Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 22-й де́нь.
Свята́го апо́стола Тимоѳе́я и свята́го преподобному́ченика Анаста́сія Пе́рсскаго.

[ВЕЧЕРЪ,]
На Го́споди, воззва́хъ: стихи́ры апо́стола, гла́съ 1. Подо́бенъ: Всехва́льніи му́ченицы.

Луча́ми Ду́ха* я́вѣ ты́ просвѣща́емь,* священноявле́нне Тимоѳе́е,* свѣтлѣ́йшій я́ко свѣти́льникъ яви́лся еси́,* обтека́я всю́ зе́млю* и просвѣща́я благода́тію.* И ны́нѣ моли́ся* дарова́ти душа́мъ на́шимъ* ми́ръ и ве́лію ми́лость.

Богому́дре Тимоѳе́е,* сла́дости пото́къ пи́лъ еси́* и богому́дренно напои́лъ еси́* ра́зума Бо́жія те́плѣ жела́ющія,* Христу́ подража́я.* Къ Нему́же ны́нѣ ра́достно отше́лъ еси́,* сла́ву созерца́я Тро́ицы пресвѣ́тлую* и ми́ръ безмѣрноси́льный.

Па́влу повину́яся,* писа́ніемъ бесѣ́дуя Ду́ха,* свѣтосія́ненъ ве́сь бы́лъ еси́,* дѣ́латель неску́денъ* и те́плъ уго́дникъ Госпо́день, всему́дре,* цѣлому́дреннѣ, благоче́стнѣ,* о Тимоѳе́е, жи́тельствовавъ,* и вѣнце́въ сподо́бился еси́ побѣ́ды,* я́ко зако́нный страда́лецъ.

Стихи́ры преподобному́ченика, гла́съ и подо́бенъ то́йже:

Му́чениковъ похвала́,* свѣ́тлы возста́вивъ побѣ́ды на пре́лесть,* тезоимени́тное, всеблаже́нне, благосла́віе* твои́мъ зва́ніемъ но́сиши,* всю́ду обноси́мь,* я́ко тве́рдъ побѣди́тель, Анаста́сіе,* и ны́нѣ возста́ви отъ грѣхо́вныхъ паде́ній* вѣ́рою чту́щія па́мять твою́.

Му́чениче Анаста́сіе,* свѣ́тлую возста́вивъ побѣ́ду на ле́сть,* воспрія́лъ еси́ сугу́бъ вѣне́цъ* по́стничества твоего́,* и тве́рдаго страда́нія,* и да́же до сме́рти противле́нія,*и чуде́съ тебѣ́ досто́йно дѣ́йство* Влады́ка Христо́съ дарова́.

Мíра концы́* твоя́ ны́нѣ пою́тъ чудеса́,* чудодѣ́йственне Анаста́сіе,* чудодѣ́йствіями бо* возме́здивъ, Христо́съ украси́ тя́,* му́ки Его́ ра́ди претерпѣ́вша,* и по сме́рти безсме́ртнаго* удосто́ился еси́* благосла́вія и блаже́нства.

Сла́ва, гла́съ 8:

Бо́гомъ предопредѣле́нъ и му́дрому Па́влу учени́къ бы́въ, научи́лся еси́ боже́ственнымъ, до́брѣ жи́тельствовавъ и вѣ́ру да́же до кро́ве несомнѣ́нно соблю́дъ, и вѣ́ренъ архіере́й показа́лся еси́, Тимоѳе́е апо́столе. Тѣ́мже идолонеи́стовствующія обличи́лъ еси́, дреко́ліемъ и ка́меніемъ ураня́емь, прія́лъ еси́ муче́нія вѣне́цъ. Сего́ ра́ди, всеблаже́нне, моли́ся о на́съ, вѣ́рою соверша́ющихъ всечестну́ю па́мять твою́.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Госпо́дни.

Юница Нескве́рная, Юнца́ ви́дящи, на дре́вѣ пригвожда́ема во́лею, рыда́ющи жа́лостнѣ, — увы́ Мнѣ́, — вопія́ше, — люби́мѣйшее Ча́до! Что́ Ти со́нмъ воздаде́ безблагода́тный евре́йскій, хотя́ Мя обезча́дствовати отъ Тебе́, Вселюбе́зне?

На стихо́внѣ окто́иха.

Та́же глаго́лемъ припѣ́въ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

И пое́мъ стихи́ру самогла́сну апо́стола, гла́съ 1:

Свѣти́льника вѣ́рныхъ и апо́стола, во Ева́нгеліи просія́вшаго Тимоѳе́я, пріиди́те, лю́діе, воспои́мъ, глаго́люще: ра́дуйся, кра́сное вѣ́ры прозябе́ніе, боже́ственнаго Па́вла сынотворе́нія; ра́дуйся, честны́й зна́телю добродѣ́телей, многому́драя уста́ Сло́ва; ра́дуйся, конце́въ боговѣща́нная цѣвни́це; ра́дуйся, вѣ́ры сто́лпе и Це́ркве утвержде́ніе.

Сла́ва, гла́съ 2:

Возвели́чилъ еси́, Христе́, я́ко во Іуде́и и въ Вавило́нѣ честна́го Креста́ си́лу, увѣ́дѣша бо его́ ра́ди животво́рнаго воста́нія пра́здникъ, и бы́стъ и́мъ плѣне́нный свободи́тель идолонеи́стовства, и му́ченикъ неопи́санъ чуде́съ, ны́нѣ благохва́льный Анаста́сій, сла́вный страда́лецъ, со а́нгелы лику́я и моля́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Болѣ́зни претерпѣ́вши мно́гія въ распя́тіи Сы́на и Бо́га Твоего́, Пречи́стая, стоня́ше, слезя́щи и восклица́ющи: увы́ Мнѣ́, Ча́до сла́дкое, безъ пра́вды ка́ко стра́ждеши, хотя́ изба́вити я́же отъ Ада́ма земноро́дныя? Тѣ́мже, Пречи́стая Дѣ́во, Тебе́ мо́лимъ вѣ́рою: ми́лостива на́мъ Того́ содѣ́лай.

Тропа́рь апо́стола, гла́съ 4:

Бла́гости научи́вся и трезвя́ся во всѣ́хъ, благо́ю со́вѣстію священнолѣ́пно обо́лкся, поче́рплъ еси́ отъ сосу́да избра́ннаго неизрече́нная и, вѣ́ру соблю́дъ, ра́вное тече́ніе соверши́лъ еси́, апо́столе Тимоѳе́е. Моли́ Христа́ Бо́га спасти́ся душа́мъ на́шимъ.

Тропа́рь му́ченика, гла́съ то́йже:

Му́ченикъ Тво́й, Го́споди, Анаста́сій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего, имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


НА УТРЕНИ,
Кано́нъ окто́иха еди́нъ и святы́хъ два́, на 8.

Кано́нъ апо́стола, его́же краегране́сіе: Тимоѳе́я апо́стола пѣ́сньми честву́ю. Творе́ніе Ѳеофа́ново, гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Воста́нія страсте́й и невѣ́дѣнія мра́къ моли́твами твои́ми, блаже́нне, разори́ свѣ́тлою безстра́стія благода́тію, я́ко да богоявле́нна ны́нѣ досто́йно воспою́ тя.

Ви́дѣвъ Предвѣ́дѣцъ и Бо́гъ твоего́ ума́ добро́ту, Тимоѳе́е, боже́ственнымъ апо́столомъ тя́, сослужи́теля удосто́ивъ, показа́, му́дрымъ про́мысломъ о на́съ промышля́я.

Еди́но Пресу́щественное Нача́ло, проразумѣва́ющее вся́, вѣ́мы: отъ е́ллинъ бо апо́столъ, Христо́вою просвѣще́нъ благода́тію, ны́нѣ боже́ственному Па́влу счисля́ется Тимоѳе́й.

Му́ченика.

Утромъ свѣтлѣ́йшимъ Твоего́, Христе́, воста́нія осіява́емь, сего́ тезоимени́тый, отъ восто́ка устреми́вся, я́ко со́лнце, ны́нѣ Це́рковь озаря́етъ чудесы́.

Боже́ственныя любве́ испо́лненъ, терпѣли́вно му́ки претерпѣ́лъ еси́, му́чениче Анаста́сіе, и Христу́, по́стническими укра́шенъ добро́тами, ра́дуяся, приве́лся еси́, благово́нная же́ртва, блаже́нне.

Богоро́диченъ: Ра́дуйся, благода́ти исто́чниче, ра́дуйся, лѣ́ствице и две́ре небе́сная, ра́дуйся, све́щниче, и ста́мно злата́я, и горо́ несѣко́мая, Яже Жизнода́вца Христа́ мíру Ро́ждшая.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Излія́ся, всеблаже́нне, бога́тно благода́ть во устна́хъ твои́хъ и рѣ́ки догма́товъ источи́, Це́рковь Христо́ву напая́ющія и многопло́денъ принося́щія пло́дъ, Тимоѳе́е христопроповѣ́дниче, богому́дре апо́столе.

Но́ги твоя́ проро́чески, всеблаже́нне, украси́шася, вся́къ бо у́мъ, я́вѣ преиму́щій, благовѣсти́лъ еси́ ми́ръ, всему́дре, дре́внюю разруши́вшаго человѣ́ковъ бра́нь Спа́са всѣ́хъ и Го́спода.

Умертви́въ твоя́ у́ды плотскíя, Сло́ву повину́лъ еси́ ху́ждшая, блаже́нне Тимоѳе́е, влады́чество пода́въ лу́чшему, и, стра́сти удержа́въ, ду́шу уясни́лъ еси́, наставля́емь Па́вловыми уче́ніи.

Му́ченика.

Стезю́ ше́ствовавъ тѣ́сную, пе́рвѣе у́бо поще́ніемъ къ му́ченической сла́вѣ предуспѣ́лъ еси́, муче́нія ра́ди наслажде́ніе обрѣ́тъ болѣ́зньми, сла́вне му́чениче Анаста́сіе, небе́сную красоту́ пріе́мля.

Болѣ́знь страда́нія твоего́ во всю́ изы́де вселе́нную, му́чениче непобѣди́ме: проти́ву бо грѣха́ да́же до кро́ве сопроти́вився, побѣдоно́сецъ бы́лъ еси́ и вѣнце́мъ побѣ́ды украси́лся еси́.

Богоро́диченъ: Изъ Тебе́ прозябе́, Чи́стая, Цвѣ́тъ неувяда́емый, благоуха́ющій все́ человѣ́чество Боже́ственнымъ мѵ́ромъ естества́ Своего́, Иже Отцу́ Собезнача́льный, и изъ Тебе́ бы́въ подъ лѣ́томъ, Дѣ́во Всенепоро́чная.

Сѣда́ленъ, гла́съ 4. Подо́бенъ: Ско́ро предвари́.

Боже́ственными дарова́ніи укра́шенъ, удобри́лъ еси́, сла́вне, Ефе́сскую свѣ́тлую митропо́лію, апо́столе, проповѣ́дникъ бо показа́лся еси́, съ Па́вломъ боже́ственнымъ всѣ́мъ провозвѣсти́лъ еси́ спаси́тельное сло́во. Тѣ́мже торжеству́емъ вѣ́рою па́мять твою́.

Сла́ва, му́ченика, гла́съ то́йже:

Сла́вою соверше́нства яви́лся еси́ прече́стенъ, я́ко Боже́ственными просвѣти́въ свѣтозаре́ніи у́мъ и позна́въ Креста́ крѣ́пость, преподо́бенъ посто́мъ и кровьми́ му́ченикъ бы́лъ еси́, богому́дренне, Анаста́сіе блаже́нне. Тѣ́мже и чуде́съ тобо́ю то́читъ да́ръ Христо́съ.

И ны́нѣ, богоро́диченъ:

Дѣ́во Всенепоро́чная, я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній, и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, Еди́на Всепѣ́тая.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рть, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Зако́нно, всеблаже́нне, пострада́ти изво́ливъ, воздержа́ніемъ всеконе́чнымъ треволне́нія страсте́й уму́ покори́лъ еси́, добродѣ́тели пріе́мъ соверше́ніе, великопроповѣ́дниче богому́дре Тимоѳе́е.

Облиста́въ, я́ко со́лнце, Па́велъ, испусти́, я́коже зарю́ свѣ́тлу, вселе́нную бога́тнымъ свѣ́томъ просвѣща́я, свѣтоявле́нно тя́, богоявле́нне Тимоѳе́е, къ наставле́нію на́шему и утвержде́нію.

Возжела́въ те́плѣ жела́ній кра́йнѣйшее и любо́вію сраствори́вся, раче́ніемъ на другу́ю жи́знь преше́лъ еси́, богопрія́тне, всегда́ твоего́ созира́я Рачи́теля и Того́ видѣ́нія насыща́яся.

Му́ченика.

Ничто́же тя́ су́щія ко Христу́ любве́ отлучи́: ни удо́въ отсѣче́ніе, ни ра́нъ преще́ніе, ни ме́чь, ни сме́рть, но ниже́ о́гнь, ниже́ гла́дъ, Анаста́сіе, небе́снаго ликова́нія купносе́льниче.

Со усе́рдіемъ на ра́мо кре́стъ тво́й взе́мъ, послѣ́довалъ еси́ Христо́вымъ спаси́тельнымъ за́повѣдемъ и, Сего́ бы́въ подража́тель да́же до сме́рти, всеизря́днѣйше, ны́нѣ наслажда́ешися Того́ свѣ́тлости.

Богоро́диченъ: Ра́дость Тебѣ́ я́вѣ съ небесе́ прише́дъ, архистрати́гъ, Чи́стая, благовѣсти́, ре́къ: Бо́гъ изы́детъ съ пло́тію изъ Тебе́, Дѣ́во Всечи́стая, во спасе́ніе любо́вію пою́щихъ Тя́.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Пе́рваго и всѣ́хъ Вино́внаго Свѣ́та невеще́ственными сія́ніи просвѣща́емь, мíръ уясни́лъ еси́ проповѣ́даніемъ честны́мъ, свѣти́льникъ благоче́стія, жи́зни сло́во преимѣ́нія проявле́нно яви́лся еси́, священнотаи́нниче всеблаже́нне.

Па́вла боже́ственнаго и́стинный учени́къ учи́теля стопа́мъ послѣ́дуетъ, сего́ сѣ́я уче́нія вѣ́рнымъ, и́миже благоче́стія къ свѣ́ту наставля́еми, изъ но́щи у́тренююще, славосло́вимъ Тя́, Человѣколю́бче.

Просвѣще́ніемъ Па́велъ вторы́й явля́ешися, служа́щій пе́рвѣй свѣ́тлости, сея́ позна́ніемъ просвѣти́ на́съ. Сего́ сво́инникъ Тимоѳе́й яви́ся, Того́ всеору́жіемъ побѣди́тельно огражда́емь.

Му́ченика.

Дре́вле хваля́йся безмѣ́рно, и зе́млю претя́ объя́ти, и всу́е гордя́ся, мо́ре, му́дре, все́ потреби́ти, твои́ми благому́жествы, Анаста́сіе му́чениче, попира́ется богопроти́вный.

Зако́нно пострада́въ му́ченикъ Христо́въ и побѣди́въ, страда́ніи возме́здія, чуде́съ дѣ́йство пріе́млетъ я́вѣ: неду́ги бо цѣли́тъ и де́моны отгоня́етъ, Христо́вою си́лою чудодѣ́йствуя, Анаста́сій.

Богоро́диченъ: Прокля́тіе Евы, всѣ́хъ ма́тере, Твои́мъ Рождество́мъ, Дѣ́во, упраздни́ла еси́, мíру благослове́ніе израсти́вши, Христа́: тѣ́мъ Тя́, ра́дующеся, и усты́, и язы́комъ, Богоро́дицу вои́стинну исповѣ́дающе, велича́емъ.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Колесни́ца Бо́жія яви́лся еси́, Тимоѳе́е, нося́щи Того́ Боже́ственное и́мя, предъ лице́мъ безбо́жныхъ мучи́телей, богопрія́тне, не ужаса́яся си́хъ сверѣ́пства: ты́ бо въ непобѣди́мую Спа́са крѣ́пость одѣ́ялся еси́.

Вѣне́цъ благолѣ́пенъ прія́лъ еси́, пребога́те Тимоѳе́е, богому́дре апо́столе, и діади́мою Ца́рствія досто́йно обложи́лся еси́, и предста́лъ еси́ престо́лу Влады́ки твоего́, съ Па́вломъ ра́дуяся въ се́лѣхъ небе́сныхъ, блаже́нне.

Мѵ́ромъ у́мнаго, Тимоѳе́е всече́стне, пло́тію на́съ ра́ди истоще́ннаго Христа́ обонява́емь, благово́ніе Сего́ прія́лъ еси́ и пре́далъ еси́ вѣ́рою тебѣ́ притека́ющимъ, таи́нниче неизрече́нныхъ свя́те, Того́ мы́сленныя любве́.

Му́ченика.

Заре́ю Кре́стною я́вѣ просвѣща́емь, пре́лести мра́къ разрѣши́лъ еси́ и побѣди́лъ еси́, спле́тся съ мучи́телемъ, всесла́вне, и, ра́дуяся, прія́лъ еси́ твоя́ побѣди́тельная, му́чениче Христо́въ Анаста́сіе, лику́я съ му́ченическими во́инствы.

Богоро́диченъ: Ве́сь ли́къ отъ Бо́га науче́нъ проро́ческій Твое́ прорече́ та́инство несказа́ннаго и боже́ственнаго зача́тія, е́же изъ Тебе́ Боже́ственнаго Сло́ва, Ма́ти Дѣ́во: Ты́ бо и́стиннѣйшій и дре́вній совѣ́тъ яви́ла еси́.

Конда́къ, гла́съ 1. Подо́бенъ: Ли́къ а́нгельскій.

Боже́ственнаго ученика́ и спутеше́ственника Па́влова Тимоѳе́я, вѣ́рніи, воспои́мъ вси́, съ си́мъ почита́юще му́драго Анаста́сія, возсія́вшаго отъ Перси́ды, я́ко звѣзду́, и отгоня́щаго душе́вныя на́ша стра́сти и неду́ги тѣле́сныя.

Икосъ:

Со́лнца мно́жае возсія́ лѣ́тнее святы́хъ торжество́, и вѣ́рныя просвѣти́, и де́монскую тмообра́зную си́лу отгна́ всю́, и неду́ги очи́сти, и проше́нія прося́щихъ испо́лни. Тѣ́мже притека́ю а́зъ, окая́нный, и молю́ся отъ болѣ́зни стра́стнаго моего́ се́рдца, да пріиму́, я́же хощу́, и обря́щу, я́же тре́бую: премѣне́ніе печа́ли, и житіе́ безпеча́льно, и прегрѣше́ній оставле́ніе, и боже́ственное врачева́ніе душе́вное и тѣле́сное.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Слико́вникъ небе́снаго чи́на ты́ по досто́инству бы́въ, весели́шися ра́достно, зари́ свѣтода́тельныя, блаже́нне, насыща́яся, священнотаи́нниче Тимоѳе́е, хва́льнаго возвѣща́я Бо́га и препросла́вленнаго.

Священнодѣ́йствуя Христо́во Ева́нгеліе, отъ добродѣ́тельныхъ высо́тъ богопи́санная посла́нія Па́велъ боже́ственнѣйшій, ра́дуяся, посла́ я́ко ученику́ тебѣ́, Тимоѳе́е, хва́льнаго возвѣща́я Бо́га и препросла́вленнаго.

Немощно́е пло́ти укрѣпля́ше благомо́щіемъ души́: я́ко безтѣле́сенъ бо, на земли́ ты́ жи́тельствовавъ, му́ченикъ бы́лъ еси́, во главу́ сокруша́емь, священнодѣ́телю та́инствъ Бо́жіихъ, богоблаже́нне.

Му́ченика.

Страда́лецъ вѣ́рныя поуща́етъ, я́вѣ о́бразъ показа́въ му́жество свое́ Боже́ственнѣй ны́нѣ подража́ти стра́сти во́льнѣй, ю́же за ны́ претерпѣ́ хва́льный отце́въ Бо́гъ и препросла́вленъ.

Равномо́щная Тро́ица вѣ́руется благоче́стія рачи́телемъ: до́бліи бо страда́льцы за Сію́ пострада́ша, кро́ви излива́юще, му́ченически борю́щеся, и ду́ши предаю́ще я́вѣ, и убива́еми.

Богоро́диченъ: Ра́дуйся, Чи́стая, изъ Тебе́ про́йде Па́стырь, Иже во Ада́мову ко́жу одѣ́явся, вои́стинну превозноси́мый во всего́ мя́, человѣ́ка, за благоутро́біе непости́жное, хва́льный отце́въ Бо́гъ и препросла́вленъ.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Стоя́нія а́нгельскаго сподобля́емь, показа́лся еси́, Тимоѳе́е блаже́нне, небе́сныхъ чино́въ, научи́вся бо преесте́ственно, свѣ́тлости си́хъ подража́лъ еси́, му́дре. Съ ни́миже воспѣва́еши, веселя́ся: да благослови́тъ тва́рь вся́ Го́спода и превозно́ситъ во вся́ вѣ́ки.

Си́лою одѣ́явся съ небесе́, я́ко апо́столъ, яви́лся еси́, богому́дре, наше́дшею страннообра́зно ученико́мъ Сло́ва и самови́дцемъ, о Тимоѳе́е! Съ ни́миже воспѣва́еши, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Ста́лъ еси́ жела́нія я́вѣ, всеблаже́нне, кра́йнѣйшаго, я́ко дости́глъ до́брыхъ, Тимоѳе́е богопроповѣ́дниче, всегда́ осія́емь свѣ́томъ Тро́ическимъ я́сно, и ны́нѣ воспѣва́еши, веселя́ся: да благослови́тъ тва́рь вся́ Го́спода и превозно́ситъ во вся́ вѣ́ки.

Му́ченика.

Отъ земли́ ты́ къ небесе́мъ вѣнцено́сецъ, му́чениче Анаста́сіе, возлетѣ́лъ еси́, ле́сти вся́кія де́монскія избѣ́гъ, и попра́лъ еси́ и́дольская чти́лища. Тѣ́мже и зове́ши ны́нѣ, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Омочи́лъ еси́ му́ченическими твои́ми кровьми́ твою́ оде́жду, пребога́те му́чениче, кре́стъ же, я́ко ски́птръ, нося́, со Христо́мъ ца́рствуеши во вѣ́ки, Анаста́сіе, Ему́же ны́нѣ воспѣва́еши, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Арха́нгельскими пѣсносло́віи сла́вимый, Бога́тное Сло́во на́съ ра́ди обнища́, Тя́ Ма́терь, добро́ту Іа́ковлю, Благослове́нная, избра́въ. Тѣ́мже, воспѣва́юще, пое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Рече́ніе Дави́дово испо́лнися, я́ко бо мо́лнія, вселе́ннѣй яви́лся еси́, проповѣ́даніемъ озаря́я концы́, всеприснопа́мятне блаже́нне Тимоѳе́е, тѣ́мъ тя́, богоявле́нне, непреста́нно велича́емъ.

Заре́ю свѣтонача́льною, прему́дре, Богонача́льнымъ Трисо́лнечнымъ осія́ніемъ насыща́яся и чи́сто наслажда́яся, пою́щія тя́, блаже́нне, спаса́й отъ мра́ка прегрѣше́ній, священнотаи́нниче всече́стне.

Ра́вна Тя́ Отцу́ и Ду́ху, Единоро́дне, пра́вѣ му́дрствующе, сла́вимъ, уче́ньми апо́столовъ Твои́хъ, Влады́ко, утвержда́еми, Па́вла, проповѣ́дника Твоего́ смотре́нія, и Тимоѳе́я богому́драго.

Му́ченика.

Струя́ми твои́хъ крове́й, сла́вне, и́дольскую ле́сть всю́ погаси́лъ еси́, исполне́ніе же Це́ркве уясни́лъ еси́, о не́йже моля́ся, всеизря́днѣйше, не преста́й Влады́цѣ, да тя́ вси́ блажи́мъ.

О, па́че сло́ва сла́вы твоея́ и неизрече́ннаго Боже́ственнаго вои́стинну осія́нія! Его́же причасти́лся еси́ я́ко побѣди́тель, Анаста́сіе, Влады́цѣ Христу́ предстоя́, Его́же и ны́нѣ моли́ о на́съ, воспѣва́ющихъ тя́.

Богоро́диченъ: О, стра́шнаго Твоего́ чудесе́! Ты́ бо, Дѣ́во Богоро́дице, та́инство, пре́жде родо́въ и пре́жде вѣко́въ сокрове́нное въ Бо́зѣ, вся́ созда́вшемъ, ро́ждши Бо́га Сло́ва несказа́нно, яви́ла еси́.

Свѣти́ленъ. Подо́бенъ: Свѣ́те неизмѣ́нный.

Два́ свѣти́ла въ мíрѣ сія́ютъ свѣтоно́сно, Тимоѳе́й же вели́кій во Христо́выхъ апо́столѣхъ и Анаста́сій му́ченикъ во единообра́зныхъ, и́хже восхва́лимъ вку́пѣ.

Сла́ва, и ны́нѣ, богоро́диченъ:

Вси́ вѣ́рніи, Тя́ Хода́таицу ко изъ Тебе́ ны́нѣ Ро́ждшемуся предлага́емъ, Пресвята́я, мы́ же лу́чшаго ра́ди сраспина́емся Сему́. Тѣ́мже не преста́й о на́съ моля́щи.

На стихо́внѣ окто́иха. Сла́ва, гла́съ 5:

Преподо́бне о́тче, побѣди́тель Ми́довъ и Халде́евъ бы́въ мы́сленныхъ, всю́ Вавило́на пре́лесть низложи́въ си́лою Креста́, ни гла́дкостію сласте́й умягчи́лся еси́, ни огня́ искуше́ній убоя́лся еси́. Сего́ ра́ди Христо́съ Бо́гъ на́шъ почестьми́ побѣди́тельными тя́ вѣнча́. Тѣ́мже, со а́нгелы предстоя́, ко Го́споду моли́ся, прося́ ми́ра и душа́мъ на́шимъ ве́лія ми́лости.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Егда́ Гро́здъ, ненасажде́нъ су́щъ, я́ко лоза́, отрасти́ла еси́, узрѣ́вши на дре́вѣ повѣ́шена, прободе́на же копіе́мъ въ Боже́ственная ре́бра, — что́ сіе́, — глаго́лала еси́, — Сы́не и Бо́же Мо́й? Ка́ко, Иже неду́ги вся́ и стра́сти исцѣля́яй, стра́сти терпи́ши, Безстра́стенъ сы́й по естеству́ Боже́ственному? Что́ Тебѣ́ безблагода́тніи лю́діе, Благодѣ́телю, сія́ возда́ша, вмѣ́сто благодѣя́ній? — вопія́ла еси́, Пречи́стая. Но Того́ страстьми́ страсте́й мя́ свободи́ти моли́ непреста́нно, я́ко да сла́влю Тя́.


НА ЛИТУРГІИ,

Блаже́нна окто́иха, на 4, и апо́стола пѣ́снь 3-я, на 4. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Тимоѳе́ю, зача́ло 290, отъ полу́: Чадо Тимоѳе́е, благодарю́ Бо́га... Аллилу́ія, [гласъ 1]: Исповѣ́дятъ небеса́ чудеса́ Твоя́, Го́споди, и́бо и́стину Твою́ въ це́ркви святы́хъ. [Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Луки́, зача́ло 50. Прича́стенъ: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 255 об. – 261 об.

/ Къ оглавленію раздѣла /


Наверхъ / Къ титульной страницѣ

0