Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 19-й де́нь.
Преподо́бнаго Мака́рія Ри́млянина, Новгоро́дскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Ка́ко тя́ по достоя́нію ублажи́мъ,* преподо́бне о́тче Мака́ріе,* или́ кíя пѣ́сни хвале́бныя* воспое́мъ ко прославле́нію твои́хъ подвиго́въ?* Ангелъ во пло́ти вои́стинну яви́лся еси́* и уго́дникъ Бо́жій,* чудесы́ просла́вленный.

Дави́дски, о́тче Мака́ріе,* на вся́къ де́нь посте́лю твою́* слеза́ми омыва́лъ еси́,* очища́я ду́шу твою́* отъ скве́рны грѣхо́вныя,* тѣ́мже и всели́ся въ тя́* Пресвяты́й Ду́хъ,* Его́же оби́тель яви́лся еси́* и таи́нникъ ве́лій* Бо́жія благода́ти.

Помина́я, о́тче Мака́ріе,* исхо́дъ души́ твоея́,* вся́ красоты́ мірскíя презрѣ́лъ еси́,* оте́чество же, ве́тхій Ри́мъ, оста́вилъ еси́* и, во страну́ Россíйскую прише́дъ,* въ пусты́ню бла́тную* и непроходи́мую всели́лся еси́,* идѣ́же по́стническими труды́* до́брѣ Бо́гу угоди́лъ еси́,* я́ко са́дъ прекра́сенъ,* цвѣ́ты добродѣ́телей процвѣты́й.

Пусты́ни кра́сное прозябе́ніе,* отъ ве́тхаго Ри́ма восте́клъ еси́, о́тче Мака́ріе,* и вели́кій Но́вградъ озари́лъ еси́ твои́ми по́двиги,* бѣсо́вская же вся́ ополче́нія побѣди́лъ еси́,* моли́твою непреста́нною на ни́хъ вооружи́вся,* тѣ́мже ны́нѣ со а́нгелы лику́еши.

Сла́ва, гла́съ 6:

Преподо́бне о́тче Мака́ріе, ты́ отъ ю́ности за́повѣди Ева́нгелія Христо́ва возлюби́лъ еси́ и, кре́стъ тво́й взе́мъ, Христу́ послѣ́довалъ еси́, умо́мъ чи́стымъ непреста́нно моли́твы Ему́ возсыла́я и при́сно помышля́я о сла́вѣ невече́рнѣй Ца́рствія небе́снаго, е́же получи́ти сподо́бился еси́, тѣ́мже тя́, преподо́бне, ублажа́емъ.

И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы и преподо́бнымъ Мака́ріемъ поми́ловатися ду́шамъ на́шимъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́му Бо́жія* строи́теля богому́драго* и па́стыря слове́сныхъ ове́цъ* Христо́выхъ до́браго* яви́ тя́ Христо́съ* во странѣ́ Россíйстѣй,* о́тче Мака́ріе,* моли́твенниче усе́рдный* о душа́хъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ Ду́ха Свята́го* душа́ твоя́ бы́сть,* о́тче Мака́ріе,* въ не́й бо добродѣ́тели высо́кія* возрасти́лъ еси́* и дости́глъ еси́* въ му́жа соверше́нна о Христѣ́,* си́льна и непобѣди́ма* во бранѣ́хъ со враги́* неви́димыми.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

До́му Госпо́дню* примета́тися возжелѣ́лъ еси́* и въ само́мъ себѣ́* хра́мъ Тріѵпоста́сному Бо́гу угото́валъ еси́,* въ не́мже Христо́съ* со Отце́мъ и Ду́хомъ всели́ся,* Мака́ріе богоблаже́нне,* моли́твенниче о душа́хъ на́шихъ.

Сла́ва, гла́съ 8:

Кто́ изрещи́ возмо́жетъ твоя́ по́двиги и труды́, о́тче преподо́бне Мака́ріе, бдѣ́нія, и сухояде́нія, и непреста́нныя моли́твы, и́миже въ пусты́ни многолѣ́тнѣ подвиза́лся еси́? Вои́стинну дре́внимъ богоно́снымъ отце́мъ подо́бенъ бы́лъ еси́, съ ни́миже ра́вное воздая́ніе отъ Го́спода пріе́мь, непреста́нно моли́ся, поми́ловатися душа́мъ на́шимъ.

И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь преподо́бнаго, гла́съ 4:

Ри́мъ, оте́чество твое́, оста́вивъ, въ пусты́ню всели́лся еси́, и та́мо, въ пу́стѣ мѣ́стѣ обрѣ́тъ жили́ще себѣ́, отбѣ́глъ еси́ суеты́ мíра сего́, и въ безмо́лвнѣмъ приста́нищи до́брѣ направля́лъ еси́ себе́ ко Го́споду. Сего́ ра́ди и мы́, чту́щіи тя́, притека́юще, мо́лимъ тя́, о́тче Мака́ріе: моли́ о на́съ Го́спода, да поми́луетъ на́съ въ де́нь су́дный.

Инъ тропа́рь, гла́съ то́йже:

Оте́чество твое́, ве́тхій Ри́мъ, оста́вивъ, во страну́ Россíйскую прише́лъ еси́, преподо́бне, и въ пусты́ни бла́тнѣй всели́вся, та́мо приста́нище ти́хое ко спасе́нію обрѣ́лъ еси́, и безмо́лвное житіе́ богоуго́дно провожда́лъ еси́, направля́я себе́ ко Го́споду моли́твами непреста́нными. Сего́ ра́ди Христо́съ тя́ возлюби́ и чудесы́ просла́ви, о́тче Мака́ріе, яви́въ тя́ па́стыря до́бра слове́снаго ста́да Своего́. Тѣ́мже и мы́, притека́юще къ тебѣ́, уми́льно глаго́лемъ: моли́ Просла́вльшаго тя́ спасти́ся душа́мъ на́шимъ.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Во странѣ́ полу́нощнѣй* свѣти́льникъ Бо́жія благода́ти возсія́,* и пусты́ня бла́тная* ши́покъ ра́йскій плодопринесе́,* благоуха́ніемъ духо́внымъ* вѣ́рныхъ сердца́ услади́вшій,* къ нему́же, вопію́ще, рце́мъ:* о преподо́бне Мака́ріе,* моли́ся ко Го́споду,* Ему́же соверше́нно угоди́лъ еси́,* дарова́ти на́мъ ми́ръ* и ве́лію ми́лость. [Три́жды.]

О, пресла́внаго чудесе́!* Въ Ри́мѣ плотско́е рожде́ніе пріе́мь,* въ Россíйстѣй хла́днѣй странѣ́* духо́вно возра́слъ еси́, преподо́бне,* и яви́лся еси́ дре́во благопло́дное,* сладкопита́ющее ду́ши на́ша.* Тѣ́мже тебѣ́ взыва́емъ:* о преподо́бне Мака́ріе,* моли́ся ко Го́споду, тя́ вѣнча́вшему,* дарова́ти на́мъ ми́ръ* и ве́лію ми́лость. [Три́жды.]

О, пресла́внаго чудесе́!* Ка́ко ты́, о́тче, въ бре́ннѣй пло́ти* а́нгельское житіе́ проходи́лъ еси́* и, сме́ртенъ тѣ́ломъ,* отъ сме́рти грѣхо́вныя ду́шу твою́ свободи́лъ еси́?* Тѣ́мже всегда́ моли́ся, преподо́бне Мака́ріе,* о на́съ, чту́щихъ па́мять твою́,* е́же спасе́нымъ на́мъ бы́ти* и тобо́ю получи́ти ми́ръ* и ве́лію ми́лость. [Два́жды.]

Сла́ва, гла́съ 6:

Егда́, о́тче преподо́бне, прибли́жися вре́мя сконча́нія твоего́ и уразумѣ́лъ еси́ ду́хомъ твое́ ко Го́споду отше́ствіе, тогда́ со слеза́ми помоли́лся еси́ о оби́тели твое́й и ученицѣ́хъ твои́хъ и вся́ ну́жная ко спасе́нію и́мъ завѣща́лъ еси́, гла́сомъ ти́химъ вѣща́я, всѣ́хъ же благословля́я, моли́твѣ бы́вшей на устѣ́хъ твои́хъ, пре́далъ еси́ ду́шу твою́ въ ру́цѣ Го́сподеви. Тому́ у́бо моли́ся, не лише́нымъ бы́ти и на́мъ кончи́ны благíя и наслѣ́дія небе́снаго.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́ преподо́бническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2. Подо́бенъ: Егда́ отъ дре́ва.

Егда́ Боже́ственное зва́ніе пріи́де на тя́, преподо́бне о́тче Мака́ріе, тогда́ оте́чество твое́, ве́тхій Ри́мъ, оста́вивъ, во страну́ Россíйскую прише́лъ еси́ и, въ предѣ́лѣхъ вели́каго Нова́града пусты́ню бла́тную обрѣ́тъ, въ не́й всели́лся еси́, я́ко въ раи́ сла́дости, и здѣ́ же́стоко житіе́ пожи́лъ еси́ и мно́гимъ путеводи́тель ко спасе́нію бы́лъ еси́. Тѣ́мже моли́ся Христу́ Бо́гу спасти́ и просвѣти́ти ду́ши на́ша.

Егда́ Боже́ственная благода́ть призва́ тя́ въ пусты́ню, Мака́ріе богоно́сне, тогда́, все́ плотско́е мудрова́ніе отложи́въ, во страну́ ди́кую и хла́дную отше́лъ еси́, посто́мъ, моли́твами и слеза́ми сію́ духо́вно уплодоноси́лъ еси́ и оби́тель святу́ю та́мо устро́илъ еси́, да сла́вится въ не́й отъ человѣ́къ и́мя Христа́ Бо́га. Тому́ моли́ся, преподо́бне, да спасе́тъ и просвѣти́тъ ду́ши на́ша.

Егда́ благода́ть Свята́го Ду́ха тя́ осѣни́, преподо́бне Мака́ріе, и рука́ми архіере́я Бо́жія іере́я освяще́ннаго тя́ соверши́, тогда́ со стра́хомъ и мно́гими слеза́ми Же́ртву Безкро́вную Го́сподеви приноси́лъ еси́ и игу́менъ бы́лъ еси́ твои́мъ ученико́мъ, примѣ́ромъ твои́мъ и́хъ поуча́я и словесы́ богодухнове́нными и́хъ наставля́я благоугожда́ти Христу́ Бо́гу. Тому́ моли́ся, богоно́сне, да спасе́тъ и просвѣти́тъ ду́ши на́ша.

Сла́ва, гла́съ 6:

Пріиди́те, правосла́вныхъ собо́ри, пѣ́сньми духо́вными восхва́лимъ пустынножи́теля и Христо́ва и́стиннаго рачи́теля, преподо́бнаго отца́ на́шего Мака́рія, и́же пусты́ню благоуха́нія духо́внаго испо́лни и чуде́съ благода́ть свы́ше получи́. Тѣ́мже всечестну́ю па́мять его́ похвала́ми ублажи́мъ, мо́лится бо Христу́ Бо́гу дарова́ти мíру ми́ръ и душа́мъ на́шимъ ве́лію ми́лость.

И ны́нѣ, богоро́диченъ:

Творе́цъ и Изба́витель мо́й, Пречи́стая, [Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 1:

Въ честнѣ́й па́мяти твое́й,* преподо́бне о́тче Мака́ріе,* вѣ́рныя благода́тно озаря́еши* и неду́ги человѣ́ческія безме́здно врачу́еши* еди́нымъ прикоснове́ніемъ къ моще́мъ твои́мъ,* тѣ́мже, съ любо́вію припа́дающе, уми́льно глаго́лемъ:* моли́ся, чудотво́рче преподо́бне, Тріѵпоста́сному Бо́гу* поми́ловати ду́ши на́ша.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне о́тче Мака́ріе,* ты́, измла́да Христа́ возлюби́въ,* все́ плотско́е мудрова́ніе умертви́лъ еси́,* потща́вся ху́ждшее покори́ти лу́чшему* и пло́ть порабо́тити ду́ху,* тѣ́мже сосу́дъ чи́стъ и освяще́нъ* Бо́гови яви́лся еси́* и чуде́съ исто́чникъ содѣ́лался еси́.* Моли́ся о на́съ, преподо́бне,* Тріѵпоста́сному Бо́гу,* поми́ловати ду́ши на́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Чу́вственныя стра́сти* побѣди́въ воздержа́ніемъ,* пусты́ню озари́лъ еси́* чуде́съ луча́ми,* просвѣща́я ду́ши,* грѣхо́вною тмо́ю помраче́нныя,* и ны́нѣ на́съ, о́тче Мака́ріе,* твои́ми моли́твами благода́тно озари́* и просвѣти́ сердца́ на́ша* къ дѣ́ланію за́повѣдей Госпо́днихъ.

Сла́ва, гла́съ 8:

По́стника Госпо́дня пѣ́сньми духо́вными, бра́тіе, почти́мъ, преподо́бнаго отца́ на́шего Мака́рія, Ри́мское рожде́ніе и Нова́града украше́ніе, пусты́ни же вои́стинну благода́тное процвѣте́ніе, къ нему́ же возопіи́мъ: а́нгеловъ подо́бниче и человѣ́ковъ наста́вниче, наста́ви ны́ ходи́ти путе́мъ по́двиговъ твои́хъ и моли́твами твои́ми содѣ́лай на́съ прича́стники бы́ти Ца́рствія небе́снаго.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь свята́го, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Зва́нію Госпо́дню послѣ́довавъ, о́тче преподо́бне Мака́ріе, въ пусты́ню всели́лся еси́, и та́мо хра́мъ во и́мя Пресвяты́я Богоро́дицы, честна́го и сла́внаго Ея́ Успе́нія, воздви́глъ еси́, и ны́нѣ вку́пѣ съ Не́ю моли́ся Христу́ Бо́гу спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Богоро́дице, Ты́ обнови́ла еси́, Пречи́стая, святы́мъ Рождество́мъ Твои́мъ земны́хъ человѣ́къ па́дшее естество́, сего́ ра́ди Тя́ пѣ́сненно велича́емъ.

По 2-мъ стихосло́віи сѣда́ленъ, гла́съ 6. Подо́бенъ: Ангельскія си́лы.

Кре́стъ Христо́въ на ра́мо взе́мъ, къ боре́нію со враги́ неви́димыми устреми́лся еси́, Мака́ріе преподо́бне, и полки́ бѣсо́вскія въ пусты́ни побѣди́лъ еси́, сего́ ра́ди, я́ко побѣдоно́сецъ, чуде́съ дарова́ніе отъ Христа́ прія́лъ еси́, Человѣколю́бца и Спа́са ду́шъ на́шихъ. [Два́жды.]

Сла́ва, и ны́нѣ, богоро́диченъ:

Кíйждо, идѣ́же ча́етъ спасти́ся, та́мо пра́ведно и притека́етъ. Мы́ же, обрѣ́тше Тя́ прибѣ́жище спаси́тельное, Богоро́дице, прилѣ́жно мо́лимся Тебѣ́: покры́й на́съ Ма́тернимъ покро́вомъ Твои́мъ отъ вся́каго зла́ и спаси́ ду́ши на́ша.

[Велича́ніе:

Ублажа́емъ тя́, преподо́бне о́тче Мака́ріе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Ско́ро предвари́.

Егда́ прише́лъ еси́ отъ Ри́ма во страну́ Россíйскую, о́тче Мака́ріе, тогда́ я́ко стра́нникъ и пришле́цъ пребыва́лъ еси́, Влады́цѣ Христу́ подо́бяся, не имѣ́я мѣ́ста, гдѣ́ главу́ подклони́ти, до́ндеже дарова́ тебѣ́ Бо́гъ пусты́ню въ мѣ́сто селе́нія, въ не́йже ра́достно водвори́лся еси́ на по́двиги духо́вныя. Того́ моли́, преподо́бне, не лише́нымъ бы́ти и на́мъ спасе́нія вѣ́чнаго. [Два́жды.]

Сла́ва, и ны́нѣ, богоро́диченъ:

При́зри, Влады́чице, на рабы́ Твоя́ и умилосе́рдися на лю́ди согрѣши́вшія, яви́, я́ко при́сно, си́лу Твою́, да непреста́нно Тя́ по до́лгу ублажа́емъ.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Блаже́нства тезоимени́те, преподо́бне о́тче Мака́ріе, ты́ усе́рдно претерпѣ́лъ еси́ пусты́нное озлобле́ніе, и мши́цъ угрызе́ніе, и бѣсо́вская страхова́нія, вери́гами желѣ́зными связа́въ твое́ тѣ́ло, да свобо́ду вы́шняго зва́нія получи́ши. Сего́ ра́ди почита́емъ святу́ю и всечестну́ю па́мять твою́.

Кано́нъ Богоро́дицѣ со ирмосо́мъ на 6 и преподо́бному на 8, гла́съ 8.
Пѣ́снь 1.

Ирмо́съ: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Іису́су: Мо́ря жите́йскаго волна́ми обурева́еми, къ Тебѣ́, Іису́се Всеблагíй, прибѣга́юще, вопіе́мъ: отъ ти́ны страсте́й на́съ изба́ви, да въ тишинѣ́ ду́ха уго́днику Твоему́, преподо́бному Мака́рію, пѣ́снь хвале́бную принесе́мъ, его́же чудесы́ сла́вно просла́вилъ еси́.

Мо́ря песо́къ предѣ́лъ положи́вый, Госпо́дь избра́ тя́ отъ ри́мскаго ро́да, преподо́бне о́тче Мака́ріе, служи́ти Ему́ въ преподо́біи и чистотѣ́ и въ Россíйстѣй странѣ́ показа́ тя́ чудотво́рца изря́дна: въ чудесѣ́хъ бо мно́гихъ сла́вно просла́вился еси́.

Мо́ря жите́йскаго треволне́ніе не потопи́ ладіи́ твоея́, о́тче Мака́ріе, но, вѣ́яніемъ Ду́ха Бо́жія управля́емь, въ ти́хое приста́нище спасе́нія вше́лъ еси́ и чуде́съ дарова́ніемъ отъ Го́спода просла́вился еси́.

Богоро́диченъ: Мо́ре сле́зъ испроси́ на́мъ, Влады́чице Преблага́я, у Ми́лостиваго Сы́на Твоего́ и Бо́га на́шего, да, и́ми угаси́вше пе́щь страсте́й, омы́емъ скве́рну грѣхо́вную ду́шъ на́шихъ и, спасе́ніе вѣ́чное получи́вше, воспое́мъ Христу́ пѣ́снь побѣ́дную, я́ко просла́вися.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Утверди́лъ еси́ на ка́мени за́повѣдей Христо́выхъ се́рдце твое́, преподо́бне о́тче Мака́ріе, у́зкимъ и приско́рбнымъ путе́мъ ше́ствовалъ еси́, алчбо́ю, и жа́ждою, и вери́гами желѣ́зными пло́ть твою́ изнуря́я блаже́ннаго ра́ди бу́дущаго поко́я, его́же получи́въ, весели́шися вѣ́чно со святы́ми.

Житію́ дре́внихъ богоно́сныхъ оте́цъ поревнова́въ, въ пусты́ню бла́тную и суро́вую удали́лся еси́, о́тче Мака́ріе, не имѣ́вшую никоего́же человѣ́ческаго утѣше́нія, въ не́йже многолѣ́тнѣ потруди́вся, оби́тель и́нокомъ созда́лъ еси́, во спасе́ніе мно́гимъ.

Утвержда́лъ еси́ бра́тію твою́ словесы́ богодухнове́нными, о́тче Мака́ріе, па́че же о́бразомъ святоподви́жнаго твоего́ житія́; тíи же, тобо́ю наставля́еми, подража́тели бы́ша подвиго́мъ твои́мъ и вку́пѣ съ тобо́ю получи́ша спасе́ніе.

Богоро́диченъ: Утвержде́ніе на Тя́ надѣ́ющихся, Пресвята́я Богоро́дице Влады́чице, не посрами́ упова́нія на́шего, е́же по Бо́зѣ на Тя́ возлага́емъ, но бу́ди на́мъ Засту́пница отъ нападе́ній діа́вольскихъ, да, Тобо́ю помоществу́еми, возвесели́мся о спасе́ніи на́шемъ.

Инъ конда́къ, гла́съ 8:

Якоже пресвѣ́тлая звѣзда́, отъ Ри́ма возсія́лъ еси́, преподо́бне, и, Бо́гомъ наставля́емь, Россíйскую страну́ свѣ́томъ чуде́съ твои́хъ озари́лъ еси́ духо́вно, созыва́я вѣ́рныя къ моще́мъ твои́мъ, отъ ни́хже исцѣле́нія неду́жнымъ подае́ши. Тѣ́мже мо́лимся тебѣ́: научи́ на́съ, о́тче, твоему́ богоразу́мію и уврачу́й неду́ги на́ша душе́вныя и тѣле́сныя, да зове́мъ ти́: ра́дуйся, преподо́бне о́тче Мака́ріе.

Сѣда́ленъ, гла́съ 4. Подо́бенъ: Ско́ро предвари́.

Ско́рый помо́щникъ явля́ешися, преподо́бне о́тче Мака́ріе, съ вѣ́рою въ моли́твахъ Тя́ призыва́ющимъ, и мѣ́сто пусты́нное твои́хъ по́двиговъ отъ запустѣ́нія коне́чнаго соблю́лъ еси́ ди́вно, на не́мже съ любо́вію честву́емъ святу́ю и всера́достную па́мять твою́. [Два́жды.]

Сла́ва, и ны́нѣ, богоро́диченъ:

Ско́рый Тво́й покро́въ, и по́мощь, и ми́лость покажи́ на рабѣ́хъ Твои́хъ, и во́лны, Чи́стая, укроти́ су́етныхъ помышле́ній, и па́дшую мою́ ду́шу возста́ви, Богоро́дице: вѣ́мъ бо, вѣ́мъ, Дѣ́во, я́ко мо́жеши, ели́ка и хо́щеши.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Проро́комъ Бо́жіимъ Иліи́ и Крести́телю поревнова́лъ еси́, преподо́бне о́тче Мака́ріе, пусты́нное житіе́ возлюби́въ, я́ко го́рлица уедине́нная, славосло́вія же еди́нъ Еди́ному Христу́ возноси́лъ еси́, воспѣва́я Того́ Боже́ственное снизхожде́ніе.

Проро́чески, о́тче Мака́ріе, по́мыслы человѣ́ческія прозрѣва́лъ еси́, чистоты́ ра́ди твоея́ серде́чныя, и бра́тію твою́ вѣ́рно поуча́лъ еси́ въ моли́твахъ бо́дрствовати и немо́лчно воспѣва́ти гла́сы преподо́бными Спа́сово Боже́ственное снизхожде́ніе.

Проро́ка и царя́ Дави́да пѣ́снь во устѣ́хъ твои́хъ всегда́ имѣ́лъ еси́, преподо́бне Мака́ріе, и се́ю Бо́га немо́лчно славосло́вилъ еси́, о́бразъ тобо́ю бра́тіи твоея́ подава́я, да во псалмѣ́хъ и пѣ́снехъ духо́вныхъ воспѣва́ютъ при́сно Христо́во Боже́ственное снизхожде́ніе.

Богоро́диченъ: Проро́ческая рече́нія на Тебѣ́ сбы́шася, Дѣ́во Богоро́дице: Ты́ бо Сло́во Бо́жіе нетлѣ́нно воплоти́ла еси́ и Невмѣсти́маго во утро́бѣ Твое́й дѣ́вственнѣй нетѣ́сно вмѣсти́ла еси́. Тѣ́мже Тя́ хвале́бно ублажа́емъ и воспѣва́емъ спаси́тельное Христо́во снизхожде́ніе.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Го́спода Бо́га освяти́лъ еси́ въ души́ твое́й, преподо́бне о́тче Мака́ріе, и же́ртвенникъ мы́сленный ду́шу твою́ содѣ́лалъ еси́, на не́мже же́ртву хвалы́ Го́сподеви возноси́лъ еси́, во смире́ніи ду́ха немо́лчно призыва́я и́мя Бо́жіе спаси́тельное.

Госпо́дни за́повѣди животво́рныя имѣ́лъ еси́, напи́саны на скрижа́лѣхъ се́рдца твоего́, преподо́бне о́тче Мака́ріе, и проповѣ́дникъ бра́тіи твое́й бы́лъ еси́ Ева́нгельскаго уче́нія, къ небеси́ возводя́щаго человѣ́ки, и́же, послу́шающе сего́, моли́твенно призыва́ютъ Боже́ственное Христо́во и́мя.

Госпо́день ра́бъ бы́лъ еси́, Мака́ріе богому́дре, де́нь и но́щь труди́вся во сла́ву Бо́жію и на по́льзу душе́вную бли́жнимъ твои́мъ, и́хже, я́ко сама́го себе́, возлюби́лъ еси́, усе́рдно подвиза́я и́хъ сла́вити о тебѣ́ Христо́во и́мя.

Богоро́диченъ: Го́спода Ма́ти и Влады́чица всея́ тва́ри яви́лася еси́, Богоро́дице Марíе, нетлѣ́нно пло́тію ро́ждши Еди́наго отъ Тро́ицы, Бо́га Сло́ва. Его́же моли́, Чи́стая, отъ безслове́сныхъ страсте́й на́съ изба́вити, да въ тишинѣ́ безстра́стія се́рдцемъ и усты́ воспѣва́емъ свято́е и́мя Его́.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

Яко кипари́съ высокове́рхій, возра́слъ еси́, преподо́бне Мака́ріе, въ пусты́ни бла́тнѣй и непло́днѣй и плодоноше́ніи духо́вными просла́вился еси́ въ не́й, я́ко и́стинный уго́дникъ Христа́ Бо́га, къ Нему́же и на́ша стопы́ напра́ви и моли́твами твои́ми отъ тлѣ́нія грѣхо́внаго на́съ изба́ви, мо́лимся.

Яко и́стинный послѣ́дователь Іису́совъ, во смире́ніи глубо́цѣ жи́знь твою́ провожда́лъ еси́, Мака́ріе блаже́нне, власяны́ми ру́бы и вери́гами желѣ́зными утѣсня́я твое́ тѣ́ло, да свободи́шися отъ тлѣ́нія грѣхо́внаго и получи́ши спасе́ніе.

Яко во́инъ благоиску́сный, о́тче Мака́ріе, стрѣ́лы вра́жія изощре́нныя со у́гльми пусты́нными сле́зными пото́ки устуди́лъ еси́ и побѣдоно́сецъ показа́лся еси́ во бранѣ́хъ со враги́ неви́димыми, и́же не возмого́ша тя́ низри́нути въ про́пасть и тлѣ́ніе грѣхо́вное, си́лою Христа́ утвержде́ннаго.

Богоро́диченъ: Яко вои́стинну прибѣ́жище непосты́дное христіа́номъ, и щи́тъ, и покро́въ, Ма́ти Бо́жія, воспѣва́ющія Тя́ отъ бѣ́дъ и скорбе́й свободи́: Тя́ бо Еди́ну, благослове́нную въ жена́хъ, Тобо́ю отъ тлѣ́нія грѣхо́внаго изба́вльшіися, немо́лчными хвала́ми ублажа́емъ.

Конда́къ, гла́съ 7:

Отъ Ри́ма возсія́лъ еси́, я́коже звѣзда́ пресвѣ́тлая, преподо́бне о́тче на́шъ Мака́ріе, и, въ пусты́ни всели́вся, просвѣти́лъ еси́ чи́стымъ житіе́мъ твои́мъ вѣ́рно притека́ющія къ тебѣ́. Тѣ́мже и мы́, прославля́юще свѣ́тлую па́мять твою́, вопіе́мъ ти́: ра́дуйся, преподо́бне о́тче Мака́ріе.

Икосъ:

Возлюби́въ Христо́вы Боже́ственныя за́повѣди, возненави́дѣлъ еси́ мíра сего́ наслажде́ніе: пло́ть твою́, преподо́бне, посто́мъ, бдѣ́ніемъ, до́лу лега́ніемъ и вери́гами желѣ́зными изнури́лъ еси́ и во умерщвле́ннѣмъ тѣлеси́ пѣ́сни благопрія́тныя, хвалы́ и славосло́вія Тріеди́ному Бо́гу немо́лчно приноси́лъ еси́, о́тче Мака́ріе. Сего́ ра́ди пріими́ отъ на́съ по достоя́нію такова́я: ра́дуйся, а́нгеле земны́й и человѣ́че небе́сный, а́нгелы удиви́вый житія́ твоего́ чистото́ю и человѣ́ки научи́вый благоугожда́ти Бо́гу; ра́дуйся, свѣти́льниче немерца́яй Боже́ственныя благода́ти, въ житіи́ и по сме́рти сія́яй чудесы́; ра́дуйся, озаря́яй ду́ши и сердца́ человѣ́ческая невече́рнимъ свѣ́томъ твоея́ сла́вы, е́юже и мѣ́сто по́двиговъ твои́хъ прославля́еши преди́вно. Ра́дуйся, преподо́бне о́тче Мака́ріе.

Пѣ́снь 7.

Ирмо́съ: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Въ пещи́ искуше́ній пусты́нныхъ, о́тче Мака́ріе, благода́ть Госпо́дню, тя́ ороша́ющую, стяжа́лъ еси́. Тѣ́мже непобѣди́мъ враго́мъ неви́димымъ показа́лся еси́ и вся́ прило́ги діа́вольскія крѣ́пко сокруши́лъ еси́, зовы́й немо́лчно: благослове́нъ еси́, Бо́же оте́цъ на́шихъ.

Поревнова́лъ еси́, преподо́бне о́тче, соиме́нному ти́ вели́кому во отцѣ́хъ Мака́рію, его́же нра́ву и чистотѣ́ непреста́нно поуча́яся, я́ко безпло́тенъ, на земли́ подвиза́лся еси́, сего́ ра́ди сосу́дъ избра́нъ Ду́ху Свято́му сподо́бился еси́ бы́ти, Его́же дѣ́йствомъ чудеса́ пресла́вная содѣ́лалъ еси́ въ житіи́ и по сме́рти, о ни́хже вѣ́рніи благословля́ютъ Бо́га оте́цъ на́шихъ.

Яко кри́нъ, въ пусты́ни процвѣ́лъ еси́, преподо́бне, и благоуха́нія Христо́ва испо́лнилъ еси́ мѣ́сто по́двиговъ твои́хъ земны́хъ. Свѣ́томъ до́брыхъ дѣ́лъ твои́хъ озари́лъ еси́ сердца́ человѣ́ковъ, просвѣща́я и́хъ уче́ніи твои́ми и науча́я пѣ́ти Го́сподеви: благослове́нъ еси́, Бо́же оте́цъ на́шихъ.

Богоро́диченъ: Въ пещи́ халде́йстѣй та́инство Рождества́ Твоего́ проразумѣва́юще, Богоро́дице, ро́ждшимся отъ Тебе́ Искупи́телемъ спасе́ніе обрѣто́хомъ и, подо́бящеся отроко́мъ богосло́вцемъ, Сы́ну Твоему́ и Го́споду благода́рно зове́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Ангели и небеса́, на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Ангелы собесѣ́дники имѣ́лъ еси́, преподо́бне Мака́ріе, и, си́ми укрѣпля́емь, въ пусты́ни безлю́днѣй и бла́тнѣй многолѣ́тнѣ пребы́лъ еси́, еди́нъ Еди́ному Бо́гу рабо́тая; сего́ ра́ди ны́нѣ со безпло́тными водворя́ешися и пое́ши хвале́бную пѣ́снь Тріеди́ному Бо́гу, препѣ́тому и превозноси́мому во вѣ́ки.

Ангела тя́ пло́тянаго вѣ́мы, преподо́бне о́тче Мака́ріе, ангелоподо́бно бо на земли́ пожи́лъ еси́ и чистоту́ души́ и тѣ́ла ре́вностно соблю́лъ еси́, ны́нѣ же водворя́ешися та́мо, идѣ́же ничто́же скве́рно вхо́дитъ, и пое́ши немо́лчную пѣ́снь Бо́гу, препѣ́тому и превозноси́мому во вѣ́ки.

Ангеловъ Творе́цъ и всея́ тва́ри Содѣ́тель подви́жника добродѣ́телей яви́ тя́, Мака́ріе преподо́бне, Его́же си́лою укрѣпля́емь, путе́мъ тѣ́снымъ ше́ствуя, дости́глъ еси́ соверше́нства духо́внаго, Ца́рствіе Христо́во унаслѣ́довалъ еси́ и со святы́ми пое́ши ра́достно: Го́спода по́йте и превозноси́те Его́ во вѣ́ки.

Богоро́диченъ: Ангельское цѣлова́ніе прино́симъ Ти́ съ любо́вію, Богоро́дице Чи́стая: ра́дуйся, Благода́тная, Госпо́дь съ Тобо́ю! Ты́ же ра́дости нетлѣ́нныя сподо́би Тя́ по до́лгу ублажа́ющія, ро́ждшагося же отъ Тебе́ Го́спода пою́щія и превознося́щія во вѣ́ки.

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Чу́ждь бы́лъ еси́, преподо́бне Мака́ріе, превозноше́нія тщесла́внаго и во смире́ніи глубо́цѣ житіе́ твое́ провожда́лъ еси́, о́бразъ смире́нія бы́лъ еси́ твои́мъ ученико́мъ, и́хже при́сно поуча́лъ еси́ бѣ́гати душепа́губныя го́рдости и во смире́ніи ду́ха велича́ти Христа́ Жизнода́вца.

Чу́ждь и стра́ненъ бы́лъ еси́ во странѣ́ Россíйстѣй, Мака́ріе, взыску́яй вы́шняго гра́да, Іерусали́ма небе́снаго, и къ нему́ непреста́нно воспаря́яй по́мыслми боголюби́выя твоея́ души́, я́же ны́нѣ со а́нгелы Христа́ велича́етъ.

Чу́ждь пра́здности яви́лся еси́, блаже́нне, но при́сно въ моли́твахъ и трудѣ́хъ пусты́нныхъ подвиза́лся еси́ и вери́гами желѣ́зными пло́ть твою́ утѣсня́лъ еси́, си́лою Го́спода си́лъ укрѣпля́емь, Его́же гла́сы хвале́бными немо́лчно велича́лъ еси́.

Богоро́диченъ: Чу́ждихъ на́съ яви́, Влады́чице, вла́сти лю́таго міроде́ржца и въ ча́съ кончи́ны на́шея на по́мощь ускори́ къ на́мъ, безпомо́щнымъ: мно́го бо мо́жетъ Ма́терняя моли́тва Твоя́ ко Го́споду, и трепе́щутъ предъ Тобо́ю ду́си тмы́, отъ и́хже наси́лія на́съ изба́ви, Всеблага́я, да Тя́ славосло́віи ра́достными велича́емъ.

Свѣти́ленъ:

Процвѣ́лъ еси́ въ по́стническихъ по́двизѣхъ, преподо́бне о́тче Мака́ріе, и пло́дъ чудотворе́нія прине́слъ еси́ Христо́вѣ Це́ркви, и о́ную пусты́ню, въ не́йже подвиза́лся еси́, благоуха́нія духо́внаго испо́лнилъ еси́, во утѣше́ніе съ вѣ́рою и любо́вію къ тебѣ́ притека́ющимъ. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и яви́ла еси́ на́мъ, потемне́ннымъ, свѣ́тъ спасе́нія Боже́ственнымъ и Пречи́стымъ Твои́мъ Рождество́мъ.

На хвали́техъ стихи́ры на 4, гла́съ 5. Подо́бенъ: Ра́дуйся, по́стникомъ.

Ра́дуйся, о́тче Мака́ріе,* звѣздо́ пресвѣ́тлая,* отъ Ри́ма возсія́вшая* и Россíйскую страну́* благода́тно озари́вшая;* ра́дуйся, вели́кій пустынножи́телю,* дре́внимъ богоно́снымъ отце́мъ равноче́стный;* ра́дуйся, предста́телю и помо́щниче ско́рый* въ моли́твахъ тя́ призыва́ющимъ.* Предвари́ и подви́гни святы́я моли́твы твоя́ о на́съ ко Го́споду* и да́нною ти́ отъ Него́ благода́тію* неду́ги на́ша душе́вныя и тѣле́сныя исцѣли́,* прося́ дарова́ти на́мъ* ми́ръ и ве́лію ми́лость. [Два́жды.]

Ра́дуйся, главо́ освяще́нная,* жили́ще Ду́ха Свята́го,* сосу́де избра́нный* Бо́жія благода́ти;* ра́дуйся, боля́щихъ цѣли́телю,* печа́льныхъ утѣ́шителю,* заблу́ждшихъ путеводи́телю.* Наста́ви и на́съ, о́тче Мака́ріе,* ходи́ти путе́мъ богоуго́дныхъ исправле́ній твои́хъ* и помяни́ на́съ въ моли́твахъ твои́хъ ко Го́споду,* прося́ на́мъ у бла́гости Его́* ве́лія ми́лости.

Ра́дуйся, пусты́нный граждани́не,* преподо́бныхъ красото́,* чуде́съ Боже́ственныхъ соверши́телю,* Мака́ріе богоно́сне,* блиста́ньми чуде́съ твои́хъ* озаря́яй на́съ благода́тно* и си́ми утвержда́яй на́съ* во Правосла́внѣй вѣ́рѣ.* Честну́ю па́мять твою́ соверша́ющимъ* пода́ждь да́ры цѣле́бныя,* коему́ждо по потре́бѣ,* и моли́ Христа́ Бо́га* дарова́ти на́мъ ве́лію ми́лость.

Сла́ва, гла́съ 6:

Преподо́бне о́тче Мака́ріе, кто́ изочте́тъ труды́ твоя́ пусты́нныя, бдѣ́нія и сухояде́нія и мно́гая моле́нія, и́миже Христу́ соверше́нно угоди́лъ еси́? Мы́ же, чту́ще тя́ я́ко вѣ́рнаго слугу́ Госпо́дня и чудотво́рца сла́внаго, честву́емъ святу́ю па́мять твою́ и умиле́нно глаго́лемъ: о́тче преподо́бне, моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Мине́я Янва́рь. Ча́сть втора́я. — М.: Издательскій совѣтъ Русской Православной Церкви, 2002. — С. 144 – 159.

/ Къ оглавленію раздѣла /


Наверхъ / Къ титульной страницѣ

0