Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 12-й де́нь.
Слу́жба и́же во святы́хъ отца́ на́шего Са́ввы, пе́рваго архіепи́скопа и учи́теля Се́рбскаго.

НА МАЛѢЙ ВЕЧЕРНИ,
[На Го́споди, воззва́хъ:] стихи́ры на 4, гла́съ 4. Подо́бенъ: Да́лъ еси́ зна́меніе.

Со́лнца свѣтлѣ́йши* просвѣще́нная па́мять твоя́* вѣ́рнымъ возсія́ лю́демъ твои́мъ,* Боже́ственными блиста́ніи сія́ просвѣща́ющи,* Са́вво вседо́блій, о́тче свяще́нне,* и де́моновъ тму́ отгоня́щи.* Тѣ́мже тя́ ублажа́емъ и моле́бно воспѣва́емъ* я́ко отечестволю́бца, и предста́теля,* и моли́твенника о душа́хъ на́шихъ.

Благоуха́етъ ра́ка свята́го твоего́ тѣ́ла,* святи́телю богодухнове́нне,* Христо́во бо вселе́ніе и благоуха́ніе бы́лъ еси́* и, словесы́ твои́ми богодохнове́нными* е́реси злосмра́дныя низложи́въ,* лю́ди твоя́ облагоуха́лъ еси́.* И ны́нѣ мо́лимъ тя́:* помяни́ вся́, вѣ́рою тя́ помина́ющія,* ко Го́споду дерзнове́ніе я́ко стяжа́въ, богоно́се.

Сла́ва, гла́съ 8. Самогла́сенъ:

Оляденѣ́вшую зе́млю се́рдца люде́й твои́хъ словесы́ твои́ми воздѣ́лавъ, и присноцвѣту́щія плоды́ благоче́стія въ ни́хъ израсти́лъ еси́ Бо́гу, и чистото́ю житія́ твоего́ ра́зумы и́хъ украси́лъ еси́, и на ре́вность подви́глъ еси́ съ собо́ю а́нгельскому мона́шествующихъ житію́, преоби́дѣти же привре́менная увѣща́лъ еси́, боже́ственная цѣвни́це, бо́дрое о́ко, па́стырей па́стырю, Са́вво блаже́нне, о́тче свяще́нне, пріими́ и на́съ, хва́лящихъ тя́, Христу́ Бо́гу моля́ся о душа́хъ на́шихъ.

И ны́нѣ, богоро́диченъ:

Кро́въ Тво́й, Богоро́дице [Дѣ́во, врачевство́ е́сть духо́вное: въ о́нь бо прибѣга́юще, отъ душе́вныхъ неду́гъ избавля́емся].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Умъ влады́ку* на стра́сти поста́вивъ,* плотолю́біемъ не порабо́тився,* а́нгельски чистото́ю,* Са́вво, пожи́лъ еси́.

Сти́хъ: Честна́ предъ Го́сподемъ* сме́рть преподо́бныхъ Его́.

Влады́ка сы́й* своеплеме́ннымъ,* апо́столъ же па́ки и первосвяти́тель,* лю́демъ твои́мъ* отъ Христа́, о́тче, дарова́лся еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ста́до твое́* слове́сное, о́тче,* проти́вными нерасточа́емо,* ко Христу́ моли́твами,* Са́вво, соблюда́й.

Сла́ва, гла́съ 4:

Отъ пеле́нъ лю́бящія тя́ лю́ди твоя́ возлюби́лъ еси́, о ни́хже и до сме́рти труди́вся, и по сме́рти си́хъ не оста́вилъ еси́, и́же цѣ́ла и благоуха́юща отъ чуждестра́нствія пріе́мше тя́, и, я́ко у́тварь ца́рскую, иму́ще тя́, веселя́тся: украси́ бо си́хъ престо́ломъ первосвяти́тельства, и, ца́рствіемъ удобри́въ, почи́лъ еси́, и вѣ́рою Тро́ическою утверди́лъ еси́. И ны́нѣ пѣ́ніемъ пѣ́сней боголѣ́пныхъ твою́ па́мять почита́ютъ, моля́щеся: богоно́се о́тче, Са́вво всесвяще́нне, Христа́ Бо́га моли́ спасти́ся душа́мъ на́шимъ.

И ны́нѣ, богоро́диченъ:

Изба́ви на́съ отъ бѣ́дъ [на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ].

Тропа́рь, гла́съ 3:

Пути́, вводя́щаго въ жи́знь, наста́вникъ, и первопресто́льникъ, и учи́тель бы́лъ еси́: пе́рвѣе бо прише́дъ, святи́телю Са́вво, оте́чество твое́ просвѣти́лъ еси́ и, породи́въ то́е Ду́хомъ Святы́мъ, я́ко древа́ ма́слинная, въ мы́сленнѣмъ раи́ насади́лъ еси́ всеосвяще́нная твоя́ ча́да. Тѣ́мъ, я́ко апо́столомъ и святи́телемъ сопресто́льна чту́ще тя́, мо́лимъ: моли́ Христа́ Бо́га дарова́ти на́мъ ве́лію ми́лость.

Сла́ва, и ны́нѣ, пра́здника или́ богоро́диченъ:

Тя́, хода́тайствовавшую [спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ].

Та́же ектенія́ и отпу́стъ.



НА ВЕЛИЦЕЙ ВЕЧЕРНИ,
Стихологису́емъ: Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 4. Подо́бенъ: Яко до́бля.

Отца́, су́щаго на небесѣ́хъ, возлюби́въ,* земна́го оста́вилъ еси́* и пусты́ню пости́глъ еси́.* Отону́дуже поще́ніемъ и моли́твами* Ду́ха Свята́го зарю́, о́тче, воспріе́мъ,* во тмѣ́ невѣ́дѣнія лю́ди твоя́* па́че со́лнца, прише́дъ, просвѣти́лъ еси́,* Христа́ проповѣ́дая во двою́ существу́,* на́съ ра́ди изъ Дѣ́вы возсія́вшаго. [Два́жды.]

Апо́столовъ равнопроповѣ́дателя,* святи́телемъ единому́дренна,* по́стникомъ сподви́жника,* па́стыря су́ща избра́нна,* ми́лости же благоутро́бна пода́теля,* досто́йно восхваля́емъ тя́,* Са́вво о́тче богому́дре,* и богото́чную рѣку́ уче́ній,* беззако́нныя е́реси потопи́вшую.

Слове́съ твои́хъ уче́ніемъ* Се́рбская Це́рковь украси́ся* и, ны́нѣ ра́дующися Правосла́віемъ,* съ боже́ственными твои́ми ча́ды* свяще́нную твою́ па́мять свѣ́тло почита́етъ,* Са́вво о́тче свяще́нне,* святи́телемъ равноче́стне,* и а́нгеломъ спредстоя́телю,* и моли́твенниче о душа́хъ на́шихъ.

Ины стихи́ры, гла́съ 6. Подо́бенъ: Все́ отло́жше.

Ве́сь освяще́нъ,* богоно́сецъ показа́лся еси́,* ма́стію Боже́ственною свято́ю* Святы́мъ Ду́хомъ обложе́нъ,* и свѣ́тло всегда́ лику́я, преподо́бне,* во Свята́я святы́хъ входя́,* и лю́ди твоя́, я́ко священнотаи́нникъ,* спаси́тельнымъ та́йнамъ научи́лъ еси́* я́ко вои́стинну іера́рхъ избра́ненъ,* Са́вво о́тче богоно́се,* со дерзнове́ніемъ моля́ся* о душа́хъ на́шихъ. [Два́жды.]

Отъ ю́ности облиста́ твое́ житіе́* добродѣ́телей луче́ю,* святи́телю всеблаже́нне,* и лю́ди твоя́ просвѣти́лъ еси́,* пре́лести мра́къ разори́въ вои́стинну.* И ны́нѣ всели́лся еси́,* идѣ́же Свѣ́тъ невече́рній,* идѣ́же а́нгелъ ликостоя́нія.* Съ ни́миже предстоя́, преподо́бне,* помина́й на́съ, твою́ па́мять,* Са́вво о́тче, соверша́ющихъ,* со дерзнове́ніемъ моля́ся* о душа́хъ на́шихъ.

Умъ тво́й манове́ніи,* су́щими въ боже́ственныхъ,* богому́дре, вѣ́рою удобре́нъ* и свѣ́тло обложе́нъ, пресла́вне,* въ ме́ртвеннѣмъ тѣлеси́ и тлѣ́ннѣ* нетлѣ́нію поучи́вся,* и, страсте́й внѣ́ бы́въ,* притяжа́лъ еси́ безпло́тныхъ свѣ́тлость,* святи́телю Са́вво богопрія́тне,* свѣ́тлый оте́чества твоего́ свѣти́льниче* и моли́твенниче дерзнове́нне* о душа́хъ на́шихъ.

Сла́ва, гла́съ 2:

Сла́вы у всѣ́хъ Царя́ Христа́ взыска́въ, влады́чествующа отца́ оста́вивъ, горы́ Аѳо́на доше́лъ еси́, идѣ́же высоту́ благоро́дія въ раба́ смире́ніе измѣни́въ, труды́ мно́гими тѣ́ло удручи́лъ еси́, моли́твами же ду́шу просвѣти́лъ еси́, до́брѣ мона́шески пребы́въ, а́нгельски въ пусты́ни пожи́лъ еси́, апо́стольски въ мíрѣ научи́лъ еси́, болѣ́зньми поще́нія и стра́нствія хожде́ніемъ му́ченическія по́двиги соверши́лъ еси́. Кто́ изглаго́летъ твоя́ добродѣ́тели, и́миже небе́сная на земли́ притяжа́лъ еси́, Са́вво блаже́нне о́тче, па́стырю и учи́телю? Но я́ко ны́нѣ предстоя́ Христу́ Бо́гу, моли́ спасти́ся душа́мъ на́шимъ.

И ны́нѣ, богоро́диченъ:

[Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.]

Вхо́дъ, проки́менъ дне́. Чте́нія три́.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́новы чте́ніе. [Главы́ 10, 6, 8 и 9.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ры самогла́сны, гла́съ 2:

Умъ преподо́бенъ, я́ко при́сно къ Бо́гу внима́ющь, свобо́денъ же и самоизво́ленъ, я́ко страстьми́ непорабоще́нъ, ду́шу чи́сту поще́ніемъ, се́рдце ми́лостивно и слеза́ми умиле́нно, тѣ́ло же моли́твами къ Бо́гу служе́бно, Са́вво блаже́нне, стяжа́лъ еси́ и сло́во му́дростно смире́ніемъ украси́лъ еси́, ве́сь отъ ю́ности благонра́віемъ Христу́, о́тче, усво́ився, отъ Него́же первосвяти́тель, я́ко апо́столъ, лю́демъ твои́мъ дарова́лся еси́ досто́йно, я́же Ева́нгеліемъ породи́лъ еси́ и Правосла́віемъ обогати́лъ еси́. И ны́нѣ предстоя́ Христу́ Бо́гу, отъ вся́кихъ бѣ́дъ сія́ изба́вити, и спасти́ ду́ши на́ша, моли́ся.

Гла́съ 4:

Ева́нгельскихъ исто́чникъ словесы́ твои́ми, святи́телю, люде́й твои́хъ сердца́ напои́лъ еси́, и сѣ́мя благоче́стія въ ни́хъ моли́твами твои́ми возрасти́лъ еси́, и сія́ прине́слъ еси́ Христу́ пло́дъ изря́денъ. Ны́нѣ я́ко предстоя́ у Него́ съ ли́ки апо́столъ и святи́тель, помина́й къ Нему́ моли́твами твои́ми сохрани́ти ны́ отъ вся́каго озлобле́нія, я́ко въ ми́рѣ соверша́ти па́мять твою́.

Се́рбская вели́кая Це́рковь, со свяще́нными и кня́зи люде́й, и всѣ́ми вѣ́рными пра́зднующи въ па́мять благу́ю па́стыря и учи́теля, и веселя́щися, зове́тъ: ду́ши пра́ведныхъ въ руцѣ́ Бо́жіи, на́мъ же дарова́ святы́я и́хъ мо́щи. Пріиди́те, вѣ́рніи, духо́вно возвесели́мся, успе́ніе и моще́й пренесе́ніе, о́ба пра́зднства святы́хъ почита́юще, и си́хъ, я́ко цвѣ́ты, хвала́ми увязе́мъ, реку́ще: ра́дуйся, ми́лостыни пода́телю, Симео́не блаже́нне, человѣ́че небе́сный; ра́дуйся, чистоты́ оби́телище, Са́вво свяще́нне, земны́й а́нгеле; ра́дуйся, дво́ице свята́я, апо́стольски лю́ди своя́ научи́вшая и предте́кшая и́мъ пути́ живо́тнаго. Но я́ко Тро́ицѣ со а́нгелы предстоя́ще, ми́ръ земли́ на́шей испроси́те и душа́мъ на́шимъ ве́лію ми́лость.

Сла́ва, гла́съ 5:

Апо́столовъ сро́дныя чистоты́ жела́ніемъ плотскíя любве́ измла́да избѣжа́въ, тѣ́ло же неудобопокори́вое брозда́ми воздержа́нія обузда́въ, благопокори́во души́ повину́лъ еси́, по́мысла си́лою го́ршее лу́чшему покори́въ, Боже́ственнаго Ду́ха сосу́дъ бы́ти удосто́ився, пе́рвый сѣда́лище Се́рбское украси́лъ еси́ и лю́ди твоя́ богому́дрію научи́лъ еси́. И ны́нѣ у Христа́ предстоя́ дерзнове́нно, Са́вво блаже́нне, святи́телю богому́дре, прилѣ́жно къ Нему́ моли́ся спасти́ ду́ши пою́щихъ святу́ю па́мять твою́.

И ны́нѣ, богоро́диченъ, гла́съ то́йже:

Ра́дуйся, две́ре Бо́жія; ра́дуйся, раю́, Дѣ́во Чи́стая; ра́дуйся, стѣно́ и покро́ве; ра́дуйся, Пречи́стая; ра́дуйся, вѣ́рныхъ забра́ло необори́мое; ра́дуйся, ти́хое приста́нище къ Тебѣ́ прибѣга́ющихъ, Чи́стая.

На стихо́внѣ стихи́ры, гла́съ 2:

Кíими, я́ко вѣнцы́, похвала́ми украси́мъ Са́вву всеблаже́ннаго? Иже отъ Восто́ка мы́сленнаго, Христа́, со́лнце разу́мное возсія́, и лю́ди своя́ на за́падѣ богоразу́міемъ, научи́въ, просвѣти́, и я́ко вѣ́рный ра́бъ Влады́цѣ своему́ въ благоче́стіи си́хъ умно́жи. Сего́ у́бо Еди́ный досто́йнѣ безсме́ртныя сла́вы у́тварію украси́, Христо́съ Человѣколю́бецъ, имѣ́яй ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Кíими духо́вными пѣ́сньми похва́лимъ Са́вву свяще́ннаго? Имже Но́ваго Завѣ́та Бо́жія, скрижа́ли Ева́нгелія уразумѣ́хомъ, и́мже Правосла́вія вѣ́ру и́стинно позна́хомъ въ Тро́ицѣ служи́ти Еди́ному Бо́гу и, Бо́жіихъ та́инъ дале́че су́ще и учуждены́, бли́зъ и самосоверши́теле бы́хомъ, зако́номъ и обы́чаемъ христоимени́тіи лю́діе бы́хомъ, царя́ вѣнча́емъ, и святи́теля соверша́емъ, и, всѣ́ми благи́ми нра́вы украша́еми, Христа́ прославля́емъ, иму́щаго ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Кíими пѣ́сненными добро́тами ублажи́мъ тя́, Са́вво, о́тче досточу́дне? Житія́ бо свѣ́тлостію въ Бо́жій ра́зумъ приводя́ща вся́, и чудесы́ ди́вными удивля́еши. Якоже бо Илія́ о́гнь дре́вле, гра́дъ съ небе́съ моли́твою све́лъ еси́, бра́та же уме́рша оживи́лъ еси́, разсла́бленнаго воздви́глъ еси́, мо́ре, ры́бою дароноси́во, тебѣ́ повину́лъ еси́ и слука́го го́рбомъ испра́вилъ еси́, мно́га чудеса́ о Бо́зѣ сотвори́лъ еси́. Тѣ́мъ твою́ па́мять любо́вію пра́зднуемъ, Христа́ велича́юще, иму́щаго ве́лію ми́лость.

Сла́ва, гла́съ 4:

Боже́ственнаго Ду́ха благода́тію, собра́нніи, веселя́щеся, Симео́на, ло́зу благоче́стія, ублажи́мъ, отъ нея́же гро́здъ чистоты́, Са́вва всесвяще́нный, израсте́. Обою́ же пѣ́сньми похва́лимъ, мы́сленныя Це́ркве свѣти́льники, Тро́ическія побо́рники, ересе́й низложи́тели, іере́евъ лѣ́поту, мона́ховъ собра́ніе, ни́щихъ же утѣше́ніе, вся́кою добродѣ́телію бога́тыя, и́же у Христа́ ны́нѣ предстоя́ще, апо́стольскими я́ко досто́йно и по́стническими вѣнцы́ украша́еми. Къ ни́мже моле́бно возопіе́мъ: проси́те мíру ми́ра и душа́мъ на́шимъ ве́лія ми́лости.

И ны́нѣ, пра́здника или́ богоро́диченъ:

[При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.]

На благослове́ніи хлѣ́бовъ: Тропа́рь, гла́съ 3: Пути́, вводя́щаго въ жи́знь.., два́жды [пи́санъ на ма́лѣй вече́рни] и тропа́рь пра́здника или́ Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́евъ богодухнове́нное удобре́ніе, Са́вво прему́дре, уче́ньми твои́ми вся́ просвѣти́лъ еси́, цѣвни́це духо́вная. Моли́ Христа́ Бо́га спасти́ся душа́мъ на́шимъ. [Два́жды.]

Сла́ва, другíй тропа́рь, гла́съ 3: Пути́, вводя́щаго въ жи́знь... И ны́нѣ, богоро́диченъ: Тя́, хода́тайствовавшую...

По 1-й стихоло́гіи сѣда́ленъ, гла́съ 8. Подо́бенъ: Прему́дрости.

Ле́сть мíра, бога́тства и свѣ́тлости, вся́, ели́ка ви́димыхъ добро́тъ малолѣ́пія, и высо́кую любо́вь роди́теля преоби́дѣвъ, смире́ніемъ же къ нищетѣ́ уча́щему, Влады́цѣ Христу́ послѣ́довалъ еси́. Отъ Него́же поще́ніемъ и моли́твами и́стинное бога́тство и су́щую свѣ́тлость, Ца́рство недви́жимо и во вѣ́ки благобы́тіе, Са́вво о́тче, наслѣ́довалъ еси́. Къ Нему́же ны́нѣ моли́ся грѣхо́въ оставле́ніе пода́ти чту́щимъ любо́вію святу́ю твою́ па́мять. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

По 2-й стихоло́гіи сѣда́ленъ, гла́съ 3: Подо́бенъ: Боже́ственныя вѣ́ры.

Добродѣ́телей дѣ́ланіемъ Це́ркви вели́кое возсія́лъ еси́ со́лнце, и сія́ніемъ слове́съ твои́хъ просвѣти́лъ еси́ вѣ́рныхъ люде́й твои́хъ собо́ры, и потреби́лъ еси́ страсте́й очерне́ніе, святи́телю Са́вво, Христа́ Бо́га моли́ дарова́ти на́мъ ве́лію ми́лость.

Другíй сѣда́ленъ. Подо́бенъ: Красотѣ́ дѣ́вства.

Сто́лпъ и утвержде́ніе Це́ркве Христо́вы, о́тче, бы́въ, сію́ непоколеби́му отъ искуше́ній лука́ваго, прему́дре, соблю́лъ еси́: вся́ бо е́реси злодѣ́йства разори́лъ еси́ и лю́ди твоя́ научи́лъ еси́ Тро́ицѣ Единосу́щнѣй во Еди́номъ Божествѣ́ служи́ти. Тѣ́мже, соше́дшеся, почита́емъ тя́, Са́вво богому́дре.

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

[Велича́ніе:

Велича́емъ тя́, святи́телю о́тче Са́вво, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8. Подо́бенъ: Прему́дрости.

Воздержа́ніемъ житіе́ украси́въ и житіе́мъ му́дрости сло́во увѣря́я, изря́денъ къ добродѣ́тели наказа́ніемъ яви́лся еси́, отъ зако́на и проро́ковъ апо́стольски науча́я о Христѣ́ Іису́сѣ, лю́ди твоя́ Ева́нгеліемъ породи́лъ еси́ и сія́ Правосла́вія вѣ́рою возрасти́лъ еси́. Тѣ́мже и по концѣ́ неконча́ему благода́ть прія́лъ еси́ и, во гро́бѣ лежа́, неразруши́мь пребыва́еши, Са́вво о́тче, святи́телю богоблаже́нне, моли́ Христа́ Бо́га согрѣше́ній проще́ніе пода́ти чту́щимъ любо́вію святу́ю твою́ па́мять. [Два́жды.]

Сла́ва, и ны́нѣ, богоро́диченъ. Подо́бенъ то́йже:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нія мя́ су́ща скве́рное оби́телище и де́моновъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тло жили́ще добродѣ́телей соверши́, свѣтоно́сная, нетлѣ́нная. Отжени́ о́блакъ страсте́й и Вы́шняго прича́стія сподо́би и свѣ́та невече́рняго, моли́твами Твои́ми.

Та́же степе́нна, 1-й антифо́нъ 4-го гла́са. Проки́менъ, гла́съ 4: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Та́мо возращу́ ро́гъ Дави́дови, угото́вахъ свѣти́льникъ пома́занному Моему́. Вся́кое дыха́ніе... Ева́нгеліе Матѳе́я, зача́ло 11.

Псало́мъ 50-й. Стихи́ра, гла́съ 6:

Ду́ха Свята́го благода́ть въ твои́хъ устна́хъ излія́ся, о́тче, и бы́лъ еси́ па́стырь Христо́вы Це́ркве, уча́ слове́сныя о́вцы, лю́ди твоя́, вѣ́ровати въ Тро́ицу, во Еди́но Божество́.

Кано́нъ Богоро́дицы, на 6 и свята́го два́ кано́на, на 8.

Кано́нъ Богоро́дицы, гла́съ 6.
Пѣ́снь 1.

Ирмо́съ: Волно́ю морско́ю Скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Ра́дуйся, отце́мъ благопохва́льная держа́во; ра́дуйся, пресла́вное украше́ніе ро́да на́шего; ра́дуйся, исто́чниче спасе́нія, источа́ющая ми́лость вѣ́рно прося́щимъ у Тебе́, Марíе Неискусобра́чная.

Пріими́ отъ у́стъ скве́рныхъ хвалу́, Дѣ́во Пречи́стая, Богороди́тельнице Чи́стая, Ты́ бо еси́ мíру защище́ніе и спасе́ніе, прилѣ́жно моли́ спасти́ся душа́мъ на́шимъ.

Хлѣ́бъ жи́зни, Христа́, родила́ еси́, Дѣ́во, вся́ческихъ Творца́, къ Нему́же моли́твами Твои́ми, Ма́ти, свободи́ отъ вся́каго грѣха́, бѣ́дъ и печа́лей вся́кихъ пою́щія Тя́.

Кано́нъ свята́го Са́ввы, его́же краестро́чіе: Са́вву похвали́ти ра́зума, Бо́же мо́й, да́руй ми́. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Іису́су: Свѣ́тъ отъ Свѣ́та, Христе́ Бо́же, отъ Отца́ пре́жде вѣ́къ рожде́йся и въ нача́лѣ Сы́й со Отце́мъ и Ду́хомъ, мра́къ души́ моея́ отгна́въ, озари́ у́мъ мо́й, молю́ся, я́ко да возмогу́ пѣ́ти Твоего́ уго́дника, Са́вву свяще́ннаго.

Аще и человѣ́къ еси́, о́тче, естество́мъ, но а́нгельски на земли́ пожи́лъ еси́, десна́го изъ ю́ности пути́ е́мься, цѣлому́дрія рачи́тель бы́въ, Ду́ха Свята́го честно́е оби́телище, Са́вво всесвяще́нне, яви́лся еси́.

Возлюби́въ му́дрости нача́ло — стра́хъ Бо́жій и за́повѣдемъ Его́ при́сно поуча́яся, дре́во насади́лся еси́ при исхо́дящихъ во́дъ духо́вныхъ, отъ ни́хже, о́тче, напая́емь, пло́дъ Христу́, Са́вво, прине́слся еси́.

Богоро́диченъ: Услы́ша Ева прама́ти, Чи́стая: въ печа́лехъ роди́ши ча́да. Ты́ же, Дѣ́во, услы́шала еси́: Госпо́дь съ Тобо́ю, ра́дуйся! И ра́дованнымъ гла́сомъ, Богоневѣ́сто, печа́ль прама́тере потреби́ла еси́.

Кано́нъ вторы́й свята́го Са́ввы. Въ не́мже о чудотворе́ніи его́. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Похваля́ющу мнѣ́ твое́ житіе́, ко Христу́ твое́ дерзнове́ніе я́ко стяжа́въ, отъ бога́тыхъ Ду́ха сокро́вищъ ка́плю ра́зума, о́тче, да́ти ми́ молю́ся, я́ко да досто́йно похвали́ти тя́ возмогу́, хвалы́ досто́йнаго.

Изъ ко́рене блага́го блажа́йшая о́трасль прозя́блъ еси́, Бо́жія ра́зума вода́ми напая́емь, и пло́дъ благоуха́ненъ яви́лся еси́, житіе́мъ твои́мъ изъ ю́ности, богоно́се, сердца́ и ду́ши весели́ши пою́щихъ тя́.

О, прему́драго твоего́ къ Бо́гу ра́зума! Имже прехи́трилъ еси́ отца́ твоего́, еле́ня лови́твою Христу́, о́тче, въеле́нивъ ду́шу твою́, Его́же любо́вію жго́мый, ко исто́чнику безсме́ртія Тому́ прите́клъ еси́.

Па́че ума́ су́щихъ любо́вію небе́сныхъ добро́тъ подви́жимь, земны́хъ малолѣ́пія избѣжа́въ, еле́ня тече́ніемъ Христа́ взыска́лъ еси́, отъ Него́же жела́емыхъ, Са́вво о́тче, не погрѣши́лъ еси́.

Чистоты́ любо́вію одержи́мь, благоро́діе души́ плотолю́біемъ не порабо́тивъ, тѣ́мъ, ны́нѣ чистоты́ вѣнцы́ пріе́мля, со а́нгелы у Христа́ весели́шися, къ Нему́же о на́съ, Са́вво о́тче, моли́ся.

Богоро́диченъ: Яже отъ земли́ до небе́съ дося́гшая Лѣ́ствица показа́ся Іа́кову, Еюже Бо́гъ Человѣ́комъ сподо́бися бы́ти, Благослове́нная Пречи́стая, неизрече́нно чу́до и недоумѣва́емо видѣ́ніе. Спаса́й къ Тебѣ́ прибѣга́ющія.

Катава́сія по уста́ву.

Пѣ́снь 3.

Ирмо́съ: Тобо́ю, Христе́, небеса́ утвержда́ема вся́, Сло́во Бо́жіе и Си́ла, исповѣ́дуютъ сла́ву неизрече́нну и вседѣ́тельныя руки́ Твоея́ сотворе́ніе, нѣ́сть бо пресвя́тъ, ра́звѣ Тебе́, Го́споди..

Тебе́ вси́, Всесвята́я, сла́вятъ чи́ни а́нгелъ, мы́ же, Богоро́дице, непреста́нно зове́мъ и благода́рно пое́мъ: ра́дуйся, Влады́чице, еди́на по́моще всѣ́хъ и заступле́ніе.

Кто́ по достоя́нію, Ма́ти, воспое́тъ Рождество́ Твоея́ утро́бы? Тва́рь, ви́дѣвши соверше́нное въ Тебѣ́ та́инство, чуде́сно зовя́ше: нѣ́сть у́бо, Влады́чице, па́че Тебе́, ино́го спасе́нія на́мъ.

Приложи́ прося́щимъ отъ Тебе́ ми́лость, Ма́ти Дѣ́во, держа́вною Твое́ю руко́ю су́щимъ въ бѣда́хъ просте́рши и въ напа́стехъ предвари́вши, Тя́ бо стяжа́хомъ вси́ избавле́ніе въ ско́рбехъ.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Презрѣ́въ ни́жняя, я́ко попира́емая, и любо́вь роди́телей преоби́дѣвъ, пустыннолю́бно Христа́ взыска́лъ еси́, Его́же мече́мъ любве́ уязви́въ ду́шу твою́, Того́ любя́ и Того́ ища́ ненасыща́емыя красоты́.

О всѣ́хъ су́щихъ на земли́ неради́въ, звѣре́й лови́твою у роди́телей испроси́вся, пусты́ню, о́тче, пости́глъ еси́, идѣ́же мно́гимъ поще́ніемъ, ско́рымъ же бдѣ́ніемъ и моли́твами душегуби́тельныя звѣ́ри — стра́сти умертви́лъ еси́.

Христа́, на́съ ра́ди смири́вшагося во́лею до ра́бія о́браза, возлюби́въ смире́ніе, и́мже высо́къ бы́въ, го́рдаго смири́лъ еси́ и во пло́ти мно́гимъ воздержа́ніемъ Тро́ицы до́мъ благооби́теленъ, Са́вво свяще́нне, удосто́ился еси́.

Богоро́диченъ: Во инѣ́хъ жена́хъ ма́ти, до́ндеже дѣ́ва, не позна́ся, ни ма́ти по рождествѣ́ дѣ́вствовати сподо́бися, на Тебѣ́ же, Дѣ́во Богома́ти, обоя́ сбы́шася. Тѣ́мъ весе́ліемъ ду́ха воспѣва́ю: нѣ́сть непоро́чны, па́че Тебе́, Влады́чице.

Инъ.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

На го́ру ра́зума добродѣ́телей возше́дъ, въ чу́вственнѣй же горѣ́ Аѳо́нъ, я́ко ина́го Исаа́ка подо́бно, сама́го себе́ возве́лъ еси́, идѣ́же, я́ко всесожже́нія овча́, се́рдце твое́ мы́сленно поже́рлъ еси́.

Свѣти́льникъ — твою́ ду́шу слеза́ми украша́я, ра́но ко Христу́ у́тренюя, ру́къ же просте́ртіемъ въ моли́твахъ Амали́ка — тѣ́ло умертви́лъ еси́ и на го́ру безстра́стія возше́лъ еси́.

Безстра́стія любо́вію пострѣка́емь, плотска́я взыгра́нія изсуши́лъ еси́, ду́шу же твою́ Боже́ственными сія́ніи просвѣти́въ, и на́мъ у́бо свѣ́тъ разу́мный, Са́вво о́тче, улучи́ти моли́ся.

Юности цвѣ́тъ гла́домъ увяди́въ, воздержа́ніемъ у́ды умертви́въ, поще́ніемъ тѣ́ла отве́рглся еси́, бдѣ́ніемъ и моли́твами возмога́я, о Го́сподѣ же любо́вію верха́ добродѣ́телей, Са́вво, дости́глъ еси́.

Благоро́діемъ высо́къ и доброду́шіемъ изя́щенъ, ра́зума му́дростію удивле́нъ бы́лъ еси́, цвѣ́тъ я́ко прекра́сный, чистото́ю сія́я, и свѣ́тлымъ смире́ніемъ, Са́вво о́тче, украси́лся еси́.

Богоро́диченъ: Ма́ти Бо́жія Пречи́стая, Благослове́нная и Всенепоро́чная, души́ моея́ стру́пы исцѣли́, и стра́сти плотскíя отжени́, и свободи́ у́мъ мо́й отъ вся́каго вре́да, и отъ вра́жія мя́ напа́сти изми́, Влады́чице.

Сѣда́ленъ, гла́съ 8. Подо́бенъ: Прему́дрости.

Па́влово насажде́ніе, и Аполло́сово пріе́мый напое́ніе, и ва́шея вѣ́ры насажде́ніе, и уче́ніемъ напое́ніе, вся́ возраща́яй Бо́гъ прія́лъ е́сть. Люде́й ва́шихъ благоче́стія вѣ́рою, моли́твами ва́шими возрасти́въ, умно́жи, отъ Того́ я́ко вѣ́рніи раби́ и дѣ́латели разу́мніи трудо́въ возме́здія досто́йно прія́ли есте́, Симео́не преподо́бне, Са́вво свяще́нне, богоно́сніи отцы́, па́стыріе и учи́теліе, Первопа́стыря и Учи́теля Христа́ моли́те ста́до ва́ше въ ми́рѣ сохрани́ти и спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Ты́ еси́ мíра заступле́ніе, Богоро́дице Чи́стая, и спасе́ніе всѣ́хъ. Тѣ́мже Тя́ гла́сы, Влады́чице, вся́ колѣ́на Богоро́дицу и́стинно проповѣ́дуемъ.

Стѣна́ еси́, и утвержде́ніе, и наде́жда вѣ́рныхъ, и сто́лпъ спасе́нія, я́же на ны́ нахо́ды низложи́, Пресвята́я Чи́стая, наде́жды бо вся́ на Тя́ возложи́хомъ.

Ра́дуйся, гра́де одушевле́нный; ра́дуйся, пала́то и престо́ле Царя́ Христа́; ра́дуйся, преподо́бныхъ похвало́ и святи́телей удобре́ніе; ра́дуйся, всѣ́хъ къ Бо́гу мо́сте; ра́дуйся, мíра ра́досте.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Ангельскому житію́ ревнова́въ, влады́чествующа отца́ оста́вивъ, горы́ Аѳо́на дости́глъ еси́. Отону́дуже поще́ніемъ и моли́твами къ мы́сленному Восто́ку, Христу́, восте́клъ еси́ и отъ Того́ со́лнце за́паднымъ возсія́лъ еси́.

Любому́дріемъ мо́ре жите́йское испыта́въ и позна́въ су́етства глубину́, бога́тство и сіе́, я́ко гни́ло, отве́рглъ еси́, словеса́ же Христо́ва избра́въ, въ сосу́дѣ се́рдца твоего́ скры́лъ еси́ и о́ная, я́ко честна́я, изво́лилъ еси́ храни́ти.

Иже въ гора́хъ тѣсноживу́щія босы́ми нога́ми обходя́, преподо́бне, и си́хъ те́плыми хлѣ́бы насыща́я, те́плыя и́хъ пріима́лъ еси́ моли́твы и отъ всѣ́хъ ко Христу́ поуче́ньми восхожде́нія въ се́рдцы твое́мъ полага́лъ еси́.

Ты́ ро́ждшаго тя́ пло́тію Ду́хомъ породи́лъ еси́, увѣща́въ его́ влады́чество, све́рстницу же и ча́да оста́вити, и́же, я́ко Авраа́мъ изъ оте́чества на зе́млю чу́жду, къ тебѣ́, о́тче, въ пусты́ню пресе́льникъ и спо́стникъ бы́сть.

Богоро́диченъ: Истинно Тя́ сѣ́нь свидѣ́тельствова, многоразли́чно образу́юща, я́вѣ показу́ющи воплоще́ннаго изъ Тебе́ Еди́наго отъ Тро́ицы, Пречи́стая, неизмѣ́нно, Богома́ти Влады́чице, и мíръ обно́вльша.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Многочи́сленное зла́то со отце́мъ разда́вше, о́ба, я́ко му́дріи домовлады́ки, тлѣ́нными нетлѣ́нная измѣни́вше, я́же ны́нѣ воспріе́млюще, ра́дуетеся, и на́съ ко Христу́ моли́твами ва́шими, пою́щихъ, вы́ спаса́йте.

Человѣ́ка отца́ призва́лъ еси́, а́нгела же ко Христу́ предпусти́лъ еси́, его́же посто́мъ иста́явшія святы́я мо́щи мѵроточе́ніе моли́твами твои́ми устро́илъ еси́, въ кра́йнее извѣще́ніе се́рдца твоего́ проше́нія.

Суему́дренный го́тѳинъ, братовоскормле́ніе ва́ше, и стра́хъ Бо́жій, и кля́тву преоби́дѣвъ, потща́ся оте́чество твое́ озло́бити, его́же такова́го у́мысла премѣни́ти не возмо́гъ, Бо́жію суду́ того́ пре́далъ еси́.

Поху́ленъ, и́же му́дръ о себѣ́, я́ко и се́й несмы́сленный, благосовѣ́тующа тя́ не пріе́мь, Бо́жію ме́сть на ся́ привлече́: ме́чь бо, его́же на па́ству твою́, о́тче, наостри́, а́нгеломъ всеконе́чно въ се́рдце свое́ прія́ше.

Просвѣща́еми благода́тію Креста́ Твоего́ святíи Твои́, Влады́ко, страну́ люде́й свои́хъ Тебѣ́ вѣ́рою приведо́ша, сы́нъ со отце́мъ, Са́вва и Симео́нъ богому́дренніи, и́хже моли́твами спаси́ отъ пога́ныхъ нахо́да пою́щія: си́лѣ Твое́й сла́ва, Милосе́рде.

Богоро́диченъ: Но́въ, я́коже Моисе́й, яви́вся, устро́илъ еси́, я́ко о́нъ, ски́нію въ пусты́ни, въ горѣ́ святѣ́й огра́ду, ю́же превозрасти́лъ еси́ трудо́въ твои́хъ по́ты и возложи́лъ еси́ Бо́жіи Ма́тери, ю́же и сохраня́й ко Го́споду съ Не́ю моли́твами.

Пѣ́снь 5.

Ирмо́съ: Къ Тебѣ́ у́тренюю, милосе́рдія ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жій: ми́ръ пода́ждь ми́, па́дшему, Человѣколю́бче.

Ра́дуйся, стѣно́ вѣ́рныхъ, держа́вная хода́таице, Пречи́стая; ра́дуйся, горо́ свята́я, Всепѣ́тая; ра́дуйся, лѣ́ствице одушевле́нная, Влады́чице; ра́дуйся, всѣ́хъ ра́досте, и по́моще безпомо́щныхъ, и покро́ве вседу́шно притека́ющихъ къ Тебѣ́.

Велегла́сно взыва́я, проро́ческій ли́къ проповѣ́даше ужа́сное рождества́ Твоего́ та́инство: я́ко еди́на имѣ́ла еси́ Го́спода въ ложесна́хъ Свои́хъ, Иже и по рождествѣ́ па́ки соблю́дъ Тя́ Дѣ́ву, я́коже и пре́жде рождества́ сохрани́.

Кто́ возмо́жетъ Твоя́, Чи́стая, я́же па́че ума́, несказа́нная та́инства человѣ́ковъ изрещи́, Пречи́стая? Ты́ бо еди́на всѣ́хъ превы́шши еси́, свѣтоно́сная и Боже́ственная сѣ́не, свѣще́ и престо́ле Бо́жій, Дѣ́во Марíе, изъ Нея́же на́мъ возсія́ Садодѣ́латель жи́зни.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Ра́зума твоего́ ре́вность Предвѣ́дый ви́дѣвъ, пе́рваго тя́ па́стыря на за́падѣ лю́демъ Свои́мъ устро́и, и́мже мы́сленнаго Восто́ка, Того́ вопло́щшася Сло́ва Христа́, проповѣ́далъ еси́, ра́вна же Отцу́ и Ду́ху Свято́му сопресто́льна.

Авситидíйскаго Іова нра́вомъ вои́стинну, о́тче, подо́бяся, до́мъ тво́й отве́рстъ имѣ́лъ еси́ и, язы́ка две́рь па́че ме́да сла́достію а́лчущимъ спасе́ніе отверза́я, ду́ши испо́лнилъ еси́ слове́съ а́нгельскія пи́щи.

Зако́номъ Боже́ственнымъ послѣ́дуя, законополо́жникъ яви́лся еси́, архіере́й богопрія́тенъ, пра́вило извѣ́стнѣйшее, наста́вникъ заблу́ждшихъ, свѣти́льникъ всесвѣ́телъ, оте́чество твое́ просвѣща́я, Са́вво богому́дре.

Богоро́диченъ: Упра́ви у́мъ мо́й, Влады́чице, тружда́ющійся въ пучи́нѣ скорбе́й и потопля́емый наше́ствіемъ тлетво́рныхъ страсте́й, мене́ же спаси́, Богоро́дице, къ Тебѣ́ прибѣга́ющаго, ины́я бо по́мощи, Чи́стая, ра́звѣ Тебе́, не зна́ю.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Яко Госпо́день учени́къ, Влады́ки твоего́ благоутро́біе, о́тче, подража́я, разсла́бленнаго въ це́рковь не́слъ еси́. Врачева́ніемъ же, ко Христу́ моли́твами и слеза́ми, обно́щно прилѣжа́въ ему́, здра́ва отъ земли́ воздви́глъ еси́.

Ста́рцу свято́му, твоему́ отцу́, въ животѣ́ его́ послушли́въ бы́лъ еси́, у́меръ же о́нъ и во гро́бѣ тебе́ еди́наго послу́ша: мѵ́ро бо его́, мно́гими проси́мо и не улучи́мо, твои́мъ, о́тче, посла́ніемъ оби́льно лю́демъ свои́мъ сіе́ источи́.

Другíй Илія́ ты́ яви́лся еси́, гра́дъ съ небесе́ моли́твою, я́коже о́нъ о́гнь, све́лъ еси́ и, си́мъ царя́ удиви́въ, ужаси́лъ еси́: въ сла́ву Бо́жію и проти́внымъ на удивле́ніе сія́, о́тче, сотвори́лъ еси́, о всѣ́хъ возмога́ющу тя́ Христу́ Бо́гу на́шему.

Сопоста́тъ, ца́рь у́гринъ, на оте́чество твое́ подви́гся, твои́ми словесы́ свирѣ́пства премѣни́ся, дивя́ся су́щей въ тебѣ́ свя́тости, умили́вся, возврати́ся, гра́дное же ка́меніе лобза́я, глаго́лаше: ди́венъ Бо́гъ во святы́хъ Свои́хъ.

Ка́мене краеуго́льна, иму́ща въ се́рдцы Христа́ утвержде́ніе, пре́лести утвержде́ніе си́льно испрове́ргша, Це́ркви же необори́мое основа́ніе яви́стеся, Юже сохраня́йте непоколеби́му, Са́вво свяще́нне и Симео́не богоно́се, моли́твами ва́шими.

Богоро́диченъ: Ко Христу́ Бо́гу вхо́да жела́юще, предводя́щую Тя́ взыска́вше, су́щей Ти́ небе́снѣй Бо́жіей Це́ркви, хра́мъ Твоего́ вхо́да на земли́ Твои́ уго́дницы, Богома́ти, воздвиго́ша, въ не́мже не преста́й даю́щи по́мощь сла́вящимъ Тя́.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Тебѣ́ припа́даю, Пречи́стая Богоро́дице Блага́я, Твои́ми моли́твами умоли́ вся́кія бла́гости Пода́теля, Сы́на Твоего́ и Го́спода, изба́вити мíръ отъ вся́каго гнѣ́ва.

Во глубину́ отве́рженъ бы́хъ бу́ри лю́тыя, мо́рю волну́ющу мя́ отъ безмѣ́рныхъ прегрѣше́ній мои́хъ и бѣ́дныхъ. Бу́рю утоли́ и тишину́ пода́ждь се́рдцу моему́.

Ты́ утѣше́ніе и прибѣ́жище, Чи́стая, рабо́мъ Твои́мъ еси́: неоску́дно твори́ е́же къ Бо́гу умиле́нное моле́ніе о и́же вѣ́рою и любо́вію моля́щихъ Тя́.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Мра́комъ е́реси покрыва́ема земля́ люде́й твои́хъ иногда́, ны́нѣ Правосла́вія свѣ́томъ свѣтлѣ́ется, ве́тхія пре́лести измѣ́ньшися, но́вый Изра́иль и лю́діе Бо́жіи бы́вше, на и́стинный зако́нъ тобо́ю, богоно́се, наставля́еми.

Апо́столъ я́ко, отъ Христа́ посла́ся и, сло́вомъ Ева́нгелія науча́я, су́щія въ нощи́ невѣ́дѣнія просвѣти́лъ еси́; исцѣле́нія же творя́ и чудеса́ ве́лія и си́ми удивля́я, привле́клъ еси́ къ Нему́ вѣ́рою люде́й твои́хъ исполне́нія.

Бо́льшихъ ища́, лу́чшая жела́я, Іерусали́ма у́бо, Еги́пта же и Сина́я доше́дъ и вся́, та́мо су́щія, въ пусты́няхъ обходя́, оби́льною руко́ю на всѣ́хъ призира́я, и́хже моли́твами оте́чество твое́, Са́вво, обогати́лъ еси́.

Богоро́диченъ: Обветша́вшія ны́ го́рькимъ дре́ва пре́жде вкуше́ніемъ и па́дшія поползнове́ніемъ, Пречи́стая, обнови́ла еси́, Зижди́теля ро́ждши, Сло́во Ѵпоста́сное, Дѣ́во Ма́ти Влады́чице.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Пресвѣ́тлыя Тро́ицы пе́рвѣе же́ртвенникъ се́рдце твое́ сотвори́лъ еси́ и це́рковь Бо́гу Спа́су во оте́чествѣ твое́мъ воздви́глъ еси́, въ не́йже, о́тче, первопресто́ленъ равноапо́стольный учи́тель отъ Христа́ удосто́ился еси́ и сло́во жи́зни лю́демъ твои́мъ источи́лъ еси́.

Бра́та твоего́ уме́рша слы́шавъ, а́нгелу, ко Христу́ дерзнове́ніемъ, ду́шу его́ возврати́ти повелѣ́лъ еси́, и сего́ вдушевле́нна, прише́дъ, обрѣ́лъ еси́. Оле, вѣ́ры! Оле, дерзнове́нія! Чу́до, о́тче, вои́стинну ужа́сно: зе́менъ сы́й, небе́сному повелѣ́лъ еси́.

Мы́сленное мо́ре страсте́й успи́въ поще́ніемъ, чу́вственное же, бе́здну ми́лости призва́въ, свирѣ́по волну́емо, сло́вомъ укроти́лъ еси́, кора́бль же спа́слъ отъ потопле́нія и въ не́мъ су́щія въ вѣ́ру приве́лъ еси́.

Его́же вся́ боя́тся и трепе́щутъ я́ко Творца́ и Го́спода, Іису́са Христа́ всего́ стяжа́въ, Христа́ въ се́рдцы твое́мъ нося́, Христа́ въ себѣ́ имѣ́я, глаго́люща, мо́рю и вѣ́тромъ Того́ си́лою запрети́лъ еси́, и вся́, о́тче, повину́шася тебѣ́, я́ко Того́ изя́щну ученику́.

Тро́иченъ: Пренача́льное Естество́ и Тріѵпоста́сное Еди́нство: Отче и Сы́не и Ду́ше Пресвяты́й, Свѣ́те и Животе́ Богонача́льный, пріими́ моли́твенники о на́съ Твоя́ уго́дники, спаса́й Це́ркви Твоя́, въ Тя́ вѣ́рующія, и сподо́би ны́ въ ми́рѣ сла́вити Твою́ держа́ву.

Богоро́диченъ: Ви́дѣти жела́юще Твоего́ Сы́на и Бо́га, небе́снаго сла́ву Ца́рствія, Богоро́дице, Са́вва и Симео́нъ преподо́бніи, сла́ву земна́го ца́рствія оста́вивше и Сего́ Кре́стъ на ра́му взе́мше, послѣ́доваша живоно́снымъ Его́ и Боже́ственнымъ стопа́мъ.

Конда́къ, гла́съ 8. Подо́бенъ: Взбра́нной.

Яко первосвяти́теля вели́каго и апо́столовъ соо́бщника, Це́рковь прославля́етъ тя́ люде́й твои́хъ, преподо́бне, но я́ко имѣ́я дерзнове́ніе ко Христу́ Бо́гу, моли́твами твои́ми отъ вся́кихъ на́съ бѣ́дъ спаса́й, да зове́мъ ти́: ра́дуйся, о́тче Са́вво богому́дре.

Икосъ:

Житіе́мъ, я́ко а́нгелъ на земли́, о́тче, яви́лся еси́, человѣ́къ бо сы́й естество́мъ, и безпло́тныхъ чистотѣ́ уподо́бился еси́. Тѣ́мже и похва́льная удивля́еши на́съ зва́ти такова́я: ра́дуйся, отца́ благочести́ва прозябе́ніе и ма́тере благоговѣ́йны прижи́тіе; ра́дуйся, моли́твами, богода́нне, и да́вшему тя́ измла́да послѣ́довавъ; ра́дуйся, поще́нія свѣ́тлый ра́сте, чистото́ю благоуха́нне; ра́дуйся, цѣлому́дрія сто́лпе, и́мже вся́кая стра́сть попра́ся; ра́дуйся, смире́ніемъ высо́кій, де́моновъ горды́ню низложи́вый; ра́дуйся, свѣти́льниче многосвѣ́тлый, возведы́й ко Христу́ лю́ди твоя́; ра́дуйся, це́рквей воздви́женіе и святи́телемъ освяще́ніе; ра́дуйся, сиро́тъ пита́телю и ни́щимъ пода́телю благоутро́бный; ра́дуйся, апо́столовъ равноре́вностне ева́нгельскимъ науче́ніемъ; ра́дуйся, му́ченикомъ сострада́льне стра́нствія хожде́ніемъ; ра́дуйся, чудодѣ́лателю ди́вныхъ о Бо́зѣ и ужа́сныхъ чуде́съ; ра́дуйся, похвало́ оте́честву твоему́, спаса́й пою́щихъ тя́. Ра́дуйся, о́тче Са́вво богому́дре.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Не преста́й, Дѣ́во Ма́ти, моля́щи Го́спода изба́витися на́мъ отъ бѣ́дъ и скорбе́й, Влады́чице, да усе́рдно пое́мъ Влады́цѣ: Бо́же оте́цъ на́шихъ, благослове́нъ еси́.

Страша́тъ мя́ и смуща́ютъ прегрѣше́ній мои́хъ во́лны, но Ты́, Блага́я Пречи́стая, проще́ніе испроси́ въ ча́съ испыта́нія, спасе́ніе подаю́щи.

И ражда́еши, и дѣ́вствуеши, и по рождествѣ́ пребыва́еши, я́коже пре́жде рождества́, Чи́стая Богоро́дице: не опали́шася бо ложесна́ Твоя́, Благослове́нная Пречи́стая, Предста́тельнице ро́да на́шего.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Житія́ твоего́ богоуго́дное зря́ исправле́ніе, Провѣ́децъ, я́ко всѣ́хъ Бо́гъ, избра́въ тебе́, сочта́ апо́стольскому ли́ку первосвяти́тель, богоно́се, и благода́тію просвѣти́ се́рдце твое́; ты́ же лю́ди твоя́ Тому́ просвѣти́лъ еси́ вопи́ти: благослове́нъ Бо́гъ и препросла́вленъ.

Ева́нгельскихъ слове́съ луча́ми лю́ди твоя́ разу́мно озари́въ, отъ недосто́йнаго въ досто́йное изве́лъ еси́ и изсо́хшая и́хъ сердца́ зловѣ́ріемъ о Бо́зѣ вѣ́рою плодови́та, Са́вво о́тче, воздѣ́лалъ еси́.

Ми́лостивъ у́бо и кро́токъ, преподо́бенъ и беззло́бивъ, ти́хъ же и увѣ́тливъ яви́лся еси́, я́коже Па́велъ, о Христѣ́ похваля́я, рече́: тако́въ на́мъ подоба́ше Архіере́й. Его́же моли́, Са́вво архіере́ю, въ ми́рѣ сохрани́ти ста́до твое́.

Богоро́диченъ: Обновля́ются въ Тебѣ́ зако́ны естества́: вы́ше естества́ бо, естество́мъ Непости́жнаго Бо́га, Дѣ́во, Емману́ила пресла́вно, Чи́стая, родила́ еси́ въ на́ше вѣ́рныхъ возрожде́ніе.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Христа́, на́съ ра́ди пло́тію на земли́ во́лею стра́нствовавша, любо́вію, о́тче, побѣжда́емь, престо́ла высоту́ во́лею оста́вивъ, восто́ку же, и за́паду, и глубина́мъ морски́мъ, я́ко со́лнце, обхо́дно стра́нствовалъ еси́.

Яко Христо́въ учени́къ, и нача́льникъ, отъ Него́ поста́вленъ, оте́чествія чужди́хъ обходя́, пріе́млемь сы́й отъ ни́хъ и люби́мь, удивле́нъ же, о́тче, и дароноси́мь: покаря́ше бо вся́ су́щая въ тебѣ́ Бо́жія любо́вь, кро́тость же и беззло́біе.

Иже бе́здну Сотвори́вый велѣ́ніемъ, Того́ ученика́ сія́ позна́вши тя́, въ болѣ́зни твое́й тебѣ́, о́тче, послужи́, ры́бу вели́ку, я́ко рука́ми, волно́ю взе́мши и, въ корабли́ тебѣ́ возлежа́щу, въ твои́ ру́цѣ предложи́.

Въ корабли́ пучи́ну съ тобо́ю плову́щіи, мо́ре, повину́вшееся тебѣ́ и дароноси́мо, ви́дѣвше, у́жасомъ, о́тче, одержи́ми бы́вше, отъ безду́шнаго научи́вшеся въ Бо́жій ра́зумъ, умили́вшеся, поклони́шася твое́й свя́тости.

Твоего́ се́рдца жела́ніе исполня́я, его́же ра́ди по земли́ стра́нствовалъ еси́, въ чужестра́нственнѣмъ гра́дѣ Бо́гъ ду́хъ тво́й пріе́млетъ, и́хже въ животѣ́ чудесы́ и по сме́рти пе́рстію гро́ба и гро́бомъ удиви́лъ еси́.

Богоро́диченъ: Стопа́мъ послѣ́дуя собо́ръ преподо́бныхъ изъ чре́ва Твоего́ неизрече́нно Возсія́вшему неизглаго́ланнымъ рождество́мъ, Дѣ́во Ма́ти, съ небе́сными ли́ки сочта́ся. Съ ни́миже мо́лимся: испроси́ на́мъ, чту́щимъ Тя́, грѣхо́въ оставле́ніе.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Ты́ прибѣ́жище на́ше еси́ и утѣше́ніе всѣ́хъ, Пречи́стая Дѣ́во: се́ бо Иже всѣ́хъ Госпо́дь, ро́ждся изъ ложе́снъ Твои́хъ, Дѣ́ву Тя́ соблюде́ по рождествѣ́. Его́же вси́ благослови́мъ устна́ми недосто́йными и превозно́симъ во вѣ́ки.

О, кíй язы́къ дово́ленъ вели́чія Твоя́ повѣ́дати, Чи́стая! Се́ бо все́ свободи́ся земноро́дныхъ мно́жество отъ вся́каго осужде́нія пе́рваго и Тебѣ́, вопію́ще, пое́тъ, источа́юще пѣ́нія и превознося́ще Пречи́стое Твое́ Рождество́.

Ми́лостива испроси́ на́мъ и благопремѣ́нна Сы́на Твоего́ и Бо́га бы́ти, Чи́стая, ны́нѣ рабо́мъ Твои́мъ, и соблюди́ на́съ отъ вся́каго прило́га сопроти́вна, и ага́рянскую горды́ню низложи́ вско́рѣ, да Тя́ пое́мъ во вся́ вѣ́ки.

Инъ.

Ирмо́съ: Свѣщено́сцы душе́ю, свѣ́тліи, па́че снѣ́га пресія́юще, преподо́бніи о́троцы посредѣ́ пла́мене не опали́шася: вся́ бо вку́пѣ, ели́ка подъ тва́рію, къ Бо́жіи пѣ́сни себѣ́ созыва́юще, съ ра́достію поя́ху: по́йте, дѣла́ Госпо́дня, Го́спода.

Во святы́хъ почива́ющаго Свята́го Ду́ха благода́тію, Са́вво святи́телю, лю́демъ твои́мъ проповѣ́далъ еси́ Сы́на собезнача́льна Отцу́ и сопресто́льна, Человѣ́ка бы́вша, человѣ́комъ спасе́ніе содѣва́юща, пою́щимъ: дѣла́ вся́, Го́спода по́йте и превозноси́те Его́ во вѣ́ки.

До́брѣ тече́ніе соверши́въ, къ жела́емому концу́ преста́вился еси́, ра́дуяся. Тѣ́мже свѣтоно́сную твою́ па́мять Це́рковь твоя́, о́тче, соверша́ющи, созыва́етъ преподо́бныя па́стыри же и учи́тели, и́же, просвѣща́еми, пою́тъ: дѣла́ вся́, Го́спода по́йте и превозноси́те Его́ во вѣ́ки.

Ага́ри ча́домъ, пога́нымъ изма́ильтяномъ, внегда́ устремля́тися на ста́до твое́ возбрани́, святи́телю, моли́твами твои́ми, я́ко мно́го дерзнове́ніе ко Христу́ стяжа́вый, да въ ми́рѣ свяще́нную твою́ па́мять соверша́юще, ра́достно пое́мъ: дѣла́ вся́, Го́спода по́йте и превозноси́те Его́ во вѣ́ки.

Богоро́диченъ: Распя́тіе и погребе́ніе, и́же отъ Тебе́ небра́чно, Дѣ́во, про́йде, претерпѣ́въ на́съ ра́ди и муче́ніе, Его́же страсте́мъ ревну́юще, преподо́бніи крестови́дно муче́ніемъ поще́нія Тому́, Чи́стая, послѣ́доваша.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Земля́ отъ свои́хъ нѣ́дръ предаде́ тя́ священнолѣ́пна, цѣ́ла же и неразруши́ма, благоуха́ніемъ и чудесы́ удивля́юща, гра́да жи́тели пе́рстію гро́ба твоего́, проро́чески вопію́щія: пра́ведницы во вѣ́ки живу́тъ.

Ка́мене сапфи́ра облежа́щая пе́рсть страда́льнаго твоего́ тѣ́ла дража́йши, о́тче, показа́ся: цѣле́бна бо, и чудотвори́ва, и па́че зла́та вѣ́рными раздѣля́ема, пою́щими досто́йно: честна́ предъ Го́сподемъ сме́рть святы́хъ Его́.

Царя́ благочести́ва святы́ню и благослове́ніе, твое́ свято́е и честно́е тѣ́ло держа́ща, со́ннымъ явле́ніемъ пода́ти увѣщава́еши, е́же ча́да твоя́ со святи́тели и свяще́нными, я́ко пребога́тое сокро́вище, во своя́ принесо́ша.

Христолюби́вый Владисла́въ самоде́ржецъ, я́ко дре́вле Дави́дъ предъ киво́томъ, предходя́ предъ святы́мъ твои́мъ тѣ́ломъ, ра́довашеся, поя́: вели́читъ душа́ моя́ Го́спода, я́ко даде́ мнѣ́ отца́ и учи́теля. И въ це́ркви свое́й, ра́дуяся, положи́.

Яко ны́нѣ престо́лу Влады́ки своего́ предстоя́ще и отону́дными заря́ми осія́еми, Симео́не богоно́се, Са́вво богому́дре, моли́твами ва́шими, святíи, страсте́й грѣха́ на́съ изба́вите, и пога́ныхъ нахо́да, и разли́чныхъ обстоя́ній.

Богоро́диченъ: Плеща́ми херуви́мскими стра́шными носи́мый Влады́ка, на престо́лѣ я́коже о́гненнѣмъ, въ Твою́, Чи́стая, всели́ся утро́бу и пло́ти прія́тіемъ человѣ́ческое обожи́ существо́. Къ Нему́же спаси́ моли́твами Твои́ми пою́щія Тя́, Ма́терь Его́.

Пѣ́снь 9.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Ра́дуйся, стѣно́ необори́мая; ра́дуйся, покро́ве мíра; ра́дуйся, це́ркви; ра́дуйся, свѣще́; ра́дуйся, престо́ле Бо́жій; ра́дуйся, всѣ́хъ ра́дость и по́моще на враги́ неви́димыя су́щи, Чи́стая, спасе́ніе и ору́жіе непобѣди́мое.

Не забу́ди, Дѣ́во, Неискусобра́чная Невѣ́сто, Твои́хъ ра́бъ, притека́ющихъ къ це́ркви Твое́й: Ты́ бо еди́на еси́ христіа́нъ наде́жда и утвержде́ніе всѣ́мъ, притека́ющимъ Тебѣ́, Чи́стая, на́ша моле́нія, Влады́чице, испо́лни.

Ты́ а́нгеловъ сла́ва и проро́ковъ зерца́ло, патріа́рховъ и апо́столовъ похвала́ свѣ́тлая; Ты́ му́чениковъ Христо́выхъ украше́ніе, по́стниковъ и пра́ведниковъ освяще́ніе красно́ и всего́ мíра ра́дость. Тѣ́мже Тя́ вси́, Чи́стая, по до́лгу пѣ́сньми велича́емъ.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Укра́шенъ, о́тче, вои́стинну добродѣ́тельными дѣя́ніи яви́лся еси́, украси́ся свѣтоно́сная твоя́ па́мять, благода́тными луча́ми на́съ просвѣща́ющи, въ не́йже бѣ́дъ и напа́стей изба́витися твои́ми ко Христу́ моли́твами мо́лимся.

Израсти́вшее тя́ Христу́ оте́чество твое́ ра́дуется, и свѣтлѣ́ется Це́рковь Спа́са и Бо́га, цѣ́ла и благоуха́нна иму́щи тя́, и па́мять твою́ дне́сь ра́достно пра́зднуетъ. Ейже возме́здіе возда́въ, святи́телю, вся́каго озлобле́нія изба́ви ю́.

Моле́ній и пѣ́ній гла́сы услы́ши, іера́рше Христо́въ, вѣ́рѣ же и любви́ вонми́ люде́й твои́хъ, и, я́ко отечестволю́бецъ, проти́вися, о́тче, ко гнѣ́вомъ на́съ вою́ющихъ, и свы́ше покро́въ тво́й да́руй хва́лящимъ тя́.

Богоро́диченъ: Исцѣли́ла еси́ сокруше́ніе, Всенепоро́чная, и ве́тхое страда́ніе земны́хъ, Бо́га поро́ждши, Царя́ Христа́, поне́сшаго пло́тію неду́ги на́ша. Тѣ́мже Тя́, вси́ ро́ди, Дѣ́во Влады́чице, ублажа́юще, Богоневѣ́сто, велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Мно́гъ въ терпѣ́ніи и къ зло́бѣ благоотда́тливъ въ животѣ́ и по сме́рти, о́тче, показа́лся еси́: слукíй бо припо́лзъ и гро́ба твоего́ верху́ возле́гъ, во отмще́нія мѣ́сто здра́ва поста́вилъ еси́, и́же, въ це́ркви ходя́, велича́ше Го́спода.

Преизя́щная ко Христу́ ва́ша любо́вь ны́нѣ объяви́ся благода́тію, да́нною ва́мъ, Симео́не и Са́вво: мо́щи ва́ша благоуха́нны и мѵроточи́вы, па́мять сла́вна и святопочита́ема. Имиже увѣря́еміи, глаго́лемъ: па́мять пра́ведниковъ съ похвала́ми быва́етъ.

Ны́нѣ ви́димыхъ глаго́лемъ, су́щихъ же, я́же лю́бящихъ Бо́га, идѣ́же а́нгели прини́кнути жела́ютъ, я́же ва́мъ досто́йно угото́ванная, о́ко не ви́дѣ, и у́хо не слы́ша, Па́велъ вѣща́етъ, и кто́ пости́жетъ си́хъ изглаго́лати?

Зря́ще а́нгельскія и Боже́ственныя свѣ́тлости и всѣ́хъ святы́хъ ли́ки, Са́вво свяще́нне и Симео́не богоно́се, съ ни́ми моли́те Человѣколю́бца житія́ исправле́ніе и грѣхо́въ оставле́ніе пода́ти хва́лящимъ вѣ́рою ва́шу па́мять.

Оба въ житіи́ единоду́шна, о́ба въ пусты́ни спо́стника, о́ба вы́ше ума́ благи́хъ получи́вша, о́ба Тро́ицѣ ны́нѣ предстоя́ща, обѣ́ма о́бщее хвалосло́віе прино́симъ, е́же пріе́мше, отцы́, пѣвцы́ ва́ша моли́твами ва́шими спаса́йте.

Богоро́диченъ: Еди́на преиму́щая дерзнове́ніе, Влады́чице, за ве́сь мíръ Сы́ну Твоему́ моли́ся. Не помяни́ безчи́сленныхъ собла́знъ на́шихъ, покры́й лю́ди, вопію́щія Ти́ уми́льнымъ гла́сомъ: спаси́, Чи́стая Богоро́дице, Тебе́ досто́йно велича́ющихъ.

Свѣти́ленъ:

Свѣти́льникъ тя́ многосвѣ́тлый, святи́телю, зна́емъ, моли́твы ча́до, пусты́ни воспита́ніе, чистоты́ оби́телище, мона́хомъ спо́стника, ни́щимъ пита́теля, святи́телемъ свѣ́тлость. Тѣ́мже тя́, о́тче, вѣ́рніи, пое́мъ.

Другíй свѣти́ленъ обѣ́ма:

Отъ Восто́ка мы́сленнаго Со́лнца, Христа́, свѣтоза́рныя лучи́ возсія́вшія и мра́чную страну́ на за́падѣ люде́й свои́хъ просвѣти́вшія свѣ́тлостію слове́съ и добродѣ́тели дѣ́ланіемъ, и ны́нѣ не преста́йте Го́споду моля́щеся и сія́ въ ми́рѣ сохрани́ти, Са́вво и Симео́не, па́мять ва́шу почита́ющихъ.

Сла́ва, и ны́нѣ, богоро́диченъ:

Прему́дрость Ѵпоста́сную, и Пресу́щное Сло́во, и Врача́ всѣ́хъ ро́ждшая, Всечи́стая Цари́це, гное́нія и я́звы исцѣли́ ду́шъ на́шихъ и сохраня́й неприкоснове́нны вся́каго нахо́да всегда́ Тя́ моля́щихъ, Засту́пнице мíра.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Отче свяще́нне, Са́вво богому́дре,* воздержа́ніемъ до́брѣ воспита́вся,* въ пресла́вную добродѣ́телей возра́слъ еси́ высоту́,* Христо́вы та́йныя добро́ты взира́я.* Его́же сія́ньми у́мъ тво́й озари́въ,* лю́ди твоя́ просвѣти́лъ еси́,* е́реси отри́нулъ еси́ отъ Це́ркве Христо́вы.* Тѣ́мже свѣти́льника тя́ стяжа́вше,* пресвѣ́тлую твою́ па́мять хва́лимъ,* свяще́нно ублажа́юще.

Вруче́нный тебѣ́ тала́нтъ умно́живъ,* ра́дости сподо́бился еси́ Го́спода твоего́* и ны́нѣ предстои́ши съ ли́ки святи́тель и по́стниковъ,* свяще́нства оде́ждею, преблаже́нне,* и вѣнце́мъ поще́нія укра́шенъ,* благода́тію Боже́ственнаго сія́нія* и заре́ю мы́сленною блиста́я духо́вно.* Отону́дуже просвѣща́й моли́твами твои́ми* пра́зднующихъ, Са́вво, о́тче свяще́нне,* твою́ свѣ́тлую и святу́ю па́мять.

Пріе́мше твоя́ честны́я мо́щи, Са́вво блаже́нне,* вѣ́рою и любо́вію почита́емъ:* орга́нъ бо яви́лся еси́ Свята́го Ду́ха,* возглаша́я несказа́нное спаси́тельное та́инство,* Боже́ственными твои́ми уче́ніи велегла́сно* проповѣ́дающи на́мъ Сло́ва воплоще́ніе,* Его́же чи́стѣе тобо́ю, о́тче, позна́хомъ.* Къ Нему́же ны́нѣ моли́твенника тя́ предлага́емъ,* въ твои́хъ преда́ніихъ сохрани́тися на́мъ.

Сла́ва, гла́съ 6:

Возсія́ солнцеобра́зно святи́теля Христо́ва па́мять, вѣ́рныхъ сердца́ мы́сленно просвѣща́ющи, ю́же и мы́ свѣ́тло соверша́юще дне́сь, моле́бно тому́ возопіе́мъ: ра́дуйся, держа́во цѣлому́дрія, непорабоще́нно души́ соблю́дъ стоя́ніе, воздержа́нія щито́мъ обложи́вся; ра́дуйся, первопа́стырю и учи́телю христоимени́тыхъ люде́й свои́хъ; ра́дуйся, церко́вное украше́ніе, архіере́евъ добро́то и мона́ховъ похвало́, Са́вво преосвяще́нне и всеблаже́нне о́тче, Христа́ Бо́га моли́ непреста́нно ми́ръ посла́ти вселе́ннѣй и спасти́ся душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Та́же, Славосло́віе вели́кое. И дае́тся еле́й бра́тіи отъ канди́ла свята́го.

Пою́ще вку́пѣ стихи́ры, гла́съ 5, самогла́сны:

Пріиди́те, христолюби́віи вси́, пріиди́те, пра́здникъ па́мяти соверша́юще, Са́вву, священнопроповѣ́дника Ева́нгелія пѣ́сньми восхва́лимъ, реку́ще: ра́дуйся, пото́че слове́сный мы́сленнаго рая́, и́же бразды́ серде́цъ на́шихъ, духо́вными вода́ми Бо́жіихъ слове́съ напои́въ, плодоно́сны показа́ Христу́ Бо́гу, подаю́щему всѣ́мъ проще́ніе и ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, благовѣ́рія наста́вниче, Боже́ственныхъ повелѣ́ній служи́телю, богосвѣ́тлый же свѣти́льниче, и́же во мра́цѣ невѣ́дѣнія сердца́ вше́дшая богоглаго́ливыми словесы́ просвѣти́въ, къ свѣ́ту Святы́я Тро́ицы возве́лъ еси́, Са́вво, о́тче богоно́се, Се́рбская похвало́ и удобре́ніе. И ны́нѣ, предстоя́ Христу́ Бо́гу, моли́ся о творя́щихъ святу́ю твою́ па́мять.

Сла́ва, гла́съ 8:

Умъ впери́въ, а́може духо́вными возлетѣ́лъ еси́ кри́лы къ высотѣ́ Бо́жія ра́зума, тогда́ же и отца́ земна́го оста́вивъ, Небе́снаго возлюби́лъ еси́. Но и ро́ждшаго тя́ пло́тію духо́внѣ породи́лъ еси́, и Небе́сному Отцу́ присво́илъ еси́, и обою́ду у Него́ просла́вилъ еси́, на небесѣ́хъ су́щихъ бла́гъ наслади́лъ еси́ его́, на земли́ же тѣ́ло его́ че́стно и мѵроточи́во моли́твами твои́ми устро́илъ еси́ и лю́ди твоя́ вѣ́рою просвѣти́лъ еси́. Тѣ́мъ и апо́стольскихъ даро́въ досто́йна яви́ тя́ прославля́емый тобо́ю Христо́съ, имѣ́яй ве́лію ми́лость.

И ны́нѣ, пра́здника, или́ богоро́диченъ:

Азъ, Дѣ́во Свята́я Богоро́дице, [къ покро́ву Твоему́ прибѣга́ю: вѣ́мъ, я́ко обря́щу Тобо́ю спасе́ніе, мо́жеши бо, Чи́стая, помощи́ мнѣ́.]


НА ЛИТУРГІИ,

Блаже́нна отъ кано́на 2-го гла́са, пѣ́снь 3-я, и 8-го гла́са, пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ ко Евре́омъ, зача́ло 318. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.] Ева́нгеліе отъ Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 178 – 193 об.

/ Къ оглавленію раздѣла /


Наверхъ / Къ титульной страницѣ

0