Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 20-й де́нь.
Преподо́бнаго и богоно́снаго отца́ на́шего Евѳи́мія Вели́каго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Небе́сныя кру́ги превозлетѣ́въ,* добродѣ́телію боже́ственною, всеблаже́нне о́тче,* заше́лъ еси́ во мра́къ,* и́мже вои́стинну не въ гада́ніихъ, преподо́бне,* но во благода́ти яви́лся еси́ Бо́жіей,* осія́нія воспріе́мля. [Два́жды.]

Добродѣ́тельми просвѣти́въ ду́шу и у́мъ,* къ небеси́ преста́вился еси́ во Христо́во Ца́рствіе,* Евѳи́міе треблаже́нне,* принося́ Ему́ болѣ́зней твои́хъ рукоя́ти,* въ по́стницѣхъ просія́въ, я́коже свѣти́льникъ,* нестарѣ́емыя наслажда́ешися пи́щи.

Единосу́щная и́стинно Тро́ица Безнача́льная,* Ду́ха жили́ще въ тебѣ́ возложи́вши,* свѣтлѣ́йша свѣти́льника показа́ тя́,* богоно́се Евѳи́міе,* долевлеку́щихъ всѣ́хъ преше́дъ,* на небесѣ́хъ жили́ще обрѣ́лъ еси́.

Сла́ва, гла́съ 2:

Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха и, отъ Него́ пріе́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая. Ны́нѣ же Боже́ственнымъ свѣ́томъ чистѣ́е осіява́емь, просвѣти́ и на́ша мы́сли, Евѳи́міе о́тче.

И ны́нѣ, богоро́диченъ:

[Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ле́сти лука́выхъ* де́моновъ обличи́въ* Креста́ си́лою,* уясни́лъ еси́ сла́ву Христо́ву,* о́тче Евѳи́міе.

Сти́хъ: Честна́ предъ Го́сподемъ* сме́рть преподо́бныхъ Его́.

Взя́лся еси́, я́ко Илія́* на колесни́цѣ о́гненнѣй,* и предстои́ши, блаже́нне,* несре́дственно Тро́ицѣ,* Евѳи́міе прекра́сне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Нося́ въ рука́хъ твои́хъ,* о́тче, Кре́стъ Госпо́день,* де́монская мечта́нія* до конца́, Евѳи́міе,* истреби́лъ еси́.

Сла́ва, и ны́нѣ, богоро́диченъ:

Ра́дуйся,* Ра́дость мíра пріи́мшая,* Христа́ Жизнода́вца,* и преста́вльшая печа́ль,* Дѣ́во, прама́тернюю.

[Тропа́рь свята́го (пи́санъ на вели́цѣй вече́рни).
Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ.., поста́вимъ стихо́въ 8 и пое́мъ стихи́ры, гла́съ 1. Подо́бенъ: Всехва́льніи му́ченицы.

Отче Евѳи́міе,* твое́ рождество́ предвозвѣсти́* посла́нный небе́сный а́нгелъ,* я́ко прозя́бшаго изъ чре́ва непло́дныя Іоа́нна,* того́ бо яви́лся еси́ ревни́тель* и единонра́венъ, нестяжа́тель бездо́мный,* я́ко Крести́тель,* и въ гора́хъ пита́яся,* просія́въ безмѣ́рными чудесми́.

Отче Евѳи́міе,* пло́дъ прозя́блъ еси́ у́бо непло́дства,* но яви́лся еси́ вои́стинну многоча́денъ:* отъ сѣ́мене бо духо́внаго твоего́* мона́шествующихъ напо́лнися пусты́ня,* я́же пе́рвѣе непрохо́дна.* И ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Отче Евѳи́міе,* твое́ житіе́ преизя́щно,* и вѣ́ра вои́стинну правосла́вна,* и́бо отъ дѣя́нія къ высоча́йшему зрѣ́нію дости́глъ еси́,* прему́дрости бы́въ жили́ще,* во двою́ естеству́ Еди́наго честву́яй отъ Тро́ицы Христа́.* Его́же моли́ о душа́хъ на́шихъ.

Отче Евѳи́міе,* страсте́й о́бщникъ бы́въ* на Крестѣ́ Распросте́ршагося* ты́ поще́ніемъ,* воскресе́нію же Его́ и сла́вѣ* сообра́зенъ вои́стинну бы́лъ еси́.* Его́же ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Ины стихи́ры, гла́съ 4. Подо́бенъ: Зва́нный свы́ше.

Иже изъ чре́ва ма́терня освяще́нъ,* егда́ Всеви́дящее Око* предложе́ніе и клоне́ніе, къ лу́чшимъ веду́щее,* невозвра́тно твое́ прови́дѣ,* тогда́, всеблаже́нне, да́ръ богода́ненъ,* благоду́шія тезоимени́тый, возвѣсти́въ тя́,* роди́телей разрѣша́етъ сѣ́тованіе.* Тѣ́мже, отъ младе́нства произведе́нъ,* Благодѣ́телю Бо́гу благоугоди́лъ еси́.* Его́же моли́* спасти́ и просвѣти́ти ду́ши на́ша. [Два́жды.]

Иже дарова́ній* Боже́ственныхъ испо́лненъ,* тя́, я́ко нескве́рненно зерца́ло, о́тче,* обрѣ́тъ Христо́съ Боже́ственныхъ явле́ній,* свѣ́тлымъ сія́ніемъ* Своего́ свѣ́та тебѣ́ изоблиста́.* Отону́дуже исцѣле́ній оби́ленъ яви́лся еси́ исто́чникъ,* препита́тель же а́лчущихъ* и жа́ждущихъ одожде́ньми напая́яй жела́ніе,* душе́вныя же зало́ги зря́,* сло́вомъ, му́дре, лу́чшія сотвори́лъ еси́ Бо́гу.* Его́же моли́* спасти́ и просвѣти́ти ду́ши на́ша.

Зрѣ́ніемъ* и дѣя́ніемъ просія́въ,* твое́ у́бо равноа́нгельное житіе́ —* пра́вило добродѣ́тели* и о́бразъ извѣ́стнѣйшій* изволя́ющихъ Бо́гу служи́ти въ соверше́нствѣ.* Твое́ же богому́дрое сло́во, Евѳи́міе,* Тро́ицу чествова́ти научи́,* Христа́ же Еди́наго, во двою́ естеству́ познава́ема,* и собо́ры равночи́сленныя* четвери́цы Ева́нгелій Христо́выхъ.* Его́же моли́* спасти́ и просвѣти́ти ду́ши на́ша.

Сла́ва, гла́съ 3:

Освяще́нъ бы́въ Бо́гу изъ чре́ва ма́терня, я́ко другíй Самуи́лъ, о́тче Евѳи́міе, тезоимени́тно бы́лъ еси́ благоду́шіе вѣ́рныхъ, мона́шествующихъ же́злъ и утвержде́ніе, Свята́го Ду́ха чи́стое жили́ще. Испроси́ на́мъ, чту́щимъ тя́, ве́лію ми́лость.

И ны́нѣ, богоро́диченъ:

Ка́ко не диви́мся [Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2. Самогла́сны.

Ге́рманово: Благоду́шствуйте, — глаго́лаше роди́телемъ а́нгелъ Госпо́день, — я́ко отроча́ изъ чре́слъ роди́тся ва́мъ, благоду́шствія тезоиме́нно. Зача́лся же еси́ во чре́вѣ, нося́ тѣ́мъ обѣтова́ніе, и отъ пеле́нъ моли́твою воспита́лся еси́, о́тче Евѳи́міе.

Студи́тово: Укрѣпи́въ у́мъ ра́зумомъ боже́ственнымъ, о́тче Евѳи́міе, преходя́щая прете́клъ еси́, ника́коже удиви́вся земны́мъ, въ ско́рбехъ у́бо велему́дръ яви́вся и до́блественнѣйшій, въ постѣ́ же и благоду́шіи смире́нъ и кро́токъ, и прису́щаго житія́ нестоя́нную пучи́ну я́вѣ преплы́лъ еси́. Въ благоути́шное приста́нище дости́гъ, Христа́ моли́ поми́ловати ду́ши на́ша.

Су́щія въ житіи́ ве́щи презрѣ́лъ еси́, о́тче Евѳи́міе, я́ко вы́шняго житія́ возжела́вый, бога́тства возгнуша́лся еси́, одѣ́явся въ смире́ніе, пи́щу возненави́дѣлъ еси́ и облобыза́лъ еси́ воздержа́ніе, непра́вду отри́нулъ еси́, пра́вду погна́лъ еси́. Тѣ́мже, о́тче преподо́бне, помяни́ и на́съ въ преподо́бныхъ моли́твахъ твои́хъ ко Го́споду.

Сла́ва, гла́съ 4:

Просія́ша до́брая дѣла́ твоя́, я́ко со́лнце, на земли́ и на небеси́, Христо́въ уго́дниче Евѳи́міе, правосла́вно бо проповѣ́далъ еси́ на́мъ и́стинную и непоро́чную вѣ́ру Христо́ву. Тѣ́мже моли́ся, преподо́бне о́тче, въ па́мяти твое́й, богоно́сне, дарова́ти на́мъ ве́лію ми́лость.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 5. Подо́бенъ: Ра́дуйся, по́стниковъ.

Ра́дуйся, я́ко благоду́шія нача́ло Це́ркве бы́въ, о́тче преподо́бне, твои́мъ бо рождество́мъ вся́ ерети́ческая стремле́нія отъ Бо́жія про́мысла отрази́шася, тѣ́мже тебе́ тезоимени́тна имену́етъ Евѳи́мія. Небе́сныхъ у́бо суще́ствъ чи́ны ра́дости испо́лнилъ еси́ житія́ свѣ́тлостію, съ ни́миже и водворя́яся, и свѣ́та исполня́яся, и всеблаже́ннаго и боже́ственнаго наслажда́яся осія́нія, Христа́ ны́нѣ моли́ душа́мъ на́шимъ да́ти ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Жезло́мъ кре́стнымъ утверди́вся, беззако́нія пото́ки изсуши́лъ еси́, пото́комъ же сла́дости боже́ственныя и рая́ исто́чникомъ мы́сленно, всеблаже́нне, напая́емь, исто́чники спаси́тельныя въ пусты́ни показа́лъ еси́. Струя́ми же Боже́ственнаго Ду́ха, преподо́бне, утучня́емь, я́коже фи́никсъ, восте́клъ еси́ на высоту́ небе́сную и сто́лпъ огнезра́ченъ яви́лся еси́, богому́дре, и по́лнъ свѣтови́днаго осія́нія. Христа́ у́бо моли́ душа́мъ на́шимъ да́ти ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Вои́стинну да́же до ски́ніи чу́дны, да́же до до́му Бо́жія, всеблаже́нне, проше́лъ еси́ ра́дованіемъ и весе́ліемъ души́, идѣ́же шу́мъ, о́тче, пра́зднующихъ красе́нъ услы́шавъ, и сла́дкаго пѣ́нія, и неизрече́ннаго наслажде́нія, и красоты́ бы́въ во прича́стіи, Евѳи́міе. Его́же еди́наго жела́я, пло́ть умертви́лъ еси́, е́же и получи́лъ еси́, боже́ственною пра́вдою украша́емь, Христа́ моли́, подаю́щаго мíру ве́лію ми́лость.

Сла́ва, гла́съ то́йже:

Преподо́бне о́тче, не да́лъ еси́ сна́ твои́мъ очесе́мъ, ниже́ вѣ́ждомъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́ и тебе́ угото́валъ еси́ Ду́ха жили́ще: прише́дъ бо, Христо́съ со Отце́мъ оби́тель въ тебѣ́ сотвори́. И Единосу́щныя Тро́ицы уго́дникъ бы́въ, великопроповѣ́дниче о́тче на́шъ Евѳи́міе, моли́ся о душа́хъ на́шихъ.

И ны́нѣ, богоро́диченъ:

Блажи́мъ Тя́ Богоро́дице Дѣ́во, и сла́вимъ Тя́ вѣ́рніи [по до́лгу, гра́дъ непоколеби́мый, стѣ́ну необори́мую, тве́рдую предста́тельницу, и прибѣ́жище ду́шъ на́шихъ].

На благослове́ніи хлѣ́бовъ тропа́рь, гла́съ 4:

Весели́ся, пусты́ня неражда́ющая, благоду́шествуй, неболя́щая, я́ко умно́жи тебѣ́ ча́да му́жъ жела́ній духо́вныхъ, благоче́стіемъ насади́въ, воздержа́ніемъ воспита́въ добродѣ́телей въ соверше́нство. Того́ моли́твами, Христе́ Бо́же, умири́ живо́тъ на́шъ. [Два́жды.]

Богоро́дице Дѣ́во, ра́дуйся... [Еди́ножды.]



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ: Еже отъ вѣ́ка утае́нное...

По 1-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Свѣ́томъ сія́я непристу́пнымъ, я́ко звѣзда́, просія́лъ еси́ въ пусты́няхъ, уче́ньми просвѣща́я, Евѳи́міе, несомнѣ́нною душе́ю приступа́ющія къ тебѣ́. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Всечи́стая Дѣ́во, прибѣга́ющихъ, мольбу́ пріе́мши отъ на́съ, не преста́й моля́щися Человѣколю́бцу спасти́ рабы́ Твоя́.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Попече́ній житія́ отве́ргся и а́нгельское житіе́ воспріи́мъ, воздержа́ніемъ ду́шу удобри́лъ еси́ и чуде́съ отъ Бо́га благода́ть прія́лъ еси́ бога́тно, Евѳи́міе богоно́сне, о на́съ моли́ся, благоче́стно восхваля́ющихъ тя́. [Два́жды.]

Сла́ва, и ны́нѣ, богоро́диченъ:

Всесвята́я Дѣ́во, поми́луй на́съ, прибѣга́ющихъ вѣ́рою къ Тебѣ́, Благоутро́бнѣй, и прося́щихъ те́плаго Твоего́ заступле́нія: мо́жеши бо, я́ко Блага́я, вся́ спасти́, я́ко су́щи Ма́ти Бо́га Вы́шняго, Ма́тернія Твоя́ моли́твы при́сно употребля́ющи, Богоблагода́тная.

[Велича́ніе:

Ублажа́емъ тя́, преподо́бне о́тче Евѳи́міе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Нищету́ и́стинно на́съ ра́ди отъ Дѣ́вы Ро́ждшагося воспріи́мъ, вмѣни́лъ еси́ привре́менная, я́ко траву́, блаже́нне, разу́мнаго бо дре́ва вкуси́въ, преподо́бне, мона́шествующихъ показа́лся еси́ учи́тель боже́ственъ, тѣ́мже и къ ре́вности а́нгельскаго жи́тельства воздви́глъ еси́ вся́ и къ ра́зуму вѣ́ры. Знаменоно́сне Евѳи́міе, о́тче на́шъ, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безсѣ́менно ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́ и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ Всесвято́е Рождество́ Твое́ и согла́сно вопіе́мъ Ти́: моли́ Христа́ Бо́га прегрѣше́ній оставле́ніе дарова́ти покланя́ющимся вѣ́рою Всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы, со ирмосо́мъ на 6 и свята́го два́ кано́на, на 8.

Кано́нъ преподо́бнаго, его́же краегране́сіе, со ирмоса́ми: Бога́тство яви́лся еси́ земноро́дныхъ, Евѳи́міе. Іоа́нна Дамаскина́, гла́съ 4.
Пѣ́снь 1.

Ирмо́съ: Нѣ́сть Тебѣ́ подо́бенъ, препросла́вленный Го́споди, руко́ю бо крѣ́пкою изба́вилъ еси́ лю́ди, я́же стяжа́лъ еси́, Человѣколю́бче.

Разрѣша́еши сѣ́тованіе пресла́вно ро́ждшимъ тя́, отъ Бо́га обѣща́нъ бы́въ, и пре́жде рожде́нія твоего́ да́ръ, благоду́шія тезоимени́тъ.

Вопіе́тъ благода́рственное Це́рковь, преподо́бне, пріе́мши тя́ прозябе́ніе отъ Бо́га, ми́рнаго благоду́шія предвозвѣсти́тельное.

Другíй кано́нъ преподо́бнаго, его́же краегране́сіе: Твои́ми моли́твами, всеблаже́нне, свѣ́тъ мнѣ́ пода́ждь. Ѳеофа́ново, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Моли́твами твои́ми и мольба́ми умоля́й Бо́га, мра́чный о́блакъ уны́нія моего́, всеблаже́нне, разори́, благоду́шія сы́й и утѣше́нія испо́лненъ, Всецарю́ предстоя́.

Инъ нѣ́кій но́вый Самуи́лъ, богода́ненъ и пре́жде зача́тія обѣща́нъ бы́въ, о́тче, всѣ́мъ яви́лся еси́ Це́рквамъ, преподо́бне, тезоиме́нно зва́ніе, по обоему́ приводи́мь быва́я благоду́шія свѣ́тлостію.

Моли́твы и моле́нія дѣ́юще твои́ роди́теліе къ Бо́гу, да́ръ Боже́ственный тя́ пріе́млютъ и свѣтоно́сно прозябе́ніе, рождество́мъ возвѣща́юща благоче́стія осія́ніе и е́реси обличе́ніе.

Ты́ изъ дѣ́тства освяти́лся еси́, преподо́бне, да́вшему Бо́гу и, къ Нему́ зря́ и наставля́емь животво́рными повелѣ́ньми Его́, богоно́се, къ высотѣ́ взя́лся еси́ превысо́цѣй добродѣ́телей вѣ́рою.

Богоро́диченъ: Тя́, Богома́ти, предста́тельство иму́ще, не убои́мся враго́въ ополче́нія, сопроти́вящихся благоче́стно сла́вящимъ изъ Тебе́ рожде́ннаго Бо́га всѣ́хъ и Го́спода, Его́же за ны́ умоли́.

Катава́сія: Су́шу глубороди́тельную зе́млю...

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Тя́ ро́ждшая, Аннѣ поревнова́вши, преподо́бнаго я́ко дре́вле Самуи́ла, же́ртву жи́ву приведе́ Бо́гу, просла́вившему и́ пре́жде зача́тія.

Бога́тою къ Бо́гу любо́вію воспаля́емь, по́мысломъ всеблагочести́вымъ стра́сти удержа́лъ еси́, преподо́бне, тѣ́мже Боже́ственная благода́ть на тебѣ́ воспочи́ла е́сть.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Отъ непло́дныя ро́ждся, духо́внаго благопло́дія земледѣ́латель многоро́днѣйшій яви́лся еси́, те́рніе посѣка́я нече́стія, преподо́бне, и благоче́стія сѣ́мя Боже́ственно вмета́я.

Священнодѣйстви́теленъ преесте́ственныхъ и та́инственныхъ зрѣ́ній, богоно́се, бы́въ, невѣ́рныя приводя́ Христу́, боголѣ́пно вѣ́рующія, уче́ніи твои́ми, о́тче, науча́емыя лу́чшимъ.

Цѣлому́дреннѣйшимъ по́мысломъ и благочести́вымъ одержи́мь, теку́щихъ и тлѣ́емыхъ а́біе вѣ́чную жи́знь и сла́дость предызбра́лъ еси́, воздержа́ніемъ кра́йнимъ пло́ть умертви́въ, Евѳи́міе.

Огнепа́льною душе́ю и уя́звленною любо́вію Христо́вою, огнепа́льныхъ лови́твъ де́монскихъ избѣ́гъ, росода́тельною благода́тію просвѣти́лся еси́, о́тче, знаменоно́сецъ бы́въ.

Богоро́диченъ: Рече́нія Боже́ственныхъ проро́ковъ и тѣ́хъ проро́чествія запеча́тала еси́, ро́ждши Сло́во, глаго́лющее чрезъ тѣ́хъ, и тѣ́хъ испо́лнившая богоглаго́ланія вся́, Благослове́нная, Всенепоро́чная.

Катава́сія: Утвержде́ніе на Тя́ надѣ́ющихся...

Сѣда́ленъ, гла́съ 8. Подо́бенъ: Прему́дрости.

Воздержа́нія еле́емъ душе́вную испо́лнилъ еси́ лампа́ду духо́внѣ, жела́я присносвѣ́тлое Жениха́ твоего́ прише́ствіе, моли́твами бо́дренными соблю́лъ еси́, преподо́бне, и въ черто́зѣ Сего́ весели́шися, блаже́нне. Тѣ́мже досто́йно сла́дость прія́лъ еси́, и́стинно присноживо́тное чуде́съ дѣ́йствіе, богоно́се Евѳи́міе. Моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Благода́рственное похвале́ніе до́лжнѣ, я́коже вдова́ о́ная два́ ле́пта, приношу́ Тебѣ́, Влады́чице, о всѣ́хъ дарова́ніихъ Твои́хъ: Ты́ бо яви́лася еси́ покро́въ ку́пно и по́мощь, напа́стей и скорбе́й при́сно мя́ изъе́млющи. Тѣ́мже, я́ко отъ среды́ горя́щія пе́щи, изба́вився оскорбля́ющихъ мя́, отъ се́рдца взыва́ю Тебѣ́: Богоро́дице, помози́ ми, моля́щи Христа́ Бо́га прегрѣше́ній оставле́ніе да́ти мнѣ́, Тя́ бо имѣ́ю наде́жду, ра́бъ Тво́й.

Пѣ́снь 4.

Ирмо́съ: Приклони́лъ еси́, Христе́, низхожде́ніемъ Твои́мъ небеса́ въ ра́зумѣ и яви́лся еси́ воплоще́нъ на земли́. Тѣ́мъ вси́ вопіе́мъ: си́лѣ Твое́й сла́ва, Человѣколю́бче.

Сохрани́въ у́мъ непрело́женъ, отъ пеле́нъ житіе́мъ восхожде́ніе показа́лъ еси́ къ Бо́гу, Ему́же приближа́яся, взима́лся еси́ отъ си́лы, о́тче, въ си́лу.

Вожделѣ́лъ еси́ Христо́ва смире́нія, пресе́льникъ отсю́ду ко гра́ду богопріе́мному бы́въ, сраспя́тися ра́зумомъ Кресто́мъ Тебе́ ра́ди Пострада́вшему.

Зако́ннѣ пострада́ти произволя́я, совле́клся еси́ житія́: на́гъ же, противобо́рцу сопле́тся Христо́вымъ подо́біемъ, въ пусты́ни одолѣ́ніе воздви́глъ еси́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Всего́ себе́, о́тче, Бо́гу освяти́лъ еси́, безсме́ртныя сла́вы жела́я, и къ Нему́ поте́клъ еси́ те́плѣ жи́тельствомъ непоро́чнымъ, и воздержа́ніемъ, и житія́ свѣ́тлостію, непреста́нно взыва́я: си́лѣ Твое́й сла́ва, Человѣколю́бче.

Ты́, Исто́чникъ, преподо́бне, благосты́ни возлюби́въ все́ю си́лою, по́стникомъ бы́лъ еси́, исто́чникъ Боже́ственныхъ дарова́ній, жа́ждущія сія́ исцѣля́я: исто́чники бо, я́коже дре́вле Моисе́й въ пусты́ни, пресла́вно, всеблаже́нне, источи́лъ еси́.

Яви́вся отъ незаходи́мыхъ Ду́ха, рабы́нина ча́да свободи́лъ еси́, сы́ны Бо́жія достолѣ́пны сія́ обновля́я сыноположе́нія креще́ніемъ: боже́ственнаго бо Предте́чи подража́въ житіе́, крести́тель показа́лся еси́, Евѳи́міе.

Отъ Бо́га благода́тію просвѣща́емь, невѣ́дущимъ позна́лся еси́, Евѳи́міе: не подоба́ше бо твое́й добродѣ́тели вои́стинну въ пусты́няхъ таи́тися и покрыва́тися. Тѣ́мже тя́, свѣтоно́сна я́ко свѣти́льника всѣ́мъ, Влады́ка всѣ́хъ показа́.

Богоро́диченъ: Ра́дуйся, Честна́я, ра́дуйся, Дѣ́во Всечи́стая; ра́дуйся, горо́, благода́тію пріосѣне́нная; ра́дуйся, ски́ніе; ра́дуйся, киво́те; ра́дуйся, свѣ́щниче, свѣ́тъ боже́ственный нося́щая, ра́дости бо неизрече́нныя и ду́шъ весе́лія вѣ́рнымъ хода́таица была́ еси́.

Катава́сія: Покры́ла е́сть небеса́...

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Себе́ покори́лъ еси́ зако́ну Бо́жію, тѣ́ло бо твое́ я́ко душе́вный, богоно́се, орга́нъ, порабо́тилъ еси́, пло́ти мудрова́ніе повину́въ Ду́ху.

Веселя́ся, соверши́лъ еси́ стезю́ жи́зни и, Бо́жій стра́хъ въ себѣ́ заче́нъ, спасе́ніе роди́лъ еси́ заблужда́емымъ, возсія́вый, я́ко со́лнце, пусты́нею покрыва́емь.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

По́стниковъ благоче́стія на небе́сную стезю́, Евѳи́міе, предводи́лъ еси́, о́тче, и къ наслѣ́дію неги́блющему въ вы́шняя возводя́й, сто́лпъ о́гненный же и о́блакъ, явля́емь заре́ю Ду́ха.

Врача́ боля́щимъ, зѣло́ ми́лостивна, мíру дарова́ тя Христо́съ, о́тче, и пита́теля а́лчущимъ пресла́вна, наказа́теля несмы́сленнымъ, цѣломудри́теля неразумѣва́ющимъ, сирота́мъ и ни́щимъ засту́пника.

Сострада́теленъ, ми́лостивъ, нра́въ смиренному́дрый нося́, бы́лъ еси́, страсте́й отсѣка́я вины́ боже́ственными уче́ніи, и умудря́я, о́тче, и наказу́я ученики́ твоя́, и ду́шъ исцѣля́я неду́ги.

Всю́ду лучи́ испуща́я чуде́съ твои́хъ, вся́ просвѣти́лъ еси́ и, я́коже магни́тъ, привле́клъ еси́ къ твои́мъ уче́ніемъ, назида́я нра́вы и ду́шъ зало́ги, проходя́ души́ чистото́ю.

Богоро́диченъ: Истинную Богоро́дицу, вси́ Тя́ проповѣ́дуемъ, Богоблаже́нная, Твои́мъ Рождество́мъ тлѣ́ннаго изба́вльшіися рождества́ и къ лу́чшей па́ки жи́зни воззва́ни бы́вше за милосе́рдіе ми́лости Бо́га на́шего.

Катава́сія: Яко ви́дѣ Иса́ія...

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Якоже дре́вле отро́ды рабы́нины, пакибытія́ ба́нею и ны́нѣ, сыноположи́въ, твои́ми моли́твами, богоно́се, сокруши́ и́го рабо́ты на́шея.

Положи́ тя прему́дра строи́теля и наказа́теля безу́мнымъ, лука́выхъ же духо́въ прогони́теля Бо́жія, богоно́се, благода́ть, дѣ́йственнѣ въ тя́ все́льшаяся.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Велича́йшую отъ Бо́га вла́сть пріе́мъ, мно́жества вражде́бныхъ де́моновъ отгна́лъ еси́, си́хъ стропо́тства исцѣля́я вся́, вѣ́рою къ тебѣ́ притека́ющія.

Блаже́нъ и́стинно бы́лъ еси́, о́тче Евѳи́міе, нищету́ богатотво́рную и пла́чь ра́достенъ стяжа́въ, преподо́бне, и́миже Ца́рство небе́сное наслѣ́довалъ еси́.

Отри́нулъ еси́ су́щую на земли́ че́сть и сла́ву удобоувяда́емую, присносу́щную же жи́знь и наслѣ́діе нетлѣ́нное, всеблаже́нне, воспрія́лъ еси́, въ се́лѣхъ небе́сныхъ всели́вся извѣ́стнѣйше.

Богоро́диченъ: Госпожу́ Тя́ вся́ческихъ и Влады́чицу имену́емъ: вои́стинну бо Су́щаго Бо́га неизрече́нно родила́ еси́, вся́ Сотво́ршаго, и Содержа́щаго, и Объе́млющаго, Всенепоро́чная.

Катава́сія: Возопи́ къ Тебѣ́...

Конда́къ, гла́съ 8. Подо́бенъ: Яко нача́тки.

Въ честнѣ́мъ рождествѣ́ твое́мъ ра́дость тва́рь обрѣ́те и въ боже́ственнѣй па́мяти твое́й, преподо́бне, благоду́шіе прія́тъ мно́гихъ твои́хъ чуде́съ, отъ ни́хже пода́ждь бога́тно въ ду́ши на́ша и очи́сти грѣхо́въ скве́рны, я́ко да пое́мъ: Аллилу́ія.

Икосъ:

Отъ лѣ́ностнаго се́рдца хвале́ніе ка́ко принесу́, окая́нный, — ужаса́юся, — и воспою́ вели́каго Евѳи́мія? Но, сего́ надѣ́явся мольба́мъ, благоду́шіемъ и тща́ніемъ мно́зѣмъ пѣ́снь начну́, и всѣ́мъ изреку́ того́ житіе́ и рожде́ніе, и ка́ко сего́ роди́теліе поя́ху Бо́гу: Аллилу́ія.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Ви́дѣлся еси́ вну́трь о́блака, о́тче, преесте́ственнымъ огне́мъ покрыва́емь, я́ко боже́ственъ, вопія́, небеснотаи́нникъ: благослове́нъ еси́, Го́споди, Бо́же оте́цъ на́шихъ.

Подае́тъ тебѣ́ преесте́ственная, о́тче, Содѣ́тель незави́стнѣ естества́, ду́шъ же зало́ги проявля́яй причаща́ющихся, преподо́бне, пло́ти Го́спода твоего́.

Еди́наго и по Боже́ственномъ воплоще́ніи Единоро́днаго, во двою́ естеству́, Евѳи́міе, честву́я, вопія́лъ еси́: благослове́нъ еси́, Го́споди, Бо́же оте́цъ на́шихъ.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Поще́нія три́знище, святы́ни, о́тче, обуче́ніе твое́ показа́лъ еси́ житіе́, воздержа́ніемъ кра́йнимъ со безпло́тными соединя́яся, зовы́й, Евѳи́міе: благослове́нъ Бо́гъ оте́цъ на́шихъ.

Ору́жіе тя́ обою́ду остро́ Христо́съ показа́, враго́въ сердца́ и де́моновъ закала́ющее полки́ и пою́щихъ ду́ши обвеселя́ющее: благослове́нъ Бо́гъ оте́цъ на́шихъ.

Свѣ́та насыща́яся Трисо́лнечнаго, о́тче, свѣ́тъ вторы́й, прича́стіемъ пе́рваго сообразова́нъ, яви́лся еси́, Евѳи́міе, зари́ испуща́я пою́щимъ: благослове́нъ Бо́гъ оте́цъ на́шихъ.

Богоро́диченъ: Яко у́тро, возсія́ла еси́, пра́вды Со́лнца иму́щи, отъ тмы́ невѣ́дѣнія мíръ очища́юща богоразу́мія заре́ю, Ему́же пое́мъ: благослове́нъ Бо́гъ оте́цъ на́шихъ.

Катава́сія: Тебе́ во огни́...

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Бо́гу себе́ освяти́въ и вже́гъ со́вѣсти пе́щь, всего́ тя́, Евѳи́міе, ра́дуяся, всежже́глъ еси́, я́ко же́ртву непоро́чну, житіе́, поя́ Христу́: Го́спода по́йте, дѣла́, и превозноси́те Его́ во вся́ вѣ́ки.

Сыноположе́нъ бы́въ благода́тію Боже́ственною, я́ко наслѣ́діе бу́дущихъ вѣ́дѣніе прія́лъ еси́: естества́ бо удержа́въ, естество́ превозше́лъ еси́, прозна́тельнѣ къ сбы́тію тща́ся, Евѳи́міе. Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Крѣпча́йшее стяжа́въ жи́тельство, всеблаже́нне, къ высоча́йшему зрѣ́нію дости́глъ еси́, прія́телище бы́въ вмѣсти́тельное Ду́ха Животво́рнаго и отту́ду бога́тно теку́щихъ дарова́ній, поя́ непреста́нно: лю́діе, превозноси́те Его́ во вѣ́ки.

Пресели́вся, дости́глъ еси́ Сіо́на краегра́діе, въ вѣ́чныя же оби́тели доше́лъ еси́ и, наслѣ́діе небе́сное отъ твои́хъ болѣ́зней обрѣ́тъ, со а́нгельскими ликостоя́ніи пое́ши: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Всесвѣ́телъ, я́ко со́лнце, пусты́ни просвѣти́лъ еси́, темнозра́чныя отгна́лъ еси́ де́моны и сто́лпъ всесвѣ́тлый небодося́жущій бы́лъ еси́, чудотво́рными сія́ніи блиста́яй, непреста́нно взыва́я Влады́цѣ: свяще́нницы, воспо́йте, лю́діе, превозноси́те во вся́ вѣ́ки.

Свяще́ннѣйшими дѣя́ньми житія́ украша́емь, нача́льнѣйшую добродѣ́тель испра́вилъ еси́, уче́ній пра́востію свѣ́телъ бы́въ, и богосло́вія извѣ́стнаго сказа́тель, вопія́ непреста́нно: свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Невѣ́сто Бо́жія Всенепоро́чная, къ Тебѣ́ прибѣга́ющія плѣне́нія страсте́й исхи́ти и самовла́стную свобо́ду, Влады́чице, правосла́вныхъ Це́рквамъ пода́ждь, вѣ́рою пѣснопою́щимъ: свяще́нницы, воспо́йте, лю́діе, превозноси́те во вся́ вѣ́ки.

Катава́сія: Нестерпи́мому Огню́...

Пѣ́снь 9.

Ирмо́съ: По Рождествѣ́ Тя́, Чи́стая, и пре́жде Рождества́, и въ Рождествѣ́, Пречи́стая, вся́ тва́рь проповѣ́дающи, я́ко Богоро́дицу и́стинную велича́емъ.

Исцѣле́ній тя́ исто́чника и пре́жде сме́рти, и въ ра́цѣ, преподо́бне, у́спша, цѣ́ла обрѣ́тше, я́ко побѣдоно́сца страда́льца блажи́мъ.

Земно́му царю́ Иже въ вы́шнихъ помо́щника содѣ́ла тя́ на ва́рвары и па́ствѣ твое́й на разли́чная искуше́нія, о́тче преподо́бне.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Сказа́ Христо́съ тебѣ́, е́же къ Нему́ многорачи́тельное, о́тче, разрѣше́ніе, я́коже Моисе́ю дре́вле богови́дцу, ему́же подо́бникъ добродѣ́телію бы́въ, расто́ргнулъ еси́ мо́ре страсте́й, преше́лъ еси́ невозбра́нно къ земли́ обѣтова́нія, проти́вныя побѣди́въ.

Преста́вился еси́, я́ко Илія́ ревни́тель, добродѣ́телей ѣ́здя колесни́цею къ небеси́, идѣ́же жи́тельство я́вѣ твое́ написа́ся, преподо́бне, и ны́нѣ Влады́цѣ предстоя́, помина́й вѣ́рою соверша́ющія па́мять твою́ свѣтоно́сную и всесвяще́нную.

Житіе́ твое́, всеблаже́нне, а́нгельское, и жи́знь твоя́, богому́дре, пресвѣ́тла, душа́ же свѣтови́днѣйшая богови́дна, и благочести́ва вѣ́ра твоя́, Боже́ственныхъ бо догма́товъ сказа́тель бы́лъ еси́, богоно́се, и проповѣ́дникъ правосла́внаго уче́нія яви́лся еси́.

Моле́бника тя́ и моли́твенника, къ Бо́гу моля́щася, о́тче, проще́ніе грѣхо́въ и долго́въ мои́хъ отсѣче́нія прося́ща, Боже́ственныя принужда́юща щедро́ты, предлага́ю усе́рдно наде́жди, моли́твою твое́ю, богому́дре, утвержда́емь.

Богоро́диченъ: Спаси́тельный бу́ди мнѣ́ сто́лпъ, Чи́стая, де́монскимъ возбраня́ющь полко́мъ, и напа́стей молву́ и бѣ́дъ отгоня́ющь, и страсте́й наше́ствіе дале́че прогоня́ющь, и чи́сту дая́й свобо́ду, и Боже́ственныхъ дарова́ній оби́льство да́руяй.

Катава́сія: Въ зако́нѣ сѣ́ни и писа́ній...

Свѣти́ленъ. Подо́бенъ: Жены́, услы́шите.

Изъ ложе́снъ освяти́ тя Бо́гъ, о́тче преподо́бне, я́ко Іеремíю дре́вле и Самуи́ла, богоно́се, проро́ка боже́ственнаго показа́въ тя́, чудодѣ́йственне Евѳи́міе, а́нгеловъ единосе́льниче, съ ни́миже помина́й вся́, тя́ вѣ́рно воспѣва́ющія. [Два́жды.]

Сла́ва, и ны́нѣ, богоро́диченъ:

Госпо́дьственно Богоро́дицу Тя́ исповѣ́дуемъ, Влады́чице, Тебе́ ра́ди спа́сшіися, и́бо Бо́га неизрече́нно родила́ еси́, разори́вшаго Кресто́мъ сме́рть и къ Себѣ́ привле́кши преподо́бныхъ собо́ры, съ ни́миже Тя́ восхваля́емъ, Дѣ́во.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Преподо́бне о́тче Евѳи́міе,* оста́вивъ я́же на земли́,* Христу́ послѣ́довалъ еси́,* не предпоче́тъ, сла́вне, тлѣ́нныхъ па́че бу́дущихъ.* Въ пусты́ни, я́коже во гра́дѣ, живы́й,* де́монскія полки́ погуби́лъ еси́.* О, кто́ возмо́глъ бы изрещи́, присносла́вне,* твоея́ души́ вои́стинну теплоту́,* я́же ко Го́споду? [Два́жды.]

Преподо́бне о́тче Евѳи́міе,* ты́ показа́лся еси́ пра́вило мона́шествующихъ и похвала́,* правосла́вныхъ услажде́ніе* и свѣ́тлый вселе́нныя свѣти́льникъ,* ле́стнаго бо врага́ не ужа́слся еси́ страхова́ній,* въ пеще́рѣ живы́й.* О, дарова́нія, су́щаго въ тебѣ́, блаже́нне!* Имже я́вѣ* вся́ку попра́лъ еси́ де́моновъ бро́вь.

Преподо́бне о́тче Евѳи́міе,* ты́ вои́стинну къ Бо́гу* ду́шу впери́лъ еси́,* и поще́ніемъ, свя́те, чу́вства очи́стивъ,* и непреста́нными моли́твами, всеблаже́нне,* безсме́ртныя жи́зни сподо́бился еси́.* О, удобре́ніе по́стниковъ пресла́вне!* Тя́ бо Христо́съ, ра́дуяся, прія́тъ* въ невеще́ственныя оби́тели.

Сла́ва, гла́съ то́йже:

Мона́ховъ мно́жества, наста́вника тя́ почита́емъ, о́тче на́шъ Евѳи́міе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ:

Влады́чице, пріими́ моли́твы ра́бъ [Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое, [ектеніи́] и отпу́стъ. Ча́съ 1-й. И коне́чный отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Евре́емъ, зача́ло 335. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 237 – 246.

/ Къ оглавленію раздѣла /


Наверхъ / Къ титульной страницѣ

0