Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 14-й де́нь.
[Отда́ніе пра́здника Богоявле́нія Госпо́дня и] преподо́бныхъ оте́цъ на́шихъ, въ Сина́и и Раи́ѳѣ избіе́нныхъ.

[Зри.] Пое́мъ всю́ слу́жбу преподо́бныхъ въ 13-й де́нь, поне́же въ сíй де́нь отдае́тся пра́здникъ Просвѣще́нія, и пое́мъ слу́жбу пра́здника си́це:

Ве́черъ, обы́чная каѳи́сма. На Го́споди воззва́хъ: стихи́ры на 6, пое́мыя на са́мый пра́здникъ. Сла́ва, и ны́нѣ: Приклони́лъ еси́ главу́ Предте́чи... Проки́менъ дне́. Вхо́да нѣ́сть, паремíй не чте́мъ. Та́же: Сподо́би, Го́споди... и ектенія́: Испо́лнимъ вече́рнюю моли́тву... На стихо́внѣ стихи́ры пра́здника, со стихи́ и́хъ. Сла́ва, и ны́нѣ, пра́здника. По Ны́нѣ отпуща́еши... и по трисвято́мъ тропа́рь пра́здника. Та́же ектенія́: Поми́луй на́съ, Бо́же... и отпу́стъ. Свята́го же, и́же на ряду́, помина́емъ на отпу́стѣ.

Воу́тріе полу́нощницу пое́мъ по обы́чаю съ каѳи́смою, и тропари́ глаго́лемъ рядовы́я, и моли́тву глаго́лемъ: Помяни́, Го́споди, въ наде́жди воскресе́нія... И отпу́стъ.

На у́трени, на Бо́гъ Госпо́дь: Тропа́рь пра́здника, три́жды. По каѳи́смахъ сѣда́льны пра́здника. И чте́ніе пра́здника. Кано́нъ пе́рвый со ирмосо́мъ на 8, другíй кано́нъ со ирмосо́мъ на 6. Ирмосы́ пое́мъ обою́ кано́новъ по два́жды. Катава́сія: ирмо́съ пое́мъ пе́рваго кано́на, на схо́дѣ. По 3-й пѣ́сни ипакои́, гла́съ 5: Егда́ явле́ніемъ Твои́мъ... По 6-й пѣ́сни конда́къ пра́здника и и́косъ. На 9-й пѣ́сни Честнѣ́йшую... не пое́мъ, но пое́мъ припѣ́вы пра́здника, я́коже и на са́мый пра́здникъ. Свѣти́ленъ пра́здника, еди́ножды. Сла́ва, и ны́нѣ, то́йже. На хвали́техъ стихи́ры пра́здника, на 4. Сла́ва, гла́съ 6: Вода́ми Іорда́нскими... И ны́нѣ, гла́съ 2: Дне́сь Христо́съ на Іорда́нъ... И славосло́віе вели́кое. По трисвято́мъ: Тропа́рь пра́здника. Ектеніи́, и отпу́стъ, и обы́чное и схожде́ніе въ притво́ръ, и ча́съ 1-й. Тропа́рь и конда́къ пра́здника.

На литургíи: блаже́нна, обои́хъ кано́новъ пѣ́снь 9-я, на 8. Антифо́новъ же пра́здника не глаго́лемъ. По вхо́дѣ: Тропа́рь пра́здника. Сла́ва, и ны́нѣ, конда́къ пра́здника. Та́же, трисвято́е. Проки́менъ, аллилу́ія и прича́стенъ пра́здника. Апо́столъ и Ева́нгеліе дне́.


[ВЕЧЕРЪ,
Обы́чная каѳи́сма. На Го́споди воззва́хъ: стихи́ры на 6, гла́съ 2, самогла́сны Іоа́нна мона́ха:

Просвѣти́теля на́шего,* просвѣща́ющаго вся́каго человѣ́ка,* ви́дѣвъ Предте́ча крести́тися прише́дша,* ра́дуется душе́ю и трепе́щетъ,* руко́ю показу́етъ Eго́ и глаго́летъ лю́демъ:* Се́й, избавля́яй Изра́иля,* свобожда́яй на́съ отъ истлѣ́нія.* О, безгрѣ́шный Христе́, Бо́же на́шъ, сла́ва Тебѣ́! [Два́жды.]

Изба́вителю на́шему,* отъ раба́ креща́ему* и Ду́ха прише́ствіемъ свидѣ́тельствуему,* ужасо́шася, зря́ще, а́нгельская во́инства.* Гла́съ же съ небесе́ принесе́ся отъ Oтца́:* Се́й, Eго́же Предте́ча руко́ю креща́етъ,* Сы́нъ Мо́й éсть возлю́бленный,* о Не́мже благоволи́хъ.* Христе́ Бо́же на́шъ, сла́ва Тебѣ́. [Два́жды.]

Іoрда́нскія струи́* Тебе́, Исто́чника, прія́ша,* и Утѣ́шитель въ ви́дѣ голуби́нѣ схожда́ше.* Приклоня́етъ ве́рхъ Приклони́вый небеса́.* Зове́тъ и вопіе́тъ бре́ніе Зижди́телю:* что́ ми повелѣва́еши, я́же вы́ше мене́?* Азъ тре́бую Твоего́ креще́нія.* О, безгре́шный Христе́, Бо́же на́шъ, сла́ва Тебѣ́!

Спасти́ хотя́ заблу́ждшаго человѣ́ка,* не не сподо́бился eси́ въ ра́бій зракъ облещи́ся:* подоба́ше бо Тебѣ́, Влады́цѣ и Бо́гу,* воспрія́ти на́ша за ны́,* Тебѣ́ бо кре́щшуся пло́тію, Изба́вителю,* оставле́нія сподо́билъ eси́ на́съ.* Тѣ́мже вопіе́мъ Ти́:* Христе́, Бо́же на́шъ, сла́ва Тебѣ́!

Сла́ва, и ны́нѣ, гла́съ то́йже. Византíево:

Приклони́лъ eси́ главу́ Предте́чи, сокруши́лъ eси́ главы́ зміе́въ. Прише́дъ въ струи́, просвѣти́лъ eси́ вся́чeская, е́же сла́вити Тя́, Спа́се, Просвѣти́теля ду́шъ на́шихъ.

Вхо́да нѣ́сть. Проки́менъ дне́.

На стихо́внѣ стихи́ры самогла́сны, гла́съ 2. Анато́ліево:

На Іoрда́нстѣй рѣцѣ́* ви́дѣвъ Тя́ Іоа́ннъ,* къ себѣ́ гряду́ща, глаго́лаше:* Христе́ Бо́же, что́ къ рабу́ прише́лъ eси́,* скве́рны не имы́й, Го́споди?* Во и́мя же чіе́ Тя́ крещу́?* Oтца́? Но Того́ но́сиши въ Себѣ́.* Сы́на? Но Са́мъ eси́ воплоти́выйся.* Ду́ха Свята́го?* И Сего́ вѣ́си дая́ти вѣ́рнымъ усты́.* Явле́йся Бо́же, поми́луй на́съ.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Ви́дѣша Тя́ во́ды, Бо́же,* ви́дѣша Тя́ во́ды и убоя́шася:* къ Твое́й бо сла́вѣ* противозрѣ́ти херуви́ми не мо́гутъ,* ниже́ взира́ти серафи́ми,* но, со стра́хомъ предстоя́ще,* о́віи у́бо но́сятъ,* о́віи же сла́вятъ си́лу Твою́.* Съ ни́миже, Ще́дре,* возвѣща́емъ хвалу́ Твою́, глаго́люще:* явле́йся Бо́же, поми́луй на́съ.

Сти́хъ: Что́ ти́ éсть мо́ре, я́ко побѣ́гло eси́?* И тебѣ́, Іорда́не, я́ко возврати́лся eси́ вспя́ть?

Днесь небесе́ и земли́ Творе́цъ* прихо́дитъ пло́тію на Іорда́нъ,* креще́нія прося́ Безгрѣ́шный,* да очи́ститъ мíръ отъ ле́сти вра́жія,* и креща́ется отъ раба́* Влады́ка вся́ческихъ,* и очище́ніе водо́ю* ро́ду человѣ́ческому да́руетъ.* Тому́ возопіе́мъ:* явле́йся Бо́же на́шъ, сла́ва Тебѣ́.

Сла́ва, и ны́нѣ, гла́съ 6. Ѳеофа́ново:

Еже отъ Дѣ́вы Со́лнце, ви́дя и́же отъ непло́дове свѣти́льникъ свѣ́тлый, во Іoрда́нѣ прося́ща креще́нія, у́жасомъ и ра́достію вопія́ше къ Нему́: Ты́ мя́ освяти́, Влады́ко, Боже́ственнымъ явле́ніемъ Твои́мъ.

Тропа́рь, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́. [Еди́ножды.]

Та́же ектенія́: Поми́луй на́съ, Бо́же... и отпу́стъ.



НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-й стихоло́гіи сѣда́ленъ, гла́съ 3. Подо́бенъ: Красотѣ́.

Явльшуся Тебѣ́ во Іорда́нѣ, Спа́се, и кре́щшуся Тебѣ́ отъ Предте́чи, Христе́, возлю́бленный Сы́нъ свидѣ́тельствованъ бы́лъ еси́, тѣ́мже и Собезнача́ленъ Отцу́ яви́лся еси́, Ду́хъ же Святы́й на Тя́ схожда́ше, Имже и просвѣти́вшеся, вопіе́мъ: сла́ву Бо́гу, Су́щему въ Тро́ицѣ.

Сла́ва, и ны́нѣ, гла́съ 4. Подо́бенъ: Ско́ро предвари́.

Струи́ освяти́лъ еси́ Іорда́нскія, держа́ву сокруши́лъ еси́ грѣхо́вную, Христе́ Бо́же на́шъ, приклони́лъ еси́ Себѣ́ дла́ни Предте́чевѣ и спа́слъ еси́ отъ ле́сти человѣ́ческій ро́дъ. Тѣ́мже Тя́ мо́лимъ: спаси́ ду́ши на́ша.

По 2-й стихо́логіи сѣда́ленъ, гла́съ 5. Подо́бенъ: Собезнача́льное Сло́во.

Іорда́нскими струя́ми обло́жся, Иже свѣ́томъ пресла́вно одѣва́яйся, въ ни́хже Ада́мово естество́ обнови́лъ еси́, сокру́шшееся злы́мъ преслуша́ніемъ, Сло́ве Бо́жій. Тѣ́мже Тя́ восхваля́емъ и свято́е Твое́ вси́ славосло́вимъ явле́ніе.

Сла́ва, и ны́нѣ, гла́съ 4. Подо́бенъ: Удиви́ся Іо́сифъ.

Іорда́не рѣко́, что́ удиви́лся еси́, зря́ Неви́димаго на́га? — Ви́дѣхъ и вострепета́хъ, — рече́, — и ка́ко бо Сего́ не хотѣ́хъ устраши́тися и зайти́? Ангели Его́ устраши́шася, зря́ще, ужасе́ся не́бо, и земля́ вострепета́, и смяте́ся мо́ре, и вся́ ви́димая и неви́димая. Христо́съ яви́ся на Іорда́нѣ освяти́ти во́ды.

Кано́на два́: Кано́нъ пе́рвый со ирмосо́мъ на 8, другíй кано́нъ со ирмосо́мъ на 6. Ирмосы́ пое́мъ обою́ кано́новъ по два́жды.

Кано́нъ пе́рвый, творе́ніе ки́ръ Космы́ мона́ха, его́же краегране́сіе: Креще́ніе очище́ніе земноро́дныхъ грѣхо́въ. Гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.

Инъ кано́нъ, творе́ніе Іоа́нна Дамаскина́, гла́съ 2.
Пѣ́снь 1.

Ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Утру я́вльшуся человѣ́комъ свѣтоно́сну ны́нѣ изъ пусты́ни, къ вода́мъ Іорда́нскимъ, Царю́ преклони́лъ еси́ со́лнца Твою́ вы́ю, ли́ка мра́чна родонача́льника исхи́тити, скве́рны же вся́кія очи́стити тва́рь.

Безнача́льне, струя́мъ спогре́бшася Тебѣ́, Сло́ве, но́ваго прево́диши, истлѣ́вшаго ле́стію, Сего́ несказа́нно отъ Отца́ пріе́мъ гла́съ держа́венъ: Се́й возлю́бленный, ра́венъ же Мнѣ́ Отрокъ естество́мъ.

Катава́сія: ирмо́съ пе́рваго кано́на, на схо́дѣ.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ:

Ирмо́съ: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Умерщвле́ніе пе́рвѣе насади́вый тва́ри, звѣ́ря злодѣ́йственнаго вообра́жься въ естество́, омрача́ется плотски́мъ прише́ствіемъ: у́тру я́вльшуся, прирази́вся Влады́цѣ сокруши́ти свою́ вражде́бную главу́.

Влече́тъ къ себѣ́ Богозда́нное естество́, утро́бы мучи́теля, погребе́нное предѣ́лы; ражда́ется па́ки земноро́дныхъ Обновле́ніе, дѣ́ло держа́вно соверша́я Влады́ка: пріи́де бо, то́е очи́стити хотя́.

Ипакои́, гла́съ 5:

Егда́ явле́ніемъ Твои́мъ просвѣти́лъ еси́ вся́ческая, тогда́ сла́ное невѣ́рія мо́ре побѣже́, и Іорда́нъ, до́лѣ текíй, возврати́ся, къ небеси́ возвыша́я на́съ. Но высото́ю Боже́ственныхъ за́повѣдей Твои́хъ соблюди́, Христе́ Бо́же, моли́твами Богоро́дицы и поми́луй насъ.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ:

Ирмо́съ: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

По́сланъ отъ Отца́, всесвѣ́тлое Сло́во, но́щи отгна́ти зломра́чное стремле́ніе, и искорени́ти гряде́ши человѣ́ковъ грѣхи́, сы́ны же привлещи́, Твои́мъ Креще́ніемъ, Бла́же, свѣ́тлый отъ стру́й Іорда́нскихъ.

Са́мое прови́дѣвъ нарече́нное Сло́во, я́сно проповѣ́дникъ вопіе́тъ тва́ри: Се́й пре́жде мене́, вторы́й пло́тію сообра́зенъ, просія́ Боже́ственною си́лою вражде́бный на́шъ отъя́ти грѣ́хъ.

Па́жить у Себе́ животво́рну нося́, уловля́етъ зміе́въ, гнѣ́здамъ натека́я мно́гими сѣтьми́, низлага́я, Богъ Сло́во, запина́етъ же уязви́вшаго всемíрный ро́дъ, сего́ потре́бль, избавля́етъ тварь.

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ:

Ирмо́съ: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Ви́дѣвъ Зижди́тель во мра́цѣ прегрѣше́ній плени́цами неизбѣ́жными его́же вообрази́ пе́рсты, поставля́етъ на обою́ ра́му, воздвигъ горѣ́, ны́нѣ во многотеку́щихъ вода́хъ омыва́я студа́ дре́вняго Ада́мова зла́го нра́ва.

Со благоче́стіемъ притеце́мъ прилѣ́жно ко исто́чникомъ пречи́стымъ тече́нія спаси́тельнаго, Сло́во усмотря́юще отъ Нетлѣ́нныя, почерпа́ла принося́ще жа́жди Боже́ственныя, мíра сла́достнѣ исцѣля́я неду́гъ.

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ:

Ирмо́съ: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Отъ глуби́ннаго льва́, тревече́рній стра́ннѣ проро́къ во вну́треннихъ валя́яся, а́біе произы́де, пакибытія́ спасе́ніе отъ змíя человѣкоубíйцы всѣ́мъ предъявля́я въ послѣ́дняя лѣ́та.

Отве́рсту не́бу всесвѣ́тлыхъ писа́ній, учени́къ зри́тъ отъ Отца́ посыла́емый, пребыва́ющъ же Ду́хъ на Пречи́стѣмъ Сло́вѣ, наше́дъ я́ко го́лубь неизрече́ннымъ о́бразомъ, лю́демъ же явля́ется, прише́дшимъ ко Влады́цѣ.

Конда́къ, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ:

Ирмо́съ: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Тебе́ живопису́ющій ассирíйскій пла́мень ужа́сенъ поставля́еши, въ ро́су преведе́нъ; тѣ́мже вода́ ны́нѣ, я́коже пла́мень, одѣва́яй, вре́дную зло́бу, Христе́, прикрове́нную опаля́етъ, отъ поползнове́нныя стези́ призыва́ющи.

Раздѣ́льшуся Іорда́ну дре́вле, по су́ху прехо́дятъ лю́діе Изра́ильстіи, Тебе́, Держа́внѣйшаго, содержа́ща тва́рь некосни́тельнѣ, ны́нѣ въ вода́хъ напису́ющіи, къ нетлѣ́ннѣй и поле́знѣй стези́.

Вѣ́мы, пе́рвѣе всепа́губный пото́пъ ми́лостивно Тя́ всѣ́хъ во тлю́ привести́, о, тревели́кія сотворя́я и стра́нная́ Ны́нѣ же пото́пльша, Христе́, грѣ́хъ за благосе́рдіе и человѣ́ческое спасе́ніе.

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ:

Ирмо́съ: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

Тріе́ богови́дніи, во огни́ ороша́еми, озаря́ющеся треми́ всесвѣ́тлѣ святы́нями, я́вѣ показова́ху Превы́шнее Естество́ смѣше́ніемъ человѣ́ческимъ, огнепаля́щее росо́ю ми́лостивно вся́ку па́губную ле́сть.

Да убѣли́тся вся́кое земно́е естество́, отъ паде́нія ны́нѣ на не́бо возводи́мо, Имже бо вся соблюда́ются, Сло́вомъ, теку́щими струя́ми омы́вшеся, прегрѣше́ній пре́жнихъ убѣже́, пресвѣ́тло измове́но.

На 9-й пѣ́сни па́ки вжига́ютъ свѣщи́ бра́тія. Честнѣ́йшую... не пое́мъ, но пое́мъ припѣ́вы пра́здника:

Велича́й, душе́ моя́, Честнѣ́йшую го́рнихъ во́инствъ, Дѣ́ву Пречи́стую Богоро́дицу.

И ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Посе́мъ вторы́й ли́къ пое́тъ то́йже припѣ́въ и ирмо́съ. И про́чихъ ше́сть припѣ́вовъ припѣва́ютъ на кíйждо тропа́рь по еди́ножды:

Велича́й, душе́ моя́, отъ Предте́чи креще́нія Прося́ща.

Велича́й, душе́ моя́, во Іорда́нѣ Прише́дшаго крести́тися.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́.

Велича́й, душе́ моя́, отъ Оте́ческаго гла́са Свидѣ́тельствованна.

Велича́й, душе́ моя́, Еди́наго отъ Тро́ицы, прекло́ньшаго вы́ю и креще́ніе пріе́мша.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Проро́че, пріиди́ ко Мнѣ, простри́ ру́ку и крести́ Мя ско́ро.

Проро́че, оста́ви ны́нѣ и крести́ Мя, хотя́ща: испо́лнити бо пріидо́хъ вся́ку пра́вду.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Посе́мъ пе́рвый ли́къ пое́тъ втора́го кано́на припѣ́въ:

Дне́сь Влады́ка преклоня́етъ вы́ю подъ ру́ку Предте́чеву.

И ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

И вторы́й ли́къ та́кожде пое́тъ припѣ́въ и ирмо́съ. И про́чія пя́ть припѣ́вы, еди́нъ два́жды:

Дне́сь Іоа́ннъ креща́етъ Влады́ку, во струя́хъ Іорда́нскихъ.

Дне́сь Влады́ка вода́ми погреба́етъ человѣ́ческій грѣ́хъ.

Увѣ́дѣхомъ Моисе́ю купино́ю явле́нная, гряди́, стра́нными уста́вы содѣ́ланная: я́ко бо спасе́ся, Огнь нося́щи, Дѣ́ва, Свѣтоно́сна ро́ждши Благодѣ́теля, во Іорда́нскихъ же струя́хъ явле́нна.

Дне́сь Влады́ка свы́ше свидѣ́тельствуется, Сы́нъ возлю́бленный.

Дне́сь Влады́ка пріи́де освяти́ти естество́ водно́е.

Дне́сь Влады́ка Креще́ніе пріе́млетъ руко́ю Предте́чевою.

Помазу́еши, соверша́я человѣ́ческое существо́, Царю́ Безнача́льне, Ду́ха обще́ніемъ, струя́ми чи́стыми отмы́въ и тмы́ крѣ́пость же посра́мль возвы́шенную, ны́нѣ въ безпреста́ннѣмъ возда́ти житіи́.

Та́же о́ба ли́ка, соше́дшеся вку́пѣ, пою́тъ пе́рвый припѣ́въ пра́здника. И ирмо́съ: Недоумѣ́етъ вся́къ язы́къ...

Свѣти́ленъ. Подо́бенъ: Посѣти́лъ ны́.

Яви́ся Спа́съ, благода́ть и и́стина, во струя́хъ Іорда́нскихъ и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

Сла́ва, и ны́нѣ, то́йже.

На хвали́техъ стихи́ры на 4, гла́съ 1. Ге́рмана патріа́рха:

Свѣ́тъ отъ Свѣ́та, возсія́ мíрови Христо́съ, Спа́съ на́шъ, явле́йся Бо́гъ. Сему́, лю́діе, поклони́мся.

Ка́ко Тя́, Христе́, раби́, Влады́ку досто́йно почти́мъ? Яко въ вода́хъ всѣ́хъ на́съ обнови́лъ eси́.

Ты, во Іорда́нѣ кре́щся, Спа́се на́шъ, во́ды освяти́лъ eси́, дла́нію раба́ рукополага́емый и стра́сти мíра исцѣля́яй. Ве́ліе та́инство явле́нія Твоего́, Человѣколю́бче Го́споди, сла́ва Тебѣ́.

Истинный Свѣ́тъ яви́ся и всѣ́мъ просвѣще́ніе да́руетъ, креща́ется Христо́съ съ на́ми, Иже вся́кія вы́шши чистоты́, влага́етъ свяще́ніе водѣ́, и душа́мъ сіе́ очище́ніе быва́етъ, земно́е явля́емое и вы́ше небе́съ разумѣва́емое. Ба́нею — спасе́ніе, водо́ю же — Ду́хъ, погруже́нія ра́ди, и́же къ Бо́гу, на́шъ восхо́дъ быва́етъ. Чуде́сна дѣла́ Твоя́, Го́споди, сла́ва Тебѣ́.

Сла́ва, гла́съ 6. Анато́лія:

Вода́ми Іорда́нскими одѣ́ялся eси́, Спа́се, одѣя́йся Свѣ́томъ, я́ко ри́зою, и приклони́лъ eси́ главу́ Предте́чи, Иже не́бо измѣ́ривый пя́дію. Да обрати́ши мíръ отъ ле́сти и спасе́ши, я́ко Человѣколю́бецъ.

И ны́нѣ, гла́съ 2, того́же:

Дне́сь Христо́съ на Іoрда́нъ пріи́де крести́тися, дне́сь Іоа́ннъ каса́ется верху́ Влады́чню. Си́лы небе́сныя ужасо́шася, пресла́вное ви́дяще та́инство. Мо́ре ви́дѣ и побѣже́, Іoрда́нъ, ви́дѣвъ, возврати́ся. Мы́ же, просвѣ́щшеся, вопіе́мъ: сла́ва яви́вшемуся Бо́гу, и на земли́ ви́дѣнному, и просвѣти́вшему мíръ.

Славосло́віе вели́кое. По трисвято́мъ тропа́рь пра́здника, ектеніи́, и отпу́стъ.



НА ЛИТУРГІИ,

Блаже́нна, обои́хъ кано́новъ пѣ́снь 9-я, на 8. Антифо́новъ же пра́здника не глаго́лемъ. По вхо́дѣ: Тропа́рь пра́здника. Сла́ва, и ны́нѣ, конда́къ пра́здника. Та́же, трисвято́е. Проки́менъ, гла́съ 4: Благослове́нъ гряды́й во и́мя Госпо́дне,* Бо́гъ Госпо́дь и яви́ся на́мъ. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. Апо́столъ дне́. Аллилу́ія, гла́съ 4: Принеси́те Го́сподеви сы́нове Бо́жіи, принеси́те Го́сподеви сы́ны о́вни. Сти́хъ: Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. Ева́нгеліе дне́. Прича́стенъ: Яви́ся благода́ть Бо́жія спаси́тельная всѣ́мъ человѣ́комъ.]


[Мрк.] Подоба́етъ вѣ́дати, а́ще случи́тся отда́ніе Богоявле́нія въ недѣ́лю пре́жде мытаря́ и фарисе́я.

Въ суббо́ту, на ма́лѣй вече́рни, на Го́споди воззва́хъ: стихи́ры воскре́сны. Сла́ва, и ны́нѣ, пра́здника. На стихо́внѣ стихи́ра воскре́сна еди́на и пра́здника стихо́вна со стихи́ свои́ми, вели́кія вече́рни. Сла́ва, и ны́нѣ, пра́здника: Дне́сь Христо́съ... [пи́санъ на хвали́техъ].

На вели́цѣй вече́рни, по обы́чной стихоло́гіи, на Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ, и пра́здника 6, пое́мыя на са́мый пра́здникъ. Сла́ва, пра́здника. И ны́нѣ, богоро́диченъ 1-й гла́са. На литíи стихи́ры, и Сла́ва, и ны́нѣ, пра́здника. На стихо́внѣ стихи́ры воскре́сны, Сла́ва, и ны́нѣ, пра́здника. На благослове́ніи хлѣ́бовъ: Тропа́рь Богоро́дице Дѣ́во.., два́жды. И пра́здника, еди́ножды. И чте́ніе въ посла́ніихъ апо́стольскихъ. Аще же нѣ́сть бдѣ́нія, по Ны́нѣ отпуща́еши: Тропа́рь воскре́сенъ. Сла́ва, и ны́нѣ, пра́здника.

На повече́ріи, по Досто́йно... [и] по Отче на́шъ... конда́къ пра́здника.

На у́трени, на Бо́гъ Госпо́дь: Тропа́рь воскре́сенъ, два́жды. Сла́ва, и ны́не, пра́здника. По каѳи́смахъ сѣда́льны воскре́сны съ богоро́дичны и́хъ. И чте́ніе. Та́же непоро́чны, съ тропари́: Ангельскій собо́ръ... Ипакои́ гла́са. Степе́нна. Проки́менъ. Вся́кое дыха́ніе... Ева́нгеліе воскре́сно, и про́чее воскре́сно и до кано́на. Кано́нъ воскре́сенъ со ирмосо́мъ на 4, и Богоро́дицѣ на 2, и пра́здника о́ба кано́на на 8. Катава́сія пра́здника. По 3-й пѣ́сни конда́къ пра́здника и и́косъ, ипакои́ пра́здника и чте́ніе пра́здника. По 6-й пѣ́сни конда́къ воскре́сенъ и и́косъ, и чте́мъ про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, и ны́нѣ, пра́здника. На хвали́техъ стихи́ры воскре́сны 4 и пра́здника 4, со сла́внымъ, съ припѣ́вы и́хъ. Сла́ва, стихи́ра ева́нгельская. И ны́нѣ, Преблагослове́нна еси́, Богоро́дице Дѣ́во... Славосло́віе вели́кое. По трисвято́мъ тропа́рь воскре́сенъ то́чію. И ектеніи́, и отпу́стъ, и оглаше́ніе, и исхожде́ніе обы́чное въ притво́ръ, и ча́съ 1-й, и коне́чный отпу́стъ.

На часѣ́хъ, Тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По Отче на́шъ: конда́къ пра́здника и воскре́сенъ глаго́лемъ, премѣня́юще.

На литургíи: блаже́нна гла́са на 6 и пра́здника, пѣ́снь 9-я обои́хъ кано́новъ на 4. По вхо́дѣ: Тропа́рь воскре́сенъ и пра́здника. Сла́ва, конда́къ воскре́сенъ. И ны́нѣ, пра́здника. Проки́менъ, Апо́столъ и Ева́нгеліе, недѣ́ли ря́дъ. Аллилу́ія, и прича́стенъ пра́здника, и дне́.


[Мрк.] Зри́мъ же и сего́ указа́нія.

Аще приспѣ́етъ въ 14-е Іаннуа́рія недѣ́ля о мытари́ и фарисе́и, на отда́ніе Богоявле́нія пое́мъ воскре́сно, и тріо́ди, и пра́здника.

Въ суббо́ту ве́чера, на ма́лѣй вече́рни стихи́ры воскре́сны, на 4. Сла́ва, и ны́нѣ, богоро́диченъ 1-й гла́са, ма́лыя вече́рни. На стихо́внѣ стихи́ра воскре́сна еди́на и пра́здника стихо́вна вели́кія вече́рни со стихи́ ея́. Сла́ва, и ны́нѣ, пра́здника: Дне́сь Христо́съ... [пи́санъ на хвали́техъ]. По трисвято́мъ: Тропа́рь воскре́сенъ. Сла́ва, и ны́нѣ, пра́здника. Ектенія́ ма́лая и отпу́стъ.

На вели́цѣй вече́рни, Блаже́нъ му́жъ.., каѳи́сму всю́. На Го́споди воззва́хъ: стихи́ры воскре́сны гла́са 3, и тріо́ди 3, со сла́внымъ, и пра́здника 4, пое́мыя на са́мый пра́здникъ. Сла́ва, пра́здника. И ны́нѣ, богоро́диченъ 1-й гла́са. Вхо́дъ, проки́менъ дне́. На литíи стихи́ры пра́здника и тріо́ди самогла́сны: Фарисе́я велехва́льный гла́съ... Сла́ва, мытаря́ и фарисе́я. И ны́нѣ, пра́здника. На стихо́внѣ стихи́ры воскре́сны. Сла́ва, тріо́ди. И ны́нѣ, пра́здника. На благослове́ніи хлѣ́бовъ: Тропа́рь Богоро́дице Дѣ́во.., два́жды. И пра́здника, еди́ножды. И чте́ніе. Аще же нѣ́сть бдѣ́нія, по Ны́нѣ отпуща́еши: Тропа́рь воскре́сенъ. Сла́ва, и ны́нѣ, пра́здника.

На повече́ріи, по Досто́йно... [и] по Отче на́шъ... конда́къ пра́здника. Сла́ва, и ны́нѣ, тріо́ди.

На у́трени, на Бо́гъ Госпо́дь: Тропа́рь воскре́сенъ два́жды. Сла́ва, и ны́нѣ, пра́здника. По каѳи́смахъ сѣда́льны воскре́сны съ богоро́дичны и́хъ. И чте́ніе во Ева́нгеліи толково́мъ. И непоро́чны, ипакои́ гла́са, и чте́ніе. Степе́нна, и проки́менъ гла́са, и Ева́нгеліе воскре́сно. Воскресе́ніе Христо́во.., псало́мъ 50-й. Сла́ва, Покая́нія... И ны́нѣ, На спасе́нія стези́... Та́же: Поми́луй мя, Бо́же... и Мно́жества содѣ́янныхъ мно́ю лю́тыхъ... Кано́нъ воскре́сенъ со ирмосо́мъ на 4, и тріо́ди на 4, и пра́здника о́ба кано́на на 6. Катава́сія пра́здника. По 3-й пѣ́сни конда́къ, и и́косъ, и сѣда́ленъ тріо́ди. Сла́ва, и ны́нѣ, пра́здника. По 6-й пѣ́сни конда́къ и и́косъ пра́здника. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, тріо́ди. И ны́нѣ, пра́здника. На хвали́техъ стихи́ры воскре́сны 4 и пра́здника со сла́внымъ 4, съ припѣ́вы и́хъ. Сла́ва, самогла́сенъ тріо́ди. И ны́нѣ, Преблагослове́нна еси́, Богоро́дице Дѣ́во... Славосло́віе вели́кое. По трисвято́мъ: Тропа́рь воскре́сенъ то́чію. Ектеніи́, и отпу́стъ, и исхожде́ніе въ притво́ръ. Сла́ва, и ны́нѣ, стихи́ра ева́нгельская, и ча́съ 1-й, и соверше́нный отпу́стъ.

На 1-мъ часѣ́, Тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По трисвято́мъ, конда́къ тріо́ди. Та́кожде и на 3-мъ, и на 6-мъ, и на 9-мъ часѣ́хъ глаго́лемъ тропари́. Кондаки́ же пра́здника и тріо́ди, премѣня́юще, глаго́лемъ.

На литургіи: блаже́нна гла́са на 4, и тріо́ди пѣ́снь 3-я, на 4, и пра́здника пѣ́снь 9-я на 4. По вхо́дѣ: Тропа́рь воскре́сенъ и пра́здника. Сла́ва, конда́къ тріо́ди. И ны́нѣ, пра́здника. Проки́менъ гла́са и пра́здника. Апо́столъ и Ева́нгеліе дне́. Прича́стенъ: Хвали́те Го́спода съ небе́съ... Другíй, пра́здника.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 203 – 204 об.

/ Къ оглавленію раздѣла /


Наверхъ / Къ титульной страницѣ

0