́стно отве́рзъ, у́мъ, я́ко изъ ка́мене, необъя́тныя Богонача́льныя возвы́силъ еси́ Тро́ицы, всеблаже́нне о́тче, тя́ велича́емъ.

Иже худу́ю оде́жду зако́ннаго расто́ргъ писа́нія и, ю́же въ не́мъ, Боже́ственную добро́ту и та́инственную Боже́ственныхъ Ду́ха на́мъ истолкова́въ писа́ній, треблаже́нне о́тче, тя́ велича́емъ.

Го́рнимъ лико́мъ сочи́сленъ сы́й, преподо́бне о́тче, и́бо съ ни́ми во вѣ́ки водворя́ешися. О твое́й па́ствѣ мольбы́ твори́ къ Бо́гу, всеблаже́нне о́тче, тя́ велича́емъ.

Иже Боже́ственнымъ научи́вся отъ Боже́ственнаго и па́че ума́ вдохнове́нія, преподо́бне о́тче, и къ тѣ́хъ та́инственно соверши́вся ненауче́нному соедине́нію безмѣ́рнымъ твои́мъ жела́ніемъ, всеблаже́нне о́тче, тя́ велича́емъ.

Богоро́диченъ: Ты́ вмѣсти́лище, Чи́стая, Боже́ственнаго необъя́тія, вы́шше естества́ была́ еси́, я́ко Бо́гу пло́ть взаи́мствовавшая, и Твои́хъ дѣ́вственныхъ не разве́рзшему ложе́снъ, внегда́ ражда́ти безъ сѣ́мене, Тя́ велича́емъ.

Катава́сія: Въ зако́нѣ сѣ́ни и писа́ній...

Свѣти́ленъ. Подо́бенъ: Ду́хомъ во святи́лищи.

Ме́чь слове́съ твои́хъ и си́ла сего́ язы́ки отсѣче́ невѣ́рныхъ до конца́, я́ко ве́щь бо терно́вную, тѣ́хъ попали́лъ еси́ безбо́жная новосѣче́нія, Тро́ицѣ научи́лъ еси́ покланя́тися боголѣ́пно, Григо́ріе Богосло́ве.

Сла́ва. Подо́бенъ: Со ученики́.

Еди́ницѣ Тріѵпоста́снѣй и Тро́ицѣ соверше́ннѣй въ Еди́номъ Божествѣ́, всему́дре богосло́ве, научи́лъ еси́ покланя́тися: Свѣ́тъ, рекíй, Отца́ и Сы́на Свѣ́тъ, па́ки же Свѣ́тъ Ду́ха Свята́го. Но Еди́нъ Свѣ́тъ, Нераздѣ́ленъ, Неслія́ненъ, Еди́нъ бо Бо́гъ, уясня́яй Единосу́щное, о Григо́ріе блаже́нне!

И ны́нѣ, богоро́диченъ:

Съ Богома́терію и Дѣ́вою Марíею и Василíемъ, всему́дре, предстоя́й вели́кимъ, Непристу́пнѣй Тро́ицѣ, ми́ръ мíру, Благочести́вому же Импера́тору побѣ́ды и на́мъ спасе́ніе испроси́, ны́нѣ восхваля́ющимъ тя́, богосло́ве архіере́ю Григо́ріе, ри́торе церко́вный.

На хвали́техъ стихи́ры свята́го на 4, гла́съ 4. Подо́бенъ: Зва́нный свы́ше.

Пресѣ́къ пи́сьмене ты́ мра́къ,* вше́лъ еси́ ду́хомъ къ Свѣ́ту Высоча́йшему* и, отону́дное пріе́мъ свѣтолія́ніе,* богосло́віемъ вся́ обогати́лъ еси́,* Григо́ріе всему́дре,* Це́ркве свѣти́ло,* блиста́ньми же слове́съ твои́хъ* мра́чныя о́блаки ересе́й разгна́лъ еси́.* Тѣ́мже водворя́ешися, идѣ́же гла́съ пра́зднующихъ,* а́нгеломъ собесѣ́дникъ,* моля́ся непреста́нно,* е́же спасти́ся душа́мъ на́шимъ.

Богосло́въ вторы́й и таи́нникъ* Боже́ственнаго осія́нія,* и́же Тро́ицы свѣ́тлый прописа́тель,* и́же о неизрече́ннѣмъ и Боже́ственнѣмъ естествѣ́* преесте́ственно науча́я, Григо́ріе,* и ны́нѣ свѣтлѣ́е наслажда́яся Бо́га,* почита́ющихъ тя́ помина́й* и побо́рствуй о Це́ркви,* ю́же собра́лъ еси́:* твое́ бо вѣща́ніе* во вся́ вселе́нныя изы́де концы́,* науча́я сла́вити* Тро́ицу Единосу́щную.

Воздѣ́лавъ зе́млю язы́комъ, богоглаго́ливе,* се́рдца бразда́мъ сѣ́мя Боже́ственное,* богосло́віемъ обогати́лъ еси́ высоча́йшимъ* Це́ркве всю́ полноту́.* Тѣ́мже пле́велы огне́мъ Ду́ха* ерети́ческій попали́лъ еси́,* филосо́фіи боже́ственныя пита́емый раче́ніемъ,* о́тче отце́въ, и па́стырю па́стырей,* и сло́во вѣ́рныхъ,* свяще́нниковъ свѣти́льниче,* вселе́нныя сла́ва,* всеблаже́нне Григо́ріе.

Къ прему́дрости ча́ши прибли́живъ* честна́я твоя́ уста́, о́тче Григо́ріе,* богосло́вія поче́рплъ еси́ Боже́ственную во́ду* и вѣ́рнымъ оби́льно препода́лъ еси́,* ересе́й загради́лъ еси́ тече́ніе душегу́бное,* хуле́нія испо́лненное.* Ибо я́ко ко́рмчія тя́ обрѣ́те Ду́хъ Святы́й,* отрѣ́юща и отгоня́ща,* я́ко вѣ́тровъ дыха́нія,* злочести́выхъ стремле́нія,* во Еди́ницѣ существа́* Тро́ицу возвѣща́юща.

Сла́ва, гла́съ 1:

Цѣвни́цу Ду́ха, ересе́й побѣди́теля и правосла́вныхъ наслажде́ніе, втора́го напе́рсника Сло́ва, самови́дца догма́томъ бы́вшаго, му́драго пастыренача́льника, церко́вныя пито́мцы, богосло́вными пѣ́сньми приреце́мъ: ты́ еси́ па́стырь до́брый, да́вый тебе́ сама́го, Григо́ріе, я́ко Учи́тель Христо́съ за ны́, и съ Па́вломъ лику́еши и мо́лишися о душа́хъ на́шихъ.

И ны́нѣ, богоро́диченъ:

[Святѣ́йшая святы́хъ всѣ́хъ си́лъ, Честнѣ́йшая всея́ тва́ри, Богоро́дице, Влады́чице мíра, спаси́ ны, Спа́са ро́ждшая, отъ прегрѣше́ній тмори́чныхъ и бѣ́дъ, я́ко Блага́я, моли́твами Твои́ми.]

Славосло́віе вели́кое, [ектеніи́] и опту́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те вси́, живу́щіи по вселе́ннѣй. Апо́столъ къ Кори́нѳяномъ, зача́ло 151. Аллилу́ія, гла́съ 2: Внемли́те, лю́діе Мои́, зако́ну Моему́, приклони́те у́хо ва́ше во глаго́лы у́стъ Мои́хъ. [Сти́хъ: Отве́рзу въ при́тчахъ уста́ моя́, провѣща́ю гана́нія испе́рва.] Ева́нгеліе отъ Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся]. На трапе́зѣ утѣше́ніе бра́тіи. И чте́мъ житіе́ свята́го.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 269 об. – 272.

/ Къ оглавленію раздѣла /


Наверхъ / Къ титульной страницѣ

0