Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 16-й де́нь.
Пра́веднаго Макси́ма, Христа́ ра́ди юро́диваго, То́темскаго чудотво́рца.

Тропа́рь, гла́съ 4:

Непоро́чнымъ свяще́нствомъ Бо́гови послужи́въ, посредѣ́ мірска́го мяте́жа юро́дство избра́лъ еси́, взе́мъ бо кре́стъ, послѣ́довалъ еси́ Христу́ невозвра́тнымъ по́мысломъ и, съ любо́вію къ Нему́ добродѣ́тельми приближа́яся, земна́я оста́вивъ, небе́сная воспрія́лъ еси́, блаже́нне Макси́ме, о́тче на́шъ, моли́ Христа́ Бо́га сохрани́тися гра́ду То́тьмѣ невреди́му и спасти́ся душа́мъ на́шимъ.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].

Кано́нъ, гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Іису́су: Пріими́ моле́ніе, Христе́ мо́й, мене́, недосто́йнаго, и отве́рзи ми́ недоуме́нный у́мъ и язы́къ, да возмогу́ Твоего́ уго́дника Макси́ма воспѣ́ти прославле́ніе.

Въ вы́шнихъ предстоя́ престо́лу Вседержи́теля, блаже́нне Макси́ме, испроси́ соверша́ющимъ свяще́нное твое́ торжество́ грѣхо́въ оставле́ніе, да воспое́мъ пѣ́снь еди́ному Влады́цѣ.

Предстоя́ще дне́сь на мѣ́стѣ погребе́нія твоего́, про́симъ, Макси́ме, о́тче на́шъ, получи́ти твои́ми моли́твами отъ злы́хъ избавле́ніе и неду́говъ исцѣле́ніе.

Богоро́диченъ: Влады́чице Пречи́стая, ро́ждшая Спа́са всѣ́хъ Го́спода, утоли́ страсте́й на́шихъ лю́тое смуще́ніе и тишину́ пода́ждь невозмути́мую, да Тебе́, Богоро́дице, непреста́нно велича́емъ.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Отъ ю́ности твоея́, о́тче на́шъ, имѣ́я нача́ло прему́дрости — стра́хъ Бо́жій, да́же и до кончи́ны соблю́лъ еси́, Бо́га Помо́щника себѣ́ призыва́я.

На земли́ предстоя́лъ еси́ престо́лу Бо́жію во стра́сѣ и смире́ніи, Безкро́вныя Же́ртвы принося́ Бо́гу, блаже́нне Макси́ме, и ми́лостива Того́ на́мъ содѣ́ловая.

Съ вѣ́рою и любо́вію тебе́ призыва́емъ въ моли́тву, пра́ведный Макси́ме, умоли́ Всеблага́го Бо́га, да изба́витъ на́съ отъ вся́кія напа́сти и гее́нскаго муче́нія.

Богоро́диченъ: Сни́де во утро́бу Твою́ Влады́ка и Госпо́дь воплоща́емь, Влады́чице Всепѣ́тая, да изба́витъ отъ пре́лести ро́дъ человѣ́ческій и Ца́рствія Своего́ сподо́битъ на́съ.

Инъ конда́къ, гла́съ 4: [1]

Боже́ственный ева́нгельскій гла́съ услы́шавъ, ра́достною душе́ю тому́ послѣ́дуя, прише́лъ еси́ въ ти́хое приста́нище безстра́стія, ча́стыми моли́твами, и посто́мъ, и сле́зными струя́ми ду́шу съ тѣ́ломъ омыва́я, возду́шною тя́гостію пло́ть умерщвля́я, руга́ніемъ людски́мъ помышле́нія смиря́я, о напа́дствующихъ моли́лся еси́, — Го́споди, не поста́ви и́мъ грѣха́, — тѣ́мъ и по сме́рти чудесы́ тя́ Бо́гъ прославля́етъ и всѣ́хъ зва́ти тебѣ́ науча́етъ: ра́дуйся, богому́дре Макси́ме, о́тче на́шъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Въ чи́стомъ се́рдца стремле́ніи о лю́дехъ принося́ моли́твы, свя́те Макси́ме, благопотре́бная испроси́лъ еси́ отъ Бо́га, прославля́я Того́ вели́чіе.

Апо́стольскій гла́съ, Макси́ме, уразумѣ́въ, я́ко отре́біе мíру есмы́, Христа́ ра́ди са́мъ себе́ всѣ́мъ въ попра́ніе вмѣни́лъ еси́.

Притека́юще дне́сь къ тебѣ́, вопіе́мъ ти́: блаже́нне Макси́ме, испроси́ на́мъ грѣхо́въ оставле́ніе.

Богоро́диченъ: Недоумѣ́ніе предлежи́тъ отъ обыше́дшихъ на́мъ зо́лъ, Пречи́стая Влады́чице, но изба́ви отъ си́хъ ско́ро, къ Тебѣ́ бо еди́нѣй прибѣга́емъ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Отъ младе́нчества просвѣти́вся душе́ю, въ мяте́жехъ благооти́шное житіе́ стяжа́ти потща́лся еси́, воспѣва́я еди́наго Человѣколю́бца.

Нагото́ю тѣле́сного, я́коже багряни́цею, мня́ше себе́ одѣ́яна бы́ти, въ зимѣ́, я́коже въ лѣ́тѣ, пребыва́я, вопія́лъ еси́, пра́ведный Макси́ме: благодарю́ Тя́, Человѣколю́бче.

Добро́тою духо́вною сія́я, обнаже́нныхъ на́съ вся́каго дѣ́ла блага́го покры́й предста́тельствомъ твои́мъ, всеблаже́нне Макси́ме.

Богоро́диченъ: Умерщвле́нную мою́ ду́шу страстьми́ скве́рными оживи́, Всенепоро́чная, Живота́, Спа́са, ро́ждшая, и къ стези́ спаси́тельнѣй и блаже́нному житію́ напра́ви.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Якоже Іо́на отъ ки́та, та́ко и ты́, о́тче, отъ мірски́хъ мяте́жей бу́яя воспрія́лъ еси́ и въ по́двизѣ юро́дства къ небе́снымъ пресели́лся еси́.

Безстра́стіемъ украша́яся, Макси́ме, я́ко безпло́тенъ, на земли́ пожи́лъ еси́, поруга́нія и досажде́нія претерпѣва́я, о досажда́ющихъ моли́лся еси́: Го́споди, не поста́ви и́мъ грѣха́ невѣ́дѣнія.

Яко воспрія́лъ еси́ благода́ть, о́тче, моли́тися ко Го́споду о лю́дехъ и гра́дѣ твое́мъ То́тьмѣ, да сохрани́тъ его́ невреди́ма и изба́витъ на́съ отъ искуше́ній и бѣ́дъ, да вси́ ра́достно пра́зднуемъ свято́е твое́ преставле́ніе.

Богоро́диченъ: Пое́мъ Тя́, вѣ́рніи, Богоблагода́тная Влады́чице, Превѣ́чнаго Бо́га пло́тію ро́ждшая, Его́же умоли́, Пречи́стая, гра́ду и лю́демъ Твои́мъ въ ми́рѣ спасти́ся.

Конда́къ, гла́съ 4:

Боже́ственному гла́су послѣ́дуя, возревнова́лъ еси́ наставля́ти па́ству свою́ не му́дростію сло́ва, но бу́йствомъ житія́ безмяте́жнаго, непреста́нными моли́твами и сле́зными струя́ми ду́шу и тѣ́ло омыва́я, возду́шными стихíями пло́ть изнуря́я, тѣ́мже и по сме́рти чудесы́ тя́ Госпо́дь просла́ви, да съ вѣ́рою зове́мъ къ тебѣ́: ра́дуйся, богому́дре о́тче на́шъ Макси́ме.

Икосъ:

Ка́ко возмо́жемъ восхвали́ти равноа́нгельское житіе́ твое́, и исповѣ́дати мно́гое твое́ терпѣ́ніе, и смире́ніе, и те́плыя ко Христу́ моли́твы? Но я́ко благосе́рдному и незло́бивому па́стырю и богому́дрому отцу́ прино́симъ похвалы́ сицева́я: ра́дуйся, пресвѣ́тлая звѣздо́, на сѣ́верѣ добродѣ́тельми возсія́вшая и полу́нощныя стра́ны озари́вшая; ра́дуйся, возненави́дѣвый су́етный мíръ, Христа́ же еди́наго всѣ́мъ се́рдцемъ возлюби́вый и Тому́ неукло́нно послѣ́довавый; ра́дуйся, я́ко бу́йственное и юро́дственное, по апо́столу, жи́тельство избра́вый; ра́дуйся, премѣни́вый тлѣ́нная и скоропреходя́щая наде́ждою бу́дущихъ вѣ́чныхъ бла́гъ; ра́дуйся, пра́ведному Іову уподо́бивыйся терпѣ́ніемъ; ра́дуйся, подви́жниче Христо́въ непобѣди́мый, но побѣжда́яй ко́зни діа́вола свои́мъ смире́ніемъ; ра́дуйся, я́коже дре́вній Ла́зарь убо́гій, ны́нѣ почива́еши на ло́нѣ Авраа́мли; ра́дуйся, и по отше́ствіи твое́мъ отъ мíра су́щимъ въ бѣда́хъ гото́въ засту́пникъ обрѣта́ешися; ра́дуйся, всегда́ въ моли́твахъ усе́рдно тя́ призыва́ющимъ ско́рый помо́щникъ явля́ешися; ра́дуйся, богому́дре Макси́ме, о́тче на́шъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Нескве́рну добро́ту душе́вную соблю́лъ еси́ ума́ чистото́ю, бу́йство мíра избра́въ, да Бо́гу прему́дръ яви́шися, вопія́: благослове́нъ еси́, Го́споди Бо́же, во вѣ́ки.

Пе́щь страсте́й и пла́мень искуше́ній росо́ю моли́твъ твои́хъ погаси́въ, о́тче Макси́ме, а́нгельски на земли́ пожи́лъ еси́, вопія́: благослове́нъ еси́, Го́споди Бо́же, во вѣ́ки.

Украси́ тебе́ Тро́ица, блаже́нне Макси́ме, вѣнце́мъ пра́вды за труды́ и по́двиги твоя́, Ейже въ весе́ліи вопіе́ши: благослове́нъ еси́, Го́споди Бо́же, во вѣ́ки.

Богоро́диченъ: Яко престо́лъ огнезра́ченъ, Царя́ но́сиши тва́ри, Его́же умоли́, Дѣ́во, со блаже́ннымъ Макси́момъ Ца́рствія небе́снаго сподо́бити на́съ, пѣсносло́вящихъ вѣ́рно предста́тельство Твое́.

Пѣ́снь 8.

Ирмо́съ: Ангели и небеса́, на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Безпло́тныхъ жи́тельству на земли́ подража́я и любо́вь къ Бо́гу и бли́жнему нелицемѣ́рну имѣ́я, вы́ну взыва́лъ еси́: благослови́те, по́йте Го́спода и превозноси́те во вся́ вѣ́ки.

Небе́сныя красо́ты возлюби́въ, земна́я пристра́стія отри́нулъ еси́ и, дости́гнувъ го́рняго черто́га, со святы́ми взыва́еши: благослови́те, вся́ дѣла́ Госпо́дня, Го́спода.

Въ ра́йскія селе́нія пресели́вся ны́нѣ, у престо́ла сла́вы со безпло́тными ли́ки предстои́ши и съ ни́ми хвале́бную пѣ́снь вопіе́ши: да благослови́тъ вся́ка тва́рь Го́спода и превозно́ситъ во вѣ́ки.

Богоро́диченъ: По́мощи, е́же отъ Тебе́ тре́бующія, не пре́зри, Дѣ́во, пою́щія и превознося́щія Тя́ во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Благослове́нъ Госпо́дь Бо́гъ, просла́вивый на земли́ па́мять твою́, блаже́нне Макси́ме, и гра́дъ тво́й То́тьму просвѣти́вый житіе́мъ твои́мъ, я́коже лѣ́ствицею, наставля́я къ небе́снымъ добро́тамъ.

По́двигомъ до́брымъ подвиза́лся еси́ и пра́веднымъ сно́мъ почи́лъ еси́, да и по кончи́нѣ свое́й поле́зная всѣ́мъ подае́ши, съ вѣ́рою къ тебѣ́ притека́ющимъ и прося́щимъ ско́раго заступле́нія, блаже́нне Макси́ме.

Припа́дающе, вси́ взыва́емъ къ тебѣ́, блаже́нне о́тче Макси́ме: испроси́ Це́рквамъ соедине́нія, христолюби́вымъ лю́демъ [2] на супоста́ты одолѣ́ніе, мíру всему́ умире́ніе и душа́мъ на́шимъ спасе́ніе.

Богоро́диченъ: Влады́чице и Ма́ти Изба́вителя, пріими́ моле́ніе недосто́йныхъ ра́бъ Твои́хъ, да хода́тайствуеши къ Ро́ждшемуся отъ Тебе́. О, Влады́чице мíра, бу́ди Хода́таица.

Моли́тва.

О, преблаже́нне и досточу́дне уго́дниче Бо́жій, Макси́ме пра́ведный! Воспрія́въ благода́ть Свята́го Ду́ха, пе́рвѣе послужи́лъ еси́ непоро́чнымъ свяще́нствомъ Пресвятѣ́й Тро́ицѣ, предстоя́ престо́лу Бо́жію и принося́ о лю́дехъ Безкро́вныя Же́ртвы. Егда́ же, ко Го́споду кра́йнимъ жела́ніемъ одержи́мь, юро́дивое житіе́ Христа́ ра́ди избра́лъ еси́, мірскíя пре́лести отри́нулъ еси́, нагото́ю тѣле́сною, я́коже багряни́цею, одѣ́яся, со́лнечный зно́й и вели́кій мра́зъ съ любо́вію претерпѣ́, подвиза́яся во гра́дѣ То́тьмѣ, и сего́ ра́ди наслѣ́довалъ еси́ небе́сный черто́гъ въ селе́ніихъ пра́ведныхъ. Но, я́ко имѣ́яй дерзнове́ніе ко Христу́ Бо́гу, проле́й о на́съ, о свя́тче Бо́жій, те́плыя моли́твы, да изба́вимся мы́ вся́кія ну́жды и вся́каго сопроти́внаго зла́. Не преста́й моли́ти Сло́ва, Христа́ Бо́га на́шего, о гра́дѣ и лю́дехъ, сохрани́тися и́мъ неврежде́ннымъ отъ гла́да и я́звы, огня́ и меча́ и отъ наше́ствія супоста́товъ. Низпосли́ съ небесе́, о свяще́нная главо́, преблаже́нне Макси́ме, на на́съ, усе́рдно притека́ющихъ къ тебѣ́ и съ любо́вію лобыза́ющихъ святы́й о́бразъ тво́й, ми́ръ, благода́ть и спасе́ніе душа́мъ на́шимъ, да и мы́ со всѣ́ми святы́ми наслѣ́дницы бу́демъ небе́снаго Ца́рствія, воспѣва́юще ку́пно Святу́ю Тро́ицу, Отца́ и Сы́на и Свята́го Ду́ха, ны́нѣ, и при́сно, и во вѣ́ки вѣко́въ. Ами́нь.

Примѣчанія:
[1] См. «Житія святыхъ, на русскомъ языкѣ изложенныя по руководству Четьихъ-миней св. Димитрія Ростовскаго съ дополненіями, объяснительными примѣчаніями и изображеніями святыхъ. Книга дополнительная, вторая: Мѣсяцы Январь-Апрѣль. М.: Синодальная Типографія, 1916. С. 146».
[2] Въ текстѣ должно быть: «Христолюби́вому Импера́тору...».

Источникъ: Мине́я Янва́рь. Ча́сть втора́я. — М.: Издательскій совѣтъ Русской Православной Церкви, 2002. — С. 31 – 36.

/ Къ оглавленію раздѣла /


Наверхъ / Къ титульной страницѣ

0