Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 18-й де́нь.
Па́мять святы́хъ тріе́хъ святи́телей: двои́хъ патріа́рховъ Александрíйскихъ Аѳана́сія и Кири́лла, и и́же во святы́хъ отца́ на́шего архіепи́скопа Макси́ма Но́ваго, бы́вшаго де́спота Се́рблемъ.

НА МАЛѢЙ ВЕЧЕРНИ,
[На Го́споди воззва́хъ:] стихи́ры Макси́му, гла́съ 1. Подо́бенъ: Небе́сныхъ чино́въ.

Благочести́ваго ко́рене блага́я о́трасль,* отъ нея́же прозябе́ цвѣ́тъ благоуха́нный:* мо́щи бо твоя́ проявля́ютъ добродѣ́тели,* и́хже мы́ облагоуха́юще,* восхваля́емъ Бо́га, тебе́ просла́вльшаго,* Макси́ме достоблаже́нне.

Во юдо́ли, я́ко кри́нъ,* процвѣ́лъ еси́, святи́телю,* и, я́ко ши́покъ, благоуха́еши, святи́телю,* вѣ́рныхъ сердца́ облагоуха́я и ра́дости исполня́я,* и́же, въ весе́ліи воспѣва́юще, глаго́лютъ:* ди́венъ Бо́гъ во святы́хъ Свои́хъ.

Сла́ва, Аѳана́сію, гла́съ 6. Ге́рманово:

Христо́ва іера́рха воспои́мъ вси́, Аѳана́сія, я́ко Аріева мнѣ́нія вся́ упраздни́ и Святы́я Тро́ицы держа́ву во всѣ́мъ мíрѣ я́сно возвѣща́етъ, Еди́наго Бо́га въ Тре́хъ Ли́цѣхъ нераздѣ́льна, Его́же и мо́литъ о на́съ, вѣ́рою соверша́ющихъ па́мять его́.

И ны́нѣ, богоро́диченъ:

Арха́нгельское сло́во прія́ла еси́, и херуви́мскій престо́лъ показа́лася еси́, и на объя́тіихъ Свои́хъ носи́ла еси́, Богоро́дице, Наде́жду ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ земна́го ца́рствія,* оста́вилъ еси,* преблаже́нне и новоявле́нне Макси́ме,* до́мъ Святы́я Тро́ицы* бы́лъ еси́.

Сти́хъ: Честна́ предъ Го́сподемъ* сме́рть преподо́бныхъ Его́.

Вои́стинну, о́тче,* яви́лся еси́* купе́цъ предо́блій,* и́же стяжа́въ Христа́,* Би́серъ многоцѣ́нный,* и Сего́ положи́въ во умѣ́,* ду́шу просвѣти́лъ еси́.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Свѣ́тлаго и свята́го ко́рене* цвѣ́тъ соверше́нія и свѣ́тлости* ты́ бы́въ,* новоявле́нне Макси́ме* преблаже́нне.

Сла́ва, гла́съ и подо́бенъ то́йже:

Аѳана́сія восхва́лимъ и Кири́лла* и Макси́ма просла́вимъ* я́ко служи́теліе* Святы́я Тро́ицы.

И ны́нѣ, богоро́диченъ:

Дѣ́во Преблаже́нная,* ублажа́емъ Тя́,* ро́ди человѣ́честіи,* я́ко родила́ еси́* Спаси́теля ду́шъ на́шихъ.

Тропа́рь, гла́съ 4:

Бо́же оте́цъ на́шихъ, [творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ].

Или́ се́й, гла́съ 3:

Дѣ́лы возсія́вше правосла́вія, все́ погаси́вше злосла́віе, побѣди́теліе, побѣдоно́сцы бы́сте, благоче́стіемъ вся́ обогати́вше, Це́рковь вельми́ украси́вше, досто́йно обрѣто́сте Христа́ Бо́га, да́рующаго на́мъ ве́лію ми́лость.

Сла́ва, другíй тропа́рь, свято́му Макси́му, гла́съ то́йже:

Стра́нное рожде́ніе и воспита́ніе бы́лъ еси́, о́тче, и па́ки во вла́сти своего́ ца́рствія водвори́вся, небе́снаго Ца́рствія жела́я, земно́е ца́рствіе оста́вивъ и смире́ніемъ небе́сныхъ бла́гъ получи́лъ еси́, преблаже́нне Макси́ме, моли́, мо́лимся, о душа́хъ на́шихъ.

И ны́нѣ, богоро́диченъ, по гла́су:

[Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8. Свята́го Макси́ма, гла́съ 1:

Отъ младе́нства цѣлому́дріе возлюби́въ, о́тче,* и ю́ностный цвѣ́тъ возрасте́ Це́ркви,* Іо́сифу подража́я, прекра́сне,* во иноплеме́нныхъ, я́ко цѣ́ли го́лубь, вѣ́ру соблю́лъ еси́,* прему́дръ же и богоуго́денъ яви́вся,* тѣ́мже и удивля́емь бы́лъ еси́ отъ всѣ́хъ,* Макси́ме достоблаже́нне. [Два́жды.]

Свѣ́тъ лица́ твоего́, о́тче,* проявля́етъ тво́ю духо́вную благода́ть,* красе́нъ бы́въ во видѣ́ніи,* краснѣ́йшій же душе́ю:* твоя́ бо мо́щи облагоуха́ютъ чу́вства,* и удивля́ютъ вся́къ ра́зумъ,* и прославля́ютъ Бо́га,* просла́вльшаго тя́,* о́тче на́шъ Макси́ме.

Боголюби́вое твое́ ста́до* и вѣ́рныхъ собо́ри,* восхваля́емъ тя́, святи́телю,* я́ко въ животѣ́ удивле́нъ бы́въ,* прему́дрымъ твои́мъ уче́ніемъ,* по сме́рти же то́чиши исцѣле́нія.* Тѣ́мже исцѣли́ ду́ши и тѣлеса́ на́ша,* Христо́въ служи́телю,* Макси́ме преблаже́нне.

Ины стихи́ры, Аѳана́сія и Кири́лла, гла́съ 4. Подо́бенъ: Яко до́бля.

Гоне́нія претерпѣ́лъ еси́* и бѣды́ подъя́лъ еси́,* богоглаго́ливе преподо́бне Аѳана́сіе,* до́ндеже ле́сть прогна́лъ еси́* Аріеву безбо́жную* и ста́до твое́ отъ нече́стія спа́слъ еси́,* Единосу́щнаго Отцу́ догма́тствуя* Сы́на же и Ду́ха правосла́вно,* священнодѣ́йственне, всеблаже́нне.

Блиста́ньми проповѣ́данія* су́щія во тмѣ́ просвѣти́лъ еси́* и ле́сть всю́ отгна́лъ еси́,* предбѣ́дствуя о вѣ́рѣ тве́рдо, Аѳана́сіе,* я́ко па́стырь и́стиненъ,* я́ко водруже́ніе непоколеби́мо,* пресла́вне, Христо́вы Це́ркве.* Сего́ ра́ди, соше́дшеся, тя́ почита́емъ,* пѣ́сненно ра́дующеся.

Отъ Христо́вы Це́ркве* мы́сленныя во́лки, Кири́лле, отгна́лъ еси́* жезло́мъ уче́ній твои́хъ,* и сію́ о́крестъ огради́лъ еси́* слове́съ утвержде́ніи,* и предста́вилъ еси́ Христу́, недви́жиму и непоколеби́му.* Его́же моли́ отъ тли́ и бѣ́дъ изба́вити* вѣ́рою соверша́ющія всечестну́ю па́мять твою́.

Сія́ніи Ду́ха* просвѣти́въ тво́й у́мъ,* свѣтолу́чное со́лнце бы́лъ еси́,* я́коже лучи́, повелѣ́нія* во вся́ концы́ простира́я,* и вѣ́рныхъ озаря́я* исполне́ніе, всеблаже́нне,* и отгоня́ тму́, богоно́се, ересе́й* си́лою отъ Дѣ́вы Возсія́вшаго.

Сла́ва, гла́съ 6:

Во исхо́дѣ ди́внаго твоего́ преставле́нія чи́стыя твоея́ души́, честнѣ́йшій о́тче, благолѣ́пна два́ му́жа зря́, во оде́ждахъ красото́ю сія́юща, лице́мъ свѣ́тлымъ и очи́ма ра́достныма къ ма́тери и ученико́мъ твои́мъ глаго́лалъ еси́: отку́ду къ на́мъ пріидо́ша кра́сніи му́жіе сíи? Они́ же, разумѣ́вше бы́вшее посѣще́ніе Бо́жіе, я́ко посла́ Бо́гъ а́нгели во о́бразѣ Аѳана́сія и Кири́лла ти́хо взя́ти ду́шу твою́ отъ чи́стаго тѣ́ла твоего́, свя́те святи́телю треблаже́нне, Макси́ме досточу́дне.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́. И чте́нія.

Втора́го зако́на чте́ніе. [Глава́ 1.]

Во дне́хъ о́нѣхъ, рече́ Моисе́й къ сыно́мъ Изра́илевымъ: ви́дите, преда́хъ предъ лице́мъ ва́шимъ зе́млю, вше́дше, наслѣ́дуйте ю́, ю́же кля́тся Госпо́дь отце́мъ ва́шимъ — Авраа́му, и Исаа́ку, и Іа́кову — да́ти и́мъ и сѣ́мени и́хъ по ни́хъ. И реко́хъ къ ва́мъ во вре́мя о́но, глаго́ля: не возмогу́ еди́нъ води́ти ва́съ. Госпо́дь Бо́гъ на́шъ умно́жилъ вы́ е́сть, и се́, есте́ дне́сь, я́ко звѣ́зды небе́сныя, мно́жествомъ. Госпо́дь Бо́гъ оте́цъ на́шихъ да приложи́тъ ва́мъ, я́ко да бу́дете ты́сящами сугу́бо, и да благослови́тъ ва́съ, я́коже глаго́ла ва́мъ. И взя́хъ отъ ва́съ му́жы му́дры, и худо́жны, и смы́сленны и поста́вихъ и́хъ владѣ́ти надъ ва́ми: тысященача́льники, и стонача́льники, и пятдесятонача́льники, и десятонача́льники, и письмоводи́тели судія́мъ ва́шимъ. И заповѣ́дахъ судія́мъ ва́шимъ во вре́мя о́но, глаго́ля: разслу́шайте посредѣ́ бра́тій ва́шихъ и суди́те пра́ведно посредѣ́ му́жа, и посредѣ́ бра́та его́, и посредѣ́ прише́льца его́. Да не позна́ете лица́ въ судѣ́, ма́лому и вели́кому су́диши, и не устыди́шися лица́ человѣ́ческа, я́ко су́дъ Бо́жій е́сть.

Втора́го зако́на чте́ніе. [Глава́ 10.]

Во дне́хъ о́нѣхъ, рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и не́бо небесе́, земля́ и вся́, ели́ка су́ть на не́й. Оба́че отцы́ ва́ши произво́ли Госпо́дь люби́ти и́хъ, и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́я ва́ша не ожесточи́те ктому́. Ибо Госпо́дь Бо́гъ ва́шъ, Се́й Бо́гъ бого́мъ и Госпо́дь господе́й; Бо́гъ Вели́кій, и Крѣ́пкій, и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и си́ру, и вдови́цѣ, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́лъ ти́ е́сть вели́кая и сла́вная сія́, я́же ви́дѣстѣ о́чи твои́.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во о́чію безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 1:

Въ честнѣ́мъ преставле́ніи твое́мъ, о́тче на́шъ Макси́ме, мно́жество наро́да собира́ется, и́нокъ же и церко́внаго ли́ка, и и́же въ мірски́хъ тебѣ́ послужи́вшихъ и сво́инствующихъ съ тобо́ю: о́бще бо пла́чь громогла́сенъ о тебѣ́, преподо́бне, сотвори́ша.

Твои́ лю́діе, преподо́бне Макси́ме, слезя́ще, надгро́бная тебѣ́ глаго́лаху: о, прему́драго твоего́ ра́зума, о́тче на́шъ преблаже́нне! я́ко се́й ча́съ помина́я, на́съ оста́вилъ еси́, и житія́ сего́ сла́ву и красоту́ ни вочто́же вмѣни́въ, Бо́гови прилѣпи́лся еси́, и Тому́ послѣ́довалъ еси́, и отъ Него́ [Христа́ Бо́га] просла́вился еси́.

Яко луна́, заше́дъ въ подзе́мная, преподо́бне, и, я́ко би́серъ, кры́емь въ земли́ вла́жной, яви́лся еси́, святи́телю, свѣ́томъ просвѣще́нъ благода́ти Свята́го Ду́ха, исцѣля́я и освяща́я ду́ши и тѣлеса́ на́ша, новоявле́нне Макси́ме достосла́вне.

Аѳана́сію и Кири́ллу, гла́съ 4:

Добродѣ́тели вся́цѣй обучи́лся еси́, терпѣли́вно, богодухнове́нне, и, пома́зався Ду́ха пома́заніемъ святы́мъ, священнодѣ́тель свяще́ннѣйшій я́вѣ бы́лъ еси́ и па́стырь и́стиненъ и вѣ́ры побо́рникъ, тѣ́мже вся́ Це́рковь сла́витъ твою́ па́мять, свяще́нно соверша́ющи и Спа́са прославля́ющи.

Благосказа́ніемъ слове́съ твои́хъ, свяще́ннѣйше Кири́лле, Це́рковь вся́ украша́ется, и благоче́стно удобря́ется кра́сными добро́тами, и почита́етъ свяще́нно твою́ святу́ю и благознамени́тую па́мять, сла́вне, правосла́вныхъ похвало́, отце́въ верхо́вне, и́же на собо́рѣ, Всесвяты́я побо́рниче.

Сла́ва, гла́съ 2:

Ко́ль кра́сное видѣ́ніе ви́дѣлъ еси́ во исхо́дѣ души́ твоея́, о преблаже́нне Макси́ме, и пресвѣ́тлыя святи́тели и богому́дрыя Аѳана́сія и Кири́лла. И ма́терь и ученики́ твоя́ ужаси́лъ еси́, коне́чную жа́лость лю́демъ, о́тче, оста́вилъ еси́.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На стихо́внѣ стихи́ры самогла́сны, гла́съ 1:

Во все́мъ подража́лъ еси́* прароди́телемъ твои́мъ, святи́телю,* Симео́ну преподо́бному* и Са́ввѣ свяще́нному.* Они́ бо, ца́рство оста́виша,* бога́тство въ ру́цѣ ни́щихъ вда́вше* и, стра́нствовати изво́лиша,* Ми́лостиваго Бо́га себѣ́ обрѣт́ше,* тѣ́мже и отъ Христа́ Бо́га* сла́ву и вѣ́чный поко́й получи́ша,* тебе́, преподо́бне Макси́ме,* совсе́льника иму́ще,* съ ни́ми и сца́рствующа* въ небе́сномъ Ца́рствіи.

Сти́хъ: Честна́ предъ Го́сподемъ* сме́рть преподо́бныхъ Его́.

Ве́сь освяще́нъ Бо́гови* бы́лъ еси́, о́тче,* труды́ и посто́мъ себе́ украша́я,* ми́лостынями же вже́гъ свѣщу́, уясни́лъ еси́,* предвари́въ Жениха́ — Христа́,* и вше́дъ въ черто́гъ веселя́ся,* всехва́льне святи́телю Макси́ме,* моли́ спасти́ся душа́мъ на́шимъ.

Сти́хъ: Свяще́нницы Твои́ облеку́тся въ пра́вду,* и преподо́бніи [Твои́ возра́дуются].

Свя́те святи́телю Макси́ме,* посѣща́й ста́до твое́,* и соблюда́й невреди́мо* отъ волко́въ напа́дающихъ,* загражда́я и́хъ злокова́рная уста́,* я́ко да въ ми́рѣ* воспѣва́емъ сла́ву твою́.

Сла́ва, [Аѳана́сію], гла́съ 3:

Па́ки на́мъ златоте́чный Ни́лъ и безсме́ртія тезоимени́тъ, лѣ́тною па́мятію прише́дъ, до́брыми восхожде́ньми наводня́етъ златостру́йная безсме́ртія лія́нія, и, пи́щу сла́дкую плододая́ высо́кимъ боговѣща́ніемъ, Тро́ицы Нераздѣ́льнѣй держа́вѣ учи́тъ покланя́тися, и источа́етъ боже́ственная уче́нія, вѣ́рныхъ напая́етъ помышле́нія и мо́лится о душа́хъ на́шихъ.

И ны́нѣ, богоро́диченъ, [гла́съ то́йже]:

Безъ сѣ́мене отъ Боже́ственнаго [Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.]

На благослове́ніи хлѣ́бовъ: Тропа́рь свята́го Макси́ма, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го Макси́ма, два́жды. Сла́ва, іера́рховъ. И ны́нѣ, богоро́диченъ.

По 1-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Цѣлому́дріе Іо́сифово стяжа́лъ еси́, святи́телю, и кро́тость Дави́дову. Іо́сифъ, дѣ́вства цвѣ́тъ соблюде́, ца́рства сподо́бися; Дави́дъ же, Голіа́ѳа уби́въ, пома́занникъ свѣ́телъ яви́ся. Ты́ же, преподо́бне, во все́мъ искуше́нъ бы́въ, крѣ́постію тве́рдаго твоего́ ра́зума неврежде́нъ пребы́лъ еси́ и, фарао́на мы́сленнаго потопи́въ, себе́ чи́ста Бо́гови предста́вилъ еси́. Тѣ́мже и Бо́гъ, ви́дѣвъ чистоту́ души́ твоея́, преблаже́нне Макси́ме, на свѣ́щникъ святи́тельства возведе́ тя́, просвѣща́ти и освяща́ти ду́ши на́ша. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́вою пребыва́етъ.

По 2-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Якоже предопредѣли́ Предвоззва́вый тя́, безсме́ртія ты́ предображе́ніе бы́лъ еси́, я́ко умертви́въ благоче́стно Аріева мудрова́нія, невреди́мь бо бы́лъ еси́, и́стины побо́рникъ, о́тче Аѳана́сіе, правосла́вныхъ похвало́. Тѣ́мже тя́ по до́лгу пою́ще, соверша́емъ боже́ственную па́мять твою́. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

[Велича́ніе:

Велича́емъ тя́, святи́телю о́тче Макси́ме, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8. Подо́бенъ: Прему́дрости Сло́ва.

Прему́дрости рачи́теля, Макси́ма восхва́лимъ, сла́ву земну́ю оста́вльша, Христу́ Царю́ послѣ́дова, вы́шнихъ жела́я, ни́жняя оста́вилъ еси́, мно́гія ско́рби и бѣды́ подъя́лъ еси́, изгна́нія же и чужестра́нствія, Христа́ любя́ и Христо́ви подо́бяся, во дво́рѣхъ Госпо́днихъ всели́лся еси́, преподо́бне о́тче, мо́лимся, моли́ Христа́ Бо́га прегрѣше́ній оставле́ніе дарова́ти пра́зднующимъ вѣ́рою и любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Помышля́ю су́дъ и бою́ся истяза́нія, трепе́щу му́ки и ужаса́юся о́гненныя болѣ́зни, тмы́ же и та́ртара, увы́, что́ сотворю́, сту́дъ ка́ко претерплю́, егда́ кни́ги отве́рзутся и дѣя́нія облича́тся? Сего́ ра́ди припа́даю Ти́, Богоро́дице Пречи́стая, тогда́ предста́ни ми́, ну́жды о́ныя изыма́ющи, Тебе́ бо и́мамы прибѣ́жище, Влады́чице.

Та́же степе́нна 1-й антифо́нъ 4-го гла́са. Проки́менъ, гла́съ 4: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Вся́кое дыха́ніе... Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Дне́сь весели́тся Христо́ва Це́рковь въ па́мяти треблаже́нныхъ оте́цъ: я́ко Аѳана́сій Арія посрами́ и Кири́ллъ Несто́рія низложи́, Макси́мъ же, сла́ву оста́вивъ и кре́стъ взе́мъ, послѣ́дова Христу́.

Кано́ны три́, святы́мъ: Макси́му на 6, Аѳана́сію и Кири́ллу на 8.

Кано́нъ Макси́му, его́же краегране́сіе си́це: Восхва́лимъ святи́теля, хору́гву Це́ркве. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Іису́су: Воспою́ Тебе́, Го́споди Бо́же мо́й, я́ко просла́вилъ еси́ Тебе́ просла́вльшаго, Макси́ма, всѣ́ми хвали́маго, са́мъ бо себе́ отъ младе́нства, я́ко ма́слинную вѣ́твь, Тебѣ́, Христе́, принесе́, и я́ко Бо́гу, — оса́нна, — Тебѣ́ вопіе́тъ.

Азъ же тя́ воспою́, я́ко еле́емъ ми́лостыни и по́ты трудо́въ твои́хъ, себе́, о́тче, ума́стилъ еси́ и, свѣти́льникъ вже́гъ, съ му́дрыми дѣ́вами въ срѣ́теніе Жениха́ Христа́, блаже́нне Макси́ме, въ весе́ліе вѣ́чное всели́лся еси́.

Симео́на преподо́бнаго и святи́теля Са́ввы ты́ яви́лся еси́, о́тче, лоза́ и́стинная, источа́я вино́ спасе́нія, всѣ́хъ вѣ́рныхъ ду́ши веселя́щее, святи́телю о́тче на́шъ преблаже́нне, Макси́ме досточу́дне.

Богоро́диченъ: Совѣ́та Превѣ́чнаго хра́мъ воздви́глъ еси́, святи́телю, архистрати́га Гавріи́ла ра́достное провѣща́ніе Богоро́дицѣ вседне́вно воспѣва́я: ра́дуйся, Невѣ́сто неневѣ́стная.

Кано́нъ свята́го Аѳана́сія, его́же краегране́сіе: Аѳана́сій хвала́ Правосла́вія бы́сть. Творе́ніе Ѳеофа́ново, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Аѳана́сію принося́ похвалу́, я́ко добродѣ́тель благохваля́, къ Бо́гу приношу́ па́че похвале́ніе, отъ Него́же человѣ́комъ даде́ся достохва́льно дарова́ніе добродѣ́тели, ея́же бы́сть одушевле́нъ о́бразъ и печа́ть.

Богому́дрія бы́лъ еси́ испо́лненъ и, па́че со́лнца а́нгельскимъ, блаже́нне, житіе́мъ облиста́въ ны́нѣ, преподо́бне, превозше́лъ еси́ похва́лъ зако́ны, я́же отъ на́съ, но пріими́, о́тче, а́ще и не по досто́инству похваля́емый.

Достодо́лжно у́бо пѣ́снь плете́мъ въ сла́внѣй твое́й па́мяти, но, лиша́ющеся велича́йшихъ, Аѳана́сіе, по досто́инству пѣ́сней твои́хъ, про́симъ проще́ніе на́мъ да́ти и оби́льную благода́ть тобо́ю Ду́ха.

Богоро́диченъ: Пресла́вная возглаго́лашася о Тебѣ́ въ ро́дѣхъ родо́въ, Бо́га Сло́ва во чре́вѣ вмѣсти́вшая, чиста́ же пребы́вши, Богоро́дице Марíе. Тѣ́мже Тя́ вси́ почита́емъ, по Бо́зѣ предста́тельство на́ше.

Инъ кано́нъ свята́го Кири́лла, его́же краегране́сіе: Зрѣ́ній Кири́ллъ боже́ственныхъ цѣвни́ца. Іоа́нново, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Отъ Бо́га свѣтода́тельную благода́ть, Кири́лле, пріе́мъ и свѣ́телъ свѣти́льникъ яви́вся, слове́сныя облиста́лъ еси́ на́мъ лучи́ па́мятію твое́ю, я́ко да досто́йно тя́ воспои́мъ.

Испо́лнился еси́ свѣтоявле́нія, Кири́лле му́дре, Ду́ха, я́ко за́повѣдей Христо́выхъ храни́тель, страсте́й очище́нъ, Пребоже́ственныя бы́лъ еси́ вои́стинну Тро́ицы жили́ще.

Яко ре́вности и дерзнове́нія испо́лненъ, Кири́лле сла́вне, богобо́рцы вся́ нелжи́во языкобо́лія обличи́лъ еси́ злочести́выхъ ересе́й, Правосла́віе защища́я.

Богоро́диченъ: Тро́ицы Пребоже́ственныя, Всечи́стая, Еди́наго родила́ еси́, изъ Тебе́ пло́тію я́вльшася по на́мъ благоволе́ніемъ Роди́теля и содѣ́йствіемъ Ду́ха Всесвята́го, Богоневѣ́сто.

Катава́сія: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Хвала́ми да почти́мъ треблаже́ннаго отца́, и́же, небе́сная жела́я, земна́я оста́вивъ, и по стезя́мъ поте́къ, я́ко еле́нь, жела́я водна́го исто́чника: си́це усе́рдно послѣ́довалъ е́сть стопа́мъ роди́телей свои́хъ.

Ве́сь у́бо у́мъ впери́въ къ высотѣ́, земна́я ни вочто́же вмѣня́я, и смире́ніемъ, достоблаже́нне Макси́ме, высо́кая воспрія́лъ еси́.

Аще и изгна́нъ бы́лъ еси́, Макси́ме преподо́бне, оби́тели твоего́ оте́чества, но пресла́вный у́бо Ра́дулъ воево́да любе́зно тебе́, о́тче, пріе́млетъ, ра́дуяся душе́ю и краси́тся вели́чіемъ, я́ко даде́ ему́ Бо́гъ отца́, и учи́теля, и спаси́теля душе́внаго.

Богоро́диченъ: Ка́я сія́, я́же вои́стинну бли́зъ Бо́га, я́ко превозше́дши вся́ а́нгельскія чи́ны, еди́на, добро́тою дѣ́вства сія́ющи, я́ко Ма́ти Вседержи́теля?

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Очи́стивъ отъ вся́кія скве́рны ду́шу же и тѣ́ло, Аѳана́сіе, хра́мъ показа́лся еси́ досто́йно боже́ственъ. Тѣ́мже Тро́ицы исполне́ніе почи́ въ тебѣ́, священнотаи́нниче всеблаже́нне.

Твою́ ду́шу, я́коже жела́ше, Утѣ́шителева благода́ть, отъ страсте́й очище́ну, обрѣ́тши, я́вѣ въ не́й дѣ́йствія показу́етъ и пресвѣ́тло свѣти́ло, о́тче, мíру тя́ полага́етъ.

Святи́тельства у́бо пра́вило святи́телемъ показа́лся еси́, дѣ́тельнаго же подписа́ніе житія́, сло́во же твое́ я́сно, видѣ́нія о́бразъ, прему́дре, богосло́вія же твоего́ предѣ́лъ уче́нія яви́ся.

Богоро́диченъ: Херуви́мовъ и серафи́мовъ превы́шши показа́лася еси́, Богоро́дице, Ты́ бо еди́на прія́ла еси́ Невмѣсти́маго Бо́га во Твое́мъ чре́вѣ, Нескве́рная. Тѣ́мже, вѣ́рніи, Тя́ вси́ пѣ́сньми, Чи́стая, ублажа́емъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Укрѣпля́емь о Христѣ́, ко́зни лука́ваго змíя тве́рдымъ умо́мъ, Кири́лле, я́ко тка́ніе паучи́нное, расто́ргнулъ еси́.

Ти́ну страсте́й отъ души́ оттря́слъ еси́, Кири́лле, низложи́въ вся́кое помысло́въ возноше́ніе, на Христа́ превознося́щееся.

Яко благополу́ченъ страда́лецъ, о́тче, уклони́лся еси́ тве́рдо вся́каго плотска́го сладостра́стія, я́ко тще́тнаго и навѣ́тнаго.

Богоро́диченъ: Сло́во Отчее, предочи́стившися, о Чи́стая, Ду́хомъ, слове́снаго естества́ на благодѣя́нія родила́ еси́.

Катава́сія: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Конда́къ Аѳана́сія, гла́съ 2. Подо́бенъ: Крове́й Твои́хъ.

Правосла́вія насади́въ уче́нія, злосла́вія те́рніе изсѣ́клъ еси́, умно́живъ сѣ́мя вѣ́ры одожде́ніемъ Ду́ха, преподо́бне, тѣ́мже тя́ пое́мъ, Аѳана́сіе.

Икосъ:

Аѳана́сія же и Кири́лла всепра́зднственную па́мять пѣ́сньми, вѣ́рніи, восхва́лимъ дне́сь: сíи бо Арія льсти́ваго и Евно́мія вку́пѣ съ Саве́лліемъ во глубину́ тѣ́хъ поги́бели вложи́ша, огню́ вѣ́чному преда́вше ты́я сгорѣ́ти, я́ко поху́лившія непра́ведно на Спа́сово воплоще́ніе, тѣ́мже тя́ пое́мъ, Аѳана́сіе.

Сѣда́ленъ гла́съ 8. Подо́бенъ: Прему́дрости Сло́ва.

Роди́теля и сро́дники, сла́ву же и и́же въ сла́вѣ тебѣ́ служа́щихъ оста́вилъ еси́, же́ртву жи́ву Бо́гови себе́ предста́ви лъ еси́ и мно́гихъ вразуми́лъ еси́, пу́ть покая́нія показа́вый, Макси́ме всеблаже́нне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, Кири́лла, гла́съ 3. Подо́бенъ: Красотѣ́ дѣ́вства.

Ересе́й ле́сть обличи́лъ еси́ и Правосла́вную вѣ́ру уясни́лъ еси́, я́ко богоглаго́ливъ и благочести́въ, проповѣ́далъ еси́ въ мíрѣ Еди́но Божество́ въ Тро́ицѣ сла́вити, естество́мъ Единосу́щное и Ли́цы неслія́нное. Тѣ́мже и, соше́дшеся, всесла́вне Кири́лле, почита́емъ па́мять твою́.

И ны́нѣ, богоро́диченъ:

Недомы́сленно и непостижи́мо е́сть, Влады́чице Богора́дованная, е́же содѣ́ланное о Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на отъ пречи́стыхъ крове́й Твои́хъ, Его́же всегда́, Чи́стая, я́ко Сы́на Твоего́, моли́ спасти́ся душа́мъ на́шимъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Лю́ди Бо́жія возмуща́етъ ненави́дяй добра́, и обою́ стратила́ту, Ра́дула и Богда́на воево́ды, бли́зъ сраже́нію бы́вшу. Ты́ же, преподо́бне Макси́ме, я́ко крыла́тъ предста́въ, обои́мъ полко́мъ ми́ръ да́въ; они́ же возвраща́ются во своя́ си, сла́вяща Бо́га и уго́дника Его́.

Идѣ́же бо Ду́хъ хо́щетъ — ды́шетъ, я́коже рече́ Христо́съ во Ева́нгеліи, и апо́столъ: идѣ́же любо́вь — та́мо побѣжда́ется мно́жество грѣхо́въ. Ду́хомъ, о́тче, провозвѣсти́лъ еси́ боже́ственная твоя́ словеса́.

Макси́ме всехва́льне, кто́ по достоя́нію возмо́жетъ восхвали́ти кро́ткаго твоего́ взо́ра и медото́чныхъ твои́хъ глаго́лъ? Язы́къ тво́й бы́сть тро́сть кни́жника, Ду́хомъ Святы́мъ подвиза́емь, мно́гихъ привлече́ къ вѣ́рѣ, мно́жайшихъ же къ покая́нію.

Богоро́диченъ: Иже отъ не су́щихъ вся́ческая Божество́мъ содѣва́я, роди́ся изъ Тебе́, Богома́ти, мíръ просвѣща́я свѣ́тлыми заря́ми Боже́ственными и богоразу́мія свѣтлостьми́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Все́ тебѣ́ вдохну́ живоно́сное дыха́ніе съ высоты́, пе́рвѣе прише́дшее боголѣ́пно Ду́ха Христо́ва въ го́рницѣ и ученики́ насы́щшее, апо́стола тя́ показа́ тринадеся́таго, о́тче, Правосла́вную вѣ́ру проповѣ́дающаго.

Ты́, Боже́ственною ре́вностію зѣло́ распаля́емь, въ собо́рѣ спосо́бствуя, и пре́жде, е́же соверши́тися тебѣ́ предсѣда́телю, въ Нике́и проповѣ́дуеши Единосу́щное, тѣ́мже Це́ркве Христо́съ пастыренача́льника и учи́теля тя́ поставля́етъ.

Вруче́на имѣ́я церко́вная корми́ла отъ промышле́нія Боже́ственнаго, Аѳана́сіе, еретико́въ душевре́дная вся́ языкобо́лія, я́коже нѣ́кая сѣки́ра, посѣ́клъ еси́, искореня́я, я́коже те́рніе, и сѣ́мя сло́ва напая́я, му́дрѣ воздѣ́лалъ еси́.

Богоро́диченъ: Ты́ вѣ́рныхъ похвала́ еси́, Безневѣ́стная, Ты́ Предста́тельница, Ты́ и прибѣ́жище христіа́нъ, стѣна́ и приста́нище: къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу Чи́стую Тя́ зна́ющія.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Побѣди́вши стра́сти душетлѣ́нныя и по́мысломъ удержа́вша пло́ти, богоно́сне Кири́лле, ви́дѣвъ, Христо́съ боже́ственныя тя́ Це́ркве предсѣда́теля, о́тче, поста́вилъ е́сть.

Наслѣ́довавъ, я́ко сы́нъ возлю́бленъ, оте́ческую Ма́ркову добродѣ́тель, и престо́ла бы́лъ еси́ прее́мникъ, боже́ственнаго стопа́мъ евангели́ста послѣ́дуя.

Отъ Христа́ у́бо, я́ко овча́, упа́слся еси́, я́коже па́стырь упа́слъ еси́ ста́до, о́тче, словесы́ душепита́тельными твои́ми, я́ко трава́ми и цвѣты́, оби́льно напитава́я благода́ти.

Богоро́диченъ: Изъ не су́щихъ вся́ Боже́ственною си́лою Содѣ́лавый ражда́ется изъ Тебе́, Богома́ти, мíръ озаря́я свѣ́тлыми заря́ми Божества́ и богозна́нія свѣ́тлостію.

Катава́сія: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Самово́льнѣ оста́вилъ еси́, о́тче на́шъ Макси́ме, вся́ сла́вная, и сро́дная, и подру́жная, по глаго́лу Ева́нгельскому, Христу́ Бо́гу послѣ́довалъ еси́ и стра́нствовати изво́лилъ еси́.

Тлѣ́нная бо оста́вивъ, треблаже́нне, нетлѣ́нная воспрія́лъ еси́, свѣ́томъ насыща́яся Боже́ственныя свѣ́тлости во дво́рѣхъ Го́спода твоего́, Макси́ме прему́дре.

Лю́діе твои́, о о́тче, и ча́да, Ду́хомъ Святы́мъ порожде́нна, жа́лостная оста́вльше, ра́достная тебѣ́ воспѣва́ютъ пѣ́нія, вопію́ще: не оста́ви на́съ, свя́те, въ ра́дости Го́спода твоего́, моля́ Его́ о душа́хъ на́шихъ.

Богоро́диченъ: Свы́ше Тебѣ́ гла́съ ра́достно возопи́ а́нгелъ, Богоро́дице, неизрече́нное Влады́ки возвѣща́я Тебѣ́ зача́тіе.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Христа́ имѣ́я, глаго́люща, о́тче, во орга́нѣ доброгла́снѣмъ язы́ка твоего́, посрами́лъ еси́ у́бо и́доловъ напи́санно е́ресь, заблужде́нныя наставля́я и обраща́я ко и́стинному Бо́гу, Аѳана́сіе.

Губи́тельный е́реси вся́, о́тче, изобличи́лъ еси́ словесы́ и писа́ньми, разли́чную ле́сть изгоня́я му́дрыми показа́ньми изъ вселе́нныя, уясня́я невоспротивосло́внѣ Правосла́вную вѣ́ру, блаже́нне.

Тя́, учи́теля вои́стинну вели́ка учи́телей му́дрыхъ, Аѳана́сіе, неле́стно сказу́етъ и со апо́столы причте́ Це́рковь Христо́ва, о́тче, изъявля́юща непоро́чное сло́во вѣ́ры.

Богоро́диченъ: Ма́тернее дерзнове́ніе къ Сы́ну Твоему́ стяжа́вши, Всечи́стая, сро́днаго промышле́нія на́шего не пре́зри, мо́лимся, я́ко Тя́ и еди́но, христіа́не, ко Влады́цѣ очище́ніе ми́лостивно предлага́емъ.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ны́нѣ лице́ Христо́во созерца́яй, ты́ лице́мъ къ лицу́, о Кири́лле, зерца́ломъ, вои́стинну разрѣ́шшимся, соедини́лся еси́ твои́мъ жела́ніемъ.

Тече́нію, вои́стинну зѣ́льному, наводня́ющему рѣ́ки, твое́, о Кири́лле, уподо́бися сло́во, злосла́вныхъ отвраща́я ухищре́нія.

Ра́внѣ ме́рзское Аріево раздѣле́ніе, о Кири́лле, скве́рное же Саве́лліево слія́ніе изъ глубины́ изве́рглъ еси́.

Богоро́диченъ: Тя́ ору́жіе непобѣди́мое на враги́ предлага́емъ: Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Катава́сія: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Яко ши́покъ въ те́рніи, преподо́бне Макси́ме, во иноплеме́нныхъ возра́слъ еси́, вѣ́ру тве́рдо и чистоту́ соблю́лъ еси́; по вѣ́рѣ чи́стаго твоего́ се́рдца вседомо́вно тебе́ Бо́гъ преселя́етъ въ зе́млю люде́й твои́хъ, я́коже Авраа́ма иногда́ въ зе́млю обѣтова́нія.

Хору́гвь Христо́ва, христіа́номъ похвала́, по апо́столу, о́тче на́шъ Макси́ме, взыва́я: ничи́мже, хваля́ся, то́кмо о крестѣ́ Го́спода на́шего Іису́са Христа́.

О, прему́драго твоего́ ра́зума, всехва́льне святи́телю! Ка́ко утаи́вся всѣ́хъ свои́хъ си́, и посредѣ́ мяте́жа и молвы́, кре́стъ взе́мъ, послѣ́довалъ еси́ Христу́.

Богоро́диченъ: Тя́ еди́ну посредѣ́ те́рнія обрѣ́тъ, я́ко пречестны́й кри́нъ и удо́лія цвѣ́тъ, о Богома́ти, Жени́хъ изъ утро́бы Твоея́, — Сло́во, —про́йде.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Чужда́го сѣ́мене сѣ́ятель яви́вся Аполлина́рій, земна́го словесе́ и ума́ Христо́во вочеловѣ́ченіе, крѣ́пко изобличи́ся отъ тебе́, всеблаже́нне, я́коже несмы́сленъ и умовре́денъ.

Тече́ній слове́сныхъ, излія́нныхъ изъ усте́нъ твои́хъ, я́ко изъ исто́чника приснотеку́щаго благода́ти, преподо́бне, сладча́йшія ме́да, я́ко отъ окри́на, во́ды, вѣ́рніи, почерпа́емъ.

Диви́тся вся́къ твои́мъ, о́тче, влѣ́поту списа́ніемъ му́дрымъ, любезновмѣща́я, хотя́щія прозяба́ти е́реси прови́дя, отвраща́емыя отъ тебе́ проро́чески.

Богоро́диченъ: Да изба́вимся отъ лю́тыхъ прегрѣше́ній мольба́ми Твои́ми, Богоро́дительнице Чи́стая, и да получи́мъ, Всечи́стая, Боже́ственное осія́нія изъ Тебе́ неизрече́нно воплоще́ннаго Сы́на Бо́жія.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Клеща́ми серафи́мъ проро́ку у́гль, Це́ркви же Христо́вѣ твои́ми рука́ми подае́ши, священнотаи́нниче, е́же Боже́ственнаго огня́ у́гліе очище́нія.

Единопредѣ́льныя, я́ко Сампсо́нъ, иноплеме́нники не потреби́лъ еси́, иноро́дныя же вся́ иносла́вныхъ уче́нія низложи́лъ еси́ и держа́ву правосла́внымъ да́лъ еси́, Кири́лле.

Собо́ру богоизбра́нному я́вѣ предводи́тельствовавъ, злоче́стіе Несто́ріево, христобо́рную де́рзость, о́тче, низложи́лъ еси́, ре́вностію дыха́я по и́стиннѣй Богома́тери.

Богоро́диченъ: О, чу́до, всѣ́хъ чуде́съ новѣ́йшее! Яко Дѣ́ва во утро́бѣ вся́ческая Содержа́щаго, неискусому́жно заче́нши, не тѣсновмѣсти́.

Катава́сія: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ — Бо́гъ мо́й.

Конда́къ, гла́съ 2. Подо́бенъ: Въ вы́шнихъ ища́.

Кре́стъ взе́мъ, мно́гія ско́рби и изгна́нія подъя́лъ еси́, святи́телю Макси́ме всеосвяще́нне, оте́чества твоего́ и бо́говруче́ннаго ста́да лиша́емь, вся́ бо до́блественнѣ терпѣ́лъ еси́, душе́внаго ра́ди твоего́ просвѣще́нія.

Икосъ:

О, кто́ отъ земны́хъ похвали́ти возмо́жетъ Бо́гомъ просла́вленнаго? Мы́ же ра́достная, я́ко вѣ́твы взе́мше, похва́льная тебѣ́, о́тче, прино́симъ: ра́дуйся, благочести́ваго ко́рене о́трасли; ра́дуйся, цвѣ́те благоуха́нный, чи́стаго твоего́ житія́; ра́дуйся, прему́драго воздержа́нія сокро́вище; ра́дуйся, я́ко ца́рство земно́е оста́вивъ, воево́да Царя́ Христа́ бы́лъ еси́; ра́дуйся, я́ко мно́гія труды́ и бѣды́ подъя́лъ еси́; ра́дуйся, я́ко слеза́ми твои́ми мно́гихъ удиви́лъ еси́, пу́ть покая́нія показа́вый; ра́дуйся, я́ко мно́гая ча́да Ду́хомъ Святы́мъ породи́лъ еси́; ра́дуйся, я́ко кри́нъ, во юдо́ли процвѣ́лъ еси́. Ра́дуйся, Макси́ме преблаже́нне, душе́вное просвѣще́ніе.

Въ то́йже де́нь.
Па́мять и́же во всяты́хъ отца́ на́шего Макси́ма Но́ваго, архіепи́скопа, бы́вшаго де́спота Се́рблемъ.

             Сти́хъ: Но́вое процвѣте́ніе яви́лся еси́, Макси́ме.

             Сти́хъ: Но́вую оби́тель обрѣ́лъ еси́ на небесѣ́хъ.

Се́й блаже́нный и ди́вный Макси́мъ бы́сть отъ ко́рене благочести́ваго Симео́на Нема́ни, сы́нъ же де́спота Стефа́на, Стефа́нъ же бы́сть сы́нъ Гео́ргія де́спота. Се́й же Стефа́нъ му́дростію и хра́бростію превосходя́ мно́гихъ, красото́ю же преизли́ха, я́ко прослу́тися о хра́брости и ра́зумѣ его́ до сама́го ами́ры Амура́та, и́же вожделѣ́ ви́дѣти его́, ку́пно и съ бра́томъ Ге́ргуромъ. Посыла́етъ у́бо ко отцу́ и́хъ Гео́ргію, во е́же посла́ти къ нему́ сы́ны своя́ на ви́дѣніе Ма́ри цари́цы. И, вѣ́рою и кля́твою утве́рждъ, возврати́ти и́хъ здра́вы во своя́ си́. Оте́цъ же и́хъ, вѣ́ру е́мь, посыла́етъ и́хъ къ ами́рѣ на посѣще́ніе дще́ре своея́; ами́ра же весе́ло и любо́вно пріе́млетъ и́хъ. Они́ же, мно́гую хра́брость показа́ша на ко́нскомъ риста́ніи, я́ко въ не́нависть подви́гнути ага́ряны хра́брство и красота́ и́хъ. И та́ко сшива́ютъ клеветы́ за́вистныя. Приступа́ютъ къ царю́, глаго́люще: «а́ще пу́стиши здра́вы таковы́я храбрецы́, мы́ у́бо по́слѣжде отъ ни́хъ побѣжде́ни бу́демъ. Аще ли же искази́ши и́хъ, мы́ зе́млю и оте́чество и́хъ во́змемъ въ на́ше достоя́ніе». Якоже и бы́сть. И та́ко окая́нный ца́рь, скве́рну вѣ́ру свою́ и кля́тву преступи́въ, о́ба бра́та лиша́етъ зѣ́ницъ о́чныхъ, и та́ко ко отцу́ и́хъ посыла́етъ. Оте́цъ же и́хъ, слы́шавъ и ви́дѣвъ, жа́лости и рыда́нія неутѣши́маго испо́лнився, мно́гая нарица́я, глаго́лаше. По́слѣжде, едва́ въ себѣ́ бы́въ, повелѣ́ привести́ мно́гое мно́жество изма́ильтянъ, и, сѣ́дъ на зе́млю, повелѣ́ закла́ти и́хъ, до́ндеже ве́сь огрезну́ въ кро́ви и́хъ. И та́ко въ таково́й жа́лости по ма́лѣмъ вре́мени житіе́ оставля́етъ. Юнѣ́йшій же сы́нъ его́ Ла́зарь на престо́лъ госпо́дства возведе́нъ бы́сть, и тому́, еди́но лѣ́то владѣ́вшу, ко Го́споду отхо́дитъ нескве́рная та́ душа́. По се́мъ у́бо Ге́ргуръ отхо́дитъ въ Хиленда́рь и власы́ остриза́етъ. Стефа́нъ же пріе́млетъ де́спотства са́нъ, и та́ко хра́бровавъ на ага́ряны, ели́ко мо́щно свѣ́та незря́щему, оставля́етъ оте́чество и отхо́дитъ на За́падъ. Ке́сарь же о не́мъ увѣ́дѣвъ, призыва́етъ его́ къ себѣ́, жа́луя и любе́зно учрежда́я, дивя́ся прему́дрости его́, и дае́тъ ему́ во упокое́ніе Белигра́дъ, и́же во Фрино́лѣ. И ту́ бра́ку сочетава́ется, пое́млетъ себѣ́ въ сопру́жницу дще́рь кня́зя Арвани́тскаго, Арани́та Хра́браго, госпожу́ Ангели́ну, и ту́ ражда́етъ блага́го и кра́снаго о́трока, блаже́ннаго сего́ Макси́ма, и вдае́тся [се́й] учи́тися Боже́ственнымъ кни́гамъ. Онъ же, я́ко благопоспѣши́въ, на́ша же и внѣ́шняя писа́нія ско́ро въ кра́й извы́къ, и та́ко водворя́ется во дворѣ́ ке́саревѣ. Вси́ у́бо красотѣ́ его́ и му́дрости дивля́хуся, я́ко и само́й дще́рѣ ке́саревѣ вожделѣ́ти красоты́ его́, и еди́ною безсту́днѣ къ нему́ рещи́: «кому́ е́смь а́зъ подо́бна?» — «Оному, — рече́, — и́же Ада́ма и Еву изъ рая́ изве́дшему». И та́ко посрами́въ ю́, отъ себе́ отрази́. По се́мъ слы́шавъ Угорскій кра́ль о не́мъ и о бра́тѣ его́ Іоа́ннѣ, посыла́етъ ке́сарю посла́ти и́хъ къ нему́. И та́ко съ че́стію отпу́щени бы́ша, оставля́ютъ Фрино́лу и, взе́мше мо́щи отца́ своего́ и ма́терь, прихо́дятъ ко кра́лю. Кра́ль же, любе́знѣ и́хъ пріе́мь, вдае́тъ и́мъ оте́чество и́хъ Си́рмію, и та́мо у́бо до́блественнѣ хра́брствовавше на ага́ряны, похваля́еми бѣ́ху кра́лемъ. Кра́ль же дае́тъ сро́дницу свою́ сему́ блаже́нному Макси́му, и́менемъ Сиби́ллу, я́ко бы́ти ему́ въ жену́. Онъ пріе́мь, сотвори́ти хотѣ́ бы́ти е́й Восто́чнаго исповѣ́данія, я́ко у́бо не восхотѣ́, о́нъ чи́ста отъ нея́ себе́ соблюде́ и, утаи́вся всѣ́хъ, остриза́етъ чисто́тныя своя́ власы́, прихо́дитъ во и́же отъ него́ созда́нный монасты́рь. Сиби́лла же, раска́явшися, отхо́дитъ ко и́же отъ ни́хъ и́нокинямъ, и та́ остриза́етъ власы́. Іоа́ннъ же, бра́тъ его́, и ма́ти, и вси́ вла́стели, мно́гъ пла́чь и жа́лость сотвори́ша о сбы́вшемся. И въ жа́лости сы́й бра́тъ его́, тлѣ́нная оста́вль и нетлѣ́нная воспрія́тъ, не оста́вль му́жеска по́ла, коне́чну жа́лость оста́вивъ Се́рбскому наро́ду. По сме́рти же бра́та его́ понужде́нъ быва́етъ Макси́мъ кра́лемъ и всѣ́ми вла́стели па́ки прія́ти де́спотства са́нъ. Онъ же не восхотѣ́въ, — увы́, — прихо́дитъ иноплеме́нныхъ въ до́мъ и́хъ и оте́чество, иноплеме́нникъ же о́нъ изго́нитъ и́хъ. Преподо́бный же Макси́мъ, взе́мъ мо́щи отца́ и бра́та своего́, и ма́терь, прихо́дитъ ко и́же Ра́дулу, стратила́ту Вла́шскому. Христолю́бецъ же пріе́млетъ и́хъ ра́достною душе́ю и весе́ліемъ се́рдца, и ту́ поко́й получа́ютъ, я́ко во свои́хъ си́. Ненави́дяй же добра́ діа́волъ, воздвиза́етъ ра́ть между́ стратила́ты обоя́ Да́кій, Ра́дуломъ и Богда́номъ воево́домъ, и бли́зъ сраже́нію бы́вшу. Блаже́нный же Макси́мъ, я́ко крыла́тъ, прите́къ посредѣ́ обои́хъ полко́въ, и богому́дрымъ ра́зумомъ свои́мъ утоли́въ о́ба стратила́та и любо́вію утверди́въ, ми́рно возврати́ти сотвори́ коему́ждо во своя́ си́, сла́вящимъ Бо́га и уго́дника Его́. Оба же воево́ды любо́вь положи́ша ко свято́му, ему́ нехотя́щу, возве́дше, хиротони́саша на престо́лъ архіере́йства Вла́шскаго. И по вре́мени Ра́дулъ воево́да отхо́дитъ ко Го́споду. Ми́лостивая та́ душа́ ми́лости сподо́бися. По не́мже прихо́дитъ злонра́вный Ми́хна воево́да. Святы́й, прозрѣ́въ его́ злокова́рство, я́ко преда́ти его́ и́мать въ ру́цѣ ами́рѣ ага́рянскому, ухищря́етъ у́бо святы́й, и посыла́етъ нѣ́кія отъ вла́стелъ, глаго́лати, е́же посла́ти ко кра́лю Угорскому ми́рная сотвори́ти. Онъ же отпуща́етъ его́ съ гра́ммотами. Святы́й же, та́й вся́ своя́ взе́мъ, и то́щно рѣку́ Олту прехо́дитъ, и та́ко безъ стра́ха кра́ля достиза́етъ, и вся́, я́же о ми́рѣ, до́брѣ устроя́етъ, и гра́ммоты кра́левы къ Ми́хнѣ посла́въ, ктому́ не возврати́ся на сво́й престо́лъ. Ниже́ па́ки иноплеме́нникъ о́ный оста́ви его́ во сво́й его́ монасты́рь пріити́, но, испроси́въ отъ свои́хъ сва́товъ Якшичевъ, Стефа́на и Ма́рка, мѣ́сто видѣ́ніемъ добро́, Крушедо́лъ та́ко зово́мо, съ по́мощію Іоа́нна, нѣ́коего воево́ды, ту́ воздвиза́етъ благолѣ́пну оби́тель во и́мя Благовѣ́щенія Пресвяты́я Богоро́дицы и, и́ноковъ мно́жество собра́въ, трудолю́бно поживе́, и боголюбе́зная своя́ ча́да со слеза́ми наказу́я и уча́, ко Го́споду отхо́дитъ, Его́же отъ младе́нства возлюби́, мѣ́сяца Іаннуа́рія 18-го дне́. Повѣству́ютъ же вси́ предстоя́щіи на исхо́дѣ души́ его́, я́ко ви́дѣти ему́ два́ а́нгела, во о́бразѣ патріа́рховъ Александрíйскихъ Аѳана́сія и Кири́лла, во оде́ждахъ кра́сныхъ сія́ющихъ, и рещи́ ему́: «отку́ду къ на́мъ пріидо́ша благолѣ́пніи сíи му́жіе во оде́ждахъ кра́сныхъ?» По мно́гихъ же зна́меніяхъ и со́нныхъ открове́ніяхъ, въ седьмо́е лѣ́то откры́вше ра́ку его́, — о, чудесе́! — обрѣто́ша тѣ́ло цѣ́ло и неруши́мо ку́пно со одѣя́ніемъ, благоуха́ніемъ вся́ чу́вства исполня́ющее и удивля́ющее, творя́ зна́менія и исцѣля́я неду́жныя, съ вѣ́рою къ нему́ притека́ющія. Соверша́ется же собо́ръ его́ во и́же отъ него́ созда́ннѣй оби́тели, о Христѣ́ Іису́сѣ, Го́сподѣ на́шемъ, Ему́же сла́ва всегда́, ны́нѣ, и при́сно и во вѣ́ки вѣко́въ, ами́нь.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ра́дулъ воево́да, благоче́стія испо́лнь, ра́достно Бо́га похваля́ше, я́ко благочести́ваго ко́рене о́трасль пріе́мъ, па́че же Бо́жіе оби́телище и цвѣ́тъ чистоты́. Тѣ́мже и вопія́ше: благослове́нъ Бо́гъ оте́цъ на́шихъ.

Госпо́дь даде́, Госпо́дь взя́тъ, — по Іову, Бо́га благодаря́, глаго́лалъ еси́, свяще́нне Макси́ме, хва́льнаго воспѣва́я Бо́га и препросла́вленнаго.

Возду́хъ у́бо освяти́ся благово́ніемъ моще́й твои́хъ, Макси́ме, Христо́въ святи́телю, Це́рковь же, веселя́щися, вопіе́тъ: благослове́нъ Бо́гъ оте́цъ на́шихъ.

Богоро́диченъ: Истинную Богоро́дицу исповѣ́дающе Тя́, я́ко а́нгелъ, — ра́дуйся, — вѣ́рою вопіе́мъ Ти́, — еди́на бо Ра́дость родила́ еси́, Обра́дованная и при́сно Благослове́нная.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Единоче́стное, сопресто́льное Отцу́ Сло́во, Единоро́дна же Сы́на правосла́вно проповѣ́давъ, безсме́ртія, о́тче тезоимени́те, а́біе науча́еши, Ду́ху Сопресто́льна, и Единосу́щна, и Соприсносу́щна.

Учи́теля тя́, проповѣ́дника священноявле́нна Трисо́лнечнаго Свѣ́та, возвѣща́юща вѣ́ру правосла́вія да́же до коне́цъ земли́, нече́стія зря́ роди́тель, изгна́нія на тя́ воздвиза́етъ.

Бѣды́ безмѣ́рныя, я́же подъя́лъ еси́, блаже́нне, подвиза́яся по благоче́стіи, вѣнцы́ же, та́коже свѣ́тліи, и́бо адама́нтъ бы́лъ еси́ бію́щимъ, къ себѣ́ же, я́ко магни́тъ, привлача́лъ еси́ вся́.

Стра́нныя догма́ты, чу́ждія же Це́ркве Христо́вы, изгна́лъ еси́, Тро́ицу богосло́вивъ Ѵпоста́сьми, Божество́мъ же Еди́ницу, Юже пѣ́лъ еси́: благослове́нъ Бо́гъ оте́цъ на́шихъ.

Богоро́диченъ: Ны́нѣ вся́ испо́лнишася Свѣ́та Боже́ственнаго Тобо́ю, Пречи́стая: Ты́ бо две́рь яви́лася еси́, е́юже мíру Бо́гъ бесѣ́дова, просвѣща́я вѣ́рою зову́щія: благослове́нъ Бо́гъ оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ Сина́йстѣй горѣ́ во мра́къ дре́вле вше́дъ, зако́нъ прія́тъ, блаже́нне Кири́лле, Моисе́й, убива́ющій пи́сменемъ, ты́ же разгну́лъ еси́ сокрове́нную добро́ту Ду́ха.

Законоположе́нія гада́ньми, я́коже младе́нцемъ пе́рвѣе, о́тче, да́ннаго покрыва́лу покрове́нія, я́коже ши́пки, разумѣ́нія ты́ откры́лъ еси́, сказа́въ о́бразы я́вственнѣйше.

Въ несли́тномъ соедине́ніи Боже́ственномъ и несѣко́момъ я́вѣ, о́тче, раздѣле́ніи Три́ у́бо богосло́вствуяй Ѵпоста́си, ре́клъ еси́, Кири́лле, непремѣ́нныя же въ существѣ́ Еди́номъ и Божествѣ́.

Богоро́диченъ: Вы́шняго освяще́нное боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Катава́сія: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Усе́рдно взе́мъ кре́стъ и Христу́ послѣ́довавъ, Макси́ме преблаже́нне, ско́рби мно́ги и изгна́нія претерпѣ́лъ еси́, вопія́: благослови́те, вся́ дѣла́ Госпо́дня, Го́спода.

Ца́рскій цвѣ́тъ Це́ркви цвѣте́тъ, Кре́стъ и́стинный, ты́ же, сего́ взе́мъ, святи́телю Макси́ме досточу́дне, ца́рскимъ путе́мъ поте́клъ еси́, вопія́: благослови́те, вся́ дѣла́ Госпо́дня, Го́спода.

Разрѣ́шъ сою́за мірскíя, связа́въ себе́ любо́вію Бо́жіею: и́го бо взе́мъ, яре́мъ Христо́въ, и, сего́ поне́съ, вопія́лъ еси́: благослови́те, вся́ дѣла́ Госпо́дня, Го́спода.

Богоро́диченъ: Неи́стовства злотворя́щихъ ти́ не устраши́лся еси́, боже́ственный Макси́ме: Вы́шняго бо си́ла, изъ Дѣ́вы возсія́вшаго, всеору́жіемъ кре́стнымъ тя́ одѣ́я, вопи́ти: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Святи́телей украше́ніе благосла́вное, Аѳана́сіе, сто́лпе свѣ́та и Це́ркве утвержде́ніе, Тро́ицы побо́рниче, богосло́вія трубо́ злата́я, житія́ же мона́шескаго извѣ́стный законописа́телю, съ на́ми пра́зднуеши, іере́и соверша́я, лю́ди вѣ́рныя приводя́ Христу́ во вѣ́ки.

Безсме́ртія бы́лъ еси́ вои́стинну тезоимени́тъ, дѣ́ятельныя бо сло́вомъ превозше́лъ еси́, иску́сныя же въ сло́вѣ извѣ́стіемъ житія́ побѣжда́я, во обои́хъ преше́лъ еси́ краи́. Тѣ́мже, преизя́щною добродѣ́телію просія́въ, безсме́ртную стяжа́лъ еси́ па́мять во вѣ́ки.

Ты́ свѣтлѣ́йшее показа́лъ еси́, тайнонебе́сниче богопрія́тне, святи́тельство до́блими страда́ньми твои́ми, пре́лесть изгна́лъ еси́ твои́ми изгна́ніи ча́стыми за Тро́ицу, Юже проповѣ́дуя, вопія́лъ еси́: Отцу́ поклони́теся, Сы́на богосло́вите, Ду́ха воспо́йте во вся́ вѣ́ки.

Богоро́диченъ: Пло́тію Ро́ждшую Еди́наго отъ Тро́ицы Бо́га и по Рождествѣ́ па́ки цѣ́лу пребы́вшую непреста́нно воспои́мъ, я́ко превы́шшую херуви́мовъ и серафи́мовъ честнѣ́йшую, вопію́ще: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Яко волна́ морска́я вои́стинну, въ тебѣ́ истече́ прему́дрости исто́чникъ, и́бо приснотеку́щія потеко́ша рѣ́ки изъ чре́ва твоего́, о́тче, уче́ній благочести́выхъ, я́коже прорече́ Христо́съ: прехо́дятъ бо песка́ твоя́ словеса́ богоглаго́ливая.

Па́стырь и учи́тель му́дръ Це́ркви показа́вся, два́, Кири́лле, я́вѣ истолкова́лъ еси́, преподо́бне, завѣ́ты, я́ко бо анки́ру и оте́ческое наслѣ́діе твоя́ иму́щи словеса́, вопіе́тъ: благослови́те, вся́ дѣла́ Госпо́дня, Го́спода.

Сло́ва, Вопло́щшагося на́съ ра́ди, Всехитреца́, ты́ неизрече́нному науча́еши соедине́нію, Кири́лле, нераздѣ́льному, неслія́нному, по коему́ждо манове́нію ра́внѣ уклони́лъ еси́, вопія́: благослови́те, вся́ дѣла́ Госпо́дня, Го́спода.

Богоро́диченъ: Безъ ма́тере Сло́во изъ Отца́ Сы́й пе́рвѣе, безъ отца́ бы́сть изъ Тебе́ второ́е, Всечи́стая, вопло́щся пре́жде Безпло́тный за благоутро́біе, восхотѣ́въ спасти́ пою́щія: благослови́те, вся́ дѣла́ Госпо́дня, Го́спода.

Катава́сія: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Красно́ у́бо Це́рковь весели́тся въ па́мяти твое́й, о святи́телю треблаже́нне Макси́ме! Се́рбстіи же ро́дове сти́чутся, пра́зднственная тебѣ́ принося́ще, восхваля́юще Христа́, тебе́ просла́вльшаго.

Въ печа́ли, о́тче, оста́вилъ еси́ боголюбе́зная твоя́ ча́да, въ ра́дость же душе́вную претвори́лъ еси́ вѣ́рныхъ мно́жества явле́ніемъ благово́нныхъ моще́й твои́хъ: похва́льная же тебѣ́ прино́сятъ наро́дныхъ собра́нія.

Ихже о́ко не ви́дѣ, и у́хо не слы́ша, и на се́рдце человѣ́ку не взыде́, такова́я, о́тче, отъ Бо́га получи́лъ еси́ блага́я, си́хъ наслажда́яся, моли́ о ста́дѣ твое́мъ, е́же Бо́гови собра́лъ еси́, и о лю́дехъ твои́хъ, восхваля́ющихъ тя́, грѣха́ изба́витися, и ра́дости сподо́битися, и весе́лія вѣ́чнаго.

Богоро́диченъ: Въ ра́дость Богоро́дицы водрузи́лъ еси́ оби́тель кра́сную, въ не́йже ча́да твоя́ боголюби́вая, обстоя́ще ра́ку твою́ честну́ю, святи́телю Макси́ме преблаже́нне, воспѣва́юще Го́спода, Дѣ́ву ублажа́ютъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Просія́ житіе́, я́ко мо́лнія, излія́ся же, о́тче, всѣ́мъ вѣща́ніе твое́, я́коже гро́мъ, я́же со́лнце назира́етъ, съ небесе́ бо имѣ́лъ еси́ свы́ше вдохнове́ніе и́стинно. Тѣ́мже не угаси́ твоея́ па́мяти хода́тай забве́нія — гро́бъ, Аѳана́сіе.

Свѣ́томъ Трисо́лнечнымъ и Трисія́ннымъ яснѣ́йше ны́нѣ осія́емь, пѣвце́мъ твои́мъ осія́ніе зареви́дно явля́еши, я́ко зерца́ломъ, свы́ше испуща́я со́лнечнѣ, и тебѣ́ оставле́нія, блаже́нне, а́ще вели́ко и превосхо́дно па́че досто́инства проси́мое.

Пою́ще, мо́лимъ тя́ прилѣ́жно: о Це́ркви моли́ся, Кресто́мъ побѣ́ды дарова́ти царю́, правосла́внѣй же вѣ́рѣ крѣ́пость на е́реси враго́въ, на́мъ же спасе́ніе, ми́ръ же мíру, въ твое́й па́мяти, Аѳана́сіе.

Богоро́диченъ: Зачала́ еси́, Дѣ́во, безъ сѣ́мене вся́ческая созда́вшаго Сло́во Бо́жіе кромѣ́ хотѣ́ній пло́ти, кромѣ́ тлѣ́нія же родила́ еси́ и безъ болѣ́зней ма́терскихъ. Тѣ́мъ Тя́, Богоро́дицу, и язы́комъ и се́рдцемъ исповѣ́дающе, велича́емъ.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Возноше́ніе на Христо́въ взе́млющееся ра́зумъ и Сего́ Богома́терь, Кири́лле, вся́кое крѣ́пцѣ низложи́лъ еси́ Несто́рія безбо́жное, сыно́въ дво́ицу, та́кожде и слія́ніе безгла́вныхъ есте́ствъ.

Си́лою ра́зума и просвѣще́ніемъ благода́ти Тро́ицу Единосу́щную, Сы́на же, воплоще́ннаго Бо́га, богосло́вилъ еси́, блаже́нне, яви́вся же Богоро́дицы побо́рникъ, въ вы́шнихъ ны́нѣ прославля́ешися.

Свы́ше на́съ, пѣвцы́, приснопа́мятне, назира́еши, о́тче, ми́лостивно, царю́ побѣ́ды крестоно́сцу подая́ и возвыша́я моли́твами твои́ми ро́гъ правосла́вныхъ, уясня́я же твою́ па́мять велича́ющія.

Богоро́диченъ: Непло́дствующее боже́ственныхъ добродѣ́телей, Всечи́стая Богоро́дице, се́рдце мое́ покажи́, Дѣ́во, плодоно́сно, изъ непло́дове ро́ждшаяся во́лею вся́ Претворя́ющаго ма́ніемъ, да пою́ Тя, Всепѣ́тую.

Катава́сія: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Свѣти́ленъ. Подо́бенъ: Ду́хомъ во святи́лищи.

Ду́хомъ просвѣща́еми, святи́теліе треблаже́нніи, озаря́ете сердца́ и ду́ши на́ша, воспѣва́ющихъ ва́шу свѣ́тлую па́мять, Аѳана́сіе прему́дре, Кири́лле преблаже́нне, и Макси́ме досточу́дне.

Сла́ва:

Тро́ицы проповѣ́дника, восхва́лимъ вели́каго Аѳана́сія, па́стыря вели́каго гра́да Александрíи: Арія бо посрами́ и Святѣ́й Тро́ицѣ покланя́тися научи́.

И ны́нѣ, богоро́диченъ:

Со дерзнове́ніемъ глаго́лати Богоро́дицу и покланя́тися Се́й вои́стинну отъ вѣ́рныхъ ты́ науча́еши, Кири́лле всеблаже́нне, безбо́жную Несто́рія потребля́я пре́лесть.

На хвали́техъ стихи́ры самогла́сны [на 4], гла́съ 1:

Стефа́нъ, вѣне́цъ добро́ты и красота́ Це́ркве,* преподо́бная же Ангели́на, лоза́ честна́я,* породи́ста ро́ждіе виногра́да спасе́ннаго,* Макси́ма свяще́ннаго и Іоа́нна пра́веднаго,* отъ ни́хже источа́ется на́мъ весе́ліе душе́вное,* и́хже моли́твами, Бо́же,* спаси́ ду́ши на́ша, я́ко Милосе́рдъ. [Два́жды.]

Возве́дъ о́ко душе́вное къ небеси́* и у́мъ впери́въ къ Бо́гу,* вся́ су́етная пренебре́глъ еси́;* слеза́ми же лице́ твое́ умыва́я,* преподо́бне о́тче на́шъ Макси́ме,* я́ко да чи́сту ду́шу твою́* Христу́ Бо́гу предста́виши.

Дне́сь красу́ется Христо́ва Це́рковь* въ па́мяти треблаже́ннаго отца́ Макси́ма,* дне́сь обстоя́ще ра́ку твою́* боголюби́вая твоя́ ча́да,* Ду́хомъ Святы́мъ порожде́нное твое́ ста́до,* и хва́лящеся, вопію́тъ:* ди́венъ Бо́гъ во святы́хъ Свои́хъ;* въ Це́рквахъ благослови́мъ Тя́, Го́споди.

Сла́ва гла́съ 3:

Вели́кія и́стины трубы́, многострада́льный Аѳана́сій, и Макси́мъ, и Кири́ллъ, свѣ́тлый проповѣ́дникъ, на трапе́зу дне́сь созыва́ютъ Це́рковь; свѣ́тло, вѣ́рніи вси́, къ торжеству́ усря́щемъ, до́брыя па́стыри пѣ́сньми почита́юще, свяще́нныя и́хъ труды́, я́ко да моли́твами и́хъ пріи́мемъ отъ Христа́ Бо́га грѣхо́въ проще́ніе и ве́лію ми́лость.

И ны́нѣ, богоро́диченъ:

Невѣ́стникъ свѣтоно́сенъ и чи́стъ, Дѣ́во, бы́вши Бо́гу, воспѣва́емъ Тя́ любо́вію и блажи́мъ, я́ко да святи́теля Макси́ма моли́твами спасе́ши ду́ши на́ша.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на Макси́ма, пѣ́снь 3-я, и святи́телей, пѣ́снь 6-я. Проки́менъ, гла́съ 8: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ Це́ркви преподо́бныхъ. Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе отъ Матѳе́я, зача́ло 11. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́].

Источникъ: Пра́вила моле́бная святы́хъ Се́рбскихъ Просвѣти́телей. Въ че́сть святомомяну́тыхъ святи́телей, въ по́льзу же и богомо́льство святы́хъ оби́телей и церкве́й Се́рбскихъ, во воспомина́ніе же и подража́ніе правосла́внаго Се́рбскаго ро́да. — М., 1765. — Л. 117 об. – 133.

/ Къ оглавленію раздѣла /


Наверхъ / Къ титульной страницѣ

0