Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 12-й де́нь.
Па́мять твори́мъ Пресвятѣ́й Влады́чицѣ на́шей Богоро́дицѣ, въ че́сть и па́мять явле́нія чудотво́рныя Ея́ ико́ны, имену́емыя «Млекопита́тельница».

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры Богоро́дицы на 8, гла́съ 6:

Велича́емъ Тя́, Богоро́дице Дѣ́во,* возвели́чившую ро́дъ на́шъ,* изъ Тебе́ бо воплоти́ся Изба́витель Госпо́дь* Имже Ада́мъ и Ева кля́твы свободи́вшася,* и отъ мра́чныхъ удо́лій во Еде́мъ па́ки вве́дшася,* Сы́й Бо́гъ на́шъ,* спаса́яй при́сно Тя́ велича́ющія. [Два́жды.]

Велича́емъ Тя́, Богоро́дице Дѣ́во,* Засту́пницу усе́рдную ро́да христіа́нскаго,* покро́вомъ ми́лости Твоея́* покрыва́ющую всю́ вселе́нную;* се́ бо ико́на Твоя́* чуде́съ мно́жество источа́етъ* и я́ко да́ръ Боже́ственъ* Це́ркви Христо́вой дарова́ся* бла́гостію Творца́, все́льшагося въ Тя́ пло́тію,* и пита́вшагося отъ сосе́цъ Твои́хъ я́ко Младе́нецъ,* Сы́й Предвѣ́чный Бо́гъ,* спаса́яй при́сно Тя́ велича́ющія. [Два́жды.]

Велича́емъ Тя́, Богоро́дице Дѣ́во,* я́ко одушевле́нный киво́тъ Божества́* и маннопріе́мную ста́мну,* позлаще́нную Ду́хомъ Святы́мъ:* ложесна́ бо Твоя́ престо́лъ Себѣ́ сотвори́* и отъ сосе́цъ Твои́хъ пита́тися изво́ли* Сы́й Бо́гъ на́шъ,* спаса́яй при́сно Тя́ велича́ющія.

Сла́ва, и ны́нѣ, гла́съ 6:

Отъ святы́я ико́ны Твоея́, Влады́чице Преблага́я, исцѣле́ній струи́ истека́ютъ, и́миже напая́ются благода́тно ду́ши на́ша и врачу́ются безме́здно тѣлеса́ на́ша, тѣ́мже Тя́, ми́лостивую Ма́терь и Млекопита́тельницу Спаси́теля на́шего, при́сно въ пѣ́снехъ велича́емъ.

Вхо́дъ. Проки́менъ дне́. [И чте́нія три́.]

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На стихо́внѣ стихи́ры, гла́съ 2. Самогла́сны:

Пресвята́я Ма́ти Бо́жія,* ка́ко Тя́ возблагодари́мъ досто́йно,* яко пресла́вно ико́ну Твою́ на́мъ яви́ла еси́* въ покро́въ и утѣше́ніе вѣ́рнымъ,* и въ защище́ніе оби́тели на́шея отъ вся́каго зла́,* и тоя́ свѣто́носнымъ явле́ніемъ* утверди́ла еси́ въ сердца́хъ на́шихъ* Правосла́вную вѣ́ру.

Сти́хъ: Слы́ши, Дщи́, и ви́ждь,* и приклони́ у́хо Твое́.

Влады́чице Преблага́я,* не забу́ди на́съ, смире́нныхъ,* вѣ́рно покланя́ющих[ся] Твое́й чудотво́рнѣй ико́нѣ* и умиле́нно на не́й созерца́ющихъ* млекопита́ніе Тобо́ю Христа́ Бо́га,* я́ко Младе́нца въ объя́тіяхъ Твои́хъ держи́маго.* Его́же моли́, Всеблага́я,* изба́вити ны́ скорбе́й вре́менныхъ и вѣ́чныхъ* и спасти́ ду́ши на́ша.

Сти́хъ: Помяну́ и́мя Твое́* во вся́комъ ро́дѣ и ро́дѣ.

О, Всепѣ́тая Ма́ти Дѣ́во,* преклони́ся ми́лостивно къ моли́твамъ на́шимъ,* предъ пречи́стымъ о́бразомъ Твои́мъ приноси́мымъ дне́сь,* покры́й на́съ ма́тернимъ Твои́мъ покро́вомъ отъ вся́каго зла́* и защити́ на́съ отъ искуше́ній вра́жіихъ,* да вси́ непреста́нно Тя́ велича́емъ.

Сла́ва, и ны́нѣ, гла́съ то́йже:

Ны́нѣ наста́ де́нь ра́достенъ, де́нь честна́го торжества́ Засту́пницы на́шея Влады́чицы Богоро́дицы, Яже явля́етъ на́мъ ико́ну Свою́ святу́ю въ покро́въ и утѣше́ніе. Сію́ у́бо обы́мемъ любо́вію серде́чною и, лобыза́я, рце́мъ изображе́ннѣй на не́й Млекопита́тельницѣ Спа́са на́шего: о Всеблага́я, сотвори́ ны́ досто́йны бы́ти такова́го да́ра ми́лости Твоея́, и чту́щихъ Тя́ всегда́ спаса́й отъ вся́кихъ бѣ́дъ, Богоро́дице Чи́стая и Неискусобра́чная.

Тропа́рь, гла́съ 3:

Безъ сѣ́мене отъ Боже́ственнаго Ду́ха, во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́, тѣ́мже не преста́й моли́ти изба́витися отъ бѣ́дъ душа́мъ на́шимъ.

Сла́ва, и ны́нѣ, и́нъ тропа́рь, гла́съ 1:

Ико́ну Твою́ боже́ственную, я́ко селе́ніе Твоея́ сла́вы, Млекопита́тельнице Дѣ́во, покланя́ющеся сла́вимъ, изъ тоя́ бо та́инственно то́чиши млеко́ невеще́ственныхъ даро́въ, пита́ющи и сердца́, и ду́ши, вѣ́рою вопію́щихъ: сла́ва вели́чію Твоему́, Чи́стая, сла́ва чудесми́ Твои́ми, сла́ва неизглаго́ланной къ на́мъ Твое́й бла́гости.


НА УТРЕНИ,
На Бо́гъ Госпо́дь: Тропа́рь, гла́съ 3: Безъ сѣ́мене.., два́жды. Сла́ва и ны́нѣ, и́нъ тропа́рь, гла́съ 1: Ико́ну Твою́.., еди́ножды.

По 1-й стихоло́гіи сѣда́ленъ, гла́съ 4:

Боже́ственною благода́тію осѣни́ Госпо́дь пречи́стый о́бразъ Тво́й, Влады́чице, и се́й содѣ́ла многоцѣле́бнымъ сокро́вищемъ свята́го Са́ввы молча́льницѣ въ Каре́и, слѣпы́я просвѣща́ти, разсла́бленныя укрѣпля́ти и вся́къ неду́гъ исцѣля́ти, да та́ко, прославля́я о́бразъ Тво́й, научи́тъ на́съ сла́вити и велича́ти Тя́, су́щую Богоро́дицу и Пита́тельницу жи́зни на́шея.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 6:

Яко звѣзда́ многосвѣ́тлая, ико́на Твоя́, Богоро́дице Дѣ́во, просвѣща́етъ на́съ благода́тію чуде́съ и созыва́етъ на́съ дне́сь сла́вити и воспѣва́ти многопѣ́тое и́мя Твое́, я́же мѵ́ро излія́нное для́ лю́бящихъ Тя́, вѣрныхъ Твоихъ рабо́въ. О, Госпоже́ Пречи́стая, мо́лимъ Тя́, не оста́ви на́съ Твои́мъ заступле́ніемъ въ ча́съ кончи́ны живота́ на́шего.

Сла́ва, и ны́нѣ, то́йже.

По поліеле́и велича́ніе:

Велича́емъ Тя́, Пресвята́я Дѣ́во, Млекопита́тельнице Спа́са на́шего, и чте́мъ о́бразъ Тво́й святы́й, отъ него́ же подае́ши на́мъ благода́ть исцѣле́нія.

Псало́мъ избра́нный: Помяни́, Го́споди, Дави́да, и всю́ кро́тость его́...

По поліеле́и сѣда́ленъ, гласъ 6:

Пріиди́те, вѣ́рніи, пріиди́те, просла́вимъ чу́дное явле́ніе ико́ны Бо́жія Ма́тере: пресла́вно и боголѣ́пно та́ возсія́вши на тве́рди святы́я Це́ркви, чудесы́ вели́кими всѣ́хъ просвѣща́етъ духо́вно и созыва́етъ ве́село вопи́ти Богома́тери пѣ́снь ра́достную: ра́дуйся, Обра́дованная, Госпо́дь съ Тобо́ю.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра самогла́сна, гла́съ 8:

Пресла́вная чудеса́ показа́ла еси́, Влады́чице, явле́ніемъ чудотво́рнаго Твоего́ о́браза и исцѣле́ньми мно́гими отъ него́ быва́емыми неду́жнымъ. Тѣ́мже Твои́ми ми́лостынями, Госпоже́, хва́лимся и Твоя́ чудеса́ велегла́сно проповѣ́дуемъ, я́ко Ты́ еси́ Прибѣ́жище на́ше и къ Бо́гу ми́лостивая Хода́таице.

Кано́нъ Богоро́дицы, ирмосы́ по два́жды, тропари́ на 12. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Водо́ю моли́твъ Твои́хъ, Дѣ́во, ороси́ на́съ къ плодоно́сію духо́вному и воспламени́ хла́дное на́ше се́рдце Боже́ственною любо́вію, да Тебѣ́, Млекопита́тельницѣ Пита́теля на́шего, пѣ́ніе хвале́бное воспое́мъ досто́йно, Чи́стая.

Во́ды страстны́хъ помышле́ній обурева́ютъ на́съ, Госпоже́ Всеблага́я, Всенепоро́чная, млекопита́вшая Спа́са ду́шъ на́шихъ и отъ ико́ны Твоея́ святы́я всѣ́мъ да́рующая утѣше́ніе.

Во́ду непостоя́нную жите́йскихъ треволне́ній преити́ безбѣ́дно помози́ на́мъ, Чи́стая, и отъ лю́тыхъ неду́говъ исцѣле́ніе на́мъ пода́ждь, Млекопита́тельнице Свята́я, и покажи́ прича́стники на́съ бы́ти наслѣ́дія небе́снаго, Богоневѣ́стная.

Во́ды цѣле́бныя источа́етъ на́мъ ико́на Твоя́ всечестна́я, Богоро́дице Дѣ́во, и стра́сти многоразли́чныя исцѣля́етъ и по́мощь вѣ́рнымъ отъ Тебе́ подае́тъ въ бѣда́хъ, да сла́вимъ чудеса́ Твоя́ и пое́мъ Тя́, благи́хъ вино́вную, воплоти́вшую и дои́вшую Богомладе́нца Іису́са.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́сныхъ ра́дованіе и земны́хъ упова́ніе еси́, Богоро́дице Дѣ́во, свѣ́тлая пала́то Царя́ царе́й, млекопита́вшая Его́ отъ сосцу́ Твое́ю. Его́же моли́ прилѣ́жно спасти́ и просвѣти́ти ду́ши на́ша, еди́на Всеблага́я.

Небе́съ превы́шшая, зе́млю освяти́вшая Рождество́мъ Твои́мъ, и млекопита́вшая Зижди́теля Твоего́, Богоневѣ́стная Марíе, ико́ною сла́дкаго подо́бія Твоего́ на́съ утѣша́еши и неду́жнымъ исцѣле́ніе подае́ши, еди́на Пречи́стая.

Небе́сная Цари́це, Всеми́лостивая Влады́чице, нетлѣ́нно роди́вшая и дои́вшая святы́хъ Святѣ́йшее Сло́во, ку́ю досто́йную похвалу́ принесе́мъ Ти́, недосто́йніи? Аще не Сама́ Ты́ помо́жеши на́мъ неосужде́нно сла́вити Тя́ и пѣ́ти Твоя́ чудеса́, еди́на Богоблаже́нная.

Небе́сное а́нгельское славосло́віе слы́шиши, Госпоже́, въ Сіо́нѣ го́рнемъ, на́съ же, до́льныхъ, назира́еши отту́ду ма́тернимъ Твои́мъ о́комъ и вы́ну мо́лиши за на́съ Сы́на Твоего́ и Бо́га, да вѣ́чнаго избѣ́гнемъ осужде́нія, еди́на Пренепоро́чная.

Сѣда́ленъ Богоро́дицы, гла́съ 8:

Вели́чія Твоя́ кто́ исповѣ́сть, Богоро́дице? Явле́ніемъ бо чудотво́рныя ико́ны Твоея́ возвесели́ла еси́ ду́ши пра́ведныхъ, мно́гія неду́ги е́ю врачу́я и отъ вся́кихъ бѣ́дъ избавля́я, и́же по Бо́зѣ упова́ніе на Тя́ возлага́ютъ. О, Влады́чице Всеми́лостивая, не лиши́ у́бо и на́съ Твоего́ заступле́нія, спаси́ Правосла́внаго Импера́тора на́шего, и гра́дъ се́й, оби́тель на́шу отъ вся́каго зла́, да, Тобо́ю хва́лящеся, не постыди́мся во вѣ́ки.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Услы́ши гла́сы на́ша хвале́бныя, Богоро́дице Преблага́я, и пріими́ на́ше поклоне́ніе, предъ свято́ю ико́ною Твое́ю приноси́мое дне́сь: млекопита́ющую Спа́са Христа́ ви́димъ бо Тя́ на ико́нѣ, и ра́дуемся, грѣ́шніи, сла́вяще ро́ждшагося отъ Тебе́ Бо́га.

Услы́шала еси́, Пречи́стая Влады́чице, благовѣ́щеніе арха́нгелово, — ра́дуйся, Благода́тная, Госпо́дь съ Тобо́ю! — и зачала́ еси́ во утро́бѣ Твое́й предвѣ́чнаго Бо́га, Его́же нетлѣ́нно ро́ждши, млеко́мъ Твои́мъ я́ко Младе́нца пита́ла еси́ во спасе́ніе на́ше.

Услы́ша первосвяти́тель Се́рбскій Са́вва завѣ́тъ вели́каго во отцѣ́хъ Са́ввы Освяще́ннаго о святѣ́й ико́нѣ Твое́й Млекопита́тельницѣ, Богоро́дице Дѣ́во, и прія́тъ ю́ со благоговѣ́ніемъ, я́ко зало́гъ Твоего́ благоволе́нія, Преблага́я.

Услы́шаша и́ноцы Святы́я горы́ Аѳо́нскія, я́ко свята́я ико́на Твоя́ Млекопита́тельница отъ Іерусали́ма къ ни́мъ прино́сится, о Ма́ти Сло́ва и Дѣ́во, и ра́достно потеко́ша во срѣ́теніе е́й, сла́вяще и пою́ще многопѣ́тое Твое́ и́мя.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣти́ на́съ, Влады́чице, потемне́нныхъ грѣха́ми, сія́ніемъ Бо́жіей благода́ти, и сподо́би ны́ зрѣ́ти святу́ю Твою́ ико́ну и на не́й созерца́ти ве́ліе чу́до чуде́съ: Творца́ вселе́нныя, я́ко Младе́нца отъ сосцу́ Твое́ю пита́емаго.

Просвѣще́ніе и спасе́ніе на Тя́ надѣ́ющихся, Богоро́дице Дѣ́во, облагодати́ на́шъ по́мыслъ досто́йно сла́вити Тя́ и пѣ́ти чудеса́, я́же отъ ико́ны Твоея́ святы́я яви́ла еси́ и при́сно явля́еши во утѣше́ніе и спасе́ніе на́ше.

Просвѣти́вый не́бо со́лнцемъ и зе́млю основа́вый дыха́ніемъ у́стъ Свои́хъ, Зижди́тель вся́ческихъ во утро́бѣ Твое́й, Пречи́стая, нетѣ́сно вмѣсти́ся и отъ сосцу́ Твое́ю я́ко Младе́нецъ пита́шеся, на́мъ же дарова́ исто́чникъ чуде́съ, святу́ю ико́ну Твою́, Преблага́я.

Просвѣти́ся Боже́ственною благода́тію Аѳо́нская оби́тель преподо́бнаго Са́ввы Освяще́ннаго, пріе́мъ въ наслѣ́діе, щи́тъ и покро́въ, святу́ю ико́ну Твою́, Богома́ти Влады́чице, Млекопита́тельница имену́емую: сію́ у́бо и мы́ достодо́лжнымъ поклоне́ніемъ почита́емъ и Тя́, Предста́тельницу на́шу, въ пѣ́снехъ немо́лчно ублажа́емъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

[Моли́твы мно́жайшія здѣ́сь, предъ ико́ною Влады́чицы, возно́сятся, егда́ сія́ въ правосла́вную Россíю отъ Святы́я горы́ и́ноками оби́тели Ильи́нскія принесе́ся, вѣ́рнымъ во утѣше́ніе и въ ра́дость несконча́емую.] [1]

Моли́тву вся́къ принося́й Тебѣ́ съ вѣ́рою и любо́вію предъ пречи́стымъ о́бразомъ Твои́мъ, Богоро́дице Преблага́я, не неуслы́шанъ отъ Тебе́ оты́детъ: всѣ́мъ бо вся́ блага́я да́руеши, я́ко Ма́ти Всеблага́го Бо́га и Пита́тельница Пита́теля вселе́нныя.

Моли́твенно Тя́ сла́вимъ, Пречи́стая, и, съ любо́вію припа́да[юще] къ многоцѣле́бному Твоему́ о́бразу, се́рдцемъ и усты́ его́ целу́[емъ], ви́дяще въ не́мъ зало́гъ благода́тный Твоего́ къ на́мъ Ма́терняго благоволе́нія.

Моли́тися всегда́ усе́рдно хотѣ́ніе пода́ждь на́мъ, Преблага́я Влады́чице, вся́ бо мо́жеши я́ко Ма́ти и Млекопита́тельница Всемогу́щаго Бо́га, Его́же ми́лостива на́мъ сотвори́ всеси́льнымъ предста́тельствомъ Твои́мъ и не попусти́ до конца́ поги́бнути рабо́мъ Твои́мъ.

Конда́къ Богоро́дицы, гла́съ 8:

Очи́стимъ чу́вствія ду́шъ и тѣле́съ на́шихъ и у́зримъ на ико́нѣ Твое́й, Богоро́дице, та́инство пресла́вное: Творца́ Вселе́нныя и Го́спода вы́шнихъ си́лъ, во объя́тіяхъ Твои́хъ держи́ма и отъ сосцу́ Твое́ю пита́ема, я́ко Младе́нца. Тѣ́мже со стра́хомъ и ра́достію покланя́емся Тебѣ́ и ро́ждшемуся отъ Тебе́ Спа́су на́шему, зову́ще: ра́дуйся, Влады́чице, Пита́тельнице жи́зни на́шея.

Икосъ:

Арха́нгельское цѣлова́ніе услы́шала еси́, Приснодѣ́во, и въ чистотѣ́ дѣ́вственнѣй Бо́га зачала́ и родила́ еси́, Его́же я́ко Младе́нца, отъ сосцу́ Твое́ю млеко́мъ пита́ла еси́. Ангели и человѣ́цы удиви́вши вели́чіемъ Твои́хъ соверше́нствъ и содѣ́явшагося о Тебѣ́ Боже́ственнаго та́инства. Тѣ́мже ублажа́емъ Тя́, и́стинную Богоро́дицу, возвели́чившую па́дшее человѣ́чество и милосе́рдіемъ неизрече́ннымъ призира́ющую на ро́дъ христіа́нскій, богоумиле́нно зове́мъ: ра́дуйся, Влады́чице, Пита́тельнице жи́зни на́шея.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отъ усе́рдія на́шего приноси́мое Тебѣ́ пѣ́ніе не пре́зри, Влады́чице, но отъ ико́ны Твоея́ святы́я пода́ждь на́мъ да́ры Твоя́ благода́тныя, на по́льзу ду́шъ и тѣле́съ на́шихъ, да ра́достно взыва́емъ Ро́ждшемуся отъ Тебе́: отце́въ Бо́же, благослове́нъ еси́.

Отъ свята́го чудотво́рнаго о́браза Твоего́, Богоро́дице Дѣ́во, струи́ исцѣле́ній истека́ютъ и воня́ живо́тная благоуха́етъ, е́юже ме́ртвость грѣхо́вная ду́шъ на́шихъ потребля́ется и плодоно́сіе духо́вное подае́тся зову́щимъ: отце́въ Бо́же, благослове́нъ еси́.

Отъ Іерусали́ма на Святу́ю го́ру Аѳо́нскую ико́на Твоя́ благода́тная принесе́ся, Богома́ти Влады́чице, въ зало́гъ благоволе́нія Твоего́ къ избра́нному Тобо́ю жре́бію на земли́ и насе́льникомъ его́ преподо́бнымъ, и́же гла́сы немо́лчными воспѣва́ютъ Сы́ну Твоему́: отце́въ Бо́же, благослове́нъ еси́.

Отъ глубины́ зо́лъ мно́гихъ къ Тебѣ́ припа́даемъ, о Ма́ти Сло́ва и Дѣ́во, и мо́лимся прилѣ́жно: пода́ждь на́мъ по́мощь Твою́ благода́тную и не попусти́ поги́бнути на́мъ до конца́, но спаси́ на́съ десни́цею Твое́ю и воздви́гни пѣ́ти всѣ́хъ Творцу́: отце́въ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ небесе́ и земли́ воплоти́ла еси́, Богоро́дице, отъ дѣ́вственныхъ крове́й Твои́хъ багряни́цу пло́ти Ему́ истка́вши и я́ко Младе́нца отъ сосцу́ Твое́ю Его́ млекопита́вши, и́стиннаго Бо́га и Человѣ́ка, хвали́маго и превозноси́маго во вся́ вѣ́ки.

Цари́це на́ша Преблага́я и Засту́пнице Пресвята́я, Ма́ти Го́спода вы́шнихъ си́лъ, съ ни́ми моли́ Его́ прилѣ́жно ми́ръ мíрови дарова́ти, плодоно́сіе земли́ и всѣ́мъ на́мъ здра́віе и спасе́ніе, да хва́лимъ и превозно́симъ Его́ во вся́ вѣ́ки.

Ца́рство и госпо́дство дарова́ Тебѣ́, Богоро́дице Марíе, Сы́нъ Тво́й и Бо́гъ: ца́рствуеши бо съ Ни́мъ вѣ́чно и стро́иши и покрыва́еши лю́ди, искупле́нныя Его́ честно́ю кро́вію, и́же сла́вятъ многопѣ́тое и́мя Твое́, хва́ляще и превознося́ще просла́вльшаго Тя́ Го́спода во вся́ вѣ́ки.

Царя́ на́шего правосла́внаго, оте́чество на́ше, го́ру сію́ и оби́тель на́шу святу́ю, сохрани́ и соблюди́, Влады́чице, въ долготу́ дне́й невреди́мыми отъ вся́каго зла́, и вознеси́ ро́дъ христіа́нскій надъ язы́ки невѣ́рными, да пое́мъ Твое́ Ма́тернее заступле́ніе, и хва́лимъ и превозно́симъ Христа́ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стинну никто́же, притека́я къ Тебѣ́ моли́твенно, то́щь отъ Тебе́ исхо́дитъ, Пречи́стая Богоро́дице Дѣ́во: всѣ́хъ Ты́ ми́луеши и ущедря́еши, я́ко любоблагоутро́бная Ма́ти, тѣ́мже, вси́ ро́ди земнíи, благода́рно Тя́ велича́емъ.

Вои́стинну зало́гъ благода́тный, свята́я и чудотво́рная ико́на Твоя́ яви́ся, Богоро́дице Преблага́я, на ню́же взира́юще, сія́ніе Бо́жіей благода́ти въ ду́ши на́ша неви́димо пріе́млемъ и по до́лгу пѣ́сньми хвале́бными Тя́ велича́емъ.

Вои́стинну щи́тъ и покро́въ оби́тели на́шей, свята́я ико́на Твоя́ даде́ся, Преблага́я Дѣ́во, отъ щедро́тъ Твои́хъ Ма́тернихъ: сію́ у́бо съ любо́вію объе́млюще, се́рдцемъ и усты́ цѣлу́емъ и Тя́, Благодѣ́тельницу на́шу, непреста́нно велича́емъ.

Вои́стинну всѣ́хъ святы́хъ вы́шша еси́, Богоро́дице Дѣ́во, ро́ждшая Святѣ́йшее Сло́во и млекопита́вшая я́ко Младе́нца воплоще́ннаго Бо́га, на́съ ра́ди Человѣ́ка бы́вша, да изба́витъ па́дшій ро́дъ человѣ́ческій отъ поги́бели вѣ́чныя. Тѣ́мже Тя́, я́ко Вино́вницу спасе́нія на́шего, немо́лчно велича́емъ.

Свѣти́ленъ Богоро́дицы, гла́съ 4:

Пречи́стаго о́браза Твоего́ явле́ніе, Ма́ти Бо́жія, пра́зднуемъ свѣ́тло, и́бо въ не́мъ позн[ав]а́емъ зна́меніе Твоего́ къ на́мъ благоволе́нія, Преблага́я: покрыва́еши и спаса́еши на Тя́ упова́ющія, Богоро́дице Всепѣ́тая и Неискусобра́чная.

Сла́ва, и ны́нѣ, то́йже.

[На хвали́техъ] стихи́ры Богоро́дицы на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Ве́лія ра́дость Святѣ́й горѣ́ Аѳо́нстѣй свы́ше дарова́ся,* свята́я и благода́ти прича́стная ико́на Твоя́, Богоро́дице,* отъ Іерусали́ма къ не́й принесе́ся,* благоче́стію во утвержде́ніе и вѣ́рнымъ во спасе́ніе,* о ея́же принесе́ніи ра́дующеся,* Тебѣ́, Влады́чице, мо́лимся,* спаси́ ду́ши на́ша, я́ко Милосе́рда. [Два́жды.]

О, пресла́внаго чудесе́!* Ди́вный святи́тель Са́вва,* зало́гъ ми́лостей Твои́хъ,* ико́ну Твою́ святу́ю, Богоро́дице,* на́мъ отъ Іерусали́ма прино́ситъ,* и вся́ ны́ призыва́етъ* благоговѣ́йно е́й поклони́тися.* Сего́ ра́ди съ любо́вію къ не́й припа́дающе,* моле́бно къ Тебѣ́ вопіе́мъ:* отъ бѣ́дъ изба́ви на́съ, Влады́чице,* и спаси́ ду́ши на́ша, я́ко Милосе́рда.

О, пресла́внаго чудесе́!* Исто́чникъ исцѣле́ній на́мъ дне́сь яви́ся,* ико́на Твоя́ многочуде́сная, Богоро́дице,* е́юже свята́я оби́тель* вели́каго во святы́хъ Са́ввы* духо́вно обогати́ся* и чуде́съ Твои́хъ благода́тію просла́вися.* Сію́ у́бо боголѣ́пнымъ поклоне́ніемъ честву́емъ* и со умиле́ніемъ Тебѣ́ вопіе́мъ:* Правосла́віе утверди́ въ на́съ непоколеби́мо, Влады́чице,* и спаси́ ду́ши на́ша, я́ко Милосе́рда.

Сла́ва, и ны́нѣ, гла́съ 6:

Блажи́мъ Тя́ вси́ ро́ди, Богоро́дице, я́ко ра́дости вся́ ны́ испо́лнила еси́ явле́ніемъ чудотво́рныя Твоея́ ико́ны и дарова́ніемъ мно́гихъ отъ нея́ исцѣле́ній: ду́ши бо и тѣлеса́ врачу́еши и отъ вся́кихъ бѣ́дъ избавля́еши честна́го о́браза Твоего́ осѣне́ніемъ, ему́же дне́сь покланя́ющеся, усе́рдно мо́лимъ Тя́: сподо́би, Влады́чице, Твоя́ рабы́ въ бу́дущемъ вѣ́цѣ избра́нныхъ ра́дости.

Та́же славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я на 8. Проки́менъ, гла́съ 3, [пѣ́снь Богоро́дицы]: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. [Сти́хъ: Лицу́ Твоему́ помо́лятся бога́тіи лю́дстіи.] Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Примѣчаніе:
[1] Недостающій тропарь канона приводится по изданію: «Минея Январь. Часть 1-я. М.: Издательскій совѣтъ Русской Православной Церкви, 2002. С. 431».

Источникъ — Служба Пресвятой Богородицѣ, явленія ради чудотворной иконы Ея, Млекопитательницы.

/ Къ оглавленію раздѣла /


Наверхъ / Къ титульной страницѣ

0