Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 13-й де́нь.
Слу́жба преподо́бному и богоно́сному отцу́ на́шему Елеаза́ру, Анзерскому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1:

Отче Елеаза́ре богому́дре, ты́ вои́стинну тяготу́ дневну́ю поне́слъ еси́, во о́стровѣ пу́стѣ прежи́въ мно́га лѣ́та, и ны́нѣ мзду́ трудо́въ твои́хъ пріе́млеши на небеси́; помина́й на́съ, почита́ющихъ честно́е преставле́ніе твое́.

Преподо́бне о́тче Елеаза́ре, труды́ и по́двиги твои́ми прія́лъ еси́ вла́сть на ду́хи нечи́стыя, е́же прогони́ти ты́я отъ человѣ́къ, лука́вствія тѣ́хъ моли́твами твои́ми изба́витися, мо́лимся, на́мъ, свѣ́тло пра́зднующимъ святу́ю па́мять твою́.

Сла́ва, гла́съ 2:

Пріиди́те, празднолю́бныхъ собо́ри, ра́достно похва́лимъ отца́ на́шего Елеаза́ра, и́же, въ тѣ́лѣ сы́й, безпло́тныя враги́ побѣди́ и небе́сныя благода́ти сподо́бися, бу́дущая сказу́я, я́ко настоя́щая. Тѣ́мже любе́зно вопіе́мъ ему́: ра́дуйся, преподо́бне о́тче на́шъ, рачи́телю безмо́лвія, пусты́нный жи́телю, сто́лпе крѣ́пости проти́ву лица́ вра́жія, прилѣ́жно моли́ся Го́сподеви дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Все́ упова́ніе мое́ [на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

На стихо́внѣ стихи́ры, гла́съ 2:

До́мъ Ду́ху Пресвято́му себе́ предугото́валъ еси́, преподо́бне Елеаза́ре, во Христа́ вѣ́рою утверди́вся, помози́ и на́мъ проти́ву ко́зней діа́вольскихъ.

Стихъ: Честна́ предъ Го́сподемъ сме́рть преподо́бныхъ Его́.

Гро́бъ тво́й, преподо́бне Елеаза́ре, вѣ́рнымъ всѣ́мъ прибѣ́жище быва́етъ и отъ бѣ́дъ спасе́ніе, цѣльбы́ подая́ вѣ́рою прибѣга́ющимъ.

Стихъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ски́тъ въ жили́ще и́нокомъ основа́лъ еси́, преподо́бне Елеаза́ре, о́тче на́шъ, моли́ся о живу́щихъ въ не́мъ, да обря́щемъ ми́лость въ де́нь Су́дный.

Сла́ва, гла́съ 8:

Добродѣ́тельнаго житія́ твоего́, преподо́бне, кто́ исчи́слити возмо́жетъ труды́ и по́двиги, я́же подъя́лъ еси́ отъ ю́ности твоея́, Христо́ви послѣ́довавъ и въ за́повѣдехъ Его́ ходя́ де́нь и но́щь? Посто́мъ и моли́твою, бдѣ́ніемъ и коленопреклоне́ніемъ, кро́тостію и незло́біемъ въ чи́стѣй со́вѣсти Тому́ порабо́талъ еси́, и ны́нѣ трудо́въ твои́хъ воздая́ніе отъ Христа́ бога́тно воспрія́лъ еси́. Сего́ ра́ди мо́лимъ тя́, всеблаже́нне Елеаза́ре, о́тче на́шъ, моли́ спасти́ся душа́мъ на́шимъ.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Тропа́рь, гла́съ 3:

Отве́ргъ пло́ти тлѣ́нная, нетлѣ́нныхъ потща́лся еси́ дости́гнути, и, мíра удали́вся, всели́лся еси́ въ морскíй о́стровъ, и на не́мъ усе́рдно мно́га лѣ́та Го́сподеви порабо́талъ еси́, сего́ ра́ди и да́ры прозрѣ́нія и чуде́съ обогати́лся еси́, о́тче преподо́бне Елеаза́ре. Христа́ Бо́га моли́ дарова́ти на́мъ ми́ръ и ве́лію ми́лость.

Сла́ва, и ны́нѣ, богоро́диченъ:

Тя́, хода́тайствовавшую [спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]

Та́же ектенія́. И отпу́стъ.



НА ВЕЛИЦѢЙ ВЕЧЕРНИ,
По предначина́тельнѣмъ псалмѣ́, пое́мъ Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 6:

Все́ отве́ргъ мірско́е пристра́стіе и пло́ть свою́ преоби́дѣвъ, Христа́ Еди́наго возлюби́лъ еси́, Его́же ра́ди во о́стровъ всели́лся еси́, преподо́бне, идѣ́же мно́га лѣ́та трудолю́бнѣ подвиза́вся, поревнова́лъ еси́ житію́ преподо́бныхъ оте́цъ Зоси́мы и Савва́тія, съ ни́миже ны́нѣ лику́я на небесѣ́хъ, Христу́ моли́ся о душа́хъ на́шихъ. [Два́жды.]

Все́ сокро́вище свое́ скрыва́я на небесѣ́хъ, земна́я вся́ расточи́лъ еси́; до́мъ и роди́тели оста́вивъ, легко́ поте́клъ еси́ вслѣ́дъ Христа́, взыску́я жи́тельства вѣ́чнаго, е́же и обрѣ́лъ еси́, всеблаже́нне. О чту́щихъ досто́йно па́мять твою́ со дерзнове́ніемъ моли́ся, во е́же спасти́ся на́мъ. [Два́жды.]

Все́ жела́ніе твое́ устреми́въ къ Бо́гу, во о́стровъ пусты́й дости́глъ еси́ и, въ не́мъ водвори́вся, му́жественно съ де́моны бра́лся еси́, и́хже и побѣди́лъ еси́ си́лою Христо́вою, тѣ́мже сла́венъ показа́лся еси́ чудотво́рецъ, Елеаза́ре пребога́те. Моли́ся о пра́зднующихъ любо́вію святу́ю па́мять твою́. [Два́жды.]

Все́ пусты́нное озлобле́ніе претерпѣва́я, во о́стровѣ пу́стѣ живы́й, преподо́бне, труды́ вели́кія подъя́лъ еси́, еще́ же и тѣ́ло свое́ вери́гами удруча́я, всего́ себе́ въ коне́цъ истощи́лъ еси́ и подража́тель дре́внимъ святы́мъ пустынножи́телемъ яви́лся еси́, съ ни́миже моли́ся о душа́хъ на́шихъ. [Два́жды.]

Сла́ва, гла́съ 5:

Стеце́мся ны́нѣ, о празднолю́бцы, псалмы́ и пѣ́сньми похва́лимъ преподо́бнаго, и, веселя́щеся, воспои́мъ, глаго́люще: ра́дуйся, те́плый моли́твенниче и ско́рый помо́щниче, Елеаза́ре всеблаже́нне, ра́дуйся, весе́ліе на́ше духо́вное; ны́нѣ на́съ, ча́дъ твои́хъ, свѣ́тло пра́зднующихъ па́мять твою́, помина́й у престо́ла всѣ́хъ Царя́ и Бо́га, во е́же низпосла́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Въ Чермнѣ́мъ мо́ри [Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ].

Вхо́дъ, проки́менъ дне́ и чте́нія три́ преподо́бническая.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Весели́ся, ски́те, непло́дствовавый иногда́: ны́нѣ бо на́мъ пло́дъ ра́дости отъ тебе́ прозябе́ и воня́ благода́ти Бо́жія мѵроуха́етъ, ея́же наслажда́ющеся, Христа́ славосло́вимъ, Иже прославля́етъ святы́я Своя́ и чуде́съ дѣ́йствомъ обогати́ преподо́бнаго Елеаза́ра. Сего́ ра́ди зове́мъ ему́ непреста́нно: моли́ спасти́ся душа́мъ на́шимъ.

Пріиди́те, вси́ вѣ́рніи, похва́лимъ преподо́бнаго отца́ на́шего Елеаза́ра: се́й бо во́инъ духо́вный яви́ся, непобѣди́мь вои́стинну, побѣди́въ мы́сленнаго Амали́ка, тѣ́мже и вѣне́цъ сла́вы прія́тъ отъ руки́ Вседержи́теля и мо́лится о душа́хъ на́шихъ.

Кто́ не просла́витъ тя́, преподо́бне Елеаза́ре, о́тче на́шъ, зря́ многоцѣле́бный гро́бъ тво́й, отъ него́же дѣ́йствуеши си́лы душа́мъ на́шимъ во спасе́ніе и тѣлесе́мъ во здра́віе? Сего́ ра́ди прилѣ́жно мо́лимся ти́: моли́ся о на́съ непреста́нно Христу́ Бо́гу на́шему, да ми́лость пріи́мемъ и благода́ть обря́щемъ во благовре́менную по́мощь.

Сла́ва, гла́съ 5:

Ра́дуйся ны́нѣ, все́ мона́шеское мно́жество: де́нь преставле́нія отца́ на́шего свѣ́тло почти́мъ, въ о́ньже о́нъ, я́ко ра́бъ вѣ́рный, вни́де въ ра́дость Го́спода своего́ и, я́ко строи́тель до́му му́дрый, мзду́ пра́ведную прія́тъ отъ Влады́ки Христа́. Тѣ́мже и мы́, дне́сь ко гро́бу его́ припа́дающе и съ любо́вію то́й лобыза́юще, возопіи́мъ: бу́ди засту́пникъ на́шъ, Елеаза́ре всебога́те, я́ко да вси́ ми́лость пріи́мемъ и благода́ть обря́щемъ во благовре́менную по́мощь.

И ны́нѣ, богоро́диченъ:

[Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.]

На стихо́внѣ сти́хиры, гла́съ 5:

Ра́дуйся, о́тче Елеаза́ре богому́дре: ты́ бо, въ житіи́ твое́мъ безмо́лвія жела́ніемъ объя́тъ бы́въ и препла́вая пучи́ну жите́йскаго непостоя́ннаго мо́ря, мно́гія бѣды́ и напа́сти претерпѣ́лъ еси́, и ны́нѣ моли́твами твои́ми бу́рю морску́ю въ тишину́ прелага́еши, и отъ потопле́нія избавля́еши вѣ́рою призыва́ющія тя́, и на́мъ, почита́ющимъ святу́ю па́мять твою́, испроси́ ми́ръ и ве́лію ми́лость.

Сти́хъ: Честна́ предъ Го́сподемъ [сме́рть преподо́бныхъ Его́].

Ра́дуйся, о́тче Елеаза́ре богоблаже́нне: ты́ бо, отъ ю́ности ревну́я житію́ Го́сподеви благоугоди́вшихъ, ски́тскій жи́тель бы́лъ еси́ и ны́нѣ мно́гихъ отъ бу́рь и треволне́ній жите́йскихъ избавля́еши, во огра́ду спаси́тельную сію́ совокупля́я, тѣ́мже моли́ Го́спода изба́вити напа́стей вся́ческихъ почита́ющія святу́ю па́мять твою́ и низпосла́ти и́мъ ми́ръ и ве́лію ми́лость.

Стихъ: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́].

Ра́дуйся, о́тче Елеаза́ре богоно́се, и́ноческое по Бо́зѣ житіе́ измла́да возлюби́вый и пу́ть къ немяте́жному безмо́лвію мона́хомъ показа́вый, о́бразомъ ски́тскаго житія́ тѣ́хъ наставля́я, и ны́нѣ на́съ, лю́тѣ стра́ждущихъ въ пучи́нѣ жите́йскихъ попече́ній, ко приста́нищу благооти́шному напра́ви, грѣхо́внаго потопле́нія на́съ избавля́я и моля́ душа́мъ на́шимъ да́ти ми́ръ и ве́лію ми́лость.

Сла́ва, гла́съ 7:

Ра́дуются ны́нѣ мона́шествующихъ ли́цы, въ пречестнѣ́мъ хра́мѣ Святы́я Тро́ицы совоку́пльшеся, идѣ́же многоцѣле́бныя мо́щи, въ нѣ́дрѣхъ земны́хъ почива́ющія, воне́ю безсме́ртія облагоуха́ютъ все́ благочести́выхъ собра́ніе и торжествова́ти устроя́ютъ въ лѣ́тней па́мяти преподо́бнаго отца́ на́шего, пѣ́сненныя хвалы́ тому́ воспѣва́юще, я́ко скитонача́льнику и добродѣ́телей подви́жнику, мона́шескаго житія́ присносія́ющему свѣти́льнику и моли́твеннику о душа́хъ на́шихъ.

И ны́нѣ, богоро́диченъ:

Подъ кро́въ Тво́й, Влады́чице, вси́ земноро́дніи, прибѣга́юще, вопіе́мъ Ти́: Богоро́дице, упова́ніе на́ше, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

Но Ны́нѣ отпуща́еши..., на благослове́ніи хлѣ́бовъ: Тропа́рь свята́го, два́жды. И Богоро́дице Дѣ́во, ра́дуйся.., еди́ножды. И про́чее по обы́чаю.



НА УТРЕНИ,
На Бо́гъ Госпо́дь: Тропа́рь свята́го, гла́съ 3: Отве́ргъ пло́ти тлѣ́нная.., два́жды. Сла́ва, и ны́нѣ, богоро́диченъ: Тя́ хода́тайствовавшую...

На 1-й стихоло́гіи сѣда́ленъ, гла́съ 4:

Всели́вся во о́стровъ Анзерскій, преподо́бне, и́стинный поко́й обрѣ́лъ еси́ въ не́мъ, посто́мъ, и моли́твами, и труда́ми подвиза́вся де́нь и но́щь, де́монскія полки́ прогна́лъ еси́ и преподо́бнымъ отце́мъ Зоси́мѣ и Савва́тію житіе́мъ твои́мъ уподо́бился еси́, съ ни́миже моли́ся о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Упова́ніе и прибѣ́жище христіа́номъ, Богоро́дице Приснодѣ́во, не пре́зри на́съ, тре́бующихъ Твоея́ по́мощи и заступле́нія, но я́ко Ма́ти Зижди́теля всѣ́хъ Бо́га моли́ спасти́ся рабо́мъ Твои́мъ.

По 2-й стихоло́гіи сѣда́ленъ, гла́съ 1:

Вои́стинну пресла́вно житіе́ твое́, преподо́бне, я́ко а́нгеломъ подо́бникъ бы́лъ еси́, посто́мъ и моли́твами плотскíя стра́сти умертви́въ, тѣ́мже ны́нѣ во странѣ́ живы́хъ вселя́яся, вку́пѣ со а́нгелы сла́виши Тро́ицу Единосу́щную. [Два́жды.]

Сла́ва, и ны́нѣ, богоро́диченъ:

Тя́, Пречи́стая Богоро́дице, а́нгели пою́тъ непреста́нно, я́ко Содѣ́теля всѣ́хъ Бо́га родила́ еси́ неискусому́жно во спасе́ніе на́съ, пою́щихъ: ра́дуйся, Дѣ́во, христіа́нъ похвало́.

По поліеле́и сѣда́ленъ, гла́съ 8:

Ка́ко тя́ просла́вимъ, преподо́бне? Ты́ бо, еще́ жи́въ сы́й, просла́вленъ бы́лъ еси́ су́щею въ тебѣ́ благода́тію Бо́жіею, егда́ въ лице́ царю́ благовѣ́рному Михаи́лу предвозвѣсти́лъ еси́ рожде́ніе сы́на его́. Сего́ ра́ди зове́мъ ти́: ра́дуйся, прорица́телю пресла́вный, Елеаза́ре, о́тче на́шъ. [Два́жды.]

Сла́ва, и ны́нѣ, богоро́диченъ:

Дѣ́во Пренепоро́чная и Неискусобра́чная, Марíе Богоро́дице, при́зри на рабы́ Твоя́, вѣ́рно зову́щія Ти́: ра́дуйся, просвѣти́вшая ро́дъ человѣ́ческій Рождество́мъ Твои́мъ, Имже ле́сть бѣсо́вская отгна́ся; ра́дуйся, спасе́ніе на́ше и утвержде́ніе.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Ева́нгеліе отъ Матѳе́я, зача́ло 43.

По Ева́нгеліи стихи́ра, гла́съ 6:

Ка́ко тя́ ублажи́ти, недоумѣ́емъ мы́, преподо́бне и достоблаже́нне о́тче Елеаза́ре, ты́ бо вои́стинну дре́внимъ проро́комъ подо́бникъ яви́лся еси́, егда́ рожде́ніе сы́на царе́ва проре́клъ еси́. Тѣ́мже тя́, я́ко равноче́стна святы́мъ, почита́емъ и моли́твенника Бо́гу благопрія́тна о душа́хъ на́шихъ.

Кано́нъ Богоро́дицѣ со ирмосо́мъ на 6, и свята́го на 8, гла́съ 4.

Пѣ́снь 1.

Ирмо́съ: Наста́вльшему дре́вле Изра́иля, бѣжа́щаго отъ рабо́ты фарао́новы, и въ пусты́ни пита́вшему, пои́мъ Изба́вителю Бо́гу на́шему, я́ко просла́вися.

Наста́ви мя́ на пу́ть ра́зума, Го́споди, свѣ́тло воспѣ́ти уго́дника Твоего́, ему́же благоволи́лъ еси́ во о́стровъ Анзерскій всели́тися, идѣ́же на враги́ укрѣпи́лъ еси́ его́, я́ко Всеси́ленъ.

Кто́ исчи́слити возмо́жетъ по́двиги твоя́, пресла́вне Елеаза́ре, и́миже подвиза́вся, враги́ безпло́тныя побѣди́лъ еси́? И ны́нѣ отгоня́еши и́хъ отъ человѣ́къ благода́тію Свята́го Ду́ха.

Аще и тма́ми покуша́шеся вра́гъ отъя́ти сокро́вище души́ твоея́, но, уя́звленъ бы́въ мече́мъ крѣ́пкаго твоего́ терпѣ́нія, всегда́ постыжде́нъ, отбѣга́ше отъ тебе́.

Богоро́диченъ: Богоро́дице Приснодѣ́во, простри́ ми́лостивно десни́цу Твою́ на по́мощь мнѣ́, я́ко уя́звленъ е́смь лю́тѣ отъ врага́ и человѣкоубíйцы и на Тя́ то́чію наде́жду мою́ полага́ю, Ты́ мя́ уще́дри.

Катава́сія пра́здника: Глубины́ откры́лъ е́сть дно́...

Пѣ́снь 3.

Ирмо́съ: Утверди́ся се́рдце мое́ въ Го́сподѣ, даю́щемъ моли́тву моля́щемуся, я́ко лу́къ си́льныхъ изнемо́же и немощству́ющіи препоя́сашася си́лою.

Непобѣди́мь пребы́лъ еси́, преподо́бне, о Го́сподѣ, препоя́савшемъ тя́ си́лою Свое́ю, е́юже го́рдость де́моновъ низложи́ся.

Дарова́ся тебѣ́ благода́ть отъ Го́спода, е́же возставля́ти немощны́я, тѣ́мже и на́мъ моли́ препоя́сатися си́лою.

Сто́лпъ крѣ́пости бы́лъ еси́ проти́ву лица́ вра́жія, о́тче Елеаза́ре, не́мощны сотвори́ супоста́ты на́ша моли́твами твои́ми, мо́лимся.

Богоро́диченъ: Влады́чице мíра, Блага́я Помо́щнице, спаси́ и въ крѣ́пости вознеси́ ро́гъ людíй Твои́хъ, избавля́ющи на́съ отъ вся́кихъ бѣ́дъ и обстоя́ній.

Сѣда́ленъ, гла́съ 3:

Яко заря́ со́лнечная, пресвѣ́тло сія́еши во о́стровѣ Анзерстѣмъ, и всѣ́мъ вѣ́рнымъ, прибѣга́ющимъ подъ кро́въ моли́твъ твои́хъ, преподо́бне Елеаза́ре, о́тче на́шъ, весе́ліе подае́ши, стяжа́лъ бо еси́ мно́гое дерзнове́ніе ко Христу́ Бо́гу. Тому́ непреста́нно моли́ся дарова́ти на́мъ оставле́ніе грѣхо́въ и ве́лію ми́лость. [Два́жды.]

Сла́ва, и ны́нѣ, богоро́диченъ:

Подъ Твою́ ми́лость прибѣга́емъ, Богоро́дице Дѣ́во, моле́ній на́шихъ не пре́зри въ ско́рбехъ, но отъ бѣ́дъ изба́ви на́съ, еди́на Чи́стая и Благослове́нная.

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Еди́наго Бо́га въ се́рдцы твое́мъ имѣ́я, преподо́бне, въ ски́тѣ Анзерстѣмъ, а́ки въ раи́ богозда́ннѣмъ, безмо́лвно пожи́лъ еси́, взыва́я при́сно: сла́ва си́лѣ Твое́й, Го́споди.

Пресвѣ́телъ свѣти́льникъ бы́лъ еси́, о́тче Елеаза́ре, всѣ́мъ, ку́пно жи́вшимъ съ тобо́ю, озаря́я свѣ́тлостію житія́ твоего́ и призыва́я вы́ну воспѣва́ти Бо́гу: сла́ва си́лѣ Твое́й, Го́споди.

Радѣ́я о сла́вѣ Бо́жіи, во о́стровъ пусты́й всели́лся еси́, о́тче, его́же и просла́вилъ еси́ о и́мени Госпо́дни, научи́въ всѣ́хъ вопи́ти: сла́ва си́лѣ Твое́й, Го́споди.

Богоро́диченъ: Изъ Твои́хъ ложе́снъ, Богороди́тельнице, Сло́во Бо́жіе произы́де несказа́нно, Его́же моли́ отъ зо́лъ изба́витися всѣ́мъ, вѣ́рно зову́щимъ: сла́ва си́лѣ Твое́й, Го́споди.

Пѣ́снь 5.

Ирмо́съ: Мра́къ разрѣши́ грѣха́ моего́, внегда́ возсія́ти Ти́ у́тро свѣ́тлое за́повѣдей Твои́хъ, Го́споди, Непристу́пный Свѣ́те.

Его́же возлюби́лъ еси́ и Ему́же порабо́талъ еси́ отъ ю́ности, о́тче преподо́бне, Того́ умоли́, мра́къ грѣхо́вный души́ моея́ разгна́ти сія́ніемъ Ду́ха.

Приложи́лъ еси́ труды́ ко трудо́мъ, о́тче, подвиза́яся сугу́бо ра́ди бли́жнихъ твои́хъ, сего́ ра́ди небе́сная блага́я приложи́шася тебѣ́.

О тѣ́лѣ твое́мъ небрегíй, пребыва́лъ еси́ на земли́, вы́ну отъ небе́сныхъ поуча́яся, преподо́бне, тѣ́мже ны́нѣ съ ли́ки святы́хъ пребыва́еши на небеси́.

Богоро́диченъ: Нескве́рная Агнице, Богоотрокови́це Марíе, Твои́мъ всеси́льнымъ предста́тельствомъ сокруши́ вся́, востаю́щія на ны́ си́лы вра́жія.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но, я́ко Бо́гъ, изъ глубины́ возведи́ живо́тъ мо́й, Многоми́лостиве.

Дале́че отъ Бо́га грѣ́хъ мя́ отри́ну и въ пучи́нѣ зо́лъ погружа́юся лю́тѣ. Но, о предста́телю на́шъ, изба́ви отъ належа́щія ско́рби ду́шу мою́.

Оста́ви мя́ си́ла моя́ и нѣ́сть помога́яй ми́, къ тебѣ́ у́бо припа́даю, о́тче преподо́бне, бу́ди ми́ помо́щникъ во обстоя́ніихъ зо́лъ.

Бе́здною грѣхо́въ сляца́емь, окая́нный, во глубину́ отча́янія поверга́юся, но, предвари́въ моли́твами твои́ми, о́тче Елеаза́ре, возведи́ мя ко свѣ́ту боговѣ́дѣнія.

Богоро́диченъ: Безнача́льный Бо́гъ пло́тію изъ Тебе́ роди́ся въ лѣ́то, и по рождествѣ́ соблюде́ Тя́ Дѣ́ву нетлѣ́нну, Того́ сотвори́ на́мъ ми́лостива, мо́лимъ Ти ся, и отъ находя́щихъ зо́лъ избавля́юща.

Конда́къ, гла́съ 1:

Яко лучу́ тя́ со́лнечную, Христо́съ показа́, преподо́бне, сія́ющу во странѣ́ примо́рстѣй чуде́съ благода́тію, уставля́еши бо пла́вающимъ тишину́ морску́ю, вѣ́рою моля́щимся тебѣ́ и вопію́щимъ: ра́дуйся, Елеаза́ре, о́тче на́шъ, страны́ Бѣломо́рскія похвало́ и утвержде́ніе.

Икосъ:

Благода́тію чуде́съ обогати́лся еси́ пресла́вно, преподо́бне о́тче на́шъ Елеаза́ре, я́ко отъ гро́ба твоего́ здра́віе боля́щимъ и вся́ку по́мощь тре́бующимъ подае́ши незави́стно. Тѣ́мже сте́кшеся дне́сь, де́нь преставле́нія твоего́ духо́вно пра́зднуемъ, по́двиги твоя́ почита́юще и похва́льная воспѣва́юще: ра́дуйся, многоразли́чныя цѣльбы́ неду́гующимъ душе́вно и тѣле́сно ско́ро подава́яй; ра́дуйся, пла́вающихъ въ мо́ри во благооти́шное приста́нище незри́мо управля́яй; ра́дуйся, во вся́кихъ бѣда́хъ и ско́рбехъ явля́яй ско́рое заступле́ніе; ра́дуйся, скиту́ Анзерскому похвало́ и утвержде́ніе.

Пѣ́снь 7.

Ирмо́съ: Образу злато́му не поклони́вшеся, о́троцы авраа́мстіи искуша́хуся, я́ко зла́то въ горни́лѣ, въ пещи́ о́гненнѣй, я́ко въ черто́зѣ свѣ́тлѣмъ, ликова́ху, пою́ще: благослове́нъ еси́, Бо́же оте́цъ на́шихъ.

Ничто́же земно́е предпоче́лъ еси́ па́че небе́сныхъ и, я́ко зла́то въ горни́лѣ, искуси́лся еси́, въ ски́тѣ живы́й, ве́сь свѣтови́денъ бы́въ, всегда́ въ богомы́сліи поуча́яся и при́сно взыва́я: Бо́же, благослове́нъ еси́.

Моли́твою и посто́мъ Го́сподеви прилѣпля́яся, богоблаже́нне, Тому́ еди́ному послужи́лъ еси́, отъ Него́же вѣне́цъ неувяда́емый воспрія́въ, ра́достно пое́ши во Ца́рствіи небе́снѣмъ: Бо́же, благослове́нъ еси́.

Гро́бъ тво́й, преподо́бне Елеаза́ре, благода́тію Христо́вою цѣльбопода́теленъ явля́ется, къ нему́же вѣ́рніи притека́юще и исцѣле́нія пріе́млюще, Христу́ вопію́тъ: Бо́же, благослове́нъ еси́.

Богоро́диченъ: Ми́лостива мнѣ́ Сы́на Твоего́ и всѣ́хъ Бо́га ма́терними Твои́ми моли́твами сотвори́, Пречи́стая, я́ко да, спаса́емь Тобо́ю, вопію́ Ти́ непреста́нно: благослове́нъ Пло́дъ чре́ва Твоего́.

Пѣ́снь 8.

Ирмо́съ: Изба́вителю всѣ́хъ, Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Аще и въ пу́стѣ о́стровѣ сокры́лся еси́, преподо́бне, но не утаи́ся добродѣ́тельнаго житія́ твоего́ свѣ́тлость, благода́тію бо проро́ческою сія́я, научи́лъ еси́ всѣ́хъ пѣ́ти: вся́ дѣла́, благослови́те, по́йте Го́спода.

Дре́во благоплодови́то посредѣ́ о́строва пусты́ннаго гро́бъ тво́й обрѣ́теся, о́тче, отъ него́же чуде́сный пло́дъ объе́млюще, ду́ши наслажда́емъ, и, Христа́ славосло́вяще, зове́мъ: вся́ дѣла́, благослови́те, по́йте Го́спода.

Увы́ мнѣ́, что́ сотворю́, окая́нный, приводя́ во у́мъ многотру́дное твое́ житіе́, ему́же не подража́хъ отню́дъ! О, преподо́бне о́тче, поне́ отны́нѣ наста́ви мя́ на пу́ть пра́вый, е́же вопи́ти: вся́ дѣла́, благослови́те, по́йте Го́спода.

Богоро́диченъ: Отъ Тебе́, Пречи́стая Богоро́дице, излія́ся Исто́чникъ неисчерпа́емый воды́ живы́я на омове́ніе скве́рны грѣхо́вныя, е́юже благоволи́ и мнѣ́ очи́ститися, да зову́ Ти́: благослове́на Ты́ въ жена́хъ еси́, Всенепоро́чная Влады́чице.

Пѣ́снь 9.

Ирмо́съ: Велича́емъ вси́ человѣко́любіе Твое́, Христе́, Спа́се на́шъ, Сла́во ра́бъ Твои́хъ и Вѣ́нче вѣ́рныхъ, возвели́чивый па́мять Ро́ждшія Тя́.

Якоже излива́еши благода́ть Твою́, Христе́ Спа́се на́шъ, на святы́я Твоя́, тѣ́мъ и на́мъ да́руй ми́лости Твоя́, почита́ющимъ па́мять преподо́бнаго Твоего́.

Богоуго́дно на земли́ пожи́въ, преподо́бне, и ны́нѣ на небесѣ́хъ предстоя́ Христу́ Бо́гу, моли́ся возвели́чити держа́ву ца́рствія Благовѣ́рнаго Импера́тора на́шего и ми́ромъ огради́ти.

Якоже та́тей, покуша́вшихся тебе́ окра́сти и обезу́мѣвшихъ, разрѣши́лъ еси́ моли́твою, та́ко и на́съ, во узи́лищи страсте́й су́щихъ, разрѣши́ моли́твами твои́ми.

Богоро́диченъ: Что́ Ти́ принесе́мъ, Богоро́дицѣ, или́ что́ вѣща́ти и́мамы, грѣ́шніи? То́чію уми́льно вопіе́мъ: спаси́ рабы́ Твоя́, Богоблагода́тная Отрокови́це, я́ко да Тя́ при́сно велича́емъ.

Свѣти́ленъ:

Отъ ю́ности, о́тче, до́мъ Ду́ху Пресвято́му яви́лся еси́, въ кро́тости и смиреному́дріи Го́сподеви прилѣпля́яся, тѣ́мже и зе́млю кро́ткихъ наслѣ́довалъ еси́, идѣ́же, ны́нѣ лику́я, помина́й на́съ, почита́ющихъ честну́ю па́мять твою́. [Два́жды.]

Сла́ва, и ны́нѣ, богоро́диченъ:

Ра́дуйся, Тебѣ́ зове́мъ, Благослове́нная Богоро́дице Дѣ́во, я́ко Тобо́ю присносу́щныя ра́дости прича́стницы бы́хомъ, Жи́знь бо Ѵпоста́сную родила́ еси́ во спасе́ніе всѣ́мъ, пою́щимъ Тя́.

На хвали́техъ стихи́ры на 4, гла́съ 8:

О, пресла́вное чу́до! Гро́бъ тво́й, преподо́бне Елеаза́ре, я́ко са́дъ благоцвѣту́щій, явля́ется дне́сь, воне́ю безсме́ртія облагоуха́я притека́ющихъ къ нему́, и, я́ко со́лнце, въ полу́дни сія́ющее, чудесы́ озаря́етъ всѣ́хъ, пра́зднующихъ па́мять твою́.

О, пресла́внаго твоего́ житія́, богому́дре Елеаза́ре! Яко во пло́ти сы́й, безпло́тнымъ а́нгеломъ уподо́бился еси́, съ ни́миже ны́нѣ лику́еши на небесѣ́хъ и я́сно зри́ши лице́ Святы́я Тро́ицы. Ейже моли́ся о на́съ, досто́йно чту́щихъ па́мять твою́.

О, до́блестнаго твоего́ терпѣ́нія и му́жества непреодоли́маго, Елеаза́ре досточу́дне! Побѣди́лъ бо еси́ враги́ неви́димыя, и́же чрезъ все́ житіе́ твое́ не престава́ху воздвиза́ти бра́ни на тя́, тѣ́мже, я́ко до́бръ во́инъ Христо́въ, увѣнча́лся еси́. Помина́й на́съ, соверша́ющихъ па́мять твою́.

О, достоблаже́нне Елеаза́ре! Труды́ и по́двиги по́стными стра́сти умертви́вый, сосу́дъ избра́нъ Ду́ху Свято́му бы́лъ еси́, отъ Него́же да́ра проро́ческаго сподо́бився, я́сно предсказа́лъ еси́ царе́ви рожде́ніе сы́на, тѣ́мже вси́ прославля́емъ па́мять твою́.

Сла́ва, гла́съ 8:

Пріиди́те, мона́шествующихъ собо́ри, пѣ́сньми восхва́лимъ па́мять преподо́бнаго отца́ Елеаза́ра, пусты́ннаго безмо́лвія люби́теля, мона́шескаго житія́ учи́теля, неду́говъ благода́тнаго цѣли́теля, всѣ́мъ святы́мъ соприча́стника и моли́твенника о душа́хъ на́шихъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. Та́же ектеніи́ и отпу́стъ.



НА ЛИТУРГІИ,

Блаже́нна на 8, отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба преподо́бному и богоно́сному отцу́ на́шему Елеаза́ру, Анзерскому чудотво́рцу, его́же па́мять Мѣ́сяца Іаннуа́рія въ 13-й де́нь. — СПб.: Сѵнода́льная Тѵпогра́фія, 1900. — С. 40.

/ Къ оглавленію раздѣла /


Наверхъ / Къ титульной страницѣ

0