Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны о́бщіи, на о́смь гласо́въ, преподо́бнымъ и богоно́снымъ отце́мъ на́шимъ, Симео́ну но́вому мѵрото́чцу, и святи́телю Са́ввѣ чудотво́рцу, учи́телемъ Се́рбскимъ.
Творе́ніе Ѳеодо́сія и́нока и пресви́тера, монастыря́ нарица́емаго Хиланда́ра.

Кано́нъ о́бщій преподо́бному Симео́ну и святи́телю Са́ввѣ. Гла́съ 1.
Пѣ́снь 1.

Преукраше́нны Боже́ственною благода́тію, Симео́нъ преподо́біемъ и Са́вва священнонача́льствіемъ, всѣ́хъ созыва́ютъ къ добродѣ́тели вѣ́рныхъ. Начина́юще дѣя́ньми и восходя́ще видѣ́ньми, съ ли́ки и похвала́ми, пою́ще Еди́ному Бо́гу на́шему: сла́вно бо просла́вися.

Преукраше́нъ смиренному́дріемъ, и́ночествующихъ мно́жества, богоно́се Симео́не преподо́бне, собра́лъ еси́ къ весе́лію духо́вному, показу́я тѣ́мъ пу́ть добродѣ́телей въ трудѣ́хъ и по́двизѣхъ, тебе́ Просла́вльшему, пою́ще Бо́гу на́шему: сла́вно бо просла́вися.

Сла́ва: Преукраше́нъ свяще́нства оде́ждею, всю́ свѣ́тлу и боголѣ́пну, Са́вво, це́рковь твою́ показа́лъ еси́, испо́лненну совокупле́ньми вѣ́рныхъ, утвержде́нну уче́ніи твои́ми, съ вѣ́рою и пѣ́сньми духо́вными пою́ще Еди́ному Бо́гу на́шему: сла́вно бо просла́вися.

И ны́нѣ, богоро́диченъ: Преукраше́нна Боже́ственною сла́вою и, я́ко Цари́ца, Дѣ́во, предстоя́щи одесну́ю Царя́ и Бо́га, не преста́й моля́щи сохрани́ти невреди́мо ста́до Сы́на Твоего́, е́же собра́ Симео́нъ и Са́вва о и́мени Твое́мъ, Богоро́дице.

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Содѣ́тель и Содержи́тель вся́ческихъ недви́жимо и неразори́мо подаде́ утвержде́ніе Це́ркви Свое́й Христо́съ: Симео́на преподо́бнаго, и Са́вву святи́теля, Иже еди́нъ Свя́тъ и прославля́яй святы́хъ Свои́хъ.

Содѣ́телю и Творцу́ вся́ческихъ, престо́лу предстоя́ Бо́га, о́тче Симео́не, моли́ утверди́тися на́мъ недви́жимымъ прило́ги вра́жіими, да въ тишинѣ́ сла́вимъ еди́наго Свята́го и во святы́хъ Почива́ющаго.

Сла́ва: Содѣ́теля и Промы́сленника всѣ́хъ не преста́й моля́ о ста́дѣ твое́мъ, сохрани́ти сіе́ отъ нападе́ній сопроти́вныхъ и отъ вре́да ересе́й, и утверди́ти е́, Са́вво, въ правосла́вныхъ преда́ніихъ твои́хъ.

И ны́нѣ, богоро́диченъ: Содѣ́тельная и содержи́тельная вся́ческихъ Бо́жія Му́дрость и Си́ла, хра́мъ Себѣ́ созда́ отъ пречи́стыхъ крове́й Твои́хъ. Его́же моли́, Богоро́дице, хра́мы показа́ти на́съ Того́ благода́ти и напои́ти ча́шею весе́лія, растворе́нною Ду́хомъ Святы́мъ, и утверди́ти на столпѣ́хъ вѣ́ры святы́я во́ли Его́.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Глаго́ланьми святы́ми, уче́ніи ва́шими всѣ́хъ научи́ли есте́ покланя́тися Бо́гу, Творцу́ всѣ́хъ, и Воплоще́нному, Иже отъ Дѣ́вы, Сло́ву Отчу, и исповѣ́дати Ду́ха Свята́го съ весе́ліемъ, си́лою и Божество́мъ Си́мъ не разлу́чна.

Глаго́ломъ Спа́совымъ повину́яся, вся́, я́же на земли́, расточи́въ, сокро́вище во свѣ́тѣ пребыва́ющемъ себѣ́ собра́лъ еси́, и, взе́мъ кре́стъ, съ весе́ліемъ Тому́ послѣ́довалъ еси́, вопія́: си́лѣ Твое́й сла́ва, Человѣколю́бче.

Сла́ва: Глаго́лы твои́ проро́честіи, изыдо́ша во всю́ зе́млю въ сердца́ вѣ́рныхъ, и въ концы́ вселе́нныя во исправле́ніе житія́, и въ Тро́ицѣ, Со́лнцѣ пра́веднѣмъ, полага́ютъ селе́ніе вѣ́ры своея́. Отъ нача́тка бо небе́съ, и до коне́цъ земны́хъ, вся́ испо́лнь сла́вы Ея́, и вся́къ вѣ́рный просвѣща́ется держа́вою Ея́.

И ны́нѣ, богоро́диченъ: Глаго́ломъ проро́ческимъ послѣ́дующе, две́рь небе́сную, и го́ру присѣ́нную, вои́стинну Богоро́дицу Тя́ имену́емъ, и́бо зно́емъ грѣхо́внымъ распала́емы, къ Тебѣ́ прибѣга́юще, прохлажда́емся, и Тобо́ю вхо́димъ во врата́ ра́йская, ору́жіемъ пла́меннымъ не ктому́ возбраня́еми.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Боже́ственную и неувяда́ющую добро́ту добродѣ́телей ва́шихъ воздая́ніемъ свидѣ́тельствуютъ: приснотеку́щее преподо́бнаго мѵ́ра излія́ніе, и цѣ́лость цвѣту́щая не разруше́нна тѣлесе́, отъ Боже́ственныя благода́ти возсія́вшаго, су́щимъ во тмѣ́ и сѣ́ни, я́коже со́лнце, первосвяти́теля.

Боже́ственную и пребыва́ющую добро́ту Ца́рствія Христо́ва, Симео́не, смотря́я, приснотеку́щій исто́чникъ сле́зный испуща́я, не преста́лъ еси́, отъ Боже́ственнаго же посѣще́нія, все́льшися въ тя́ благода́ть Ду́ха Утѣ́шителя, су́щимъ во тмѣ́ невѣ́дѣнія показа́ тя́ со́лнце.

Сла́ва: Боже́ственную и нераздѣли́мую держа́ву Святы́я Тро́ицы лю́демъ твои́мъ повѣ́дая, увѣ́рилъ еси́ покланя́тися Ѵпоста́сному и Соприсносу́щному Сло́ву Безнача́льнаго Отца́, отъ Отца́ же исходя́щему Ду́ху Свято́му, всѣ́хъ просвѣща́ющу, Трисія́нному Со́лнцу.

И ны́нѣ, богоро́диченъ: Боже́ственныя и неизрече́нныя добро́ты сла́вы Сы́на Твоего́, Богоро́дице, да не отпаде́мъ, но спо́доби мя́ тоя́ мольба́ми Твои́ми, правосла́вно исповѣ́дающа Тя́, отъ дѣ́вственныя утро́бы воплоще́нное, пра́ведное на́мъ возсія́вшую Со́лнце.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Морски́хъ глубиноро́дныхъ зміе́въ, многообра́зныхъ ересе́й, главы́ сокруши́ли есте́, гнѣздя́щихся въ вода́хъ, въ сердца́хъ и́хъ, благоче́стія не навы́кшихъ, и тѣ́хъ бра́шно, си́хъ восхи́тивше, Возгремѣ́вшему надъ вода́ми мно́гими, обро́ки Бо́гови принесли́ есте́.

Мо́ря жите́йскаго глубино́ю потопля́ющаго пре́лести, вну́трь, въ се́рдцѣ, воображе́ніемъ тридне́внаго Влады́ки погребе́нія, о́тче Симео́не, изше́дъ, яви́ся неврежде́нъ и спасе́нъ непреткнове́нно въ пусты́ни, поже́рлся еси́ со гла́сомъ хвале́нія Го́сподеви.

Сла́ва: Мо́ре, наводне́нное глубино́ю уче́ній правосла́вныхъ, о́тче Са́вво, яви́лся еси́, и тѣ́хъ напое́ньми спасе́нны показа́лъ еси́ о́вцы, тебѣ́ послѣ́дующія, въ ни́хже моли́ и на́съ утверди́ти невреди́ми, во смире́ніи благоче́стно рабо́тающе Го́сподеви.

И ны́нѣ, богоро́диченъ: Мо́ре грѣхороди́тельныхъ страсте́й, вну́треннихъ помышле́ній на́шихъ, уста́ви, Богоро́дице, воображе́ніемъ дѣ́вственнаго и пречи́стаго Рождества́ Твоего́, и спасе́нны покажи́ на́съ и тѣ́ми невреди́мы, да пѣ́сньми благода́рными воспѣва́емъ Тя́, Влады́чице.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Безсту́днаго нападе́нія же и я́рости безбо́жныхъ и зловѣ́рныхъ язы́къ, боже́ственными мольба́ми ва́шими на́съ избавля́юще, я́рость у́бо укроти́те, наси́лованіе же побѣди́те, богодохнове́нная святы́хъ преподо́бная и свяще́нная дво́ице, и весе́лымъ гла́сомъ сподо́бите воспѣва́ти посредѣ́ хра́ма ва́шего: препросла́вленный отце́въ на́шихъ Бо́же, благослове́нъ еси́.

Безсту́дному злохи́трству бѣсо́вскому и огню́ распаля́ющу страсте́й пло́ти на́шея, боже́ственнымъ покро́вомъ моли́твъ твои́хъ укрѣпи́ на́съ, о́тче Симео́не, проти́витися, трича́стное души́ очи́стивше, серде́чнымъ просвѣще́ннымъ чу́вствомъ воспѣва́ти: препросла́вленный оте́цъ на́шихъ Бо́же, благослове́нъ еси́.

Сла́ва: Безсту́дною горды́нею на ста́до твое́ подви́гшемуся, благоговѣ́ніемъ противля́яся, чудодѣ́йствіемъ я́рость укроти́лъ еси́. Сама́го же увѣ́рилъ еси́, богодохнове́ннымъ, Са́вво, язы́комъ вѣща́я, Тро́ицу правосла́внѣ почита́ти, во Отцѣ́ и Сы́нѣ и Ду́сѣ Святѣ́мъ, нераздѣ́льна Бо́га оте́цъ на́шихъ.

И ны́нѣ, богоро́диченъ: Безсту́днаго оклевета́нія возду́шныхъ лука́выхъ духо́въ, и огня́ муче́нія, ожида́юща грѣ́шныхъ, моли́твами Твои́ми, Дѣ́во Богоро́дице, изба́ви на́съ, сла́вящихъ Тя́, и́стинную Роди́тельницу, покланя́емому и сла́вимому со Отце́мъ и Ду́хомъ, Христу́, Бо́гу оте́цъ на́шихъ.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Пла́мень страсте́й на́шихъ погаси́ти слеза́ми умиле́нія сподо́бите, злочести́выя же и грѣ́шныя, паля́ща огня́ вѣ́чнующаго, моли́те, святíи, изба́витися на́мъ, живо́тнаго же исто́чника во оби́телехъ ва́шихъ наслажда́тися, воспѣва́ющимъ: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Пла́менемъ разже́гся любве́ Боже́ственныя, я́ростная движе́нія, преподо́бне Симео́не, до конца́ умертви́лъ еси́ воздыха́ньми умиле́нія, ангелоподо́бенъ ве́сь показа́лся на земли́. По тлѣ́ніи же сме́ртнѣмъ, исто́чникъ живы́й, мѵ́ро точа́щь благово́нно, яви́ся, возвеселя́я ча́да твоя́, пою́ща тебе́ просла́вльшаго Го́спода.

Сла́ва: Пла́мень любве́ роди́тельскія дерзнове́ннѣ, Са́вво, попра́лъ еси́, мíра и міродержи́теля усе́рдно избѣжа́въ, разжиза́нія же ю́ностная посто́мъ увяди́въ. Процвѣ́лъ еси́, я́ко дре́во при исхо́дищихъ духо́вныхъ, напая́емо вода́ми воздержа́нія, и во вре́мя пло́дъ подава́я, веселя́щь сердца́ воспѣва́ющихъ: Го́спода по́йте и превозноси́те во вся́ вѣ́ки.

И ны́нѣ, богоро́диченъ: Пла́мень страсте́й, разжига́ющь окая́нную пло́ть мою́, угаси́, Богоро́дице, те́плою по́мощію Твое́ю, и возжжи́ уга́сшій свѣти́льникъ се́рдца моего́ всеси́льнымъ Твои́мъ покро́вомъ, бо́дрствующа покажи́ мя, да не тле́ю грѣхо́вною сни́ду во а́дъ отча́янія и, ожи́вльши мя́ покая́ніемъ, возста́ви взыва́юща: Го́спода пое́мъ, изба́вленніи, и превозно́симъ во вся́ вѣ́ки.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Побѣди́сте есте́ственная сво́йства непоро́чнымъ святы́мъ житіе́мъ ва́шимъ: во пло́ти бо живу́ще, мíрови умертви́стеся. И, уме́рше, живота́ вѣ́чнующаго зна́менія на́мъ явля́ете: по сме́рти — чудодѣ́йствія, по погребе́ніи же — мѵ́ра исто́чники. И спаса́ете при́сно, Симео́не и Са́вво, и́же ва́съ почита́ющихъ.

Премѣня́ются естества́ уста́вы въ тебѣ́, о́тче богоно́се, дерза́етъ бо учи́ти во смире́ніи ю́ность, и зло́бою младе́нствуетъ въ высотѣ́ богоразу́мія ста́рость: по пло́ти бо оте́цъ сѣди́нѣ му́дростнѣй, ду́хомъ кро́тости сы́ну учени́къ бы́лъ еси́, и моли́твами твои́ми спаса́еши, Симео́не, почита́ющихъ тя́.

Сла́ва: Претвори́шася ве́щемъ сво́йства тобо́ю, Са́вво священнонача́льниче, сла́ва бо небреже́ся и смире́ніе вожделѣ́ся. За смире́ніе на престо́лѣ высо́цѣ учи́тель, и по сме́рти страсте́мъ цѣли́тель: спаса́еши на́съ и къ Бо́гу моли́твами твои́ми, при́сно восхваля́ющихъ тя́.

И ны́нѣ, богоро́диченъ: Побѣжде́нна мя́ страстьми́ мно́гими, лѣ́ностію и небреже́ніемъ, объяде́ніемъ и уны́ніемъ, тщесла́вію же рабо́тающа, и продерза́ніемъ, и я́ростію умерщвля́ема, испра́ви, Богоро́дице, къ стезя́мъ покая́нія и, бу́дущаго муче́нія исхити́вши, спаси́ мя, Тебе́ велича́юща.

Источникъ: Кано́ны на о́смь гласо́въ, преподо́бныхъ и богоно́сныхъ отец́ъ на́шихъ, Симео́на и Са́ввы Се́рбскихъ. — Вене́ція: Въ Тѵпогра́фіи Грекоправосла́вной Дими́трія Ѳеодосіе́ва Іоанни́нскаго, 1776. — С. 5-16.

/ Къ оглавленію раздѣла /


Наверхъ / Къ титульной страницѣ

0