Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 19-й де́нь.
Слу́жба преподо́бному отцу́ на́шему Са́ввѣ, игу́мену Стороже́вскому, Звенигоро́дскому чудотво́рцу.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.

Отъ ю́ности, преподо́бне,* плотска́я мудрова́нія* покори́лъ еси́ ду́ху,* и, въ живоно́сную ме́ртвость одѣ́явся,* свѣти́льникъ, блаже́нне,* яви́лся еси́ пресвѣ́тлый.* Благода́тію Боже́ственнаго Ду́ха* и́стиненъ па́стырь показа́вся,* слове́сною, Са́вво, цѣвни́цею* со́бранное ста́до о Христѣ́* до́брѣ упа́слъ еси́* и на па́жить духо́вную возве́лъ еси́. [Два́жды.]

Зрѣ́ти жела́я* мы́сленную свѣ́тлость* боже́ственнаго обоже́нія,* житіе́ возжелѣ́въ невеще́ственное,* мíръ оста́вилъ еси́,* пусты́ню дости́глъ еси́* и слеза́ми сію́ напои́лъ еси́,* жела́ніе улучи́въ,* е́же ко Влады́цѣ твоему́ предстоя́ніе,* и ны́нѣ священнолѣ́пно предстои́ши,* со а́нгелы ликовству́я. [Два́жды.]

Сла́ва, гла́съ то́йже. Самогла́сенъ:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію я́ко мо́щно возше́лъ еси́: му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху; тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее; и ны́нѣ на небесѣ́хъ, зерца́ломъ разрѣ́шшимся, о́тче на́шъ Са́вво, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Яко до́бля.

Бо́жіею си́лою укрѣпля́емь,* мы́сль свою́ горѣ́ возвыша́я,* небе́сное наслѣ́діе, о́тче, прія́лъ еси́* и на земли́ благоче́стно со́бранная твоея́ па́ствы ча́да,* упа́слъ еси́ до́блимъ твои́мъ нра́вомъ* и равноа́нгельнымъ житіе́мъ,* Ду́ха свѣтлостьми́ святы́ми осія́емь,* о всѣ́хъ при́сно моли́ся,* творя́щихъ свяще́нную па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Жела́я улучи́ти небе́сную добро́ту,* на земли́, я́ко безпло́тенъ, о́тче, подвиза́лся еси́;* имѣ́я посо́біе непобѣди́мо,* си́лу Влады́ки твоего́,* надъ страстьми́ воцари́лся еси́* и ны́нѣ Вѣ́чному Царю́ предстои́ши,* Его́же моли́, Са́вво преподо́бне,* спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Житіе́ твое́ благоче́стно* добродѣ́тельми укра́шено,* пра́вдою, я́ко боже́ственнымъ вѣнце́мъ, вѣнча́вся,* Влады́чню престо́лу предстои́ши,* со а́нгельскими лику́я во́инствы.* Сего́ ра́ди тя́ въ пѣ́снехъ почита́емъ,* Са́вво преподо́бне, о́тче на́шъ,* моли́ спасти́ся ста́ду твоему́* отъ всѣ́хъ искуше́ній.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Са́вво: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ; съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь, гла́съ 8:

Пусты́ни яви́лся еси́ до́брое прозябе́ніе, преподо́бне: отъ ю́ности бо изво́лилъ еси́ чи́стое житіе́, духо́вному твоему́ учи́телю послѣ́дуя, и того́ уче́ніемъ у́мъ къ небе́снымъ впери́въ, и ста́ду твоему́ прему́дръ наста́вникъ показа́лся еси́; тѣ́мъ и Христо́съ я́ко пресвѣ́тла тя́ свѣти́льника чудесы́ обогати́, Са́вво, о́тче на́шъ, моли́ спасти́ся душа́мъ на́шимъ.

[Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 4:

Зако́нно устро́ивъ твою́ жи́знь, страстна́я взыгра́нія до конца́ увяди́лъ еси́, побѣ́ды вѣне́цъ отъ Бо́га прія́лъ еси́, Са́вво, о́тче на́шъ, моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ, моли́тву пріе́мши отъ на́съ, не преста́й моля́щи Человѣколю́бца спасти́ся рабо́мъ Твои́мъ.

По 2-й стихоло́гіи сѣда́ленъ, гла́съ 1:

Соверше́нную къ Бо́гу любо́вь стяжа́лъ еси́, о́тче, земна́я преоби́дѣвъ, къ небе́снымъ возше́лъ еси́, ра́дуяся; вѣнцено́сче преблаже́нне, моли́ Христа́ Бо́га, спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Упова́ніе христіа́номъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ о воспѣва́ющихъ Тя́, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно сла́вящимъ Тя́.

По поліеле́и сѣда́ленъ, гла́съ 8:

Влады́цѣ Христу́ во все́мъ, о́тче Са́вво, угоди́лъ еси́, Иже Своего́ Ца́рства снаслѣ́дника тя́ сотвори́, и по свято́мъ преставле́ніи честны́я твоя́ мо́щи источа́ютъ разли́чная исцѣле́нія, тѣ́мже вопіе́мъ ти́: моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Отъ вся́каго преще́нія и озлобле́нія человѣ́къ спаси́ ны́, Пресвята́я Дѣ́во: Тя́ бо и́мамы покро́въ и заступле́ніе, прибѣга́ющіи къ Тебѣ́, Богома́ти, и рожде́ннаго изъ Тебе́ Бо́га на́шего, Его́же моли́ изба́витися отъ бѣ́дъ рабо́мъ Твои́мъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 2:

Преподо́бне о́тче, измла́да въ добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха, и отъ Него́ пріе́мъ чуде́съ дѣ́йство, научи́лъ еси́ человѣ́ки преоби́дѣти сла́дкая. Ны́нѣ же, боже́ственнымъ свѣ́томъ чистѣ́йше осіява́емь, просвѣти́ и на́ша мы́сли, Са́вво, о́тче на́шъ.

Кано́нъ Богоро́дицѣ со ирмосо́мъ на 6. И свята́го на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Наста́ви мя́, Го́споди Бо́же мо́й, да возмогу́ благоче́стно уго́дника Твоего́, преподо́бнаго Са́ввы, сла́вное и честно́е восхвали́ти торжество́.

Му́жески подвиза́лся еси́ и, зарю́ духо́вную воспріе́мъ, взя́лся еси́ къ высотѣ́ небе́снѣй, и ны́нѣ со а́нгелы прославля́ешися.

Ору́жіемъ креста́ огражда́яся, преподо́бне, всю́ си́лу проти́внаго побѣди́лъ еси́ и до конца́ сего́ безъ вѣ́сти сотвори́лъ еси́.

Богоро́диченъ: Пресу́щное Сло́во, существо́ на́ше пріе́мъ отъ чи́стыхъ крове́й Твои́хъ, богосодѣ́ла на́съ, тлѣ́нія изба́вивъ, Чи́стая: сего́ ра́ди Тя́ при́сно сла́вимъ.

Катава́сія: Христо́съ ражда́ется...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Молча́ніемъ язы́къ обузда́лъ еси́ и немяте́жнымъ житіе́мъ во пло́ти а́нгельски, о́тче, пожи́лъ еси́.

Вои́стинну благíя жи́зни сподо́бился еси́, преподо́бне, чистото́ю и поще́ніемъ сію́ обрѣ́тъ. И ны́нѣ со безпло́тными вопіе́ши: нѣ́сть свя́тъ, па́че Тебе́, Го́споди.

Трисія́ннымъ Свѣ́томъ озаре́нъ, и благода́ть Ду́ха Свята́го всели́ся въ тя́, преподо́бне, возлю́бльши чи́стую твою́ ду́шу, и непреста́нно вопіе́ши: нѣ́сть свя́тъ, па́че Тебе́, Го́споди.

Богоро́диченъ: Разумѣ́ти рождества́ Твоего́, Чи́стая, неизглаго́ланную глубину́ недоумѣ́етъ у́мъ человѣ́чь: Бо́гъ бо, истощи́въ Себе́ за милосе́рдіе во утро́бѣ Твое́й, всего́ мя́ обнови́.

Сѣда́ленъ, гла́съ 4:

Мра́зъ нощны́й претерпѣ́лъ еси́, и тяготу́ ва́ра дневна́го поне́слъ еси́, и си́хъ ра́ди вѣ́чное наслажде́ніе и пи́щу присноживу́щую воспрія́лъ еси́, Христо́въ уго́дниче, блаже́нне Са́вво: моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи, му́ченики, проро́ки и преподо́бными моли́ дарова́ти на́мъ очище́ніе и ве́лію ми́лость.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Безмѣ́рное смире́ніе возлюби́въ, своея́ мы́сли зри́тельное очи́стилъ еси́ и ны́нѣ, въ ра́йскихъ селе́ніихъ водворя́яся, вопіе́ши: сла́ва си́лѣ Твое́й, Го́споди.

Сле́зными пото́ки, преподо́бне, зе́млю се́рдца твоего́ напои́лъ еси́, предстоя́ въ моли́твѣ неколе́бленъ, Творцу́ всѣ́хъ взыва́лъ еси́: сла́ва си́лѣ Твое́й, Го́споди.

Не забу́ди ста́да твоего́, преподо́бне, е́же му́дрѣ собра́лъ еси́ и въ жи́зни се́й упа́слъ еси́ благоче́стно: потщи́ся, о́тче на́шъ Са́вво, ввести́ во огра́ду небе́сную.

Богоро́диченъ: Чистоты́ жили́ще, селе́ніе Влады́ки всѣ́хъ и проро́ковъ всѣ́хъ сбытіе́, Богора́дованная Чи́стая, пою́щія Тя́ уще́дри.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Бо́дренными бдѣ́ніи, блаже́нне, и ча́стыми воздыха́ніи, Благода́ть Ду́ха возрасте́ въ тебѣ́, о́тче, и сла́вна тя́, Са́вво, показа́.

Влады́чне смире́ніе воспріи́мъ, во́ду почерпа́я, на ра́мѣхъ свои́хъ носи́ти изво́лилъ еси́: нача́льника трудополо́жна во все́мъ себе́ показа́лъ еси́.

Преблаже́нне, богопрія́тне о́тче на́шъ Са́вво, непреста́нно ста́до твое́ вопіе́тъ ти́: моли́твами твои́ми ко Го́споду спаси́ ны́, мо́лимся.

Богоро́диченъ: По рожде́ніи стра́шнѣмъ пребыла́ еси́ Дѣ́ва, я́коже пре́жде. Бо́гъ бѣ́ рожде́йся, устроя́яй вся́ во́лею, Безневѣ́стная Марíе Богоблагода́тная.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Страда́ніи по́двигъ твои́хъ, преблаже́нне, класъ боже́ственный возрасти́лъ еси́ и пита́еши благоче́стно восхваля́ющія тя́, Са́вво преподо́бне, о́тче на́шъ.

Кня́зя проше́ніе, о́тче, со тща́ніемъ исполня́я, хра́мъ Богома́тере воздви́глъ еси́, въ не́мже пра́здничною ра́достію мона́ховъ мно́жества веселя́тся, па́мять твою́ прославля́юще.

Ка́плями по́товъ твои́хъ, преподо́бне, враго́въ ополче́нія попра́лъ еси́ и дости́глъ еси́ а́нгельскія невеще́ственныя ли́ки.

Богоро́диченъ: Всеблага́я Влады́чице, я́же преблага́го Бо́га пло́тію ро́ждши, озло́бленное страстьми́ мое́ се́рдце очи́сти, да вѣ́рою и любо́вію велича́ю Тя́.

Конда́къ, гла́съ 2. Подо́бенъ: Вы́шнихъ ища́.

Госпо́днимъ жела́ніемъ распали́вся, стра́сти плотскíя воздержа́ніемъ оттря́съ, Боже́ственнаго свѣ́та незаходи́мое свѣти́ло яви́лся еси́, чуде́съ луча́ми всѣ́хъ просвѣща́еши, притека́ющихъ къ ра́цѣ моще́й твои́хъ, Са́вво преподо́бне, о́тче на́шъ.

Икосъ:

Всеси́льное Ду́ха Свята́го дѣ́йство богови́дно въ тя́ всели́ся, и боголѣ́пными манове́ніи благоте́чнѣ иды́й къ горѣ́, идѣ́же хотѣ́лъ еси́ оби́тель воздви́гнути, и, я́коже небе́сный ра́й, благово́нными насажде́нъ цвѣ́ты, сію́ обрѣ́тъ, всели́лся еси́ и хра́мъ Богома́тере чу́денъ воздви́глъ еси́, мона́ховъ мно́жество собра́лъ еси́, и сія́, добродѣ́тельными дѣя́ніи свѣ́тло блиста́ющія, воздержа́ніи му́дростная вообра́жь; и ны́нѣ, въ па́мять твою́ соше́дшеся, вопіе́мъ ти́: моли́ о на́съ, Са́вво преподо́бне, о́тче на́шъ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Пучи́ною сле́зъ твои́хъ, пребога́те, злонача́льнаго змíя потопи́лъ еси́, я́ко побѣдоно́сецъ изря́денъ къ небе́снымъ возлетѣ́лъ еси́, непреста́нно вопіе́ши: благослове́нъ Бо́гъ оте́цъ на́шихъ.

Житіе́ незло́биво имѣ́лъ еси́, и непоро́чно, и укра́шено по́ты страда́нія, прехва́льне, Боже́ственнаго свѣтоли́тія испо́лнився, взыва́лъ еси́: благослове́нъ Бо́гъ оте́цъ на́шихъ.

Хва́лится, преподо́бне, гра́дъ тво́й, я́ко вѣнце́мъ ца́рскимъ обложи́ся, имѣ́я мо́щи твоя́ въ себѣ́, я́ко добра́ граждани́на отъ Бо́га прія́лъ е́сть.

Богоро́диченъ: Препѣ́тая Дѣ́во, препѣ́таго Бо́га ро́ждшая, пою́щія Тя́ прича́стники покажи́ Свѣ́та и изба́ви гее́нны огня́ и вся́каго вре́да вра́жія моли́твами Твои́ми.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Мудрова́ніе плотско́е умертви́лъ еси́, че́сти и имѣ́нія совле́клся еси́, отъ земли́ къ небе́снымъ взы́ти тща́ся и вся́ пѣ́ти науча́я: Го́спода по́йте и превозноси́те его́ во вѣ́ки.

Се́рдца твоего́ бразды́, о́тче Са́вво, му́дрѣ воздѣ́лалъ еси́, сле́зными ту́чами сія́ напои́лъ еси́ и благоуха́нно мѵ́ро прине́слся еси́ Христу́, Ему́же вопіе́ши: Го́спода по́йте и превозноси́те Его́ во вѣ́ки.

Христу́ принося́, блаже́нне, поще́нія, и сле́зы, и непоро́чную моли́тву, ри́зную лѣ́поту и мя́гкія оде́жды власяны́ми ру́бы премѣни́лъ еси́, си́мъ показу́я глубоча́йшее смире́ніе.

Богоро́диченъ: Изба́вльшеся пе́рвыя кля́твы Рождество́мъ Твои́мъ, всеблагослове́нная Отрокови́це Богора́дованная, Гавріи́ловъ тебѣ́ гла́съ возсыла́емъ: ра́дуйся, вино́вная всѣ́хъ спасе́нія.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣти сла́ву Вседержи́теля жела́я, обнови́лъ еси́ души́ крѣ́пость и сла́вою обогати́лся еси́ небе́сною.

Честно́е украше́ніе благода́ти, о́тче преподо́бне Са́вво, испроси́ Держа́вному Импера́тору на́шему во бране́хъ крѣ́пость и здра́віе тѣлесе́, я́ко да непреста́нно тя́ велича́емъ.

Чи́ни а́нгельстіи тебе́, о́тче, срѣто́ша, и пра́ведныхъ собо́ри возвесели́шася, и отъ вседержи́тельныя десни́цы Влады́чни вѣнча́лся еси́, тѣ́мже тя́ досто́йно велича́емъ.

Богоро́диченъ: Свѣ́томъ Твои́мъ мя́, Богора́дованная въ жена́хъ Дѣ́во, просвѣти́, молю́ся, и огня́ вѣ́чнаго изба́ви мя́, я́ко да велича́ю Тя́ и по до́лгу да воспою́ вели́чія Твоя́.

Свѣти́ленъ:

По́мысломъ лу́чшимъ стра́сти удержа́въ, и де́моновъ свирѣ́пства низложи́лъ еси́. И ны́нѣ со дерзнове́ніемъ предстоя́ Христу́, моли́ся о ста́дѣ твое́мъ, о́тче на́шъ. [Два́жды.]

[Слава, и нынѣ,] богородиченъ:

По Бо́зѣ на Тя́ упова́емъ, Пречи́стая, изъ Тебе́ проше́дшему сраспина́еми Христу́, Твои́ми къ Нему́ мольба́ми неврежде́нны до конца́ ны́ сохрани́.

На хвали́техъ стихи́ры на 4, гла́съ 8. Самогла́сны:

Боже́ственною си́лою одѣ́явся, умертви́лъ еси́ себе́ мíрови; житіе́ непоро́чно пожи́въ, пресла́вне, единожи́тель Се́ргія боже́ственнаго бы́лъ еси́.

Чистоты́ сосу́дъ показа́вся, исцѣле́ній зари́ облиста́лъ еси́, по́стниковъ удобре́ніе, мона́шествующихъ похвала́, Са́вво преподо́бне, о́тче на́шъ.

Умертви́въ себе́ мíру, жи́знь равноа́нгельну на земли́ пожи́лъ еси́, и, я́ко да́ръ освяще́нъ, Влады́цѣ, преподо́бне, Твою́ ду́шу, Са́вво, прине́слъ еси́, исцѣле́ній зари́ облиста́лъ еси́ и Боже́ственнаго Ца́рствія досто́йно получи́лъ еси́, моли́ спасти́ся душа́мъ на́шимъ.

Свѣ́тлое и богоуго́дное житіе́ твое́, я́ко свѣ́тъ, вои́стинну на земли́ показа́ся, Боже́ственную ви́дѣти свѣ́тлость, Са́вво, сподо́бился еси́, тѣ́мже и ви́димая вся́ оста́вилъ еси́ и Непостижи́маго зрѣ́ти сподо́бился еси́, Его́же моли́, преподо́бне, спасти́ся душа́мъ на́шимъ.

Сла́ва, гла́съ 6:

Преподо́бне о́тче Са́вво, во всю́ зе́млю изы́де вѣща́ніе исправле́ній твои́хъ, тѣ́мже на небесѣ́хъ обрѣ́лъ еси́ мзду́ трудо́въ твои́хъ, де́монскія разори́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Го́споду, ми́ръ испроси́ душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ Его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми?] Апо́столъ къ Гала́томъ, зача́ло 213. [Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба и ака́ѳистъ преподо́бному отцу́ на́шему Са́ввѣ, игу́мену Стороже́вскому, Звенигоро́дскому чудотво́рцу, его́же па́мять мѣ́сяца Деке́мврія въ 3-й де́нь; обрѣ́теніе честны́хъ моще́й, мѣ́сяца Іаннуа́рія въ 19-й де́нь. — М.: Въ Сѵнода́льной Тѵпогра́фіи, 1876. — Л. 1 – 8 об., 21 об. – 23 об.

/ Къ оглавленію раздѣла /


Наверхъ / Къ титульной страницѣ

0