Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 20-й де́нь.
Послѣ́дованіе и́же во святы́хъ отцу́ на́шему Евѳи́мію, патріа́рху Те́рновскому.

НА ВЕЛИЦѢЙ ВЕЧЕРНИ,
Пе́рвыя каѳи́смы 1-й антифо́нъ: Блаже́нъ му́жъ... На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 4. Подо́бенъ: Да́лъ еси́ зна́меніе.

Ко исто́чнику воды́ живо́тныя,* Евѳи́мію, притеце́мъ всеусе́рдно,* вѣ́рою бо въ Сы́на Бо́жія* утро́бою источа́етъ рѣ́ки благода́ти неиждива́емыя,* и утоля́етъ сердца́ жа́ждущихъ пра́вды Бо́жія,* и умыва́етъ со́вѣсть умиле́нія слеза́ми,* и па́жить зла́чную утучня́етъ овца́мъ Бо́жіяго ста́да,* идѣ́же нѣ́сть печа́ли, ни воздыха́нія.

На дре́во многовѣ́твенное,* Евѳи́мія, воспари́мъ всеусе́рдно,* его́же ли́ствія Бо́жіихъ дарова́ній нераска́енныхъ* не отпадаетъ, насажде́ну су́щу при исхо́дищихъ во́дъ,* и е́же плоды́ своя́ подае́тъ во вре́мя свое́* вѣ́рнымъ въ наслажде́ніе* и, по Ева́нгелію, пти́цы небе́сныя, сыно́въ Ца́рствія,* покрыва́етъ отъ ва́ра грѣхо́внаго.

Ины стихи́ры, гла́съ 1, самогла́сны:

Пріиди́те, ви́дите неустраши́мую до́блесть па́стыря до́браго! Се́ бо послу́шаетъ Евѳи́мій Христа́, глаго́люща не боя́тися убива́ющихъ тѣ́ло, души́ же не могу́щихъ вреди́ти, и дерзнове́нно облича́етъ кровопи́тное неи́стовство нечести́выхъ, и чу́домъ посрамля́етъ немощну́ю зло́бу и́хъ. Си́це испо́лнися сло́во, я́ко а́ще Госпо́дь съ на́ми, никто́же на ны́. [Два́жды.]

Пріиди́те, ви́дите печа́ль, сердца́ растерза́ющую! Се́ бо разлуча́етъ вра́гъ Евѳи́мія патріа́рха па́ствы его́. И вси́ облива́ются слеза́ми и го́рько къ нему́ вопію́тъ: кому́ ны́ оставля́еши, сиротству́ющихъ, святѣ́йшій о́тче? — Не оставля́ющей, — глаго́летъ, — николи́жды никого́же Вездѣсу́щей Тро́ицѣ, Бо́гу на́шему, и ны́нѣ, и во вѣ́ки.

Пріиди́те, ви́дите любо́вь ве́лію па́ствы къ па́стырю. Се́ бо провожда́ютъ Евѳи́мія патріа́рха въ невозвра́тное заточе́ніе. И вси́ пла́чутъ и рыда́ютъ, ру́цѣ же его́ и но́зѣ цѣлу́ютъ и траву́, стопы́ его́ свяще́нными попра́нную, въ благослове́ніе себѣ́ востерза́ютъ. О, Голго́ѳы къ воскресе́нію и страсте́й во спасе́ніе!

Сла́ва, гла́съ 2:

О, адама́нтскія крѣ́пости души́ Евѳи́мія! Якоже бо рече́ апо́столъ, я́ко, его́же лю́битъ, Госпо́дь наказу́етъ, си́це и са́мымъ дѣ́ломъ на не́мъ сіе́ показа́ся: обрѣ́тъ бо его́, очище́на посто́мъ и моли́твою, соверши́ и еще́ Бо́гъ зла́то души́ его́ въ горни́лѣ трипла́меннаго огня́ искуше́ній — сострада́ніемъ у́бо утро́бы оте́ческія лю́демъ Свои́мъ, страхова́ніемъ сме́рти и да́льнимъ заточе́ніемъ, сотвори́въ со искуше́ніемъ избытіе́, и́мже и возмо́же понести́ побѣ́дою пра́вды. Тѣ́мже, о́тче Евѳи́міе, имѣ́я дерзнове́ніе ве́ліе ко Го́споду, избавля́й на́съ твои́ми къ Нему́ моли́твами отъ тя́жкихъ и лю́тыхъ боре́ній мучи́теля.

И ны́нѣ, богоро́диченъ пе́рвый, гла́са:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ, проки́менъ дне́ и чте́нія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 6:

Пра́вило Правосла́вія показа́ тя́ Христо́съ, Евѳи́міе о́тче, патріа́рховъ удобре́ніе: отъ ересе́й бо очи́стилъ еси́ жре́бій апо́стольства твоего́, пиша́ и глаго́ля вѣща́нія Ду́ха святы́я на́шея вѣ́ры. И кто́ ли не слы́ша твои́хъ слове́съ уче́нія? Кто́ ли же не пи́ воды́ живо́тныя усте́нъ твои́хъ и утро́бы? Наста́ви у́бо и на́съ ны́нѣ, святѣ́йшій о́тче, свѣ́томъ правосла́внаго богоразу́мія и беззазо́рнаго благоче́стія.

Гла́съ 2:

Се́ вои́стинну Моисе́й но́вый яви́ся на́мъ — Евѳи́мій блаже́нный, взы́де бо, я́коже о́нъ, на го́ру Аѳо́нскую, бѣ́гая мíра те́мныя пучи́ны и Бо́га созерца́я очище́ннымъ о́комъ души́ своея́; но слы́ша гла́съ Бо́жіяго зва́нія и сни́де къ наро́ду па́ки со скрижа́льми боговѣ́дѣнія, я́ко да веде́тъ и́хъ крѣ́пкою руко́ю путе́мъ благоче́стія, прогоня́емь же злочести́выми, па́ки на го́ру взы́де Родо́пскую, скорбя́ у́бо, па́ствы разлуча́яся, утѣша́яся же, поко́й жела́емый души́ пустыннолю́бныя обрѣта́я и воспѣва́я благода́рственная Го́сподеви.

Сла́ва, гла́съ 5:

Ублажи́мъ, вѣ́рніи, Евѳи́мія патріа́рха, дру́га друго́въ Бо́жіихъ и сожи́теля селе́ній и́хъ. Се́й бо, услы́шавъ гла́съ проро́ка, глаго́люща, — я́ко мнѣ́ зѣло́ че́стни бы́ша дру́зи Твои́, Бо́же, — возлюби́ святы́хъ, и безпоро́чно поревнова́ вѣнце́мъ и́хъ, и похвала́ми просла́ви и́хъ на земли́: Іоа́нна у́бо, Ры́льскія пусты́ни чудотво́рца, Иларіо́на же Мегли́нскаго, побори́теля ересе́й злочести́выхъ, и сла́вную во смире́ніи Пе́тку, преподо́бное прозябе́ніе Епива́тское и пусты́нное воспита́ніе Іорда́нское, и Недѣ́лю, въ му́ченицахъ вели́кую, и Филоѳе́ю, съ му́жемъ безму́жно пожи́вшую, и Михаи́ла, во́ина Царя́ Небе́снаго. Тѣ́мже по преставле́ніи прія́ша его́ въ кро́вы вѣ́чныя, и ку́пно съ ни́ми мо́лится ны́нѣ Го́сподеви о душа́хъ на́шихъ.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, вели́кій печа́льниче* земли́ Болга́рскія, Евѳи́міе!* Судо́мъ бо Бо́жіимъ попусти́ся тебѣ́* ви́дѣти стра́шная и ужа́сная:* ни́ву трудо́въ твои́хъ, звѣрьми́ попра́нную,* и виногра́дъ возлю́бленный, ве́прьми озо́банный,* ага́рянскимъ наше́ствіемъ и порабоще́ніемъ* церкве́й Бо́жіихъ разоре́ніе, монастыре́й же сожже́ніе,* олтаре́й святы́хъ раско́паніе и трапе́зъ свяще́нныхъ опроверже́ніе.* Но со слеза́ми, я́коже другíй Іеремíя, вопія́ ко Го́споду,* моли́ и ны́нѣ о на́съ,* дарова́ти душа́мъ на́шимъ ми́ръ и ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Ра́дуйся, вели́кій печа́льниче* земли́ Болга́рскія, Евѳи́міе!* Судо́мъ бо Бо́жіимъ попусти́ся тебѣ́* ви́дѣти стра́шная и ужа́сная:* ста́до твое́, Христу́ тезоимени́тое,* во́лки свирѣ́пыми разрѣва́емо и зу́бы же́стоко терза́емо,* па́ству твою́, на ту́чнѣй па́жити уче́ній твои́хъ воспита́нную,* мечи́ нечести́выхъ избива́ему,* це́ркви же Бо́жія кровьми́ правосла́вныхъ окропля́емыя,* и слы́шати во́плей ча́дъ твои́хъ возлю́бленныхъ* и утро́бою оте́ческою терза́тися,* но по́мощи ни еди́ныя,* и му́жественно вожделѣ́ти тебѣ́ сме́рти па́че живота́.* Но со слеза́ми, я́коже другíй Іеремíя, вопія́ ко Го́споду,* моли́ и ны́нѣ о на́съ,* дарова́ти душа́мъ на́шимъ ми́ръ и ве́лію ми́лость.

Сти́хъ: Моисе́й и Ааро́нъ во іере́ехъ Его́* и Самуи́лъ въ призыва́ющихъ и́мя Его́.

Ра́дуйся, вели́кій печа́льниче* земли́ Болга́рскія, Евѳи́міе!* Судо́мъ бо Бо́жіимъ попусти́ся тебѣ́* ви́дѣти стра́шная и ужа́сная,* но и небе́сныя ра́дости прича́стника тя́ Бо́гъ сотвори́,* и яви́ тебѣ́ безвѣ́стная Своя́ и та́йная,* и жи́знь твою́ чуде́снѣ спасе́ отъ меча́ ага́рянскаго,* и крѣ́пость му́дрости Боже́ственныя въ се́рдце твое́ вложи́,* я́ко да бу́деши стра́ждущей па́ствѣ твое́й* исто́чникъ утѣше́нія Утѣ́шителева неиждива́емый,* и слеза́ми провожда́ющихъ тя́ въ заточе́ніе не вельми́ сокруша́тися,* но я́ко наста́вникъ до́брый Святѣ́й Тро́ицѣ и́хъ вручи́ти.* Но со слеза́ми, я́коже другíй Іеремíя, вопія́ ко Го́споду,* моли́ и ны́нѣ о на́съ,* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Пріиди́те, возра́дуимся Го́сподеви, настоя́щую та́йну сказу́юще: восхотѣ́въ бо, искупи́лъ ны́ е́сть честно́ю Кро́вію Единоро́днаго Сы́на Своего́, но и па́ки согрѣша́ющимъ на́мъ любо́вію посыла́етъ грѣхо́въ очище́ніе страда́ніемъ въ вѣ́цѣ се́мъ ко спасе́нію душа́мъ. И — о, ми́лости у́бо Боже́ственныя! во страда́ніи же не лиша́етъ на́съ луче́й свѣ́та святы́хъ Свои́хъ, я́коже дре́вле болга́ръ не лиши́лъ е́сть сія́нія духо́внаго патріа́рха Евѳи́мія. Но, Го́споди, моли́твами его́ и ны́нѣ не отста́ви отъ на́съ вели́кія Твоея́ ми́лости.

И ны́нѣ, богоро́диченъ вторы́й, гла́са:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

Тропа́рь, гла́съ 4:

По́двигомъ пусты́ннымъ просія́лъ еси́* и на престо́лъ первосвяти́тельства по достоя́нію возше́лъ еси́,* отону́дуже луча́ми боговѣ́дѣнія и добродѣ́тели всѣ́хъ озари́лъ еси́* и ча́шу му́ченичества безкро́вно отпи́лъ еси́.* Ны́нѣ же предстоя́ престо́лу го́рняго Іерусали́ма, Евѳи́міе,* моли́ сѣдя́щаго на не́мъ Христа́ Бо́га на́шего* о почита́ющихъ честну́ю па́мять твою́. [Два́жды.]

И Богоро́дице Дѣ́во... [Еди́ножды.] И быва́етъ благослове́ніе хлѣ́бовъ и отпу́стъ.



НА УТРЕНИ,
На Бо́гъ Госпо́дь: Тропа́рь святи́теля, два́жды. Сла́ва, и ны́нѣ, богоро́диченъ: Еже отъ вѣ́ка утае́ное.

По 1-мъ стихосло́віи сѣда́ленъ, гла́съ 4. Подо́бенъ: Удиви́ся.

Удиви́хомся вси́,* ви́дяще до́блести твоя́,* Евѳи́міе пребога́те,* ка́ко кра́сныхъ мíра отре́клся еси́* и на по́двиги дерзну́лъ еси́ пусты́ннаго жи́тельства и первосвяти́тельства,* и ка́ко неустраши́мъ пребыва́лъ еси́* неви́димыхъ и ви́димыхъ враго́въ;* и Бо́гу сла́ву воспѣва́емъ тебе́ ра́ди,* я́ко въ му́ченичествѣ невреди́ма тя́ соблюде́* и по преставле́ніи сла́вы Своея́ сподо́би тя́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Удиви́шася, Чи́стая,* ли́цы а́нгельстіи,* ка́ко, Прича́стница су́щи* богатѣ́йшая ра́дости небе́сныя,* во юдо́ли скорбе́й человѣ́ческихъ при́сно пребыва́еши,* и ко вся́кому во́плю моли́твы ма́терски тщи́шися,* и благода́ть раздае́ши неиждива́емую,* больны́хъ исцѣля́ющи и печа́льныхъ утѣша́ющи,* Дѣ́во Ма́ти Госпо́дня* и сокро́вище простра́ннѣйшее ми́лости Боже́ственныя.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства Твоего́.

Красото́ю плѣне́нъ бы́въ лица́ Бо́жія,* Евѳи́міе преподо́бне о́тче на́шъ,* ничесо́же въ мíрѣ возлюби́въ, вся́ уме́ты вмѣни́лъ еси́* и, распала́емь любо́вію Бо́жіею,* въ пре́дняя простира́яся, за́дняя же забыва́я,* Краснѣ́йшаго сыно́въ человѣ́ческихъ* всели́лъ еси́ въ ду́шу твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Краснѣ́йшая очесе́мъ Бо́жіимъ* и добрѣ́йшая ви́димыхъ и неви́димыхъ* показа́лася еси́ всѣ́хъ, Дѣ́во Богоро́дице,* сего́ ра́ди избра́ Тя́ Оте́цъ въ Невѣ́сту Себѣ́,* Сы́нъ же Тя́ Себѣ́ Ма́терь стяжа́,* сотвори́вый и пита́яй вселе́нную.* Тѣ́мже ны́нѣ, ро́дъ человѣ́ческій,* по до́лгу Тя́ ублажа́емъ.

По поліеле́и сѣда́ленъ, гла́съ 8. Подо́бенъ: Прему́дрость.

Прему́дрость даде́ся ти́ пребога́тая* отъ Исто́чника прему́дрости — Христа́ Бо́га на́шего,* во е́же учи́ти лю́ди Правосла́вія догма́томъ* и води́ти я́ у́зкимъ путе́мъ благоче́стія* на па́жить Боже́ственныя благода́ти.* Тѣ́мже и потруди́лся еси́ и бы́лъ еси́ свѣти́льникъ,* на свѣ́щницѣ всѣ́мъ свѣтя́й ча́домъ Це́ркве Правосла́вныя* Христа́ Бо́га на́шего,* Его́же моли́ спасти́ и просвѣти́ти* любо́вію соверша́ющихъ честну́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Прему́дрость во чре́вѣ заче́нши,* неопа́льно родила́ еси́ всѣ́хъ Спа́са Го́спода* и мíру была́ еси́ вина́ обоже́нія,* на зе́млю бо низвела́ еси́ благоволе́ніе Отчее,* на не́бо же возвела́ еси́ ада́мскій ро́дъ,* откры́вши ему́ ра́йская врата́.* Лѣ́ствице небе́сная и две́ре рая́, Богоро́дице Марíе,* Христа́ Бо́га на́шего моли́* грѣхо́въ оставле́ніе дарова́ти* покланя́ющимся любо́вію* пречи́стому Рождеству́ Твоему́.

Та́же степе́нна 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. И ве́сь чи́нъ у́тренняго Ева́нгелія. Ева́нгеліе отъ Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Звѣзда́ яви́лся еси́ незаходи́мая, заря́ми уче́ній просвѣща́ющая зе́млю Болга́рскую всю́, и сѣ́веръ до океа́на, и за́падъ до Адріи, треблаже́нне Евѳи́міе, равностоя́телю а́нгеловъ и единоревни́телю апо́столовъ, уча́й вселе́нную словесы́ и добродѣ́тельми. Но и ны́нѣ, я́ко имѣ́я дерзнове́ніе ко Го́споду, не преста́й моля́ся о ча́дѣхъ твои́хъ, святѣ́йшій о́тче.

Кано́нъ [Богоро́дицы, со ирмосо́мъ на 6 и] святи́теля, гла́съ 2 [на 8], его́же краегране́сіе: Сѣ́ющіи слеза́ми ра́достію по́жнутъ. Дѣ́вій [Парѳе́ній].

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Стопа́мъ и́стинныхъ израильтя́нъ послѣ́дуя, преше́лъ еси́ те́мную пучи́ну мірску́ю, ника́коже омочи́въ ноги́ твоя́ ти́ною страсте́й, Го́сподеви поя́: сла́вно бо просла́вися.

Еди́ножды на Сина́и зако́нъ дре́вній даде́ся иногда́, въ Сіо́нѣ же но́вая благода́ть возсія́, я́же ты́, блаже́нне, обоя́ богопросвѣще́ннымъ умо́мъ но́во пре́далъ еси́ наро́ду твоему́ въ чистѣ́йшемъ блиста́ніи Правосла́вія, Го́сподеви поя́: сла́вно бо просла́вися.

Юный ле́въ изра́ильтескій при Моисе́и дре́вле Амали́ка побѣди́, ты́ же ага́ряны устраши́лъ еси́ и діа́вола посрами́лъ еси́ си́лою креста́, чу́домъ сохра́ншаго тя́ отъ меча́ и заколе́нія, Го́сподеви пою́ща: сла́вно бо просла́вися.

Богоро́диченъ: Щедро́тъ Бо́жіихъ, Ма́ти Всенепоро́чная, благослове́нна бу́ди, Христа́ бо поро́ждши, на́съ привела́ еси́ отъ сме́рти къ животу́ и отъ ги́бели грѣхо́вныя къ вѣ́чному блаже́нству, Го́сподеви пою́щихъ: сла́вно бо просла́вися.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Іису́са Сладча́йшаго Боже́ственное и́мя непреста́нно се́рдцемъ глаго́ля въ безмо́лвіи усте́нъ, во у́ши Бо́га Савао́ѳа моли́тву твою́ возноси́лъ еси́ и пѣ́лъ еси́: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Извѣ́стнымъ прикоснове́ніемъ благода́ти Ду́ха къ се́рдцу твоему́ коне́чнѣ умили́лся еси́ и, избы́въ о́бласти проти́внаго, всегда́ пѣ́лъ еси́: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Се́рдце твое́ по́двигомъ утверди́въ въ Го́сподѣ и въ опіяне́ніи Ду́ха при́сно пребыва́я, си́лою свы́ше чудеса́ мно́га соверши́лъ еси́ и пѣ́лъ еси́: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Богоро́диченъ: Лу́къ си́льныхъ изнемо́же, я́ко низложи́ Госпо́дь си́льныя со престо́лъ, и немотству́ющіи препоя́сашася си́лою, вознесе́ бо Бо́гъ смире́нныя, Дѣ́во Ма́ти Госпо́дня, пою́щія: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Сѣда́ленъ, гла́съ 8. Подо́бенъ: Повелѣ́нное та́йно.

Повелѣ́ніе воспріи́мъ глубино́ю души́* ученика́ возлю́бленнаго и апо́стола,* е́же не люби́ти мíра, ни вся́, я́же въ не́мъ,* оста́вилъ еси́ кра́сная и сла́дкая вся́,* воспрія́лъ же еси́ кре́стъ тво́й, послѣ́довавъ Христу́,* отъ Него́же и воспріе́млеши мзду́ вѣ́чнующую,* я́же на се́рдце человѣ́ка не взы́де,* и наслажда́ешися зрѣ́ніемъ сла́вы Его́ чи́стыя и невече́рнія. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Повелѣ́ніе любве́ Отчія исполня́я,* послушли́въ бы́въ да́же до сме́рти,* я́коже въ глави́знѣ кни́жнѣй писа́ся о Не́мъ,* Сы́нъ Бо́жій, Чи́стая, всели́ся во утро́бу Твою́,* Тя́ ши́ршую содѣва́я небе́съ и спосажда́я на престо́лѣ Ца́рствія Своего́,* отону́дуже раздаю́щи бога́тно ми́лости Твоя́,* не забу́ди и на́съ, Цари́це Небе́сная и Ма́ти Дѣ́во.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Еще́ въ ю́ности услы́шавъ Бо́га, снизше́дшаго спасти́ крѣ́постію ро́дъ человѣ́ческій и сокруши́ти си́лу вра́жію, Того́ неукло́нно послѣ́довалъ еси́ спаси́тельнымъ стопа́мъ, на плеща́хъ нося́ благо́е и́го и немо́лчно взыва́я: сла́ва си́лѣ Твое́й, Го́споди.

Зижди́тельную ми́лость Бо́жію вкуси́въ, е́юже въ черто́гъ введе́нъ бы́лъ еси́ благода́ти, Бо́га зрѣ́лъ еси́ неви́димое очище́нныма очи́ма и при́сно со умиле́ніемъ взыва́лъ еси́: сла́ва си́лѣ Твое́й, Го́споди.

Аще и любо́вію Свое́ю Бо́гъ стра́сти ве́лія на тя́ наведе́ и да́же до сме́рти, наказу́я тя́, наказа́, искуси́ти тя́ па́че восхотѣ́въ, но ты́ благода́рственно всегда́ взыва́лъ еси́: сла́ва си́лѣ Твое́й, Го́споди.

Богоро́диченъ: Ма́ти Дѣ́во Богоро́дице, горо́, прообразова́нная и пріосѣне́нная, изъ Тебе́ Святы́й пріи́де, добродѣ́телію покрыва́яй небеса́ и спаса́яй зову́щія: сла́ва си́лѣ Твое́й, Го́споди.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Иса́ія ви́дѣ проро́ческима очи́ма на престо́лѣ превознесе́ннѣ Бо́га, ты́ же, въ но́вѣй благода́ти священнодѣ́йствуя, Агнца Бо́жія, за всѣ́хъ закла́ннаго, жре́лъ еси́, и воскре́сшаго, и одесну́ю Отца́ сѣдя́щаго.

Раздира́я ду́шу свою́ ско́рбію крѣ́пкою, наро́дъ тво́й Тро́ицѣ пре́далъ еси́ на вѣ́ки, и у́бо взя́тъ бы́сть нечести́вый отъ среды́ мы́шцею высо́кою, и благоче́стіе па́ки процветѣ́ на земли́ Болга́рстѣй моли́твами твои́ми.

Ага́ряномъ нечести́вымъ, ча́да твоя́ мече́мъ убива́ющимъ, болѣ́лъ еси́ утро́бою, но па́ки ра́довался еси́ душе́ю, благоче́стію процвѣта́ющу на земли́ скорбе́й, слеза́ми ороша́емой.

Богоро́диченъ: Дре́вле Тя́ прови́дѣ Иса́ія, Богороди́тельнице, — я́ко Дѣ́ва, — вопія́, — во чре́вѣ пріи́метъ, и Дѣ́ва роди́тъ, и по рождествѣ́ па́ки Дѣ́ва пребу́детъ, Ма́ти Емману́илева.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Общникъ сы́й ада́мскаго ро́да и порожде́ніе, бе́здну грѣха́ избѣ́глъ еси́, не оскверни́вся ниже́ въ ю́ности, кре́стъ бо на ра́мо взе́мъ, не въ мо́ри погря́зъ, но на го́ру преображе́нія возше́лъ еси́.

Съ печа́лію се́рдца, я́коже Іо́на, ко Го́споду воззва́въ, услы́шанъ бы́лъ еси́ и вла́сти звѣре́й а́біе изба́вленъ злочести́выхъ у́бо, ку́пно же и преиспо́днихъ.

То́чію по изше́ствіи изъ сме́ртныя утро́бы ки́товы проро́къ дѣ́ло Бо́жіяго зва́нія соверши́, ты́ же по избавле́ніи мечна́го усѣче́нія усугу́билъ еси́ труды́ по́двига твоего́ и про́повѣди си́лы Бо́жія.

Богоро́диченъ: Іису́са моего́ Ма́ти Богоблагода́тная, въ мо́ри страсте́й обурева́емыхъ спаси́ ны, да свѣ́тло воспое́мъ си́лы Твоя́ и Сы́нови Твоему́ благода́рственная воздади́мъ, Пречи́стая.

Конда́къ, гла́съ 8. Подо́бенъ: Взбра́нной Воево́дѣ.

Во бра́ни неви́димой бы́въ побѣди́тель, отъ Вы́шнія десни́цы вѣне́цъ прія́лъ еси́, Евѳи́міе, преподо́бне о́тче на́шъ, во бра́ни же съ злочести́выми неодолѣ́нный, усу́губилъ еси́ мзду́ твою́ въ кро́вѣхъ небе́сныхъ. Тѣ́мже воспѣва́емъ ти́ такова́я: ра́дуйся, страда́льче безкро́вный земли́ Болга́рскія.

Икосъ:

Ника́коже вои́стинну бы́сть бра́нь твоя́, по вели́кому Па́влу, проти́ву кро́ве и пло́ти, но къ нача́ломъ, и ко власте́мъ, и къ міродержи́телемъ тмы́ вѣ́ка сего́, къ духово́мъ зло́бы поднебе́снымъ, и, побѣжда́я, побѣди́лъ еси́ лука́ваго пре́жде на по́прищи души́ твоея́ пустыннолю́бныя, послѣди́ же на суди́щи ага́рянъ злочести́выхъ. Сего́ ра́ди воспѣва́емъ ти́ такова́я: ра́дуйся, страда́льче безкро́вный земли́ Болга́рскія.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Юдинымъ уя́звленъ сребролю́біемъ, ца́рь гре́ческій въ заточе́ніе тя́ посла́, тре́буя зла́та и сребра́, но ты́ раздая́ніемъ свои́хъ си́ и нестяжа́ніемъ обрѣ́лъ бя́ше безцѣ́нный би́серъ — Христа́, Иже благослове́нный Бо́гъ оте́цъ на́шихъ.

Па́ки ца́рь ту́рскій отъ па́ствы тя́ разлучи́, хотя́ загради́ти богоглаго́ливыхъ усте́нъ твои́хъ про́повѣдь благоче́стія, но и на мѣ́стѣ заточе́нія твоего́ собра́ ти́ ста́до слове́сное Па́стырь Христо́съ, благослове́нный Бо́гъ оте́цъ на́шихъ.

Обы́чно соверши́въ дѣ́ло свое́ на зе́мли мно́гими лѣ́ты, я́ко кла́съ зрѣ́лый, пожа́ тя рука́ а́нгела Бо́жія, и прія́ тя, я́ко стори́чный пло́дъ, въ жи́тницу вѣ́чнаго воздая́нія Христо́съ, благослове́нный Бо́гъ оте́цъ на́шихъ.

Богоро́диченъ: Же́нъ лу́чшихъ избра́ніе, блажи́мъ Тя́, Богоро́дице Чи́стая, горо́ усыре́нная, изъ нея́же ка́мень отсѣче́ся — Христо́съ, Иже истука́нъ столпотворе́ній человѣ́ческихъ до конца́ сокруши́, благослове́нный Бо́гъ оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Ну́ждно въ разжже́нную пе́щь страсте́й бѣ́съ хотя́ше тя́ ври́нути, но не возмо́же вселука́вый, отъ ю́ности бо ты́ благо́му по́двигу навы́къ, ду́шу слеза́ми всегда́ ороша́я, прохлажда́лъ еси́, поя́ и превознося́ Бо́га во вся́ вѣ́ки.

Ужа́сенъ, ста́рца твоего́, Ѳеодо́сія чу́днаго, ви́дѣвъ всего́, я́ко о́гненна, ве́сь устреми́лся еси́ ко огню́ Ду́ха, попаля́ющему грѣхо́въ те́рніе, ду́шу же согрѣва́ющу теплото́ю жи́зни, поя́ и превознося́ Бо́га во вся́ вѣ́ки.

Твои́ми моли́твами, я́коже другíй Илія́, огне́мъ со́лнечнымъ изсо́хшую зе́млю бога́тно дожде́мъ напои́лъ еси́, люде́й же обдари́лъ еси́ гобзова́ніемъ плодо́въ земны́хъ же и небе́сныхъ, поя́ и превознося́ Бо́га во вся́ вѣ́ки.

Богоро́диченъ: Дерза́юще, и мы́, — ра́дуйся, — вопіе́мъ Ти́, Чи́стая, чистото́ю а́нгеловъ превозше́дшая и Бо́га во утро́бу Твою́ все́льшая, Ма́ти Бо́жія, изба́ви ны́ отъ па́губы грѣхо́вныя.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Ева́нгеліе еди́но сокро́вище имѣ́лъ еси́, нищенству́я пло́тію на земли́, но, я́коже вели́кій апо́столъ, ничесо́же содержа́, мно́гихъ обогати́лъ еси́ сокро́вищи Ду́ха, къ деснѣ́й гряду́щаго Судіи́ лю́ди предуготовля́я.

Вознося́й смире́нныя Госпо́дь вознесе́ тя́ изъ глубины́ и́ноческаго смире́нія на престо́лъ первосвяти́тельства, отту́ду же на не́бо небесе́ и вѣнча́ тя́ вѣнцы́ преподо́бія и безкро́внаго му́ченичества.

Іера́рше Христо́въ и учи́телю Правосла́вія, Евѳи́міе, святѣ́йшій о́тче, его́же вѣща́нія сла́дцѣ послу́шаше ве́сь христоимени́тый Изра́иль, утверди́ ны́ въ благоче́стіи моли́твами твои́ми.

Богоро́диченъ: И мы́ Тебѣ́ вопіе́мъ, я́коже дре́вле Предте́чева ма́ти, Дѣ́во Всечестна́я: отку́ду на́мъ сіе́, я́ко къ многогрѣ́шнымъ прихо́диши и всѣ́мъ помога́еши неистощи́мою ми́лостію Твое́ю.

Свѣти́ленъ, гла́съ 3. Подо́бенъ: Пло́тію усну́въ.

Душа́ твоя́, Евѳи́міе,* досто́йно снабде́ся къ Бо́гу съ дерзнове́ніемъ,* се́рдце же твое́, святи́телю,* не тѣ́сно вмѣща́етъ люде́й твои́хъ.* Не преста́й у́бо моля́ся о на́съ,* да изба́вимся сѣте́й врага́ лука́ваго. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Марíе Богоневѣ́стная,* христіа́номъ Предста́тельнице,* а́нгеломъ же Цари́це* и всѣ́мъ святы́мъ Первостоя́тельнице,* не преста́й моля́щи Го́спода* о правосла́вно воспѣва́ющихъ Тя́.

На хвали́техъ поста́вимъ стихо́въ 4 и пое́мъ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Евѳи́мій, о́трасль боже́ственная* отъ ко́рене благоро́днаго,* прозяба́етъ и бога́тно процвѣта́етъ* и плоды́ сла́дкія благоче́стія прино́ситъ* по́стническаго воздержа́нія* и богослы́шныя моли́твы,* на свѣ́щницѣ же святи́тельства* сло́вомъ уче́нія изря́дно всѣ́хъ осіява́етъ,* и страда́ніемъ, и му́ченическимъ изгна́ніемъ,* и беззазо́рнымъ къ вѣ́чному животу́ прехожде́ніемъ,* и чуде́съ проявле́ніемъ,* и къ Бо́гу те́плымъ предста́тельствомъ.

О, пресла́внаго чудесе́!* Евѳи́мій, па́стырь до́брый, по рече́нному,* ду́шу свою́ тщи́тся положи́ти за о́вцы,* дерзнове́нно бо облича́етъ нечести́ваго мучи́теля,* ка́ко, мину́я па́стыря,* кровопроли́тно устреми́лся е́сть на ста́до;* тѣ́мже и су́дъ сме́ртный воспріе́млетъ отъ беззако́нника,* но рука́ а́нгела Бо́жія ме́чь удержава́етъ,* сохрани́ти хотя́ въ живы́хъ святи́теля* наро́ду во утѣше́ніе,* а́ще и въ изгна́ніи.

О, пресла́внаго чудесе́!* Евѳи́мій, пусты́нное воспита́ніе* горы́ свяще́ннаго Аѳо́на* подъ кро́вомъ Бо́жія Ма́тере,* учени́къ же Ѳеодо́сія чу́днаго,* и Калли́ста богодухнове́ннаго,* и Григо́рія, сина́йскихъ отце́въ сподви́жника,* па́че же всѣ́хъ возлю́бленникъ Святы́я Тро́ицы,* Юже возлюби́въ, по́двигомъ и добродѣ́телію въ ду́шу свою́ всели́,* Ейже и па́ству свою́ во вѣ́ки вручи́,* и, къ Не́йже ны́нѣ предстоя́,* непреста́нно мо́лится о на́съ.

О, пресла́внаго чудесе́!* Евѳи́мій, сѣди́нами укра́шенъ,* въ го́рняя вселя́ется* и соприча́стникъ а́нгеломъ быва́етъ,* на ло́нѣ же пра́отца Авраа́ма почива́етъ* и со всѣ́ми пра́ведными Свѣ́тъ невече́рній созерца́етъ,* причаща́ется же безмѣ́рно небе́снаго блаже́нства,* мзду́ воспріе́млетъ стори́цею земна́го труда́* и страда́ній за Христа́ неизрече́нныхъ* и мо́лится Бо́гу непреста́нно о душа́хъ на́шихъ.

Сла́ва, гла́съ то́йже:

Возсія́ па́ки на́мъ лѣ́тняя па́мять святи́теля Евѳи́мія Вели́каго, возсія́ на́мъ сла́ва и похвала́ благоче́стія болга́рскаго. Сего́ бо, отъ болга́ръ произше́дшаго, Моисе́йски возвы́силъ е́сть и́мъ въ первопа́стыря Началопа́стырь Христо́съ, води́ти я́ терно́внымъ путе́мъ искуше́ній ко обѣтова́нію спасе́нія душа́мъ. И бы́сть и́мъ въ сто́лпъ о́гненный, озяря́яй свѣ́томъ Пребоже́ственныя Тро́ицы пу́ть и́хъ благоче́стія, сквозѣ́ мра́чнаго мо́ря проходя́й и те́мныя пусты́ни нече́стія ага́рянскаго, и мо́лится при́сно о душа́хъ на́шихъ.

И ны́нѣ, богоро́диченъ, гла́съ то́йже:

Влады́чице, пріими́ моли́твы рабо́въ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое, [ектеніи́,] тропа́рь и отпу́стъ.



НА ЛИТУРГІИ,

Блаже́нна, [отъ кано́на святи́теля пѣ́снь 3 и 6.] Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, [гла́съ 2]: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. [Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Послѣдованіе иже во святыхъ отцу нашему Евѳимію, патріарху Терновскому. Твореніе недостойнаго во епископѣхъ Парѳенія Левкійскаго. — Софія: Синодально издательство, 1951. — С. 21-39.

/ Къ оглавленію раздѣла /


Наверхъ / Къ титульной страницѣ

0