Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 13-й де́нь.
Святы́хъ му́ченикъ Ерми́ла и Стратони́ка.
Въ сíй же де́нь пое́тся слу́жба и святы́хъ оте́цъ, въ Сина́и и Раи́ѳѣ избіе́нныхъ.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 4. Подо́бенъ: Да́лъ еси́ зна́меніе.

Ерми́лъ сла́вный и богому́дрый Стратони́къ,* дво́ица чу́дная,* Тро́ицу несозда́нную исповѣ́дающе,* многобо́жную ле́сть* по мно́гихъ ра́нахъ и му́кахъ побѣди́ша* и, побѣ́ды вѣнце́мъ вѣнча́вшеся,* мо́лятся дарова́ти* конце́мъ ми́ръ и ми́лость.

Сло́ва бы́въ, му́чениче,* служи́тель, Ерми́ле,* избра́ніе Боже́ственнаго Ду́ха,* тече́ніемъ кро́ве* свяще́нія оде́жду обагри́въ,* свяще́ннѣйшу и́стинно* и свѣтлѣ́йшу сію́ соверши́лъ еси́,* и ны́нѣ въ Ца́рствія мы́сленная преше́лъ еси́,* моли́твенникъ чту́щихъ тя́ быва́я теплѣ́йшій.

Оско́рды претерпѣ́вше* повелѣ́ньми му́чащаго,* въ ко́шницу вве́ржени бы́сте,* и кончи́ну блаже́нну,* и удавле́ніе во́дъ о́ба пріе́мше,* многоко́зненнаго врага́ си́ми му́дрѣ удави́сте.* И ны́нѣ жи́тельствуете прера́достно на небесѣ́хъ,* о всѣ́хъ моля́щеся,* страда́льцы до́блѣйшіи.

Стихи́ры преподо́бныхъ, гла́съ 8. Подо́бенъ: Что́ ва́съ нарече́мъ, святíи.

Вельми́ подвиза́стеся, святíи,* ва́рварское претерпѣ́сте наше́ствіе до́блественнѣ,* ду́ши преда́вше мече́мъ усе́рдно,* му́ченическими увязо́стеся вѣнцы́,* со а́нгелы водворя́етеся досто́йно.* Мно́го ва́ше терпѣ́ніе и бо́льша дарова́нія:* моли́те спасти́ся душа́мъ на́шимъ.

Преподо́бніи, Христо́ви подвиза́стеся,* привре́менная пренебре́гше житія́ во́лею,* плотско́е покори́сте мудрова́ніе до́блественнѣ* и, мечи́ о Христѣ́ сконча́вшеся,* со а́нгелы водворя́етеся досто́йно.* Тѣ́мже ва́ша па́мяти честву́юще, мо́лимся:* моли́те спасти́ся душа́мъ на́шимъ.

До́брѣ жи́тельствовасте, святíи,* му́ченическимъ подвиго́мъ уподо́бльшеся до́блественно,* вѣнцы́ съ небесе́ прія́сте зако́нно,* мечи́ и вы́ пренебрего́сте,* я́ко сíи му́ки попра́ша,* да ку́пно одѣ́етеся* вѣнце́мъ страда́нія.* Моли́те спасти́ся душа́мъ на́шимъ.

Сла́ва, гла́съ 8. Студи́тово:

Преподо́бніи отцы́, поучи́вшеся де́нь и но́щь въ зако́нѣ Госпо́дни, сподо́бистеся дре́ва живо́тнаго снасажде́нни бы́ти, и пло́дъ ва́шего страда́нія вѣнцы́ процвѣте́. Дерзнове́ніе иму́ще къ Подвигополо́жнику Бо́гу, и на́мъ испроси́те очище́ніе и ве́лію ми́лость.

И ны́нѣ, гла́съ то́йже:

Го́споди, испо́лнити хотя́, я́же уста́вилъ еси́ отъ вѣ́ка, отъ всея́ тва́ри служи́тели та́йны Твоея́ прія́лъ еси́: отъ а́нгелъ — Гавріи́ла, отъ человѣ́къ — Дѣ́ву, отъ небе́съ — звѣзду́ и отъ во́дъ — Іорда́нъ, въ не́мже беззако́ніе мірско́е потреби́лъ еси́, Спа́се на́шъ, сла́ва Тебѣ́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́ся Оте́ческое* сія́ніе сла́вы* во Іорда́нскихъ струя́хъ,* креще́ніемъ очища́ющее* скве́рну ду́шъ на́шихъ.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Пріими́ раболѣ́пно,* проро́че Іоа́нне,* Изба́вителя мíра* и крести́ Зижди́теля* человѣ́ковъ на обновле́ніе.

Сти́хъ: Что́ ти е́сть, мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Пріи́де Просвѣще́ніе,* и Избавле́ніе яви́ся* во Іорда́нскихъ струя́хъ.* Сни́демся очи́ститися* и воспѣ́ти Человѣколю́бца.

Сла́ва, гла́съ 8:

Равноа́нгельное житіе́ жи́тельствовавше болѣ́зньми по́стническими, отцы́ преподо́бніи, воздержа́ніемъ тѣ́ло порабо́тивше, повину́сте ду́ху, дѣ́лателе бы́вше за́повѣдей Госпо́днихъ. Началообра́зную добро́ту зра́ка сохрани́сте и страда́льческія по́двиги отъ по́стническихъ по́товъ соверши́сте. И, сугу́быми вѣнцы́ украси́вшеся, прилѣ́жно Спа́са моли́те спасти́ся на́мъ.

И ны́нѣ, гла́съ то́йже:

Ангельская во́инства ужасо́шася о ви́димѣмъ дне́сь во Іорда́нѣ, на́гу стоя́щу Ти́, Спа́се, въ вода́хъ и пречи́стый ве́рхъ Тво́й прекло́ньшу крести́тися отъ Іоа́нна. Тебѣ́ бо обнища́вшу во́лею, мíръ обогати́ся: Го́споди, сла́ва Тебѣ́.

Тропа́рь му́чениковъ, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, отце́въ, гла́съ то́йже:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

И ны́нѣ, тропа́рь пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
По 1-й стихоло́гіи сѣда́ленъ, гла́съ 3. Подо́бенъ: Дѣ́ва дне́сь.

Влады́ка дне́сь на Іорда́нъ пріи́де, крести́вся въ вода́хъ отъ боже́ственнаго Предте́чи, свы́ше же Оте́цъ свидѣ́тельствоваше: Се́й е́сть Сы́нъ Мо́й, о Не́мже благоизво́лихъ. И Ду́хъ яви́ся стра́ннымъ ви́домъ голуби́нымъ надъ Ни́мъ.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Іорда́нъ струя́ми слу́житъ, и Іоа́ннъ простира́етъ ру́ку тлѣ́нную я́вльшуся Тебѣ́, Неви́диме, пло́тію ко креще́нію. Но о́въ у́бо возвраща́шеся вспя́ть со стра́хомъ, о́въ же а́біе держа́ше съ тре́петомъ Тя́, Нетлѣ́ннаго. Вои́стинну Агнецъ Бо́жій, Исто́чникъ присноживо́тный, исто́чники же, и моря́, и человѣ́ки освяти́въ: Тро́ица бо просія́ свы́ше, Сы́на Тя́ имену́етъ Роди́тель, и Святы́й Ду́хъ схо́дитъ.

Сла́ва, и ны́нѣ, то́йже.

Кано́нъ пра́здника, на 6, гла́съ 2.
Пѣ́снь 1.

Ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Утру я́вльшуся человѣ́комъ свѣтоно́сну ны́нѣ изъ пусты́ни, къ вода́мъ Іорда́нскимъ, Царю́ преклони́лъ еси́ со́лнца Твою́ вы́ю, ли́ка мра́чна родонача́льника исхи́тити, скве́рны же вся́кія очи́стити тва́рь.

Безнача́льне, струя́мъ спогре́бшася Тебѣ́, Сло́ве, но́ваго прево́диши, истлѣ́вшаго ле́стію, Сего́ несказа́нно отъ Отца́ пріе́мъ гла́съ держа́венъ: Се́й возлю́бленный, ра́венъ же Мнѣ́ Отрокъ естество́мъ.

Инъ кано́нъ му́чениковъ, его́же краегране́сіе: Твои́хъ честву́ю му́ченикъ, Спа́се, сла́ву. Іо́сифъ. Гла́съ 8.
Пѣ́снь 1.

Ирмо́съ: Пои́мъ Го́сподеви, вси́ лю́діе, въ мо́ри Чермнѣ́мъ фарао́на погрузи́вшему, побѣ́дную пѣ́снь пою́ще, я́ко просла́вися.

Честны́я я́коже звѣ́зды богосія́нныя, тве́рди, му́дріи, Це́ркве яви́стеся, озаря́юще ны́ Боже́ственными свѣтлостьми́, му́ченицы.

Яви́стеся, я́коже у́гліе мы́сленное, возжже́ни огне́мъ Ду́ха, сла́вніи, и и́дольское огни́ще струя́ми крове́й угаси́сте.

Вода́ми потопля́еми Христа́ ра́ди, въ вода́хъ на́ше нече́стіе погрузи́вшаго, безбо́жія рѣ́ки, му́ченицы, изсуши́сте.

Богоро́диченъ: Уста́ви моя́ грѣхо́вныя пото́ки, я́же сме́ртную тлю́ Рождество́мъ Твои́мъ увяди́вши, и умиле́ніе ми́ да́ждь, Богороди́тельнице Всенепоро́чная.

Инъ кано́нъ преподо́бныхъ, его́же краегране́сіе: Страда́ніе воспѣ́ти, отце́въ сла́ву вели́кую. Іо́сифъ. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Воздержа́ніемъ свѣтови́дни бы́вше, блаже́ннѣйшіи, богови́дни яви́стеся я́вѣ истоще́ніемъ кро́ве. Тѣ́мже сра́дуетеся по́стникомъ Христо́вымъ и му́ченикомъ.

Мо́ремъ сле́зъ пе́рвѣе удави́сте фарао́на, му́дріи, мы́сленнаго, кро́вными по́слѣжде тече́ньми погуби́сте и безвѣ́стію препосла́сте.

Просвѣща́я Свѣтода́вецъ Госпо́дь ва́ше поще́ніе терпѣ́ніемъ, уго́дницы Христо́вы, свѣтоза́рно содѣ́ла и я́вственно страда́ніе, па́че зари́ со́лнечныя сія́ющее.

Богоро́диченъ: Сы́й по естеству́ Госпо́дь, всѣ́мъ невмѣсти́мь, въ Тебѣ́ вмѣща́ется, Влады́чице, Человѣ́къ благоутро́біемъ бы́въ, да человѣ́ки за неизрече́нное человѣколю́біе спасе́тъ.

Пѣ́снь 3.

Ирмо́съ: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Умерщвле́ніе пе́рвѣе насади́вый тва́ри, звѣ́ря злодѣ́йственнаго вообра́жься въ естество́, омрача́ется плотски́мъ прише́ствіемъ: у́тру я́вльшуся, прирази́вся Влады́цѣ сокруши́ти свою́ вражде́бную главу́.

Влече́тъ къ себѣ́ Богозда́нное естество́, утро́бы мучи́теля, погребе́нное предѣ́лы; ражда́ется па́ки земноро́дныхъ Обновле́ніе, дѣ́ло держа́вно соверша́я Влады́ка: пріи́де бо, то́е очи́стити хотя́.

Инъ.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Теку́щихъ непостоя́тельное возненави́дѣвше, бу́дущихъ возжела́сте нетлѣ́нное наслажде́ніе, до́бліи страда́льцы Христа́ Всецаря́.

Му́жески проти́вистеся, богому́дріи, пребеззако́нно повелѣва́ющему нече́стію покори́тися и побѣ́ды съ небесе́ прія́сте вѣнцы́.

Тре́бища пре́лести низложи́сте, неле́стны же, Христо́вы му́ченицы, себе́ воздвиго́сте хра́мы че́стны и столпы́ богоразу́мія.

Богоро́диченъ: Ору́жіе, пре́жде обраща́емо, вхо́ды мнѣ́ дае́тъ, стыдя́щися пробо́дшаго, Дѣ́во Ма́ти, копія́, изъ Тебе́ рожде́ннаго.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Сокруше́нною мы́слію Бо́гу угоди́вше, сокруши́сте вра́жіе велехвале́ніе, блаже́нніи, мече́мъ сокруша́еми и умерщвля́еми.

Смотря́юще пребыва́ющихъ, му́дріи, присносу́щное, нестоя́нныхъ и тлѣ́нныхъ до́лу влеку́що отри́нусте, тѣ́мже ублажа́етеся, преподобному́ченицы.

Зако́ну Боже́ственному благопоко́рною мы́слію повину́вшеся, плотскíя сла́сти воздержа́ніемъ погуби́сте и, ны́нѣ пострада́вше, сла́ву улучи́сте.

Богоро́диченъ: Пресвята́я, Пресвято́е Сло́во ро́ждшая, освяти́ на́ша и ду́ши и тѣлеса́, блажа́щихъ Тя́, Всенепоро́чную.

Конда́къ, гла́съ 2. Подо́бенъ: Вы́шнихъ ища́.

Отъ мірскíя молвы́ избѣго́сте и къ ти́хому приста́нищу преста́вистеся, му́ченичества кровьми́ и по́стничества труда́ми вѣнча́еми. Тѣ́мже и показа́стеся му́чениковъ и преподо́бныхъ единовсе́льницы.

Икосъ:

Яже на земли́ умертви́вше у́ды, жизноно́сною ме́ртвостію Христа́ и Бо́га стра́сть изобрази́сте, пе́рвѣе, въ до́брѣмъ поще́ніи, и второ́е, па́ки во страда́ніи. Тѣ́мже и Са́мъ сугу́бы вѣнцы́ низпосла́ глава́мъ ва́шимъ, отцы́, угото́вивъ жили́ще небе́сное и мѣ́сто вѣ́чное, идѣ́же ны́нѣ, ра́дующеся, яви́стеся му́чениковъ и преподо́бныхъ единовсе́льницы.

Сѣда́ленъ, гла́съ 1. Подо́бенъ: Гро́бъ Тво́й.

Въ вода́хъ ку́пно блаже́нный коне́цъ прія́сте, му́дріи, и въ ни́хъ веліа́ра погрузи́вше благода́тію Бо́га на́шего, му́ченицы. Тѣ́мже вѣнцы́, я́ко побѣдоно́сцы, пріе́мше, ра́дуетеся со а́нгельскими ли́ки, съ ни́миже на́съ помина́йте.

Сла́ва, преподо́бныхъ, гла́съ 4. Подо́бенъ: Ско́ро предвари́.

Яко пресе́льницы явля́еми и прише́льцы на земли́, ку́щи водрузи́вше въ пусты́няхъ, я́вѣ пости́стеся, преподо́бніи, нагото́ю украси́вшеся, добродѣ́телей оде́ждею, сообра́зни бы́вше Христо́выхъ страсте́й, тѣ́мже и претерпѣ́сте ва́рварское заколе́ніе.

И ны́нѣ, то́йже подо́бенъ:

Струи́ освяти́лъ еси́ Іорда́нскія, держа́ву сокруши́лъ еси́ грѣхо́вную, Христе́ Бо́же на́шъ, преклони́лъ еси́ дла́ни Себе́ Предте́чевѣ и спа́слъ еси́ отъ ле́сти человѣ́ческій ро́дъ. Тѣ́мже Тя́ мо́лимъ: спаси́ ду́ши на́ша.

Пѣ́снь 4.

Ирмо́съ: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

По́сланъ отъ Отца́, всесвѣ́тлое Сло́во, но́щи отгна́ти зломра́чное стремле́ніе, и искорени́ти гряде́ши человѣ́ковъ грѣхи́, сы́ны же привлещи́, Твои́мъ Креще́ніемъ, Бла́же, свѣ́тлый отъ стру́й Іорда́нскихъ.

Са́мое прови́дѣвъ нарече́нное Сло́во, я́сно проповѣ́дникъ вопіе́тъ тва́ри: Се́й пре́жде мене́, вторы́й пло́тію сообра́зенъ, просія́ Боже́ственною си́лою вражде́бный на́шъ отъя́ти грѣ́хъ.

Па́жить у Себе́ животво́рну нося́, уловля́етъ зміе́въ, гнѣ́здамъ натека́я мно́гими сѣтьми́, низлага́я, Богъ Сло́во, запина́етъ же уязви́вшаго всемíрный ро́дъ, сего́ потре́бль, избавля́етъ тварь.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко Сло́ва служи́тель, словесы́ твои́ми безслове́сное обличи́лъ еси́, му́чениче Ерми́ле, неразу́міе беззако́ннующихъ усе́рднѣйше.

Еди́но естество́ Божества́, еди́ну вла́сть и госпо́дство, богому́дріи, проповѣ́давше, многобо́жную ле́сть преоби́дѣсте.

Повѣ́шенъ, и стро́ганъ, и ра́нами озлобля́емь, непрекло́ненъ пребы́лъ еси́, страстоте́рпче, богому́дре му́чениче Ерми́ле.

Богоро́диченъ: Уны́ніемъ дре́млюща и грѣхо́мъ спокрыва́ема, къ покая́нію мя́, Пречи́стая, я́ко Сло́ва Ма́ти, воззови́.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Не страстьми́ тѣле́сными побѣди́вшеся, врага́ побѣди́ли есте́ и, умертви́вшеся мече́мъ, всеблаже́нніи, къ жи́зни небе́снѣй, ра́дующеся, ку́пно преста́вистеся.

Утучни́стеся, я́ко а́гнцы, воздержа́ніемъ, и, я́ко овни́ назнамени́тіи, рука́ми кровопíйцъ волко́въ убіе́ни бы́сте, и соверше́нна заколе́нія, преподо́бніи, Христу́ приведо́стеся.

Свяще́нницы же, и ста́рцы, и ю́ноши, и́же въ Раи́ѳѣ и Сина́и горѣ́ живу́щіи, му́ченицы бы́ша, преподо́бно жи́вше и ну́жно уме́рше.

Богоро́диченъ: Новодѣ́лаетъ человѣ́чество но́въ Младе́нецъ, Превѣ́чный Госпо́дь, яви́вся отъ Дѣ́вы и Человѣ́къ бы́въ. Тому́ воспои́мъ: сла́ва си́лѣ Твое́й, Го́споди.

Пѣ́снь 5.

Ирмо́съ: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Ви́дѣвъ Зижди́тель во мра́цѣ прегрѣше́ній плени́цами неизбѣ́жными его́же вообрази́ пе́рсты, поставля́етъ на обою́ ра́му, воздвигъ горѣ́, ны́нѣ во многотеку́щихъ вода́хъ омыва́я студа́ дре́вняго Ада́мова зла́го нра́ва.

Со благоче́стіемъ притеце́мъ прилѣ́жно ко исто́чникомъ пречи́стымъ тече́нія спаси́тельнаго, Сло́во усмотря́юще отъ Нетлѣ́нныя, почерпа́ла принося́ще жа́жди Боже́ственныя, мíра сла́достнѣ исцѣля́я неду́гъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Му́къ о́блацы, му́ченицы всехва́льніи, не покры́ша ва́шего му́жества: па́че со́лнца бо яви́ся благоче́стія сія́ніемъ, благочести́выя свѣтоводя́щее и де́монскій мра́къ отъе́млющее.

Преше́дше предѣ́лы человѣ́чества, богоблаже́нніи, и па́че есте́ственному соедини́вшеся соверше́нными чище́ньми, го́рькія му́ки, и строга́ніями ра́ны претерпѣ́сте ума́ тве́рдостію.

Крѣ́пко сопроти́вился еси́, му́чениче, судя́щему, сла́вне Ерми́ле, и гла́съ слы́шати съ небесе́, преблаже́нне, сподо́бился еси́, зову́щему любо́вію прибли́житися я́ко Подвигополо́жнику и Сего́ укрѣпля́ющему му́ченики.

Богоро́диченъ: Яко добра́, я́ко красна́, я́ко чистото́ю облиста́ющи, Кра́снаго добро́тою воплоти́ла еси́ Сло́ва и родила́ еси́, е́же бы́ти всѣ́мъ богодѣ́льно, Дѣ́во Ма́ти, подаю́щаго бога́тствомъ бла́гости.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ра́й сла́дости, жи́зни дре́во, Го́спода, яви́стеся, посреди́ имѣ́яй, ва́шу я́ко же́ртву кро́вь пріи́мшаго.

Крове́й то́ки со сле́зными смѣси́вше струя́ми, богоно́сцы, многообра́знаго змíя въ си́хъ погрузи́сте.

Красоту́ Бо́жію зрѣ́ти сподо́бистеся, вѣ́чное весе́ліе вмѣ́сто трудо́въ и болѣ́зней, блаже́нніи, прія́сте.

Богоро́диченъ: Родила́ еси́ Бо́га па́че сло́ва и мы́сли, и пребыла́ еси́ по рождествѣ́, я́ко пре́жде рождества́, Дѣ́ва, Чи́стая Богора́дованная.

Пѣ́снь 6.

Ирмо́съ: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Отъ глуби́ннаго льва́, тревече́рній стра́ннѣ проро́къ во вну́треннихъ валя́яся, а́біе произы́де, пакибытія́ спасе́ніе отъ змíя человѣкоубíйцы всѣ́мъ предъявля́я въ послѣ́дняя лѣ́та.

Отве́рсту не́бу всесвѣ́тлыхъ писа́ній, учени́къ зри́тъ отъ Отца́ посыла́емый, пребыва́ющъ же Ду́хъ на Пречи́стѣмъ Сло́вѣ, наше́дъ я́ко го́лубь неизрече́ннымъ о́бразомъ, лю́демъ же явля́ется, прише́дшимъ ко Влады́цѣ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Во́дъ животво́рныхъ испо́лнившеся, въ рѣ́чныя вве́ржени бы́сте струи́ и, въ ни́хъ пріе́мше кончи́ну, зло́бы предста́теля удави́сте, всехва́льніи, и ны́нѣ на́мъ исцѣле́ній пото́ки источа́ете.

Въ ко́шницу вве́ржени бы́вше, усе́рдно преда́стеся глубинѣ́, страстоте́рпцы, и къ жи́зни вознесо́стеся боже́ственнѣй, я́же отъ вѣ́ка ва́ми надѣ́емая обрѣ́тше ра́достно, велему́дріи святíи му́ченицы.

Яви́лся еси́, въ го́рцѣй му́цѣ му́чимь и па́лицами біе́мь, Стратони́че му́чениче, терпѣ́нія необори́мь сто́лпъ, возвы́шенъ степе́немъ вѣ́ры, сопротивле́ніе гони́телей потребля́я и словесы́, и дѣя́ньми.

Богоро́диченъ: Стра́сти немощны́я души́ моея́, и болѣ́знь се́рдца, Дѣ́во, и ума́ преложе́нія многообра́зная, я́ко ми́лостива, Пресвята́я, исцѣли́ и ути́ши лю́тое зо́лъ мои́хъ волне́ніе, молю́ся.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Отве́ргше пристра́стія у́зы по́стничествомъ, ну́жнѣйшею сме́ртію у́зъ тѣле́сныхъ разрѣши́стеся и нерѣши́мою любо́вію связа́стеся Зижди́теля.

Яко го́ры высо́кія, жи́тельствомъ я́вльшеся, объя́ти го́ры и созда́ніе все́ претя́щаго, си́лою Христо́вою подъ но́ги покори́сте.

Вода́ми напои́вшеся сле́зъ, блаже́нніи, я́ко земля́ добра́ же и ту́чна, муче́нія кла́съ плодоноси́сте, въ жи́тницахъ вѣ́чныхъ Христу́ соблюда́емый.

Богоро́диченъ: Успи́ страсте́й пло́ти моея́ во́лны неусы́пною Твое́ю, Дѣ́во, моли́твою, молю́ся, и не да́ждь грѣхо́внымъ усну́ти мнѣ́ сно́мъ тяжча́йшимъ.

Конда́къ, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Пѣ́снь 7.

Ирмо́съ: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Тебе́ живопису́ющій ассирíйскій пла́мень ужа́сенъ поставля́еши, въ ро́су преведе́нъ; тѣ́мже вода́ ны́нѣ, я́коже пла́мень, одѣва́яй, вре́дную зло́бу, Христе́, прикрове́нную опаля́етъ, отъ поползнове́нныя стези́ призыва́ющи.

Раздѣ́льшуся Іорда́ну дре́вле, по су́ху прехо́дятъ лю́діе Изра́ильстіи, Тебе́, Держа́внѣйшаго, содержа́ща тва́рь некосни́тельнѣ, ны́нѣ въ вода́хъ напису́ющіи, къ нетлѣ́ннѣй и поле́знѣй стези́.

Вѣ́мы, пе́рвѣе всепа́губный пото́пъ ми́лостивно Тя́ всѣ́хъ во тлю́ привести́, о, тревели́кія сотворя́я и стра́нная́ Ны́нѣ же пото́пльша, Христе́, грѣ́хъ за благосе́рдіе и человѣ́ческое спасе́ніе.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Теча́ше медото́чное отъ у́стъ твои́хъ сло́во, го́ресть уны́нія Стратони́ка, твоего́ сострада́льца, укроща́ющее, вопію́щаго, Ерми́ле: Бо́же, благослове́нъ еси́.

Же́злъ си́лы держа́, спаси́тельный кре́стъ, до́блій му́чениче, жезло́мъ біе́нія терпи́ши усе́рдно, воспѣва́я Творцу́ твоему́, Ерми́ле: Бо́же, благослове́нъ еси́.

Спасы́й отъ чре́ва ки́това содержи́маго проро́ка пресла́вно, отъ рѣ́чныхъ во́дъ ва́ша спаса́етъ побѣдоно́сныя мо́щи по кончи́нѣ, страда́льцы.

Богоро́диченъ: Разрѣша́я Евину кля́тву, во Всенепоро́чную всели́лся еси́ Дѣ́ву, благослове́нія исто́чники источа́я вопію́щимъ: благослове́нъ еси́, Го́споди Бо́же, во вѣ́ки.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Просвѣще́ни воздержа́нія свѣтлостьми́ и страда́ньми свяще́нными, му́ченицы, явле́нно освяща́еми, преидо́сте къ Свѣ́ту незаходи́мому и дне́ сы́нове бы́сте.

Во́лею су́щихъ въ мíрѣ сла́дкихъ устраня́ющеся, стра́нно человѣ́комъ Явльшемуся пло́тію присво́истеся, пребыва́ющая и неистлѣва́ющая блага́я наслѣ́довавше, преподо́бніи.

Боже́ственный Па́велъ, и Іоа́ннъ, и Ѳеоду́лъ, Ни́лъ и вку́пѣ вси́, всесла́вно и уме́рше, и пожи́вше, да ублажа́тся по́стницы и сла́вніи му́ченицы.

Богоро́диченъ: Тя́, ма́нну жи́зни во чре́вѣ Твое́мъ нося́щую, дре́вле маннопріе́мная ста́мна я́ко вои́стинну прообража́ше явле́нно. Благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

Тріе́ богови́дніи, во огни́ ороша́еми, озаря́ющеся треми́ всесвѣ́тлѣ святы́нями, я́вѣ показова́ху Превы́шнее Естество́ смѣше́ніемъ человѣ́ческимъ, огнепаля́щее росо́ю ми́лостивно вся́ку па́губную ле́сть.

Да убѣли́тся вся́кое земно́е естество́, отъ паде́нія ны́нѣ на не́бо возводи́мо, Имже бо вся соблюда́ются, Сло́вомъ, теку́щими струя́ми омы́вшеся, прегрѣше́ній пре́жнихъ убѣже́, пресвѣ́тло измове́но.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Терпи́ши, біе́мь и лю́те стру́жемь, слота́ми болѣ́зней окружа́емь, сла́вный Ерми́ле, Стратони́ка же наста́вникъ ко благоче́стія подвиго́мъ бы́лъ еси́, съ ни́мже и вопія́лъ еси́: свяще́нницы, благослови́те, лю́діе, превозноси́те Го́спода во вѣ́ки.

Непрекло́нніи мудрова́ніемъ, и до́бліи страда́ніемъ, и небе́сныхъ даро́въ досто́йніи, ка́меніе честно́е и вѣ́рныхъ предсто́лпія, ка́менію, повелѣ́ни бы́вше, не принесо́ша че́сти, Бо́гу вопія́ху, Влады́цѣ: лю́діе, превозноси́те Его́ во вѣ́ки.

Твоя́ ре́бра ноготьми́ стружа́ мучи́тель и мечи́ неми́лостивно ссѣка́я тя́, ума́ не укра́де, укрѣпле́на Боже́ственною любо́вію и Изба́вителя насмотря́юща добро́ту. Ему́же ны́нѣ со дерзнове́ніемъ предстоя́, взыва́еши: лю́діе, превозноси́те Го́спода во вѣ́ки.

Богоро́диченъ: Сы́й, по всему́ соверше́нъ и естество́мъ Непристу́пный, яви́ся присту́пенъ мнѣ́, пло́тію обложе́нъ изъ Тебе́, Неискусобра́чная, Его́же прилѣ́жно моли́ беззако́ній мои́хъ бре́мя расточи́ти и спасти́ пѣснопою́ща: свяще́нницы, благослови́те, лю́діе, превозноси́те Го́спода во вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Велича́йшій ли́къ, по́стническими доблестьми́ укра́шенъ, преподо́бныхъ дне́сь вся́ лико́вники боже́ственныя показу́етъ, восхваля́ющія у́бо того́, Христу́ же пою́щія: благослови́те, вся́ дѣла́ Госпо́дня, Го́спода.

Закла́ни бы́сте, я́коже а́гнцы, ва́рварскими мечи́ ссѣка́еми, и приведо́стеся соверше́нна закла́вшемуся Сло́ву заколе́нія и въ ски́ніихъ перворо́дныхъ всели́стеся, пѣснопою́ще: благослови́те, вся́ дѣла́ Госпо́дня, Го́спода.

На́зи, вся́кія су́ще сла́дости пра́отцы обнажи́вшаго, отцы́ преподо́бніи, злѣ́йшаго врага́ обнажи́сте: оде́жду же свяще́нну, я́ко пострада́вше, пріи́мше, сего́ въ сту́дъ, му́дріи, облеко́сте.

Богоро́диченъ: Отверза́ется па́ки Тебе́ ра́ди дре́вній ра́й, и въ о́нь вво́дится пре́жде осужде́нный человѣ́къ и обожа́ется и́стиннѣйше, Богоблагода́тная Чи́стая, человѣ́ковъ на обновле́ніе, вопію́щихъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

Увѣ́дѣхомъ Моисе́ю купино́ю явле́нная, гряди́, стра́нными уста́вы содѣ́ланная: я́ко бо спасе́ся, Огнь нося́щи, Дѣ́ва, Свѣтоно́сна ро́ждши Благодѣ́теля, во Іорда́нскихъ же струя́хъ явле́нна.

Помазу́еши, соверша́я человѣ́ческое существо́, Царю́ Безнача́льне, Ду́ха обще́ніемъ, струя́ми чи́стыми отмы́въ и тмы́ крѣ́пость же посра́мль возвы́шенную, ны́нѣ въ безпреста́ннѣмъ возда́ти житіи́.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Вѣ́триломъ, му́ченицы Христо́вы, му́къ преплы́вше пучи́ну, устреми́стеся ко приста́нищемъ поко́я, идѣ́же му́чениковъ ли́ки, пра́ведныхъ собо́ри, идѣ́же незаходи́мый Свѣ́тъ и ра́дость пра́зднующихъ въ Ду́сѣ.

Дне́сь па́мять свяще́нную страда́нія ва́шего, всеблаже́нніи, Це́рковь Христо́ва соверша́ющи, пра́зднуетъ ра́достный и свѣтоно́сный пра́здникъ, Бо́га велича́ющи, Вѣнцеда́вца ва́шего, велича́ющаго ва́съ я́ко уго́дники.

Взя́стеся къ пресвѣ́тлѣй свидѣ́тельства и́стинно высотѣ́, святíи, и воспрія́сте жела́нія кра́й, и́стинно, блаже́нніи, Ца́рствіе Бо́жіе пріе́мше недви́жимое, му́чениче Стратони́че съ Ерми́ломъ му́дрымъ и богоразу́мнымъ.

Богоро́диченъ: Пощади́ мя, Спа́се, рожде́йся и сохрани́вый Ро́ждшую Тя́ нетлѣ́нну по рождествѣ́, егда́ ся́деши суди́ти дѣла́ моя́, беззако́нія презира́я и грѣхи́ моя́, я́ко Безгрѣ́шенъ, я́ко Бо́гъ Ми́лостивъ и Человѣколю́бецъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Священносло́віи преподо́бными, свяще́нныя, пріиди́те, отцы́, въ Раи́ѳѣ и въ Сина́и пожи́вшія въ преподо́біи и благоче́стно пострада́вшія, велегла́сно велича́емъ.

Тѣ́ло и ду́шу Го́споду освяти́сте преподо́бно, воздержа́нія по́ты освяти́вшеся и кро́вными тече́ніи изсуши́вше ва́рварскія зло́бы мо́ре.

Богосія́нная ва́ша па́мять, восто́ками просвѣща́ема, за Христа́ ва́шихъ болѣ́зней помышле́нія всѣ́хъ, блаже́нніи, озаря́етъ благода́тію Вседѣ́теля и Боже́ственнаго Ду́ха.

Богоро́диченъ: Трепе́щутъ херуви́ми, зря́ще на ни́хъ неизглаго́ланнымъ сло́вомъ сѣдя́щаго Сло́ва, Ма́терними рука́ми Младе́нца держи́ма Твои́ми, Пресвята́я Влады́чице, вы́шши вся́кія тва́ри.

Свѣти́ленъ. Подо́бенъ: Ду́хомъ во святи́лищи.

Болѣ́зньми по́стничества злонача́льнаго змíя до конца́ уби́сте, при кончи́нѣ же вѣне́цъ муче́нія прія́сте, отце́въ похвало́ и му́чениковъ сла́ва, и́же въ Раи́ѳѣ и Сина́и всесвяще́нное мно́жество чу́дныхъ отце́въ.

Сла́ва, и ны́нѣ, пра́здника:

Свѣ́та незаходи́маго бы́сть настоя́щій де́нь: Христо́съ бо Истина пріи́де ны́нѣ и яви́ся. Псалмы́ Того́ досто́йно и пѣ́сньми воспои́мъ, я́ко Содѣ́теля же и Влады́ку. О, но́ваго та́инства! Ада́мовъ Творе́цъ во́лею Человѣ́къ яви́ся.

На стихо́внѣ стихи́ры, гла́съ 6. Подо́бенъ: Ангельскія.

Пріиди́те, и мы́ въ чу́вствѣ се́рдца притеце́мъ, вѣ́рніи, къ струя́мъ Іорда́нскимъ и, Христа́ ви́дѣвше, пло́тію креща́ема отъ Іоа́нна Предте́чи, ны́нѣ съ ни́мъ славосло́вяще, Тому́ возопіи́мъ: благослове́нъ, явле́йся Бо́же на́шъ, сла́ва Тебѣ́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Іессе́евъ ны́нѣ прозябе́ же́злъ, Боже́ственный Киво́тъ и ма́нны Прія́телище, изъ Него́же произы́де Цвѣ́тъ жи́зни Нетлѣ́нный: Его́же Іорда́нъ убоя́вся, и Іоа́ннъ, руко́ю прикосну́вся, Христу́ зовя́ше: благослове́нъ, явле́йся Бо́же на́шъ, сла́ва Тебѣ́.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

Воспо́йте пѣ́сни, небе́сныя си́лы, по́йте, человѣ́цы, и ра́дуйтеся согла́сно: се́ бо Влады́ка, Отчее сія́ніе, гряде́тъ къ струя́мъ Іорда́нскимъ, да крести́тся отъ раба́. Лю́діе, воззове́мъ: благослове́нъ, явле́йся Бо́же на́шъ, сла́ва Тебѣ́.

Сла́ва, гла́съ 8:

Блаже́нни есте́, преподо́бніи и му́ченицы Христа́ Бо́га: преподо́бніи у́бо я́ко пра́вды ра́ди изгна́стеся, му́ченицы же, я́ко ме́чь ва́съ не разлучи́ отъ любве́ Христо́вы. И сего́ ра́ди ра́дуетеся, я́ко мно́га мзда́ ва́ша на небесѣ́хъ.

И ны́нѣ, гла́съ то́йже:

Дне́сь тва́рь просвѣща́ется, дне́сь вся́ческая веселя́тся, небе́сная вку́пѣ и земна́я, а́нгели и человѣ́цы смѣша́ются, идѣ́же бо Царе́во прише́ствіе, и чи́нъ прихо́дитъ. Теце́мъ у́бо на Іорда́нъ и ви́димъ вси́ Іоа́нна, ка́ко креща́етъ Ве́рхъ Нерукотворе́нный и Безгрѣ́шный. Тѣ́мже, апо́стольскій гла́съ припѣва́юще, согла́сно возопіи́мъ: яви́ся благода́ть Бо́жія, спаси́тельная всѣ́мъ человѣ́комъ, озаря́ющая и подаю́щая вѣ́рнымъ ве́лію ми́лость.


НА ЛИТУРГІИ,

Блаже́нна, пра́здника пѣ́снь 8-я, на 4, и отце́въ пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Ри́мляномъ, зача́ло 99. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 24. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 193 об. – 202 об.

/ Къ оглавленію раздѣла /


Наверхъ / Къ титульной страницѣ

0