Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба св. муч. Татіанѣ приводится въ соединеніи съ общей службой мученицѣ единой.       

Мѣ́сяца Іаннуа́рія въ 12-й де́нь.
Слу́жба («поліеле́йная») святѣ́й му́ченицѣ Татіа́нѣ.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифонъ. На Го́споди воззва́хъ: стихи́ры пра́здника 3, гла́съ 8. Подо́бенъ: Го́споди, а́ще и на суди́щи.

Го́споди,* а́ще и крести́тися претерпѣ́лъ еси́ пло́тію, Безгрѣ́шне,* свободи́ти мíръ отъ грѣха́ хотя́,* но Бо́га Тя́ мы́ вѣ́дуще, сла́вимъ:* крести́вся бо, изба́вилъ еси́ отъ рабо́ты* ду́ши на́ша.

Го́споди,* егда́ на Іорда́нскія струи́,* воплоти́вся, прише́лъ еси́,* да освяти́ши во́ду* сла́внымъ Твои́мъ креще́ніемъ,* Іоа́нну Тво́й ве́рхъ* преклони́ти изво́лилъ еси́* и креща́ешися отъ раба́,* да спасе́ши ду́ши на́ша.

Го́споди,* спасти́ восхотѣ́въ отъ ле́сти мíръ,* его́же созда́лъ еси́,* изъ Неискусобра́чныя Дѣ́вы* воплоти́тися изво́лилъ еси́,* и Ада́ма отъ тли́ изба́вилъ еси́,* я́ко Человѣколю́бецъ,* и, крести́вся же, дарова́лъ еси́* просвѣще́ніе душа́мъ на́шимъ.

Ины стихи́ры святы́я 5, гла́съ 2. Подо́бенъ: Егда́ отъ дре́ва.

Егда́ Ду́ха свѣ́томъ осіява́ема бога́тно, бога́тство возненави́дѣла еси́, еди́но возлюби́вши небе́сное, въ му́ченическую крѣ́пость я́вѣ облекла́ся еси́ и къ безмѣ́рнымъ болѣ́знемъ отлучи́лася еси́. Тѣ́мже, врага́ низложи́вши, побѣ́ды исплела́ еси́ вѣнцы́, му́ченице страстоте́рпице пресла́вная. [Два́жды.]

Егда́ смра́дъ пло́ти и грѣха́ пла́мень, честна́я, угаси́ла еси́ росо́ю Боже́ственнаго Ду́ха, содѣ́йствующаго тебѣ́, тогда́ звѣ́ри обузда́ла еси́ посредѣ́ суди́ща, тѣ́ло твое́ преда́вши на ра́ны му́жески. Тѣ́мже, врага́ низложи́вши, побѣ́ды исплела́ еси́ вѣнцы́, о Татіа́но богоблаже́нная. [Два́жды.]

Ни ме́чь, ни о́гнь, ни ра́ны, ни ско́рби, ни гла́дъ, ни вся́кій ви́дъ муче́нія, твоего́, е́же ко Го́споду, притупи́ша раче́нія: разжже́ннымъ бо се́рдцемъ Того́ и́щущи, вся́ ви́димая еди́нощи оплева́ла еси́, му́ченице, и вну́трь Боже́ственнаго черто́га всели́лася еси́, невѣ́ста всѣ́хъ Царя́ бы́вши.

Сла́ва, святы́я, гла́съ 5:

Дѣ́вства твоего́ красоты́, восхотѣ́ Ца́рь сла́вы Христо́съ, я́ко непоро́чну тя́ невѣ́сту Себѣ́ обручи́, совокупле́ніемъ нетлѣ́ннымъ, и́бо во́лею Свое́ю пода́въ добро́тѣ твое́й си́лу, на враги́ же и стра́сти непобѣди́му показа́, претерпѣ́вшую ра́ны го́рькія, и му́ки свирѣ́пыя, сугу́бымъ вѣнце́мъ увязе́ тя, и поста́ви одесну́ю Себе́ я́ко цари́цу испещре́ну. Того́ моли́, му́ченице честна́я и многострада́льная, Татіа́но, пѣвце́мъ твои́мъ спасе́ніе и жи́знь пода́ти, и ве́лію ми́лость.

И ны́нѣ, пра́здника, гла́съ то́йже:

Зря́щи Тя́ естество́ вся́кое земноро́дныхъ на́га въ вода́хъ, Содѣ́теля, креще́нія прося́ща, измѣня́шеся стра́хомъ и ужаса́шеся. Предте́ча же тре́петомъ содержи́мь бя́ше, не смѣ́я прибли́житися Тебѣ́. Мо́ре побѣже́, Іорда́нъ струи́ возврати́. Го́ры взыгра́шася, зря́ще, и а́нгельскія си́лы удивля́хуся, глаго́люще: о, чудесе́! Спа́съ обнажа́ется, одѣ́яти хотя́ во спасе́ніе человѣ́ки и обновле́ніе.

Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры пра́здника, гла́съ 6. Подо́бенъ: Ангельскія.

Ны́нѣ проро́чески возопіи́мъ Го́споду: яви́лся еси́ на́мъ, Спа́се на́шъ и Зижди́телю, сокруши́лъ же еси́, Сло́ве, зміе́въ уста́ во Іорда́нѣ, я́ко Ще́дръ, и ослѣпле́нныя свѣ́томъ Твои́мъ, Христе́, просвѣти́лъ еси́. Благослове́нъ, явле́йся Бо́же на́шъ, сла́ва Тебѣ́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Держа́ву на враги́ креще́ніемъ Твои́мъ, Сло́ве, да́лъ еси́ на́мъ, любо́вію чту́щимъ Твое́ смотре́ніе, е́же во́лею соверши́лъ еси́, разрѣши́въ человѣ́ки отъ кля́твы, во Еде́мѣ пребы́вшія. Ему́же пое́мъ: благослове́нъ, явле́йся Бо́же на́шъ, сла́ва Тебѣ́.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

Иже о Ада́мѣ въ ри́зы ко́жныя во́лею иногда́ обле́кшіися паде́ніемъ, въ струя́хъ Іорда́нскихъ совле́кшеся дне́сь креще́ніемъ Госпо́днимъ, богосло́вяще со а́нгелы, Тому́ возопіе́мъ: благослове́нъ, явле́йся Бо́же на́шъ, сла́ва Тебѣ́.

Сла́ва, святы́я, гла́съ 6. Самогла́сенъ:

Одесну́ю Спа́са предста́ дѣ́ва, и страстоте́рпица и му́ченица Татіа́но, одѣ́яна добродѣ́тельми непобѣжде́на, и преукра́шена еле́емъ чистоты́, и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами, низпосли́ на́мъ, всеси́льне Спа́се, ми́лости Твоя́.

И ны́нѣ, пра́здника, гла́съ то́йже. Самогла́сенъ:

Воспои́мъ, вѣ́рніи, е́же о на́съ Бо́жія благодѣя́нія вели́чество: о на́шемъ бо прегрѣше́ніи бы́въ Человѣ́къ, на́шимъ очище́ніемъ очища́ется во Іорда́нѣ, еди́нъ Чи́стый и Нетлѣ́нный, освяща́яй мене́ и во́ды и главы́ зміе́въ сокруша́яй въ водѣ́. Почерпе́мъ у́бо во́ду съ весе́ліемъ, бра́тіе: благода́ть бо Ду́ха вѣ́рно почерпа́ющимъ неви́димо подава́ется отъ Христа́ Бо́га и Спа́са ду́шъ на́шихъ.

Тропа́рь святы́я, гла́съ 2:

Агнцу Пречи́стому и Па́стырю послѣ́дуя, а́гнице слове́сная Татіа́но, мы́сленныхъ звѣре́й не убоя́лася еси́, но зна́меніемъ кре́стнымъ вооружи́вшися, до конца́ тѣ́хъ низложи́ла еси́, и вошла́ въ небе́сную огра́ду, идѣ́же помяни́ и на́съ, му́ченице Христо́ва многочу́дная [1].

Сла́ва, и ны́нѣ, пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святы́я. И ны́нѣ, пра́здника.

По 1-й стихоло́гіи сѣда́ленъ святы́я, гла́съ 5. Подо́бенъ: Собезнача́льное.

Благоче́стно порабо́тившися Вседержи́телю, злочести́вому же мучи́телю не порабо́тилася еси́, честна́я, но претерпѣ́ла еси́ тве́рдо те́мное заключе́ніе, и ра́нъ разжже́ніе, и преста́вилася еси́ къ Бо́гу, богому́драя му́ченице, Татіа́но, моли́ся о на́съ, соверша́ющихъ па́мять твою́. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

Іорда́не рѣко́, что́ удиви́лся еси́, зря́ Неви́димаго на́га? Ви́дѣхъ и вострепета́хъ, рече́: и ка́ко бо Сего́ не хотѣ́хъ устраши́тися и заити́? Ангели Его́ устраши́шася, зря́ще, ужасе́ся не́бо, и земля́ вострепета́, и смяте́ся мо́ре и вся́ ви́димая и неви́димая. Христо́съ яви́ся на Іорда́нѣ освяти́ти во́ды.

По 2-й стихоло́гіи сѣда́ленъ святы́я, гла́съ 1. Подо́бенъ: Гро́бъ Тво́й.

Муче́ній о́гнь, Ду́ха росо́ю погаси́ла еси́, честна́я, и къ Свѣ́ту преста́вилася еси́ боже́ственному и невеще́ственному, и по кончи́нѣ блаже́ннѣй источа́еши исцѣле́ній ка́пли, Татіа́но, уставля́ющи разжже́ніе страсте́й си́лою духо́вною. [Два́жды.]

Сла́ва, и ны́нѣ, пра́здника, гла́съ 8. Подо́бенъ: Свирѣ́лей па́стырскихъ.

Креща́ется Христо́съ, просвѣща́яй мíръ, съ высоты́ Оте́цъ свидѣ́тельствова, глаго́ля: Се́й е́сть Сы́нъ Мо́й, въ Не́мже благоизво́лихъ, Того́ послу́шайте. Се́й е́сть просвѣща́яй вселе́нную благоутро́біемъ Свои́мъ, крести́выйся и спасы́й я́ко Бо́гъ ро́дъ человѣ́ческій.

Поліеле́й.

Велича́ніе: Велича́емъ тя́, страстоте́рпице Христо́ва Татіа́но, и чте́мъ честно́е страда́ніе твое́, е́же за Христа́ претерпѣ́ла еси́.

Псало́мъ избра́нный: Бо́гъ на́мъ прибѣ́жище и си́ла, Помо́щникъ въ ско́рбехъ, обрѣ́тшихъ ны́ зѣло́...

По поліеле́и сѣда́ленъ святы́я, гла́съ 4. Подо́бенъ: Вознесы́йся на Кре́стъ.

Прише́дшую Христу́ во́лею, и украси́вшую добродѣ́тельми се́рдце, благолѣ́пно воспои́мъ, Татіа́но, вѣ́рныхъ мно́жество: та́ бо посрами́ мучи́тельскую де́рзость, и просія́вши я́ко со́лнце посредѣ́ беззако́нникъ, по кончи́нѣ яви́ся земны́мъ подтвержде́ніе боже́ственное, вку́пѣ и держа́ва. [Два́жды.]

Сла́ва, и ны́нѣ, пра́здника, гла́съ то́йже. Подо́бенъ: Удиви́ся Іо́сифъ.

Пріиди́те, уви́димъ, вѣ́рніи, гдѣ́ крести́ся Христо́съ, да послѣ́дуимъ про́чее ко Іорда́ну рѣцѣ́, ко гла́су вопію́щаго въ пусты́ни, и уви́димъ та́мо Содѣ́теля Ада́мова, дла́нію ра́бскою рукополага́ема за благоутро́біе неизрече́нное, и къ Нему́ велегла́сно возопіи́мъ: прише́лъ еси́ и яви́лся еси́ во Іорда́нѣ освяти́ти во́ды.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Ма́рка, зача́ло 21.

По 50-мъ псалмѣ́ стихи́ра, гла́съ 6:

Одесну́ю Спа́са предста́ дѣ́ва, и страстоте́рпица и му́ченица, Татіа́но, одѣ́яна добродѣ́тельми непобѣжде́на, и преукра́шена еле́емъ чистоты́, и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами, низпосли́ на́мъ, всеси́льне Спа́се, ми́лости Твоя́.

Кано́нъ пра́здника со ирмосо́мъ на 6 и святы́я на 8.

Кано́нъ пра́здника, гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.

Кано́нъ святы́я, творе́ніе Игна́тіево. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Му́ченическими озаре́на свѣтлостьми́, чи́стому предстои́ши, му́ченице, Жениху́ твоему́, душетлѣ́нныхъ прегрѣше́ній прося́щи изба́витися хва́лящимъ тя́.

Бога́тство тлѣ́нное, му́ченице, соверше́нно пренебрегла́ еси́, на небесѣ́хъ нетлѣ́нное и пребыва́ющее и́щущи усе́рдно, и, ра́дующися, прошла́ еси́ му́ченическое страда́ніе.

Къ ра́намъ, къ болѣ́знемъ и біе́ніемъ многови́днымъ безбоя́зненно, му́ченице, отлучи́лася еси́: споспѣшеству́ющую бо имѣ́ла еси́ благода́ть Спа́сову и укрѣпля́ющую тя́.

Богоро́диченъ: Исто́чникъ безстра́стія ро́ждшая, уя́звеннаго страстьми́, Отрокови́це, исцѣли́ и огня́ вѣ́чнаго исхи́ти мя́, Еди́на Богоблагода́тная.

Катава́сія пра́здника.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Не поколеба́ столпа́ твоего́ се́рдца сте́кшее му́къ треволне́ніе, утверди́ся бо на ка́мени любве́ Христо́вы, всехва́льная, къ Нему́же взыва́ла еси́: я́ко нѣ́сть свя́тъ, па́че Тебе́, Го́споди.

Человѣ́ческую не́мощь Понесы́й, впери́ си́лою не́мощь твою́ на некрѣ́пкаго змíя. Тѣ́мъ, му́ченице, на зе́млю низве́ргла еси́, вѣ́рно зову́щи: я́ко нѣ́сть свя́тъ, па́че Тебе́, Го́споди.

Пото́ки изсуши́ла еси́ беззако́нія струя́ми крове́й твои́хъ, блаже́нная, сла́дости же пото́ка ны́нѣ наслажда́ешися и во Свѣ́тѣ невече́рнѣмъ обита́еши, зову́щи: я́ко нѣ́сть свя́тъ, па́че Тебе́, Го́споди.

Богоро́диченъ: Зача́тіе и рождество́ Твое́ па́че сло́ва, вѣ́ки бо Созда́вшаго сло́вомъ родила́ еси́, Изба́вльшаго безслове́сія мíра концы́, Отрокови́це Неискусому́жная, Его́же моли́ всегда́, е́же спасти́ на́съ.

Конда́къ пра́здника, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Сѣда́ленъ святы́я, гла́съ 4. Подо́бенъ: Ско́ро предвари́.

Сугу́бъ соверши́вши, му́ченице, по́двигъ на земли́, сугу́бъ и вѣне́цъ сподо́билася еси́ прія́ти отъ руки́ Жениха́ твоего́: пости́лася бо еси́, стра́сти плотскíя обузда́ющи, пострада́вши же зако́нно, врага́ низложи́ла еси́. Тѣ́мже мольба́ми твои́ми спаси́ ны отъ напа́стей. [Два́жды.]

Сла́ва, и ны́нѣ, пра́здника, гла́съ и подо́бенъ то́йже:

Свѣ́томъ, я́ко ри́зою, одѣя́йся, струя́ми одѣва́ется Іорда́нскими Христо́съ Бо́гъ на́шъ, свы́ше свидѣ́тельствующу Отцу́ сопресто́льнаго, до́лѣ прише́дшу Ду́ху сла́вы: То́й е́сть Просвѣща́яй и Освяща́яй на́съ.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Красно́ душе́вное устрое́ніе благолѣ́піемъ благоче́стія Татіа́на нося́щи, еще́ же муче́нія свѣ́томъ пресла́вно сія́ющи, къ чи́стому Жениху́ вселя́ется.

Желѣ́зомъ твое́ лице́ стру́жущія пребеззако́нныя невидѣ́ніемъ небе́сніи а́нгели му́чаху, по́сланніи къ твое́й отъ Бо́га, му́ченице, по́мощи, и́же твоему́ терпѣ́нію удиви́шася.

Зако́нно Христа́ проповѣ́дающи, побѣди́ла еси́ пребеззако́ннующія, же́ртва же непоро́чна благопрія́тна соверше́ннѣйшая Тому́ принесла́ся еси́, взыва́ющи: Тебе́ лю́бящи, Спа́се, закала́юся.

Богоро́диченъ: Ко приста́нищу ти́хому мя́ напра́ви, Богоневѣ́сто Всесвята́я: бу́ря бо мя́ волну́етъ и смуще́ніе грѣха́ лю́тѣ, вѣ́тры коле́блемь лука́выхъ духо́въ, оскорбля́ющихъ мя́.

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Твою́ честну́ю и блаже́нную стра́сть подража́ющи, безстра́стіемъ Тебѣ́ сочта́вшаяся стра́ждетъ преусе́рдно, на у́ды ссѣка́емая, Жизнода́вче Христе́, зову́щи: ино́го, ра́звѣ Тебе́, Бо́га не зна́ю.

Стра́хъ Бо́жій во утро́бѣ мы́слію пріе́мши, ду́хъ спаси́тельнаго исповѣ́данія и муче́нія родила́ еси́ пресла́вно, доблему́драя, тве́рдымъ страда́ніемъ и сопроти́вная нача́ла посрами́ла еси́.

Свѣ́тлыми сія́еши заря́ми, уясня́ема Ду́ха Свята́го свѣтоли́тіемъ, и озаря́еши вѣ́рныхъ сердца́, грѣхо́вный мра́къ разоря́ющи, му́ченице, страстоте́рпице Христо́ва досточу́дная.

Богоро́диченъ: Свѣ́тлый Со́лнца Облаче, осія́й ми́ зарю́, рѣша́щу мра́къ мои́хъ прегрѣше́ній, да́ждь ми́ ру́ку, впа́дшему въ ти́ну грѣхо́вную, воздви́гни мя́, лежа́щаго, Еди́на па́дшаго Ада́ма исправле́ніе.

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

На дре́вѣ я́ко позна́ просте́рта Тя́ му́ченица честна́я, терпи́тъ повѣ́шеніе и строга́нія тѣле́сная за любо́вь Твою́, Всемо́щне.

Сверѣ́пѣйшіи звѣ́ріе устыдѣ́шася посреди́ три́знища му́жески стра́ждущія тя́, я́коже Ѳе́клы пе́рвѣе первому́ченицы, ея́же ре́вность стяжа́ла еси́, приснопа́мятная.

Предста́вше небе́сніи а́нгели посреди́ темни́цы, тя́ свѣ́томъ осія́ша, отъ болѣ́зней изыма́юще и я́ко Бо́жію а́гницу прославля́юще.

Богоро́диченъ: Отъ всѣ́хъ родо́въ избра́ Тя, добро́ту Іа́ковлю, Юже возлюби́ Творе́цъ, Всенепоро́чная, и изъ Тебе́, возсія́въ, яви́ся.

Конда́къ му́ченицы, гла́съ 4. Подо́бенъ: Яви́лся еси́ дне́сь.

Свѣ́тло во страда́ніи твое́мъ возсія́ла еси́, страстоте́рпице, отъ крове́й твои́хъ преиспещре́на, и, я́ко кра́сная голуби́ца къ небеси́ возлетѣ́ла еси́, Татіа́но, тѣ́мже моли́ при́сно за чту́щія тя́.

Икосъ.

Уневѣ́стившуюся Христу́ муче́ніемъ, Татіа́но, соше́дшеся, почти́мъ досто́йно, я́ко да тоя́ моли́твами, душетлѣ́нныя па́губы изба́вльшеся, губи́тельства, тру́са и паде́жа, житіе́ во смире́ніи препрово́димъ, сподо́бльшеся со всѣ́ми святы́ми, отъ вѣ́ка Бо́гу благоугоди́вшими, ходи́ти во свѣ́тѣ, и пѣ́ти съ си́ми: удиви́лъ еси́, Спа́се, Твоя́ ми́лости всѣ́мъ человѣ́комъ, вѣ́рою хва́лящимъ ю́. Тѣ́мже зове́мъ е́й: моли́ непреста́нно о всѣ́хъ на́съ.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси́ вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Благомо́щно непобѣди́мая, сѣ́чема, сосце́въ отъя́тія претерпѣ́ла еси́ терпѣли́вѣйше, огне́мъ же небе́снымъ, му́ченице, попали́ла еси́ чти́ти не хотя́щія Бо́га, Его́же вся́ тва́рь пое́тъ, сла́вящи.

Въ се́рдцы нося́щи о́гнь Боже́ственныя любве́, непоро́чная, пла́мень попра́, огня́ подобора́бнаго не ужасе́ся, отроко́въ образу́ющи дре́внихъ и му́жество и крѣ́пость.

Звѣре́й сверѣ́пство тебѣ́ повине́ся, льво́въ зія́нія невре́дно премину́ла еси́, Бо́гу тя́ просла́вльшу, Того́ просла́вившую, Его́же страда́нія твое́ю исполня́ющи пло́тію, всехва́льная.

Богоро́диченъ: Жи́знь Ѵпоста́сную на́мъ ро́ждши, сме́ртію сме́рть я́вѣ потре́бльшую, стра́сти умертви́ пло́ти на́шея вѣ́рою чту́щихъ Тя́, Чи́стая, я́ко Богоро́дицу и Всесла́вную.

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Удобри́вшися добродѣ́тельми, украси́лася еси́ добро́тами муче́нія и Жениху́ обручи́лася еси́, па́че всѣ́хъ человѣ́ковъ краснѣ́йшему, добро́тою сія́ющему безсме́ртія, Татіа́но богому́драя.

Съ безпло́тными слуга́ми въ темни́цѣ Творца́ славосло́вила еси́, сія́ющи сла́вою Боже́ственнаго блиста́нія и всѣ́мъ непристу́пна пребыва́ющи, держи́мымъ тмо́ю пре́лести.

Сокруше́ніе твои́хъ уде́съ истни́ враго́въ кова́рства, крове́й тече́ніе нече́стія лю́тыя пото́ки, честна́я, изсуши́, пучи́на чуде́съ на́мъ я́вльшися.

Богоро́диченъ: Спаси́, уще́дри ны́, ще́драго Бо́га на́мъ Спа́са ро́ждшая па́че сло́ва, огнепа́льныхъ помышле́ній и страсте́й изыма́ющи зно́я Твои́ми моли́твами, Чи́стая, Препросла́вленная.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

По мно́гихъ му́кахъ ме́чнымъ тя́ судо́мъ лю́тый осужда́етъ судія́, ея́же восхожде́нію восплеска́ша небе́сніи чи́ни. Христо́съ же всеси́льною десни́цею вѣнча́ тя, му́ченице, зако́нно пострада́вшую.

Сочта́ся съ му́ченическими свѣтлѣ́йшими ста́ды, яснѣ́йши прибли́жившися Бо́гу, ви́диши, я́же ви́дятъ а́нгели, я́ко дѣ́ва въ черто́зѣ водворя́ешися. Жениха́ твоего́, честна́я, моля́щи, спасти́ся любо́вію тя́ почита́ющимъ.

Запеча́танный исто́чникъ тя́, заключе́нъ же огра́дъ, возложе́ніе че́стно и свяще́нно, невѣ́сту Христо́ву нетлѣ́нную, заколе́ніе и же́ртву, а́гницу и до́брую голуби́цу Влады́ки вся́ческихъ, Татіа́но, проповѣ́дуемъ.

Богоро́диченъ: Гла́сы прекланя́ема те́плѣ Тя́ моля́щихъ, Еди́на вѣ́рныхъ Прибѣ́жище, спаси́, уще́дри, Влады́чице, соблюди́ отъ вре́да и вся́каго язы́ковъ наше́ствія вѣ́рою и любо́вію при́сно Тя́ велича́ющія.

Свѣти́ленъ святы́я:

Яко невѣ́ста украси́лася еси́ добро́тою, обручи́вшися Жениху́ страстьми́ добротво́рными; вну́трь же черто́га свѣтови́дна, я́ко избра́нная всели́лася еси́, нося́щи свѣщу́ дѣви́ческую, и ны́нѣ ца́рствуеши съ Живу́щимъ во вѣ́ки, Татіа́но, сія́ющи. [Два́жды.]

Сла́ва, и ны́нѣ, пра́здника. Подо́бенъ: Посѣти́лъ ны́.

Яви́ся Спа́съ, благода́ть и и́стина, во струя́хъ Іорда́нскихъ и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

На хвали́техъ стихи́ры пра́здника, гла́съ 6. Подо́бенъ: Ангельскія.

Сія́ніе отъ Свѣ́та, Свѣ́тъ сы́й, Іису́се мо́й, просвѣти́лъ еси́ на́съ неизрече́ннымъ Твои́мъ осія́ніемъ, пре́жде ослѣпле́нныя во Еде́мѣ отъ змíя, во Іорда́нѣ ны́нѣ Свѣ́тъ вси́ Свѣ́томъ Твои́мъ зря́ще, вѣ́рно пое́мъ: благослове́нъ, явле́йся Бо́же на́шъ, сла́ва Тебѣ́.

Таи́нниче и стра́шныхъ строи́телю та́инъ, Предте́че ра́дости и Ду́ха самови́дче, кре́щшагося Сло́ва отъ тебе́, я́ко благоволи́, проси́ на́мъ согрѣше́ній избавле́ніе при́сно пода́ти, Ему́же пое́мъ: благослове́нъ, явле́йся Бо́же нашъ, сла́ва Тебѣ́.

Вознесе́мъ, вѣ́рніи, въ ра́зумѣ се́рдца, потеце́мъ со тща́ніемъ къ струя́мъ Іорда́нскимъ, и уви́димъ Зижди́теля, пло́тски креща́ема отъ Іоа́нна Предте́чи, и, съ ни́мъ богосло́вяще, воспои́мъ: благослове́нъ, явле́йся Бо́же на́шъ, сла́ва Тебѣ́.

Ины стихи́ры святы́я, самогла́сны, гла́съ 3:

Страда́льческое торжество́, вѣ́рніи, богому́дреннѣ соверша́емо, ви́дяще, чу́дному въ совѣ́тѣхъ Бо́гу на́шему, благода́рственное пѣснопѣ́ніе воспои́мъ: неви́димую бо держа́ву проти́вныя си́лы, въ же́нстѣмъ естествѣ́ побѣди́, и Боже́ственную Свою́ си́лу въ не́мощи соверши́въ доброму́ченицы; тоя́ моли́твами спаса́етъ ду́ши на́ша.

Истины ча́шу отъ свои́хъ крове́й страда́льческихъ всехва́льная му́ченица Христо́ва, Татіа́но, раствори́вши и сію́ всегда́ предлага́ющи Це́ркви, въ не́йже церко́вныя пито́мцы, му́дрости гла́сомъ созыва́етъ, глаго́лющи: почерпи́те пи́во Воскресе́нія свидѣ́тельное, невѣ́рныхъ прогони́тельное, и страсте́й чисти́тельное, благочести́вымъ же душа́мъ храни́тельно, Спа́су зову́ще: напои́вый на́съ пото́комъ сла́дости Ду́ха, спаси́ ду́ши на́ша.

Иже Кро́вію Христо́вою ду́ши запеча́тавше въ де́нь избавле́нія, кро́вь святу́ю, отъ му́ченическаго исто́чника востека́ющую на́мъ, съ весе́ліемъ духо́внымъ проро́чески почерпе́мъ, живото́чныхъ страсте́й Спа́совыхъ, и присносу́щныя сла́вы образова́тельну. Тѣ́мже Ему́ возопіи́мъ: прославля́яйся во святы́хъ Твои́хъ, Го́споди, пресла́вныя Твоея́ страстоте́рпицы моли́твами, спаси́ ду́ши на́ша.

Сла́ва, святы́я, гла́съ 6:

Страда́льческимъ ше́ствовавши путе́мъ, мучи́тельскаго избѣжа́ла еси́ совѣ́та, Татіа́но, всечестна́я: я́ко дѣ́ва, у́бо мудра́, свѣшу́ нося́щи вошла́ еси́ во дворы́ Го́спода твоего́; я́ко му́ченица му́жествомъ, благода́ть прія́ла еси́ исцѣли́ти плотскíя стра́сти. Но и на́съ, воспѣва́ющихъ тя́, душе́вныхъ болѣ́зней изба́ви, я́же къ Бо́гу мольба́ми твои́ми.

И ны́нѣ, пра́здника, гла́съ то́йже. Подо́бенъ: Ангельскія.

О, па́че ума́ Боже́ственнаго смотре́нія! Ка́ко Творе́цъ тва́ри предста́ и преклоня́етъ сему́ главу́? Указа́ніемъ бо на́мъ о́бразъ смире́нія вво́дитъ, и́же о Не́мъ просвѣще́ннымъ, Ему́же пое́мъ: благослове́нъ, явле́йся Бо́же на́шъ, сла́ва Тебѣ́.


НА ЛИТУРГІИ,

Блаже́нна пра́здника, пѣ́снь 7-я на 6, и святы́я, пѣ́снь 6-я, на 4. Проки́менъ пра́здника, гла́съ 4: Благослове́нъ гряды́й во и́мя Госпо́дне, Бо́гъ Госпо́дь и яви́ся на́мъ. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. И святы́я, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Апо́столъ святы́я, ко Ефесе́емъ, зача́ло 233: Бра́тіе, возмога́йте о Го́сподѣ... [2] Аллилу́ія пра́здника, гла́съ 4: Принеси́те Го́сподеви сы́нове Бо́жіи, принеси́те Го́сподеви сы́ны о́вни. Сти́хъ: Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. И святы́я, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. Ева́нгеліе святы́я, отъ Луки́, зача́ло 106: Рече́ Госпо́дь Свои́мъ ученико́мъ: внемли́те отъ человѣ́къ... Прича́стенъ пра́здника: Яви́ся благода́ть Бо́жія спаси́тельная всѣ́мъ человѣ́комъ. И святы́я: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Примѣчанія:
[1] Тропарь св. муч. Татіанѣ приводится по изданію: Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Иліи́нской, 1763. Л. 454-454 об.».
[2] Апостольскіе и Евангельскіе чтенія тѣ же, что и св. велмучц. Екатеринѣ.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 171 об. – 178.

Дополнено по изданію: Мине́а Общая. — Кíевъ: Въ тѵпогра́фіи Кíево-Пече́рской Ла́ѵры, 1864. — Л. 64 об. – 67 об.

/ Къ оглавленію раздѣла /


Наверхъ / Къ титульной страницѣ

0