Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 12-й де́нь [1].
Ина слу́жба свята́го Са́ввы Се́рбскаго [2].

ВЕЧЕРЪ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 6], гла́съ 5:

Преподо́бне о́тче, свяще́нниче Са́вво,* свирѣ́ль гла́са спасе́нія,* глася́щая уче́ніе правосла́вное всѣ́мъ на́мъ,* грѣ́шнымъ и вѣ́рнымъ душа́мъ,* богозва́нная гу́сль Бо́жія Паракли́та,* вели́кій орга́нъ Бо́жій,* достохва́льная труба́ и́стинная,* сла́дкій исто́чникъ благода́тный,* Христа́ моли́, преподо́бне,* дарова́ти пою́щимъ тебе́* ми́ръ и ве́лію ми́лость. [Два́жды.]

Преподо́бне о́тче, достохва́льне Са́вво,* обрѣ́те, Его́же возжелѣ́, твою́ ду́шу чи́стую,* благода́ть Пресвята́го Ду́ха въ тя́ всели́ся,* я́ко Незаходи́мый свѣ́тъ,* Его́же поспѣше́ніемъ ду́хи лука́выя отгоня́еши ны́нѣ* и исцѣля́еши болѣ́зни и неду́ги* приходя́щихъ къ тебѣ́ съ вѣ́рою, чи́стымъ се́рдцемъ* и пра́зднующихъ твою́ па́мять свѣтоно́сную,* Христа́ моли́, преподо́бне,* дарова́ти оте́честву твоему́ едине́ніе,* ми́ръ и ве́лію ми́лость. [Два́жды.]

Ра́дуйся, святи́телемъ пра́вило,* Це́ркви неподви́жимое утвержде́ніе,* сла́во правовѣ́рныхъ,* любому́дрія исто́чниче,* любве́ водо́ неизлива́емая,* свѣти́ло многосвѣ́тлое,* духо́вный сосу́де,* у́ме Бо́жій, кро́ткій и чи́стый,* смире́ніемъ и́стиннымъ украша́яся,* человѣ́че небе́сный и земны́й а́нгеле,* виногра́да дѣ́лателю, Христо́въ дру́же при́сный,* Того́ моли́ пода́ти чту́щимъ тя́ ве́лію ми́лость.

Кто́ не диви́тся и кто́ не блажи́тъ* пречестна́го твоего́ житія́, блаже́нне,* сме́ртію бо на безсме́ртную жи́знь преложи́ся, свя́те,* и освяща́еши всѣ́хъ, призыва́ющихъ тя́:* отъ ско́рби и напа́стей спаси́* и освяща́й ста́до твое́ всегда́* моли́твами твои́ми ко Го́споду.

Сла́ва, гла́съ то́йже:

Боже́ственное торжество́ торжеству́юще, вѣ́рніи, и во я́слехъ отъ Дѣ́вы рожде́нному Бо́гу со па́стыри и волхвы́ покло́ньшеся, и свѣ́тлость Богоявле́нія и Креще́нія Госпо́дня пости́гше, и́мже сподо́блени пра́здновати пресвѣ́тлую па́мять богоно́снаго отца́, вѣ́рніи, соше́дшеся, си́це рце́мъ: а́ще и преста́вися отъ на́съ, святи́телю благíй, но не оста́вилъ еси́ ста́да твоего́, непреста́нно моля́ся, отъ немощна́го естества́ на́шего любо́вную мольбу́ пріе́мь, и просвѣща́й, и освяща́й, и спаса́й мольба́ми свои́ми ду́ши на́ша.

И ны́нѣ, богоро́диченъ:

[Въ Чермнѣ́мъ мо́ри Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ. [3]

Вхо́дъ. Проки́менъ дне́. Чте́нія три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.]

На литíи стихи́ра, гла́съ 8:

О, пресла́вное чу́до, земна́я не́мощь, Божество́мъ укрѣ́пльшися, бѣсо́вскія полки́ низложи́ и разстоя́щаяся ча́да Ду́хомъ собра́! О, пресла́внаго Твоего́ милосе́рдія, благи́мъ же, Христе́ Спа́се, просла́вися въ свѣ́тлости святы́хъ Твои́хъ.

[Сла́ва, и ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 4:

Отче отце́мъ, свяще́нія пра́вило,* цѣлому́дрія о́бразъ,* мона́хомъ крѣ́пость,* церко́вное утвержде́ніе,* любве́ свѣти́льникъ, престо́лъ чу́вствію,* исто́чникъ ми́лости,* язы́къ огнедохнове́нный,* уста́ сладкоглаго́ливая,* сосу́дъ Бо́жій,* у́мный ра́й бы́сть,* богоблаже́нный іера́рше Христо́въ.

Сти́хъ: Честна́ предъ Го́сподемъ* сме́рть преподо́бныхъ Его́.

Подоба́ше Се́рбстѣй земли́* Са́вву имѣ́ти архіере́я,* я́ко нѣ́кую у́тварь ца́рскую,* украси́ бо престо́лъ оте́чества своего́* и увязѣ́ триплете́ннымъ вѣнце́мъ,* спасе́нія завѣ́ты предложи́ вѣ́рнымъ* и вся́ собира́я къ пѣ́нію пѣ́сней боголѣ́пныхъ,* къ нему́ же возопіи́мъ:* богоблаже́нне и богосло́ве,* Христа́ Бо́га моли́ о душа́хъ на́шихъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Архіере́омъ пра́вило,* и́нокомъ законополо́жникъ,* правовѣ́рнымъ учи́тель,* пра́вило правле́нія,* за́повѣдей мѣ́рило,* свяще́нникомъ свѣ́тлость Бо́жія,* сѣки́ра, уста́ посѣка́ющая вся́* находя́щія на ста́до твое́ проти́вныя полки́,* яви́лся еси́, преблаже́нне о́тче на́шъ, архіере́ю Са́вво,* ны́нѣ свѣ́та Боже́ственнаго ве́сь исполня́яся,* Христу́ моли́ся неосла́бно о ста́дѣ твое́мъ.

Сла́ва, гла́съ 8:

Юностное процвѣте́ніе и дѣ́вственный пло́дъ, по́стническое воздержа́ніе, свяще́нное подо́біе, ца́рское украше́ніе, си́рымъ пита́тель, ни́щимъ бы́въ оте́цъ, оби́димымъ ско́рое заступле́ніе, о, пресла́внаго твоего́, Са́вво, чудотво́рства, и́мже, Христе́, спаси́ мíръ, грѣхо́мъ запустѣ́вшій.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

Тропа́рь, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́евъ богодухнове́нное удобре́ніе, Са́вво прему́дре, уче́ньми твои́ми вся́ просвѣти́лъ еси́, цѣвни́це духо́вная. Моли́ Христа́ Бо́га спасти́ся душа́мъ на́шимъ.

[Сла́ва, и ны́нѣ, богоро́диченъ, гла́съ то́йже:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 8:

Погре́блъ еси́ лука́выхъ духо́въ ла́янія моли́твъ свои́хъ труды́ мно́гими, святи́телю, и по преставле́ніи боже́ственнѣмъ ме́ртвъ во гро́бѣ положе́нъ, и нетлѣ́ненъ бы́сть, тѣ́мже, ра́дующеся, святу́ю твою́ па́мять пра́зднуемъ и согла́сно вопіе́мъ ти́: моли́ Христа́ Бо́га грѣхо́въ оставле́ніе на́мъ дарова́ти. [Два́жды.]

Сла́ва и ны́нѣ, богоро́диченъ, [гла́съ то́йже:

Небе́сную две́рь и ковче́гъ, всесвяту́ю го́ру и всесвѣ́тлый о́блакъ воспои́мъ, неопали́мую купину́, слове́сный ра́й, Евино воззва́ніе, все́й вселе́ннѣй вели́кое сокро́вище, въ не́мже обрѣ́теся спасе́ніе мíру, оставле́ніе людски́хъ согрѣше́ній, тѣ́мже и вопіе́мъ Ей: о Богома́ти, моли́ Христа́ Бо́га спасти́ ду́ши покланя́ющихся пресвято́му Рождеству́ Твоему́.]

По 2-мъ стихосло́віи сѣда́ленъ, гла́съ 4:

Успе́ніе твое́ хва́ляще досто́йно и ра́ку твою́, честны́мъ моще́мъ твои́мъ кла́няемся и пра́хъ сла́вимъ вѣ́рно, и́хже ра́ди про́симъ, святи́телю Са́вво, грѣхо́въ избавле́нія. [Два́жды.]

Сла́ва и ны́нѣ, богоро́диченъ, [гла́съ то́йже:

Дѣ́во Всенепоро́чная, Яже Пресу́щнаго Бо́га ро́ждшая, со святи́телемъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая].

[Велича́ніе:

Велича́емъ тя́, святи́телю о́тче Са́вво, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 4:

Ангельская во́инства удиви́шася житію́ твоему́ чи́стому, а́нгельски бо въ мíрѣ пожи́лъ еси́, устраши́ся ро́дъ человѣ́ческій, зря́ще пречи́стое твое́ тѣ́ло, ви́дяще, ка́ко тлѣ́нное въ нетлѣ́нное преложи́ся, и, съ ра́достію припа́дающе, любе́зно лобыза́ютъ, Христа́ пою́ще, Просла́вльшаго тя́ во вѣ́ки вѣко́въ. [Два́жды.]

Сла́ва и ны́нѣ, богоро́диченъ, [гла́съ то́йже:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.]

Та́же степе́нна, 1-й антифо́нъ 4-го гла́са. Проки́менъ и Ева́нгеліе святи́телю: [Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Вся́кое дыха́ніе... Ева́нгеліе отъ Іоа́нна, зача́ло 35 отъ полу́.]

По 50-мъ псалмѣ́ стихи́ра, гла́съ 6:

Человѣ́че Бо́жій и вѣ́рный ра́бе, Са́вво, Госпо́день му́жъ жела́ній, сосу́де избра́нный, сто́лпе избра́нный Це́ркве, Ца́рствія наслѣ́дниче, не премолчи́, вопія́ за ны́ ко Го́споду.

Кано́нъ пе́рвый свято́му Са́ввѣ, гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися, та́ бо, Безсме́ртне, я́ко всемогу́щая, проти́вныя сотре́, Изра́ильтяномъ пу́ть глубины́ новосодѣ́лавшая.

Па́стыря Христо́выхъ ове́цъ и наста́вника спасе́нія вѣ́рныхъ уче́ній, чудесы́ возсія́вшаго на́мъ, Свѣ́та Боже́ственнаго благода́ти, святи́теля Са́вву досто́йно почти́мъ.

Яко фи́никсъ, въ дому́ Госпо́дни Дави́дски процвѣ́лъ еси́ добродѣ́тельми, тѣ́ломъ и ду́хомъ ве́сь яви́ся сла́дость, Боже́ственною благода́тію пи́щу безсме́ртія, Са́вво, подая́ оте́честву своему́.

Преше́дъ плотскíй о́блакъ и добродѣ́телей на го́ру возше́дъ, самови́децъ Боже́ственнаго ра́зума бы́въ, я́ко Моисе́й, на скрижа́лѣхъ се́рдца своего́ пріе́мъ зако́нъ благода́тный, святи́телю Са́вво.

Богоро́диченъ: Чистоты́ сокро́вище, ра́дуйся, Еюже отъ паде́нія на́шего воста́хомъ; ра́дуйся, сладкоуха́нный кри́не, Влады́чице, вѣ́рныхъ благоуха́яй, кади́ло благово́нное и мѵ́ро многоцѣ́нное.

Инъ кано́нъ, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

На престо́лѣ небе́снѣмъ сѣдя́щаго Бо́га вожделѣ́лъ еси́ всѣ́мъ се́рдцемъ, блаже́нне, разумѣ́ у́бо блага́я, мірски́хъ дѣ́лъ у́бо избѣже́, па́че ума́ бо яви́ся кро́токъ во смире́ніи.

Да Своея́ сла́вы вся́ческая исполня́я, Бо́гъ и тебе́ возлюби́, отъ пеле́нъ твои́хъ, блаже́нне, избра́въ тя́, чистото́ю бо украси́въ тя́ и добродѣ́телію просвѣти́въ, и во гро́бѣ тлѣ́ннѣмъ, я́ко нетлѣ́ннаго, сохрани́.

Богоро́диченъ: Души́ мое́й сме́рть притека́етъ, искуше́нія же ненави́дящихъ, я́ко а́спиды, обыдо́ша погуби́ти мя́, но Сама́ мя́, Богоро́дице, спаси́.

Пѣ́снь 3.

Ирмо́съ: Еди́не вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Добродѣ́телей прія́телище бы́въ и церко́вный сосу́дъ о́цта Бо́гу, святи́телю Са́вво, на тебѣ́ почи́ Ду́хъ Пресвяты́й.

Мѵ́ромъ Боже́ственнымъ пома́занъ Вседѣ́теля Ду́ха, тѣ́мъ и Се́рбскій престо́лъ, о́тче, украси́лъ еси́, облагоуха́лъ еси́ вѣ́рныхъ ра́зумы добродѣ́тельми и чудесы́, о́тче Са́вво.

Вѣнча́ется словесы́ твои́ми, я́ко ка́меніемъ драгоцѣ́ннымъ, блаже́нне, блаже́нная твоя́ Це́рковь и вѣ́чнуетъ вѣ́рнымъ, ца́рствующи.

Богоро́диченъ: Ра́дуйся, две́ре еди́на, Еюже Сло́во про́йде еди́но, вереи́ и врата́ а́дова, Влады́чице, Рождество́мъ Твои́мъ сокруши́вшая; ра́дуйся, Боже́ственный вхо́де спаса́емыхъ, Богоневѣ́сто.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Просте́рлъ еси́ ру́цѣ къ Вы́шнему въ моли́твахъ бо́дренныхъ и собра́лъ еси́ ча́да твоя́ вку́пѣ соедине́ніемъ Ду́ха, разумѣ́ти Ду́ха, крести́вшаго тя́, и Бо́га славосло́вити и пѣ́ти: нѣ́сть свя́тъ, ра́звѣ Тебе́, Го́споди.

Вели́къ о́бразъ благоче́стія на спасе́ніе показа́лъ еси́, смире́нною бо му́дростію, и ми́лостынями, и уче́ніемъ всѣ́хъ воздвига́я пѣ́ти: нѣ́сть свя́тъ, ра́звѣ Тебе́, Го́споди.

Богоро́диченъ: Яже мíрови спасе́ніе подаю́щи Боже́ственнымъ рождество́мъ Твои́мъ, отъ бѣ́дъ мя́ премѣни́.

Конда́къ, гла́съ 2:

Струя́ми сле́зъ твои́хъ, богоно́сне Са́вво, це́рковь тѣле́сную очи́стивъ, слуга́ бы́сть Святы́я Тро́ицы, сохраня́й оте́чество свое́ непобѣди́мо, тому́ бо ты́ еси́ утвержде́ніе.

Икосъ:

Уясни́ мо́й язы́къ, Спа́се мо́й, и устнѣ́ мои́ отве́рзи, я́ко да возмогу́ досто́йную похвалу́ принести́ сему́ преподо́бному отцу́ отце́мъ, Са́ввѣ, на концѣ́хъ вѣ́къ просія́вшему чудесы́, его́же труды́ и по́двиги кто́ сказа́ти отъ человѣ́къ мо́жетъ? Но, о́тче преблагíй, моли́ся о ста́дѣ свое́мъ и сохраня́й оте́чество свое́ непобѣди́мо, тому́ бо ты́ еси́ утвержде́ніе.

Пѣ́снь 4.

Ирмо́съ: Го́ру Тя́, благода́тію Бо́жіею пріосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Терпѣ́ніемъ напа́сти извѣству́я, и любо́вію Боже́ственною удобря́яся, и ревни́тель Боже́ственныхъ бы́въ, искуша́емыхъ те́плый, Са́вво, побо́рникъ.

Плотска́я взыгра́нія воздержа́ніемъ умертви́въ, безпло́тный въ тѣлеси́, стра́шенъ бѣсо́мъ яви́ся всѣ́ми дѣ́лы свои́ми.

Небе́сный Госпо́дь на тве́рди вѣ́ры, я́ко звѣзду́, тебе́ утверди́, свѣтя́ща мíру свои́ми уче́ніи.

Богоро́диченъ: Тя́, испле́тшую мíрови нерукоплете́нный вѣне́цъ, пѣсносло́вимъ, — ра́дуйся, — Тебѣ́ Дѣ́во зову́ще, храни́лище всѣ́хъ и огражде́ніе, и утвержде́ніе, и свяще́нное прибѣ́жище.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Глаго́ломъ Бо́жіимъ вразуми́вся и себе́ Бо́гови предложи́въ, оста́вль оте́чество свое́, и пости́же на Святу́ю го́ру, добродѣ́телію же вы́ше превзы́де.

Преше́дъ отъ небытія́ въ бытіе́ и отъ земны́хъ въ небе́сная, плотска́я же взыгра́нія и скве́рны плотскíя Бо́жіей любо́вію покори́лъ еси́.

Богоро́диченъ: Отъ вели́кихъ и разли́чныхъ прегрѣше́ній же и напа́стей всегда́ спаса́еши мя́, тѣ́мже я́ко ро́ждшую Тя́ Го́спода молю́ и къ Тебѣ́ прибѣга́ю, непобѣди́мѣй по́мощи скорбя́щимъ: отъ бѣ́дъ изведи́ мольба́ми Твои́ми.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Му́дрый святи́тель, па́стырь святы́й и благíй и свѣти́льникъ Це́ркве яви́лся еси́, свяще́нный о́тче Са́вво, Бо́гу служа́ и лю́ди оте́чества просвѣща́я свѣ́томъ своего́ богоразу́мія.

Въ боже́ственную твою́ па́мять святи́телей собо́ръ, о́тче, ра́дуется и вѣ́рныхъ ли́ки со безпло́тными веселя́тся, пита́ется дне́сь духо́вно Це́рковь словесы́ твои́ми, о́тче Са́вво.

Вдови́цамъ помо́щникъ, оте́цъ си́рымъ, засту́пникъ скорбя́щимъ, побо́рникъ бѣ́днымъ бы́лъ еси́ лю́демъ Бо́жіимъ, священному́чениче Са́вво, тѣ́мъ съ вѣ́рою блажи́мъ тя́.

Богоро́диченъ: Простра́нное селе́ніе Сло́ва, ра́дуйся, Пречи́стая, сосу́де, Боже́ственный би́серъ произве́дшая; ра́дуйся, всечу́дное всѣ́хъ къ Бо́гу примире́ніе, блажа́щихъ Тя́, Богоро́дице, всегда́.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ду́хомъ духо́вная умно́живъ и жела́ніемъ къ Бо́гу разже́гся, Иса́іино исполня́я прорече́ніе, издале́че ше́лъ еси́, Сіо́на дости́гъ, и поклони́ся мѣ́сту, идѣ́же стоя́ста но́зѣ Боже́ственне, и Гро́бъ Госпо́день облобыза́лъ еси́ любе́зно.

Отъ Пренепоро́чныя проше́дъ, Собезнача́льное Сло́во, о́тче, плотску́ю оби́тель Себѣ́ сотвори́ со Отце́мъ Свои́мъ въ души́ твое́й, свяще́нне, ба́ня бо Боже́ственная отъ пречи́стыхъ твои́хъ исто́чникъ, сле́зъ твое́ю о́чію, во ца́рствіи служа́щу ти́ непреста́нная быва́ше.

Богоро́диченъ: Прилѣ́жно Ти́ припа́даю, моля́ся: я́ко Ма́ти Зижди́теля моего́, одержа́щихъ мя́ бѣ́дъ свободи́.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Пріе́мь Сло́ва Спаси́теля, му́дре, тала́нтъ, я́ко уго́дникъ вѣ́рный на трапе́зѣ воздержа́ніемъ умно́жилъ еси́ и прине́слъ еси́ себе́ чи́стою любо́вію Влады́цѣ своему́, святи́телю Са́вво.

Просвѣти́лъ еси́ ри́зу свяще́нную во трудѣ́хъ свои́хъ и яви́лся па́стырь слове́сныхъ ове́цъ, му́дре, и́же па́лицею своего́ уче́нія на па́стбищѣ изгоня́еши Боже́ственное.

Отпуще́нъ пло́ти до́лжнымъ, пра́веднымъ усну́лъ еси́ сно́мъ, му́дре святи́телю Са́вво, и со а́нгелы Боже́ственныя зари́ насыща́ешися и свѣ́тлыми украша́ешися луча́ми.

Богоро́диченъ: Ра́дости вина́, облагодати́ на́шъ по́мыслъ, е́же зва́ти Тебѣ́: ра́дуйся, неопали́мая купино́, о́блаче всесвѣ́тлый, вѣ́рныя непреста́нно осѣня́ющій.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Ца́рствующій всѣ́ми, Бо́гъ тя́ испе́рва возлюби́, свя́те, тобо́ю бо ю́ности обузда́ніе всѣ́мъ показа́ и власте́мъ же покоре́ніе, ми́лостыни же рачи́теля, си́рымъ засту́пника те́пла, скорбя́щимъ утѣше́ніе.

Ца́рства Бо́жія вожделѣ́въ, блаже́нне Са́вво, Сіо́на бо дости́гнувъ, труды́ же и по́ты Сина́йскія горы́ доше́дъ и Еги́пта вари́въ, порабоща́юще ра́бскую пло́ть, и Ду́ху же ве́сь примѣси́ся, и со Христо́мъ ца́рствуеши во вся́ вѣ́ки.

Богоро́диченъ: Отверзо́шася на мя́ непра́вды уста́, Влады́чице, тѣ́мже мя́, я́ко Засту́пница, си́хъ вско́рѣ свободи́.

Конда́къ, гла́съ 2:

Избра́ннаго отъ пеле́нъ Христо́вою благода́тію и возлю́бленнаго отъ ю́ности Бо́жіимъ Ду́хомъ, ю́ностный цвѣ́тъ, Са́вву блаже́ннаго, похва́льныя вѣнцы́, вѣ́рніи, дне́сь спле́тше и боже́ственную главу́ его́ вѣнча́юще, воззове́мъ: ра́дуйся, о́тче, Бо́жіе жили́ще.

Икосъ:

Ангелъ на земли́ небе́снымъ житіе́мъ я́влься, благовѣсти́лъ еси́ всѣ́мъ ра́дость и со безпло́тными ли́ки всѣ́хъ учи́лъ еси́ водворя́тися, и тя́ ви́жду, во небе́сныхъ водворя́ема, и, чудя́ся ужа́сно тому́, си́це зову́: ра́дуйся, благоче́стія наста́вниче и нече́стія потреби́телю; ра́дуйся, небе́снымъ сожи́телю и земны́мъ пра́вило; ра́дуйся, ю́ности воздержа́ніе и ста́рости подпо́ро; ра́дуйся, правовѣ́рнымъ побо́рниче и еретико́въ низложи́телю; ра́дуйся, святи́телей добро́то и преподо́бнымъ сла́во; ра́дуйся, небе́сный человѣ́че и земны́й а́нгеле; ра́дуйся, па́стырю Бо́жіихъ слове́сныхъ ове́цъ; ра́дуйся, кро́тости о́бразе и безу́мныхъ наказа́телю; ра́дуйся, омраче́нныхъ свѣ́те и мона́ховъ сла́во; ра́дуйся, чадолюби́вый о́тче, вся́ съ собо́ю приве́дшій Бо́гу; ра́дуйся, и́мже избавля́емся грѣхо́въ; ра́дуйся, я́ко тобо́ю Ца́рства небе́снаго сподо́бихомся.

Лю́діе: Ра́дуйся, о́тче, Бо́жіе жили́ще.

Пѣ́снь 7.

Ирмо́съ: Тебе́ у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Благоче́стіемъ житіе́ соверши́въ, святи́телю Са́вво, отъ земли́ на небеса́ преста́вился еси́ и со а́нгелы Бо́гу слу́жиши непреста́нно, тѣ́мже къ на́мъ, съ вѣ́рою пою́щимъ тя́, пріиди́ ду́хомъ, просвѣща́я на́мъ у́мное о́ко.

Честно́му о́бразу твоему́ покланя́ющихся, святи́телю честны́й Са́вво, па́мять твою́ сла́вящихъ и честну́ю ра́ку твои́хъ моще́й, отъ напа́сти и бѣ́дъ свободи́ моли́твами, Са́вво, къ Бо́гу твои́ми.

Достодо́лжно чти́мъ па́мять твою́, уго́дниче Христо́въ, ра́цѣ покланя́ющеся боже́ственныхъ моще́й твои́хъ, наслажда́ющеся слове́съ твои́хъ, я́коже и чуде́съ, преподо́бне.

Богоро́диченъ: Мо́лимъ, раби́ Твои́, и приклоня́емъ колѣ́но се́рдца на́шего: приклони́ у́хо Твое́, Чи́стая, и спаси́ скорбьми́ погружа́емыя при́сно, и соблюди́ отъ вся́каго вра́жія плѣне́нія Тво́й гра́дъ, Богоро́дице.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Бога́тство мíра и всю́ сла́ву красоты́, о́тче, оста́вилъ еси́ сла́вы ра́ди Боже́ственныя и присносу́щ[н]ыя и научи́лъ еси́ вся́ пѣ́ти: Изба́вителю Бо́же, благослове́нъ еси́.

Еди́на благода́ть Отца́, Сы́на же и Ду́ха, изво́льшая тя́, святи́теля и по́стника и со апо́столы причте́ннаго, любо́вію вопію́щимъ: Изба́вителю Бо́же, благослове́нъ еси́.

Богоро́диченъ: Предста́тельствомъ Твои́мъ избавля́емся бѣ́дъ и скорбе́й и обрѣта́емъ бога́тство ве́ліе неистоща́емое.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Успи́лъ еси́ стра́сти и жите́йскія во́лны Боже́ственными восхожде́ніи и неосла́бными очище́ніями, тѣ́мъ въ невече́рнѣмъ свѣ́тѣ успе́ніемъ возсія́лъ еси́.

Благоуха́ютъ дѣла́ твои́хъ трудо́въ, блиста́ютъ уче́ній твои́хъ словеса́, чудотворе́нія всю́ду оглаша́ютъ, уго́дниче Са́вво, Христо́въ священноучениче́.

Язвы Христо́вы поне́съ, Са́вво, душе́ю, пло́тію свое́ю о́бщникъ бы́сть му́дрыхъ апо́столъ, тѣ́мъ чти́мъ тя́, вѣ́рніи, я́ко святи́теля.

Богоро́диченъ: Мíру ро́ждшая Спасе́ніе, Имже отъ земли́ на высоту́ взя́ти бы́хомъ, ра́дуйся, Всеблагослове́нная, покро́ве и держа́во, стѣно́ и утвержде́ніе пою́щимъ, Чи́стая: Го́спода по́йте дѣла́, и превозноси́те во вся́ вѣ́ки.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Избавле́ніе Христо́съ да́въ тя́ и оте́честву яви́въ тя́ свяще́нника, ста́до бо честно́ю кро́вію искупи́въ, да́стъ тя́ па́стыря, просвѣща́ти, и учи́ти, и пѣ́ти: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

О, пресла́вныхъ даро́въ, и́миже просла́ви тя́ въ мíрѣ Бо́гъ, житіе́ бо благоче́стно твое́ въ мíрѣ показа́въ, сме́рть же, я́ко свята́го, честну́, житіе́ же на небеси́ ди́вно и препросла́вленно, и вопи́ти же всѣ́хъ научи́: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Обнови́въ непло́дную ни́ву, насѣ́ялъ еси́ сѣ́мянъ словеса́, стори́цею пожа́лъ еси́ слове́сныя кла́сы, богопло́дія дѣ́лателю, дне́сь угобзи́вшія, и́же пою́тъ: благослови́те, вся́ дѣла́ Госпо́дня, Го́спода.

Богоро́диченъ: Иже нра́вомъ прельща́емь е́смь, безъ отвѣ́та сы́й, Богоро́дице, зову́: вся́ческихъ мя́ изба́ви зо́лъ.

Пѣ́снь 9.

Ирмо́съ: Образъ чи́стаго Рождества́ Твоего́ огнепали́мая купина́ показа́ неопа́льная, и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Ца́рское прозябе́ніе, святи́тельскую красоту́, мона́хомъ сла́ву и боголѣ́піе, Се́рбское свѣти́ло на земли́, Са́вву я́вльшагося вси́ досто́йно ублажи́мъ.

Освяти́ся па́мятію твое́ю оте́чество твое́, святи́телю Са́вво, и, торжеству́я, зове́тъ, и моле́бно вопіе́тъ: мольбу́ Го́сподеви принеси́ о на́съ, блаже́нне, получи́ти вѣ́чныхъ бла́гъ похваля́ющимъ ны́нѣ па́мять твою́.

Богоно́сніи веселя́тся, преставле́нія своего́ па́мять предлага́я на́мъ, о христолю́бцы, пріиди́те, свяще́нную объе́млюще его́ ра́ку, та́йными кра́снаго пѣ́нія цвѣ́ты и главы́ своя́ увѣнча́емъ.

Богоро́диченъ: Пощади́, Бо́же, наслѣ́діе Твое́, грѣхи́ на́ша вся́ презрѣ́въ ны́нѣ, на сіе́ имѣ́я моля́щую Тя́, на земли́ безсѣ́менно Тебе́ Ро́ждшую, вели́кія ра́ди ми́лости восхотѣ́вшаго вообрази́тися, Христе́, въ человѣ́чество.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Земля́, покры́вшая тѣ́ло твое́ свято́е, всегда́ весели́тся, благоуха́ющи, всѣ́хъ стра́нныхъ сла́вно призыва́ющи, а́ще бо и стра́нно во стра́нныхъ, свя́те, почи́лъ еси́, Влады́ка бо тя́, Христо́съ, Своему́ стра́нствію сла́вно причте́.

Да ра́дуется Це́рковь, славосло́вящи дне́сь, и да славосло́витъ же небе́сный кру́гъ съ не́ю, и со пѣ́сньми, земноро́дніи, ны́нѣ да усря́щемъ преосвяще́нное тѣ́ло, ны́нѣ отъ стра́нныхъ Боже́ственнымъ манове́ніемъ во своя́ си преноси́мь, пою́ще: Тебе́ велича́ю, Бо́же мо́й, Іису́се.

Богоро́диченъ: Тя́, наде́жду и заступле́ніе, тве́рдо стяжа́въ, Чи́стая, велича́я Тя́ я́ко Богоро́дицу, пѣ́снь вѣ́рою скончава́ю.

Свѣти́ленъ:

Святи́теля Христо́ва да восхва́лимъ, па́мять его́ че́стно торжеству́юще, се́й бо на́мъ предста́ви трапе́зу духо́вную, ея́же насыща́яся и Ду́хомъ наслажде́ни, Боже́ственнѣ Свѣтода́вца прославля́емъ. [Два́жды.]

Сла́ва, и ны́нѣ, богоро́диченъ:

О, святы́й, всесвѣ́тлый де́нь се́й свѣ́тлаго Са́ввы, моли́твами того́ и Богоро́дицы, мо́лимъ Тя́, Человѣколю́бче Ще́дрый, ми́ръ пода́ждь на́мъ, вѣ́рою Тебе́ сла́вящихъ.

На хвали́техъ стихи́ры [на 4], гла́съ 1:

Влады́чества престо́лъ* украша́я добродѣ́тельми,* Ду́хомъ Бо́жіимъ* святи́тельскій престо́лъ прія́тъ,* тѣ́мъ вѣ́рный смотри́тель* благода́ти въ обою́,* святи́телю Са́вво, бы́въ,* сугу́бъ вѣне́цъ прія́лъ еси́. [Два́жды.]

Воздержа́ніемъ, и болѣ́зньми,* и бѣда́ми мно́гими,* и моли́твами непреста́нными* ду́шу и тѣ́ло очи́стивъ,* богому́дре святи́телю Са́вво,* тѣ́мъ сосу́дъ избра́нный* Бо́гу на́шему бы́сть* и яви́ся апо́столъ, а́біе яви́вся,* прія́лъ еси́ дарова́нія.

Гла́съ Ева́нгелія Христо́ва послу́шавъ* и Того́ пре́жде возлюби́въ,* богоно́сне о́тче на́шъ Са́вво,* чи́стымъ житіе́мъ пожи́въ,* превозлюби́въ ча́да своя́,* не о су́щемъ бо то́кмо пе́клся еси́,* но и рѣча́ми и дѣ́лы* на не́бо возводя́ ны́,* душеспа́сныя кни́ги оста́вивъ на́мъ* и добродѣ́тельныя зако́ны,* и́же любо́вію собра́вшеся, ча́да твоя́,* сво́йственно взыва́емъ:* не пре́зри, и́хже возлюби́лъ еси́,* и́хже о Христѣ́ уче́ніемъ породи́лъ еси́,* зало́гомъ и́мамы твоя́ обѣща́нія,* а́ще и разлучи́ся отъ на́съ, па́стырю до́брый,* дерзнове́нію отъ Го́спода* и наде́ждъ не погрѣши́лъ еси́.* Отда́ждь до́лги, еди́наго по еди́ному пріе́мля* и принося́ ко Христу́ моли́твами твои́ми.

Сла́ва, гла́съ 8:

Ца́рское свяще́ніе, во святи́тельскую оде́жду обо́лкся, преподо́бне, и на земли́ послужи́лъ еси́ во пло́ти, я́ко безпло́тенъ, и Тро́ицѣ ны́нѣ предстои́ши, со безпло́тными ли́ки веселя́ся и вопія́: Трисвята́я Еди́нице Трисоста́вная, спаси́ лю́ди Своя́, всегда́ согрѣша́ющія Тебѣ́, Свое́ю бла́гостію.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Примѣчанія:
[1] Въ Сербской Церкви память свт. Саввы празднуется 14-го Января.
[2] Древняя (первоначальная) служба на день успенія св. Саввы Сербскаго. См. Каталогъ рукописей изъ собранія В. М. Ундольскаго: «№ 75. Миней служебныхъ (со включеніемъ Пролога) первая половина года, съ Сентября по Февраль. Сербскій уставный списокъ нач. XIV вѣка, на 304 л., въ два столбца, въ листъ, на пергаментѣ. — Окончаніе утрачено, прерывается въ нач. 10-го Февраля. Здѣсь, л. 265 об., подъ 14 Генв., Служба преп. Саввѣ Сербскому, совершенно отличная отъ печатной (подъ 12 Генв.). Канонъ, начало: Пастыра Христовыхь овьць и наставника спасенію вѣрнихь. На 1 л. подпись А. С. Н[орова]: "Приобрѣлъ въ Палестинѣ, въ монастырѣ св. Саввы, 1835 г., Апрѣля 16-го дня". Къ намъ поступила отъ С. Литова, Кіевскаго книгопродавца...» (Славяно-русскія рукописи В. М. Ундольскаго. Изданіе Московскаго Публичнаго и Румянцевскаго музеевъ. М., 1870, стлб. 104).
[3] Если служба совершается въ періодъ попразднства, вмѣсто богородичновъ, на «И нынѣ» — пѣснопѣнія праздника Богоявленія.

Источникъ: Мине́я Янва́рь. Ча́сть пе́рвая. — М.: Издательскій совѣтъ Русской Православной Церкви, 2002. — С. 465 – 477.

/ Къ оглавленію раздѣла /


Наверхъ / Къ титульной страницѣ

0