Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́нъ о́бщій Спа́су Христу́ и святы́мъ Симео́ну и Са́ввѣ.
Творе́ніе мона́ха Ѳеодо́сія. Гла́съ 6.

Пѣ́снь 1.

Ирмо́съ: Воздвиза́емое мо́ре немо́крыми нога́ми проходя́ дре́вле Изра́иль, егда́ ви́дяше погружа́ема го́рдаго фарао́на, ра́достно взыва́ше: пои́мъ Го́сподеви, сотво́ршему сла́вная чудеса́.

Іису́су: Внегда́ воззове́мъ, Го́споди, услы́ши ны́ и, оби́димыхъ, изба́виши ны́, гнѣ́ва Своего́ во́лны укроща́я, не преда́ждь на́съ нечести́выми поглоще́ны бы́ти, да не реку́тъ: гдѣ́ е́сть Христо́съ, Бо́гъ и́хъ? су́етно рабо́тая Ему́.

Мно́го, я́ко Христу́ иму́ще дерзнове́ніе, отъ бѣ́дъ жите́йскихъ, мо́лимся, и отъ сѣте́й вра́жіихъ на́съ изба́вите, облегча́юще бре́мя грѣхо́въ на́шихъ моли́твами свои́ми, Симео́не богоно́се и Са́вво свяще́нне, Христа́ моли́те.

Волну́еми страстны́хъ по́мысловъ бу́рею, ко приста́нищу моли́твъ ва́шихъ прибѣга́емъ, потопле́нія грѣхо́внаго изба́вите пою́щихъ ва́шу па́мять, отцы́, вѣ́рою се́рдца и души́ ра́достію.

Сла́ва: Тебѣ́, Го́споди, исповѣ́дуемъ, согрѣши́хомъ и беззако́нновахомъ, свяще́нницы же и лю́діе, вси́ вку́пѣ уклони́хомся, мно́га беззако́нія и крѣпки́ грѣхи́ на́ша, моли́твами святы́хъ Свои́хъ не отврати́ся на́съ за грѣхи́ на́ша.

И ны́нѣ, богоро́диченъ: Не умолчу́ вопи́ти яснѣ́йше вели́чія Твоя́: а́ще бо не Ты́, Отрокови́це, всегда́ предстоя́ла еси́, о мнѣ́ моля́щи Сы́на Твоего́, кто́ бы отъ толи́кія бу́ри и лю́тыхъ бѣ́дъ изба́вилъ мя́?

Пѣ́снь 3.

Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й, Себе́ предпожре́: яди́те, — вопія́, — Тѣ́ло Мое́ и вѣ́рою утверди́теся.

Іису́су: Госпо́дь, Сы́й, всѣ́мъ Зижди́тель, ру́цѣ Твои́ вся́ сотвори́ста и созда́ста, и, ра́звѣ Тебе́, нѣ́сть спаса́ющаго, дѣ́ло руку́ Твое́ю, не пре́зри на́съ, Еди́не, во бла́гости неизмѣ́нный и неизслѣ́димый въ щедро́тахъ.

Вни́зъ влеку́щія сла́вы, я́ко изъ сѣ́ти, исто́ргшеся, къ Боже́ственнѣй высотѣ́ смире́ніемъ свѣ́тло, преподо́бніи, возвы́сившеся, свѣти́льники свѣ́тлы яви́стеся, сердца́ на́ша моли́твами свои́ми ко Христу́ просвѣща́йте.

Потемне́вшую мра́комъ е́реси пе́рвѣе, па́че со́лнца вѣ́рою Тро́ицѣ страну́ Се́рбскую просвѣти́вшіи, и на́съ у́бо грѣха́ нечистоты́ ко Христу́ ны́нѣ моли́твами свои́ми, Симео́не и Са́вво, омы́ти потщи́теся.

Сла́ва: Лю́діе зако́на и благода́ти, безъ зако́на су́щимъ уподо́бихомся, му́жіе кро́ве и льсти́ви бы́хомъ и стезю́, я́же на ны́ гнѣ́ва Твоего́, ше́ствовахомъ, Го́споди, моли́твами святы́хъ Свои́хъ не погуби́ на́съ по беззако́ніямъ на́шимъ.

И ны́нѣ, богоро́диченъ: Истинную Богоро́дицу исповѣ́дую, Влады́чице, Тя́, сме́рти держа́ву потреби́вшую: я́ко бо оживля́ющая, отъ у́зъ а́довыхъ къ животу́ возвела́ еси́ мя, въ зе́млю те́кшаго.

Сѣда́ленъ, гла́съ 4:

Шестокры́лыми и многоочи́тыми неви́димый и всѣ́ми непостижи́мый, Влады́ко, милосе́рдіемъ ми́лости сподо́бився на́мъ ви́дѣнъ бы́ти пло́тію, вѣ́дый не́мощь на́шу, я́ко въ ню́ обле́кшійся, поми́луй мно́го Ти́ согрѣши́вшихъ, пою́щихъ Тебе́ ра́бъ Твои́хъ, благопремѣ́нне Го́споди.

Пѣ́снь 4.

Ирмо́съ: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія, Ты́ бо моея́ нищеты́ не отве́рглся еси́.

Іису́су: Въ сердца́ на́ша я́ко прія́тъ стра́хъ Тво́й, Твои́мъ судо́мъ устро́иши, не гнѣ́вомъ же Твои́мъ, Долготерпѣли́ве, щедро́тами бо па́че о на́съ и кро́тостію ми́лость Свою́ прояви́ши, Человѣколю́бче.

Царю́ царе́й, Еди́ному Небе́сному, Его́же Ца́рствія рачи́теліе бы́вше, ца́рствіе земно́е оста́вивше, послѣ́довасте. Христа́, преподо́бніи, моли́те, ца́рствующаго въ на́съ, грѣхи́ до конца́ потреби́ти и ду́ши на́ша свободи́ти.

Егда́ на судѣ́ моли́твами свои́ми огня́ гее́нскаго изба́вите, душетлѣ́ніе ско́рби свободи́вше, рая́ вхо́дъ отве́рзти потщи́теся и та́мо су́щаго весе́лія наслѣ́дники покажи́те, Са́вво и Симео́не, пою́щихъ ва́съ.

Сла́ва: Мно́жествомъ дре́вле беззако́ній при Но́е су́щихъ потопи́лъ еси́, преестество́мъ грѣха́ содоми́ты запали́лъ еси́, Го́споди, моли́твами святы́хъ Свои́хъ такова́го нра́ва нечи́стаго изба́ви ду́ши на́ша и спаси́ ны.

И ны́нѣ, богоро́диченъ: Ка́ко изрещи́ Твоя́ по досто́инству возмогу́ безмѣ́рныя щедро́ты, о Влады́чице! Яже мою́ всегда́ ду́шу лю́тѣ оскорбля́емую, я́ко во́ды обыше́дшія? Но, о, Твоего́ про́мысла и благодѣя́нія, его́же безу́мно окая́нный погуби́хъ!

Пѣ́снь 5.

Ирмо́съ: Отъ но́щи пѣ́снь возсыла́емъ Тебѣ́: вознизпосли́ на́мъ ми́лость Твою́, Го́споди, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Іису́су: Изъ но́щи злы́хъ дѣ́лъ мои́хъ, отъ мглы́ лю́тыя грѣ́хъ ра́ди уны́нія, псало́мски, свѣ́та Пода́телю, Бо́же, Бо́же мо́й, къ Тебѣ́ у́тренюю и извести́ ду́шу мою́ молю́ся, приклони́ у́хо Твое́ къ моле́нію моему́.

И высоту́ благоро́дія и златопоя́санныхъ оста́вивше, въ пусты́нѣ жи́ти изво́лили есте́, ве́сь бо мíръ преоби́димъ е́сть, и́мже еди́нъ Бо́гъ жела́емъ.

Грѣха́ отбѣ́гнути и слеза́ми умили́тися, стена́ти же покая́ніемъ, моли́твами свои́ми на́съ удосто́йте, я́ко избѣ́гнути бу́дущія болѣ́зни, егда́ слеза́ не бу́детъ при́нята и стена́ніе бу́детъ преоби́димо.

Сла́ва: Не на́мъ, Го́споди, не на́мъ изліе́ши ча́шу гнѣ́ва Твоего́, мы́ бо, лю́діе Твои́ христоимени́тіи, а́ще и согрѣши́хомъ, бо́гу ино́му не послужи́хомъ, моли́твами святы́хъ Твои́хъ.

И ны́нѣ, богоро́диченъ: Кíй Тебѣ́ да́ръ принесу́ благодаре́нія, за я́же наслади́хся Твои́хъ дарова́ній и Твоея́ безмѣ́рныя благосты́ни? Тѣ́мже у́бо сла́влю, пѣсносло́влю и велича́ю Твою́ неизрече́нную ко мнѣ́ ми́лость.

Пѣ́снь 6.

Ирмо́съ: Возопи́хъ всѣ́мъ се́рдцемъ, Го́споди, злы́ми дѣ́лы одержи́мь, возведи́, молю́ся, изринове́на отъ тли́, Тя́ бо помяну́хъ, Спа́се, и возвесели́ся се́рдце мое́.

Іису́су: Сѣки́ра, я́же при ко́рени, сме́рть сѣку́щая, прибли́жися, дре́ву непло́дному претя́щая сожже́ніемъ, вострепещи́, душе́ моя́, и ты́, се́рдце мое́, потряси́ся, плоды́ покая́нія принеси́, вопію́щи: пощади́ мя, Го́споди, и спаси́ мя.

Не помина́юще зла́, и́миже Бо́га прогнѣ́вахомъ, о на́съ, преподо́бніи, умоли́ти Его́ потщи́теся, презрѣ́ти согрѣше́нія и въ покая́ніе привести́: не хо́щетъ бо сме́рти грѣ́шныхъ жи́зни Пода́тель.

Съ чи́ны небе́сными Влады́цѣ Христу́ я́ко предстоя́ще, съ ни́ми, преподо́бніи, моли́теся благовре́менно житіе́ пода́ти, умно́жити же плоды́ добродѣ́телей, Са́вво и Симео́не, пою́щихъ ва́шу па́мять.

Сла́ва: Твои́мъ, Го́споди, убѣжде́нъ милосе́рдіемъ, приклони́ у́хо Твое́ на моли́тву на́шу, люде́й на́шихъ въ правовѣ́ріи соблюди́ и Це́рковь си́лою Свое́ю утверди́, прости́ на́мъ вся́ согрѣше́нія моли́твами святы́хъ Твои́хъ.

И ны́нѣ, богоро́диченъ: Обыдо́ша мя́ жите́йскія бу́ри, я́ко пче́лы со́тъ, Дѣ́во, и мое́ содержа́щія се́рдце уязвля́ютъ стрѣ́лы скорбе́й: но да обря́щу Тя́ помо́щницу, и гони́тельницу, и изба́вительницу, Всепречи́стая.

Пѣ́снь 7.

Ирмо́съ: Яви́ся на ны́ благода́ть Твоя́, Спа́се, и свѣ́тъ Креста́ Твоего́ возсія́ мíрови: благослове́нъ еси́, Го́споди, Бо́же оте́цъ на́шихъ.

Іису́су: Боже́ственнымъ Свои́мъ, Го́споди, призрѣ́ніемъ при́зри на ны́, лю́ди Твоя́, и вонми́ мольбѣ́ ра́бъ Твои́хъ, Человѣколю́бче, и изба́ви на́съ грѣха́ сме́рти душегу́бныя, и супроти́вныхъ нахо́да, и вся́каго муче́нія.

Нетлѣ́нную сла́ву прія́сте на небесѣ́хъ, на земли́ же па́мять ва́шу ублажа́емъ, Симео́не и Са́вво достохва́льніи, о́въ бо мѵропода́теленъ, другíй же чи́стъ и благоуха́ненъ, о́ба ко Христу́ моли́твами на́съ спаси́те.

Егда́ престо́лы поста́вятся и кни́ги дѣ́лъ отве́рзутся, ко́злищъ у́части, грѣ́шныхъ стоя́нія изба́вити, овца́мъ же десны́мъ святы́мъ Его́ причти́ти, преподо́бніи, Христу́ Царю́ моли́теся пою́щихъ ва́шу па́мять.

Сла́ва: Бо́гъ ми́лостивъ и ще́дръ, Бо́гъ ревни́въ и наказа́ющь, мно́го у Тебе́ ми́лости, мно́го же и осужде́нія, на ли́ца не взира́еши, коему́ждо по дѣло́мъ его́ су́диши, моли́твами святы́хъ Твои́хъ не преда́ждь на́съ пра́ведному Твоему́ суду́.

И ны́нѣ, богоро́диченъ: Ви́ждь ми́лостивымъ о́комъ Твои́мъ, и посѣти́ озлобле́ніе, е́же и́мамъ, и лю́тыхъ напа́стей, и вре́да, и бѣ́дъ, и отъ искуше́ній мя́ изба́ви безмѣ́рною ми́лостію Твое́ю.

Пѣ́снь 8.

Ирмо́съ: Угрожа́й ца́рь иногда́ ю́ношамъ, пе́щь угото́ва, и непови́ннымъ повелѣ́ вве́рженнымъ бы́ти, исповѣ́дающимъ Бо́га препросла́вленнаго, Его́же благословя́тъ творе́нія всея́ тва́ри во вѣ́ки.

Іису́су: Тѣ́ло зло́биво, души́ сопроти́вно, пренечи́сто имѣ́я, всѣ́мъ житіе́ блу́дно исхода́тайствовавъ, бѣсо́мъ жили́ще себе́ поста́вихъ, и́же при́сно уби́ти мя́ поуча́ются, къ Тебѣ́, Го́споди, прибѣга́ю: въ руку́ Твое́ю дыха́ніе всея́ тва́ри.

Мно́гихъ удиви́сте, ева́нгельски Христу́ послѣ́довавше, поще́ніемъ же и смире́ніемъ оби́льно въ пусты́нѣ обогати́стеся, Симео́не блаже́нне и Са́вво свяще́нне, дво́ице святодуше́вная, Тро́ицѣ ны́нѣ о на́съ моли́теся.

Вся́, я́же на земли́, оста́вивше, всѣ́хъ Царю́, Христу́, усе́рдно послѣ́довасте, тѣ́мъ на небесѣ́хъ вы́шняго Іерусали́ма гра́ждане ва́съ досто́йно всели́лъ е́сть, идѣ́же чту́щихъ ва́съ усе́рдно, а́ще и вели́ко е́сть проси́мое, въ свое́ покрови́тельство пріими́те.

Сла́ва: Ме́чь, блиста́ющь съ небе́съ, упи́вшійся кро́вію, и се́рпъ летя́щь, я́же ви́дѣ проро́къ, — гнѣ́въ Тво́й, Го́споди, на согрѣша́ющія и до возме́здія сме́рти необрати́мыхъ, я́ко Ми́лостивъ и Благоутро́бенъ, отврати́ отъ на́съ моли́твами святы́хъ Свои́хъ.

И ны́нѣ, богоро́диченъ: Ра́дуйся, престо́ле огнеобра́зный Госпо́день; ра́дуйся, Боже́ственная и маннопріе́мная ру́чко; ра́дуйся, златы́й свѣти́льниче, свѣще́ неугаси́мая; ра́дуйся, дѣ́вамъ сла́во и ма́теремъ украше́ніе и похвало́.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те, наслади́мся, возше́дша Сло́ва, отъ Сло́ва научи́вшеся, Его́же велича́емъ.

Іису́су: Стра́нствующа мя́ за́повѣди преступле́ніемъ, пло́ти прія́тіемъ Ты́, Влады́ко, ми́лостивно Себѣ́ пріедини́лъ еси́, и безсме́ртныя трапе́зы соо́бщника мя́ прія́лъ еси́, и вѣ́рою, Сло́ве, насади́лъ еси́: пою́ Твою́ безмѣ́рную ми́лость.

Мно́жество согрѣше́ній исповѣ́дающе, се́рдце и уста́ оскверни́хомъ, глубину́ беззако́нія открыва́юще, и возду́хъ нечистото́ю помрачи́хомъ, Тебѣ́, Го́споди, си́хъ очисти́телю, вопіе́мъ: Твоя́ есмы́ тва́рь, поми́луй на́съ вели́кія ра́ди ми́лости Твоея́.

Кто́ не диви́тся и кто́ не сла́витъ Твое́, Влады́ко, долготерпѣ́ніе: презрѣ́ беззако́нія, и, преступа́я непра́вды, премину́еши нече́стіе, и, всѣ́ грѣхи́ на́ша обраща́я, ми́луеши, и гнѣ́ва не наво́диши, кто́ изглаго́летъ щедро́ты Твоя́?

Сла́ва: Кто́ е́сть Бо́гъ, я́ко Ты́, Бо́гъ на́шъ, Его́же небеса́ со а́нгелы ужаса́ются и земля́ съ человѣ́ки потряса́ется, бе́здны смуща́ются, и а́дъ испромеща́ется, вся́ тва́рь со стра́хомъ измѣня́ется, кто́ изглаго́летъ си́лы Твоя́?

И ны́нѣ, богоро́диченъ: Моле́ніе мое́ пріими́ убо́гое и пла́ча моего́ не пре́зри, и сле́зъ, и стена́нія; но заступи́ мя, я́ко Блага́я, и проще́нія испо́лни: мо́жеши бо вся́, я́ко Всемо́щнаго Влады́ки Бо́га Ма́ти, а́ще возмога́еши то́кмо моему́ окая́нному смире́нію.

Моли́тва.

О, свяще́нная главо́, пресла́вный чудотво́рче, святи́телю Христо́въ Са́вво, Се́рбскія земли́ первопресто́льниче, храни́телю и просвѣти́телю, всѣ́хъ же христіа́нъ благонаде́жный предъ Го́сподемъ предста́телю! Тебѣ́ припа́даемъ и мо́лимся: да́ждь на́мъ бы́ти прича́стникомъ любве́ твоея́ къ Бо́гу и бли́жнему, е́юже при жи́зни свята́я душа́ твоя́ преиспо́лнена бы́сть. Озари́ на́съ и́стиною, просвѣти́ у́мъ и се́рдце на́ше свѣ́томъ Боже́ственнаго уче́нія, научи́ на́съ тебѣ́ подража́ти вѣ́рно, Бо́га и бли́жняго на́шего люби́ти и за́повѣди Госпо́дни соверша́ти непогрѣши́тельно, да бу́демъ и мы́ ча́да твоя́, не по и́мени то́кмо, но всѣ́мъ житіе́мъ на́шимъ. Моли́ся, святы́й архіере́ю, о святѣ́й Правосла́внѣй Це́ркви и оте́чествѣ твое́мъ земнѣ́мъ, при́сно тя́ любо́вію чту́щемъ. При́зри благоутро́бно на вся́ку ду́шу вѣ́рныхъ твои́хъ чти́телей, ми́лости и по́мощи твоея́ и́щущихъ, бу́ди всѣ́мъ на́мъ въ болѣ́знехъ цѣли́тель, въ ско́рбехъ утѣ́шитель, въ печа́лехъ посѣти́тель, въ бѣда́хъ и ну́ждахъ помо́щникъ, въ ча́съ же сме́ртный ми́лостивый покрови́тель и защи́титель, да по́мощію моли́твъ твои́хъ святы́хъ, сподо́бимся и мы́ грѣ́шніи спасе́ніе вѣ́рное получи́ти и Ца́рствіе Христо́во унаслѣ́довати. Ей, свя́тче Бо́жій, не посрами́ упова́нія на́шего, е́же на тя́ крѣ́пко возлага́емъ, но яви́ на́мъ твое́ многомо́щное заступле́ніе, да сла́вимъ и пое́мъ ди́внаго во святы́хъ Свои́хъ Бо́га, Отца́ и Сы́на и Свята́го Ду́ха, всегда́, ны́нѣ и при́сно и во вѣ́ки вѣко́въ. Ами́нь.

Источникъ: Мине́я Янва́рь. Ча́сть пе́рвая. — М.: Издательскій совѣтъ Русской Православной Церкви, 2002. — С. 477 – 484.

/ Къ оглавленію раздѣла /


Наверхъ / Къ титульной страницѣ

0