Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 24-й де́нь.
Слу́жба святѣ́й, блаже́ннѣй во Христѣ́ Ксе́ніи, бездо́мнѣй стра́нницѣ Петро́ва гра́да.

Твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Внеза́пу твоему́ му́жу уме́ршу,* у́мре мірска́го житія́ жела́ніе въ тебѣ́,* всю́ себе́ Христу́ предала́ еси́,* я́ко лише́нная ра́зума* мíру явля́ющися,* и жи́зни вѣ́чныя взыска́ла еси́.

Бездо́мная и чужда́я мíру,* еди́но прибѣ́жище Христа́ взыска́ла еси́,* Ксе́ніе, Бо́гу и лю́дямъ бли́жняя,* ны́нѣ же во Ца́рствіи Христо́вѣ ра́дующися,* помяни́ твоя́ бли́жнія,* къ твоему́ предста́тельству прибѣга́ющія.

Сла́ва, и ны́нѣ, богоро́диченъ, самоподо́бенъ:

Небе́сныхъ чино́въ ра́дованіе,* на земли́ человѣ́ковъ крѣ́пкое предста́тельство,* Пречи́стая Дѣ́во,* спаси́ ны, и́же къ Тебѣ́ прибѣга́ющія,* я́ко на Тя́ упова́ніе* по Бо́зѣ, Богоро́дице, возложи́хомъ.

Та́же: Свѣ́те ти́хій... Проки́менъ дне́, и по Сподо́би Го́споди въ ве́черъ се́й...

На стихо́внѣ стихи́ры, гла́съ 6. Подо́бенъ: Тридне́венъ вокре́слъ еси́.

Чужда́я мíру, но су́щихъ въ не́мъ не чужда́ющаяся,* о лю́дехъ милосе́рдствующи,* юро́да слову́щи, му́дрости наставля́еши,* вся́ко терпя́щи, стра́ждущія цѣли́ши:* си́ла бо Христо́ва* въ твое́й не́мощи соверша́ется.

Сти́хъ: Госпо́дь храни́тъ прише́льцы,* си́ра и вдову́ пріи́метъ.

Земно́е бога́тство, Ксе́ніе, раздала́ еси́,* я́ко непра́ведное,* и до́ма кро́въ отве́ргла еси́,* ми́лостію Бо́жіею покрыва́ющися.* Стра́нствію Христо́ву ревну́ющи,* Ца́рствія Христо́ва дости́гла еси́.

Сти́хъ: Госпо́дь возво́дитъ низве́рженныя,* Госпо́дь лю́битъ пра́ведники.

Образъ терпѣ́нія и незло́бія, Ксе́ніе, яви́ла еси́,* юро́дство мíра обличи́вши.* Предста́тельство твое́ къ Бо́гу вѣ́мы:* помоли́ся за ны́ въ ну́ждхъ на́шихъ,* бездо́мныя же и оте́чествія лише́нныя,* Оте́чествія небе́снаго дости́гнути наста́ви.

Сла́ва, и ны́нѣ, богоро́диченъ, гла́съ и подо́бенъ то́йже:

Любы́ изся́че, умно́жишася беззако́нія,* я́коже предрече́ Госпо́дь:* отъ собла́зновъ душегу́бца врага́* огради́ на́съ, Богоро́дице,* и я́ко Роди́тельница Всевы́шняго,* вы́шнее заступле́ніе на́мъ испроси́.

Та́же: Ны́нѣ отпуща́еши... Трисвято́е, по Отче на́шъ...

Тропа́рь, гла́съ 4:

Суеты́ земна́го мíра отве́ргшися,* кре́стъ житія́ бездо́мнаго во стра́нничествѣ прія́ла еси́,* скорбе́й, лише́ній, людска́го осмѣя́нія не убоя́лася еси́,* любо́вь же Христо́ву позна́ла еси́,* е́юже ны́нѣ на небеси́ услажда́ешися,* Ксе́ніе блаже́нная, богому́драя,* моли́ся о спасе́ніи ду́шъ на́шихъ.

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Ектенія́ сугу́бая ма́лая, и отпу́стъ.



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

О, Ксе́ніе блаже́нная,* небе́сное Оте́чествіе возлюби́вши* на земли́ вои́стинну стра́нна пребыла́ еси́,* я́ко на странѣ́ чужде́й преходя́щи.* Ны́нѣ у́бо въ дому́ Отца́ Небе́снаго водворя́ющися* и стра́нствія Влады́чня въ черто́зѣхъ го́рнихъ наслажда́ющися,* не забу́ди на́съ, па́мять твою́ вѣ́рно творя́щихъ,* и отъ бѣ́дъ многоразли́чныхъ на́съ избавля́й,* предъ престо́ломъ Го́спода Сла́вы на́съ помина́ющи.

О, Ксе́ніе сла́вная,* я́ко му́драя дѣ́ва* въ полу́нощи житія́ твоего́ Жениху́ Христу́ въ срѣ́теніе изшла́ еси́,* свѣти́льникъ пламенѣ́ющій любве́ Бо́жія нося́щи,* юро́да отъ мíра нарица́ющися,* премíрныя же му́дрости исполня́ющися.* Тѣ́мже отъ ми́лости еле́я, его́же бога́тно стяжа́ла еси́,* пода́ждь на́мъ, па́мять твою́ вѣ́рно творя́щимъ,* ка́пли того́ точа́щи на я́звы на́ша.

О, Ксе́ніе мужему́дренная,* крѣ́пость души́ твоея́ кто́ исповѣ́сть?* Яко на бра́нь со кня́земъ тмы́ и мíра сего́ исходя́щи,* Андре́емъ нарекла́ся еси́,* ничто́же бо устраши́ тя или́ стужи́ ти:* гла́дъ же и хла́дъ и наготу́ терпя́щи, —* вся́ могу́ о Христѣ́, мене́ укрѣпля́ющемъ, —* со апо́столомъ взыва́ла еси́.* Тѣ́мже и вѣнча́ тя Христо́съ подвигополо́жникъ.

Ины стихи́ры, гла́съ 2:

Андре́ю, Христа́ ра́ди юро́дивому, поревнова́ла еси́,* нищету́ во́льную избра́вши,* и вся́ блага́я мíра сего́ презрѣ́ла еси́, блаже́нная,* премíрная же блага́я обрѣ́тши,* раздае́ши да́ры ту́не си́хъ тре́бующимъ* и твоего́ заступле́нія прося́щимъ.

Проро́ковъ еси́ соприча́стница, о Ксе́ніе,* я́ко граду́щая ду́хомъ прозрѣва́ла еси́,* преподо́бнымъ же сожи́тельница явля́ешися,* жесто́кому житію́ тѣ́хъ послѣ́довавши,* и безме́зднымъ враче́мъ ревну́еши,* исцѣле́нія неду́жнымъ доны́нѣ ту́не подаю́щи.

Что́ тя нарече́мъ, о Ксе́ніе блаже́нная?* Кíя ти́ пѣ́сни принесе́мъ?* Яко въ житіи́ земнѣ́мъ че́сти мірскíя бѣ́гавши,* небе́сную сла́ву наслѣ́дила еси́,* тѣ́мже ны́нѣ отъ всѣ́хъ прославля́ема,* не пре́зри и на́ша хвале́нія усе́рдная.

Ду́ха Свята́го теплото́ю согрѣва́ема,* благода́тію Того́, я́ко боготка́нною оде́ждею, облече́нная,* наготу́ и хла́дъ претерпѣва́ла еси́ мужему́дренно,* гла́дъ же духо́вный сло́вомъ Бо́жіимъ утоля́ющи,* о пи́щи тѣле́снѣй небрегла́ еси́,* отъ си́лы въ си́лу ду́хомъ восходя́щи,* тѣ́мже и блаже́нство пра́ведныхъ наслѣ́дила еси́.

Вдови́ца честна́я отъ ю́ности обрѣ́тшися,* дще́ри Фану́илевѣ поревнова́ла еси́,* хра́му Бо́жію примѣта́ющися,* посто́мъ же и моли́твою Бо́гу денноно́щно служа́щи.* Тѣ́мже и сподо́билася еси́ зрѣ́ти Христа́ Спа́са,* не на руку́ Симео́ню носи́ма,* но во сла́вѣ присносу́щнѣй,* на престо́лѣ превознесе́нномъ на небеси́ возсѣда́юща.

Сла́ва, гла́съ 3:

Се́ ны́нѣ Ксе́нія блаже́нная* на пра́здникъ сво́й на́съ собира́етъ,* церко́внымъ гла́сомъ зову́щи:* о ча́да и дру́зи, вску́ю лю́бите суету́ и и́щете лжи́?* Что́ всу́е мяте́теся?* Ви́дите мя́, вся́ я́ко уме́ты вмѣни́вшую* и свобо́ду отъ вся́кія тщеты́ улучи́вшую;* послѣ́дуйте у́бо мнѣ́, я́коже и а́зъ Христу́,* и къ бога́тству, а́ще тече́тъ, не прилага́йте се́рдца,* я́ко да вре́мени прише́дшу со мно́ю водворите́ся* въ черто́зѣхъ ра́дости несконча́емыя.

И ны́нѣ, богоро́диченъ догма́тикъ, гла́съ то́йже:

Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́.

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. Та́же блаже́нныя, гла́съ 8:

Стра́ннице блаже́нная,* вся́ су́етная я́ко уме́ты вмѣни́вшая,* да би́серъ — Христа́ пріобря́щеши,* зри́мъ тя́, сто́гны гра́да Петро́ва преходя́щую* болѣ́зненными стопа́ми о́ныя освяти́вшую,* мра́за не страша́щуюся, но́щію внѣ́ гра́да тая́щуюся.* Та́мо колѣ́на души́ и тѣ́ла прекло́ньши,* о, ко́ль те́плы мольбы́ Бо́гу ты́ сказа́ла еси́,* па́ки же ра́достно поноше́ній сама́ поиска́ла еси́,* въ злострада́ніихъ Христа́ ра́ди юро́дствовавшая,* прозрѣ́нія же да́ра та́йно сподо́бльшаяся,* благодѣ́тельнице лю́демъ чудодѣ́тельная,* Ксе́ніе свята́я,* бу́ди моле́бница при́сно за ны́.

Сла́ва, гла́съ 4:

По и́мени твоему́, Ксе́ніе, и житіе́ твое́:* была́ бо еси́ мíру сему́ я́ко стра́нная,* вѣ́ку сему́ я́ко чужда́я,* Це́ркви же святѣ́й я́ко при́сная.* На земли́ пребыла́ еси́ я́ко го́стія привре́менная,* на небеси́ же пребыва́еши я́ко жи́тельница вѣ́чная.* Та́мо еси́ я́ко Бо́жія избра́нница,* мы́ же на земли́ ублажа́емъ тя́ я́ко на́шу моли́твенницу.

И ны́нѣ, богоро́диченъ, гла́съ то́йже:

Богоро́дице, грѣ́шныхъ Спору́чнице,* не оста́ви на́съ погиба́ющихъ,* но ри́зою заступле́нія Твоего́ покры́й на́съ,* я́ко да ри́зы тоя́ кра́й вѣ́рою удержа́вше,* изъ глубины́ паде́ній изведе́ни бу́демъ,* милосе́рдіе Твое́ прославля́юще.

На стихо́внѣ стихи́ры, гла́съ 1:

Поспѣша́й на по́мощь на́шу, о Ксе́ніе пра́ведная!* Яко вси́ есмы́ въ бѣда́хъ,* вѣ́ры несумне́нныя не стяжа́вше,* дерзнове́нія же въ моли́твахъ не иму́ще.* Тѣ́мже къ тебѣ́, блаже́нная, прибѣга́емъ:* ты́ у́бо не́мощь на́шу воспо́лни,* Христа́ Бо́га о на́съ умоля́ющи.

Сти́хъ: Госпо́дь храни́тъ прише́льцы,* си́ра и вдову́ пріи́метъ.

Прорече́нія твоя́, блаже́нная,* и́стину сокрове́нную провѣщава́ху,* тѣ́мже велѣ́ніемъ твои́мъ вѣ́рою послѣ́дующіи,* ра́дость и отъ бѣ́дъ избавле́ніе улуча́ху.* Оба́че тѣ́мъ противля́ющіися,* го́рькія печа́ли прича́стницы быва́ху,* ничто́же по́льзующеся.

Сти́хъ: Госпо́дь возво́дитъ низве́рженныя,* Госпо́дь лю́битъ пра́ведники.

Вои́стину, Ксе́ніе,* по и́мени твоему́ и житіе́ твое́ бы́сть,* на небеси́ бо ду́хомъ живу́щи,* на земли́ стра́нна яви́лася еси́,* гра́да, здѣ́ пребыва́ющаго, не иму́щи,* но гряду́щаго взыску́ющи,* въ не́мже ны́нѣ водворя́ешися.

Сла́ва, гла́съ 7:

Но́вый Андре́й, юро́дства по́двигъ во́лею на себе́ взе́мшій, явля́ешися,* о Ксе́ніе, Андре́емъ наре́кшаяся:* тѣ́мже и видѣ́нія премíрныхъ, я́ко то́й сподобля́ющися,* отверза́еши о́чи суето́ю омраче́ннымъ* и предста́тельствуеши о всѣ́хъ, тебе́ ра́ди ми́лости у Христа́ Спа́са прося́щихъ,* Его́же моли́, блаже́нная,* спасти́ся душа́мъ на́шимъ.

И ны́нѣ, богоро́диченъ, гла́съ то́йже:

Подъ кро́въ Тво́й, Влады́чице, вси́ земноро́дніи, прибѣга́юще, вопіе́мъ Ти́: Богоро́дице, упова́ніе на́ше, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

[На благослове́ніи хлѣ́бовъ: Тропа́рь блаже́нныя, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]

Инъ тропа́рь, гла́съ 8:

Тебе́, о стра́ннице, яви́ Христо́съ Госпо́дь моли́твенницу те́плую за ро́дъ на́шъ,* въ житіи́ бо твое́мъ страда́нія и ско́рби воспрія́вши,* Бо́гу же и человѣ́комъ любо́вію послужи́вши,* дерзнове́ніе ве́ліе стяжа́ла еси́.* Тѣ́мже къ тебѣ́ въ напа́стехъ и ско́рбехъ усе́рдно прибѣга́емъ,* изъ глубины́ серде́цъ на́шихъ взыва́юще:* упова́нія на́шего не посрами́, Ксе́ніе блаже́нная.


НА УТРЕНИ,
На Бо́гъ Госпо́дь: Тропа́рь [святы́я], два́жды. Сла́ва, и ны́нѣ, богоро́диченъ, гла́съ то́йже.

По 1-й каѳи́смѣ сѣда́ленъ, гла́съ 1:

Не ктому́ озлобле́нія и ско́рби претерпѣва́еши, блаже́нная, на земли́ чужде́й стра́нствующи, но во Оте́чествіи небе́снѣмъ водворя́ешися и та́мо съ ли́ки пра́ведныхъ утѣша́ешися. Тѣ́мже и на́съ, непреста́нно тебе́ призыва́ющихъ, отъ бѣ́дъ и напа́стей многообра́зныхъ при́сно избавля́й. [Два́жды.]

Сла́ва, и ны́нѣ, богоро́диченъ, гла́съ то́йже:

Богоро́дице Дѣ́во, ра́дуйся, ра́дость отъ а́нгела прія́вшая и ра́дость мíру прине́сшая, ра́дуйся, ро́ждшая Зижди́теля Твоего́ и Го́спода. Ра́дуйся, сподо́бльшаяся бы́ти Ма́ти Бо́жія.

По 2-й каѳи́смѣ сѣда́ленъ, гла́съ 8:

Тебѣ́, блаже́нная, отъ Бо́га даде́ся благода́ть пещи́ся о лю́дехъ, неду́жныя цѣли́ти и ско́рбныя утѣша́ти, обурева́емыя напа́стьми ко приста́нищу благоути́шному направля́ти, заблу́дшія и отча́янныя на пу́ть спасе́нія направля́ти. Тѣ́мже мы́ ны́нѣ, па́мять твою́ соверша́юще, те́плѣ зове́мъ: не забу́ди на́съ, блаже́нная, въ твои́хъ дерзнове́нныхъ моли́твахъ. [Два́жды.]

Сла́ва, и ны́нѣ, богоро́диченъ, гла́съ то́йже:

Тебе́, Влады́чице, еди́ну наде́жду и прибѣ́жище и́мамы, Тебе́ стѣ́ну неруши́мую отъ всѣ́хъ вра́гъ и напа́стей стяжа́хомъ, не оста́ви на́съ ны́нѣ и при́сно и во вѣ́ки.

Поліеле́й и велича́ніе:

Ублажа́емъ тя́, свята́я блаже́нная Ксе́ніе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...

По поліеле́и сѣда́ленъ, гла́съ 5:

Отве́рзи уста́ на́ша, Спа́се, да́ждь сло́во ра́зума рабо́мъ неключи́мымъ, воспѣ́ти досто́йно Ксе́нію блаже́нную, тоя́ бо по́двизи мірскíй ра́зумъ превосхо́дятъ, и тоя́ смире́ніе, я́ко покро́вомъ, житіе́ ея́ сокрыва́етъ. Оба́че чудесы́ и предста́тельствомъ тоя́ просвѣща́еми, отъ любве́ серде́чныя непреста́нно зове́мъ: не оста́ви на́съ заступле́ніемъ твои́мъ, Ксе́ніе прему́драя. [Два́жды.]

Сла́ва, и ны́нѣ, богоро́диченъ, гла́съ то́йже:

Не му́дростію и си́лою, не бога́тствомъ хва́лимся, но Тобо́ю, пренепоро́чная, Ты́ бо ро́дъ человѣ́чь на высоту́ а́нгелъ превосходя́щую вознесла́ еси́, Сло́во предвѣ́чное ро́ждши, и ма́тернее дерзнове́ніе къ Сы́ну Твоему́ и Бо́гу стяжа́вши. Тѣ́мже Ти́ припа́дающе, мо́лимся: на забу́ди на́съ си́рыхъ, о всепѣ́тая Ма́ти и Дѣ́во.

Степе́нна, 1-й антифо́нъ, 4-го гла́са. Проки́менъ, гла́съ 4-й: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся Тебѣ́. Вся́кое дыха́ніе... Ева́нгеліе отъ Луки́, зача́ло 78.

По 50-мъ псалмѣ́ стихи́ра, гла́съ 6:

Жесто́кое житіе́ во́лею избра́ла еси́, и озлобле́нія вся́ческая претерпѣ́ла еси́, юро́дство мíра сего́ обличи́вши, прему́дрость же Бо́жію яви́вши. И ны́нѣ на небеси́ утѣша́ешися, мы́ же, на земли́ стра́нствующе, тебѣ́ непреста́нно зове́мъ: не забу́ди на́съ, блаже́нная, Христа́ Бо́га о на́съ умоля́ющи.

Кано́нъ моле́бный Богоро́дицы съ ирмосо́мъ на 6, и блаже́ннѣй Ксе́ніи на 8, гла́съ 4-й, его́же краегране́сіе: Ксе́нію мужеу́мную похвала́ми почита́емъ.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Ксе́ніе блаже́нная, вои́стинну по и́мени твоему́ и житіе́ твое́ бы́сть: на земли́ бо, я́ко во странѣ́ чужде́й, преходя́щи и во Оте́чествіе небе́сное преста́витися ча́ющи, вся́ земна́я, я́ко сѣ́нь и со́ніе, презрѣ́ла еси́.

Суету́ вся́ческую, я́ко пра́хъ отъ ногу́ твое́ю отря́сши, жесто́кимъ путе́мъ въ зе́млю обѣтова́нія ше́ствовати изво́лила еси́, Ксе́ніе мужему́дренная, человѣкоубíйцу врага́, я́ко Амали́ка, побѣжда́ющи и Го́сподеви побѣ́дное пѣ́ніе принося́щи.

Еги́петскія котлы́ благоде́нствія презрѣ́вши и мíру кичли́вому посмѣя́вшися, Ксе́ніе му́драя, мо́ря жите́йскаго дно́ прешла́ еси́ неврежде́нно, Бо́гу тя́ веду́щу руко́ю крѣ́пкою, Ему́же воспѣ́ла еси́ побѣ́дное пѣ́ніе.

Богоро́диченъ: Ненадѣ́ющихся наде́ждо и бори́мыхъ по́моще, Пречи́стая, въ мо́ри су́щихъ звѣздо́ боготе́чная, и въ пусты́ни заблу́ждшихъ исто́чниче живоно́сный, отра́ду душа́мъ на́шимъ, Дѣ́во Благослове́нная, да́ждь.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Іоа́нна, возлю́бленнаго ученика́ Спа́сова, слы́шавши глаго́люща: и́же лю́битъ мíръ, въ не́мъ любви́ Отчей нѣ́сть; мíръ грѣхолюби́вый возненави́дѣвши, въ до́мъ Отчій поспѣша́ла еси́, блаже́нная.

Юро́ду себе́ Христа́ ра́ди сотво́рши, му́дрости же премíрныя исполня́ющися, о́комъ чи́стымъ бу́дущая, я́ко настоя́щая, прозрѣва́ющи, проро́комъ Бо́жіимъ поревнова́ла еси́, Ксе́ніе богому́драя.

Моли́тва усе́рдная — пи́ща тебѣ́ бы́сть, пра́веднице, руга́нія же и осмѣя́нія — питіе́ сла́дкое, смиренному́дріе — оде́жда украше́нія, и вѣне́цъ — Ду́ха осія́ніе.

Богоро́диченъ: Уста́ двиза́ти на моли́тву, я́коже ма́ти Самуи́лова ника́коже облѣни́мся, вѣ́рніи, небесе́ и земли́ Цари́цу призыва́ющи.

Сѣда́ленъ, гла́съ 5:

Егда́ но́щію моли́твы твоя́ тайнолѣ́пно творя́щи, на снѣ́гъ колѣ́на твоя́ преклоня́ла еси́, блаже́нная, душа́ твоя́ па́че снѣ́га убѣля́шеся, сле́зы же, отъ теплоты́ серде́чныя пролива́емыя, зе́млю согрѣва́ху, гра́дъ тво́й спя́щій бдѣ́ніемъ твои́мъ спаса́шеся, и гнѣ́въ Бо́жій отъ того́ отвраща́шеся. Ны́нѣ у́бо тебѣ́ отъ мíра сего́ отше́дшей, бѣ́дствуемъ лю́тѣ, но́щь несвѣ́тла наста́ на́мъ, огустѣ́ тма́ грѣхо́вная, со́нъ лѣ́ности и нерадѣ́нія зѣ́ницы на́ша смежи́, гра́дъ тво́й въ ру́цѣ безбо́жникъ предаде́ся, и оте́чествіе твое́ врагу́ порабо́тися, потщи́ся у́бо на моли́тву и на по́мощь на́мъ поспѣша́й, Ксе́ніе, дерзнове́ніемъ ве́лія. [Два́жды.]

Слава, и нынѣ, богородиченъ, гласъ тойже:

Предста́тельнице и ско́рая Засту́пнице ро́да христіа́нского, бездо́мныхъ и оте́чествія лише́нныхъ Покрови́тельнице, моли́ при́сно Сы́на Твоего́ и Бо́га съ блаже́нною Ксе́ніею за ру́сскія лю́ди во оте́чествіи и въ разсѣ́яніи су́щія, да Оте́чествія неотъе́млемаго, небе́снаго дости́гнемъ.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Же́нскую не́мощь отлага́ющи, Андре́емъ нарекла́ся еси́, мужеу́мная, проти́ву духо́въ зло́бы подвиза́ющися, — сла́ва си́лѣ Твое́й, — къ Подаю́щему ти́ си́лу взыва́ющи.

Евино высокоу́міе, ра́й затвори́вшее, отве́ргши всеконе́чно, богому́драя, юро́да нарещи́ся изволя́еши, змíя льсти́ваго посрами́вши.

Умъ Христо́въ внутрьу́ду тая́щи, прему́драя, мíра му́дрость попира́еши, вразумля́еши же лю́ди, судьбы́ Бо́жія предвозвѣща́ющи, и стопы́ на́ша на пу́ть пра́вый направля́ющи.

Богоро́диченъ: Милосе́рдіе Твое́ къ на́мъ преклони́ти тщи́мся, Богоро́дице, моли́твенницу Тебѣ́ предлага́ющи Ксе́нію блаже́нную, ея́же предста́тельство стяжа́ти упова́емъ, па́мять ея́ те́плѣ воспѣва́юще.

Пѣ́снь 5.

Ирмо́съ: Стяжа́вый ны́, избра́нныя лю́ди, кро́вію Твое́ю, Го́споди, Тво́й ми́ръ да́ждь на́мъ, во единомы́сліи сохраня́я ста́до Твое́.

Наготу́ и хла́дъ терпя́щи, ри́зы же ни́щимъ раздаю́щи, — довлѣ́етъ ми́ ри́за креще́нія, — въ себѣ́ взыва́ла еси́, блаже́нная.

Уврачу́й на́ша ра́ны, услы́ши моли́твы, умири́ на́шу жи́знь и на по́мощь на́мъ поспѣша́й, Ксе́ніе благолюби́вая.

Юныя вразуми́ и на пу́ть и́стины наста́ви, ста́рыя умудри́ и боже́ственная разумѣ́ти научи́, вся́ко на дѣла́ блага́я и́хъ подвиза́ющи, о Ксе́ніе, му́дрость небе́сную стяжа́вшая.

Богоро́диченъ: Печа́ли отло́жше, восклони́мся и горѣ́ воззри́мъ, бра́тіе, и у́зримъ въ небесѣ́хъ Цари́цу Богоро́дицу, покро́вомъ Свои́мъ свѣтоно́снымъ на́съ покрыва́ющую.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Окорми́ на́съ, въ мо́ри жите́йскомъ бѣ́дствующихъ, блаже́нная, ко приста́нищу благооти́шному на́съ провожда́ющи, моля́щися ко Еди́ному, Иже на́съ спасти́ могу́щему.

Хотя́ще блага́я твори́ти, зла́я содѣва́емъ. За́повѣди Бо́жія вѣ́дуще, о тѣ́хъ небреже́мъ и согрѣша́емъ: помози́ на́мъ немощны́мъ, Ксе́ніе благосе́рдая.

Возопи́ о на́съ ко Го́споду, Ему́же послужи́ла еси́, о Ксе́ніе, гла́сомъ крѣ́пкимъ, я́коже Моисе́й въ пусты́ни, и услы́шитъ тя́ Бо́гъ, спасти́ хотя́й человѣ́ки.

Богоро́диченъ: Аще не ты́ на́мъ ру́цѣ про́стреши, о Богома́ти, не и́мамы избы́ти поги́бельнаго ро́ва, сего́ ра́ди Ти́ зове́мъ: Влады́чице, спаси́ ны.

Конда́къ, гла́съ 3:

На земли́ я́ко стра́нна пребы́вши,* о небе́снѣмъ же Оте́чествіи воздыха́ющи,* юро́да отъ бу́іихъ и невѣ́рныхъ,* прему́дра же и свя́та отъ вѣ́рныхъ познава́ешися,* и отъ Бо́га сла́вою и че́стію вѣнча́ешися,* Ксе́ніе мужеу́мная и богоу́мная,* сего́ ра́ди зове́мъ ти́:* ра́дуйся, я́ко по стра́нствіи земнѣ́мъ* въ дому́ Отчемъ водворя́ешися.

Икосъ:

Кто́ сія́, во врата́ Ца́рствія небе́снаго толку́щая, ея́же ри́зы бѣлы́, лице́ же сія́етъ па́че со́лнца? Отку́ду прихо́дитъ и яковы́хъ тре́буетъ? — Сія́ е́сть дщи́ Отца́ Небе́снаго, Сы́на Бо́жія раба́ вѣ́рная и Ду́ха Свята́го сосу́дъ избра́нный, на земли́ я́ко стра́нница прише́льствовавшая. Ны́нѣ во Оте́чествіе небе́сное преставля́ется, со тща́ніемъ у́бо се́й две́ри отве́рзите и срѣта́йте ю́, съ весе́ліемъ зову́ще: ра́дуйся, Ксе́ніе, я́ко по стра́нствіи земнѣ́мъ въ дому́ Отчемъ водворя́ешися.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Ле́гкое бре́мя Христо́во на ра́мо твое́ взе́мши, вся́ тя́жкая земна́я ни во что́же вмѣня́ющи, блаже́нная, неудобоноси́мое ка́меніе на ве́рхъ церко́вный преноси́ла еси́, усе́рдно трудя́щися и зову́щи: благослове́нъ еси́ Го́споди, Бо́же оте́цъ на́шихъ.

Алчемъ и жа́ждемъ и наготу́емъ духо́вно: пи́щу сла́дкую, твое́ наставле́ніе, да́ждь у́бо на́мъ, блаже́нная, прохлади́ горта́ни на́ша росо́ю моли́твъ твои́хъ о на́съ, убо́гихъ, я́ко да Го́сподеви благода́рнѣ зове́мъ: благослове́нъ еси́, Бо́же оте́цъ на́шихъ.

Мытаре́во грѣхолю́бное житіе́ подража́юще, смиренному́дрія того́ не стяжа́хомъ, па́че же и фарисе́евой го́рдости преда́хомся, добродѣ́телей же не иму́ще, что́ у́бо сотвори́мъ немощнíи, а́ще не къ тебѣ́, Ксе́ніе, прибѣ́гнемъ и возопіи́мъ: умоли́ о на́съ Бо́га оте́цъ на́шихъ.

Богоро́диченъ: Ины́я нѣ́сть во вселе́ннѣй, я́коже Ты́, Богоро́дице, я́же ма́тернее дерзнове́ніе ко Спа́су иму́щая, и а́нгелы пресла́вною чистото́ю превозше́дшая: тѣ́мже Ти́ припа́даемъ, Влады́чице, моли́ о на́съ при́сно Бо́га оте́цъ на́шихъ.

Пѣ́снь 8.

Ирмо́съ: Вся́ческая, Влады́ко, прему́дростію Твое́ю соста́вилъ еси́, земли́ же па́ки утверди́лъ еси́, я́коже вѣ́си, дно́, основа́ніемъ водрузи́вый на вода́хъ безмѣ́рныхъ. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Помо́щница на́мъ бу́ди, блаже́нная, изыма́ющи на́съ отъ скорбе́й и болѣ́зней, отъ собла́зновъ же, нестрое́ній и бѣ́дъ, и жела́нія серде́цъ на́шихъ во бла́го испо́лни, я́ко да о тебѣ́ Бо́га благодаря́ще, вопіе́мъ: благослови́те дѣла́ Госпо́дня непреста́нно Го́спода.

Огне́вицу держа́вствующему уста́вила еси́, цари́цѣ же въ видѣ́ніи со́ннѣмъ предста́вши, прорекла́ еси́ то́й рожде́ніе ча́да, тѣ́мже благода́рственнѣ вопія́ше: благослови́те дѣла́ Госпо́дня непреста́нно Го́спода.

Ча́да твоя́ есмы́, о Ксе́ніе блаже́нная, не оста́ви на́съ си́рыхъ, но на по́мощь къ на́мъ пріиди́. Не забу́ди о сла́вѣ твое́й пеку́щихся, но ра́дованіемъ и́мъ возда́ждь, да вси́ согла́сно пое́мъ: благослови́те дѣла́ Госпо́дня непреста́нно Го́спода.

Богоро́диченъ: Имя Твое́ пресла́дкое и мѵроуха́нное да не отхо́дитъ отъ у́стъ на́шихъ, Богоро́дице, сердца́ же на́ша любо́вію боже́ственною горя́ща, всю́ тва́рь да приглаша́ютъ вопи́ти: благослови́те дѣла́ Госпо́дня непреста́нно Ма́терь Бо́жію.

Пѣ́снь 9.

Ирмо́съ: Тя́, пресла́вную Невѣ́сту и Всесвяту́ю Богоро́дицу, Зижди́теля ро́ждшую неви́димыхъ же и всѣ́хъ ви́димыхъ, пѣ́сньми велича́емъ.

Тайнолѣ́пная житія́ твоего́ и по́двизи твои́ сокрове́нніи, ны́нѣ мíру яви́шася, Ксе́ніе блаже́нная, тѣ́мже о тебѣ́ всеселя́щеся, Христа́ Бо́га, тебе́ просла́вльшаго, немо́лчно велича́емъ.

Аще и преста́вилася еси́ отъ земны́хъ, оба́че вѣ́дуще тя́ и по сме́рти на́мъ спребыва́ющую и моли́твами твои́ми при́сно на́съ отъ бѣ́дъ покрыва́ющу, благода́рнѣ тя́, блаже́нная, велича́емъ.

Еже о на́съ, немощны́хъ и убо́гихъ, попече́ніе твое́ воспомина́юще, съ любо́вію къ тебѣ́ припа́даемъ, моли́твеннице на́ша крѣ́пкая: не оста́ви у́бо на́съ, си́рыхъ, но при́сно на́мъ помога́й, я́ко да о тебѣ́ Бо́га и Отца́ Небе́снаго при́сно велича́емъ.

Богоро́диченъ: Моли́твы Ксе́ніи блаже́нныя къ Тебѣ́, Влады́чице, о на́съ приноси́мыя, къ Сы́ну твоему́ и Бо́гу, Дѣ́во, принеси́, Твои́мъ ма́тернимъ хода́тайствомъ ты́я подкрѣпля́ющи, и спаса́й, Пречи́стая, Тя́ велича́ющія.

Свѣти́ленъ:

До́ме Отчій, отве́рзи ми́ две́ри, отъ земли́ чужде́й преста́вльшейся, — вопіе́тъ Ксе́нія блаже́нная, во врата́ Ца́рствія небе́снаго толку́щи. [Два́жды.]

Сла́ва, и ны́нѣ, богоро́диченъ:

Две́ре небе́сная, пала́то Царе́ва, христіа́нъ неруши́мая стѣно́, богопріе́мнѣи Твои́ ру́цѣ на́мъ простира́ющи, введи́ на́съ, Влады́чице, въ вѣ́чныя кро́вы.

На хвали́техъ стихи́ры на 4, гла́съ 8:

Со́лнца пра́вды — Христа́ безу́мно уклони́хомся, и зима́ на́мъ е́сть лю́тая жестокосе́рдія. Но ты́, блаже́нная, теплото́ю моли́твъ твои́хъ оледенѣ́вшая сердца́ н́ша согрѣва́й, я́ко да отъ сна́ нечу́вствія восклони́мся, весну́ духо́вную возвѣща́ющи.

Въ нощи́ грѣхо́внѣй заблуди́хомся, огустѣ́ тма́ духо́вная: ка́ко избѣ́гнемъ паде́ній и поги́бельнаго ро́ва? Ка́ко обрѣте́мъ пу́ть ко спасе́нію? Ты́, блаже́нная, свѣти́льникъ милосе́рдія твоего́ возже́гши, изы́ди въ срѣ́теніе на́съ погиба́ющихъ и, просте́рши на́мъ ру́цѣ твои́, на стези́ пра́выя изведи́ ны.

Гдѣ́ прему́дръ, гдѣ́ кни́жникъ, гдѣ́ совопро́сникъ вѣ́ка сего́? Не обуи́ ли Бо́гъ прему́дрость мірску́ю? Тѣ́мже и ты́, Ксе́ніе, мíру юро́да явля́ешися, Христа́, Бо́жію Прему́дрость, проповѣ́дающи, и Того́ благода́тію просвѣща́ема, всѣ́хъ науча́еши суеты́ мірскíя отгреба́тися.

Нищету́ соверше́нную стяжа́вши, прему́драя, мірска́я мудрова́нія отве́ргши, Бо́гу же я́ко вдови́чу ле́пту въ же́ртву ра́зумъ прине́сши, юро́да человѣ́комъ явля́ешися, оба́че тя́ вѣ́мы мудрѣ́йшую прему́дрыхъ, тѣ́мже отъ тебе́ науче́нія про́симъ: просвѣти́ на́шъ у́мъ твое́ю свѣ́тлостію, мра́къ невѣ́дѣнія отгоня́ющи.

Сла́ва, гла́съ 6:

Все отложи́вши мірско́е попече́ніе, ри́зою юро́дства прему́дрость сокрыва́ющи, Бо́гу же и человѣ́комъ тайнолѣ́пно послужи́вши, стяжа́ла еси́ Свята́го Ду́ха благода́ть, о Ксе́ніе блаже́нная, тѣ́мже я́ко дерзнове́ніе ко Спа́су иму́щая, не преста́й моли́ти Того́ спасти́ся душа́мъ на́шимъ.

И ны́нѣ, богоро́диченъ, гла́съ то́йже:

Вся́ превозше́дши непоро́чнаго дѣ́вства добро́тою, Бо́га родила́ еси́ неизрече́нно, Пресвята́я Дѣ́во Ма́ти, тѣ́мже ро́дъ человѣ́чь о Тебѣ́ ра́дуется, и Тобо́ю, и́стинною Богоро́дицею, дерзнове́нно хва́лится, на Тя́ упова́ніе возлага́я, Ты́ бо еси́ Предста́тельница и Спасе́ніе мíру.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна, отъ кано́на блаже́нныя пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Къ Гала́томъ посла́нія, зача́ло 208. Аллилу́ія, гла́съ 1: Терпя́ потерпѣ́хъ Го́спода и вня́тъ ми́, и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́. Ева́нгеліе отъ Матѳе́я, зача́ло 104. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба святѣ́й, блаже́ннѣй во Христѣ́ Ксе́ніи, бездо́мнѣй стра́нницѣ Петро́ва гра́да. — Jordanville: Тѵпографія преп. Іова Почаевскаго, [1978]. — 29 с.

/ Къ оглавленію раздѣла /


Наверхъ / Къ титульной страницѣ

0