Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 23-й де́нь.
Свята́го священному́ченика Кли́мента, епи́скопа Анки́рскаго, и свята́го му́ченика Агаѳанге́ла.

[ВЕЧЕРЪ,]
На Го́споди воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Пребы́въ въ вѣ́рѣ, я́коже въ виногра́дѣ Христо́вѣ,* во вре́мя прія́лъ еси́ дѣ́ланіе болѣ́зней,* му́чениче, многообра́зно,* тѣ́мже пло́дъ спасе́нія израсти́лъ еси́,* царю́ тезоимени́тно и дѣ́лателю,* священному́чениче Кли́менте сла́вне.

Четверосугу́бна седми́ца твоя́ муче́нія, му́дре,* честна́ яви́ся вои́стинну и Бо́гу, и а́нгеломъ,* и всѣ́мъ человѣ́комъ,* огня́ у́бо го́рькаго, и сѣче́нія, и ра́ны мно́гія,* гра́ды обходя́ и страны́, иску́съ пріе́мъ,* не отступи́лъ еси́ любве́ Христо́вы.

Па́стырски просія́въ, священному́чениче Христо́въ,* страда́льческія по́двиги подъя́лъ еси́ до́блественне:* еди́нъ чрезъ обоя́ вѣне́цъ пріе́мъ,* во обѣ́ихъ украша́емь,* свяще́нствѣ и болѣ́знехъ страда́льческихъ.* Тѣ́мже моли́ спасти́ся на́мъ.

Ины стихи́ры, гла́съ 2. Подо́бенъ: Егда отъ дре́ва.

Лоза́ виногра́да живо́тнаго яви́лся еси́, та́инственнымъ дѣ́ланіемъ окопова́ема, болѣ́зньми у́бо по́стничества, о́тче, посѣка́ема, мече́мъ же объе́млема муче́нія, вино́ умиле́нія на́мъ раствори́лъ еси́, и́мже ны́нѣ насыща́еми вси́, вѣ́рою всесвяще́нную па́мять твою́ пра́зднуемъ, блаже́нне.

Егда́ священнодѣ́йствовалъ еси́ Стра́шную, и Соверше́ннѣйшую Же́ртву, и Премíрную, тогда́ прине́слся еси́, священнодѣ́йствуемь, твою́ же кро́вь, всему́дре, преусе́рднымъ се́рдцемъ кро́ви примѣси́лъ еси́ Влады́ки твоего́, е́юже ты́ окропля́емь, блаже́нне, ве́сь чи́стъ показа́лся еси́, ве́сь свяще́ннѣйшій, богоглаго́ливе.

Жря́ Агнца Бо́жія, грѣхи́ мíра очища́ющаго и тлю́ и сме́рть истреби́вшаго, я́ко овча́ непоро́чно, поже́рлся еси́, богому́дре, сра́сленъ бы́въ подо́біемъ, блаже́нне, Живоно́сныя сме́рти. Ны́нѣ же Его́ Ца́рствія, достоблаже́нне, получи́лъ еси́.

Сла́ва, гла́съ 8:

Време́нъ четвери́щно обхо́дъ, богозва́нне, седмоусугу́билъ еси́, біе́мь, стру́жемь, измѣня́я гра́ды и страны́, распина́емь за Христа́, но ниже́ о́гнь, ниже́ ме́чь, ниже́ ра́ны души́ твоея́ разрѣши́ша тве́рдость, погуби́лъ же еси́ де́моновъ крѣ́пость, священному́чениче Кли́менте. Тѣ́мъ моли́ся Христу́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Госпо́дни.

Не терплю́, Ча́до, ви́дѣти Тя́, на дре́вѣ усну́вша, бо́дрость всѣ́мъ даю́щаго, я́ко да дре́вле преступле́нія плодо́мъ, сно́мъ поги́бельнымъ усну́вшимъ боже́ственную и спаси́тельную бо́дрость пода́си, — Дѣ́ва глаго́лаше, пла́чущи, Юже велича́емъ.

На стихо́внѣ стихи́ры окто́иха. Сла́ва, гла́съ 1. Анато́ліево.

Чу́днаго во свяще́нницѣхъ му́ченика Кли́мента въ до́лгомъ вре́мени искуше́ніемъ му́къ въ при́сно благи́хъ получи́ти сподо́бися сла́дости и бога́тства боже́ственнаго, мно́гія къ подвиго́мъ пома́завъ свои́мъ подо́біемъ и покори́въ пло́ть, вы́ше му́дрствовати сме́рти. Къ нему́же, вѣ́рніи, возопіи́мъ: великому́чениче сла́вне, ко Христу́ моли́твами твои́ми лѣ́тная настоя́нія разрѣши́ страсте́й на́шихъ и изба́ви отъ лю́тыхъ моли́твами твои́ми.

И ны́нѣ, богоро́диченъ или́ крестобогоро́диченъ. Подо́бенъ: Небе́сныхъ чино́въ.

У Креста́ предстоя́щи Сы́на и Бо́га Твоего́* и долготерпѣ́ніе Того́ сматря́ющи,* глаго́лала еси́, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій?* Да спасе́ши человѣ́чество.

Тропа́рь, гла́съ 4:

Лоза́ преподо́бства и сте́бль страда́льчества, цвѣ́тъ свяще́ннѣйшій и пло́дъ богода́нный, вѣ́рнымъ, всесвяще́нне, присноцвѣту́щъ, дарова́лся еси́, но я́ко му́чениковъ сострада́лецъ и священнонача́льниковъ сопресто́льникъ, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха и свята́го на 4, его́же краегране́сіе: Пою́ ро́згу у́мныя лозы́. Творе́ніе Ѳеофа́ново, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Съ го́рними ли́ки я́ко іере́й и я́ко му́ченикъ сла́венъ Христу́ предстоя́, прилѣ́жно моли́ получи́ти осія́нія твоего́ восхваля́ющимъ тя́.

Просте́ртыя по́двиги по земли́ препроводи́въ, преподо́бне, Ца́рствія небе́снаго сподо́бился еси́ вѣне́цъ прія́ти и вѣ́чную жи́знь и неразори́мую.

Изба́вленъ стра́стію Безстра́стнаго, страда́ніемъ потща́лся еси́ къ Нему́ востещи́, подража́тель бы́въ я́вѣ страсте́й Его́, а́нгеловъ ссе́льниче.

Богоро́диченъ: Преиспещре́нна добро́тою добродѣ́телей, Богома́ти Пречи́стая, Бо́га и́стиннаго добродѣ́тель зачала́ еси́ на́мъ, исто́чникъ благи́хъ источа́юща.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Красны́ прине́слъ еси́ плоды́, розга́ жизноно́сныя бы́въ Лозы́, и, сія́ му́ченическими украси́въ блиста́ньми, Спа́су всѣ́хъ освяти́лъ еси́.

Па́вла яви́лся еси́ подража́тель, всю́ вселе́нную претека́я, всеблаже́нне, креще́ніемъ богодѣ́льнымъ и кро́вію кропле́нія освяща́я исповѣ́данія твоего́.

Богоро́диченъ: Нѣ́сть непоро́чна, я́коже Ты́, Всечи́стая Богоро́дице: еди́на бо отъ вѣ́ка Бо́га и́стиннаго и всѣ́хъ Содѣ́теля, Бо́га Сло́ва, па́че сло́ва родила́ еси́.

Сѣда́ленъ, гла́съ 8. Подо́бенъ: Прему́дрости.

Отъ Анки́ры звѣзду́ богосія́нную, Каппадо́ковъ похвалу́, благоче́стно Кли́мента почти́мъ, многострада́льнаго му́ченика, свяще́нниковъ сла́ву, преподо́бныхъ похвалу́, си́рыхъ предста́теля, ни́щихъ побо́рника, и́же и, пострада́въ въ два́десять осьмо́е лѣ́то, мно́гія просвѣти́, и оте́чество освяти́ многострада́льный му́ченикъ, мо́лится же Христу́ Бо́гу прегрѣше́ній оставле́ніе дарова́ти чту́щимъ любо́вію святу́ю па́мять его́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ блажи́мъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га прегрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Обте́къ всю́ зе́млю, просте́рлъ еси́ подвиго́въ ро́згу, страда́льческое иска́пая ра́дованіе и благово́нія сла́дость, страстоте́рпче всеблаже́нне.

Ве́ртъ зря́ще твоего́ страда́нія, ра́нъ цвѣ́ты, блаже́нне, твои́хъ, ра́дующеся, пожина́емъ и разли́чными чудесы́ чу́вства обвеселя́емъ.

Дне́ бы́лъ еси́ сы́нъ, чу́дне, и Свѣ́та Невече́рняго, непреста́нно озаря́емь Трисо́лнечнымъ Свѣ́томъ и сія́ніемъ проповѣ́данія.

Богоро́диченъ: Марíе Всечи́стая, чистоты́ бы́вши прія́телище вмѣсти́тельное Боже́ственнаго вселе́нія, душе́вную мою́ скве́рну и окаля́ніе истреби́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ра́ны, всему́дре, терпя́ многолѣ́тныя и должа́йшія, многострада́теленъ бы́лъ еси́, ны́нѣ же нетлѣ́ннаго блаже́нства сла́дость наслѣ́довалъ еси́ вѣ́чнующую.

Вѣ́ру, я́ко анки́ру тве́рдую, и наде́жду, и любо́вь основа́ніе положи́въ, Честнѣ́й Тро́ицѣ себе́ возложи́лъ еси́ хра́мъ освяще́нъ, о́тче всебога́те.

Богоукра́шенный сопру́гъ пресвѣ́тлый подвиза́ся на три́знищи страда́нія, пріе́мъ вѣ́чную жи́знь, со а́нгелы лику́етъ и сра́дуется.

Богоро́диченъ: Спасти́ хотя́ отъ тли́ истлѣ́вшее человѣ́ческое естество́, Зижди́тель и Госпо́дь во утро́бу очище́ну Святы́мъ Ду́хомъ всели́вся, неизрече́нно вообрази́ся.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Зако́нно пострада́вше, вѣнцы́ отъ руки́ Влады́чнія прія́сте, даро́въ разли́чныхъ раздая́нія, и благода́ть исцѣле́ній, и вѣ́рныхъ врачева́ти неду́ги.

Житіе́ боже́ственное, подвиго́въ пробавле́ніе, ра́нъ изпростре́ніе, благолѣ́пія вѣнча́ніе та́йное, и добро́ты діади́ма, и оде́жда нетлѣ́нія тебѣ́ бы́ша.

Богоро́диченъ: Всечи́стая Влады́чице, ро́ждшая земны́мъ ко́рмчія Го́спода, страсте́й мои́хъ непостоя́нное и лю́тое утоли́ смуще́ніе и тишину́ пода́ждь се́рдцу моему́.

Конда́къ, гла́съ 4. Подо́бенъ: Яви́лся еси́ дне́сь.

Лозы́ бы́лъ еси́ честна́я розга́ Христо́ва, многострада́льне Кли́менте всехва́льне, я́влься, со стра́ждущими же взыва́лъ еси́: Ты́ му́чениковъ, Христе́, свѣ́тлое ра́дованіе.

Икосъ:

Отъ младе́нства свяще́нно воздое́ннаго, ро́згу лозы́ Царя́ Христа́, пѣ́сньми почти́мъ вѣ́рно: то́й бо яви́ся весе́ліемъ и́стинно и добро́тою че́стенъ, въ му́кахъ и страда́ніихъ непрекло́ненъ, во свяще́нствѣ воображе́нъ іера́рхъ и о́бщникъ Бо́жія Ца́рства, и́дольская бо ка́пища и я́рость мучи́телей въ ничто́же вмѣни́въ, на три́знищи Еди́наго ра́достію Спа́са исповѣ́дуя: Ты́ му́чениковъ, Христе́, свѣ́тлое ра́дованіе.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Заре́ю муче́нія вселе́нную уясни́лъ еси́, воспѣва́я Христу́ мы́сли и души́ чистото́ю: благослове́нъ еси́, Го́споди, Бо́же отце́въ на́шихъ.

Твои́хъ исправле́ній свяще́ннѣйшее торжество́, небе́снымъ свѣ́томъ сія́ющо, озаря́етъ зову́щія: благослове́нъ еси́, Го́споди, Бо́же отце́въ на́шихъ.

Богоро́диченъ: Му́дрости прему́дрый, Дѣ́во, Ма́ти была́ еси́, вся́ му́дрѣ пра́вящія есте́ственною бла́гостію. Благослове́нъ, Всечи́стая, Пло́дъ Твоего́ чре́ва.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Яви́вшеся свѣтлѣ́йшіи на земли́ свѣти́льницы, озаря́ете тве́рдь, всебога́тіи, честны́я Це́ркве, на небесѣ́хъ же сія́ніемъ страда́нія ва́шего перворо́дныхъ торжество́, весели́теся, вопію́ще: Го́спода по́йте, дѣла́, и превозноси́те во вся́ вѣ́ки.

Съ весе́ліемъ ра́достную твои́хъ подвиго́въ па́мять ны́нѣ пра́зднуемъ: я́коже бо безпло́тенъ, претерпѣ́лъ еси́ ра́нъ треволне́нія, но вмѣ́сто си́хъ вѣ́чнующую пи́щу досто́йно воспрія́лъ еси́, воздая́ніе бога́тное, — Го́спода по́йте, дѣла́, — взыва́я, — и превозноси́те во вся́ вѣ́ки.

Во упещре́нную и пресвѣ́тлую оде́жду ты́ сла́вы одѣ́явся вмѣ́сто ду́ха, пребога́те, лю́таго уны́нія, вмѣ́сто му́къ а́нгельское пребыва́ніе премѣни́лъ еси́, пріе́мъ Жи́зни Присносу́щныя, — Го́спода по́йте, дѣла́, — зовы́й, — и превозноси́те во вся́ вѣ́ки.

Богоро́диченъ: Изъ Присносу́щнаго Роди́теля Соприсносу́щное Сло́во и Сразумѣва́емое, напослѣ́докъ же вѣко́въ вопло́щся отъ Дѣ́вы, человѣ́ческій ве́сь богосодѣ́ла зра́къ, Себѣ́ по Ѵпоста́си неслія́нно соедини́въ, Го́спода по́йте, дѣла́, и превозноси́те во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ба́нею свѣтови́днаго креще́нія соверши́вся, и свяще́нства ма́стію, и му́ченическою кро́вію омы́вся, блаже́нне, укра́шенъ, ра́дуяся, восте́клъ еси́ къ небе́снымъ во́инствомъ, богоблаже́нне.

Святы́хъ му́чениковъ вѣне́цъ — Сло́во Бо́жіе, вѣнце́мъ дарова́ній украси́ тво́й святы́й ве́рхъ, чу́дне, пра́вды незаходи́мое Со́лнце, Его́же ра́ди по́двиги до́лгія, ра́дуяся, претерпѣ́лъ еси́.

Богоро́диченъ: Сы́нъ и Сло́во Бо́жіе Безнача́льное, вопло́щся, Сы́нъ Дѣ́вы быва́етъ благоволе́ніемъ Отца́ и Ду́ха Боже́ственнаго содѣ́йствомъ, ве́сь обнови́ истлѣ́вшій мо́й зра́къ, я́ко Всеси́ленъ.

Свѣти́ленъ. Подо́бенъ: Жены́, услы́шите.

Якоже Па́велъ апо́столъ, зе́млю обте́клъ еси́ всю́, и до́лгими твои́ми по́двиги просте́рлъ еси́, Кли́менте, ро́згу, и мре́жею вѣ́ры уловля́еши Агаѳанге́ла, соо́бщника и сму́ченика, блага́го вѣща́нія тезоимени́тнаго страда́льца.

Сла́ва, и ны́нѣ, богоро́диченъ:

Ты́ мое́ заступле́ніе, Пречи́стая, и крѣ́пкое прибѣ́жище, Ты́ и предста́тельница, и покро́въ, и къ Тебѣ́ припа́даю, зовы́й: отъ бѣ́дъ мои́хъ изба́ви мя́, я́ко Ра́дость ро́ждшая, и отъ огня́ исхи́ти вѣ́чнаго, Дѣ́во, на Тя́ надѣ́ющагося.


НА ЛИТУРГІИ,

Блаже́нна окто́иха и свята́го пѣ́снь 3-я на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 262 – 266.

/ Къ оглавленію раздѣла /


Наверхъ / Къ титульной страницѣ

0