Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 19-й де́нь.
Преподо́бнаго отца́ на́шего Мака́рія Еги́птянина.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Блаже́нства су́щаго па́че ума́ жела́я,* вмѣни́лъ еси́, чу́дне,* пи́щу — воздержа́ніе,* нищету́ — бога́тство,* нестяжа́ніе — имѣ́ніе и́стинное* и благосла́віе — смире́ніе.* Тѣ́мже и жела́нія,* е́же по ра́зуму, улучи́лъ еси́,* въ жили́щахъ водворя́яся святы́хъ, Мака́ріе.

Тече́ніе воздержа́нія* непрело́жно соверши́лъ еси́* и вѣ́ру соблю́лъ еси́,* отону́дуже и вѣне́цъ прія́лъ еси́, о́тче, пра́вды,* его́же тебѣ́ угото́ва Христо́съ,* по досто́инству дая́й воздая́нія,* и че́сти да́руяй,* и болѣ́зней возме́здіе.* Ихже и ны́нѣ на́мъ, сла́вне, пода́ти моли́ся.

Вся́кое сладостра́стіе,* удруча́я тѣ́ло твое́,* отве́рглъ еси́, богому́дре,* огорча́я чу́вства воздержа́ніи крѣ́пкими и жестокожи́тіемъ,* терпѣ́ніемъ же напа́стей* и пожда́ніемъ обстоя́ній.* Ихже ра́ди безконе́чное воспріе́млеши наслажде́ніе,* и пи́щу непреем́ную, и ра́дость неизглаго́ланную.

Сла́ва, гла́съ 8. Анато́ліево:

Весели́ся, Еги́пте, процвѣ́тшій такова́го граждани́на, во блаже́нныхъ Мака́рія: се́й бо, прему́дростію Свята́го Ду́ха украси́вся, вся́ко поще́ніе въ добродѣ́тельномъ житіи́ свое́мъ произобрази́. Того́ и мы́ хода́тая приводя́ще, про́симъ умоли́ти Христа́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Твои́, Го́споди.

Юница Нескве́рная, Юнца ви́дящи, на дре́вѣ пригвожда́ема во́лею, рыда́ющи жа́лостнѣ, — увы́ Мнѣ́, — вопія́ше, — люби́мѣйшее Ча́до! Что́ Ти со́нмъ воздаде́ безблагода́тный евре́йскій, хотя́ Мя́ обезча́дствовати отъ Тебе́, Вселюбе́зне?

На стихо́внѣ окто́иха. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́щи, Всенепоро́чная Богоро́дице, ви́сящъ, ма́терски рыда́ющи, вопія́ла еси́: Сы́не Мо́й и Бо́же Мо́й, спаси́ любо́вію пою́щія Тя́.

Тропа́рь, гла́съ 1:

Пусты́нный жи́тель, и во пло́ти а́нгелъ, и чудотво́рецъ яви́лся еси́, богоно́се о́тче на́шъ Мака́ріе, посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою приходя́щихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
Оба кано́на окто́иха и свята́го кано́нъ на 6, его́же краегране́сіе: Всеизря́днаго въ по́стницѣхъ Мака́рія сла́влю. Ѳеофа́ново, гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Боже́ственнымъ свѣ́томъ сія́я и со а́нгелы, о́тче, ны́нѣ водворя́яся, моли́твами твои́ми спаса́й соверша́ющія всесвяще́нную твою́ па́мять и въ ра́дости вопію́щія: пои́мъ Бо́гу на́шему, я́ко просла́вися.

Пу́ть, къ жи́зни веду́щій, неукло́нно, преблаже́нне, ше́ствуяй, соверши́лъ еси́, избѣ́гъ мяте́жей, и бѣсо́вская смуще́нія разори́лъ еси́, ра́достно взыва́я: пои́мъ Бо́гу на́шему, я́ко просла́вися.

Умертви́въ плотско́е мудрова́ніе по́стническими твои́ми боре́ніи, Боже́ственному Ду́ху покори́лъ еси́, о́тче, и, Сего́ управля́емь Боже́ственною си́лою, въ ра́дости вопія́лъ еси́: пои́мъ Бо́гу на́шему, я́ко просла́вися.

Вся́ кра́сная оста́вилъ еси́, непреста́нную возлюби́въ, о́тче, красоту́ въ дому́ Госпо́дни, идѣ́же шу́мъ чи́стѣ пра́зднующихъ, въ ра́дости вопію́щихъ: пои́мъ Бо́гу на́шему, я́ко просла́вися.

Богоро́диченъ: Безлѣ́тнаго Сы́на Безнача́льнаго Отца́, пло́ть на́съ ра́ди, человѣ́ковъ, бы́вша, Чи́стая, во утро́бѣ заче́нши, подъ лѣ́томъ Сего́ родила́ еси́ несказа́нно. Ему́же и, ра́дующеся, вопіе́мъ: пои́мъ Бо́гу на́шему, я́ко просла́вися.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Зако́ну повину́лся еси́ Ду́ха, Его́же всеору́жіемъ препоя́сався, преподо́бне, не зако́ну грѣха́ произволе́ніе подклони́лъ еси́.

Горѣ́ къ Бо́гу мудрова́ніе имѣ́я, богоно́се, я́же на земли́ оста́вилъ еси́, болѣ́зньми воздержа́нія непреста́нно облегча́емь.

Расто́ргъ у́зы естества́, преесте́ственнымъ и чи́стымъ твои́мъ житіе́мъ, богоно́се, су́щихъ па́че естества́ прія́лъ еси́ дѣ́йство.

Да Бо́гу, блаже́нне, въ безмяте́жіи бесѣ́дуеши, въ пусты́ни, о́тче, жи́ти изво́лилъ еси́, отъ мо́лвъ удаля́яся.

Богоро́диченъ: Спасти́ хотя́ человѣ́ка на поле́зное, я́ко Благодѣ́тель Человѣколю́бецъ, въ Твою́ утро́бу неопи́санно, Богома́ти, всели́ся.

Конда́къ, гла́съ 4. Подо́бенъ: Яви́лся еси́.

Въ дому́ Госпо́дь воздержа́нія вои́стинну тя́ положи́, я́коже звѣзду́ непреле́стную, свѣтоводя́щу концы́, о́тче отце́въ, Мака́ріе преподо́бне.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Воздержа́нія огне́мъ, я́ко зла́то въ пещи́, му́дре, искуси́вся, свѣтлѣ́йшій яви́лся еси́, сего́ ра́ди къ небе́сному преста́вился еси́ Ца́рствію. Тѣ́мже, вѣ́рою восхваля́юще тя́, вопіе́мъ: благода́ть, ми́лость и очище́ніе прегрѣше́ній на́шихъ, о́тче, испроси́. [Два́жды.]

Сла́ва, и ны́нѣ, богоро́диченъ:

Напра́ви ны́ на пу́ть покая́нія, укло́ньшіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная, Благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Нескве́рная Агница Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Тлѣ́емаго а́біе ве́тхаго человѣ́ка совле́клся еси́, о́тче, съ грѣхо́вными страстьми́ воздержа́ніемъ незави́стнымъ, обле́клся же еси́ въ но́ваго по Христѣ́, всече́стне.

Свѣтлѣ́йшее твое́ житіе́ я́ко пра́вило извѣ́стнѣйшее вся́кія, о́тче, боже́ственныя добродѣ́тели показа́ся въ моли́твахъ и постѣ́хъ, бдѣ́ніихъ же и мольба́хъ ко Христу́ Человѣколю́бцу.

Дрема́нія твои́мъ вѣ́ждомъ, богому́дре, не да́лъ еси́, до́ндеже, о́тче, до́мъ себе́ сотвори́лъ еси́ краснѣ́йшій Всеви́дцу Влады́цѣ, къ Нему́же взыва́лъ еси́: сла́ва, Христе́, си́лѣ Твое́й.

Въ ю́ности цѣлому́дріе, въ ста́рости ра́зумъ, во все́мъ же житіи́ пожда́ніе и долготерпѣ́ніе и ко всѣ́мъ любо́вь показа́лъ еси́, взыва́ющимъ: сла́ва, Христе́, си́лѣ Твое́й.

Богоро́диченъ: Умерщвле́нныя, Всечи́стая, человѣ́ки оживи́ла еси́, па́дшія сія́ къ тлѣ́нію возста́вила еси́, Жизнода́вца ро́ждши, избавля́ющаго взыва́ющія: сла́ва, Христе́, си́лѣ Твое́й.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Просте́ръ, сла́вне, души́ у́мное и чу́вства, му́дре, упра́вивъ, бы́лъ еси́ хра́мъ освяще́нъ Бо́гу и всече́стенъ.

Стропти́вѣйшаго змíя увяди́въ кова́рства и того́ го́рькія ко́зни притупи́лъ еси́, при́сно въ Боже́ственномъ зако́нѣ ду́шу устроя́я.

Украси́лъ еси́, преподо́бне, души́ трича́стное и, влады́ку у́мъ поста́вивъ, имѣ́лъ еси́ Христа́, наставля́ющаго къ ше́ствію небе́сному.

Богоро́диченъ: Дѣ́ва роди́ Пречи́стаго Бо́га, законополага́юща всѣ́мъ чистоту́ и святы́ню благоче́стія су́щимъ на земли́ возвѣща́юща.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Въ пусты́ни жи́ти усе́рдно возлюби́лъ еси́, богоно́се, въ не́й Бо́га пріе́мля, избавля́ющаго тя́ и соблюда́юща твоя́ стопы́.

Непрекло́ненъ въ поще́ніи, богому́дре, пребы́лъ еси́ да́же до конца́, храня́ сіе́ опасе́ніе, и́мже нетлѣ́ннаго сподо́бился еси́ я́вѣ наслажде́нія.

Равноа́нгельно на земли́ житіе́ пожи́лъ еси́, равноа́нгельную и че́сть досто́йно получи́лъ еси́, со а́нгелы всѣ́хъ Бо́гу предстоя́.

Богоро́диченъ: Зачала́ еси́ во утро́бѣ, Богома́ти, Безнача́льнаго Бо́га Сло́ва, на́съ ра́ди, человѣ́ковъ, бы́вша непрело́жна по на́мъ, во двою́ зна́емаго естеству́.

Конда́къ, гла́съ 1. Подо́бенъ: Ли́къ а́нгельскій.

Блаже́нную жи́знь сконча́въ въ житіи́, съ му́ченическими ли́ки въ земли́ кро́ткихъ досто́йно водворя́ешися, богоно́сне Мака́ріе, и пусты́ню, я́коже гра́дъ, насели́въ, благода́ть прія́лъ еси́ отъ Бо́га чуде́съ, тѣ́мже тя́ почита́емъ.

Икосъ:

Богоно́снаго бы́въ у́бо Анто́нія учени́къ, о́тче, и́скренній, я́коже во́скъ, изобразу́емь, вся́кую изобрази́лъ еси́ того́ пои́стиннѣ добродѣ́тель и страда́нія. Тѣ́мъ и, я́ко Илія́ сугу́бо, я́коже ино́му Елиссе́ю, тебѣ́ чуде́съ благода́ть даде́ся, и предвѣ́дѣнія осія́ніе и́стины получи́вшему, ве́ліе положи́ся во все́мъ мíрѣ дѣя́ніе житія́ твоего́, воздвиза́я спя́щія въ поги́бельнѣй про́пасти, тѣ́мже тя́ почита́емъ.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Свы́ше манове́ніемъ и Бо́жіею по́мощію враги́ низложи́въ, побѣдоно́сецъ, зовы́й, бы́лъ еси́: препѣ́тый Го́споди, Бо́же отце́въ на́шихъ, благослове́нъ еси́.

Очи́стивъ мглу́, отъ страсте́й бы́вшую, безстра́стія просвѣще́ніемъ озари́лся еси́, зовы́й, блаже́нне: препѣ́тый Го́споди, Бо́же отце́въ на́шихъ, благослове́нъ еси́.

Уясни́въ ду́шу добродѣ́тельными благолѣ́потами, красе́нъ добро́тою Бо́гу бы́въ, пѣснопѣ́лъ еси́, ра́дуяся: препѣ́тый Го́споди, Бо́же отце́въ на́шихъ, благослове́нъ еси́.

Богоро́диченъ: Призыва́я ны́, плѣне́нныя, Дѣ́во, во е́же бѣ́хомъ въ нача́лѣхъ, во чре́во Твое́ всели́вся, воплоти́ся Человѣколю́бецъ Госпо́дь, Бо́гъ отце́въ на́шихъ Благослове́нный.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Глаго́лы жи́зни вѣ́чныя, всеблаже́нне, въ се́рдцы твое́мъ пріе́мъ, пло́ть увяди́лъ еси́, мíру же умертви́лся еси́ и, въ живоно́сную ме́ртвость одѣ́явся, — Го́спода по́йте, — взыва́еши, — и превозноси́те Его́ во вся́ вѣ́ки.

Ми́лостива бы́ти, богоно́сне, еди́наго Благода́теля моли́ твою́ всесвяще́нную па́мять пра́зднующимъ, согрѣше́ній оставле́ніе си́мъ испроша́я: Го́спода по́йте, дѣла́, и превозноси́те Его́ во вся́ вѣ́ки.

Ма́ніемъ къ Бо́гу непреста́ннымъ внима́я и отону́днаго осія́нія зарю́ пріе́мля, свѣ́тъ противосія́ющій проза́рный, я́ко зерца́ло, посыла́еши пою́щимъ: Го́спода по́йте, дѣла́, и превозноси́те Его́ во вся́ вѣ́ки.

На лѣ́ствицу, къ небеси́ просте́ртую, на не́йже утвержде́нъ яви́ся Госпо́дь, о́тче, возше́лъ еси́, боже́ственными восхожде́ньми при́сно предуспѣва́я, преподо́бне, до́ндеже дости́глъ еси́ пою́щихъ: Го́спода по́йте, дѣла́, и превозноси́те Его́ во вся́ вѣ́ки.

Богоро́диченъ: Пое́мъ Тя́, Обра́дованная, Бо́га бо воплоще́нна на́мъ родила́ еси́. Тѣ́мже Богоро́дицу Тя́ вси́ имену́емъ, богопрія́тную трапе́зу, добро́ту Іа́ковлю, — Го́спода по́йте, дѣла́, — вопію́ще, — и превозноси́те Его́ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Слеза́ми у́бо по́стническими ни́ву се́рдца твоего́ напои́лъ еси́, ра́дуяся же, о́тче богоно́се, ны́нѣ въ ра́дости рукоя́ти собира́еши подвиго́въ по́чести, тѣ́мже тя́ вси́ ублажа́емъ.

Незаходи́мый возсія́ тебѣ́ свѣ́тъ, и присносу́щное весе́ліе воспрія́, идѣ́же, лику́я со а́нгелы о́крестъ Царя́ и Го́спода, вѣ́рою соверша́ющія па́мять твою́ помина́й, о́тче всеблаже́нне.

Возмо́глъ еси́ избѣжа́ти де́моновъ стрѣля́нія и кова́рствій лука́выхъ, спасе́ся, блаже́нне, душа́ твоя́, свята́, чиста́ и нескве́рна, наслѣ́дія небе́снаго сподо́бися, помина́й у́бо пою́щія тя́.

Зако́номъ, о́тче, страда́льческимъ подвиза́лся еси́ досто́йнѣ и побѣди́лъ еси́. Тѣ́мже тя́ сла́вы вѣнце́мъ еди́нъ Благодѣ́тель почте́ и боже́ственнаго свѣтоявле́нія сподо́би и блаже́нныхъ наслажде́ній.

Богоро́диченъ: Яко всѣ́хъ тва́рей Творца́ ро́ждши, Богома́ти, превозшла́ еси́ всю́ тва́рь боже́ственною сла́вою, и святы́нею, и благода́тію, и вся́кими добродѣ́тели пе́рвшествы. Тѣ́мже Тя́ вси́ велича́емъ.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лъ еси́ тебе́ сама́го въ пусты́няхъ и, стра́сти покори́въ плотскíя, равноа́нгеленъ показа́лся еси́, о́тче на́шъ богоно́сне.

Сла́ва, и ны́нѣ, богоро́диченъ:

Держа́внымъ Твои́мъ покро́вомъ отъ враго́въ навѣ́та Твоя́ рабы́, Чи́стая, соблюди́ вся́ ны́ невре́дны: Тя́ бо и́мамы Еди́ну прибѣ́жище въ ну́ждахъ.

На стихо́внѣ окто́иха. Сла́ва, гла́съ 4:

Просія́ша до́брая дѣла́ твоя́, я́ко со́лнце, на земли́ и на небеси́, Христо́въ уго́дниче Мака́ріе, правосла́вно бо проповѣ́далъ еси́ на́мъ и́стинную и непоро́чную вѣ́ру Христо́ву. Тѣ́мже моли́ся, преподо́бне о́тче, въ па́мяти твое́й, богоно́сне, дарова́ти на́мъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не вожделѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́ки и но́ги Твоя́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


НА ЛИТУРГІИ,

Блаже́нна окто́иха, на 4, и свята́го пѣ́снь 6-я, на 4, и вся́ слу́жба сего́ мѣ́сяца въ 15-й де́нь: [Проки́менъ, гла́съ 8: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 232 об. – 236 об.

/ Къ оглавленію раздѣла /


Наверхъ / Къ титульной страницѣ

0