Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 13-й де́нь.
Слу́жба преподо́бному отцу́ на́шему Ирина́рху Затво́рнику, Росто́вскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1:

Отче Ирина́рше, ты́, о спасе́ніи души́ подвиза́яся, не да́лъ еси́ сна́ очесе́мъ твои́мъ, ни вѣ́ждома дрема́нія, но, моля́ся, исхо́дъ тво́й отъ земны́хъ вы́ну помышля́лъ еси́ и вся́кое плотоуго́діе отве́рглъ еси́, тѣ́ло свое́ желѣ́зными у́жами томя́ и ра́нами ураня́я плещи́ твоя́, да Ца́рствія небе́снаго досто́инъ яви́шися, е́же улучи́въ благода́тію Христо́вою, помина́й на́съ, любо́вію чту́щихъ тя́.

Оби́тели твоея́ кра́сное прозябе́ніе, о́тче Ирина́рше, плоды́ чуде́съ прино́сиши въ не́й непреста́нно и, я́ко ке́дръ высокове́рхій, къ небеси́ пу́ть на́мъ указу́еши, преподо́бне, да, о́бразомъ житія́ твоего́ наставля́еми, избѣ́гнемъ плѣ́на грѣхо́внаго и обря́щемъ простра́нство Ца́рствія небе́снаго.

Сла́ва, гла́съ 6:

Преподо́бне о́тче Ирина́рше, ты́ отъ млады́хъ лѣ́тъ еди́наго Христа́ возлюби́лъ еси́ и, кре́стъ сво́й взе́мъ, Тому́ усе́рдно послѣ́довалъ еси́, злострада́ніи мно́гими му́ченикомъ подо́бяся и невече́рнюю сла́ву Ца́рствія Его́ небе́снаго во умѣ́ преднося́, тѣ́мже тя́, я́ко богоно́сца, ублажа́емъ.

И ны́нѣ, пра́здника.

На стихо́внѣ [стихи́ры], гла́съ 2:

До́мъ о́тчій оста́вивъ, блаже́нне Ирина́рше, во оби́тели страстоте́рпцевъ Христо́выхъ до́брый и́нокъ показа́лся еси́ и, до́брѣ о спасе́ніи душе́внѣмъ подвиза́вся, со всѣ́ми му́ченики во Ца́рствіи небе́снѣмъ прославля́ешися.

Сти́хъ: Честна́ предъ Го́сподемъ [сме́рть преподо́бныхъ Его́].

До́мъ тѣ́сенъ имѣ́лъ еси́, преподо́бне о́тче, и во убо́зѣмъ жили́щѣ многолѣ́тнѣ обита́лъ еси́, и въ затво́рѣ у́жемъ желѣ́знымъ прикова́вся, вери́ги же тя́жкія на тѣ́лѣ твое́мъ нося́, тѣ́мже и получи́лъ еси́ воздая́ніе небе́сное.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

До́мъ Бо́жія благода́ти душа́ твоя́ бы́сть, преподо́бне, злострада́ньми отъ скве́рны грѣхо́вныя очище́нная, и тѣ́ло твое́ многотерпѣли́вое яви́ся исцѣле́ній исто́чникъ си́лою Христо́вою.

Сла́ва, гла́съ 8:

Кто́ изрещи́ возмо́жетъ твоя́ по́двиги, терпѣ́ніе же и злострада́ніе, о́тче на́шъ Ирина́рше, преподо́бне? Вои́стину позо́ръ ди́венъ а́нгеломъ и человѣ́комъ бы́лъ еси́. Тѣ́мже со а́нгелы ны́нѣ ра́дуешися и, дерзнове́ніе ко Го́споду пріе́мъ, мо́лишися те́плѣ о душа́хъ на́шихъ.

И ны́нѣ, пра́здника.

Тропа́рь, гла́съ 4:

Яко му́ченика добропроизво́льна и преподо́бныхъ удобре́ніе, звѣзду́ Росто́вскую, въ затво́рѣ, у́захъ и вери́гахъ Го́сподеви благоугоди́вшаго и чуде́съ благода́ть отъ Него́ пріе́мшаго, Ирина́рха преди́внаго пѣ́сньми хвале́бными почти́мъ и, къ многоцѣле́бнѣй ра́цѣ моще́й его́ припа́дающе, уми́льно глаго́лемъ: о́тче преподо́бне, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника.



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., [1-й антифо́нъ.] На Го́споди воззва́хъ.., стихи́ры на 8: пра́здника 3 и преподо́бному 5, во гла́съ 8:

Ра́дуйтеся, правосла́вныхъ собо́ри! Въ странѣ́ Росто́встѣй подви́жникъ чу́денъ возсія́, путе́мъ у́зкимъ ше́ствовавый къ Сіо́ну го́рнему, Ирина́рхъ затво́рникъ и веригоно́сецъ, у́зы Христо́вы вы́ну помина́яй, у́зами желѣ́зными любве́ ра́ди Христо́вы себе́ связа́вый, къ нему́же, вопію́ще, рце́мъ: уго́дниче Спа́совъ, помоли́ся ко Го́споду, да спасе́тъ ду́ши на́ша, я́ко Милосе́рдъ. [Два́жды.]

О, пресла́внаго зра́ка! Но́въ подви́жникъ благоче́стія въ Росто́вѣ яви́ся, Ирина́рхъ, у́зникъ Христо́въ, его́же терпѣ́нію чудя́щеся, того́ па́мять моли́твенно почита́емъ и цѣле́бную си́лу отъ ра́ки его́ пріе́млемъ, зову́ще и глаго́люще: уго́дниче Спа́совъ, помоли́ся къ просла́вльшему тя́ Го́споду дарова́ти на́мъ ми́ръ и ве́лію ми́лость. [Два́жды.]

О, пресла́внаго чудесе́! Ка́ко ты́, о́тче Ирина́рше, въ бре́ннѣй пло́ти а́нгелы безпло́тныя удиви́лъ еси́ и, человѣ́къ бы́въ пе́рстенъ, а́ки внѣ́ тѣ́ла, злострада́нія му́жески переноси́лъ еси́ во́льно? Моли́ся, о́тче преподо́бне, о на́съ, чту́щихъ тя́, ко Го́споду, да да́руетъ на́мъ, грѣ́шнымъ, покая́ніе, ми́ръ и ве́лію ми́лость.

Сла́ва, гла́съ 6:

Егда́ услы́шалъ еси́, о́тче, гла́съ Боже́ственный отъ ико́ны распя́тія Христо́ва, въ затво́рѣ сраспина́тися Христу́ тебѣ́ повелѣва́ющъ, а́біе въ хра́минѣ тѣ́снѣй себе́ затвори́лъ еси́ и, у́жемъ желѣ́знымъ въ не́й прикова́вся, многолѣ́тнѣ, въ постѣ́ и моли́твѣ, подвиза́лся еси́, да Христу́ Бо́гу благоуго́денъ яви́шися, Ему́же помоли́ся, преподо́бне, да не лиши́тъ и на́съ наслѣ́дія небе́снаго.

И ны́нѣ, пра́здника.
Вхо́дъ. Проки́менъ дне́. И чте́нія три́ преподо́бническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и преподо́бнаго стихи́ры, гла́съ 2:

Егда́ открове́ніемъ Боже́ственнымъ, о́тче Ирина́рше, повелѣ́ніе прія́лъ еси́, е́же въ затво́рѣ Го́сподеви порабо́тати, вспя́ть ника́коже озира́тися дерзну́лъ еси́, сего́ ра́ди отъ Го́спода вѣне́цъ сла́вы прія́лъ еси́, преподо́бне, Ему́же помоли́ся, да спасе́тъ и просвѣти́тъ ду́ши на́ша.

Егда́ иноплеме́нная ра́ть на́йде на оби́тель твою́, преподо́бне, ты́ ля́ховъ не устраши́лся еси́, но прозорли́во тѣ́мъ провозвѣсти́лъ еси́, я́ко во оте́чество свое́ возврати́тися не и́мутъ. Та́ко тя́ Христо́съ му́жествомъ и си́лою духо́вною просла́ви, Ему́же помоли́ся, преподо́бне, да спасе́тъ и просвѣти́тъ ду́ши на́ша.

Сла́ва, гла́съ 6:

Пріиди́те, и́ноковъ ли́цы и по́стниковъ собо́ръ, пѣ́сньми духо́вными до́браго и́нока и по́стника почти́мъ, преподо́бнаго отца́ на́шего Ирина́рха, свѣти́льника Росто́ву и всея́ Россíи удобре́ніе, но́въ о́бразъ по́двига духо́внаго на́мъ показа́вшаго, у́зника добропроизво́льна бы́вшаго, чуде́съ благода́тію ны́нѣ сія́юща. Его́ всечестну́ю па́мять ны́нѣ ублажа́емъ, мо́лится бо Христу́ Бо́гу дарова́ти мíру ми́ръ и душа́мъ на́шимъ ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 1:

Преподо́бне о́тче Ирина́рше, во всю́ страну́ Россíйскую изы́де сла́ва по́двигъ твои́хъ. Кто́ не удиви́тся терпѣ́нію твоему́ и му́жеству души́ твоея́, я́ко многолѣ́тнѣ въ затво́рѣ подвиза́лся еси́ и, у́зникъ бы́въ добропроизво́ленъ, мно́ги ско́рби, гоне́нія и болѣ́зни претерпѣ́лъ еси́ незло́биво, я́ко а́гнецъ кро́ткій, не пререка́я гони́телемъ твои́мъ? Тѣ́мже, ны́нѣ пріе́мъ возме́здіе небе́сное отъ Христа́ Бо́га, моли́ся Ему́, поми́ловати ду́ши на́ша.

Сти́хъ: Честна́ предъ Го́сподемъ [сме́рть преподо́бныхъ Его́].

Преподо́бне о́тче Ирина́рше, ты́, кре́стъ Христо́въ на ра́мо твое́ взе́мъ, по́двиги мно́гими тѣ́ло свое́ сокруши́лъ еси́ и тѣ́мъ тяготы́ плотскíя избѣ́глъ еси́, безстра́стіе благода́тное улучи́въ. Тѣ́мже сосу́дъ чи́стъ Ду́ха Свята́го яви́лся еси́, Его́же дѣ́йствіемъ мно́ги чудеса́ соверша́я, моли́ся вы́ну ко Го́споду, преподо́бне, поми́ловати ду́ши на́ша.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Преподо́бне о́тче Ирина́рше, свѣ́тлая твоя́ па́мять освяща́етъ на́ша ду́ши благоуха́ніемъ добродѣ́телей, всѣ́мъ явля́ющи, и́миже Бо́гу угоди́лъ еси́ и чудотво́рецъ изря́денъ яви́лся еси́, дара́ми Ду́ха Свята́го сія́яй. И ны́нѣ, о́тче, твои́ми моли́твами на́съ озари́ и моли́ся ко Го́споду, тя́ просла́вльшему, да спасе́тъ ду́ши на́ша.

Сла́ва, гла́съ 8:

По́стника Госпо́дня, у́зника Христо́ва, затво́рника благоумиле́ннаго и чудотво́рца пресла́внаго, Ирина́рха преподо́бнаго пѣ́сньми духо́вными, бра́тіе, почти́мъ и моле́бно къ нему́ возопіи́мъ: а́нгеловъ подо́бниче и человѣ́ковъ наста́вниче, научи́ ны ходи́ти путе́мъ богоуго́дныхъ исправле́ній твои́хъ и моли́твами твои́ми изба́ви ны́ осужде́нія вѣ́чнаго.

И ны́нѣ, пра́здника.

На благослове́ніи хлѣ́бовъ: Тропа́рь преподо́бнаго, два́жды, [пи́санъ на ма́лѣй вече́рни,] та́же пра́зднику: Во Іорда́нѣ.., еди́ножды.



НА УТРЕНИ,
На Бо́гъ Госпо́дь: Тропа́рь пра́зднику, два́жды. Сла́ва, свято́му. И ны́нѣ, пра́здника.

По 1-мъ стихосло́віи сѣда́ленъ, гла́съ 4:

Зва́нію Госпо́дню послѣ́довавъ, о́тче, въ затво́рѣ неисхо́дно подвиза́лся еси́, пло́ть твою́ изнуря́я посто́мъ, вери́гами желѣ́зными и ра́нами во́льными, я́же налага́лъ еси́ на плещи́ твоя́, Ирина́рше преблаже́нне, оби́тели твоея́ похвало́ и моли́твенниче о душа́хъ на́шихъ. [Два́жды.]

Сла́ва и ны́нѣ, пра́здника.

По 2-мъ стихосло́віи сѣда́ленъ, гла́съ 7:

Кре́стъ Христо́въ на ра́мо твое́ взе́мъ, Ирина́рше, о́тче на́шъ, кня́зю Дими́трію кре́стъ честны́й въ побѣ́ду на супоста́ты вда́лъ еси́ и тому́ я́вѣ проре́клъ еси́ си́лою Христа́ Бо́га враги́ покори́ти, тѣ́мже и ны́нѣ въ небе́сныхъ черто́зѣхъ прославля́ешися и мо́лишися о душа́хъ на́шихъ. [Два́жды.]

Сла́ва, и ны́нѣ, пра́здника.

[Велича́ніе:

Ублажа́емъ тя́, преподо́бне о́тче Ирина́рше, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4:

Егда́ узрѣ́ тя нача́льникъ ра́ти иноплеме́нныя, Ирина́рше преподо́бне, удиви́ся терпѣ́нію твоему́ и ничи́мже оскорби́ оби́тель твою́, но я́ко уго́дника Бо́жія тя́ почита́лъ е́сть, ему́же и́стину, не обину́яся, глаго́лалъ еси́ небоя́зненно, и сбы́стся надъ ни́мъ сло́во твое́, я́ко проро́ка вои́стину и моли́твенника о душа́хъ на́шихъ. [Два́жды.]

Сла́ва, и ны́нѣ, пра́здника.

Степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* [сме́рть преподо́бныхъ Его́.] Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Богоно́се о́тче Ирина́рше, ты́ Бо́гу соверше́нно угоди́лъ еси́ въ житіи́ вре́меннѣмъ и ны́нѣ навѣ́ки съ Ни́мъ въ вѣ́чномъ животѣ́ соедини́лся еси́, пресвѣ́тлое лице́ Влады́ки Христа́ созерца́я, Ему́же помоли́ся, преподо́бне, о всѣ́хъ, вѣ́рою почита́ющихъ па́мять твою́.

Кано́нъ пра́здника втора́го творца́ [со ирмосо́мъ на 6] и преподо́бнаго на 8.

Кано́нъ преподо́бнаго, гла́съ 8.
Пѣ́снь 1.

Ирмо́съ: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Мо́ря стра́стнаго пучи́ну преше́лъ еси́ безвре́дно, преподо́бне о́тче, и подъ зна́менемъ креста́ Христо́ва крѣ́пко ра́товалъ еси́, терпѣ́ніемъ и смире́ніемъ неви́димыя враги́ побѣжда́я. Тѣ́мже чуде́съ благода́тію отъ Го́спода просла́вился еси́ преди́вно.

Мо́рю предѣ́лъ положи́вый, Госпо́дь яви́ тя ди́вна въ терпѣ́ніи и злострада́ніи, Ирина́рше блаже́нне, по́двигомъ бо но́вымъ себе́ вда́лъ еси́, любве́ ра́ди Христо́вы пло́ть твою́ затво́ромъ и у́зами желѣ́зными изнуря́я, въ ни́хже дара́ми духо́вными просла́вился еси́, пречу́дне.

Мо́ря жите́йскаго треволне́ніе не погрузи́ корабля́ твоего́ душе́внаго, Ирина́рше богому́дре, вѣ́яніемъ бо Ду́ха Бо́жія управля́емъ, въ ти́хое приста́нище вше́лъ еси́ и мно́гими благода́тными дара́ми просла́вился еси́.

Богоро́диченъ: Ту́чи сле́зъ испроси́ на́мъ, Влады́чице Преблага́я, и тѣ́ми угаси́ пе́щь страсте́й на́шихъ, да спасе́ніе вѣ́чное полу́чимъ Твои́мъ предста́тельствомъ и воспои́мъ Христу́ побѣ́дную пѣ́снь, я́ко просла́вися.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Утверди́лъ еси́ на ка́мени терпѣ́нія се́рдце твое́, преподо́бне о́тче, и, а́ки безпло́тенъ, вся́кія ско́рби, гоне́нія же и злострада́нія безро́потно претерпѣва́лъ еси́, на Подвигополо́жника Христа́ Бо́га очи́ма вѣ́ры взира́я. Тѣ́мже и о спасе́ніи свое́мъ возвесели́лся еси́ Того́ Боже́ственною благода́тію.

Утвержде́нный открове́ньми небе́сными, въ затво́рѣ многолѣ́тнѣ пребы́лъ еси́, Ирина́рше блаже́нне, у́зами желѣ́зными связа́въ твое́ тѣ́ло, ра́ны же тому́ неща́дно возлага́я, да ника́коже возмо́жетъ воста́ти на ду́хъ тво́й, во спасе́ніе вѣ́чное тобо́ю управля́емый.

Утвержда́лъ еси́ прозо́рливыми твои́ми словесы́ бли́жнія твоя́, о́тче преди́вне, къ любвѣ́ Христо́вой всѣ́хъ возбужда́я, ея́же преиспо́лненъ бы́въ, гони́телемъ твои́мъ кро́токъ и незло́бивъ показа́лся еси́, о покая́ніи тѣ́хъ моля́ Бо́га.

Богоро́диченъ: Утвержде́ніе на Тя́ надѣ́ющихся, Богоро́дице Дѣ́во, не посрами́ упова́нія на́шего, е́же по Бо́зѣ на Тя́ возлага́емъ, но бу́ди на́мъ Защи́тница отъ нападе́ній вра́жіихъ, да, Тобо́ю помоществу́еми, возвесели́мся о спасе́ніи на́шемъ.

Конда́къ и и́косъ пра́здника.
Сѣда́ленъ, гла́съ 4:

Ско́рый помо́щникъ явля́ешися, преподо́бне о́тче Ирина́рше, всѣ́мъ, съ вѣ́рою притека́ющимъ къ честно́му твоему́ гро́бу, исцѣле́нія боля́щимъ подава́я отъ него́ си́лою Го́спода си́лъ, просла́вльшаго тя́ чудотворе́нія благода́тію. Сего́ ра́ди съ любо́вію почита́емъ святу́ю и всечестну́ю па́мять твою́. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Проро́комъ Бо́жіимъ подо́бяся, о́тче Ирина́рше, бу́дущая, я́ко настоя́щая, созерца́лъ еси́ и прозорли́во предре́клъ еси́ иму́щее бы́ти изгна́ніе ля́ховъ, при́сно умоля́я Христа́ о побѣ́дѣ правосла́вныхъ и воспѣва́я Того́ Боже́ственное снизхожде́ніе.

Проро́чески омыва́лъ еси́ лице́ твое́ слеза́ми и питіе́ твое́ пла́чемъ растворя́лъ еси́, преподо́бне, да пла́чемъ вре́меннымъ пла́ча вѣ́чнаго избѣ́гнеши. Тѣ́мже блаже́нство пла́чущихъ унаслѣ́довалъ еси́ на небесѣ́хъ и ны́нѣ во Ца́рствіи Христа́ Бо́га утѣша́ешися, воспѣва́я Того́ Боже́ственное снизхожде́ніе.

Проро́ка и царя́ Дави́да пѣснопѣ́нія возлюби́ душа́ твоя́, преподо́бне о́тче, и́миже Бо́га де́нь и но́щь сла́вилъ еси́, и, я́ко пти́ца, осо́бящаяся на здѣ́, отъ затво́ра твоего́ уедине́ннаго благоумиле́нно пѣ́сни хвалы́ и славосло́вія Христу́ Бо́гу воспѣва́лъ еси́ при́сно, Того́ Боже́ственное снизхожде́ніе прославля́я.

Богоро́диченъ: Проро́ческая рече́нія на Тебѣ́ сбы́шася, Дѣ́во Богоро́дице, Ты́ бо Сло́во Бо́жіе нетлѣ́нно воплоти́ла еси́ и Невмѣсти́маго во утро́бѣ Твое́й дѣ́вственнѣй вмѣсти́ла еси́. Тѣ́мже и воспѣва́емъ спаси́тельное Христо́во снизхожде́ніе.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Го́спода Бо́га освяти́лъ еси́ въ души́ твое́й, преподо́бне о́тче, и, Того́ Боже́ственною любо́вію уязви́въ се́рдце твое́, яви́лся еси́ вѣ́рный дѣ́латель за́повѣдей Христо́выхъ, во смире́ніи ду́ха вы́ну пребыва́я и въ моли́твахъ непреста́нныхъ призыва́я и́мя Бо́жіе спаси́тельное.

Го́спода Бо́га вы́ну зрѣ́лъ еси́ очи́ма души́ твоея́, преподо́бне о́тче, и, стра́хомъ Бо́жіимъ утвержда́емъ, непоколеби́мъ отъ искуше́ній вра́жіихъ пребы́лъ еси́, вся́ прило́ги діа́вольстіи отража́я призыва́ніемъ моли́твеннымъ Боже́ственнаго и́мене Христо́ва.

Госпо́день ра́бъ бы́лъ еси́, Ирина́рше преблаже́нне, вы́ну рабо́тавый Влады́цѣ Христу́ во смире́ніи и терпѣ́ніи мно́зѣ, пло́ть твою́ изнуря́я затво́ромъ тѣ́снымъ и вери́гами тя́жкими, я́ко вси́, зря́щіи таково́е твое́ страда́льческое житіе́, и́мя Христо́во прославля́ху.

Богоро́диченъ: Госпо́дня Ма́ти и Влады́чица всея́ тва́ри яви́лася еси́, Богоро́дице Марíе, ро́ждши Еди́наго отъ Тро́ицы, Бо́га Сло́ва. Его́же моли́, Чи́стая, страсте́й безслове́сныхъ на́съ изба́вити, да въ тишинѣ́ безстра́стія се́рдцемъ и усты́ воспѣва́емъ свято́е и́мя Его́.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

Яко вѣ́рный послѣ́дователь Христа́ Бо́га, смире́нъ и незло́бивъ бы́лъ еси́, Ирина́рше преблаже́нне, моля́ся вы́ну за враги́ и гони́тели твоя́. Мо́лимъ тя́, преподо́бне, научи́ и на́съ твоему́ непамятозло́бію и ко Христу́ путеводи́ на́съ моли́твами твои́ми, да не поги́бнемъ въ бе́зднѣ грѣхо́внѣй.

Яко безпло́тенъ вои́стинну, о́тче, вся́кое злострада́ніе тѣле́сное терпѣ́лъ еси́ му́жески, утѣсни́тель бы́въ твоему́ тѣ́лу, е́же желѣ́зными у́зами неосла́бно истни́лъ еси́, да отъ бе́здны грѣхо́вныя изы́детъ живо́тъ тво́й.

Яко крѣ́пкій ратобо́рецъ, въ доспѣ́хи желѣ́зныя одѣ́явся, преподо́бне, враги́ неви́димыя побѣжда́лъ еси́ и, вся́ искуше́нія діа́вольская отража́я, вои́стину бы́лъ еси́ сто́лпъ непоколеби́мъ благоче́стія и подви́жникъ соверше́нный о Христѣ́, въ не́мже тля́ грѣхо́вная ника́коже обрѣ́теся.

Богоро́диченъ: Яко вои́стину прибѣ́жище непосты́дное христіа́номъ, щи́тъ и покро́въ, Ма́ти Бо́жія, воспѣва́ющія Тя́ бѣ́дъ и скорбе́й свободи́. Тя́ бо Еди́ну, благослове́нную въ жена́хъ, немо́лчными пѣ́сньми хвале́бными ублажа́емъ.

Конда́къ, гла́съ 2:

Волне́ній мно́жество жесто́кимъ житіе́мъ преходя́, изгна́ніе, затво́ръ и у́зы желѣ́зныя претерпѣ́лъ еси́ му́жески, Ирина́рше терпѣливоду́шне, на́мъ оста́вль о́бразъ злострада́нія и терпѣ́нія твоего́, озаря́я чуде́съ блиста́ньми съ вѣ́рою приходя́щихъ къ честно́му гро́бу твоему́, у него́же, я́ко по́честь побѣ́дную, вери́ги твоя́ тя́жкія ви́димъ, отъ ни́хже подае́ши исцѣле́нія неду́жнымъ. Сего́ ра́ди зове́мъ ти́: ра́дуйся, Ирина́рше, о́тче преди́вный.

Икосъ:

Ангельскими нра́вы себе́ благоукраси́въ, Ирина́рше блаже́нне, ти́хъ, кро́токъ и незло́бивъ бы́лъ еси́. Въ земно́мъ житіи́ ко враго́мъ твои́мъ не вражду́я, но при́сно моля́ся за ни́хъ Бо́гу, вои́стину небе́сный человѣ́къ показа́лся еси́ и соверше́нный уго́дникъ Христо́въ, Имъ бо въ житіи́ и по преставле́ніи чудесы́ мно́гими просла́вленъ бы́лъ еси́, преподо́бне. Ты́ и ны́нѣ то́чиши исцѣле́нія отъ ра́ки моще́й твои́хъ, къ ни́мже съ вѣ́рою и любо́вію притека́юще, вопіе́мъ ти́: ра́дуйся, Ирина́рше, о́тче преди́вный.

Пѣ́снь 7.

Ирмо́съ: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Въ пещи́ мно́гихъ искуше́ній, Ирина́рше блаже́нне, терпѣли́во пребыва́лъ еси́, не опале́нъ уны́нія пла́менемъ, и вся́ прило́ги діа́воли смире́ніемъ и незло́біемъ души́ твоея́ низложи́лъ еси́, при́сно зовы́й: благослове́нъ еси́, Бо́же оте́цъ на́шихъ.

Въ пещи́ гоне́нія лю́таго, я́ко сребро́ чи́стое, предъ лице́мъ Бо́жіимъ яви́лся еси́, преподо́бне о́тче, сего́ ра́ди а́нгела Бо́жія сподо́бился еси́ зрѣ́ти, да вы́ну пое́ши: благослове́нъ еси́, Бо́же оте́цъ на́шихъ.

Пе́щь мно́гихъ скорбе́й разжже́ ти́ діа́волъ, Ирина́рше терпѣливоду́шне, неразу́мныя на тя́ человѣ́ки воздвиза́я, но вся́ сія́ незло́біемъ твои́мъ посрами́лъ еси́ и, при́сно моля́ся за ни́хъ Бо́гу, взыва́лъ немо́лчно: благослове́нъ еси́, Бо́же оте́цъ на́шихъ.

Богоро́диченъ: Въ пещи́ халде́йстѣй та́инство рождества́ Твоего́ проразумѣва́я, Богоро́дице, ро́ждшимся отъ Тебе́ Искупи́телемъ спасе́ніе обрѣто́хомъ и, подо́бно отроко́мъ богосло́вцемъ, Сы́ну Твоему́ и Го́споду благода́рно зове́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Ангели и небеса́, на Престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Ангела тя́ во пло́ти и человѣ́ка небе́снаго ви́дѣвъ, воево́да ра́ти иноплеме́нныя ублажи́ терпѣ́ніе твое́ и му́жество души́ твоея́, о́тче преподо́бне, глаго́ля, я́ко такова́го отца́ никогда́же ви́дѣ, и та́ко просла́ви Бо́га, препѣ́таго и превозноси́маго во вѣ́ки.

Ангелы собесѣ́дники имѣ́лъ еси́, преподо́бне о́тче, и, тѣ́ми укрѣпля́емъ, гоне́ніе лю́тое претерпѣ́лъ еси́ му́жески, гони́телемъ же твои́мъ благотвори́ти тща́лся еси́, при́сно моля́ся за ни́хъ Бо́гу, препѣ́тому и превозноси́мому во вѣ́ки.

Ангеловъ Творе́цъ, Христо́съ Госпо́дь, обѣтова́нія Своя́ на тебѣ́ испо́лни, Ирина́рше, о́тче на́шъ, и я́ко претерпѣ́вшему до конца́ вся́кое злострада́ніе прозорли́вства и чудотворе́нія дарова́ тебѣ́ благода́ть, е́юже зѣло́ просла́вилъ еси́ на земли́ Бо́га, препѣ́таго и превозноси́маго во вѣ́ки.

Богоро́диченъ: Ангельское цѣлова́ніе прино́симъ Ти́ съ любо́вію, Богоро́дице Чи́стая, глаго́ля: ра́дуйся, Благода́тная, Госпо́дь съ Тобо́ю! Ты́ же ра́дости небе́сныя сподо́би по до́лгу Тя́ ублажа́ющія и отъ Тебе́ ро́ждшагося сла́вящія Бо́га препѣ́таго и превозноси́маго во вѣ́ки.

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Чу́ждъ бы́лъ еси́ вся́каго лука́вства, о́тче, и толи́ко кро́токъ и незло́бивъ, я́ко диви́тися ученико́мъ твои́мъ, ви́дящимъ тя́, среди́ лю́таго гоне́нія ми́рно пребы́вшаго ду́хомъ, и гони́тели твоя́, я́ко благотво́рцы, почита́вшаго, на ни́хже не гнѣ́вался еси́, но при́сно велича́лъ еси́ Христа́ Жизнода́вца.

Чужезе́мцы ля́хи, зря́ще по́двиги твоя́ вели́кія, преподо́бне о́тче, умили́шася и, я́ко уго́дника Бо́жія, тя́ почита́ху, тебе́ ра́ди не расхища́я оби́тели твоея́ святы́я. Ты́ же и́мъ небоя́зненно пра́вду Бо́жію вѣща́лъ еси́, при́сно велича́я Христа́ Жизнода́вца.

Чу́ждъ поко́я въ затво́рѣ твое́мъ бы́лъ еси́, о́тче Ирина́рше, рука́ма твои́ма оде́жды сшива́я и и́ми ни́щія одѣва́я, и во устѣ́хъ моли́тву Іису́сову непреста́нно имѣ́лъ еси́, се́рдцемъ и усты́ твои́ми немо́лчно велича́я Христа́ Жизнода́вца.

Богоро́диченъ: Чу́ждыхъ искуше́ній вра́жескихъ яви́ ны, Влады́чице, и въ ча́съ кончи́ны на́шея ускори́ къ на́мъ на по́мощь, пріе́мъ сомоли́твенника Твоего́ за ны́, преподо́бнаго Ирина́рха. Умоли́ же Сы́на Твоего́ и Го́спода изба́вити ду́ши на́ша отъ наси́лія вра́жія, да, спасе́нніи Тобо́ю, ра́достно Тя́ велича́емъ.

Свѣти́ленъ:

Процвѣ́лъ еси́, я́ко кри́нъ се́льный, во удо́ліяхъ смире́нія и терпѣ́нія, преподо́бне о́тче, и плода́ми трудо́въ твои́хъ услажда́еши ду́ши на́ша, исцѣле́нія подава́я отъ честна́го твоего́ гро́ба всѣ́мъ, съ вѣ́рою и любо́вію къ тебѣ́ притека́ющимъ. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 5:

Ра́дуйся, преподо́бне о́тче Ирина́рше, звѣздо́ Росто́вская, чуде́съ сія́ньми всю́ зе́млю Ру́сскую озари́вшая. Ра́дуйся, у́зниче Христо́въ и страстоте́рпче во́льный, отъ десни́цы Всевы́шняго увѣнча́нный. Ра́дуйся, ско́рый помо́щниче всѣ́хъ, въ моли́твѣ тя́ призыва́ющихъ. Потщи́ся помощи́ и на́мъ, сла́вящимъ тя́, и да́нною ти́ отъ Го́спода благода́тію неду́ги на́ша душе́вныя и тѣле́сныя исцѣли́, прося́ дарова́ти на́мъ ве́лію ми́лость. [Два́жды.]

Ра́дуйся, по́стниче Госпо́день, затво́рниче терпѣливоду́шне и моли́твенниче богопрія́тне! Ра́дуйся, наста́вниче, богому́дрія небе́снаго преиспо́лненный, всѣ́хъ къ богоугожде́нію и́стинному наставля́яй. Наста́ви и на́съ, о́тче, ходи́ти путе́мъ богоуго́дныхъ исправле́ній твои́хъ и приклони́ся ми́лостиво ко гла́сомъ на́шимъ хвале́бнымъ, и́миже честву́емъ съ любо́вію святу́ю па́мять твою́, Ирина́рше блаже́нне.

Ра́дуйся, и́ноковъ красото́, терпѣ́нія пра́вило, кро́тости зерца́ло, чуде́съ Боже́ственныхъ соверши́телю, Ирина́рше богоно́се, оте́чество земно́е луча́ми чуде́съ твои́хъ озаря́яй и си́ми утвержда́яй на́съ въ Правосла́вной вѣ́рѣ. Тѣ́мже честну́ю па́мять твою́ соверша́ющимъ пода́ждь ве́лію ми́лость.

Сла́ва, гла́съ 6:

Преподо́бне о́тче Ирина́рше, во вся́ концы́ страны́ Россíйскія изы́де вѣща́ніе многотерпѣли́ваго житія́ твоего́ и сла́ва чуде́съ твои́хъ. Вели́кій Росто́въ тобо́ю красу́ется, и вся́ко мѣ́сто и́мать тя́ засту́пника, [идѣ́же] и́мя твое́ моли́твенно призыва́ется. Тѣ́мже уми́льно глаго́лемъ: уго́дниче Бо́жій, моли́ся ко Го́споду о спасе́ніи всѣ́хъ, вѣ́рно пра́зднующихъ святу́ю па́мять твою́.

И ны́нѣ, пра́здника.
Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нны отъ кано́на [пра́здника пѣ́снь 8-я на 4 и преподо́бнаго] пѣ́снь 6-я на 4. [Проки́менъ пра́здника, гла́съ 4: Благослове́нъ гряды́й во и́мя Госпо́дне, Бо́гъ Госпо́дь и яви́ся на́мъ. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. И преподо́бнаго проки́менъ, гла́съ 7: Честна́ предъ Го́сподемъ сме́рть преподо́бныхъ Его́.] Апо́столъ къ Гала́томъ, зача́ло 213. [Аллилу́ія пра́здника, гла́съ 4: Принеси́те Го́сподеви сы́нове Бо́жіи, принеси́те Го́сподеви сы́ны о́вни. Сти́хъ: Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. И преподо́бнаго, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.] Ева́нгеліе отъ Луки́, зача́ло 24. Прича́стенъ: [Яви́ся благода́ть Бо́жія спаси́тельная всѣ́мъ человѣ́комъ. И преподо́бнаго:] Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


МОЛИТВЫ ПРЕП. ИРИНАРХУ:

Моли́тва 1-я.

О, вели́кій уго́дниче Бо́жій и пресла́вный чудотво́рче, преподо́бне о́тче на́шъ Ирина́рше! При́зри на ны́, грѣ́шныя, въ ско́рбехъ и обстоя́ніихъ на́шихъ усе́рдно къ тебѣ́ вопію́щія и на тя́ по Бо́зѣ все́ упова́ніе на́ше возлага́ющія. Про́симъ тя́ со умиле́ніемъ мно́гимъ: твои́мъ предста́тельствомъ ко Го́споду Бо́гу испроси́ на́мъ ми́ръ, долгоде́нствіе, братолю́біе, земли́ плодоно́сіе, возду́ха благорастворе́нія, дожди́ благовре́менны и свы́ше благослове́ніе на вся́ начина́нія на́ша блага́я. Изба́ви же всѣ́хъ на́съ святы́ми твои́ми моли́твами отъ вся́кихъ бѣ́дъ: гла́да, гра́да, пото́па, огня́, меча́, вредоно́снаго че́рвія, тлетво́рныхъ вѣтро́въ, смертоно́сный я́звы и напра́сныя сме́рти, и во вся́кихъ ско́рбехъ на́шихъ бу́ди на́мъ утѣ́шитель и помо́щникъ, сохраня́я ны́ отъ паде́ній грѣхо́вныхъ и сподобля́я наслѣ́дники бы́ти Ца́рствія небе́снаго, да прославля́емъ вку́пѣ съ тобо́ю всѣ́хъ благи́хъ Пода́теля, Тріеди́наго Бо́га: Отца́, и Сы́на, и Свята́го Ду́ха во вѣ́ки вѣко́въ. Ами́нь.

Моли́тва 2-я.

О, преподо́бне о́тче Ирина́рше! Свяще́нной ра́цѣ моще́й твои́хъ многоцѣле́бныхъ предстоя́ще, мо́лимъ тя́ усе́рдно хода́таемъ на́шимъ при́сно бы́ти и засту́пникомъ. Испроси́ у́бо на́мъ отъ Христа́ Бо́га ми́ръ, тишину́, благоде́нствіе, здра́віе, и спасе́ніе, и отъ всѣ́хъ враго́въ ви́димыхъ и неви́димыхъ огражде́ніе, покры́й же на́съ хода́тайствомъ твои́мъ отъ нахожде́нія вся́кихъ бѣ́дъ и скорбе́й, па́че же отъ искуше́ній врага́ те́мнаго, да вси́ мы́ съ тобо́ю прославля́емъ всесвято́е и́мя Отца́, и Сы́на, и Свята́го Ду́ха, ны́нѣ, и при́сно, и во вѣ́ки вѣко́въ. Ами́нь.

Источникъ: Слу́жба преподо́бному отцу́ на́шему Ирина́рху Затво́рнику, Росто́вскому чудотво́рцу. — М.: Сѵнода́льная Тѵпогра́фія, 1910. — 16 л.

/ Къ оглавленію раздѣла /


Наверхъ / Къ титульной страницѣ

0