Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны о́бщіи, на о́смь гласо́въ, преподо́бнымъ и богоно́снымъ отце́мъ на́шимъ, Симео́ну но́вому мѵрото́чцу, и святи́телю Са́ввѣ чудотво́рцу, учи́телемъ Се́рбскимъ.
Творе́ніе Ѳеодо́сія и́нока и пресви́тера, монастыря́ нарица́емаго Хиланда́ра.

Кано́нъ о́бщій преподо́бному Симео́ну и святи́телю Са́ввѣ, ему́же краегране́сіе сицево́: Го́споди, просвѣща́я слѣпцы́, Ты́ мя просвѣти́. Гла́съ 2.
Пѣ́снь 1.

Гряди́те, вѣ́рніи, духо́внѣ веселя́щеся, восхва́лимъ до́брыя засту́пники на́ша, разгна́вшіи мра́къ преле́стный, и просвѣ́щше си лю́ди, я́же прія́ша отъ руки́ Христа́ Бо́га, я́ко спаси́тели.

Умнаго свѣти́льника, Симео́на, незаблу́дна вожда́ иму́ще, послѣ́дуимъ вопію́щу: пріиди́те, ча́да, послу́шайте мене́. Стра́хомъ Госпо́днимъ и любо́вію содержа́щеся, пріи́мете оставле́ніе согрѣше́ній, и́хже содѣ́ясте.

Сла́ва: Са́вву, вели́каго архіере́я, не нае́мника, но и́стиннаго па́стыря, поло́жшаго ду́шу о овца́хъ, и тѣ́хъ ра́ди мно́гія ско́рби претерпѣ́вша, воспѣва́юще мо́лимъ, глаго́люще: и на́съ во огра́дѣ твое́й невреди́мы соблюди́, и спасе́нны предста́ви Пастыренача́льнику Христу́.

И ны́нѣ, богоро́диченъ: Помо́щницу вѣ́рныхъ и наде́жду отча́яннымъ, Тебе́ мо́лимъ, Влады́чице, Бо́га ро́ждшую: разрѣше́ніе пода́ждь злы́хъ, одержа́щихъ на́съ, и та́мо не осужде́нно предста́ви, Сы́на Твоего́ и Бо́га, стра́шному суди́щу Христо́ву.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Утвержде́ніе церко́вное, и забра́ло вѣ́рнымъ, Са́вву архіере́я, о́бразъ смире́нія и́ночествующимъ, преподо́бнаго Симео́на, гла́сы пѣ́сней духо́вныхъ вѣнча́имъ, я́ко фи́никсы, псало́мски процвѣ́тшія, во дво́рѣхъ благода́ти Отца́ Небе́снаго.

До́бляго во бра́нѣхъ чу́вственныхъ и крѣ́пльша во смире́ніи Симео́на я́вльшася, неви́димыхъ вра́гъ горды́ню кре́стною си́лою побѣ́ждшаго, моля́ще припа́даемъ, глаго́люще: ста́до твое́, о́тче, нера́туемо и во еди́нствѣ соблюди́.

Сла́ва: Иже на́съ ра́ди Христа́ смири́вшагося, усе́рдно кре́стъ взе́мъ, Са́вво, послѣ́довалъ еси́, оста́вивъ мíру погреба́ти своя́ мертвецы́. Тѣ́мже вели́кія сла́вы Того́ и благода́ти сподо́би тя́, святи́теля, посыла́етъ своеплеме́ннымъ лю́демъ, Ца́рствіе Бо́жіе возвѣща́юща.

И ны́нѣ, богоро́диченъ: Подъ Твое́ крѣ́пкое заступле́ніе прибѣга́юще, наде́жды на́шея да не отпаде́мъ, Богоро́дице Пречи́стая, но да пріи́мемъ облегче́ніе страсте́й, востаю́щихъ на ны́, Ты́ бо всѣ́мъ еси́ спасе́ніе, хва́лящимъ Тя́.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Ра́дуйся, ко́рене благочести́вый Симео́не, израсти́вый вѣ́твь доброцвѣту́щую, Са́вву архіере́я, насыща́юща плодо́мъ уче́ній правосла́вныхъ сердца́, вѣ́рнаго ста́да ва́шего, и соверша́юща во́зрастъ духо́внаго обновле́нія.

Умири́ во еди́нствѣ духо́внаго совокупле́нія на́ша разстоя́нія, Симео́не о́тче богоно́се, я́ко со дерзнове́ніемъ предстоя́ Миротво́рцу Христу́, Иже и вожда́ на́мъ Тебе́ да́вшему, смотри́тельнѣ вся́ дѣ́йствующа на спасе́ніе на́ше и обновле́ніе.

Сла́ва: Священнонача́льниковъ удобре́ніе, вѣ́рѣ утвержде́ніе, до́брый па́стырю и вождю́, Са́вво о́тче на́шъ, не оста́ви воста́ти на ны́ волко́мъ, ста́да не щадя́щимъ, ниже́ въ на́съ обрѣсти́ся стро́потная творя́щихъ или́ глаго́лющихъ. Да въ тишинѣ́ сла́вимъ Го́спода, спа́сшаго на́съ и обно́вльшаго.

И ны́нѣ, богоро́диченъ: Взыва́емъ Тебѣ́ въ нощи́ и во дни́, неключи́міи раби́ Твои́, Бо́га ро́ждшей: соблюди́ отъ прило́гъ вра́жіихъ, Влады́чице, оби́тель, ю́же Са́вва и Симео́нъ соста́виша, Твои́ служи́тели, и на Тебе́ прело́жше, всѣ́хъ Спаси́тельницу и Обновле́ніе.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Яко добродѣ́телей сокро́вища и о́бразъ богоуго́днаго житія́, Симео́на и Са́вву достодо́лжно похва́лимъ, просвѣти́ша бо во тмѣ́ лежа́щихъ и спасо́ша заблу́ждшихъ, и къ ни́мъ притека́юще, страсте́й на́шихъ облегче́ніе пріе́млемъ.

Щедро́тамъ пучи́ну, Симео́на, и изсуша́ющу рѣ́ки прегрѣше́ній, и смире́нія глубину́, возводя́щую на высоту́ небе́сную, въ себѣ́ стяжа́вша, досто́йно ублажа́емъ; си́ма бо крыло́ма впери́вся Ду́хомъ Святы́мъ, возлетѣ́въ, почи́лъ е́сть у Христа́, прося́ на́мъ прегрѣше́ній избавле́нія.

Сла́ва: Ааро́ну подо́бнаго, Са́вву святи́теля восхва́лимъ, уста́ бы́вшаго, безмо́лвіемъ входя́щему въ видѣ́ніе благоразу́мія, кро́ткому отцу́ своему́, и людска́я стремле́нія носи́вша и разсуди́вшаго, не тельца́ же подо́біе, но Жива́го Бо́га о́бразъ тѣ́мъ показа́вшаго.

И ны́нѣ, богоро́диченъ: Еди́на во тмѣ́ невѣ́дѣнія су́щимъ Воззва́ніе, и Просвѣще́ніе, и незаблу́дная Води́тельница, Ты́ мя́ просвѣти́ омраче́ннаго и наведи́ на стезю́ спасе́нія, и тмы́ несвѣ́тлыя, и че́рвія неусыпа́ющаго, Богоро́дице, исхи́ти: кромѣ́ бо Тебе́, ину́ю Помо́щницу не и́мамъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Свѣти́льника вели́каго и́ночествующихъ, Симео́на воспое́мъ, во глубину́ смире́нія собо́ю пу́ть тѣ́мъ показа́вшаго. Са́вву ублажи́мъ архіере́я, и́же въ бе́зднѣ грѣхо́внѣй су́щія лю́ди отъ бу́ри душетлѣ́нныя къ Бо́гу возве́дшаго.

Любве́ Боже́ственныя бе́здною содержи́мь, Симео́не, неизрече́нными Христо́вы благода́ти обогати́вся дарова́ньми, и на́съ отъ пучи́ны вражды́ душегуби́тельныя въ любо́вь Бо́жію соедини́въ о Христѣ́, возведи́ моли́твами.

Сла́ва: Яко святи́теля, принося́ща Бо́гови же́ртвы безкро́вныя, мо́лимъ, Са́вво, раби́ твои́: уста́ви бра́ни на́ша чу́вственныя, и спасе́нны отъ глубины́ душевре́дныя, ко Го́споду возведи́ ны, моли́твами твои́ми.

И ны́нѣ, богоро́диченъ: Печа́льнымъ утѣ́ха, обурева́емымъ приста́нище, волну́ющагося помышле́ній стра́стныхъ въ пучи́нѣ, предвари́вши, окорми́ мя, Влады́чице Богороди́тельнице, и во приста́нище смире́нія возведи́ моли́твами Твои́ми.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Ца́рствіе настоя́щее сопроти́вно бу́дущему вмѣни́вше, высо́къ пла́мень ре́вности Боже́ственныя въ се́рдцѣ воспріе́мше, сіе́ оста́вльше и, кре́стъ взе́мше, Го́сподеви послѣ́довасте. Христо́съ же, я́ко благопослу́шнымъ Того́ ученико́мъ, простре́ ва́мъ дарова́нія духо́вная, Сы́й благослове́нъ и препросла́вленъ, Бо́гъ оте́цъ на́шихъ.

Еже по о́бразу непоро́чнѣ, Симео́не, соблю́лъ еси́, бла́гъ му́жъ, въ мíрѣ расточа́я и дая́ убо́гимъ, показа́ся, и пра́вда твоя́ во вѣ́ки пребыва́ющи, свидѣ́тельствовася; взе́мъ же кре́стъ и Христу́ послѣ́довавъ, въ по́двизѣхъ дѣ́йствуя, въ соверше́нное дости́глъ еси́.

Тве́рдостію благочести́ваго ра́зума лу́чшее, па́че ху́ждшаго избра́въ: любо́вь роди́тельскую, Са́вво, оста́вль, Христу́ послѣ́довалъ еси́, тѣ́мже тя́ и Боже́ственнымъ Его́ та́йнамъ строи́теля, ро́ду же и роди́телемъ, я́ко апо́стола, на престо́лѣ святи́теля, сы́на и́хъ судію́ и учи́теля, тѣ́мъ показу́етъ.

Сла́ва: Иму́ще дерзнове́ніе къ Бо́гу, я́ко и́стинніи Того́ уго́дницы, сопроти́вныхъ наше́ствія и междоусо́бныя бра́ни на́съ изба́вити, и пла́мене душевре́дныхъ страсте́й на́шихъ росо́ю духо́вною угаси́ти, Того́ умоли́те.

И ны́нѣ, богоро́диченъ: Ми́лостивно очище́ніе и непосты́дная моли́твенница бу́ди на́мъ, рабо́мъ Твои́мъ, Богоро́дице, и лю́таго пла́мене муче́нія изба́ви на́съ. Имаши бо Мило́стива, Тебе́ послу́шающа, Его́же родила́ еси́, Христа́, Иже росо́ю благода́ти Своея́ всѣ́хъ прохлажда́юща.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

Единомы́сленная дво́ице, Нераздѣ́льнѣй Тро́ицѣ предстоя́ще, проще́ніе на́шимъ согрѣше́ніямъ и стра́стнымъ дѣ́йствамъ умерщвле́ніе испроси́те, да зло́бы у́бо отве́ргшеся, добродѣ́тели же воспріе́мше, пое́мъ: благослови́те, вся́ дѣла́ Госпо́дня, Го́спода.

Плодови́тая ма́слина, Симео́не, вѣ́ры пра́востію показа́ся: ми́лостивъ бы́въ, ни́щихъ уще́дрилъ еси́, и во вре́мя благоча́діе Го́сподеви прине́съ; мíра отрече́ся, стра́сти же умертви́въ, до́мъ благода́ти бы́въ, и отъ честны́хъ моще́й мѵ́ро благово́нія источа́я, весели́ши ду́ши на́ша.

Сла́ва: Ра́слъ богосожде́нная, тезоимени́тнѣ нарече́ся: цвѣ́тъ бо ю́ности, Са́вво, Бо́гови оста́вивъ, возше́лъ еси́ въ духо́вный во́зрастъ добродѣ́телей дѣя́ньми. Те́рніе же зло́бы искорени́въ, лозу́ вѣ́ры насади́лъ еси́, и рѣка́ми твои́хъ уче́ній напая́ема, до́мъ рая́ богоразу́мія простре́ся.

И ны́нѣ, богоро́диченъ: Умертви́ сла́сти пло́ти моея́, Влады́чице, и уста́ви стра́стная помышле́нія ума́ моего́, и во гро́бѣ забве́нія лежа́щую ду́шу мою́ воскреси́, твори́ти благоуго́дныя во́ли Сы́на Твоего́ и Бо́га. Тебе́ бо имѣ́ю наде́жду, ожи́вльшую и испра́вльшую естество́ ро́да на́шего, Богоро́дице.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Служи́тели ва́ша свы́ше назира́юще, изба́вите неви́димыхъ вра́гъ и лука́выхъ человѣ́къ озлобле́нія: служи́телю та́йнамъ Христо́вымъ, Са́вво святи́телю; и́нокомъ удобре́ніе, Симео́не богоно́се, да отъ бѣ́дъ изба́вльшеся, любо́вію ва́съ возвели́чимъ.

Вѣ́рѣ утвержде́ніе, Це́рквамъ соедине́ніе, царе́мъ побѣ́ду на сопроти́вныя, и смире́ніе пода́ти, моли́теся, богохрани́мому ста́ду ва́шему, о не́мъ же труди́стеся: ва́съ бо въ бѣда́хъ ско́рое избавле́ніе и́мамы и те́плыя моли́твенники ко Христу́, Его́же велича́емъ.

Ярости и преще́нія лю́таго, и во а́дѣ муче́нія, рабо́мъ твои́мъ, тебе́ предста́теля иму́щимъ и хода́тая къ Бо́гу, Симео́не о́тче на́шъ, моли́ изба́витися, и жи́зни сподо́битися во оби́телехъ пра́ведныхъ, идѣ́же и са́мъ весели́шися о Христѣ́, Его́же велича́емъ.

Сла́ва: Тала́нтъ, его́же отъ Бо́га пріе́мь, усугу́билъ еси́, до́лгъ же, пріобрѣ́теніе Влады́цѣ дерзнове́ніемъ, глаго́ля, прине́слъ еси́: се́ а́зъ, и лю́діе Твои́, и́хже вручи́лъ ми́ еси́. Тѣ́мже и небе́снаго гла́са сподо́бися, вводя́ща благíя и вѣ́рныя рабы́ въ ра́дость вѣ́чную, ея́же и на́мъ, о́тче Са́вво, моли́ сподо́битися.

И ны́нѣ, богоро́диченъ: Иже херуви́момъ на ра́мѣхъ Сѣдя́щаго, понесла́ еси́, Дѣ́во, на пречи́стую руку́ Твое́ю, и́хже милосе́рдно къ Нему́ просте́рши, Ма́тернимъ дерзнове́ніемъ умоли́, изъ руки́ изба́вити на́съ, борю́щихъ ны́, и рукописа́нія грѣ́хъ на́шихъ расто́ргнути, Тебе́ велича́ющихъ.

Источникъ: Кано́ны на о́смь гласо́въ, преподо́бныхъ и богоно́сныхъ отец́ъ на́шихъ, Симео́на и Са́ввы Се́рбскихъ. — Вене́ція: Въ Тѵпогра́фіи Грекоправосла́вной Дими́трія Ѳеодосіе́ва Іоанни́нскаго, 1776. — С. 17-28.

/ Къ оглавленію раздѣла /


Наверхъ / Къ титульной страницѣ

0