Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 17-й де́нь.
Преподо́бнаго и богоно́снаго отца́ на́шего Анто́нія Вели́каго.

Аще восхо́щетъ настоя́тель, твори́мъ бдѣ́ніе.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 2. Подо́бенъ: Егда́ отъ дре́ва Тя́.

Егда́ во гро́бѣ тебе́ сама́го, ра́дуяся, заключи́лъ еси́, о́тче, любве́ ра́ди Христо́вы, терпѣ́лъ еси́ крѣпча́йше отъ де́моновъ искуше́нія, моли́твою же и благода́тію отгна́лъ еси́ си́хъ паучи́ны немощнѣ́йшія совѣ́тованія. Тогда́ собра́шася чи́ни а́нгельстіи, зову́ще: сла́ва Укрѣ́пльшему тя́, Анто́ніе. [Два́жды.]

Другíй яви́лся еси́ Илія́, имѣ́яй сла́вныя ученики́ твоя́, я́коже Елиссе́я, му́дре, и́мже и благода́ть твою́ сугу́бу оста́вилъ еси́, восхище́нъ, я́ко на колесни́цѣ возду́шнѣй, о́тче. Тѣ́мже, живя́й ду́хомъ, ны́нѣ сра́дуешися и́мъ. Вся́ помина́й, всеблаже́нне, соверша́ющія любо́вію твое́ честно́е торжество́, Анто́ніе.

Якоже богови́децъ Моисе́й, во мра́къ мы́сленный вше́лъ еси́ видѣ́ній вои́стинну, а́біе же ви́дѣлъ еси́, Его́же жела́лъ еси́, я́сно: просла́вився же лице́мъ, заре́ю о́ною, о́тче, наста́вити во спаси́тельныя оби́тели. Тѣ́мже, соше́дшеся, богому́дре, ра́дующеся, взыва́емъ: сла́ва Укрѣ́пльшему тя́ Христу́ Бо́гу.

Сла́ва, гла́съ 3. Анато́лія:

Преподо́бне Анто́ніе, твердѣ́йшаго страда́льчества зно́йное и мра́зное житіе́, я́ко въ незаходи́мыхъ воспочива́я, соверши́лъ еси́: пусты́ннѣйшимъ бо тебе́ сама́го совокупи́въ духо́внѣ, огнепа́льныя стрѣ́лы де́монскія попра́лъ еси́. И, превы́шши вся́кія добродѣ́тели бы́въ, водворяе́шися со а́нгелы во Ца́рствіи небе́снѣмъ, съ ни́миже моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* отъ ма́тернихъ пеле́нъ,* богоно́се,* освяще́нъ сосу́дъ, Анто́ніе,* и до́мъ Всесвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Ле́сти лука́выхъ* де́моновъ посрами́въ* Креста́ си́лою,* уясни́лъ еси́ сла́ву Христо́ву,* о́тче Анто́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Возне́слся еси́, я́ко Илія́,* на колесни́цѣ о́гненнѣй* и преше́лъ еси́, блаже́нне,* нехода́тайственнѣ къ Тро́ицѣ,* Анто́ніе всемíрне.

Сла́ва, и ны́нѣ, богоро́диченъ:

Го́рніи Тя́ ли́цы,* Богоро́дице Дѣ́во,* пою́тъ съ до́льними,* сла́вяще непреста́нно* Рождество́ Твое́ Пречи́стое.

[Тропа́рь свята́го. Сла́ва, и ны́нѣ, богоро́диченъ.]



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 4. Подо́бенъ: Зва́нный свы́ше.

Просвѣти́выйся Ду́ха луча́ми,* егда́ тя́ боже́ственное жела́ніе распали́,* и ду́шу впери́* Того́ возжела́ти любве́ вои́стинну кра́йнѣйшее:* тогда́ преоби́дѣлъ еси́ пло́ть и кро́вь,* и внѣ́ мíра бы́лъ еси́ мно́гимъ воздержа́ніемъ,* и безмо́лвіемъ Сему́ соединя́яся.* Тѣ́мже напо́лнился еси́,* я́ко проси́лъ еси́, отту́ду до́брыхъ* и просія́лъ еси́, я́коже звѣзда́,* озаря́я ду́ши на́ша, Анто́ніе. [Три́жды.]

Де́моновъ лу́ки и стрѣ́лы сокруши́въ* благода́тію Боже́ственнаго Ду́ха,* и зло́бу и ловле́нія и́хъ* всѣ́мъ явле́нно сотвори́лъ еси́* боже́ственными уче́ньми,* боже́ственными сія́ньми облиста́емь.* Мона́шествующихъ богоза́рнѣйшій свѣти́льникъ бы́лъ еси́,* и пусты́ни пе́рвый украси́тель,* и неду́гующихъ иску́снѣйшій и честны́й вра́чь* и началообра́зное начерта́ніе добродѣ́тельнаго житія́,* о́тче Анто́ніе. [Три́жды.]

Чи́стый душе́ю и се́рдцемъ,* а́нгелъ земны́й, человѣ́къ небе́сный,* дѣ́вства учи́тель,* воздержа́нія извѣ́стное мѣ́рило, Анто́ніе,* живы́й со Влады́кою твои́мъ* и немо́лчное славосло́віе, блаже́нне,* со а́нгелы, и преподо́бными,* и всѣ́ми му́ченики Сему́ принося́,* соверша́ющія твою́ свяще́нную па́мять всегда́* отъ лю́тыхъ бѣ́дъ и прегрѣше́ній свободи́. [Два́жды.]

Сла́ва, гла́съ 6:

Еже по о́бразу соблю́дъ невреди́мо, у́мъ Влады́ку надъ страстьми́ па́губными по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, граждани́нъ пусты́нный, благотеку́щихъ обучи́тель, пра́вило добродѣ́тели извѣ́стнѣйшее, и ны́нѣ на небесѣ́хъ зерца́ломъ разрѣ́шшимся, о́тче на́шъ Анто́ніе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? [Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. И чте́нія.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. И свята́го, гла́съ 2. Самогла́сны. Студи́тово:

По́стническое обуче́ніе собра́въ на земли́, преподо́бне Анто́ніе, и страсте́й прило́ги въ тече́ніи сле́зъ твои́хъ вся́ потопи́лъ еси́, лѣ́ствица боже́ственная и честна́я, на небеса́ возводя́щая, всѣ́мъ позна́ся богопрія́тное житіе́ твое́: благоче́стія бо плоды́ въ себѣ́ показа́въ, исцѣля́еши тѣ́ми не́мощи страсте́й вѣ́рно вопію́щихъ тебѣ́: ра́дуйся, восто́ка звѣздо́ златоза́рнѣйшая, и мона́шествующихъ свѣти́льниче, и па́стырю; ра́дуйся, приснопа́мятне, пусты́ни добрѣ́йшее воспита́ніе и Це́ркве непозы́блемое утвержде́ніе; ра́дуйся, заблужда́ющихъ вели́кій наста́вниче; ра́дуйся, на́ша похвало́ и вселе́нныя свѣ́тлое ра́дованіе.

На земли́ а́нгела и на небесѣ́хъ человѣ́ка Бо́жія, мíра благоукраше́ніе, наслажде́ніе благи́хъ и добродѣ́телей, по́стниковъ похвалу́, Анто́нія почти́мъ: насажде́нъ бо въ дому́ Бо́жіи, процвѣте́ пра́ведно и, я́ко ке́дръ, въ пусты́ни, умно́жи па́ству Христо́ву слове́сныхъ ове́цъ въ преподо́біи и пра́вдѣ.

Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха и, отъ Него́ пріе́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая. Ны́нѣ же Боже́ственнымъ свѣ́томъ чистѣ́е осіява́емь, просвѣти́ и на́ша мы́сли, о́тче Анто́ніе.

Сла́ва, гла́съ 5:

Преподо́бне о́тче, гла́съ Ева́нгелія Госпо́дня услы́шавъ, мíръ оста́вилъ еси́, бога́тство и сла́ву въ ничто́же вмѣни́въ. Тѣ́мъ всѣ́мъ вопія́лъ еси́: возлюби́те Бо́га и обря́щете благода́ть вѣ́чную, ничто́же предпочти́те па́че любве́ Его́, да егда́ пріи́детъ въ сла́вѣ Свое́й, обря́щете поко́й со всѣ́ми святы́ми. Его́же моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ:

Блажи́мъ Тя́, Богоро́дице Дѣ́во, я́ко изъ Тебе́ возсія́ Со́лнце пра́вды, Христо́съ, имѣ́яй ве́лію ми́лость.

На стихо́внѣ стихи́ры, гла́съ 5. Подо́бенъ: Ра́дуйся, по́стниковъ.

Ра́дуйся, а́нгельскимъ счета́яся ликостоя́ніемъ въ вы́шнихъ, Анто́ніе: житіе́ бо тѣ́хъ, о́тче, на земли́, вои́стинну добродѣ́телію обучи́вся, пожи́лъ еси́, я́влься чистѣ́йшее и нескве́рное зерца́ло, лучеза́рная блиста́нія пріе́мшее Ду́ха Пресвята́го, всеблаже́нне. Тѣ́мже, озаря́емь, зрѣ́лъ еси́ бу́дущая, вся́ предглаго́ля, отъ Боже́ственнаго свѣтоявле́нія науча́емь Христо́ва, Его́же моли́ душа́мъ на́шимъ да́ти ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, по́стниковъ началово́ждь бы́вый и непобѣди́мый побо́рникъ: страсте́й бо изсѣка́я коре́нія и де́моновъ стремле́нія, сопроти́вився му́жески, обличи́лъ еси́ тѣ́хъ не́мощь и душегу́бную пре́лесть, Спа́сова же Креста́ дѣ́йство и непобѣди́мую яви́лъ еси́ си́лу, е́юже и препоя́сався, побѣди́лъ еси́ вся́, отмета́ющія Боже́ственное во пло́ти явле́ніе Христо́во, Его́же моли́ душа́мъ на́шимъ да́ти ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Сто́лпъ свѣтови́денъ добродѣ́тели утвержде́нъ и о́блакъ, осѣня́ющь су́щія въ пусты́ни, яви́лся еси́, къ небеси́ отъ земли́ Бо́га зря́щихъ предводя́щій. Креста́ па́лицею страсте́й расто́ргъ мо́ре, мы́сленнаго же Амали́ка побѣди́въ, невозбра́ненъ небе́сный восхо́дъ обрѣ́лъ еси́, богоблаже́нне, и наслѣ́діе нетлѣ́нное, со безпло́тными престо́лу ра́достно предстоя́ Христо́ву, Его́же моли́ душа́мъ на́шимъ да́ти ве́лію ми́лость.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Анто́ніе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, Па́влу соприча́стниче Ѳиве́йскому, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

[На благослове́ніи хлѣ́бовъ: Тропа́рь свята́го, два́жды, и Богоро́дице Дѣ́во.., еди́ножды.]

Тропа́рь, гла́съ 4:

Ревни́теля Илію́ нра́вы подража́я, Крести́телю пра́выми стезя́ми послѣ́дуя, о́тче Анто́ніе, пусты́ни бы́лъ еси́ жи́тель и вселе́нную утверди́лъ еси́ моли́твами твои́ми. Тѣ́мже моли́ Христа́ Бо́га спасти́ся душа́мъ на́шимъ.


НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, богоро́диченъ: Еже отъ вѣ́ка утае́ное...

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Зва́нію Го́спода твоего́ послѣ́довалъ еси́, мíръ отве́ргъ и вся́, я́же въ мíрѣ, кра́сная, всеблаже́нне Анто́ніе, претерпѣ́лъ еси́ пусты́нное озлобле́ніе усе́рдно, полки́ же отрази́лъ еси́ де́моновъ му́жественнѣ. Тѣ́мже твою́ па́мять при́сно пѣ́сньми восхваля́емъ вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, боже́ственнымъ Рождество́мъ Твои́мъ истлѣ́вшее страстьми́ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, я́ко умертви́ша вся́ прило́ги страсте́й воздержа́ніемъ и тве́рдымъ терпѣ́ніемъ вои́стинну, и посрами́вша зѣло́ противоборца́ врага́ и всю́ сего́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе, сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ.

По поліеле́и сѣда́ленъ, гла́съ 8. Подо́бенъ: Прему́дрости.

Па́стырскую хи́трость воспріи́мъ и мона́шествующихъ сто́лпъ и основа́ніе, крѣ́пцѣ упа́слъ еси́ разу́мную па́ству твою́: Христо́ва бо возжелѣ́въ Боже́ственная уче́нія, въ ни́хже сло́во посѣ́ялъ еси́, преподо́бне. Тѣ́мже и къ ре́вности а́нгельскаго жи́тельства воздви́глъ еси́ вся́ единому́дренно сла́вити Бо́га, богоно́се Анто́ніе, моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся Всесвято́му Рождеству́ Твоему́.

Степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы на 6. И свята́го на 8.

Кано́нъ Богоро́дицы, его́же краегране́сне: Пою́ хвалу́ живоно́снѣй Отрокови́цѣ. Творе́ніе Іоа́нна Дамаскина́, гла́съ 2.
Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оляденѣ́вшій пу́ть мо́ря Твое́ явля́ше Рождество́, Чи́стая, Юже пое́мъ вси́, я́ко просла́вися.

Си́ла Вы́шняго Ѵпоста́сь соверше́нная, Бо́жія Му́дрость, вопло́щшаяся, Пречи́стая, изъ Тебе́, къ человѣ́комъ бесѣ́дова, я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́ пра́вды Со́лнце, Чи́стая, и мíру возсія́, я́ко просла́вися.

Кано́нъ преподо́бнаго, его́же краегране́сіе: Анто́нія боже́ственнаго восхвали́ти лѣ́по. Творе́ніе Ѳеофа́ново, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Безсме́ртія и жи́зни е́мься вѣ́чныя я́вѣ и Трисія́нныя зари́, о́тче, насыща́яся, просвѣще́ніемъ благода́ти омраче́нную ду́шу мою́ озари́ти помоли́ся, я́ко да досто́йно воспою́ тя.

Мла́дъ сы́й во́зрастомъ тѣлесе́, но́въ пу́ть добродѣ́тели воспріе́мъ, си́мъ безбѣ́дно ше́ствовалъ еси́, зако́ну но́вому повину́яся Спа́сову, треблаже́нне, и живоно́снымъ повелѣ́ніемъ Ева́нгелія послѣ́дуя.

Трисо́лнечнымъ сія́ніемъ, всему́дре, озаря́емь, злоу́мное, блаже́нне, де́моновъ сверѣ́пство, и звѣре́й зія́нія, и ра́нъ болѣ́зни, я́коже паучи́ну, разори́лъ еси́, Боже́ственнымъ разжиза́емь жела́ніемъ.

Богоро́диченъ: Яко Бо́жія Ма́ти, дерзнове́ніе иму́щи къ ро́ждшемуся изъ Тебе́ Единоро́дному Сло́ву, и Отцу́ Собезнача́льному, и Соесте́ственному Ду́ху, моля́щи не преста́й отъ бѣ́дъ спасти́, Всенепоро́чная, Тя́, Богоро́дицу, сла́вящія.

Катава́сія: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене превы́шшій вся́каго, я́ко време́нъ Творе́цъ, изъ Тебе́, Дѣ́во, во́льно Младе́нецъ созда́ся.

Чре́во, простра́ннѣйшее небе́съ, воспои́мъ, и́мже Ада́мъ на небесѣ́хъ, ра́дуяся, живе́тъ.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Утвержде́ннымъ по́мысломъ и крѣ́пкимъ терпѣ́ніемъ страсте́й увяди́лъ еси́ пла́мень, въ безстра́стія свѣ́тлую оде́жду, Анто́ніе, одѣ́ялся еси́, о́тче, и спасе́нія ри́зу.

Крѣпча́йшія прило́ги де́моновъ дерза́ющихъ и звѣ́рскими о́бразы подо́бящихся, пренебре́глъ еси́ тѣ́хъ немощну́ю си́лу, крѣ́пкаго бо имѣ́лъ еси́ во бранѣ́хъ Спомо́щника.

Богоно́сецъ, нача́ла тмы́ и вла́сти обличи́въ воздержа́ніемъ крѣ́пкимъ, до́блественный побѣди́тель, Анто́ніе, бы́лъ еси́, по́стниковъ сла́ва, мона́шествующихъ похвала́.

Богоро́диченъ: Умерщвле́нный мо́й у́мъ живо́тнымъ дѣ́йствомъ, изъ Тебе́ я́вльшимся мíру, воздви́гни, Чи́стая, и къ жи́зни наста́ви, я́же сме́рти две́ри разо́ршая еди́на Рождество́мъ Твои́мъ.

Катава́сія: Утвержде́ніе на Тя́ надѣ́ющихся, утверди́, Го́споди, Це́рковь, ю́же стяжа́лъ еси́ Честно́ю Твое́ю Кро́вію.

Сѣда́ленъ, гла́съ 8. Подо́бенъ: Прему́дрости.

Ду́шу твою́ связа́въ любо́вію Христо́вою, земна́я возненави́дѣвъ вся́ му́дрѣ, водвори́лся еси́, о́тче преподо́бне, въ пусты́няхъ и гора́хъ, разу́мнаго бо дре́ва вкуси́въ, сла́вне, я́ко отъ незаходи́мыхъ, таи́нниче, а́нгельски просія́лъ еси́. Тѣ́мже и, мра́къ проше́дъ пло́ти твоея́, тму́ отгна́лъ еси́ де́моновъ, Анто́ніе, и, мона́шествующихъ предызбра́нный, моли́ Христа́ Бо́га прегрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нія мя́ су́ща скве́рное оби́телище и де́моновъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная. Отжени́ о́блакъ страсте́й, и вы́шняго прича́стія сподо́би, и Свѣ́та Невече́рняго моли́твами Твои́ми.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превознесе́ся Боже́ственная гора́ до́му Госпо́дня превы́шше си́лъ, Богома́терь я́вственнѣйши.

Зако́новъ есте́ственныхъ кромѣ́, еди́на, Дѣ́во, ро́ждши Влады́чествующаго тва́рію, сподо́билася еси́ боже́ственнаго зва́нія.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Добродѣ́телей лѣ́ствицу Боже́ственную употреби́въ, къ высотѣ́, о́тче, возше́лъ еси́ и Бо́га ви́дѣлъ еси́, на не́й утвержде́на и да́ры раздава́юща руко́ю богатѣ́йшею вѣ́рно пою́щимъ: си́лѣ Твое́й сла́ва, Человѣколю́бче.

Ве́сь Бо́гу освяти́лся еси́, Анто́ніе, еди́нъ Еди́ному, всему́дре, единя́яся добродѣ́телію и бесѣ́дами и богоявле́нія, я́ко чи́стъ, сподобля́емь: земли́ бо и земны́хъ отступи́въ, досто́йно небе́сное обрѣ́лъ еси́ наслажде́ніе.

Умъ и ду́шу очи́стивъ, Анто́ніе, пре́лесть, о́тче, душегу́бную, и кова́рствія, и ле́сти го́рькія, и мечта́нія враго́въ обличи́лъ еси́, пострада́въ бо, навы́клъ еси́ и, научи́вся, учи́ши мона́шествующихъ мно́жества, всеблаже́нне.

Богоро́диченъ: Бо́га, изъ Тебе́ воплоще́ннаго, моли́, непрело́жно, е́же бѣ́, пребы́вша и есте́ственно ра́вна Отцу́, и Тебѣ́, Ро́ждшей, бы́вша Единосу́щна, проще́ніе прегрѣше́ній и ду́шъ спасе́ніе пою́щимъ Тя́ вѣ́рою дарова́ти.

Катава́сія: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Сы́й пре́жде вѣ́къ, отъ Дѣ́вы вопло́щся, Бо́гъ на́шъ.

Житію́ и пло́ти мое́й свѣ́тъ возсія́, и дря́хлость грѣха́ разруши́, напослѣ́докъ изъ Дѣ́вы безъ сѣ́мене вопло́щся, Вы́шній.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Живу́ща въ тебѣ́ имѣ́я вся́ ви́дящаго Бо́га, блаже́нне, науча́юща тя́, и просвѣща́юща, и умудря́юща, ду́шъ, треблаже́нне, чи́стыхъ и блаже́нныхъ восхо́ды зрѣ́ти сподо́бился еси́.

Исцѣле́ній тебѣ́ благода́ть на неду́ги разли́чныя дарова́ и на ду́хи нечи́стыя Христо́съ вла́сть, му́дре: естество́ бо, о́тче, побѣди́въ, па́че естества́ даро́въ причасти́лся еси́ Ду́ха.

Богоро́диченъ: Тя́ стѣ́ну иму́ще и предста́тельствомъ Твои́мъ соблюда́еми, Твое́ю боже́ственною сла́вою хва́лящеся, Тя́ блажи́мъ: Ты́ бо, Всечи́стая, душа́мъ на́шимъ источа́еши весе́ліе и ра́дованіе.

Катава́сія: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, о, окая́нный, — вопія́ше, — а́зъ! прови́дѣхъ бо воплоща́ема Бо́га, Свѣ́та Невече́рня, и ми́ромъ Влады́чествующа.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́: Тво́й бо Сы́нъ, я́ко Агнецъ, за всѣ́хъ закала́ется.

Вопіе́мъ Ти́ вси́, и́стиннѣй Богома́тери: прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́, отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю, и спаси́.

Зако́нное страда́льчески житіе́ отъ мя́гкихъ ногте́й воспріи́мъ, богому́дре, да́же до конца́ соблю́лъ еси́ и, я́ко боже́ственъ до́блественникъ, вѣне́цъ прія́лъ еси́ побѣ́ды отъ всѣ́хъ Ца́рствующаго.

Иму́ще тя́ къ Бо́гу моли́твенника крѣпча́йша, блаже́нне, и о́бщника попече́ній, и предста́теля, и побо́рника, и хода́тая благоче́стія, отъ вся́кихъ спаса́емся бѣ́дъ, и напа́стей, и обстоя́ній.

Богоро́диченъ: Вознесла́ еси́ всеи́стинно па́дшееся человѣ́ческое существо́, во зра́цѣ Боже́ственнѣмъ и Отца́ въ ра́венствѣ, ви́димаго Сы́на неизмѣ́ннаго, Богома́ти, безъ сѣ́мене во чре́вѣ поноси́вши.

Катава́сія: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Конда́къ, гла́съ 2. Подо́бенъ: Вы́шнихъ ища́.

Жите́йскія молвы́ отри́нувъ, безмо́лвно житіе́ сконча́лъ еси́, Крести́теля подража́яй вся́кимъ о́бразомъ, преподо́бнѣйшій, съ ни́мъ у́бо тя́ почита́емъ, отце́въ нача́льниче, Анто́ніе.

Икосъ:

Христо́въ гла́съ услы́шавъ, ше́ствовалъ еси́ въ слѣ́дъ Того́ за́повѣдей, на́гъ житія́ бы́въ, и отве́рглъ еси́ попече́нія вся́ стяжа́ній, имѣ́ній и рабо́въ твои́хъ, и сестры́ любле́ніе, богоно́се Анто́ніе, и, еди́нъ въ пусты́няхъ Бо́гу бесѣ́дуя чистѣ́йше, ра́зума благода́ть прія́лъ еси́, ю́же ми́ посли́, въ пѣ́снехъ тя́ пою́щему, отце́въ нача́льниче, Анто́ніе.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ще въ нощи́, Іа́ковъ у́бо я́ко въ гада́ніи Бо́га, воплоще́нна же изъ Тебе́, свѣ́тлостію яви́ся пою́щимъ: Пребоже́ственный отце́въ Бо́гъ и препросла́вленъ.

Зна́менія е́же въ Тебѣ́ неизрече́ннаго проявля́я сплете́нія, со Іа́ковомъ бо́рется: и́мже во́лею соедини́ся человѣ́комъ, Чи́стая, Пребоже́ственный отце́въ Бо́гъ и препросла́вленъ.

Ме́рзокъ, и́же не проповѣ́дуетъ еди́наго Дѣ́вы Тя́ Сы́на отъ Всепѣ́тыя Тро́ицы, и несомнѣ́нною мы́слію, и язы́комъ вопія́: Пребоже́ственный отце́въ Бо́гъ и препросла́вленъ.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Ча́ши бы́ша арома́тъ лани́ты твоя́, добродѣ́телей благово́ніе и спасе́ніе благоуха́ющія, я́ко отъ цвѣ́тника, вѣ́рою зову́щимъ: благослове́нъ Бо́гъ оте́цъ на́шихъ.

Благода́ть Ду́ха Всесвята́го, въ тя́ все́льшися, духо́въ гони́теля лука́вствія, о́тче, содѣ́ла и мона́шествующихъ обучи́теля, зову́ща: благослове́нъ Бо́гъ оте́цъ на́шихъ.

Богоро́диченъ: Марíю Пречи́стую и Всесвяту́ю восхва́лимъ: То́ю бо благода́ть на́мъ источа́ется па́че ума́ даро́въ, я́ко отъ пото́ка Боже́ственныя бла́гости, Юже благочести́вымъ по́мысломъ ны́нѣ ублажи́мъ.

Катава́сія: Тебе́, во огни́ ороси́вшаго о́троки богосло́вившія и въ Дѣ́ву Нетлѣ́нну все́льшагося, Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ Тобо́ю и съ человѣ́ки поживе́, Иже бла́гостію несравне́нный и си́лою. Ему́же пою́ще, вси́ вѣ́рніи, зове́мъ: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Вои́стинно Тя́, Чи́стую, проповѣ́дающе, сла́вимъ Богоро́дицу: Ты́ бо Еди́наго родила́ еси́ отъ Тро́ицы воплоще́нна. Ему́же со Отце́мъ и Ду́хомъ вси́ пое́мъ: да пое́тъ Го́спода вся́ тва́рь и превозно́ситъ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Въ моли́твахъ бо́дрое, въ поще́ніихъ благомо́щное, терпѣли́вное въ напа́стехъ, Анто́ніе, ума́ чистото́ю на земли́, я́ко а́нгелъ, показу́я, Бо́гу вопія́лъ еси́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Моли́твами, преподо́бне, и мольба́ми приближа́яся ты́ непреста́нно къ Бо́гу, восте́клъ еси́ къ высотѣ́ превзя́тѣй, де́монскихъ сѣте́й избѣ́гъ, свободи́вся же тѣ́хъ мучи́тельства, богому́дре, воспѣва́еши: свяще́нницы, по́йте, лю́діе, превозноси́те во вся́ вѣ́ки.

Но́вый Моисе́й бы́въ, въ пусты́ни побѣ́ду на враги́ и бори́тели поста́вилъ еси́, лю́ди предводя́, по́стниковъ собо́ръ въ весе́ліи и но́вомъ жи́тельствѣ, вопію́щихъ Влады́цѣ: свяще́нницы, благослови́те, лю́діе, превозноси́те во вся́ вѣ́ки.

Богоро́диченъ: Богороди́тельнице Всечи́стая, души́ моея́ я́звы и грѣхо́вныя стру́пы очи́сти, исто́чниками омыва́ющи, су́щими изъ боку́ Рождества́ Твоего́ и су́щими изъ того́ очища́ющи струя́ми, къ Тебѣ́ бо взыва́ю, и къ Тебѣ́ прибѣга́ю, и Тя́ призыва́ю, Богоблагода́тную.

Катава́сія: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе во утро́бѣ Твое́й, Чи́стая, и сіе́ возста́ви, ко а́ду попо́лзшееся. Тѣ́мже Тя́, Всечи́стая, я́ко Богоро́дицу, велича́емъ.

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Наста́ свѣтоно́сный тво́й пра́здникъ, всеблаже́нне о́тче Анто́ніе, испо́лнь ра́дости, испо́лнь весе́лія духо́внаго, испо́лнь Свята́го Ду́ха, испо́лнь благоуха́нія и просвѣще́нія, и ны́нѣ, иму́ще тя́ поще́нія пра́вило и законополо́жника, ра́дуемся.

Не преста́й моля́ Изба́вителя, всечестны́й о́тче, дарова́ти благоговѣ́йно па́мять твою́ соверша́ющимъ свяще́нную, прегрѣше́ній оставле́ніе, дарова́ній раздая́ніе, боже́ственное предста́тельство, ду́шъ спасе́ніе, вѣ́чное ра́дованіе.

Равноа́нгеленъ пожи́въ на земли́, равноа́нгельну обрѣ́лъ еси́ свѣ́тлость, тѣ́хъ бо богови́днѣйшимъ сія́ніемъ въ прича́стіи бы́лъ еси́. Съ ни́миже и ра́дуешися всегда́, я́ко боже́ственный проро́къ, я́ко му́ченикъ вѣнцено́сецъ, я́ко мона́шествующихъ верхо́вникъ.

Богоро́диченъ: Зачала́ еси́, Дѣ́во, безъ сѣ́мене вся́ческая созда́вшаго Сло́во Бо́жіе, кромѣ́ хотѣ́ній плотски́хъ, и безъ истлѣ́нія родила́ еси́, безъ болѣ́зней ма́тернихъ. Тѣ́мъ Тя́, Богоро́дицу, и язы́комъ, и се́рдцемъ исповѣ́дующе, велича́емъ.

Катава́сія: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Свѣти́ленъ. Подо́бенъ: Свѣ́те неизмѣ́нный.

Свѣ́тъ единонра́вныхъ показа́лся еси́, свѣ́та ходи́ти стезя́ми благочести́выя научи́въ, Анто́ніе, отце́въ о́тче, и пла́мень мо́лніи па́ки о́гнь испуща́я и попаля́я де́моновъ полки́. [Два́жды.]

Сла́ва, и ны́нѣ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и носи́ла еси́ на боже́ственныхъ объя́тіихъ Пресу́щественное Сло́во, невра́щно и неизмѣ́нно.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Преподо́бне о́тче Анто́ніе,* ты́, и́го Христо́во на ра́мена взе́мъ,* до́блественнѣ наи́тіе вра́жіе попра́лъ еси́* и пусты́ни гра́ды показа́лъ еси́,* сего́ ра́ди тя́ вси́ вѣ́рою почита́емъ,* о всеблаже́нне,* мона́шествующихъ похвало́.* Тѣ́мже Христа́ непреста́нно моли́,* о е́же спасти́ся на́мъ. [Два́жды.]

Вѣ́рою соше́дшеся вси́,* я́ко по́стника Христо́ва* тя́ почита́емъ, Анто́ніе:* ра́дуяся бо, ше́ствовалъ еси́ въ пусты́ни непрохо́днѣй, му́дре,* наста́вникъ сея́ бы́лъ еси́ че́стенъ.* Тѣ́мже тебѣ́ мы́ вѣ́рою взыва́емъ:* о всеблаже́нне,* мона́шествующихъ похвало́,* о на́съ моли́ся ко Го́споду,* е́же спасти́ся на́мъ.

Преподо́бне о́тче Анто́ніе,* и́стинныя ра́ди жи́зни* во гро́бѣ заключи́лся еси́,* ника́коже боя́ся неви́димыхъ враго́въ:* иногда́ бо, толца́нія творя́ще, пріидо́ша къ тебѣ́,* ты́ же моли́твами твои́ми си́хъ безъ вѣ́сти сотворя́лъ еси́,* о терпѣливоду́шне,* пусты́ни первонача́льниче.* Тѣ́мже тя́ вѣ́рно вси́ почита́емъ и ублажа́емъ.

Сла́ва, гла́съ 8:

На не́бо теку́щую возше́дъ колесни́цу, чу́дне, добродѣ́телей, дости́глъ еси́ краегра́діе поще́ніемъ, изъ пусты́ни обходя́ го́рняго Іерусали́ма прекра́сная, и, отъ болѣ́зненныхъ подвиго́въ досто́йно по́чести пріе́мъ, съ небе́сными ра́дуешися чинонача́ліи, всеблаже́нне, вѣ́чныхъ благи́хъ наслѣ́дникъ и Ца́рствія жи́тель бы́въ, но моли́ся, богоно́се Анто́ніе, Спа́су всѣ́хъ умири́ти мíръ и спасти́ ду́ши на́ша.

И ны́нѣ, богоро́диченъ:

Влады́чице, пріими́ моли́твы ра́бъ [Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 335. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 216 – 224 об.

/ Къ оглавленію раздѣла /


Наверхъ / Къ титульной страницѣ

0