Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 25-й де́нь.
Слу́жба Пресвятѣ́й Богоро́дицѣ, соверша́емая въ де́нь пра́зднества свято́й чудотво́рной Ея́ ико́ны, имену́емой «Утоли́ моя́ печа́ли».

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 2:

Ино прибѣ́жище, Чи́стая, человѣ́цы къ Творцу́ и Влады́цѣ не стяжа́хомъ мы́, ра́звѣ Тебе́, Богоневѣ́сто. Не отве́ржи на́съ отъ Твоего́ заступле́нія, ниже́ посрами́ любо́вію прибѣга́ющихъ къ покро́ву Твоему́, Ма́ти Бо́га Вы́шняго, потщи́ся, покажи́ Твоея́ ми́лости бога́тство и ны́нѣ отъ страсте́й на́съ спаси́. [Три́жды.]

Стра́хъ многообра́зныхъ искуше́ній и ну́ждныхъ бу́ря ны́нѣ мя́ обурева́ютъ, и глубина́ потопля́етъ мя́ отча́янія, зима́ прегрѣше́ній мои́хъ лю́тѣ мя́ смуща́етъ, предвари́ и изба́ви мя́, обурева́ема, Еди́на вѣ́рнымъ Тишино́, и къ приста́нищу вы́шняго боже́ственнаго зва́нія возведи́. [Два́жды.]

Сла́ва, и ны́нѣ, [гла́съ то́йже]:

О, вели́каго та́инства! Ви́дя чудеса́, проповѣ́даю Божество́, Емману́илъ у́бо естества́ две́ри отве́рзе, я́ко Человѣколю́бецъ, дѣ́вства же затво́ры не разве́рзе, я́ко Бо́гъ, но та́ко изъ ложе́снъ про́йде, я́коже слу́хомъ вни́де, та́ко роди́ся, я́коже и зача́тся. Безстра́стно вни́де и неизрече́нно изы́де, по глаго́лющему проро́ку: та́ две́рь затворе́нна бу́детъ, и никто́же не про́йдетъ сквозѣ́ ея́, то́кмо Еди́нъ Госпо́дь Бо́гъ Изра́илевъ, имѣ́яй ве́лію ми́лость.

Вхо́дъ. Проки́менъ дне́ и чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Главы́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 2:

Злата́я кади́льнице, ру́чко, и же́зле, и свѣти́льниче свѣтоза́рный, сви́тче боже́ственный, въ не́мже пе́рстомъ Бо́жіимъ написа́ся Сло́во, спаси́ на́съ, Тебе́ велича́ющихъ.

Да́руй на́мъ по́мощь, Богоро́дице, на Тя́ надѣ́ющимся, вѣ́рнымъ прибѣ́жище. Изба́ви отъ бѣ́дъ рабы́ Твоя́, Дѣ́во, на Тя́ бо по Бо́зѣ упова́ніе возлага́емъ.

Влады́чице, Ма́ти Изба́вителя, пріими́ моле́ніе рабо́въ Твои́хъ, а́ще и недосто́йнѣ моля́щихся Тебѣ́, да мо́лишися за ны́ къ Ро́ждшемуся изъ Тебе́, Влады́чице мíра, бу́ди на́мъ Изба́вительница.

Сла́ва, и ны́нѣ, гла́съ 8:

Тя́ мо́лимъ, предста́тельницу на́шу, Пречи́стая Богоро́дице, одержи́ми печа́льми, не оста́ви до конца́ поги́бнути рабо́мъ Твои́мъ, но ускори́ изъя́ти на́съ отъ настоя́щія ско́рби и печа́ли. О, Пресвята́я Дѣ́во Чи́стая, Ты́ бо еси́ на́мъ по́мощь и стѣна́ необори́мая.

На стихо́внѣ стихи́ры, гла́съ 4:

Наста́вницу Тя́ заблу́ждшихъ и приста́нище спаси́тельно въ пучи́нѣ, Влады́чице, и въ бу́ри, во искуше́ніи же и печа́лѣхъ Христо́съ Тя́ всѣ́мъ показа́, Сы́нъ Тво́й и Бо́гъ, вѣ́рно приходя́щимъ къ Тебѣ́, Его́же моли́ отъ злы́хъ бѣ́дъ изба́витися вѣ́дущимъ Тя́, Богоро́дице, вои́стинну наста́вницу.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Тлѣ́ніе потреби́ла еси́, Всепѣ́тая, и болѣ́знь дре́внюю всю́ рождество́мъ Твои́мъ, Живо́тъ мíру ро́ждши, сме́рть разруши́вшій. Болѣ́зни же, я́ко Блага́я, исцѣля́еши вѣ́рно Тво́й чуде́сный о́бразъ почита́ющихъ, и любо́вію кла́няющихся, и чту́щихъ Тя́, Чи́стую наста́вницу.

Сти́хъ: Слы́ши, Дщи́, и ви́ждь, и приклони́ у́хо Твое́.

Яко исто́чника Тя́ живота́, Всепѣ́тая, вѣ́дуще и я́ко чуде́съ и цѣле́бъ пода́тельницу, страсте́й душе́вныхъ же и тѣле́сныхъ ско́рое потребле́ніе, ми́лости и щедро́тъ неисчерпа́емое мо́ре, Тебѣ́ припа́даемъ вси́, прося́ще отъ ско́рби разрѣше́нія и бу́дущихъ муче́ній избавле́нія.

Сла́ва, и ны́нѣ, гла́съ 8:

Ра́дуйся, Благослове́нная Богоро́дице, Пречи́стая Ма́ти Христо́ва. Ра́дуйся, вѣ́рныхъ наде́ждо, ра́дуйся, мíра очище́ніе. Ра́дуйся, вся́кія ско́рби избавля́ющая рабы́ Твоя́, ра́дуйся, человѣ́комъ утѣше́ніе живоно́сное. Ра́дуйся, заступле́ніе призыва́ющихъ Тя́, Богоблагода́тная. Ра́дуйся, Бо́жіе пребыва́ніе и гора́ свята́я.

Тропа́рь, гла́съ 5:

Утоли́ болѣ́зни многовоздыха́ющія души́ моея́, утоли́вшая вся́ку слезу́ отъ лица́ земли́, Ты́ бо человѣ́комъ болѣ́зни отго́ниши и грѣ́шныхъ ско́рби разруша́еши, Тебе́ бо вси́ стяжа́хомъ наде́жду и утвержде́ніе, Пресвята́я Ма́ти Дѣ́во.


НА УТРЕНИ,
[На Бо́гъ Госпо́дь: Тропа́рь Богоро́дицы, два́жды. Сла́ва, и ны́нѣ, то́йже.]

По 1-й каѳи́смѣ сѣда́ленъ, гла́съ 5:

Пречи́стая Дѣ́во Богоро́дице, поми́луй на́съ, прибѣга́ющихъ съ вѣ́рою къ Тебѣ́, Милосе́рдой, и прося́щихъ те́плаго заступле́нія Твоего́, мо́жеши бо, я́ко Блага́я, всѣ́хъ спасти́ и, я́ко Ма́ти Бо́га Вы́шняго, ма́терними Твои́ми моли́твами всегда́ избавля́еши чту́щихъ Тя́ отъ всѣ́хъ бѣ́дъ и скорбе́й, Благослове́нная.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 1:

Правовѣ́рно чту́щія Тя́, и къ Тебѣ́ прибѣга́ющія, и ико́нѣ Твое́й святѣ́й любе́зно покланя́ющіяся, о Бо́жія Ма́ти, спаси́ и не да́ждь въ расхище́ніе супоста́томъ, ниже́ да на́йдутъ на ны́ вся́ зла́я, я́же грѣхи́ на́ша угото́ваша на́мъ, ниже́ беззако́нія на́ша да превзы́дутъ на главы́ на́ша, но да Твоя́ ма́терняя къ Бо́гу преодолѣ́етъ за ны́ богопрія́тная моли́тва.

Сла́ва, и ны́нѣ, то́йже.

Велича́ніе:

[Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.]

Псало́мъ [избра́нный]: Ве́лій Госпо́дь и хва́ленъ зѣло́...

По поліеле́и сѣда́ленъ, гла́съ 1:

Пречи́стая Твоя́ ико́на, Богоро́дице Дѣ́во, — врачевство́ всему́ мíру духо́вное, къ не́йже прибѣга́юще, лобыза́емъ, и почита́емъ, и покланя́емся, исцѣле́ній благода́ть почерпа́юще отъ нея́ и неду́гъ тѣле́сныхъ и душе́вныхъ страсте́й Твои́ми моли́твами свобожда́ющеся.

Сла́ва, и ны́нѣ, то́йже.

Степе́нна, 1-й антифо́нъ, 4-го гла́са. Проки́менъ, [гла́съ 4]: Помяну́ и́мя Твое́* [во вся́комъ ро́дѣ и ро́дѣ]. Сти́хъ: Слы́ши, Дщи́, [и ви́ждь, и приклони́ у́хо Твое́]. Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Пречи́стая Дѣ́во, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Кано́нъ [благода́ренъ Пресвятѣ́й Богоро́дицѣ со ирмосо́мъ на 6 и пра́здника, на 8.] Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Яже всѣ́мъ удо́бь послу́шная въ ско́рби и въ печа́ли помога́ющая, Богоро́дице Блага́я, благода́ть пода́ждь пѣ́ти Тя́ дерза́ющимъ, Влады́чице, скорбя́щихъ Ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя отъ напа́стей, убо́гаго раба́ Твоего́, скорбя́щихъ Ра́досте.

Отъ вра́гъ ви́димыхъ и неви́димыхъ изба́ви, мо́лимся, къ Тебѣ́ прибѣга́ющихъ, Богоро́дице, и разори́ вся́къ совѣ́тъ борю́щихъ на́съ.

Отыми́ поноше́ніе человѣ́ческое и клеветы́ навѣ́тникъ отъ мене́, Богоро́дице, молю́ Тя, да усе́рдно сла́влю Го́спода, Его́же пита́ла еси́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Враго́въ навѣ́ты разори́ су́етныя, Всепѣ́тая Богоро́дице, и не оскудѣ́й моли́твами Твои́ми, снабдя́щи на́съ, восхваля́ющихъ Тя́.

При́зри, Чи́стая, ми́лостивнымъ Твои́мъ о́комъ и изба́ви мя вся́каго навѣ́та ви́димыхъ и неви́димыхъ враго́въ, ослѣпи́вши зѣ́ницы оче́съ и́хъ.

Зло́е нападе́ніе враго́въ, я́ко о́гнь, паля́щее, и́щущихъ всегда́ погуби́ти на́съ, Дѣ́во, росо́ю моли́твъ Твои́хъ угаси́.

Неугаси́мая лампа́до, заря́ присносія́тельная, но́щію мя́ скорбе́й одержи́ма просвѣти́ моли́твами Твои́ми, ро́ждшая Со́лнце сла́вы — Христа́.

Конда́къ, гла́съ 6:

Предста́тельство христіа́нъ непосты́дное, хода́тайство ко Творцу́ непрело́жное, не пре́зри грѣ́шныхъ моле́ній гла́сы, но предвари́, я́ко Блага́я, на по́мощь на́съ, вѣ́рно зову́щихъ Ти́: ускори́ на моли́тву и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

Сѣда́ленъ, гласъ 2:

Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ изба́ви на́съ, Еди́на вско́рѣ предста́тельствующая.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

[Спасе́нія Тя́ мо́стъ,] моли́тву неусы́пну, заступле́ніе тве́рдо мо́лимъ: умилосе́рдися, и ви́ждь на́шу нестерпи́мую печа́ль, болѣ́зни, ско́рби, стра́сти, и благопремѣ́нно посѣти́, Ма́ти Бо́жія, ра́дость ско́рую подаю́щи.

Не неприча́стни есмы́, Влады́чице, Твоего́ заступле́нія въ ско́рбѣхъ, тѣ́мже и ны́нѣ на́мъ помози́ вско́рѣ, лю́тѣ обурева́емымъ, ру́ку простира́ющи, Чи́стая. Бу́ди ми́лостива болѣ́знемъ на́шимъ, Ма́ти Бо́жія, ра́дость ско́рую подаю́щи.

Не упова́ша, Влады́чице, на Тя́ беззако́ннующіи, но упова́ша на язы́къ [велерѣ́чивъ, на язы́къ] человѣ́чь, при́сно зави́стно излія́вшійся, непра́ведно пролія́ти кро́вь и́скренняго, рыка́юще, Ты́ же, Чи́стая, че́люсти и́хъ сокруши́.

Смири́, Влады́чице, враго́въ вознесе́нную вы́ю велерѣ́чующихъ, совѣ́ты, и злонра́вія, и сердца́, поуча́ющаяся злы́мъ, на мя́ по вся́ дни́, крѣ́пость же и побѣ́ду пода́ждь призыва́ющимъ Тя́, Ма́ти Бо́жія, ра́дость ско́рую подаю́щи.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тьмѣ́ заблу́ждшимъ, Богоразу́мія просвѣще́ніе да́руя.

Моли́твеннице нело́жная, упова́ніе христіа́нъ, Обра́дованная, пріими́ мольбы́ отъ на́съ, прилѣ́жно призыва́ющихъ и моля́щихся Тебѣ́.

Исто́чникъ Тя́ жи́зни су́щій, Чи́стая, безсме́ртія источа́ющій во́ды, земноро́дніи, позна́вше, ублажа́емъ.

Вооружи́ся на ны́ лука́вно вра́гъ, язы́комъ, я́коже мече́мъ, погуби́ти хотя́, но Твое́ю, Богороди́тельнице, крѣ́постію предвари́.

Пучи́ну, Чи́стая, заступле́ній кто́ изочте́тъ си́лы Твоея́? Тѣ́мже на́съ, су́щихъ въ ну́ждѣ, ско́ро предвари́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Цѣлому́дрія су́щи хода́таица, призыва́ющимъ Тя́ ны́нѣ яви́ся и отъ вся́кихъ изба́ви напа́стей и бѣ́дъ, Богоневѣ́сто.

Злодѣ́йства вра́жія разори́ и клеветы́ непра́ведныя уста́ви, Благослове́нная Пречи́стая, избавля́ющи непови́нныя отъ ско́рби.

Лю́тыми грѣхи́ окруже́ни и напа́стными бѣда́ми потопля́еми, подъ боже́ственный покро́въ Тво́й прибѣга́емъ, Ма́ти Христа́ Бо́га.

Неискусому́жно ро́ждши Го́спода, яви́ся по рождествѣ́ па́ки дѣ́вствующи. О, пресла́внаго чудесе́, въ Тебѣ́ содѣ́ланнаго, Богоневѣ́сто!

Конда́къ, гла́съ 6:

Не ввѣ́ри мя́ человѣ́ческому предста́тельству, Пресвята́я Влады́чице, но пріими́ моле́ніе раба́ Твоего́: ско́рбь бо обдержи́тъ мя́, терпѣ́ти не могу́ де́монскаго стрѣля́нія, покро́ва не и́мамъ, ниже́ гдѣ́ прибѣ́гну, окая́нный, всегда́ побѣжда́емь, и утѣше́нія не и́мамъ, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́ніе мое́, поле́зно сотвори́.

Икосъ:

Простри́ дла́ни Cвои́, и́миже всѣ́хъ Влады́ку я́ко младе́нца прія́ла еси́, [за мно́жество бла́гости]; не оста́ви на́съ, всегда́ надѣ́ющихся на Тя́, бо́дренною Твое́ю моли́твою и неисче́тною бла́гостію уще́дри на́съ, и пода́ждь душа́мъ на́шимъ милосе́рдіе Свое́, во вѣ́ки источа́ющи: Тебе́ бо и́мамы, грѣ́шніи, Засту́пницу отъ находя́щихъ на ны́ бѣ́дъ и зо́лъ. Но, я́ко иму́щи милосе́рдія щедро́ты, ускори́ на моли́тву, и потщи́ся на умоле́ніе, заступа́ющи при́сно, Богоро́дице, чту́щихъ Тя́.

Пѣ́снь 7.

Ирмо́съ: Да пресла́вное рождество́ Твое́, Христе́, е́же отъ Дѣ́вы, прообрази́ши я́вѣ, неопали́мы въ пещи́ о́троки сохрани́лъ еси́, пѣ́сньми пою́щія Тебѣ́: отце́въ Бо́же, благослове́нъ еси́.

О, благоутро́бія Твоего́, Дѣ́во Чи́стая! Рѣши́ши бо безмѣ́рныя печа́ли и напа́сти призыва́ющимъ въ ну́ждѣ и обстоя́ніи. Тѣ́мже и ны́нѣ помози́, Благослове́нная, Тя́ восхваля́ющимъ.

Покажи́ ско́рое твое́ заступле́ніе, покажи́, я́ко мо́жеши я́ко Ма́ти Бо́га, призыва́емъ Тя́ отъ се́рдца, со слеза́ми припа́дающе, ско́рбь укроти́ и болѣ́знь рабо́въ Твои́хъ вско́рѣ.

Уста́ человѣ́ковъ, я́ко льво́въ лю́тыхъ, гро́ба тяжча́йше отверзо́шася го́рько поглоти́ти мя́, но Ты́, Богоро́дице, яви́ся наде́жда ненадѣ́ющимся и низложи́ крѣ́пость и́хъ, Благослове́нная.

Да у́зрятъ врази́ и постыдя́тся, да уразумѣ́ютъ и ви́дятъ Твою́, е́же по на́мъ сопроти́въ борю́щую си́лу, и въ про́пасть преиспо́днюю низложи́ и́хъ, Благослове́нная, Наде́ждо ненадѣ́ющихся.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Прибѣ́жище на́ше и мíру ра́дованіе, Богороди́тельнице, умилосе́рдитися потщи́ся и спѣ́шно благода́ть Твою́ пода́ждь на́мъ, оскорбле́ннымъ, и заступи́, Блага́я, Твоя́ рабы́.

Совѣ́тъ су́етенъ совѣща́ша лю́тѣ на ны́ безбо́жныхъ со́нмища, я́коже пре́жде Ахитофе́лъ. Но вопіе́мъ: Твои́ми моли́твами се́й разори́, низло́жши си́хъ крѣ́пость, Богоро́дице.

Призыва́ющихъ Тя́, Богоро́дице, отъ души́ нело́жно во вся́кой ско́рби, и въ болѣ́знехъ разли́чныхъ, и бѣда́хъ лю́тыхъ спѣ́шно услы́ши, Влады́чице, си́хъ избавля́ющи при́сно моли́твами Твои́ми.

Да и́мя Твое́, Богоро́дице, на земли́ славосло́вится, Иже, изъ Тебе́ возсія́въ, грѣ́шникомъ держа́вную наде́жду и стѣ́ну Тя́ дарова́: Тобо́ю бо вся́кое дыха́ніе къ Бо́гу притека́етъ.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Да загради́тся вся́къ язы́къ, лука́вымъ поуча́яйся, да молча́тъ устна́ льсти́вая и уста́, непра́ведно глаго́лющая на пра́веднаго беззако́ніе, горды́нею и за́вистію вражде́бною вку́пѣ, Богоро́дицы моли́твою и святы́хъ Христо́выхъ.

Въ моли́твахъ бо́друю, Чи́стую Богоро́дицу призыва́емъ вси́, болѣ́знію и ско́рбію одержи́ми, взыва́юще: Влады́чице Чи́стая, ско́ро изба́ви отъ обдержа́щихъ болѣ́зней рабы́ Твоя́ при́сно, я́ко по Бо́зѣ Засту́пницы ины́я не и́мамы.

Отча́явшихся ве́ліе прибѣ́жище, обурева́емыхъ ти́хое приста́нище, Ты́ еси́, Богоро́дице. Тѣ́мже и мы́ притека́емъ, взыва́юще: да не постыди́мся, Ма́ти и́стиннаго Живота́, но да, благодаря́ще, усе́рдно Тя́ велича́емъ.

Пріими́, Отрокови́це Пречи́стая, боже́ственную пѣ́снь, воздава́ющи благода́ть на Тя́ надѣ́ющимся, и ми́ръ испроси́ Це́рквамъ при́сно посла́ти и Импера́тору на́шему одолѣ́нія и побѣ́ды, да христіа́нскій вся́къ язы́къ Тя́ велича́етъ.

Свѣти́ленъ:

Те́плое заступле́ніе въ бѣда́хъ, въ печа́лехъ утѣше́ніе, и къ Бо́гу примире́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Сла́ва, и ны́нѣ:

Тя Предста́тельницу и́мамы, грѣ́шніи, о Пресвята́я Дѣ́во, Ты́ ми́лостива къ на́мъ сотвори́ Сы́на Твоего́ и Бо́га на́шего ма́терними Твои́ми моли́твами.

На хвали́техъ стихи́ры [на 4], гла́съ 2:

Всѣ́мъ предста́тельствуеши, Блага́я, прибѣга́ющимъ съ вѣ́рою въ держа́вный Тво́й покро́въ, ино́го бо не и́мамы, грѣ́шніи, къ Бо́гу въ бѣда́хъ и ско́рбехъ при́сно избавле́нія, обремене́ни грѣхи́ мно́гими, Ма́ти Бо́га Вы́шняго. Тѣ́мже Ти́ припа́даемъ: изба́ви отъ вся́каго обстоя́нія рабы́ Твоя́.

Всѣ́хъ скорбя́щихъ ра́дость, и оби́димыхъ засту́пница, и а́лчущихъ пита́тельница, стра́нныхъ утѣше́ніе, обурева́емыхъ приста́нище, больны́хъ посѣще́ніе, немощны́хъ покро́въ и засту́пница, же́злъ ста́рости, Ма́ти Бо́га Вы́шняго, Ты́ еси́, Пречи́стая, потщи́ся, мо́лимся, спасти́ся рабо́мъ Твои́мъ.

Ра́дуйся, Пречи́стая Дѣ́во, ра́дуйся, честны́й ски́птре Царя́ Христа́; ра́дуйся, прозя́бшая Гро́здъ та́йный; ра́дуйся, две́ре небе́сная и неопали́мая купино́; ра́дуйся, всемíрный свѣ́те; ра́дуйся, всѣ́хъ ра́досте; ра́дуйся, вѣ́рныхъ спасе́ніе; ра́дуйся, Засту́пнице всѣ́хъ христіа́нъ и прибѣ́жище, Влады́чице.

Сла́ва, и ны́нѣ, гла́съ 8:

Ра́дуйся, вселе́нныя похвало́; ра́дуйся, хра́ме Госпо́день, ра́дуйся, горо́ пріосѣне́нная; ра́дуйся, всѣ́хъ прибѣ́жище, ра́дуйся, свѣ́щниче златы́й, ра́дуйся, сла́во правосла́вныхъ честна́я, ра́дуйся, Марíе, Ма́ти Христа́ Бо́га; ра́дуйся раю́, ра́дуйся, боже́ственная трапе́зо, ра́дуйся, сѣ́не, ра́дуйся, ру́чко всезлата́я, ра́дуйся, всѣ́хъ упова́ніе.

Славосло́віе вели́кое, [ектеніи́,] и отпу́стъ, и ча́съ 1-й.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, Апо́столъ, Ева́нгеліе и прича́стенъ Богоро́дицѣ о́бщій: [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Слу́жба Пресвятѣ́й Богоро́дицѣ, соверша́емая въ де́нь пра́зднества свято́й чудотво́рной Ея́ ико́ны, имену́емой: Утоли́ моя́ печа́ли. — СПб: Въ Сѵнода́льной Тѵпогра́фіи, 1860. — С. 1-19, 52-58.

/ Къ оглавленію раздѣла /


Наверхъ / Къ титульной страницѣ

0