Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 16-й де́нь.
Поклоне́ніе честны́хъ вери́гъ свята́го и всехва́льнаго апо́стола Петра́.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Пре́лесть связа́лъ еси́,* по Го́сподѣ вя́жемь,* и въ темни́цѣ, апо́столе, заключа́емь.* Тѣ́мже тя́ любо́вію почита́емъ* и вѣ́рою вери́ги облобыза́емъ твоя́:* отъ ни́хже почерпа́юще здра́віе тѣлесе́* и души́ спасе́ніе,* по до́лгу восхваля́емъ тя́, богови́дче,* безпло́тныхъ собесѣ́дниче. [Два́жды.]

Тобо́ю ра́зумъ пріе́млютъ* неразу́міемъ одержи́міи,* язы́ковъ многосѣ́менніи ро́ди пе́рвѣе,* и́хже о́бразъ показа́, съ высоты́ носи́мь,* сосу́дъ, вну́трь вмѣща́ющь вся́кое живо́тно, апо́столе.* Тѣ́мже вся́къ тя́ во́зрастъ сла́витъ,* покланя́яся, я́же носи́лъ еси́, вери́гамъ,* за Христа́ усе́рднѣйше. [Два́жды.]

Его́же отве́рглся еси́, суди́ма,* воста́вша воспѣ́лъ еси́ изъ ме́ртвыхъ, апо́столе,* и проповѣ́далъ еси́* въ концѣ́хъ мíра,* Бо́га же и Человѣ́ка,* бла́гостію мно́гою земны́мъ пріобщи́вшася.* Тѣ́мже любо́вію тя́ блажи́мъ, Пе́тре,* покланя́ющеся, я́же носи́лъ еси́, вери́гамъ,* за Христа́, пресла́вне. [Два́жды.]

Сла́ва, гла́съ 6. Византíево:

Дне́сь на́мъ основа́ніе Це́ркве, Пе́тръ — ка́мень вѣ́ры предлага́етъ честны́я своя́ вери́ги въ душе́вное благоче́стіе. Пріиди́те вси́, сія́ облобыза́юще, благохва́льными пѣ́сньми того́ увѣнча́имъ: ра́дуйся, те́плый вѣ́ры побо́рниче, и́же те́плымъ ра́зумомъ Христа́ исповѣ́давъ и Сы́на Бо́жія въ дерзнове́ніи мно́зѣмъ; ра́дуйся, вселе́нныя ра́дованіе и небе́снаго Ца́рствія ключарю́. Благода́ть подава́й любо́вію тя́ чту́щимъ и честны́я твоя́ вери́ги облобыза́ющимъ жела́ніемъ, я́ко предстоя́ престо́лу всѣ́хъ Царя́ Христа́, моли́тву творя́ о на́съ, соверша́ющихъ па́мять твою́.

И ны́нѣ, богоро́диченъ. Аще среда́ или́ пято́къ, крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́щи Всенепоро́чная Богоро́дица ви́сящъ, ма́терски рыда́ющи, вопія́ше: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ стихи́ры окто́иха. Сла́ва, гла́съ 6:

Па́ки на́съ те́плый предста́тель совоздвиза́етъ къ духо́внѣй трапе́зѣ, Пе́тръ — ка́мень вѣ́ры, честны́я своя́ вери́ги предложи́въ на́мъ, я́коже снѣ́дь многоцѣ́нну, неду́говъ во врачева́ніе, скорбя́щихъ во утѣше́ніе, въ приста́нище обурева́емыхъ. Пріиди́те вси́, сія́ облобыза́юще, того́ Просла́вльшаго умо́лимъ: моли́твами его́, Христе́, спаси́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жду, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

Ри́ма не оста́вль, къ на́мъ прише́лъ еси́ честны́ми вери́гами, я́же носи́лъ еси́, апо́столовъ первопресто́льне. Имже вѣ́рою покланя́ющеся, мо́лимся: твои́ми къ Бо́гу моли́твами да́руй на́мъ ве́лію ми́лость.


НА УТРЕНИ,
Оба кано́на окто́иха и апо́стола на 6.

Кано́нъ апо́стола, его́же краегране́сіе: Петра́ честву́ю, основа́ніе догма́тъ. Творе́ніе Іо́сифово. Гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Торжеству́етъ, лику́ющи, вся́ Христо́ва Це́рковь ду́хомъ, благохва́лящи тя́ вѣ́рою и твоя́, апо́столе первопресто́льне, облобыза́ющи вери́ги честны́я отъ любве́, я́же носи́лъ еси́ свя́занъ, связу́я мучи́теля.

Изъ глубины́ пре́лести ловя́, Пе́тре, человѣ́ки, я́ко ры́бы, приве́лъ еси́ тебе́ Избра́вшему отъ ры́барей и́стинно въ верхо́внаго всѣ́хъ ученико́въ. Сего́ ра́ди вери́ги, я́же носи́лъ еси́, облобыза́емъ.

Основа́ніемъ вѣ́ры всѣ́хъ ду́ши вѣ́рныхъ назда́лъ еси́ и, хра́мы пре́лести, Пе́тре, низложи́въ, созда́лъ еси́ Це́ркви, тя́ велегла́сно чту́щія всегда́ и вери́ги, я́же носи́лъ еси́.

Богоро́диченъ: Ору́жія вся́ льсти́ваго врага́, Пречи́стая Дѣ́во, соверше́нно оскудѣ́ша, отне́лѣже копіе́мъ уязви́ся въ Твою́ утро́бу нескве́рную всели́вшееся Сло́во. Его́же сладча́йшимъ ны́нѣ уязви́тися жела́ніемъ се́рдцу моему́, молю́ Тя.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Ве́сь Свѣ́ту соединя́яся чистѣ́йшему, Того́ Боже́ственными причаще́ніи, свѣ́тъ яви́лся еси́ вторы́й, Пе́тре, озаря́ющій ду́ши на́ша.

Зако́ны Христо́вы утверди́лъ еси́ и пребеззако́ннующія благозако́нію научи́лъ еси́, я́ко апо́столовъ верхо́вный, я́ко догма́товъ основа́ніе недви́жимо.

Язы́комъ свяще́ннымъ проповѣ́далъ еси́ Бо́га, пострада́вшаго и на Крестѣ́ распе́ншагося. Сего́ ра́ди, Пе́тре, почита́емъ связа́вшія тя́ вери́ги.

Богоро́диченъ: Стоя́ше да́же до Тебе́ сме́рть неодержи́маго стремле́нія: Ты́ бо родила́ еси́ Исто́чникъ безсме́ртія, Богоро́дице Ма́ти Дѣ́во.

Конда́къ, гла́съ 2. Подо́бенъ: Вы́шнихъ ища́.

Ка́мень Христо́съ ка́меня вѣ́ры прославля́етъ свѣ́тло, ученико́въ первопресто́льника: созыва́етъ бо вся́ пра́здновати, Пе́тре, чудеси́ твоея́ честны́я вери́ги и подае́тъ согрѣше́ній проще́ніе.

Сѣда́ленъ, гла́съ 4. Подо́бенъ: Вознесы́йся.

Яко верхо́внаго му́дрыхъ апо́столовъ и я́ко ключаря́ небе́снаго Ца́рствія восхваля́емъ вѣ́рою тя́, апо́столе, и облобыза́емъ чи́стою со́вѣстію, Пе́тре, я́же носи́лъ еси́, я́ко злодѣ́й, вери́ги, злодѣ́йства разруша́я вра́жія, отъ ни́хже изба́витися на́мъ помоли́ся. [Два́жды.]

Сла́ва, и ны́нѣ, богоро́диченъ:

Херуви́мовъ и серафи́мовъ превы́шши, небесе́ же и земли́ простра́ннѣйши и ви́димыя тва́ри и неви́димыя яви́лася еси́ преиму́щи неразсу́днымъ разсужде́ніемъ: Его́же бо простра́нствія небеса́ не вмѣща́ютъ, во Твое́й утро́бѣ вмѣсти́ла еси́, Чи́стая, Его́же моли́ спасти́ся рабо́мъ Твои́мъ.

Крестобогоро́диченъ:

Изъ Безнача́льнаго Отца́ Рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се! — вопія́ше, — ка́ко сла́вимый я́ко Бо́гъ отъ а́нгеловъ, отъ беззако́нныхъ ны́нѣ человѣ́ковъ, Сы́не, хотя́, распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Витíйствуя Влады́ки вели́чія, непокори́выхъ евре́евъ сердца́ къ вѣ́рѣ обрати́лъ еси́ боже́ственнѣй, я́ко основа́ніе вѣ́ры.

Ше́ствія твоя́ позна́на бы́ша на вода́хъ преоби́льною любо́вію Ходи́вшаго верху́ си́хъ, Пе́тре, и стези́ тебѣ́ боже́ственныя Сказа́вшаго.

Врачевство́ иму́ще неду́говъ всеразли́чныхъ, боже́ственныя вери́ги твоя́, блаже́нне, сія́ облобыза́емъ вѣ́рою, тя́ почита́юще.

Богоро́диченъ: Яко въ пала́ту простра́нную, все́лься Ца́рь всѣ́хъ во святу́ю Твою́ утро́бу, яви́ся воплоща́емь, Всецепоро́чная Влады́чице.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Отцу́ Собезнача́льнаго проповѣ́далъ еси́ Сы́на открове́ніемъ, всехва́льне, Боже́ственнымъ и блаже́нства сподо́бился еси́ блаже́ннаго изъ у́стъ.

Егда́ свѣ́тъ узрѣ́лъ еси́, возсія́вшій на Ѳаво́рѣ, со́лнечныя покрыва́ющій лучи́, свѣ́томъ су́щимъ отъ Свѣ́та озари́лся еси́, Пе́тре, и вѣ́рныя просвѣти́лъ еси́.

Ме́ртва тридне́вновавша проповѣ́далъ еси́ Христа́, Его́же ра́ди вери́ги носи́лъ еси́, Пе́тре. Имже поклони́тися сподо́бившеся, благоче́стно тя́ чти́мъ.

Богоро́диченъ: Отягоще́ннаго, Пречи́стая, бре́менемъ мно́гихъ грѣхо́въ, облегчи́ мя́ ны́нѣ носи́ти и́го, укрѣпля́ющи, Христо́во легча́йшее.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Стремгла́вное пресла́вно претерпѣ́лъ еси́ распя́тіе, угото́вилъ еси́ къ небе́снѣй стези́ но́ги твоя́, е́юже на́съ ходи́ти, учениче́ Христо́въ, укрѣпи́.

Всели́лся еси́ въ жи́знь живу́щихъ и, вя́жемь ея́ ра́ди, у́зы веліа́ра сокруши́лъ еси́, связа́вшаго тя́. Сего́ ра́ди чти́мъ твоя́ вери́ги.

Моли́ Влады́ку, всеблаже́нне, тва́ри, низпосла́ти очище́ніе, и ми́ръ, и ми́лость сла́вящимъ тя́, я́ко Того́ учени́къ и́скреннѣйшій.

Богоро́диченъ: Умерщвле́нія ко́жныхъ ри́зъ совлече́ся пра́отецъ: Зижди́тель бо въ того́ облачи́тся отъ Твои́хъ крове́й, воплоти́вся па́че сло́ва, Всенепоро́чная.

Конда́къ, гла́съ 2. Подо́бенъ: Въ моли́твахъ неусыпа́ющую.

Верхо́внаго и пе́рваго апо́столовъ, Истины боже́ственнаго ученика́, Петра́ вели́каго восхва́лимъ и того́ вѣ́рою цѣлу́емъ вери́ги, прегрѣше́ній разрѣше́ніе пріе́млюще.

Икосъ:

Сла́внаго и вели́каго Госпо́дня ученика́ досто́йно кíй язы́къ человѣ́ковъ похвали́ти возмо́жетъ? Его́же бо благосло́внѣ Боже́ственное Сло́во ублажи́, кíй у́мъ восхва́литъ? Оба́че, е́же кто́ по си́лѣ стя́жетъ, до́лжно е́сть Бо́гу приноси́ти, сіе́ же и сотвори́ти покуша́юся. Но, о празднолю́бцы, благоче́стно первопресто́льнаго пѣ́сньми увѣнча́имъ, прегрѣше́ній разрѣше́ніе пріе́млюще.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Три́жды отве́рглся еси́ Христа́, тѣ́мже вопроше́ніемъ трикра́тнымъ исцѣля́етъ твое́ согрѣше́ніе, Пе́тре пресла́вне, и утвержде́ніе показу́етъ мно́гихъ коле́блющихся.

Яко у́зникъ Христо́въ, сладча́йшимъ жела́ніемъ у́замъ разли́чнымъ пріобщи́лся еси́, тѣ́мже и твои́мъ вери́гамъ, разрѣша́ющимъ стра́сти, Пе́тре, вѣ́рою покланя́емся.

Но́щь глубо́кую лю́таго многобо́жія рѣши́ши, вселе́нную проходя́, я́коже велича́йшее со́лнце, Пе́тре, Христо́въ самови́дче, апо́столовъ сла́ва.

Сла́ва Христу́ бы́лъ еси́, Сего́ твои́ми удесы́ просла́вилъ еси́, Пе́тре пресла́вне. Тѣ́мже тя́ сла́вимъ и связа́вшимъ тя́ вери́гамъ покланя́емся.

Богоро́диченъ: Соше́дый на зе́млю, я́ко до́ждь, Дѣ́во, богоразу́міемъ всю́ напои́ зе́млю и показа́ Тя а́нгеловъ всѣ́хъ, Чи́стая, честнѣ́йшую.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Земледѣ́льствуя сердца́, Пе́тре, жесто́кая, благопло́днѣйшая сія́ соверши́лъ еси́ Дѣ́лателю тва́ри, ключи́ тебѣ́ боже́ственныя преда́вшему вяза́ти же и рѣши́ти согрѣше́нія.

Блажи́мъ тя́, Пе́тре, всегда́ и твоя́ цѣлу́емъ вери́ги, я́же, я́ко злодѣ́й, носи́лъ еси́, убива́я зло́бы нача́льника и связу́я у́зами твои́ми, апо́столе.

Неукло́ннымъ твои́мъ ка́менемъ, Пе́тре, вѣ́ры соблюда́я Це́ркве исполне́ніе, отъ среды́ собла́зны отжени́, Пе́тре, и ми́рное испроси́ се́й, блаже́нне, устрое́ніе.

Узами и стра́стію пречи́стою Связа́вшаго а́дъ и сме́рть свѣ́тло проповѣ́далъ еси́, сего́ ра́ди, всеблаже́нне, вери́ги твоя́ цѣлу́юще, освяща́емся.

Тро́иченъ: Якоже чи́ни го́рніи, возопіи́мъ трисвяты́ми гла́сы, Всевино́внаго Отца́ ны́нѣ сла́вяще, и Сы́на, и Ду́ха, еди́но Существо́, еди́ну Си́лу и еди́но Дѣ́йство.

Богоро́диченъ: Мы́сленный Тя́ свѣ́щникъ преднаписа́ проро́къ, боже́ственную свѣщу́, Богороди́тельнице, нося́щій, просвѣ́щшу пе́рвѣе омраче́нныя мно́гими зо́лъ омраче́ньми.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко Плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ви́дѣти сподо́бился еси́ да́льная, вѣ́рно надѣ́емая тебѣ́, Пе́тре, и трудо́въ по́чести отъ Бо́га Человѣколю́бца, ра́дуяся, пріе́млеши, Его́же пло́тію твое́ю стра́сть Боже́ственную изобрази́лъ еси́.

Яко боже́ственный ключа́рь Ца́рствія, сего́ отве́рзи вхо́ды вѣ́рно тя́ чту́щимъ на земли́ и честны́я твоя́ цѣлу́ющимъ вери́ги, Пе́тре, и́миже свя́занъ, носи́лъ еси́.

Съ Сы́номъ сы́й на Ѳаво́рѣ, гла́са Оте́ческаго, Сего́ явля́юща, сподо́бился еси́ услы́шати: Боже́ственнымъ бо Ду́хомъ, Пе́тре, твое́ се́рдце очища́емо пресла́вно озари́ся.

На́мъ, любо́вію тя́ чту́щимъ и вери́ги твоя́ цѣлу́ющимъ, и́миже, Пе́тре, связа́лся еси́, очище́ніе, и долго́въ испроси́ разрѣше́ніе, и Ца́рствія небе́снаго наслажде́ніе.

Богоро́диченъ: Свѣ́та жили́ще была́ еси́, тѣ́мже Свѣ́томъ наста́ви мя́, Отрокови́це, омраче́на всѣ́ми вра́жіими искуше́ньми, я́ко да вѣ́рою Тя́, Всечи́стая, велича́ю, Ма́ти Дѣ́во.

Свѣти́ленъ. Подо́бенъ: Ду́хомъ во святи́лищи.

Вери́гами свя́зана страсте́й мя́, окая́ннаго, разрѣши́, блаже́нне, я́коже иногда́ вери́ги разрѣши́ а́нгелъ Бо́жій и отъ темни́цы изве́дъ пресла́вно заключе́на тя́ въ не́й, апо́столовъ верхо́вниче, блаже́ннѣйше Пе́тре.

Богоро́диченъ: Дѣ́во Всенепоро́чная, Ты́ позна́лася еси́ я́ко Ма́ти, я́ко Бо́га же и Человѣ́ка па́че естества́ ро́ждши, и спасе́ніе бы́сть Рожде́ніе Твое́ пою́щимъ любо́вію: сла́ва подоба́етъ, и че́сть, и поклоне́ніе Тро́ицѣ Непристу́пнѣй и Боже́ственнѣй.

На стихо́внѣ стихи́ры окто́иха. Сла́ва, гла́съ 4. Іоа́нна мона́ха.

Трикра́тнымъ вопроше́ніемъ, е́же, — Пе́тре, лю́биши ли Мя́? — трикра́тное отверже́ніе Христо́съ испра́ви. Тѣ́мже и къ Тайновѣ́дцу Си́монъ: Го́споди, вся́ вѣ́си, вся́ зна́еши, Ты́ вѣ́си, я́ко люблю́ Тя́. Тѣ́мже къ нему́ Спа́съ: паси́ о́вцы Моя́, паси́ избра́нныя Моя́, паси́ а́гнцы Моя́, я́же Свое́ю кро́вію стяжа́хъ во спасе́ніе. Того́ моли́, богоблаже́нне апо́столе, дарова́ти на́мъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не вожделѣ́ннѣйше,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́ки и но́ги Твоя́, Сло́ве,* пригвозди́шася отъ беззако́нныхъ* и кро́вь Твою́ излія́лъ еси́, Влады́ко?


НА ЛИТУРГІИ,

Блаже́нна отъ кано́на апо́стола пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ Дѣя́ній, зача́ло 29. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, и́бо и́стину Твою́ въ це́ркви святы́хъ. [Сти́хъ: Бо́гъ прославля́емь въ совѣ́тѣ святы́хъ.] Ева́нгеліе Іоа́нна, зача́ло 67. Прича́стенъ: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 211 об. – 215 об.

/ Къ оглавленію раздѣла /


Наверхъ / Къ титульной страницѣ

0