Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іанну́арія въ 15-й де́нь.
Преподо́бныхъ оте́цъ на́шихъ Па́вла Ѳиве́йскаго и Іоа́нна Ку́щника.

[ВЕЧЕРЪ,]
На Го́споди воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Нача́ло добродѣ́тельныя яви́лся еси́* небохо́дныя я́вѣ стези́,* треблаже́нне Па́вле, жи́тельства мíрови.* Ибо восхожде́нія духо́вная* положи́лъ еси́ до́брѣ въ души́ твое́й,* и́миже кра́ю прикосну́лся еси́ добродѣ́телей* воздержа́ніемъ и болѣ́зньми мно́гими.

Къ Боже́ственному жела́нію,* блаже́нне, впери́въ у́мъ,* возше́лъ еси́ къ го́рнимъ пусты́ни,* я́коже во мра́къ, прибли́жился еси́,* въ не́мже Бо́жіимъ просвѣти́лся еси́ ра́зумомъ свѣ́тло* и на скрижа́ли души́ твоея́* добродѣ́телей пома́зался еси́ свѣ́тлостію.

Процвѣте́ пусты́ня* цвѣ́ты добродѣ́телей твои́хъ кра́сная,* страсте́й бо погуби́лъ еси́ те́рнія въ не́й,* насади́лъ еси́ болѣ́зни благосла́вныя* боже́ственныхъ твои́хъ дѣя́ній.* Тѣ́мже, я́ко кри́нъ, отъ Бо́га ны́нѣ* благоуха́нія житія́ твоего́* благоуха́еши на́мъ.

Ины стихи́ры, гла́съ 2. Подо́бенъ: Егда́ отъ дре́ва.

Егда́ манове́ніемъ Боже́ственнымъ мірскíя красоты́, ра́дуяся, о́тче, избѣ́глъ еси́, тогда́ предпоче́лъ еси́ па́че простра́ннаго пути́ тѣ́сный, и болѣ́зненный, и зѣло́ жесто́кій. Тѣ́мже попече́ніе ду́шъ прія́лъ еси́, въ Боже́ственный одѣ́явся о́бразъ отбѣже́ніемъ и нагото́ю всѣ́хъ сласте́й, богоблаже́нне.

Стра́нную поразумѣ́лъ еси́ жи́знь, стра́нно начина́ніе, любо́вію Христо́вою уя́звленъ, Его́же неизрече́нную нищету́ возлюби́лъ еси́, и предъ враты́ твои́хъ роди́телей, бездо́менъ, о́тче, претерпѣ́лъ еси́, утѣсня́емый и оскорбля́емый. Тѣ́мже дарова́ній испо́лнился еси́ и неотъе́млемое бога́тство, е́же на небесѣ́хъ, наслѣ́довалъ еси́.

Нося́ въ рука́хъ свяще́нное, о́тче, Ева́нгеліе, сего́ испо́лнитель бы́лъ еси́, имѣ́нія роди́телей отве́ргся, Іоа́нне, и слеза́ми и тѣсното́ю все́ соверши́лъ еси́ твое́ житіе́, преподо́бне, тѣ́мже утѣше́нія Боже́ственнаго, и непреста́ннаго весе́лія ны́нѣ наслажда́ешися, преблаже́нне.

Сла́ва, гла́съ 2:

Отве́ргся мíра и су́щихъ въ мíрѣ, преподо́бне, Ева́нгеліе взе́мъ, ева́нгельски Христу́ послѣ́довалъ еси́ и, въ ку́щѣ живы́й, я́ко въ раи́, та́йно, коне́чнымъ жестокожи́тіемъ пло́ти человѣкоубíйцу змíя удави́лъ еси́. Тѣ́мже на небесѣ́хъ водворя́яся, Іоа́нне блаже́нне, испроси́ на́мъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва Тя́.

Егда́ нескве́рная Агница ви́дѣ Своего́ Агнца, на заколе́ніе я́ко Человѣ́ка во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

На стихо́внѣ окто́иха. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ: де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жду, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


НА УТРЕНИ,
Кано́нъ окто́иха еди́нъ. И святы́хъ два́, на 8.

Кано́нъ свята́го Па́вла, творе́ніе Іоа́нна мона́ха, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Па́вла богоно́снаго, я́ко мона́шествующихъ удобре́ніе, вѣ́рніи, соше́дшеся, пѣ́сньми по до́лгу почита́емъ.

Бы́лъ еси́ пусты́ни пе́рвый жи́тель, Па́вле сла́вне, и небе́снаго Ца́рствія наслѣ́дникъ показа́лся еси́ поще́ніемъ.

Всего́ себе́ воздержа́ніемъ очи́стивъ, всеблаже́нне, жили́ще яви́лся еси́ Бо́жіе и а́нгеловъ единосе́льникъ.

Богоро́диченъ: Пречи́стая Богоро́дице, Яже воплоще́нно Присносу́щное и Пребоже́ственное Сло́во па́че естества́ ро́ждшая, пое́мъ Тя́.

Инъ кано́нъ Іоа́нна, его́же краегране́сіе: Ни́ща страсте́й мя́ покажи́ моли́твами твои́ми, блаже́нне. Іо́сифъ. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Обогати́вся Боже́ственными добродѣ́тельми, бога́тство преоби́дѣлъ еси́ земно́е и небе́сное получи́лъ еси́. Тѣ́мже мя́, обнища́вша, Боже́ственнаго ра́зума обогати́ благода́тію, я́ко да твое́ воспою́, о́тче, жи́тельство равноа́нгельное.

Яре́мъ Госпо́день благíй, блаже́нне, отъ ю́ности ты́ подъе́мъ, по́стническими боре́ніи врага́ смири́лъ еси́, смире́ніемъ Христо́вымъ воору́жся, и́мже возвы́сился еси́ на высоту́, Іоа́нне, къ небеси́.

Яко ше́ствовавъ стезе́ю тѣ́сною, скорбьми́, и слеза́ми, и стена́ньми, и озлобле́ніи, преподо́бне, къ простра́ннѣйшей широтѣ́ дости́глъ еси́, обрѣ́тъ оби́тель досто́йну болѣ́зней, о́тче Іоа́нне досточу́дне.

Богоро́диченъ: Лю́тыми страсте́й навѣ́ты, Отрокови́це, обурева́емь и прило́ги грѣхо́вными преклоне́нъ, ко Твоему́ неусы́пному и непобѣди́мому предста́тельству, Всепѣ́тая, любо́вію прибѣга́ю, уще́дри мя́ и спаси́, Приснодѣ́во.

Пѣ́снь 3.

Ирмо́съ: Утвержде́й Сло́вомъ небеса́ и зе́млю основа́вый на вода́хъ мно́гихъ, утверди́ мя къ пѣ́нію славосло́вія Твоего́, Го́споди.

Къ Бо́гу о́комъ твоея́ души́ взира́я, о́тче, Того́ возлюби́лъ еси́, возненави́дѣвъ земна́я и а́нгельскую соверши́въ жи́знь.

Луча́ми, о́тче, добродѣ́телей, страсте́й отгна́лъ еси́ мглу́ я́вѣ, просвѣще́ніе Ду́ха во твое́мъ се́рдцы пріе́мъ.

Небе́снымъ хлѣ́бомъ пита́яся, я́ко Илія́ дре́вле вра́номъ, мы́сленныя отбѣ́глъ еси́, о́тче, Іезаве́ли, къ покро́ву Христо́ву.

Богоро́диченъ: Ца́рь сла́вы и Творе́цъ, обагри́въ кровьми́, Богороди́тельнице, Свою́ багряни́цу омочи́въ, та́инственно очервлени́.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Кади́ло благово́нно Всеви́дцу, преподо́бне, твоя́ моли́твы прине́слъ еси́, я́же обоня́въ и пріе́мъ, по́стническимъ лико́мъ причте́ тя.

Яви́лся еси́ чу́до велича́йше, сердца́, преподо́бне, благочести́выхъ ужаса́я: ка́ко предъ враты́ претерпѣ́лъ еси́ роди́телей, нище́тствуя и оскорбля́емь.

Зако́нно въ моли́твахъ и поще́ніихъ, преподо́бне, претерпѣва́я, въ безстра́стіе обле́клся еси́, пло́ти мудрова́ніе смири́въ крѣ́постію Боже́ственнаго Ду́ха.

Богоро́диченъ: Яко мѵроуха́ненъ ши́покъ отъ удо́лій, Пречи́стая, Чи́стый Тя́ обрѣ́те и посредѣ́ Тебе́ всели́ся, благово́нія испо́лнивъ человѣ́чество.

Конда́къ Па́вла, гла́съ 3. Подо́бенъ: Дѣ́ва дне́сь.

Яко свѣти́ло незаходя́щее мы́сленнаго Со́лнца, соше́дшеся, дне́сь восхва́лимъ въ пѣ́снехъ: возсія́лъ бо еси́ су́щимъ во тмѣ́ неразу́мія, вся́ возводя́ къ Боже́ственнѣй высотѣ́, ѳиве́евъ украше́ніе, Па́вле преподо́бне, отце́въ и по́стниковъ тве́рдое основа́ніе.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Мíра кра́сная отъ се́рдца возненави́дѣвъ и Еди́наго Бо́га отъ души́ возлюби́въ, пусты́ню, я́ко во обита́тельный гра́дъ, Па́вле, по́стиглъ еси́. Въ еди́нѣхъ то́кмо видѣ́ніихъ упражня́яся, яви́лся еси́, я́ко а́нгелъ, съ пло́тію живы́й. Тѣ́мъ тя́ почита́емъ.

Сла́ва, и́нъ сѣда́ленъ Іоа́нна, гла́съ 3. Подо́бенъ: Красотѣ́ дѣ́вства.

Бога́тство тлѣ́нное и сла́ву мимотеку́щую оста́вивъ, небе́сное бога́тство воспрія́лъ еси́ и сла́ву, о́тче, и́стинно вѣ́чнующую, блаже́нне. Тѣ́мже блажи́мъ свято́е твое́ успе́ніе и, торжеству́юще въ не́мъ, вопіе́мъ тебѣ́: помяни́ на́съ ко Го́споду, я́ко имѣ́я, Іоа́нне, дерзнове́ніе.

И ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спаси́тельное, всѣ́хъ веселя́щее ду́ши и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со а́нгеломъ вопіе́мъ Тебѣ́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Та́йно проро́къ предзря́ отъ Дѣ́вы Тя́, Сло́ве, воплоща́ема, пѣ́сненно вопія́ше: сла́ва си́лѣ Твое́й, Го́споди.

Насажде́нъ въ дому́ Бо́жіи, добродѣ́телей благопло́діе прозя́блъ еси́ и плотска́я увяди́лъ еси́ воста́нія по́стничествомъ твои́мъ.

Огне́мъ любве́ Бо́жія страсте́й те́рніе попали́лъ еси́ и тебе́ сама́го Ду́ха, о́тче, жили́ще показа́лъ еси́.

Жезло́мъ добродѣ́тельныя твоея́ жи́зни, я́коже звѣ́ри, стра́сти отгна́лъ еси́, тѣ́мже и твоя́ сме́рть звѣ́ри на погребе́ніе твое́ собра́.

Богоро́диченъ: Багряни́ца истка́ся та́инственная изъ чи́стыхъ крове́й Твои́хъ всѣ́хъ Бо́гу, въ ню́же одѣ́явся, Богоро́дице, соедини́ на́съ Бо́гу и Отцу́.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Въ ру́бищахъ убо́гихъ сокро́вище сокрове́но яви́лся еси́, богодохнове́нне: Боже́ственную бо оде́жду возлюби́лъ еси́ и, одѣ́явся, въ черто́гъ вы́шній вше́лъ еси́.

Пріе́мъ небе́сное сѣ́мя, богодохнове́нне, се́рдца браздо́ю кла́съ красе́нъ воздѣ́лалъ еси́, умы́ препитава́ющь преподо́бно па́мять твою́ чту́щимъ.

Претерпѣ́лъ еси́ въ тѣ́снѣйшей ку́щи, чу́дне, ни́щь, я́коже другíй Ла́зарь, во́лею бы́въ. Тѣ́мже почи́лъ еси́ Авраа́ма ны́нѣ въ нѣ́дрѣхъ, о́тче преподо́бне.

Богоро́диченъ: Упра́ви моея́ души́ движе́нія, Всенепоро́чная, къ Боже́ственнымъ повелѣ́ніемъ Возсія́вшаго изъ чре́ва Твоего́, бу́ри избавля́ющи мя́ жите́йскихъ собла́зновъ хода́тайствомъ Твои́мъ.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Въ пѣ́ніихъ и поще́ніихъ, моли́твахъ же и бдѣ́ніихъ пожи́въ, преподо́бне, къ Бо́гу всели́лся еси́.

Житіе́ твое́ всечестно́е бы́сть въ Го́сподѣ, Па́вле всеблаже́нне, и погребе́ніе твое́ пресла́вно.

Тече́ніе поще́нія, преподо́бне, сконча́въ, вы́шнимъ си́ламъ собесѣ́дникъ, о́тче, бы́лъ еси́.

Богоро́диченъ: Дѣ́ву по Рождествѣ́ пое́мъ Тя́, Богоро́дице, Ты́ бо Бо́га Сло́ва пло́тію мíру родила́ еси́.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Стра́ненъ земны́хъ сласте́й бы́лъ еси́, стра́ненъ свои́хъ, стра́ненъ роди́телей твои́мъ изволе́ніемъ, и, воздержа́ніемъ себе́ очи́стивъ, усво́ился еси́ Вседержи́телю, о́тче Іоа́нне, обнища́въ ду́хомъ.

Хра́мъ себе́ Святы́я Тро́ицы соверши́въ, претерпѣ́лъ еси́, утѣсня́емь ку́щею, Боже́ственными поуче́ніи ду́шу очища́я и добро́ту Бо́жію неизглаго́ланную, о́тче Іоа́нне, при́сно зря́.

Зако́на Бо́жія испо́лнитель яви́лся еси́, ничто́же предсуди́въ па́че Сего́ любве́, богому́дре о́тче, ни бра́тіи бо, ни роди́телей тя́ любо́вь, ниже́ бога́тство, ниже́ досто́инство, ниже́ пло́ти сла́дость разсла́биша.

Богоро́диченъ: Емману́ила, всѣ́хъ Влады́ку, ражда́еши нетлѣ́нно, пребы́вши Дѣ́ва и по рождествѣ́, Дѣ́во Ма́ти. Его́же непреста́нно моли́ искуше́ній вра́жіихъ изба́вити подъ кро́въ Тво́й прибѣга́ющія.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Ру́ки просте́ръ къ Бо́гу, ду́шу твою́, преподо́бне, Тому́ преложи́лъ еси́, во дни́ и нощи́ благоугожда́я Ему́.

Просла́виша успе́ніе твое́ а́нгеловъ во́инства, проро́ковъ же чи́ни и святы́хъ апо́столовъ, о́тче преподо́бне.

Бу́рю страсте́й пребѣ́гъ, вѣ́триломъ, преподо́бне, кра́йняго по́стничества въ небу́рное приста́нище устреми́лся еси́ Христо́во.

Богоро́диченъ: Еди́на сло́вомъ пло́тію Сло́во Ро́ждшая, изба́ви, мо́лимся, сѣте́й врага́ ду́ши на́ша.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Го́рдаго змíя низложи́лъ еси́ смиреному́дрія ору́жіи, всеблаже́нне, и, возвы́сився ду́хомъ, во оби́тели присножи́зненныя всели́лся еси́.

Дарова́ній испо́лнился еси́ Ду́ха и лука́вствія покори́лъ еси́ ду́хи, я́ко смы́сленъ, и прему́дръ, и Бо́гу весьма́ возложе́нъ.

Безстра́стія сія́я высота́ми, о́тче Іоа́нне, коли́бою утѣсня́емь и напа́стьми облага́емь, терпѣ́лъ еси́, Боже́ственнѣ укрѣпля́емь.

Богоро́диченъ: Равнодѣ́тельна Ро́ждшему и сопресто́льна Сло́ва изъ утро́бы Твоея́, Чи́стая, воплоти́ла еси́, за благоутро́біе неизрече́нное на́ше все́ поне́сшаго.

Конда́къ, гла́съ 2. Подо́бенъ: Вы́шнихъ ища́.

Возлюби́въ, прему́дре, нищету́ неокра́дому, роди́телей твои́хъ бога́тство возненави́дѣлъ еси́ и, Ева́нгеліе въ рука́хъ твои́хъ держа́, послѣ́довалъ еси́ Христу́ Бо́гу, Іоа́нне, моля́ся непреста́нно о всѣ́хъ на́съ.

Икосъ:

Кто́ дово́ленъ досто́йно воспѣ́ти твоя́ труды́, и болѣ́зни, и дѣ́ланія мно́гая, и сла́ву, и вели́чество? Но моли́твами твои́ми къ Бо́гу благопрія́тными Ду́ха благода́ть мнѣ́ ны́нѣ пода́ждь, я́ко да твоя́ па́че естества́ по́двиги изреку́ вѣ́рно и воспою́, е́же па́че сло́ва, терпѣ́ніе твое́ и со́вѣсти пожда́ніе, всеблаже́нне, льсти́ваго врага́ посрами́лъ еси́. Не преста́й моля́ся о всѣ́хъ на́съ.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди Бо́же оте́цъ на́шихъ.

Мудрова́ніе плотско́е покори́въ Ду́ху, преподо́бный вопія́ше: благослове́нъ еси́ во вѣ́ки, Го́споди Бо́же оте́цъ на́шихъ.

Спасе́нъ бы́въ отъ вра́жіихъ сѣ́тей, преподо́бне, въ ра́дости вопія́ше: благослове́нъ еси́ во вѣ́ки, Го́споди Бо́же оте́цъ на́шихъ.

Страсте́й пла́мень ве́сь попра́въ по́стнически, преподо́бный вопія́ше: благослове́нъ еси́ во вѣ́ки, Го́споди Бо́же оте́цъ на́шихъ.

Богоро́диченъ: Не́бо сотвори́вый Дѣ́ву, и изъ Нея́, я́ко со́лнце, возсія́въ, благослове́нъ еси́ во вѣ́ки, Го́споди Бо́же оте́цъ на́шихъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Тѣ́сный предпоче́лъ еси́, не́жели простра́нный, пу́ть, достосла́вне, и, ра́дуяся, претерпѣ́лъ еси́ предъ враты́ роди́телей твои́хъ, укоря́емь и удруча́емь мно́гими болѣ́зньми, богоблаже́нне.

Тебе́ сама́го удобри́лъ еси́ краснѣ́йшими, му́дре, восхожде́ніи, пло́ти умертви́въ мудрова́ніе. Тѣ́мже всели́лся еси́ въ небе́сная, лико́мъ счисля́емь при́сно честны́хъ отце́въ, досточу́дне.

Пути́ ше́ствуя, вводя́щія къ Боже́ственному поко́ю, уклони́лся еси́ про́пастей де́монскихъ, блаже́нне, Боже́ственною покрыва́емь благода́тію, вопія́ше: Сы́й благослове́нъ и препросла́вленъ.

Богоро́диченъ: Пое́мъ Рождество́ Твое́, Благослове́нная, и́мже изба́вихомся дре́вняго осужде́нія, и Тя́ блажи́мъ, Богоблаже́нная, Еди́ну, Юже возлюби́, Сы́й благослове́нъ и препросла́вленъ.

Пѣ́снь 8.

Ирмо́съ: Безнача́льнаго Царя́ сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Поревнова́лъ еси́ Іоа́нну богому́дрому Предте́чи, въ пусты́ни пости́вся, съ ни́мже и жи́знь получи́ти сподо́бился еси́ и́стинно присносу́щную.

Угаси́лъ еси́ страсте́й пе́щи, о́тче на́шъ, воздержа́нія росо́ю, вопія́ всеблагоче́стно: лю́діе, превозноси́те Христа́ во вѣ́ки.

Ра́й и́стинно содѣ́лалъ еси́ пусты́ню, въ не́й преизя́ществовавъ во вся́кой добродѣ́тели, тѣ́мже и рая́ сла́дости сподо́бился еси́.

Богоро́диченъ: Яко иму́щи къ Бо́гу дерзнове́ніе, Всепѣ́тая Богома́ти Марíе, умоли́ Его́ бѣ́дъ изба́вити вѣ́рою Тя́ пою́щія.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Неветша́емый себѣ́, Іоа́нне, добродѣ́тельми упещре́ннѣ истка́ хито́нъ одѣя́ніемъ нище́тнымъ: въ ви́дѣ ни́щаго ты́ одѣ́ялся еси́, предъ враты́ роди́телей претерпѣва́я.

Непоро́ченъ, я́коже другíй Іовъ, предъ враты́ злостра́ждеши, я́ко на гно́ищи, терпя́ уко́ры рабо́въ твои́хъ, му́дре, гла́домъ же и жа́ждею дручи́мь, тѣ́мже наслѣ́довалъ еси́ го́рнее Ца́рствіе.

Послѣ́довалъ еси́ я́вѣ, е́же прія́лъ еси́ рука́ми, Ева́нгелію, и обнища́лъ еси́, блаже́нне, сѣ́туя во все́й жи́зни, и кро́токъ бы́лъ еси́, и незло́бивъ, и Ца́рствія го́рняго наслѣ́дникъ.

Богоро́диченъ: Струю́ приснотеку́щую на́мъ, притека́ющимъ къ Тебѣ́, Чи́стая, то́чиши: ея́же оби́льную благода́ть почерпа́юще, Твое́ пое́мъ Рождество́, Пречи́стая, и превозно́симъ во вѣ́ки.

Пѣ́снь 9.

Ирмо́съ: Неви́димаго зра́комъ Боже́ственнымъ пріе́мшая, Неискусобра́чная Дѣ́во и Ма́ти, пѣ́сньми Рождество́ Твое́ велича́емъ.

Яко сокро́вище тя́ мы́сленное сокрове́нно, преподо́бне, откры́ Бо́гъ Анто́нію, на́мъ же въ сла́ву и ра́дованіе.

Въ стра́хъ Бо́жій себе́ сама́го пригвозди́въ, о́тче преподо́бне, и сме́рти поуче́ніемъ житіе́ соверши́въ, жи́зни сподо́бился еси́.

Яко дерзнове́ніе къ Бо́гу стяжа́въ, моли́ о и́же на земли́ соверша́ющихъ вѣ́рою па́мять твою́ сію́, Па́вле блаже́нне.

Богоро́диченъ: Собезнача́льнаго Отцу́ и Свято́му Ду́ху заче́нши Христа́ и ро́ждши несказа́нно, Дѣ́во, моли́, е́же спасти́ся на́мъ.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Крѣ́пость моя́ и пѣ́ніе Госпо́дь, — взыва́лъ еси́, — предста́теля тмы́ въ Се́мъ побѣжда́ю, мечта́нныхъ ле́стей, я́же отъ него́, ника́коже бою́ся, еди́ну мечта́я добро́ту Боже́ственную и непристу́пную.

Яко земля́ тучна́, преподо́бне, твое́ се́рдце прія́тъ небе́сное сѣ́мя у́мными бразда́ми и стори́чествующій кла́съ плодоно́ситъ, пита́ющи всѣ́хъ, вѣ́рно чту́щихъ тя́, ду́ши, богоблаже́нне.

Освяти́ Госпо́дь изъ ложе́снъ тя́, блаже́нне, и къ Себѣ́ ше́ствія твоя́ напра́ви. Тѣ́мже счи́слился еси́ преподо́бнымъ, благоче́стно пожи́вшимъ, съ ни́миже обоже́нія наслажда́ешися, пресла́вне.

Богоро́диченъ: Свѣ́та жили́ще утро́ба Твоя́ бы́стъ, Имже свѣ́тъ во тмѣ́ сѣдя́щіи ви́дѣша. Тѣ́мже Тя́ гла́сы немо́лчными, Ма́ти Бо́жія, при́сно воспѣва́емъ и любо́вію почита́емъ, я́ко наде́жду ду́шъ на́шихъ.

Свѣти́ленъ. Подо́бенъ: Жены́, услы́шите.

Роди́телей пристра́стіе оста́вивъ и бога́тство теку́щее, тво́й кре́стъ взя́лъ еси́, о́тче, и Христу́, Іоа́нне, преусе́рдно послѣ́довалъ еси́: по́стнически же умертви́лъ еси́ стра́сти, къ безстра́стію восте́клъ еси́ и мо́лишися о на́съ, богоно́се.

Сла́ва, и ны́нѣ, богоро́диченъ:

Совѣ́та вели́каго Ангела Отча родила́ еси́, Христа́, Всепѣ́тая Отрокови́це, Царя́ сла́вы, Его́же Кре́стъ преподо́бніи и по́стницы взе́мше, въ слѣ́дъ Сего́ потеко́ша. Съ ни́миже непреста́нно моли́ о на́съ, Богоро́дице.

На стихо́внѣ окто́иха. Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Па́вле, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́споду поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ма очи́ма ви́дится, о Влады́ко!* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* Су́щаго, изъ Нея́ неизрече́нно возсія́вшаго* Бо́га и Человѣ́ка.


НА ЛИТУРГІИ,

Блаже́нна, отъ кано́на Па́вла, пѣ́снь 3-я и Іоа́нна, пѣ́снь 6-я. Проки́менъ, гла́съ 8: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 205 – 211.

/ Къ оглавленію раздѣла /


Наверхъ / Къ титульной страницѣ

0